੨. ਆਮਗਨ੍ਧਸੁਤ੍ਤਂ

੨੪੨. ‘‘ਸਾਮਾਕਚਿਙ੍ਗੂਲਕਚੀਨਕਾਨਿ ਚ, ਪਤ੍ਤਪ੍ਫਲਂ ਮੂਲਫਲਂ ਗਵਿਪ੍ਫਲਂ;

ਧਮ੍ਮੇਨ ਲਦ੍ਧਂ ਸਤਮਸ੍ਨਮਾਨਾ [ਸਤਮਸਮਾਨਾ (ਸੀ. ਪੀ.), ਸਤਮਸ੍ਸਮਾਨਾ (ਸ੍ਯਾ. ਕਂ.)], ਨ ਕਾਮਕਾਮਾ ਅਲਿਕਂ ਭਣਨ੍ਤਿ.

੨੪੩. ‘‘ਯਦਸ੍ਨਮਾਨੋ ਸੁਕਤਂ ਸੁਨਿਟ੍ਠਿਤਂ, ਪਰੇਹਿ ਦਿਨ੍ਨਂ ਪਯਤਂ ਪਣੀਤਂ;

ਸਾਲੀਨਮਨ੍ਨਂ ਪਰਿਭੁਞ੍ਜਮਾਨੋ, ਸੋ ਭੁਞ੍ਜਸੀ ਕਸ੍ਸਪ ਆਮਗਨ੍ਧਂ.

੨੪੪. ‘‘ਨ ਆਮਗਨ੍ਧੋ ਮਮ ਕਪ੍ਪਤੀਤਿ, ਇਚ੍ਚੇਵ ਤ੍ਵਂ ਭਾਸਸਿ ਬ੍ਰਹ੍ਮਬਨ੍ਧੁ;

ਸਾਲੀਨਮਨ੍ਨਂ ਪਰਿਭੁਞ੍ਜਮਾਨੋ, ਸਕੁਨ੍ਤਮਂਸੇਹਿ ਸੁਸਙ੍ਖਤੇਹਿ;

ਪੁਚ੍ਛਾਮਿ ਤਂ ਕਸ੍ਸਪ ਏਤਮਤ੍ਥਂ, ਕਥਂ ਪਕਾਰੋ ਤਵ ਆਮਗਨ੍ਧੋ’’.

੨੪੫. ‘‘ਪਾਣਾਤਿਪਾਤੋ ਵਧਛੇਦਬਨ੍ਧਨਂ, ਥੇਯ੍ਯਂ ਮੁਸਾਵਾਦੋ ਨਿਕਤਿਵਞ੍ਚਨਾਨਿ ਚ;

ਅਜ੍ਝੇਨਕੁਤ੍ਤਂ [ਅਜ੍ਝੇਨ ਕੁਜ੍ਜਂ (ਸੀ. ਪੀ.)] ਪਰਦਾਰਸੇਵਨਾ, ਏਸਾਮਗਨ੍ਧੋ ਨ ਹਿ ਮਂਸਭੋਜਨਂ.

੨੪੬. ‘‘ਯੇ ਇਧ ਕਾਮੇਸੁ ਅਸਞ੍ਞਤਾ ਜਨਾ, ਰਸੇਸੁ ਗਿਦ੍ਧਾ ਅਸੁਚਿਭਾਵਮਸ੍ਸਿਤਾ [ਅਸੁਚੀਕਮਿਸ੍ਸਿਤਾ (ਸੀ. ਸ੍ਯਾ. ਕਂ. ਪੀ.)];

ਨਤ੍ਥਿਕਦਿਟ੍ਠੀ ਵਿਸਮਾ ਦੁਰਨ੍ਨਯਾ, ਏਸਾਮਗਨ੍ਧੋ ਨ ਹਿ ਮਂਸਭੋਜਨਂ.

੨੪੭. ‘‘ਯੇ ਲੂਖਸਾ ਦਾਰੁਣਾ ਪਿਟ੍ਠਿਮਂਸਿਕਾ [ਯੇ ਲੂਖਰਸਾ ਦਾਰੁਣਾ ਪਰਪਿਟ੍ਠਿਮਂਸਿਕਾ (ਕ.)], ਮਿਤ੍ਤਦ੍ਦੁਨੋ ਨਿਕ੍ਕਰੁਣਾਤਿਮਾਨਿਨੋ;

ਅਦਾਨਸੀਲਾ ਨ ਚ ਦੇਨ੍ਤਿ ਕਸ੍ਸਚਿ, ਏਸਾਮਗਨ੍ਧੋ ਨ ਹਿ ਮਂਸਭੋਜਨਂ.

੨੪੮. ‘‘ਕੋਧੋ ਮਦੋ ਥਮ੍ਭੋ ਪਚ੍ਚੁਪਟ੍ਠਾਪਨਾ [ਪਚ੍ਚੁਟ੍ਠਾਪਨਾ ਚ (ਸੀ. ਸ੍ਯਾ.), ਪਚ੍ਚੁਟ੍ਠਾਪਨਾ (ਪੀ.)], ਮਾਯਾ ਉਸੂਯਾ ਭਸ੍ਸਸਮੁਸ੍ਸਯੋ ਚ;

ਮਾਨਾਤਿਮਾਨੋ ਚ ਅਸਬ੍ਭਿ ਸਨ੍ਥਵੋ, ਏਸਾਮਗਨ੍ਧੋ ਨ ਹਿ ਮਂਸਭੋਜਨਂ.

੨੪੯. ‘‘ਯੇ ਪਾਪਸੀਲਾ ਇਣਘਾਤਸੂਚਕਾ, ਵੋਹਾਰਕੂਟਾ ਇਧ ਪਾਟਿਰੂਪਿਕਾ [ਪਾਤਿਰੂਪਿਕਾ (?)];

ਨਰਾਧਮਾ ਯੇਧ ਕਰੋਨ੍ਤਿ ਕਿਬ੍ਬਿਸਂ, ਏਸਾਮਗਨ੍ਧੋ ਨ ਹਿ ਮਂਸਭੋਜਨਂ.

੨੫੦. ‘‘ਯੇ ਇਧ ਪਾਣੇਸੁ ਅਸਞ੍ਞਤਾ ਜਨਾ, ਪਰੇਸਮਾਦਾਯ ਵਿਹੇਸਮੁਯ੍ਯੁਤਾ;

ਦੁਸ੍ਸੀਲਲੁਦ੍ਦਾ ਫਰੁਸਾ ਅਨਾਦਰਾ, ਏਸਾਮਗਨ੍ਧੋ ਨ ਹਿ ਮਂਸਭੋਜਨਂ.

੨੫੧. ‘‘ਏਤੇਸੁ ਗਿਦ੍ਧਾ ਵਿਰੁਦ੍ਧਾਤਿਪਾਤਿਨੋ, ਨਿਚ੍ਚੁਯ੍ਯੁਤਾ ਪੇਚ੍ਚ ਤਮਂ ਵਜਨ੍ਤਿ ਯੇ;

ਪਤਨ੍ਤਿ ਸਤ੍ਤਾ ਨਿਰਯਂ ਅਵਂਸਿਰਾ, ਏਸਾਮਗਨ੍ਧੋ ਨ ਹਿ ਮਂਸਭੋਜਨਂ.

੨੫੨. ‘‘ਨ ਮਚ੍ਛਮਂਸਾਨਮਨਾਸਕਤ੍ਤਂ [ਨ ਮਚ੍ਛਮਂਸਂ ਨ ਅਨਾਸਕਤ੍ਤਂ (ਸੀ. ਅਟ੍ਠ ਮੂਲਪਾਠੋ), ਨ ਮਂਚ੍ਛਮਂਸਾਨਾਨਾਸਕਤ੍ਤਂ (ਸ੍ਯਾ. ਕ.)], ਨ ਨਗ੍ਗਿਯਂ ਨ ਮੁਣ੍ਡਿਯਂ ਜਟਾਜਲ੍ਲਂ;

ਖਰਾਜਿਨਾਨਿ ਨਾਗ੍ਗਿਹੁਤ੍ਤਸ੍ਸੁਪਸੇਵਨਾ, ਯੇ ਵਾਪਿ ਲੋਕੇ ਅਮਰਾ ਬਹੂ ਤਪਾ;

ਮਨ੍ਤਾਹੁਤੀ ਯਞ੍ਞਮੁਤੂਪਸੇਵਨਾ, ਸੋਧੇਨ੍ਤਿ ਮਚ੍ਚਂ ਅਵਿਤਿਣ੍ਣਕਙ੍ਖਂ.

੨੫੩. ‘‘ਯੋ ਤੇਸੁ [ਸੋਤੇਸੁ (ਸੀ. ਪੀ.)] ਗੁਤ੍ਤੋ ਵਿਦਿਤਿਨ੍ਦ੍ਰਿਯੋ ਚਰੇ, ਧਮ੍ਮੇ ਠਿਤੋ ਅਜ੍ਜਵਮਦ੍ਦਵੇ ਰਤੋ;

ਸਙ੍ਗਾਤਿਗੋ ਸਬ੍ਬਦੁਕ੍ਖਪ੍ਪਹੀਨੋ, ਨ ਲਿਪ੍ਪਤਿ [ਨ ਲਿਮ੍ਪਤਿ (ਸ੍ਯਾ. ਕਂ ਕ.)] ਦਿਟ੍ਠਸੁਤੇਸੁ ਧੀਰੋ’’.

੨੫੪. ਇਚ੍ਚੇਤਮਤ੍ਥਂ ਭਗਵਾ ਪੁਨਪ੍ਪੁਨਂ, ਅਕ੍ਖਾਸਿ ਨਂ [ਤਂ (ਸੀ. ਪੀ.)] ਵੇਦਯਿ ਮਨ੍ਤਪਾਰਗੂ;

ਚਿਤ੍ਰਾਹਿ ਗਾਥਾਹਿ ਮੁਨੀ ਪਕਾਸਯਿ, ਨਿਰਾਮਗਨ੍ਧੋ ਅਸਿਤੋ ਦੁਰਨ੍ਨਯੋ.

੨੫੫. ਸੁਤ੍ਵਾਨ ਬੁਦ੍ਧਸ੍ਸ ਸੁਭਾਸਿਤਂ ਪਦਂ, ਨਿਰਾਮਗਨ੍ਧਂ ਸਬ੍ਬਦੁਕ੍ਖਪ੍ਪਨੂਦਨਂ;

ਨੀਚਮਨੋ ਵਨ੍ਦਿ ਤਥਾਗਤਸ੍ਸ, ਤਤ੍ਥੇਵ ਪਬ੍ਬਜ੍ਜਮਰੋਚਯਿਤ੍ਥਾਤਿ.

ਆਮਗਨ੍ਧਸੁਤ੍ਤਂ ਦੁਤਿਯਂ ਨਿਟ੍ਠਿਤਂ.