੧੧. ਰਾਹੁਲਸੁਤ੍ਤਂ

੩੩੭. ‘‘ਕਚ੍ਚਿ ਅਭਿਣ੍ਹਸਂਵਾਸਾ, ਨਾਵਜਾਨਾਸਿ ਪਣ੍ਡਿਤਂ;

ਉਕ੍ਕਾਧਾਰੋ [ਓਕ੍ਕਾਧਾਰੋ (ਸ੍ਯਾ. ਕ.)] ਮਨੁਸ੍ਸਾਨਂ, ਕਚ੍ਚਿ ਅਪਚਿਤੋ ਤਯਾ’’ [ਤਵ (ਸੀ. ਅਟ੍ਠ.)].

੩੩੮. ‘‘ਨਾਹਂ ਅਭਿਣ੍ਹਸਂਵਾਸਾ, ਅਵਜਾਨਾਮਿ ਪਣ੍ਡਿਤਂ;

ਉਕ੍ਕਾਧਾਰੋ ਮਨੁਸ੍ਸਾਨਂ, ਨਿਚ੍ਚਂ ਅਪਚਿਤੋ ਮਯਾ’’.

੩੩੯. ‘‘ਪਞ੍ਚ ਕਾਮਗੁਣੇ ਹਿਤ੍ਵਾ, ਪਿਯਰੂਪੇ ਮਨੋਰਮੇ;

ਸਦ੍ਧਾਯ ਘਰਾ ਨਿਕ੍ਖਮ੍ਮ, ਦੁਕ੍ਖਸ੍ਸਨ੍ਤਕਰੋ ਭਵ.

੩੪੦. ‘‘ਮਿਤ੍ਤੇ ਭਜਸ੍ਸੁ ਕਲ੍ਯਾਣੇ, ਪਨ੍ਤਞ੍ਚ ਸਯਨਾਸਨਂ;

ਵਿਵਿਤ੍ਤਂ ਅਪ੍ਪਨਿਗ੍ਘੋਸਂ, ਮਤ੍ਤਞ੍ਞੂ ਹੋਹਿ ਭੋਜਨੇ.

੩੪੧. ‘‘ਚੀਵਰੇ ਪਿਣ੍ਡਪਾਤੇ ਚ, ਪਚ੍ਚਯੇ ਸਯਨਾਸਨੇ;

ਏਤੇਸੁ ਤਣ੍ਹਂ ਮਾਕਾਸਿ, ਮਾ ਲੋਕਂ ਪੁਨਰਾਗਮਿ.

੩੪੨. ‘‘ਸਂਵੁਤੋ ਪਾਤਿਮੋਕ੍ਖਸ੍ਮਿਂ, ਇਨ੍ਦ੍ਰਿਯੇਸੁ ਚ ਪਞ੍ਚਸੁ;

ਸਤਿ ਕਾਯਗਤਾਤ੍ਯਤ੍ਥੁ, ਨਿਬ੍ਬਿਦਾਬਹੁਲੋ ਭਵ.

੩੪੩. ‘‘ਨਿਮਿਤ੍ਤਂ ਪਰਿਵਜ੍ਜੇਹਿ, ਸੁਭਂ ਰਾਗੂਪਸਞ੍ਹਿਤਂ;

ਅਸੁਭਾਯ ਚਿਤ੍ਤਂ ਭਾਵੇਹਿ, ਏਕਗ੍ਗਂ ਸੁਸਮਾਹਿਤਂ.

੩੪੪. ‘‘ਅਨਿਮਿਤ੍ਤਞ੍ਚ ਭਾਵੇਹਿ, ਮਾਨਾਨੁਸਯਮੁਜ੍ਜਹ;

ਤਤੋ ਮਾਨਾਭਿਸਮਯਾ, ਉਪਸਨ੍ਤੋ ਚਰਿਸ੍ਸਤੀ’’ਤਿ.

ਇਤ੍ਥਂ ਸੁਦਂ ਭਗਵਾ ਆਯਸ੍ਮਨ੍ਤਂ ਰਾਹੁਲਂ ਇਮਾਹਿ ਗਾਥਾਹਿ ਅਭਿਣ੍ਹਂ ਓਵਦਤੀਤਿ.

ਰਾਹੁਲਸੁਤ੍ਤਂ ਏਕਾਦਸਮਂ ਨਿਟ੍ਠਿਤਂ.