੪. ਨਨ੍ਦਾਪੇਤਿਵਤ੍ਥੁ

੧੬੮. ‘‘ਕਾਲ਼ੀ ਦੁਬ੍ਬਣ੍ਣਰੂਪਾਸਿ, ਫਰੁਸਾ ਭੀਰੁਦਸ੍ਸਨਾ;

ਪਿਙ੍ਗਲਾਸਿ ਕਲ਼ਾਰਾਸਿ, ਨ ਤਂ ਮਞ੍ਞਾਮਿ ਮਾਨੁਸਿ’’ਨ੍ਤਿ.

੧੬੯. ‘‘ਅਹਂ ਨਨ੍ਦਾ ਨਨ੍ਦਿਸੇਨ, ਭਰਿਯਾ ਤੇ ਪੁਰੇ ਅਹੁਂ;

ਪਾਪਕਮ੍ਮਂ ਕਰਿਤ੍ਵਾਨ, ਪੇਤਲੋਕਂ ਇਤੋ ਗਤਾ’’ਤਿ.

੧੭੦. ‘‘ਕਿਂ ਨੁ ਕਾਯੇਨ ਵਾਚਾਯ, ਮਨਸਾ ਦੁਕ੍ਕਟਂ ਕਤਂ;

ਕਿਸ੍ਸ ਕਮ੍ਮਵਿਪਾਕੇਨ, ਪੇਤਲੋਕਂ ਇਤੋ ਗਤਾ’’ਤਿ.

੧੭੧. ‘‘ਚਣ੍ਡੀ ਚ ਫਰੁਸਾ ਚਾਸਿਂ [ਚਣ੍ਡੀ ਫਰੁਸਵਾਚਾ ਚ (ਸੀ.)], ਤਯਿ ਚਾਪਿ ਅਗਾਰਵਾ;

ਤਾਹਂ ਦੁਰੁਤ੍ਤਂ ਵਤ੍ਵਾਨ, ਪੇਤਲੋਕਂ ਇਤੋ ਗਤਾ’’ਤਿ.

੧੭੨. ‘‘ਹਨ੍ਦੁਤ੍ਤਰੀਯਂ ਦਦਾਮਿ ਤੇ, ਇਮਂ [ਇਦਂ (ਸੀ. ਅਟ੍ਠ.)] ਦੁਸ੍ਸਂ ਨਿਵਾਸਯ;

ਇਮਂ ਦੁਸ੍ਸਂ ਨਿਵਾਸੇਤ੍ਵਾ, ਏਹਿ ਨੇਸ੍ਸਾਮਿ ਤਂ ਘਰਂ.

੧੭੩. ‘‘ਵਤ੍ਥਞ੍ਚ ਅਨ੍ਨਪਾਨਞ੍ਚ, ਲਚ੍ਛਸਿ ਤ੍ਵਂ ਘਰਂ ਗਤਾ;

ਪੁਤ੍ਤੇ ਚ ਤੇ ਪਸ੍ਸਿਸ੍ਸਸਿ, ਸੁਣਿਸਾਯੋ ਚ ਦਕ੍ਖਸੀ’’ਤਿ.

੧੭੪. ‘‘ਹਤ੍ਥੇਨ ਹਤ੍ਥੇ ਤੇ ਦਿਨ੍ਨਂ, ਨ ਮਯ੍ਹਂ ਉਪਕਪ੍ਪਤਿ;

ਭਿਕ੍ਖੂ ਚ ਸੀਲਸਮ੍ਪਨ੍ਨੇ, ਵੀਤਰਾਗੇ ਬਹੁਸ੍ਸੁਤੇ.

੧੭੫. ‘‘ਤਪ੍ਪੇਹਿ ਅਨ੍ਨਪਾਨੇਨ, ਮਮ ਦਕ੍ਖਿਣਮਾਦਿਸ;

ਤਦਾਹਂ ਸੁਖਿਤਾ ਹੇਸ੍ਸਂ, ਸਬ੍ਬਕਾਮਸਮਿਦ੍ਧਿਨੀ’’ਤਿ.

੧੭੬. ਸਾਧੂਤਿ ਸੋ ਪਟਿਸ੍ਸੁਤ੍ਵਾ, ਦਾਨਂ ਵਿਪੁਲਮਾਕਿਰਿ;

ਅਨ੍ਨਂ ਪਾਨਂ ਖਾਦਨੀਯਂ, ਵਤ੍ਥਸੇਨਾਸਨਾਨਿ ਚ;

ਛਤ੍ਤਂ ਗਨ੍ਧਞ੍ਚ ਮਾਲਞ੍ਚ, ਵਿਵਿਧਾ ਚ ਉਪਾਹਨਾ.

੧੭੭. ਭਿਕ੍ਖੂ ਚ ਸੀਲਸਮ੍ਪਨ੍ਨੇ, ਵੀਤਰਾਗੇ ਬਹੁਸ੍ਸੁਤੇ;

ਤਪ੍ਪੇਤ੍ਵਾ ਅਨ੍ਨਪਾਨੇਨ, ਤਸ੍ਸਾ ਦਕ੍ਖਿਣਮਾਦਿਸੀ.

੧੭੮. ਸਮਨਨ੍ਤਰਾਨੁਦ੍ਦਿਟ੍ਠੇ, ਵਿਪਾਕੋ ਉਦਪਜ੍ਜਥ;

ਭੋਜਨਚ੍ਛਾਦਨਪਾਨੀਯਂ, ਦਕ੍ਖਿਣਾਯ ਇਦਂ ਫਲਂ.

੧੭੯. ਤਤੋ ਸੁਦ੍ਧਾ ਸੁਚਿਵਸਨਾ, ਕਾਸਿਕੁਤ੍ਤਮਧਾਰਿਨੀ;

ਵਿਚਿਤ੍ਤਵਤ੍ਥਾਭਰਣਾ, ਸਾਮਿਕਂ ਉਪਸਙ੍ਕਮਿ.

੧੮੦. ‘‘ਅਭਿਕ੍ਕਨ੍ਤੇਨ ਵਣ੍ਣੇਨ, ਯਾ ਤ੍ਵਂ ਤਿਟ੍ਠਸਿ ਦੇਵਤੇ;

ਓਭਾਸੇਨ੍ਤੀ ਦਿਸਾ ਸਬ੍ਬਾ, ਓਸਧੀ ਵਿਯ ਤਾਰਕਾ.

੧੮੧. ‘‘ਕੇਨ ਤੇਤਾਦਿਸੋ ਵਣ੍ਣੋ, ਕੇਨ ਤੇ ਇਧ ਮਿਜ੍ਝਤਿ;

ਉਪ੍ਪਜ੍ਜਨ੍ਤਿ ਚ ਤੇ ਭੋਗਾ, ਯੇ ਕੇਚਿ ਮਨਸੋ ਪਿਯਾ.

੧੮੨. ‘‘ਪੁਚ੍ਛਾਮਿ ਤਂ ਦੇਵਿ ਮਹਾਨੁਭਾਵੇ, ਮਨੁਸ੍ਸਭੂਤਾ ਕਿਮਕਾਸਿ ਪੁਞ੍ਞਂ;

ਕੇਨਾਸਿ ਏਵਂ ਜਲਿਤਾਨੁਭਾਵਾ, ਵਣ੍ਣੋ ਚ ਤੇ ਸਬ੍ਬਦਿਸਾ ਪਭਾਸਤੀ’’ਤਿ.

੧੮੩. ‘‘ਅਹਂ ਨਨ੍ਦਾ ਨਨ੍ਦਿਸੇਨ, ਭਰਿਯਾ ਤੇ ਪੁਰੇ ਅਹੁਂ;

ਪਾਪਕਮ੍ਮਂ ਕਰਿਤ੍ਵਾਨ, ਪੇਤਲੋਕਂ ਇਤੋ ਗਤਾ.

੧੮੪. ‘‘ਤਵ ਦਿਨ੍ਨੇਨ ਦਾਨੇਨ, ਮੋਦਾਮਿ ਅਕੁਤੋਭਯਾ;

ਚਿਰਂ ਜੀਵ ਗਹਪਤਿ, ਸਹ ਸਬ੍ਬੇਹਿ ਞਾਤਿਭਿ;

ਅਸੋਕਂ ਵਿਰਜਂ ਖੇਮਂ, ਆਵਾਸਂ ਵਸਵਤ੍ਤਿਨਂ.

੧੮੫. ‘‘ਇਧ ਧਮ੍ਮਂ ਚਰਿਤ੍ਵਾਨ, ਦਾਨਂ ਦਤ੍ਵਾ ਗਹਪਤਿ;

ਵਿਨੇਯ੍ਯ ਮਚ੍ਛੇਰਮਲਂ ਸਮੂਲਂ, ਅਨਿਨ੍ਦਿਤੋ ਸਗ੍ਗਮੁਪੇਹਿ ਠਾਨ’’ਨ੍ਤਿ.

ਨਨ੍ਦਾਪੇਤਿਵਤ੍ਥੁ ਚਤੁਤ੍ਥਂ.