੪. ਮਙ੍ਗਲਸੁਤ੍ਤਂ

ਏਵਂ ਮੇ ਸੁਤਂ – ਏਕਂ ਸਮਯਂ ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ ਅਨਾਥਪਿਣ੍ਡਿਕਸ੍ਸ ਆਰਾਮੇ. ਅਥ ਖੋ ਅਞ੍ਞਤਰਾ ਦੇਵਤਾ ਅਭਿਕ੍ਕਨ੍ਤਾਯ ਰਤ੍ਤਿਯਾ ਅਭਿਕ੍ਕਨ੍ਤਵਣ੍ਣਾ ਕੇਵਲਕਪ੍ਪਂ ਜੇਤਵਨਂ ਓਭਾਸੇਤ੍ਵਾ ਯੇਨ ਭਗਵਾ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਅਟ੍ਠਾਸਿ. ਏਕਮਨ੍ਤਂ ਠਿਤਾ ਖੋ ਸਾ ਦੇਵਤਾ ਭਗਵਨ੍ਤਂ ਗਾਥਾਯ ਅਜ੍ਝਭਾਸਿ –

੨੬੧. ‘‘ਬਹੂ ਦੇਵਾ ਮਨੁਸ੍ਸਾ ਚ, ਮਙ੍ਗਲਾਨਿ ਅਚਿਨ੍ਤਯੁਂ;

ਆਕਙ੍ਖਮਾਨਾ ਸੋਤ੍ਥਾਨਂ, ਬ੍ਰੂਹਿ ਮਙ੍ਗਲਮੁਤ੍ਤਮਂ’’.

੨੬੨. ‘‘ਅਸੇਵਨਾ ਚ ਬਾਲਾਨਂ, ਪਣ੍ਡਿਤਾਨਞ੍ਚ ਸੇਵਨਾ;

ਪੂਜਾ ਚ ਪੂਜਨੇਯ੍ਯਾਨਂ [ਪੂਜਨੀਯਾਨਂ (ਸੀ. ਸ੍ਯਾ. ਕਂ. ਪੀ.)], ਏਤਂ ਮਙ੍ਗਲਮੁਤ੍ਤਮਂ.

੨੬੩. ‘‘ਪਤਿਰੂਪਦੇਸਵਾਸੋ ਚ, ਪੁਬ੍ਬੇ ਚ ਕਤਪੁਞ੍ਞਤਾ;

ਅਤ੍ਤਸਮ੍ਮਾਪਣਿਧਿ [ਅਤ੍ਤਸਮ੍ਮਾਪਣੀਧੀ (ਕਤ੍ਥਚਿ)] ਚ, ਏਤਂ ਮਙ੍ਗਲਮੁਤ੍ਤਮਂ.

੨੬੪. ‘‘ਬਾਹੁਸਚ੍ਚਞ੍ਚ ਸਿਪ੍ਪਞ੍ਚ, ਵਿਨਯੋ ਚ ਸੁਸਿਕ੍ਖਿਤੋ;

ਸੁਭਾਸਿਤਾ ਚ ਯਾ ਵਾਚਾ, ਏਤਂ ਮਙ੍ਗਲਮੁਤ੍ਤਮਂ.

੨੬੫. ‘‘ਮਾਤਾਪਿਤੁ ਉਪਟ੍ਠਾਨਂ, ਪੁਤ੍ਤਦਾਰਸ੍ਸ ਸਙ੍ਗਹੋ;

ਅਨਾਕੁਲਾ ਚ ਕਮ੍ਮਨ੍ਤਾ, ਏਤਂ ਮਙ੍ਗਲਮੁਤ੍ਤਮਂ.

੨੬੬. ‘‘ਦਾਨਞ੍ਚ ਧਮ੍ਮਚਰਿਯਾ ਚ, ਞਾਤਕਾਨਞ੍ਚ ਸਙ੍ਗਹੋ;

ਅਨਵਜ੍ਜਾਨਿ ਕਮ੍ਮਾਨਿ, ਏਤਂ ਮਙ੍ਗਲਮੁਤ੍ਤਮਂ.

੨੬੭. ‘‘ਆਰਤੀ ਵਿਰਤੀ ਪਾਪਾ, ਮਜ੍ਜਪਾਨਾ ਚ ਸਂਯਮੋ;

ਅਪ੍ਪਮਾਦੋ ਚ ਧਮ੍ਮੇਸੁ, ਏਤਂ ਮਙ੍ਗਲਮੁਤ੍ਤਮਂ.

੨੬੮. ‘‘ਗਾਰਵੋ ਚ ਨਿਵਾਤੋ ਚ, ਸਨ੍ਤੁਟ੍ਠਿ ਚ ਕਤਞ੍ਞੁਤਾ;

ਕਾਲੇਨ ਧਮ੍ਮਸ੍ਸਵਨਂ [ਧਮ੍ਮਸਵਣਂ (ਕਤ੍ਥਚਿ), ਧਮ੍ਮਸਵਨਂ (ਸੀ. ਕ.)], ਏਤਂ ਮਙ੍ਗਲਮੁਤ੍ਤਮਂ.

੨੬੯. ‘‘ਖਨ੍ਤੀ ਚ ਸੋਵਚਸ੍ਸਤਾ, ਸਮਣਾਨਞ੍ਚ ਦਸ੍ਸਨਂ;

ਕਾਲੇਨ ਧਮ੍ਮਸਾਕਚ੍ਛਾ, ਏਤਂ ਮਙ੍ਗਲਮੁਤ੍ਤਮਂ.

੨੭੦. ‘‘ਤਪੋ ਚ ਬ੍ਰਹ੍ਮਚਰਿਯਞ੍ਚ, ਅਰਿਯਸਚ੍ਚਾਨ ਦਸ੍ਸਨਂ;

ਨਿਬ੍ਬਾਨਸਚ੍ਛਿਕਿਰਿਯਾ ਚ, ਏਤਂ ਮਙ੍ਗਲਮੁਤ੍ਤਮਂ.

੨੭੧. ‘‘ਫੁਟ੍ਠਸ੍ਸ ਲੋਕਧਮ੍ਮੇਹਿ, ਚਿਤ੍ਤਂ ਯਸ੍ਸ ਨ ਕਮ੍ਪਤਿ;

ਅਸੋਕਂ ਵਿਰਜਂ ਖੇਮਂ, ਏਤਂ ਮਙ੍ਗਲਮੁਤ੍ਤਮਂ.

੨੭੨. ‘‘ਏਤਾਦਿਸਾਨਿ ਕਤ੍ਵਾਨ, ਸਬ੍ਬਤ੍ਥਮਪਰਾਜਿਤਾ;

ਸਬ੍ਬਤ੍ਥ ਸੋਤ੍ਥਿਂ ਗਚ੍ਛਨ੍ਤਿ, ਤਂ ਤੇਸਂ ਮਙ੍ਗਲਮੁਤ੍ਤਮ’’ਨ੍ਤਿ.

ਮਙ੍ਗਲਸੁਤ੍ਤਂ ਚਤੁਤ੍ਥਂ ਨਿਟ੍ਠਿਤਂ.