੪. ਰੇਵਤੀਪੇਤਵਤ੍ਥੁ

੭੧੪. [ਵਿ. ਵ. ੮੬੩] ‘‘ਉਟ੍ਠੇਹਿ ਰੇਵਤੇ ਸੁਪਾਪਧਮ੍ਮੇ, ਅਪਾਰੁਤਦ੍ਵਾਰੇ ਅਦਾਨਸੀਲੇ;

ਨੇਸ੍ਸਾਮ ਤਂ ਯਤ੍ਥ ਥੁਨਨ੍ਤਿ ਦੁਗ੍ਗਤਾ, ਸਮਪ੍ਪਿਤਾ [ਸਮਜ੍ਜਤਾ (ਸੀ.)] ਨੇਰਯਿਕਾ ਦੁਖੇਨਾ’’ਤਿ.

੭੧੫. ਇਚ੍ਚੇਵ [ਇਚ੍ਚੇਵਂ (ਸ੍ਯਾ. ਕ.)] ਵਤ੍ਵਾਨ ਯਮਸ੍ਸ ਦੂਤਾ, ਤੇ ਦ੍ਵੇ ਯਕ੍ਖਾ ਲੋਹਿਤਕ੍ਖਾ ਬ੍ਰਹਨ੍ਤਾ;

ਪਚ੍ਚੇਕਬਾਹਾਸੁ ਗਹੇਤ੍ਵਾ ਰੇਵਤਂ, ਪਕ੍ਕਾਮਯੁਂ ਦੇਵਗਣਸ੍ਸ ਸਨ੍ਤਿਕੇ.

੭੧੬. ‘‘ਆਦਿਚ੍ਚਵਣ੍ਣਂ ਰੁਚਿਰਂ ਪਭਸ੍ਸਰਂ, ਬ੍ਯਮ੍ਹਂ ਸੁਭਂ ਕਞ੍ਚਨਜਾਲਛਨ੍ਨਂ;

ਕਸ੍ਸੇਤਮਾਕਿਣ੍ਣਜਨਂ ਵਿਮਾਨਂ, ਸੁਰਿਯਸ੍ਸ ਰਂਸੀਰਿਵ ਜੋਤਮਾਨਂ.

੭੧੭. ‘‘ਨਾਰੀਗਣਾ ਚਨ੍ਦਨਸਾਰਲਿਤ੍ਤਾ [ਚਨ੍ਦਨਸਾਰਾਨੁਲਿਤ੍ਤਾ (ਸ੍ਯਾ.)], ਉਭਤੋ ਵਿਮਾਨਂ ਉਪਸੋਭਯਨ੍ਤਿ;

ਤਂ ਦਿਸ੍ਸਤਿ ਸੁਰਿਯਸਮਾਨਵਣ੍ਣਂ, ਕੋ ਮੋਦਤਿ ਸਗ੍ਗਪਤ੍ਤੋ ਵਿਮਾਨੇ’’ਤਿ.

੭੧੮. ‘‘ਬਾਰਾਣਸਿਯਂ ਨਨ੍ਦਿਯੋ ਨਾਮਾਸਿ, ਉਪਾਸਕੋ ਅਮਚ੍ਛਰੀ ਦਾਨਪਤਿ ਵਦਞ੍ਞੂ;

ਤਸ੍ਸੇਤਮਾਕਿਣ੍ਣਜਨਂ ਵਿਮਾਨਂ, ਸੁਰਿਯਸ੍ਸ ਰਂਸੀਰਿਵ ਜੋਤਮਾਨਂ.

੭੧੯. ‘‘ਨਾਰੀਗਣਾ ਚਨ੍ਦਨਸਾਰਲਿਤ੍ਤਾ, ਉਭਤੋ ਵਿਮਾਨਂ ਉਪਸੋਭਯਨ੍ਤਿ;

ਤਂ ਦਿਸ੍ਸਤਿ ਸੁਰਿਯਸਮਾਨਵਣ੍ਣਂ, ਸੋ ਮੋਦਤਿ ਸਗ੍ਗਪਤ੍ਤੋ ਵਿਮਾਨੇ’’ਤਿ.

੭੨੦. ‘‘ਨਨ੍ਦਿਯਸ੍ਸਾਹਂ ਭਰਿਯਾ, ਅਗਾਰਿਨੀ ਸਬ੍ਬਕੁਲਸ੍ਸ ਇਸ੍ਸਰਾ;

ਭਤ੍ਤੁ ਵਿਮਾਨੇ ਰਮਿਸ੍ਸਾਮਿ ਦਾਨਹਂ, ਨ ਪਤ੍ਥਯੇ ਨਿਰਯਦਸ੍ਸਨਾਯਾ’’ਤਿ.

੭੨੧. ‘‘ਏਸੋ ਤੇ ਨਿਰਯੋ ਸੁਪਾਪਧਮ੍ਮੇ, ਪੁਞ੍ਞਂ ਤਯਾ ਅਕਤਂ ਜੀਵਲੋਕੇ;

ਨ ਹਿ ਮਚ੍ਛਰੀ ਰੋਸਕੋ ਪਾਪਧਮ੍ਮੋ, ਸਗ੍ਗੂਪਗਾਨਂ ਲਭਤਿ ਸਹਬ੍ਯਤ’’ਨ੍ਤਿ.

੭੨੨. ‘‘ਕਿਂ ਨੁ ਗੂਥਞ੍ਚ ਮੁਤ੍ਤਞ੍ਚ, ਅਸੁਚੀ ਪਟਿਦਿਸ੍ਸਤਿ;

ਦੁਗ੍ਗਨ੍ਧਂ ਕਿਮਿਦਂ ਮੀਲ਼੍ਹਂ, ਕਿਮੇਤਂ ਉਪਵਾਯਤੀ’’ਤਿ.

੭੨੩. ‘‘ਏਸ ਸਂਸਵਕੋ ਨਾਮ, ਗਮ੍ਭੀਰੋ ਸਤਪੋਰਿਸੋ;

ਯਤ੍ਥ ਵਸ੍ਸਸਹਸ੍ਸਾਨਿ, ਤੁਵਂ ਪਚ੍ਚਸਿ ਰੇਵਤੇ’’ਤਿ.

੭੨੪. ‘‘ਕਿਂ ਨੁ ਕਾਯੇਨ ਵਾਚਾਯ, ਮਨਸਾ ਦੁਕ੍ਕਟਂ ਕਤਂ;

ਕੇਨ ਸਂਸਵਕੋ ਲਦ੍ਧੋ, ਗਮ੍ਭੀਰੋ ਸਤਪੋਰਿਸੋ’’ਤਿ.

੭੨੫. ‘‘ਸਮਣੇ ਬ੍ਰਾਹ੍ਮਣੇ ਚਾਪਿ, ਅਞ੍ਞੇ ਵਾਪਿ ਵਨਿਬ੍ਬਕੇ;

ਮੁਸਾਵਾਦੇਨ ਵਞ੍ਚੇਸਿ, ਤਂ ਪਾਪਂ ਪਕਤਂ ਤਯਾ.

੭੨੬. ‘‘ਤੇਨ ਸਂਸਵਕੋ ਲਦ੍ਧੋ, ਗਮ੍ਭੀਰੋ ਸਤਪੋਰਿਸੋ;

ਤਤ੍ਥ ਵਸ੍ਸਸਹਸ੍ਸਾਨਿ, ਤੁਵਂ ਪਚ੍ਚਸਿ ਰੇਵਤੇ.

੭੨੭. ‘‘ਹਤ੍ਥੇਪਿ ਛਿਨ੍ਦਨ੍ਤਿ ਅਥੋਪਿ ਪਾਦੇ, ਕਣ੍ਣੇਪਿ ਛਿਨ੍ਦਨ੍ਤਿ ਅਥੋਪਿ ਨਾਸਂ;

ਅਥੋਪਿ ਕਾਕੋਲ਼ਗਣਾ ਸਮੇਚ੍ਚ, ਸਙ੍ਗਮ੍ਮ ਖਾਦਨ੍ਤਿ ਵਿਫਨ੍ਦਮਾਨ’’ਨ੍ਤਿ.

੭੨੮. ‘‘ਸਾਧੁ ਖੋ ਮਂ ਪਟਿਨੇਥ, ਕਾਹਾਮਿ ਕੁਸਲਂ ਬਹੁਂ;

ਦਾਨੇਨ ਸਮਚਰਿਯਾਯ, ਸਂਯਮੇਨ ਦਮੇਨ ਚ;

ਯਂ ਕਤ੍ਵਾ ਸੁਖਿਤਾ ਹੋਨ੍ਤਿ, ਨ ਚ ਪਚ੍ਛਾਨੁਤਪ੍ਪਰੇ’’ਤਿ.

੭੨੯. ‘‘ਪੁਰੇ ਤੁਵਂ ਪਮਜ੍ਜਿਤ੍ਵਾ, ਇਦਾਨਿ ਪਰਿਦੇਵਸਿ;

ਸਯਂ ਕਤਾਨਂ ਕਮ੍ਮਾਨਂ, ਵਿਪਾਕਂ ਅਨੁਭੋਸ੍ਸਸੀ’’ਤਿ.

੭੩੦. ‘‘ਕੋ ਦੇਵਲੋਕਤੋ ਮਨੁਸ੍ਸਲੋਕਂ, ਗਨ੍ਤ੍ਵਾਨ ਪੁਟ੍ਠੋ ਮੇ ਏਵਂ ਵਦੇਯ੍ਯ;

‘ਨਿਕ੍ਖਿਤ੍ਤਦਣ੍ਡੇਸੁ ਦਦਾਥ ਦਾਨਂ, ਅਚ੍ਛਾਦਨਂ ਸੇਯ੍ਯ [ਸਯਨ (ਸੀ.)] ਮਥਨ੍ਨਪਾਨਂ;

ਨ ਹਿ ਮਚ੍ਛਰੀ ਰੋਸਕੋ ਪਾਪਧਮ੍ਮੋ, ਸਗ੍ਗੂਪਗਾਨਂ ਲਭਤਿ ਸਹਬ੍ਯਤਂ’.

੭੩੧. ‘‘ਸਾਹਂ ਨੂਨ ਇਤੋ ਗਨ੍ਤ੍ਵਾ, ਯੋਨਿਂ ਲਦ੍ਧਾਨ ਮਾਨੁਸਿਂ;

ਵਦਞ੍ਞੂ ਸੀਲਸਮ੍ਪਨ੍ਨਾ, ਕਾਹਾਮਿ ਕੁਸਲਂ ਬਹੁਂ;

ਦਾਨੇਨ ਸਮਚਰਿਯਾਯ, ਸਂਯਮੇਨ ਦਮੇਨ ਚ.

੭੩੨. ‘‘ਆਰਾਮਾਨਿ ਚ ਰੋਪਿਸ੍ਸਂ, ਦੁਗ੍ਗੇ ਸਙ੍ਕਮਨਾਨਿ ਚ;

ਪਪਞ੍ਚ ਉਦਪਾਨਞ੍ਚ, ਵਿਪ੍ਪਸਨ੍ਨੇਨ ਚੇਤਸਾ.

੭੩੩. ‘‘ਚਾਤੁਦ੍ਦਸਿਂ ਪਞ੍ਚਦਸਿਂ, ਯਾ ਚ ਪਕ੍ਖਸ੍ਸ ਅਟ੍ਠਮੀ;

ਪਾਟਿਹਾਰਿਯਪਕ੍ਖਞ੍ਚ, ਅਟ੍ਠਙ੍ਗਸੁਸਮਾਗਤਂ.

੭੩੪. ‘‘ਉਪੋਸਥਂ ਉਪਵਸਿਸ੍ਸਂ, ਸਦਾ ਸੀਲੇਸੁ ਸਂਵੁਤਾ;

ਨ ਚ ਦਾਨੇ ਪਮਜ੍ਜਿਸ੍ਸਂ, ਸਾਮਂ ਦਿਟ੍ਠਮਿਦਂ ਮਯਾ’’ਤਿ.

੭੩੫. ਇਚ੍ਚੇਵਂ ਵਿਪ੍ਪਲਪਨ੍ਤਿਂ, ਫਨ੍ਦਮਾਨਂ ਤਤੋ ਤਤੋ;

ਖਿਪਿਂਸੁ ਨਿਰਯੇ ਘੋਰੇ, ਉਦ੍ਧਂਪਾਦਂ ਅਵਂਸਿਰਂ.

੭੩੬. ‘‘ਅਹਂ ਪੁਰੇ ਮਚ੍ਛਰਿਨੀ ਅਹੋਸਿਂ, ਪਰਿਭਾਸਿਕਾ ਸਮਣਬ੍ਰਾਹ੍ਮਣਾਨਂ;

ਵਿਤਥੇਨ ਚ ਸਾਮਿਕਂ ਵਞ੍ਚਯਿਤ੍ਵਾ, ਪਚ੍ਚਾਮਹਂ ਨਿਰਯੇ ਘੋਰਰੂਪੇ’’ਤਿ.

ਰੇਵਤੀਪੇਤਵਤ੍ਥੁ ਚਤੁਤ੍ਥਂ.