੯. ਕਿਂਸੀਲਸੁਤ੍ਤਂ

੩੨੬. ‘‘ਕਿਂਸੀਲੋ ਕਿਂਸਮਾਚਾਰੋ, ਕਾਨਿ ਕਮ੍ਮਾਨਿ ਬ੍ਰੂਹਯਂ;

ਨਰੋ ਸਮ੍ਮਾ ਨਿਵਿਟ੍ਠਸ੍ਸ, ਉਤ੍ਤਮਤ੍ਥਞ੍ਚ ਪਾਪੁਣੇ’’.

੩੨੭. ‘‘ਵੁਡ੍ਢਾਪਚਾਯੀ ਅਨੁਸੂਯਕੋ ਸਿਯਾ, ਕਾਲਞ੍ਞੂ [ਕਾਲਞ੍ਞੁ (ਸੀ. ਸ੍ਯਾ.)] ਚਸ੍ਸ ਗਰੂਨਂ [ਗਰੂਨਂ (ਸੀ.)] ਦਸ੍ਸਨਾਯ;

ਧਮ੍ਮਿਂ ਕਥਂ ਏਰਯਿਤਂ ਖਣਞ੍ਞੂ, ਸੁਣੇਯ੍ਯ ਸਕ੍ਕਚ੍ਚ ਸੁਭਾਸਿਤਾਨਿ.

੩੨੮. ‘‘ਕਾਲੇਨ ਗਚ੍ਛੇ ਗਰੂਨਂ ਸਕਾਸਂ, ਥਮ੍ਭਂ ਨਿਰਂਕਤ੍ਵਾ [ਨਿਰਾਕਤ੍ਵਾ (?) ਨਿ + ਆ + ਕਰ + ਤ੍ਵਾ] ਨਿਵਾਤਵੁਤ੍ਤਿ;

ਅਤ੍ਥਂ ਧਮ੍ਮਂ ਸਂਯਮਂ ਬ੍ਰਹ੍ਮਚਰਿਯਂ, ਅਨੁਸ੍ਸਰੇ ਚੇਵ ਸਮਾਚਰੇ ਚ.

੩੨੯. ‘‘ਧਮ੍ਮਾਰਾਮੋ ਧਮ੍ਮਰਤੋ, ਧਮ੍ਮੇ ਠਿਤੋ ਧਮ੍ਮਵਿਨਿਚ੍ਛਯਞ੍ਞੂ;

ਨੇਵਾਚਰੇ ਧਮ੍ਮਸਨ੍ਦੋਸਵਾਦਂ, ਤਚ੍ਛੇਹਿ ਨੀਯੇਥ ਸੁਭਾਸਿਤੇਹਿ.

੩੩੦. ‘‘ਹਸ੍ਸਂ ਜਪ੍ਪਂ ਪਰਿਦੇਵਂ ਪਦੋਸਂ, ਮਾਯਾਕਤਂ ਕੁਹਨਂ ਗਿਦ੍ਧਿ ਮਾਨਂ;

ਸਾਰਮ੍ਭਂ ਕਕ੍ਕਸਂ ਕਸਾਵਞ੍ਚ ਮੁਚ੍ਛਂ [ਸਾਰਮ੍ਭ ਕਕ੍ਕਸ੍ਸ ਕਸਾਵ ਮੁਚ੍ਛਂ (ਸ੍ਯਾ. ਪੀ.)], ਹਿਤ੍ਵਾ ਚਰੇ ਵੀਤਮਦੋ ਠਿਤਤ੍ਤੋ.

੩੩੧. ‘‘ਵਿਞ੍ਞਾਤਸਾਰਾਨਿ ਸੁਭਾਸਿਤਾਨਿ, ਸੁਤਞ੍ਚ ਵਿਞ੍ਞਾਤਸਮਾਧਿਸਾਰਂ;

ਨ ਤਸ੍ਸ ਪਞ੍ਞਾ ਚ ਸੁਤਞ੍ਚ ਵਡ੍ਢਤਿ, ਯੋ ਸਾਹਸੋ ਹੋਤਿ ਨਰੋ ਪਮਤ੍ਤੋ.

੩੩੨. ‘‘ਧਮ੍ਮੇ ਚ ਯੇ ਅਰਿਯਪਵੇਦਿਤੇ ਰਤਾ,

ਅਨੁਤ੍ਤਰਾ ਤੇ ਵਚਸਾ ਮਨਸਾ ਕਮ੍ਮੁਨਾ ਚ;

ਤੇ ਸਨ੍ਤਿਸੋਰਚ੍ਚਸਮਾਧਿਸਣ੍ਠਿਤਾ,

ਸੁਤਸ੍ਸ ਪਞ੍ਞਾਯ ਚ ਸਾਰਮਜ੍ਝਗੂ’’ਤਿ.

ਕਿਂਸੀਲਸੁਤ੍ਤਂ ਨਵਮਂ ਨਿਟ੍ਠਿਤਂ.