੧੦. ਉਤ੍ਤਰਮਾਤੁਪੇਤਿਵਤ੍ਥੁ

੩੩੧. ਦਿਵਾਵਿਹਾਰਗਤਂ ਭਿਕ੍ਖੁਂ, ਗਙ੍ਗਾਤੀਰੇ ਨਿਸਿਨ੍ਨਕਂ;

ਤਂ ਪੇਤੀ ਉਪਸਙ੍ਕਮ੍ਮ, ਦੁਬ੍ਬਣ੍ਣਾ ਭੀਰੁਦਸ੍ਸਨਾ.

੩੩੨. ਕੇਸਾ ਚਸ੍ਸਾ ਅਤਿਦੀਘਾ [ਅਹੂ ਦੀਘਾ (ਕ.)], ਯਾਵਭੂਮਾਵਲਮ੍ਬਰੇ [ਯਾਵ ਭੂਮ੍ਯਾ’ਵਲਮ੍ਬਰੇ (?)];

ਕੇਸੇਹਿ ਸਾ ਪਟਿਚ੍ਛਨ੍ਨਾ, ਸਮਣਂ ਏਤਦਬ੍ਰਵਿ.

੩੩੩. ‘‘ਪਞ੍ਚਪਣ੍ਣਾਸਵਸ੍ਸਾਨਿ, ਯਤੋ ਕਾਲਙ੍ਕਤਾ ਅਹਂ;

ਨਾਭਿਜਾਨਾਮਿ ਭੁਤ੍ਤਂ ਵਾ, ਪੀਤਂ ਵਾ ਪਨ ਪਾਨਿਯਂ;

ਦੇਹਿ ਤ੍ਵਂ ਪਾਨਿਯਂ ਭਨ੍ਤੇ, ਤਸਿਤਾ ਪਾਨਿਯਾਯ ਮੇ’’ਤਿ.

੩੩੪. ‘‘ਅਯਂ ਸੀਤੋਦਿਕਾ ਗਙ੍ਗਾ, ਹਿਮਵਨ੍ਤਤੋ [ਹਿਮਵਨ੍ਤਾਵ (ਕ.)] ਸਨ੍ਦਤਿ;

ਪਿਵ ਏਤ੍ਤੋ ਗਹੇਤ੍ਵਾਨ, ਕਿਂ ਮਂ ਯਾਚਸਿ ਪਾਨਿਯ’’ਨ੍ਤਿ.

੩੩੫. ‘‘ਸਚਾਹਂ ਭਨ੍ਤੇ ਗਙ੍ਗਾਯ, ਸਯਂ ਗਣ੍ਹਾਮਿ ਪਾਨਿਯਂ;

ਲੋਹਿਤਂ ਮੇ ਪਰਿਵਤ੍ਤਤਿ, ਤਸ੍ਮਾ ਯਾਚਾਮਿ ਪਾਨਿਯ’’ਨ੍ਤਿ.

੩੩੬. ‘‘ਕਿਂ ਨੁ ਕਾਯੇਨ ਵਾਚਾਯ, ਮਨਸਾ ਦੁਕ੍ਕਟਂ ਕਤਂ;

ਕਿਸ੍ਸ ਕਮ੍ਮਵਿਪਾਕੇਨ, ਗਙ੍ਗਾ ਤੇ ਹੋਤਿ ਲੋਹਿਤ’’ਨ੍ਤਿ.

੩੩੭. ‘‘ਪੁਤ੍ਤੋ ਮੇ ਉਤ੍ਤਰੋ ਨਾਮ [ਪੁਤ੍ਤੋ ਮੇ ਭਨ੍ਤੇ ਉਤ੍ਤਰੋ (ਕ.)], ਸਦ੍ਧੋ ਆਸਿ ਉਪਾਸਕੋ;

ਸੋ ਚ ਮਯ੍ਹਂ ਅਕਾਮਾਯ, ਸਮਣਾਨਂ ਪਵੇਚ੍ਛਤਿ.

੩੩੮. ‘‘ਚੀਵਰਂ ਪਿਣ੍ਡਪਾਤਞ੍ਚ, ਪਚ੍ਚਯਂ ਸਯਨਾਸਨਂ;

ਤਮਹਂ ਪਰਿਭਾਸਾਮਿ, ਮਚ੍ਛੇਰੇਨ ਉਪਦ੍ਦੁਤਾ.

੩੩੯. ‘‘ਯਂ ਤ੍ਵਂ ਮਯ੍ਹਂ ਅਕਾਮਾਯ, ਸਮਣਾਨਂ ਪਵੇਚ੍ਛਸਿ;

ਚੀਵਰਂ ਪਿਣ੍ਡਪਾਤਞ੍ਚ, ਪਚ੍ਚਯਂ ਸਯਨਾਸਨਂ.

੩੪੦. ‘‘ਏਤਂ ਤੇ ਪਰਲੋਕਸ੍ਮਿਂ, ਲੋਹਿਤਂ ਹੋਤੁ ਉਤ੍ਤਰ;

ਤਸ੍ਸ ਕਮ੍ਮਸ੍ਸ ਵਿਪਾਕੇਨ, ਗਙ੍ਗਾ ਮੇ ਹੋਤਿ ਲੋਹਿਤ’’ਨ੍ਤਿ.

ਉਤ੍ਤਰਮਾਤੁਪੇਤਿਵਤ੍ਥੁ ਦਸਮਂ.