੯. ਹੇਮਵਤਸੁਤ੍ਤਂ

੧੫੩. ‘‘ਅਜ੍ਜ ਪਨ੍ਨਰਸੋ ਉਪੋਸਥੋ, (ਇਤਿ ਸਾਤਾਗਿਰੋ ਯਕ੍ਖੋ)

ਦਿਬ੍ਬਾ [ਦਿਬ੍ਯਾ (ਸੀ. ਸ੍ਯਾ. ਕਂ. ਪੀ.)] ਰਤ੍ਤਿ ਉਪਟ੍ਠਿਤਾ;

ਅਨੋਮਨਾਮਂ ਸਤ੍ਥਾਰਂ, ਹਨ੍ਦ ਪਸ੍ਸਾਮ ਗੋਤਮਂ’’.

੧੫੪. ‘‘ਕਚ੍ਚਿ ਮਨੋ ਸੁਪਣਿਹਿਤੋ, (ਇਤਿ ਹੇਮਵਤੋ ਯਕ੍ਖੋ)

ਸਬ੍ਬਭੂਤੇਸੁ ਤਾਦਿਨੋ;

ਕਚ੍ਚਿ ਇਟ੍ਠੇ ਅਨਿਟ੍ਠੇ ਚ, ਸਙ੍ਕਪ੍ਪਸ੍ਸ ਵਸੀਕਤਾ’’.

੧੫੫. ‘‘ਮਨੋ ਚਸ੍ਸ ਸੁਪਣਿਹਿਤੋ, (ਇਤਿ ਸਾਤਾਗਿਰੋ ਯਕ੍ਖੋ)

ਸਬ੍ਬਭੂਤੇਸੁ ਤਾਦਿਨੋ;

ਅਥੋ ਇਟ੍ਠੇ ਅਨਿਟ੍ਠੇ ਚ, ਸਙ੍ਕਪ੍ਪਸ੍ਸ ਵਸੀਕਤਾ’’.

੧੫੬. ‘‘ਕਚ੍ਚਿ ਅਦਿਨ੍ਨਂ ਨਾਦਿਯਤਿ, (ਇਤਿ ਹੇਮਵਤੋ ਯਕ੍ਖੋ)

ਕਚ੍ਚਿ ਪਾਣੇਸੁ ਸਞ੍ਞਤੋ;

ਕਚ੍ਚਿ ਆਰਾ ਪਮਾਦਮ੍ਹਾ, ਕਚ੍ਚਿ ਝਾਨਂ ਨ ਰਿਞ੍ਚਤਿ’’.

੧੫੭. ‘‘ਨ ਸੋ ਅਦਿਨ੍ਨਂ ਆਦਿਯਤਿ, (ਇਤਿ ਸਾਤਾਗਿਰੋ ਯਕ੍ਖੋ)

ਅਥੋ ਪਾਣੇਸੁ ਸਞ੍ਞਤੋ;

ਅਥੋ ਆਰਾ ਪਮਾਦਮ੍ਹਾ, ਬੁਦ੍ਧੋ ਝਾਨਂ ਨ ਰਿਞ੍ਚਤਿ’’.

੧੫੮. ‘‘ਕਚ੍ਚਿ ਮੁਸਾ ਨ ਭਣਤਿ, (ਇਤਿ ਹੇਮਵਤੋ ਯਕ੍ਖੋ)

ਕਚ੍ਚਿ ਨ ਖੀਣਬ੍ਯਪ੍ਪਥੋ;

ਕਚ੍ਚਿ ਵੇਭੂਤਿਯਂ ਨਾਹ, ਕਚ੍ਚਿ ਸਮ੍ਫਂ ਨ ਭਾਸਤਿ’’.

੧੫੯. ‘‘ਮੁਸਾ ਚ ਸੋ ਨ ਭਣਤਿ, (ਇਤਿ ਸਾਤਾਗਿਰੋ ਯਕ੍ਖੋ)

ਅਥੋ ਨ ਖੀਣਬ੍ਯਪ੍ਪਥੋ;

ਅਥੋ ਵੇਭੂਤਿਯਂ ਨਾਹ, ਮਨ੍ਤਾ ਅਤ੍ਥਂ ਚ [ਅਤ੍ਥਂ ਸੋ (ਸੀ. ਪੀ. ਕ.)] ਭਾਸਤਿ’’.

੧੬੦. ‘‘ਕਚ੍ਚਿ ਨ ਰਜ੍ਜਤਿ ਕਾਮੇਸੁ, (ਇਤਿ ਹੇਮਵਤੋ ਯਕ੍ਖੋ)

ਕਚ੍ਚਿ ਚਿਤ੍ਤਂ ਅਨਾਵਿਲਂ;

ਕਚ੍ਚਿ ਮੋਹਂ ਅਤਿਕ੍ਕਨ੍ਤੋ, ਕਚ੍ਚਿ ਧਮ੍ਮੇਸੁ ਚਕ੍ਖੁਮਾ’’.

੧੬੧. ‘‘ਨ ਸੋ ਰਜ੍ਜਤਿ ਕਾਮੇਸੁ, (ਇਤਿ ਸਾਤਾਗਿਰੋ ਯਕ੍ਖੋ)

ਅਥੋ ਚਿਤ੍ਤਂ ਅਨਾਵਿਲਂ;

ਸਬ੍ਬਮੋਹਂ ਅਤਿਕ੍ਕਨ੍ਤੋ, ਬੁਦ੍ਧੋ ਧਮ੍ਮੇਸੁ ਚਕ੍ਖੁਮਾ’’.

੧੬੨. ‘‘ਕਚ੍ਚਿ ਵਿਜ੍ਜਾਯ ਸਮ੍ਪਨ੍ਨੋ, (ਇਤਿ ਹੇਮਵਤੋ ਯਕ੍ਖੋ )

ਕਚ੍ਚਿ ਸਂਸੁਦ੍ਧਚਾਰਣੋ;

ਕਚ੍ਚਿਸ੍ਸ ਆਸਵਾ ਖੀਣਾ, ਕਚ੍ਚਿ ਨਤ੍ਥਿ ਪੁਨਬ੍ਭਵੋ’’.

੧੬੩. ‘‘ਵਿਜ੍ਜਾਯ ਚੇਵ ਸਮ੍ਪਨ੍ਨੋ, (ਇਤਿ ਸਾਤਾਗਿਰੋ ਯਕ੍ਖੋ)

ਅਥੋ ਸਂਸੁਦ੍ਧਚਾਰਣੋ;

ਸਬ੍ਬਸ੍ਸ ਆਸਵਾ ਖੀਣਾ, ਨਤ੍ਥਿ ਤਸ੍ਸ ਪੁਨਬ੍ਭਵੋ’’.

੧੬੪. ‘‘ਸਮ੍ਪਨ੍ਨਂ ਮੁਨਿਨੋ ਚਿਤ੍ਤਂ, ਕਮ੍ਮੁਨਾ ਬ੍ਯਪ੍ਪਥੇਨ ਚ;

ਵਿਜ੍ਜਾਚਰਣਸਮ੍ਪਨ੍ਨਂ, ਧਮ੍ਮਤੋ ਨਂ ਪਸਂਸਤਿ’’.

੧੬੫. ‘‘ਸਮ੍ਪਨ੍ਨਂ ਮੁਨਿਨੋ ਚਿਤ੍ਤਂ, ਕਮ੍ਮੁਨਾ ਬ੍ਯਪ੍ਪਥੇਨ ਚ;

ਵਿਜ੍ਜਾਚਰਣਸਮ੍ਪਨ੍ਨਂ, ਧਮ੍ਮਤੋ ਅਨੁਮੋਦਸਿ’’.

੧੬੬. ‘‘ਸਮ੍ਪਨ੍ਨਂ ਮੁਨਿਨੋ ਚਿਤ੍ਤਂ, ਕਮ੍ਮੁਨਾ ਬ੍ਯਪ੍ਪਥੇਨ ਚ;

ਵਿਜ੍ਜਾਚਰਣਸਮ੍ਪਨ੍ਨਂ, ਹਨ੍ਦ ਪਸ੍ਸਾਮ ਗੋਤਮਂ.

੧੬੭. ‘‘ਏਣਿਜਙ੍ਘਂ ਕਿਸਂ ਵੀਰਂ [ਧੀਰਂ (ਸ੍ਯਾ.)], ਅਪ੍ਪਾਹਾਰਂ ਅਲੋਲੁਪਂ;

ਮੁਨਿਂ ਵਨਸ੍ਮਿਂ ਝਾਯਨ੍ਤਂ, ਏਹਿ ਪਸ੍ਸਾਮ ਗੋਤਮਂ.

੧੬੮. ‘‘ਸੀਹਂਵੇਕਚਰਂ ਨਾਗਂ, ਕਾਮੇਸੁ ਅਨਪੇਕ੍ਖਿਨਂ;

ਉਪਸਙ੍ਕਮ੍ਮ ਪੁਚ੍ਛਾਮ, ਮਚ੍ਚੁਪਾਸਪ੍ਪਮੋਚਨਂ.

੧੬੯. ‘‘ਅਕ੍ਖਾਤਾਰਂ ਪਵਤ੍ਤਾਰਂ, ਸਬ੍ਬਧਮ੍ਮਾਨ ਪਾਰਗੁਂ;

ਬੁਦ੍ਧਂ ਵੇਰਭਯਾਤੀਤਂ, ਮਯਂ ਪੁਚ੍ਛਾਮ ਗੋਤਮਂ’’.

੧੭੦. ‘‘ਕਿਸ੍ਮਿਂ ਲੋਕੋ ਸਮੁਪ੍ਪਨ੍ਨੋ, (ਇਤਿ ਹੇਮਵਤੋ ਯਕ੍ਖੋ)

ਕਿਸ੍ਮਿਂ ਕੁਬ੍ਬਤਿ ਸਨ੍ਥਵਂ [ਸਨ੍ਧਵਂ (ਕ.)];

ਕਿਸ੍ਸ ਲੋਕੋ ਉਪਾਦਾਯ, ਕਿਸ੍ਮਿਂ ਲੋਕੋ ਵਿਹਞ੍ਞਤਿ’’.

੧੭੧. ‘‘ਛਸੁ [ਛਸ੍ਸੁ (ਸੀ. ਪੀ.)] ਲੋਕੋ ਸਮੁਪ੍ਪਨ੍ਨੋ, (ਹੇਮਵਤਾਤਿ ਭਗਵਾ)

ਛਸੁ ਕੁਬ੍ਬਤਿ ਸਨ੍ਥਵਂ;

ਛਨ੍ਨਮੇਵ ਉਪਾਦਾਯ, ਛਸੁ ਲੋਕੋ ਵਿਹਞ੍ਞਤਿ’’.

੧੭੨. ‘‘ਕਤਮਂ ਤਂ ਉਪਾਦਾਨਂ, ਯਤ੍ਥ ਲੋਕੋ ਵਿਹਞ੍ਞਤਿ;

ਨਿਯ੍ਯਾਨਂ ਪੁਚ੍ਛਿਤੋ ਬ੍ਰੂਹਿ, ਕਥਂ ਦੁਕ੍ਖਾ ਪਮੁਚ੍ਚਤਿ’’ [ਪਮੁਞ੍ਚਤਿ (ਸ੍ਯਾ.)].

੧੭੩. ‘‘ਪਞ੍ਚ ਕਾਮਗੁਣਾ ਲੋਕੇ, ਮਨੋਛਟ੍ਠਾ ਪਵੇਦਿਤਾ;

ਏਤ੍ਥ ਛਨ੍ਦਂ ਵਿਰਾਜੇਤ੍ਵਾ, ਏਵਂ ਦੁਕ੍ਖਾ ਪਮੁਚ੍ਚਤਿ.

੧੭੪. ‘‘ਏਤਂ ਲੋਕਸ੍ਸ ਨਿਯ੍ਯਾਨਂ, ਅਕ੍ਖਾਤਂ ਵੋ ਯਥਾਤਥਂ;

ਏਤਂ ਵੋ ਅਹਮਕ੍ਖਾਮਿ, ਏਵਂ ਦੁਕ੍ਖਾ ਪਮੁਚ੍ਚਤਿ’’.

੧੭੫. ‘‘ਕੋ ਸੂਧ ਤਰਤਿ ਓਘਂ, ਕੋਧ ਤਰਤਿ ਅਣ੍ਣਵਂ;

ਅਪ੍ਪਤਿਟ੍ਠੇ ਅਨਾਲਮ੍ਬੇ, ਕੋ ਗਮ੍ਭੀਰੇ ਨ ਸੀਦਤਿ’’.

੧੭੬. ‘‘ਸਬ੍ਬਦਾ ਸੀਲਸਮ੍ਪਨ੍ਨੋ, ਪਞ੍ਞਵਾ ਸੁਸਮਾਹਿਤੋ;

ਅਜ੍ਝਤ੍ਤਚਿਨ੍ਤੀ [ਅਜ੍ਝਤ੍ਤਸਞ੍ਞੀ (ਸ੍ਯਾ. ਕਂ. ਕ.)] ਸਤਿਮਾ, ਓਘਂ ਤਰਤਿ ਦੁਤ੍ਤਰਂ.

੧੭੭. ‘‘ਵਿਰਤੋ ਕਾਮਸਞ੍ਞਾਯ, ਸਬ੍ਬਸਂਯੋਜਨਾਤਿਗੋ;

ਨਨ੍ਦੀਭਵਪਰਿਕ੍ਖੀਣੋ, ਸੋ ਗਮ੍ਭੀਰੇ ਨ ਸੀਦਤਿ’’.

੧੭੮. ‘‘ਗਬ੍ਭੀਰਪਞ੍ਞਂ ਨਿਪੁਣਤ੍ਥਦਸ੍ਸਿਂ, ਅਕਿਞ੍ਚਨਂ ਕਾਮਭਵੇ ਅਸਤ੍ਤਂ;

ਤਂ ਪਸ੍ਸਥ ਸਬ੍ਬਧਿ ਵਿਪ੍ਪਮੁਤ੍ਤਂ, ਦਿਬ੍ਬੇ ਪਥੇ ਕਮਮਾਨਂ ਮਹੇਸਿਂ.

੧੭੯. ‘‘ਅਨੋਮਨਾਮਂ ਨਿਪੁਣਤ੍ਥਦਸ੍ਸਿਂ, ਪਞ੍ਞਾਦਦਂ ਕਾਮਾਲਯੇ ਅਸਤ੍ਤਂ;

ਤਂ ਪਸ੍ਸਥ ਸਬ੍ਬਵਿਦੁਂ ਸੁਮੇਧਂ, ਅਰਿਯੇ ਪਥੇ ਕਮਮਾਨਂ ਮਹੇਸਿਂ.

੧੮੦. ‘‘ਸੁਦਿਟ੍ਠਂ ਵਤ ਨੋ ਅਜ੍ਜ, ਸੁਪ੍ਪਭਾਤਂ ਸੁਹੁਟ੍ਠਿਤਂ;

ਯਂ ਅਦ੍ਦਸਾਮ ਸਮ੍ਬੁਦ੍ਧਂ, ਓਘਤਿਣ੍ਣਮਨਾਸਵਂ.

੧੮੧. ‘‘ਇਮੇ ਦਸਸਤਾ ਯਕ੍ਖਾ, ਇਦ੍ਧਿਮਨ੍ਤੋ ਯਸਸ੍ਸਿਨੋ;

ਸਬ੍ਬੇ ਤਂ ਸਰਣਂ ਯਨ੍ਤਿ, ਤ੍ਵਂ ਨੋ ਸਤ੍ਥਾ ਅਨੁਤ੍ਤਰੋ.

੧੮੨. ‘‘ਤੇ ਮਯਂ ਵਿਚਰਿਸ੍ਸਾਮ, ਗਾਮਾ ਗਾਮਂ ਨਗਾ ਨਗਂ;

ਨਮਸ੍ਸਮਾਨਾ ਸਮ੍ਬੁਦ੍ਧਂ, ਧਮ੍ਮਸ੍ਸ ਚ ਸੁਧਮ੍ਮਤ’’ਨ੍ਤਿ.

ਹੇਮਵਤਸੁਤ੍ਤਂ ਨਵਮਂ ਨਿਟ੍ਠਿਤਂ.