੬. ਸਭਿਯਸੁਤ੍ਤਂ

ਏਵਂ ਮੇ ਸੁਤਂ – ਏਕਂ ਸਮਯਂ ਭਗਵਾ ਰਾਜਗਹੇ ਵਿਹਰਤਿ ਵੇਲ਼ੁਵਨੇ ਕਲਨ੍ਦਕਨਿਵਾਪੇ. ਤੇਨ ਖੋ ਪਨ ਸਮਯੇਨ ਸਭਿਯਸ੍ਸ ਪਰਿਬ੍ਬਾਜਕਸ੍ਸ ਪੁਰਾਣਸਾਲੋਹਿਤਾਯ ਦੇਵਤਾਯ ਪਞ੍ਹਾ ਉਦ੍ਦਿਟ੍ਠਾ ਹੋਨ੍ਤਿ – ‘‘ਯੋ ਤੇ, ਸਭਿਯ, ਸਮਣੋ ਵਾ ਬ੍ਰਾਹ੍ਮਣੋ ਵਾ ਇਮੇ ਪਞ੍ਹੇ ਪੁਟ੍ਠੋ ਬ੍ਯਾਕਰੋਤਿ ਤਸ੍ਸ ਸਨ੍ਤਿਕੇ ਬ੍ਰਹ੍ਮਚਰਿਯਂ ਚਰੇਯ੍ਯਾਸੀ’’ਤਿ.

ਅਥ ਖੋ ਸਭਿਯੋ ਪਰਿਬ੍ਬਾਜਕੋ ਤਸ੍ਸਾ ਦੇਵਤਾਯ ਸਨ੍ਤਿਕੇ ਤੇ ਪਞ੍ਹੇ ਉਗ੍ਗਹੇਤ੍ਵਾ ਯੇ ਤੇ ਸਮਣਬ੍ਰਾਹ੍ਮਣਾ ਸਙ੍ਘਿਨੋ ਗਣਿਨੋ ਗਣਾਚਰਿਯਾ ਞਾਤਾ ਯਸਸ੍ਸਿਨੋ ਤਿਤ੍ਥਕਰਾ ਸਾਧੁਸਮ੍ਮਤਾ ਬਹੁਜਨਸ੍ਸ, ਸੇਯ੍ਯਥਿਦਂ – ਪੂਰਣੋ ਕਸ੍ਸਪੋ ਮਕ੍ਖਲਿਗੋਸਾਲੋ ਅਜਿਤੋ ਕੇਸਕਮ੍ਬਲੋ ਪਕੁਧੋ [ਕਕੁਧੋ (ਸੀ.) ਪਕੁਦ੍ਧੋ (ਸ੍ਯਾ. ਕਂ.)] ਕਚ੍ਚਾਨੋ ਸਞ੍ਚਯੋ [ਸਞ੍ਜਯੋ (ਸੀ. ਸ੍ਯਾ. ਕਂ. ਪੀ.)] ਬੇਲਟ੍ਠਪੁਤ੍ਤੋ [ਬੇਲ੍ਲਟ੍ਠਿਪੁਤ੍ਤੋ (ਸੀ. ਪੀ.), ਵੇਲ਼ਟ੍ਠਪੁਤ੍ਤੋ (ਸ੍ਯਾ.)] ਨਿਗਣ੍ਠੋ ਨਾਟਪੁਤ੍ਤੋ [ਨਾਤਪੁਤ੍ਤੋ (ਸੀ. ਪੀ.)], ਤੇ ਉਪਸਙ੍ਕਮਿਤ੍ਵਾ ਤੇ ਪਞ੍ਹੇ ਪੁਚ੍ਛਤਿ. ਤੇ ਸਭਿਯੇਨ ਪਰਿਬ੍ਬਾਜਕੇਨ ਪਞ੍ਹੇ ਪੁਟ੍ਠਾ ਨ ਸਮ੍ਪਾਯਨ੍ਤਿ; ਅਸਮ੍ਪਾਯਨ੍ਤਾ ਕੋਪਞ੍ਚ ਦੋਸਞ੍ਚ ਅਪ੍ਪਚ੍ਚਯਞ੍ਚ ਪਾਤੁਕਰੋਨ੍ਤਿ. ਅਪਿ ਚ ਸਭਿਯਂ ਯੇਵ ਪਰਿਬ੍ਬਾਜਕਂ ਪਟਿਪੁਚ੍ਛਨ੍ਤਿ.

ਅਥ ਖੋ ਸਭਿਯਸ੍ਸ ਪਰਿਬ੍ਬਾਜਕਸ੍ਸ ਏਤਦਹੋਸਿ – ‘‘ਯੇ ਖੋ ਤੇ ਭੋਨ੍ਤੋ ਸਮਣਬ੍ਰਾਹ੍ਮਣਾ ਸਙ੍ਘਿਨੋ ਗਣਿਨੋ ਗਣਾਚਰਿਯਾ ਞਾਤਾ ਯਸਸ੍ਸਿਨੋ ਤਿਤ੍ਥਕਰਾ ਸਾਧੁਸਮ੍ਮਤਾ ਬਹੁਜਨਸ੍ਸ, ਸੇਯ੍ਯਥਿਦਂ – ਪੂਰਣੋ ਕਸ੍ਸਪੋ…ਪੇ… ਨਿਗਣ੍ਠੋ ਨਾਟਪੁਤ੍ਤੋ, ਤੇ ਮਯਾ ਪਞ੍ਹੇ ਪੁਟ੍ਠਾ ਨ ਸਮ੍ਪਾਯਨ੍ਤਿ, ਅਸਮ੍ਪਾਯਨ੍ਤਾ ਕੋਪਞ੍ਚ ਦੋਸਞ੍ਚ ਅਪ੍ਪਚ੍ਚਯਞ੍ਚ ਪਾਤੁਕਰੋਨ੍ਤਿ; ਅਪਿ ਚ ਮਞ੍ਞੇਵੇਤ੍ਥ ਪਟਿਪੁਚ੍ਛਨ੍ਤਿ. ਯਨ੍ਨੂਨ੍ਨਾਹਂ ਹੀਨਾਯਾਵਤ੍ਤਿਤ੍ਵਾ ਕਾਮੇ ਪਰਿਭੁਞ੍ਜੇਯ੍ਯ’’ਨ੍ਤਿ.

ਅਥ ਖੋ ਸਭਿਯਸ੍ਸ ਪਰਿਬ੍ਬਾਜਕਸ੍ਸ ਏਤਦਹੋਸਿ – ‘‘ਅਯਮ੍ਪਿ ਖੋ ਸਮਣੋ ਗੋਤਮੋ ਸਙ੍ਘੀ ਚੇਵ ਗਣੀ ਚ ਗਣਾਚਰਿਯੋ ਚ ਞਾਤੋ ਯਸਸ੍ਸੀ ਤਿਤ੍ਥਕਰੋ ਸਾਧੁਸਮ੍ਮਤੋ ਬਹੁਜਨਸ੍ਸ; ਯਂਨੂਨਾਹਂ ਸਮਣਂ ਗੋਤਮਂ ਉਪਸਙ੍ਕਮਿਤ੍ਵਾ ਇਮੇ ਪਞ੍ਹੇ ਪੁਚ੍ਛੇਯ੍ਯ’’ਨ੍ਤਿ.

ਅਥ ਖੋ ਸਭਿਯਸ੍ਸ ਪਰਿਬ੍ਬਾਜਕਸ੍ਸ ਏਤਦਹੋਸਿ – ‘‘ਯੇਪਿ ਖੋ ਤੇ [ਯੇ ਖੋ ਤੇ (ਸ੍ਯਾ.), ਯਂ ਖੋ ਤੇ (ਕ.)] ਭੋਨ੍ਤੋ ਸਮਣਬ੍ਰਾਹ੍ਮਣਾ ਜਿਣ੍ਣਾ ਵੁਡ੍ਢਾ ਮਹਲ੍ਲਕਾ ਅਦ੍ਧਗਤਾ ਵਯੋਅਨੁਪ੍ਪਤ੍ਤਾ ਥੇਰਾ ਰਤ੍ਤਞ੍ਞੂ ਚਿਰਪਬ੍ਬਜਿਤਾ ਸਙ੍ਘਿਨੋ ਗਣਿਨੋ ਗਣਾਚਰਿਯਾ ਞਾਤਾ ਯਸਸ੍ਸਿਨੋ ਤਿਤ੍ਥਕਰਾ ਸਾਧੁਸਮ੍ਮਤਾ ਬਹੁਜਨਸ੍ਸ, ਸੇਯ੍ਯਥਿਦਂ – ਪੂਰਣੋ ਕਸ੍ਸਪੋ…ਪੇ. … ਨਿਗਣ੍ਠੋ ਨਾਟਪੁਤ੍ਤੋ, ਤੇਪਿ ਮਯਾ ਪਞ੍ਹੇ ਪੁਟ੍ਠਾ ਨ ਸਮ੍ਪਾਯਨ੍ਤਿ, ਅਸਮ੍ਪਾਯਨ੍ਤਾ ਕੋਪਞ੍ਚ ਦੋਸਞ੍ਚ ਅਪ੍ਪਚ੍ਚਯਞ੍ਚ ਪਾਤੁਕਰੋਨ੍ਤਿ, ਅਪਿ ਚ ਮਞ੍ਞੇਵੇਤ੍ਥ ਪਟਿਪੁਚ੍ਛਨ੍ਤਿ; ਕਿਂ ਪਨ ਮੇ ਸਮਣੋ ਗੋਤਮੋ ਇਮੇ ਪਞ੍ਹੇ ਪੁਟ੍ਠੋ ਬ੍ਯਾਕਰਿਸ੍ਸਤਿ! ਸਮਣੋ ਹਿ ਗੋਤਮੋ ਦਹਰੋ ਚੇਵ ਜਾਤਿਯਾ, ਨਵੋ ਚ ਪਬ੍ਬਜ੍ਜਾਯਾ’’ਤਿ.

ਅਥ ਖੋ ਸਭਿਯਸ੍ਸ ਪਰਿਬ੍ਬਾਜਕਸ੍ਸ ਏਤਦਹੋਸਿ – ‘‘ਸਮਣੋ ਖੋ [ਸਮਣੋ ਖੋ ਗੋਤਮੋ (ਸ੍ਯਾ. ਕ.)] ਦਹਰੋਤਿ ਨ ਉਞ੍ਞਾਤਬ੍ਬੋ ਨ ਪਰਿਭੋਤਬ੍ਬੋ. ਦਹਰੋਪਿ ਚੇਸ ਸਮਣੋ ਗੋਤਮੋ ਮਹਿਦ੍ਧਿਕੋ ਹੋਤਿ ਮਹਾਨੁਭਾਵੋ, ਯਂਨੂਨਾਹਂ ਸਮਣਂ ਗੋਤਮਂ ਉਪਸਙ੍ਕਮਿਤ੍ਵਾ ਇਮੇ ਪਞ੍ਹੇ ਪੁਚ੍ਛੇਯ੍ਯ’’ਨ੍ਤਿ.

ਅਥ ਖੋ ਸਭਿਯੋ ਪਰਿਬ੍ਬਾਜਕੋ ਯੇਨ ਰਾਜਗਹਂ ਤੇਨ ਚਾਰਿਕਂ ਪਕ੍ਕਾਮਿ. ਅਨੁਪੁਬ੍ਬੇਨ ਚਾਰਿਕਂ ਚਰਮਾਨੋ ਯੇਨ ਰਾਜਗਹਂ ਵੇਲ਼ੁਵਨਂ ਕਲਨ੍ਦਕਨਿਵਾਪੋ, ਯੇਨ ਭਗਵਾ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਭਗਵਤਾ ਸਦ੍ਧਿਂ ਸਮ੍ਮੋਦਿ. ਸਮ੍ਮੋਦਨੀਯਂ ਕਥਂ ਸਾਰਣੀਯਂ ਵੀਤਿਸਾਰੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨੋ ਖੋ ਸਭਿਯੋ ਪਰਿਬ੍ਬਾਜਕੋ ਭਗਵਨ੍ਤਂ ਗਾਥਾਯ ਅਜ੍ਝਭਾਸਿ –

੫੧੫. ‘‘ਕਙ੍ਖੀ ਵੇਚਿਕਿਚ੍ਛੀ ਆਗਮਂ, (ਇਤਿ ਸਭਿਯੋ)

ਪਞ੍ਹੇ ਪੁਚ੍ਛਿਤੁਂ ਅਭਿਕਙ੍ਖਮਾਨੋ;

ਤੇਸਨ੍ਤਕਰੋ ਭਵਾਹਿ [ਭਵਾਹਿ ਮੇ (ਪੀ. ਕ.)] ਪਞ੍ਹੇ ਮੇ ਪੁਟ੍ਠੋ,

ਅਨੁਪੁਬ੍ਬਂ ਅਨੁਧਮ੍ਮਂ ਬ੍ਯਾਕਰੋਹਿ ਮੇ’’.

੫੧੬. ‘‘ਦੂਰਤੋ ਆਗਤੋਸਿ ਸਭਿਯ, (ਇਤਿ ਭਗਵਾ)

ਪਞ੍ਹੇ ਪੁਚ੍ਛਿਤੁਂ ਅਭਿਕਙ੍ਖਮਾਨੋ;

ਤੇਸਨ੍ਤਕਰੋ ਭਵਾਮਿ [ਤੇਸਮਨ੍ਤਕਰੋਮਿ ਤੇ (ਕ.)] ਪਞ੍ਹੇ ਤੇ ਪੁਟ੍ਠੋ,

ਅਨੁਪੁਬ੍ਬਂ ਅਨੁਧਮ੍ਮਂ ਬ੍ਯਾਕਰੋਮਿ ਤੇ.

੫੧੭. ‘‘ਪੁਚ੍ਛ ਮਂ ਸਭਿਯ ਪਞ੍ਹਂ, ਯਂ ਕਿਞ੍ਚਿ ਮਨਸਿਚ੍ਛਸਿ;

ਤਸ੍ਸ ਤਸ੍ਸੇਵ ਪਞ੍ਹਸ੍ਸ, ਅਹਂ ਅਨ੍ਤਂ ਕਰੋਮਿ ਤੇ’’ਤਿ.

ਅਥ ਖੋ ਸਭਿਯਸ੍ਸ ਪਰਿਬ੍ਬਾਜਕਸ੍ਸ ਏਤਦਹੋਸਿ – ‘‘ਅਚ੍ਛਰਿਯਂ ਵਤ, ਭੋ, ਅਬ੍ਭੁਤਂ ਵਤ, ਭੋ! ਯਂ ਵਤਾਹਂ ਅਞ੍ਞੇਸੁ ਸਮਣਬ੍ਰਾਹ੍ਮਣੇਸੁ ਓਕਾਸਕਮ੍ਮਮਤ੍ਤਮ੍ਪਿ [ਓਕਾਸਮਤ੍ਤਮ੍ਪਿ (ਸੀ. ਪੀ.)] ਨਾਲਤ੍ਥਂ ਤਂ ਮੇ ਇਦਂ ਸਮਣੇਨ ਗੋਤਮੇਨ ਓਕਾਸਕਮ੍ਮਂ ਕਤ’’ਨ੍ਤਿ. ਅਤ੍ਤਮਨੋ ਪਮੁਦਿਤੋ ਉਦਗ੍ਗੋ ਪੀਤਿਸੋਮਨਸ੍ਸਜਾਤੋ ਭਗਵਨ੍ਤਂ ਪਞ੍ਹਂ ਅਪੁਚ੍ਛਿ –

੫੧੮. ‘‘ਕਿਂ ਪਤ੍ਤਿਨਮਾਹੁ ਭਿਕ੍ਖੁਨਂ, (ਇਤਿ ਸਭਿਯੋ)

ਸੋਰਤਂ ਕੇਨ ਕਥਞ੍ਚ ਦਨ੍ਤਮਾਹੁ;

ਬੁਦ੍ਧੋਤਿ ਕਥਂ ਪਵੁਚ੍ਚਤਿ,

ਪੁਟ੍ਠੋ ਮੇ ਭਗਵਾ ਬ੍ਯਾਕਰੋਹਿ’’.

੫੧੯. ‘‘ਪਜ੍ਜੇਨ ਕਤੇਨ ਅਤ੍ਤਨਾ, (ਸਭਿਯਾਤਿ ਭਗਵਾ)

ਪਰਿਨਿਬ੍ਬਾਨਗਤੋ ਵਿਤਿਣ੍ਣਕਙ੍ਖੋ;

ਵਿਭਵਞ੍ਚ ਭਵਞ੍ਚ ਵਿਪ੍ਪਹਾਯ,

ਵੁਸਿਤਵਾ ਖੀਣਪੁਨਬ੍ਭਵੋ ਸ ਭਿਕ੍ਖੁ.

੫੨੦. ‘‘ਸਬ੍ਬਤ੍ਥ ਉਪੇਕ੍ਖਕੋ ਸਤਿਮਾ, ਨ ਸੋ ਹਿਂਸਤਿ ਕਞ੍ਚਿ ਸਬ੍ਬਲੋਕੇ;

ਤਿਣ੍ਣੋ ਸਮਣੋ ਅਨਾਵਿਲੋ, ਉਸ੍ਸਦਾ ਯਸ੍ਸ ਨ ਸਨ੍ਤਿ ਸੋਰਤੋ ਸੋ.

੫੨੧. ‘‘ਯਸ੍ਸਿਨ੍ਦ੍ਰਿਯਾਨਿ ਭਾਵਿਤਾਨਿ, ਅਜ੍ਝਤ੍ਤਂ ਬਹਿਦ੍ਧਾ ਚ ਸਬ੍ਬਲੋਕੇ;

ਨਿਬ੍ਬਿਜ੍ਝ ਇਮਂ ਪਰਞ੍ਚ ਲੋਕਂ, ਕਾਲਂ ਕਙ੍ਖਤਿ ਭਾਵਿਤੋ ਸ ਦਨ੍ਤੋ.

੫੨੨. ‘‘ਕਪ੍ਪਾਨਿ ਵਿਚੇਯ੍ਯ ਕੇਵਲਾਨਿ, ਸਂਸਾਰਂ ਦੁਭਯਂ ਚੁਤੂਪਪਾਤਂ;

ਵਿਗਤਰਜਮਨਙ੍ਗਣਂ ਵਿਸੁਦ੍ਧਂ, ਪਤ੍ਤਂ ਜਾਤਿਖਯਂ ਤਮਾਹੁ ਬੁਦ੍ਧ’’ਨ੍ਤਿ.

ਅਥ ਖੋ ਸਭਿਯੋ ਪਰਿਬ੍ਬਾਜਕੋ ਭਗਵਤੋ ਭਾਸਿਤਂ ਅਭਿਨਨ੍ਦਿਤ੍ਵਾ ਅਨੁਮੋਦਿਤ੍ਵਾ ਅਤ੍ਤਮਨੋ ਪਮੁਦਿਤੋ ਉਦਗ੍ਗੋ ਪੀਤਿਸੋਮਨਸ੍ਸਜਾਤੋ ਭਗਵਨ੍ਤਂ ਉਤ੍ਤਰਿਂ [ਉਤ੍ਤਰਿ (ਕ.)] ਪਞ੍ਹਂ ਅਪੁਚ੍ਛਿ –

੫੨੩. ‘‘ਕਿਂ ਪਤ੍ਤਿਨਮਾਹੁ ਬ੍ਰਾਹ੍ਮਣਂ, (ਇਤਿ ਸਭਿਯੋ)

ਸਮਣਂ ਕੇਨ ਕਥਞ੍ਚ ਨ੍ਹਾਤਕੋਤਿ;

ਨਾਗੋਤਿ ਕਥਂ ਪਵੁਚ੍ਚਤਿ,

ਪੁਟ੍ਠੋ ਮੇ ਭਗਵਾ ਬ੍ਯਾਕਰੋਹਿ’’.

੫੨੪. ‘‘ਬਾਹਿਤ੍ਵਾ ਸਬ੍ਬਪਾਪਕਾਨਿ, (ਸਭਿਯਾਤਿ ਭਗਵਾ)

ਵਿਮਲੋ ਸਾਧੁਸਮਾਹਿਤੋ ਠਿਤਤ੍ਤੋ;

ਸਂਸਾਰਮਤਿਚ੍ਚ ਕੇਵਲੀ ਸੋ,

ਅਸਿਤੋ ਤਾਦਿ ਪਵੁਚ੍ਚਤੇ ਸ ਬ੍ਰਹ੍ਮਾ.

੫੨੫. ‘‘ਸਮਿਤਾਵਿ ਪਹਾਯ ਪੁਞ੍ਞਪਾਪਂ, ਵਿਰਜੋ ਞਤ੍ਵਾ ਇਮਂ ਪਰਞ੍ਚ ਲੋਕਂ;

ਜਾਤਿਮਰਣਂ ਉਪਾਤਿਵਤ੍ਤੋ, ਸਮਣੋ ਤਾਦਿ ਪਵੁਚ੍ਚਤੇ ਤਥਤ੍ਤਾ.

੫੨੬. ‘‘ਨਿਨ੍ਹਾਯ [ਨਿਨਹਾਯ (ਸ੍ਯਾ.)] ਸਬ੍ਬਪਾਪਕਾਨਿ, ਅਜ੍ਝਤ੍ਤਂ ਬਹਿਦ੍ਧਾ ਚ ਸਬ੍ਬਲੋਕੇ;

ਦੇਵਮਨੁਸ੍ਸੇਸੁ ਕਪ੍ਪਿਯੇਸੁ, ਕਪ੍ਪਂ ਨੇਤਿ ਤਮਾਹੁ ਨ੍ਹਾਤਕੋ’’ਤਿ.

੫੨੭. ‘‘ਆਗੁਂ ਨ ਕਰੋਤਿ ਕਿਞ੍ਚਿ ਲੋਕੇ, ਸਬ੍ਬਸਂਯੋਗੇ [ਸਬ੍ਬਯੋਗੇ (ਕ.)] ਵਿਸਜ੍ਜ ਬਨ੍ਧਨਾਨਿ;

ਸਬ੍ਬਤ੍ਥ ਨ ਸਜ੍ਜਤੀ ਵਿਮੁਤ੍ਤੋ, ਨਾਗੋ ਤਾਦਿ ਪਵੁਚ੍ਚਤੇ ਤਥਤ੍ਤਾ’’ਤਿ.

ਅਥ ਖੋ ਸਭਿਯੋ ਪਰਿਬ੍ਬਾਜਕੋ…ਪੇ… ਭਗਵਨ੍ਤਂ ਉਤ੍ਤਰਿਂ ਪਞ੍ਹਂ ਅਪੁਚ੍ਛਿ –

੫੨੮. ‘‘ਕਂ ਖੇਤ੍ਤਜਿਨਂ ਵਦਨ੍ਤਿ ਬੁਦ੍ਧਾ, (ਇਤਿ ਸਭਿਯੋ)

ਕੁਸਲਂ ਕੇਨ ਕਥਞ੍ਚ ਪਣ੍ਡਿਤੋਤਿ;

ਮੁਨਿ ਨਾਮ ਕਥਂ ਪਵੁਚ੍ਚਤਿ,

ਪੁਟ੍ਠੋ ਮੇ ਭਗਵਾ ਬ੍ਯਾਕਰੋਹਿ’’.

੫੨੯. ‘‘ਖੇਤ੍ਤਾਨਿ ਵਿਚੇਯ੍ਯ ਕੇਵਲਾਨਿ, (ਸਭਿਯਾਤਿ ਭਗਵਾ)

ਦਿਬ੍ਬਂ ਮਾਨੁਸਕਞ੍ਚ ਬ੍ਰਹ੍ਮਖੇਤ੍ਤਂ;

ਸਬ੍ਬਖੇਤ੍ਤਮੂਲਬਨ੍ਧਨਾ ਪਮੁਤ੍ਤੋ,

ਖੇਤ੍ਤਜਿਨੋ ਤਾਦਿ ਪਵੁਚ੍ਚਤੇ ਤਥਤ੍ਤਾ.

੫੩੦. ‘‘ਕੋਸਾਨਿ ਵਿਚੇਯ੍ਯ ਕੇਵਲਾਨਿ, ਦਿਬ੍ਬਂ ਮਾਨੁਸਕਞ੍ਚ ਬ੍ਰਹ੍ਮਕੋਸਂ;

ਸਬ੍ਬਕੋਸਮੂਲਬਨ੍ਧਨਾ ਪਮੁਤ੍ਤੋ, ਕੁਸਲੋ ਤਾਦਿ ਪਵੁਚ੍ਚਤੇ ਤਥਤ੍ਤਾ.

੫੩੧. ‘‘ਦੁਭਯਾਨਿ ਵਿਚੇਯ੍ਯ ਪਣ੍ਡਰਾਨਿ, ਅਜ੍ਝਤ੍ਤਂ ਬਹਿਦ੍ਧਾ ਚ ਸੁਦ੍ਧਿਪਞ੍ਞੋ;

ਕਣ੍ਹਂ ਸੁਕ੍ਕਂ ਉਪਾਤਿਵਤ੍ਤੋ, ਪਣ੍ਡਿਤੋ ਤਾਦਿ ਪਵੁਚ੍ਚਤੇ ਤਥਤ੍ਤਾ.

੫੩੨. ‘‘ਅਸਤਞ੍ਚ ਸਤਞ੍ਚ ਞਤ੍ਵਾ ਧਮ੍ਮਂ, ਅਜ੍ਝਤ੍ਤਂ ਬਹਿਦ੍ਧਾ ਚ ਸਬ੍ਬਲੋਕੇ;

ਦੇਵਮਨੁਸ੍ਸੇਹਿ ਪੂਜਨੀਯੋ, ਸਙ੍ਗਂ ਜਾਲਮਤਿਚ੍ਚ ਸੋ ਮੁਨੀ’’ਤਿ.

ਅਥ ਖੋ ਸਭਿਯੋ ਪਰਿਬ੍ਬਾਜਕੋ…ਪੇ… ਭਗਵਨ੍ਤਂ ਉਤ੍ਤਰਿਂ ਪਞ੍ਹਂ ਅਪੁਚ੍ਛਿ –

੫੩੩. ‘‘ਕਿਂ ਪਤ੍ਤਿਨਮਾਹੁ ਵੇਦਗੁਂ, (ਇਤਿ ਸਭਿਯੋ)

ਅਨੁਵਿਦਿਤਂ ਕੇਨ ਕਥਞ੍ਚ ਵੀਰਿਯਵਾਤਿ;

ਆਜਾਨਿਯੋ ਕਿਨ੍ਤਿ ਨਾਮ ਹੋਤਿ,

ਪੁਟ੍ਠੋ ਮੇ ਭਗਵਾ ਬ੍ਯਾਕਰੋਹਿ’’.

੫੩੪. ‘‘ਵੇਦਾਨਿ ਵਿਚੇਯ੍ਯ ਕੇਵਲਾਨਿ, (ਸਭਿਯਾਤਿ ਭਗਵਾ)

ਸਮਣਾਨਂ ਯਾਨਿਧਤ੍ਥਿ [ਯਾਨਿਪਤ੍ਥਿ (ਸੀ. ਸ੍ਯਾ. ਪੀ.)] ਬ੍ਰਾਹ੍ਮਣਾਨਂ;

ਸਬ੍ਬਵੇਦਨਾਸੁ ਵੀਤਰਾਗੋ,

ਸਬ੍ਬਂ ਵੇਦਮਤਿਚ੍ਚ ਵੇਦਗੂ ਸੋ.

੫੩੫. ‘‘ਅਨੁਵਿਚ੍ਚ ਪਪਞ੍ਚਨਾਮਰੂਪਂ, ਅਜ੍ਝਤ੍ਤਂ ਬਹਿਦ੍ਧਾ ਚ ਰੋਗਮੂਲਂ;

ਸਬ੍ਬਰੋਗਮੂਲਬਨ੍ਧਨਾ ਪਮੁਤ੍ਤੋ, ਅਨੁਵਿਦਿਤੋ ਤਾਦਿ ਪਵੁਚ੍ਚਤੇ ਤਥਤ੍ਤਾ.

੫੩੬. ‘‘ਵਿਰਤੋ ਇਧ ਸਬ੍ਬਪਾਪਕੇਹਿ, ਨਿਰਯਦੁਕ੍ਖਂ ਅਤਿਚ੍ਚ ਵੀਰਿਯਵਾ ਸੋ;

ਸੋ ਵੀਰਿਯਵਾ ਪਧਾਨਵਾ, ਧੀਰੋ ਤਾਦਿ ਪਵੁਚ੍ਚਤੇ ਤਥਤ੍ਤਾ.

੫੩੭. ‘‘ਯਸ੍ਸਸ੍ਸੁ ਲੁਨਾਨਿ ਬਨ੍ਧਨਾਨਿ, ਅਜ੍ਝਤ੍ਤਂ ਬਹਿਦ੍ਧਾ ਚ ਸਙ੍ਗਮੂਲਂ;

ਸਬ੍ਬਸਙ੍ਗਮੂਲਬਨ੍ਧਨਾ ਪਮੁਤ੍ਤੋ, ਆਜਾਨਿਯੋ ਤਾਦਿ ਪਵੁਚ੍ਚਤੇ ਤਥਤ੍ਤਾ’’ਤਿ.

ਅਥ ਖੋ ਸਭਿਯੋ ਪਰਿਬ੍ਬਾਜਕੋ…ਪੇ… ਭਗਵਨ੍ਤਂ ਉਤ੍ਤਰਿਂ ਪਞ੍ਹਂ ਅਪੁਚ੍ਛਿ –

੫੩੮. ‘‘ਕਿਂ ਪਤ੍ਤਿਨਮਾਹੁ ਸੋਤ੍ਤਿਯਂ, (ਇਤਿ ਸਭਿਯੋ)

ਅਰਿਯਂ ਕੇਨ ਕਥਞ੍ਚ ਚਰਣਵਾਤਿ;

ਪਰਿਬ੍ਬਾਜਕੋ ਕਿਨ੍ਤਿ ਨਾਮ ਹੋਤਿ,

ਪੁਟ੍ਠੋ ਮੇ ਭਗਵਾ ਬ੍ਯਾਕਰੋਹਿ’’.

੫੩੯. ‘‘ਸੁਤ੍ਵਾ ਸਬ੍ਬਧਮ੍ਮਂ ਅਭਿਞ੍ਞਾਯ ਲੋਕੇ, (ਸਭਿਯਾਤਿ ਭਗਵਾ)

ਸਾਵਜ੍ਜਾਨਵਜ੍ਜਂ ਯਦਤ੍ਥਿ ਕਿਞ੍ਚਿ;

ਅਭਿਭੁਂ ਅਕਥਂਕਥਿਂ ਵਿਮੁਤ੍ਤਂ,

ਅਨਿਘਂ ਸਬ੍ਬਧਿਮਾਹੁ ਸੋਤ੍ਤਿਯੋਤਿ.

੫੪੦. ‘‘ਛੇਤ੍ਵਾ ਆਸਵਾਨਿ ਆਲਯਾਨਿ, ਵਿਦ੍ਵਾ ਸੋ ਨ ਉਪੇਤਿ ਗਬ੍ਭਸੇਯ੍ਯਂ;

ਸਞ੍ਞਂ ਤਿਵਿਧਂ ਪਨੁਜ੍ਜ ਪਙ੍ਕਂ, ਕਪ੍ਪਂ ਨੇਤਿ ਤਮਾਹੁ ਅਰਿਯੋਤਿ.

੫੪੧. ‘‘ਯੋ ਇਧ ਚਰਣੇਸੁ ਪਤ੍ਤਿਪਤ੍ਤੋ, ਕੁਸਲੋ ਸਬ੍ਬਦਾ ਆਜਾਨਾਤਿ [ਆਜਾਨਿ (ਸ੍ਯਾ.)] ਧਮ੍ਮਂ;

ਸਬ੍ਬਤ੍ਥ ਨ ਸਜ੍ਜਤਿ ਵਿਮੁਤ੍ਤਚਿਤ੍ਤੋ [ਵਿਮੁਤ੍ਤੋ (ਸੀ.)], ਪਟਿਘਾ ਯਸ੍ਸ ਨ ਸਨ੍ਤਿ ਚਰਣਵਾ ਸੋ.

੫੪੨. ‘‘ਦੁਕ੍ਖਵੇਪਕ੍ਕਂ ਯਦਤ੍ਥਿ ਕਮ੍ਮਂ, ਉਦ੍ਧਮਧੋ ਤਿਰਿਯਂ ਵਾਪਿ [ਤਿਰਿਯਞ੍ਚਾਪਿ (ਸ੍ਯਾ.)] ਮਜ੍ਝੇ;

ਪਰਿਬ੍ਬਾਜਯਿਤ੍ਵਾ ਪਰਿਞ੍ਞਚਾਰੀ, ਮਾਯਂ ਮਾਨਮਥੋਪਿ ਲੋਭਕੋਧਂ;

ਪਰਿਯਨ੍ਤਮਕਾਸਿ ਨਾਮਰੂਪਂ, ਤਂ ਪਰਿਬ੍ਬਾਜਕਮਾਹੁ ਪਤ੍ਤਿਪਤ੍ਤ’’ਨ੍ਤਿ.

ਅਥ ਖੋ ਸਭਿਯੋ ਪਰਿਬ੍ਬਾਜਕੋ ਭਗਵਤੋ ਭਾਸਿਤਂ ਅਭਿਨਨ੍ਦਿਤ੍ਵਾ ਅਨੁਮੋਦਿਤ੍ਵਾ ਅਤ੍ਤਮਨੋ ਪਮੁਦਿਤੋ ਉਦਗ੍ਗੋ ਪੀਤਿਸੋਮਨਸ੍ਸਜਾਤੋ ਉਟ੍ਠਾਯਾਸਨਾ ਏਕਂਸਂ ਉਤ੍ਤਰਾਸਙ੍ਗਂ ਕਰਿਤ੍ਵਾ ਯੇਨ ਭਗਵਾ ਤੇਨਞ੍ਜਲਿਂ ਪਣਾਮੇਤ੍ਵਾ ਭਗਵਨ੍ਤਂ ਸਮ੍ਮੁਖਾ ਸਾਰੁਪ੍ਪਾਹਿ ਗਾਥਾਹਿ ਅਭਿਤ੍ਥਵਿ –

੫੪੩. ‘‘ਯਾਨਿ ਚ ਤੀਣਿ ਯਾਨਿ ਚ ਸਟ੍ਠਿ, ਸਮਣਪ੍ਪਵਾਦਸਿਤਾਨਿ [ਸਮਣਪ੍ਪਵਾਦਨਿਸ੍ਸਿਤਾਨਿ (ਸ੍ਯਾ. ਕ.)] ਭੂਰਿਪਞ੍ਞ;

ਸਞ੍ਞਕ੍ਖਰਸਞ੍ਞਨਿਸ੍ਸਿਤਾਨਿ, ਓਸਰਣਾਨਿ ਵਿਨੇਯ੍ਯ ਓਘਤਮਗਾ.

੫੪੪. ‘‘ਅਨ੍ਤਗੂਸਿ ਪਾਰਗੂ [ਪਾਰਗੂਸਿ (ਸ੍ਯਾ. ਪੀ. ਕ.)] ਦੁਕ੍ਖਸ੍ਸ, ਅਰਹਾਸਿ ਸਮ੍ਮਾਸਮ੍ਬੁਦ੍ਧੋ ਖੀਣਾਸਵਂ ਤਂ ਮਞ੍ਞੇ;

ਜੁਤਿਮਾ ਮੁਤਿਮਾ ਪਹੂਤਪਞ੍ਞੋ, ਦੁਕ੍ਖਸ੍ਸਨ੍ਤਕਰਂ ਅਤਾਰੇਸਿ ਮਂ.

੫੪੫. ‘‘ਯਂ ਮੇ ਕਙ੍ਖਿਤਮਞ੍ਞਾਸਿ, ਵਿਚਿਕਿਚ੍ਛਾ ਮਂ ਤਾਰਯਿ ਨਮੋ ਤੇ;

ਮੁਨਿ ਮੋਨਪਥੇਸੁ ਪਤ੍ਤਿਪਤ੍ਤ, ਅਖਿਲ ਆਦਿਚ੍ਚਬਨ੍ਧੁ ਸੋਰਤੋਸਿ.

੫੪੬. ‘‘ਯਾ ਮੇ ਕਙ੍ਖਾ ਪੁਰੇ ਆਸਿ, ਤਂ ਮੇ ਬ੍ਯਾਕਾਸਿ ਚਕ੍ਖੁਮਾ;

ਅਦ੍ਧਾ ਮੁਨੀਸਿ ਸਮ੍ਬੁਦ੍ਧੋ, ਨਤ੍ਥਿ ਨੀਵਰਣਾ ਤਵ.

੫੪੭. ‘‘ਉਪਾਯਾਸਾ ਚ ਤੇ ਸਬ੍ਬੇ, ਵਿਦ੍ਧਸ੍ਤਾ ਵਿਨਲ਼ੀਕਤਾ;

ਸੀਤਿਭੂਤੋ ਦਮਪ੍ਪਤ੍ਤੋ, ਧਿਤਿਮਾ ਸਚ੍ਚਨਿਕ੍ਕਮੋ.

੫੪੮. ‘‘ਤਸ੍ਸ ਤੇ ਨਾਗਨਾਗਸ੍ਸ, ਮਹਾਵੀਰਸ੍ਸ ਭਾਸਤੋ;

ਸਬ੍ਬੇ ਦੇਵਾਨੁਮੋਦਨ੍ਤਿ, ਉਭੋ ਨਾਰਦਪਬ੍ਬਤਾ.

੫੪੯. ‘‘ਨਮੋ ਤੇ ਪੁਰਿਸਾਜਞ੍ਞ, ਨਮੋ ਤੇ ਪੁਰਿਸੁਤ੍ਤਮ;

ਸਦੇਵਕਸ੍ਮਿਂ ਲੋਕਸ੍ਮਿਂ, ਨਤ੍ਥਿ ਤੇ ਪਟਿਪੁਗ੍ਗਲੋ.

੫੫੦. ‘‘ਤੁਵਂ ਬੁਦ੍ਧੋ ਤੁਵਂ ਸਤ੍ਥਾ, ਤੁਵਂ ਮਾਰਾਭਿਭੂ ਮੁਨਿ;

ਤੁਵਂ ਅਨੁਸਯੇ ਛੇਤ੍ਵਾ, ਤਿਣ੍ਣੋ ਤਾਰੇਸਿ ਮਂ ਪਜਂ.

੫੫੧. ‘‘ਉਪਧੀ ਤੇ ਸਮਤਿਕ੍ਕਨ੍ਤਾ, ਆਸਵਾ ਤੇ ਪਦਾਲਿਤਾ;

ਸੀਹੋਸਿ ਅਨੁਪਾਦਾਨੋ, ਪਹੀਨਭਯਭੇਰਵੋ.

੫੫੨. ‘‘ਪੁਣ੍ਡਰੀਕਂ ਯਥਾ ਵਗ੍ਗੁ, ਤੋਯੇ ਨ ਉਪਲਿਮ੍ਪਤਿ [ਤੋਯੇਨ ਨ ਉਪਲਿਪ੍ਪਤਿ (ਸੀ.), ਤੋਯੇ ਨ ਉਪਲਿਪ੍ਪਤਿ (ਪੀ.), ਤੋਯੇਨ ਨ ਉਪਲਿਮ੍ਪਤਿ (ਕ.)];

ਏਵਂ ਪੁਞ੍ਞੇ ਚ ਪਾਪੇ ਚ, ਉਭਯੇ ਤ੍ਵਂ ਨ ਲਿਮ੍ਪਸਿ;

ਪਾਦੇ ਵੀਰ ਪਸਾਰੇਹਿ, ਸਭਿਯੋ ਵਨ੍ਦਤਿ ਸਤ੍ਥੁਨੋ’’ਤਿ.

ਅਥ ਖੋ ਸਭਿਯੋ ਪਰਿਬ੍ਬਾਜਕੋ ਭਗਵਤੋ ਪਾਦੇਸੁ ਸਿਰਸਾ ਨਿਪਤਿਤ੍ਵਾ ਭਗਵਨ੍ਤਂ ਏਤਦਵੋਚ – ‘‘ਅਭਿਕ੍ਕਨ੍ਤਂ, ਭਨ੍ਤੇ…ਪੇ… ਏਸਾਹਂ ਭਗਵਨ੍ਤਂ ਸਰਣਂ ਗਚ੍ਛਾਮਿ ਧਮ੍ਮਞ੍ਚ ਭਿਕ੍ਖੁਸਙ੍ਘਞ੍ਚ; ਲਭੇਯ੍ਯਾਹਂ, ਭਨ੍ਤੇ, ਭਗਵਤੋ ਸਨ੍ਤਿਕੇ ਪਬ੍ਬਜ੍ਜਂ, ਲਭੇਯ੍ਯਂ ਉਪਸਮ੍ਪਦ’’ਨ੍ਤਿ.

‘‘ਯੋ ਖੋ, ਸਭਿਯ, ਅਞ੍ਞਤਿਤ੍ਥਿਯਪੁਬ੍ਬੋ ਇਮਸ੍ਮਿਂ ਧਮ੍ਮਵਿਨਯੇ ਆਕਙ੍ਖਤਿ ਪਬ੍ਬਜ੍ਜਂ, ਆਕਙ੍ਖਤਿ ਉਪਸਮ੍ਪਦਂ, ਸੋ ਚਤ੍ਤਾਰੋ ਮਾਸੇ ਪਰਿਵਸਤਿ; ਚਤੁਨ੍ਨਂ ਮਾਸਾਨਂ ਅਚ੍ਚਯੇਨ ਆਰਦ੍ਧਚਿਤ੍ਤਾ ਭਿਕ੍ਖੂ ਪਬ੍ਬਾਜੇਨ੍ਤਿ, ਉਪਸਮ੍ਪਾਦੇਨ੍ਤਿ ਭਿਕ੍ਖੁਭਾਵਾਯ. ਅਪਿ ਚ ਮੇਤ੍ਥ ਪੁਗ੍ਗਲਵੇਮਤ੍ਤਤਾ ਵਿਦਿਤਾ’’ਤਿ.

‘‘ਸਚੇ, ਭਨ੍ਤੇ, ਅਞ੍ਞਤਿਤ੍ਥਿਯਪੁਬ੍ਬਾ ਇਮਸ੍ਮਿਂ ਧਮ੍ਮਵਿਨਯੇ ਆਕਙ੍ਖਨ੍ਤਾ ਪਬ੍ਬਜ੍ਜਂ, ਆਕਙ੍ਖਨ੍ਤਾ ਉਪਸਮ੍ਪਦਂ ਚਤ੍ਤਾਰੋ ਮਾਸੇ ਪਰਿਵਸਨ੍ਤਿ, ਚਤੁਨ੍ਨਂ ਮਾਸਾਨਂ ਅਚ੍ਚਯੇਨ ਆਰਦ੍ਧਚਿਤ੍ਤਾ ਭਿਕ੍ਖੂ ਪਬ੍ਬਾਜੇਨ੍ਤਿ, ਉਪਸਮ੍ਪਾਦੇਨ੍ਤਿ ਭਿਕ੍ਖੁਭਾਵਾਯ, ਅਹਂ ਚਤ੍ਤਾਰਿ ਵਸ੍ਸਾਨਿ ਪਰਿਵਸਿਸ੍ਸਾਮਿ; ਚਤੁਨ੍ਨਂ ਵਸ੍ਸਾਨਂ ਅਚ੍ਚਯੇਨ ਆਰਦ੍ਧਚਿਤ੍ਤਾ ਭਿਕ੍ਖੂ ਪਬ੍ਬਾਜੇਨ੍ਤੁ ਉਪਸਮ੍ਪਾਦੇਨ੍ਤੁ ਭਿਕ੍ਖੁਭਾਵਾਯਾ’’ਤਿ. ਅਲਤ੍ਥ ਖੋ ਸਭਿਯੋ ਪਰਿਬ੍ਬਾਜਕੋ ਭਗਵਤੋ ਸਨ੍ਤਿਕੇ ਪਬ੍ਬਜ੍ਜਂ ਅਲਤ੍ਥ ਉਪਸਮ੍ਪਦਂ…ਪੇ… ਅਞ੍ਞਤਰੋ ਖੋ ਪਨਾਯਸ੍ਮਾ ਸਭਿਯੋ ਅਰਹਤਂ ਅਹੋਸੀਤਿ.

ਸਭਿਯਸੁਤ੍ਤਂ ਛਟ੍ਠਂ ਨਿਟ੍ਠਿਤਂ.