੫. ਉਚ੍ਛੁਪੇਤਵਤ੍ਥੁ

੭੩੭. ‘‘ਇਦਂ ਮਮ ਉਚ੍ਛੁਵਨਂ ਮਹਨ੍ਤਂ, ਨਿਬ੍ਬਤ੍ਤਤਿ ਪੁਞ੍ਞਫਲਂ ਅਨਪ੍ਪਕਂ;

ਤਂ ਦਾਨਿ ਮੇ ਨ [ਨ ਦਾਨਿ ਮੇ ਤਂ (ਸੀ. ਕ.)] ਪਰਿਭੋਗਮੇਤਿ, ਆਚਿਕ੍ਖ ਭਨ੍ਤੇ ਕਿਸ੍ਸ ਅਯਂ ਵਿਪਾਕੋ.

੭੩੮. ‘‘ਹਞ੍ਞਾਮਿ [ਵਿਹਞ੍ਞਾਮਿ (ਕ.)] ਖਜ੍ਜਾਮਿ ਚ ਵਾਯਮਾਮਿ, ਪਰਿਸਕ੍ਕਾਮਿ ਪਰਿਭੁਞ੍ਜਿਤੁਂ ਕਿਞ੍ਚਿ;

ਸ੍ਵਾਹਂ ਛਿਨ੍ਨਥਾਮੋ ਕਪਣੋ ਲਾਲਪਾਮਿ, ਕਿਸ੍ਸ [ਕਿਸ੍ਸਸ੍ਸ (ਸੀ.), ਕਿਸ੍ਸਸ੍ਸੁ (?)] ਕਮ੍ਮਸ੍ਸ ਅਯਂ ਵਿਪਾਕੋ.

੭੩੯. ‘‘ਵਿਘਾਤੋ ਚਾਹਂ ਪਰਿਪਤਾਮਿ ਛਮਾਯਂ, ਪਰਿਵਤ੍ਤਾਮਿ ਵਾਰਿਚਰੋਵ ਘਮ੍ਮੇ;

ਰੁਦਤੋ ਚ ਮੇ [ਦੂਰਤੋ ਚ ਮੇ (ਸ੍ਯਾ. ਕ.)] ਅਸ੍ਸੁਕਾ ਨਿਗ੍ਗਲਨ੍ਤਿ, ਆਚਿਕ੍ਖ ਭਨ੍ਤੇ ਕਿਸ੍ਸ ਅਯਂ ਵਿਪਾਕੋ.

੭੪੦. ‘‘ਛਾਤੋ ਕਿਲਨ੍ਤੋ ਚ ਪਿਪਾਸਿਤੋ ਚ, ਸਨ੍ਤਸ੍ਸਿਤੋ ਸਾਤਸੁਖਂ ਨ ਵਿਨ੍ਦੇ;

ਪੁਚ੍ਛਾਮਿ ਤਂ ਏਤਮਤ੍ਥਂ ਭਦਨ੍ਤੇ, ਕਥਂ ਨੁ ਉਚ੍ਛੁਪਰਿਭੋਗਂ ਲਭੇਯ੍ਯ’’ਨ੍ਤਿ.

੭੪੧. ‘‘ਪੁਰੇ ਤੁਵਂ ਕਮ੍ਮਮਕਾਸਿ ਅਤ੍ਤਨਾ, ਮਨੁਸ੍ਸਭੂਤੋ ਪੁਰਿਮਾਯ ਜਾਤਿਯਾ;

ਅਹਞ੍ਚ ਤਂ ਏਤਮਤ੍ਥਂ ਵਦਾਮਿ, ਸੁਤ੍ਵਾਨ ਤ੍ਵਂ ਏਤਮਤ੍ਥਂ ਵਿਜਾਨ.

੭੪੨. ‘‘ਉਚ੍ਛੁਂ ਤੁਵਂ ਖਾਦਮਾਨੋ ਪਯਾਤੋ, ਪੁਰਿਸੋ ਚ ਤੇ ਪਿਟ੍ਠਿਤੋ ਅਨ੍ਵਗਚ੍ਛਿ;

ਸੋ ਚ ਤਂ ਪਚ੍ਚਾਸਨ੍ਤੋ ਕਥੇਸਿ, ਤਸ੍ਸ ਤੁਵਂ ਨ ਕਿਞ੍ਚਿ ਆਲਪਿਤ੍ਥ.

੭੪੩. ‘‘ਸੋ ਚ ਤਂ ਅਭਣਨ੍ਤਂ ਅਯਾਚਿ, ‘ਦੇਹਯ੍ਯ ਉਚ੍ਛੁ’ਨ੍ਤਿ ਚ ਤਂ ਅਵੋਚ;

ਤਸ੍ਸ ਤੁਵਂ ਪਿਟ੍ਠਿਤੋ ਉਚ੍ਛੁਂ ਅਦਾਸਿ, ਤਸ੍ਸੇਤਂ ਕਮ੍ਮਸ੍ਸ ਅਯਂ ਵਿਪਾਕੋ.

੭੪੪. ‘‘ਇਙ੍ਘ ਤ੍ਵਂ ਗਨ੍ਤ੍ਵਾਨ ਪਿਟ੍ਠਿਤੋ ਗਣ੍ਹੇਯ੍ਯਾਸਿ [ਇਙ੍ਘ ਤ੍ਵਂ ਪਿਟ੍ਠਿਤੋ ਗਣ੍ਹ ਉਚ੍ਛੁਂ (ਸੀ.)], ਗਹੇਤ੍ਵਾਨ ਤਂ ਖਾਦਸ੍ਸੁ ਯਾਵਦਤ੍ਥਂ;

ਤੇਨੇਵ ਤ੍ਵਂ ਅਤ੍ਤਮਨੋ ਭਵਿਸ੍ਸਸਿ, ਹਟ੍ਠੋ ਚੁਦਗ੍ਗੋ ਚ ਪਮੋਦਿਤੋ ਚਾ’’ਤਿ.

੭੪੫. ਗਨ੍ਤ੍ਵਾਨ ਸੋ ਪਿਟ੍ਠਿਤੋ ਅਗ੍ਗਹੇਸਿ, ਗਹੇਤ੍ਵਾਨ ਤਂ ਖਾਦਿ ਯਾਵਦਤ੍ਥਂ;

ਤੇਨੇਵ ਸੋ ਅਤ੍ਤਮਨੋ ਅਹੋਸਿ, ਹਟ੍ਠੋ ਚੁਦਗ੍ਗੋ ਚ ਪਮੋਦਿਤੋ ਚਾਤਿ.

ਉਚ੍ਛੁਪੇਤਵਤ੍ਥੁ ਪਞ੍ਚਮਂ.