੭. ਰਾਜਪੁਤ੍ਤਪੇਤਵਤ੍ਥੁ

੭੫੩. ਪੁਬ੍ਬੇ ਕਤਾਨਂ ਕਮ੍ਮਾਨਂ, ਵਿਪਾਕੋ ਮਥਯੇ ਮਨਂ;

ਰੂਪੇ ਸਦ੍ਦੇ ਰਸੇ ਗਨ੍ਧੇ, ਫੋਟ੍ਠਬ੍ਬੇ ਚ ਮਨੋਰਮੇ.

੭੫੪. ਨਚ੍ਚਂ ਗੀਤਂ ਰਤਿਂ ਖਿਡ੍ਡਂ, ਅਨੁਭੁਤ੍ਵਾ ਅਨਪ੍ਪਕਂ;

ਉਯ੍ਯਾਨੇ ਪਰਿਚਰਿਤ੍ਵਾ, ਪਵਿਸਨ੍ਤੋ ਗਿਰਿਬ੍ਬਜਂ.

੭੫੫. ਇਸਿਂ ਸੁਨੇਤ੍ਤ [ਸੁਨਿਤ (ਕ.)] ਮਦ੍ਦਕ੍ਖਿ, ਅਤ੍ਤਦਨ੍ਤਂ ਸਮਾਹਿਤਂ;

ਅਪ੍ਪਿਚ੍ਛਂ ਹਿਰਿਸਮ੍ਪਨ੍ਨਂ, ਉਞ੍ਛੇ ਪਤ੍ਤਗਤੇ ਰਤਂ.

੭੫੬. ਹਤ੍ਥਿਕ੍ਖਨ੍ਧਤੋ ਓਰੁਯ੍ਹ, ਲਦ੍ਧਾ ਭਨ੍ਤੇਤਿ ਚਾਬ੍ਰਵਿ;

ਤਸ੍ਸ ਪਤ੍ਤਂ ਗਹੇਤ੍ਵਾਨ, ਉਚ੍ਚਂ ਪਗ੍ਗਯ੍ਹ ਖਤ੍ਤਿਯੋ.

੭੫੭. ਥਣ੍ਡਿਲੇ ਪਤ੍ਤਂ ਭਿਨ੍ਦਿਤ੍ਵਾ, ਹਸਮਾਨੋ ਅਪਕ੍ਕਮਿ;

‘‘ਰਞ੍ਞੋ ਕਿਤਵਸ੍ਸਾਹਂ ਪੁਤ੍ਤੋ, ਕਿਂ ਮਂ ਭਿਕ੍ਖੁ ਕਰਿਸ੍ਸਸਿ’’.

੭੫੮. ਤਸ੍ਸ ਕਮ੍ਮਸ੍ਸ ਫਰੁਸਸ੍ਸ, ਵਿਪਾਕੋ ਕਟੁਕੋ ਅਹੁ;

ਯਂ ਰਾਜਪੁਤ੍ਤੋ ਵੇਦੇਸਿ, ਨਿਰਯਮ੍ਹਿ ਸਮਪ੍ਪਿਤੋ.

੭੫੯. ਛਲ਼ੇਵ ਚਤੁਰਾਸੀਤਿ, ਵਸ੍ਸਾਨਿ ਨਵੁਤਾਨਿ ਚ;

ਭੁਸਂ ਦੁਕ੍ਖਂ ਨਿਗਚ੍ਛਿਤ੍ਥੋ, ਨਿਰਯੇ ਕਤਕਿਬ੍ਬਿਸੋ.

੭੬੦. ਉਤ੍ਤਾਨੋਪਿ ਚ ਪਚ੍ਚਿਤ੍ਥ, ਨਿਕੁਜ੍ਜੋ ਵਾਮਦਕ੍ਖਿਣੋ;

ਉਦ੍ਧਂਪਾਦੋ ਠਿਤੋ ਚੇਵ, ਚਿਰਂ ਬਾਲੋ ਅਪਚ੍ਚਥ.

੭੬੧. ਬਹੂਨਿ ਵਸ੍ਸਸਹਸ੍ਸਾਨਿ, ਪੂਗਾਨਿ ਨਹੁਤਾਨਿ ਚ;

ਭੁਸਂ ਦੁਕ੍ਖਂ ਨਿਗਚ੍ਛਿਤ੍ਥੋ, ਨਿਰਯੇ ਕਤਕਿਬ੍ਬਿਸੋ.

੭੬੨. ਏਤਾਦਿਸਂ ਖੋ ਕਟੁਕਂ, ਅਪ੍ਪਦੁਟ੍ਠਪ੍ਪਦੋਸਿਨਂ;

ਪਚ੍ਚਨ੍ਤਿ ਪਾਪਕਮ੍ਮਨ੍ਤਾ, ਇਸਿਮਾਸਜ੍ਜ ਸੁਬ੍ਬਤਂ.

੭੬੩. ਸੋ ਤਤ੍ਥ ਬਹੁਵਸ੍ਸਾਨਿ, ਵੇਦਯਿਤ੍ਵਾ ਬਹੁਂ ਦੁਖਂ;

ਖੁਪ੍ਪਿਪਾਸਹਤੋ ਨਾਮ [ਖੁਪ੍ਪਿਪਾਸਾਹਤੋ ਨਾਮ (ਸੀ. ਪੀ)], ਪੇਤੋ ਆਸਿ ਤਤੋ ਚੁਤੋ.

੭੬੪. ਏਤਮਾਦੀਨਵਂ ਞਤ੍ਵਾ [ਦਿਸ੍ਵਾ (ਸੀ.)], ਇਸ੍ਸਰਮਦਸਮ੍ਭਵਂ;

ਪਹਾਯ ਇਸ੍ਸਰਮਦਂ, ਨਿਵਾਤਮਨੁਵਤ੍ਤਯੇ.

੭੬੫. ਦਿਟ੍ਠੇਵ ਧਮ੍ਮੇ ਪਾਸਂਸੋ, ਯੋ ਬੁਦ੍ਧੇਸੁ ਸਗਾਰਵੋ;

ਕਾਯਸ੍ਸ ਭੇਦਾ ਸਪ੍ਪਞ੍ਞੋ, ਸਗ੍ਗਂ ਸੋ ਉਪਪਜ੍ਜਤੀਤਿ.

ਰਾਜਪੁਤ੍ਤਪੇਤਵਤ੍ਥੁ ਸਤ੍ਤਮਂ.