੬. ਪਞ੍ਚਪੁਤ੍ਤਖਾਦਪੇਤਿਵਤ੍ਥੁ

੨੬. ‘‘ਨਗ੍ਗਾ ਦੁਬ੍ਬਣ੍ਣਰੂਪਾਸਿ, ਦੁਗ੍ਗਨ੍ਧਾ ਪੂਤਿ ਵਾਯਸਿ;

ਮਕ੍ਖਿਕਾਹਿ ਪਰਿਕਿਣ੍ਣਾ [ਮਕ੍ਖਿਕਾਪਰਿਕਿਣ੍ਣਾ ਚ (ਸੀ.)], ਕਾ ਨੁ ਤ੍ਵਂ ਇਧ ਤਿਟ੍ਠਸੀ’’ਤਿ.

੨੭. ‘‘ਅਹਂ ਭਦਨ੍ਤੇ [ਭਦ੍ਦਨ੍ਤੇ (ਕ.)] ਪੇਤੀਮ੍ਹਿ, ਦੁਗ੍ਗਤਾ ਯਮਲੋਕਿਕਾ;

ਪਾਪਕਮ੍ਮਂ ਕਰਿਤ੍ਵਾਨ, ਪੇਤਲੋਕਂ ਇਤੋ ਗਤਾ.

੨੮. ‘‘ਕਾਲੇਨ ਪਞ੍ਚ ਪੁਤ੍ਤਾਨਿ, ਸਾਯਂ ਪਞ੍ਚ ਪੁਨਾਪਰੇ;

ਵਿਜਾਯਿਤ੍ਵਾਨ ਖਾਦਾਮਿ, ਤੇਪਿ ਨਾ ਹੋਨ੍ਤਿ ਮੇ ਅਲਂ.

੨੯. ‘‘ਪਰਿਡਯ੍ਹਤਿ ਧੂਮਾਯਤਿ, ਖੁਦਾਯ [ਖੁਦ੍ਦਾਯ (ਕ.)] ਹਦਯਂ ਮਮ;

ਪਾਨੀਯਂ ਨ ਲਭੇ ਪਾਤੁਂ, ਪਸ੍ਸ ਮਂ ਬ੍ਯਸਨਂ ਗਤ’’ਨ੍ਤਿ.

੩੦. ‘‘ਕਿਂ ਨੁ ਕਾਯੇਨ ਵਾਚਾਯ, ਮਨਸਾ ਦੁਕ੍ਕਟਂ ਕਤਂ;

ਕਿਸ੍ਸ ਕਮ੍ਮਵਿਪਾਕੇਨ, ਪੁਤ੍ਤਮਂਸਾਨਿ ਖਾਦਸੀ’’ਤਿ.

੩੧. ‘‘ਸਪਤੀ [ਸਪਤ੍ਤੀ (ਸੀ.)] ਮੇ ਗਬ੍ਭਿਨੀ ਆਸਿ, ਤਸ੍ਸਾ ਪਾਪਂ ਅਚੇਤਯਿਂ;

ਸਾਹਂ ਪਦੁਟ੍ਠਮਨਸਾ, ਅਕਰਿਂ ਗਬ੍ਭਪਾਤਨਂ.

੩੨. ‘‘ਤਸ੍ਸਾ ਦ੍ਵੇਮਾਸਿਕੋ ਗਬ੍ਭੋ, ਲੋਹਿਤਞ੍ਞੇਵ ਪਗ੍ਘਰਿ;

ਤਦਸ੍ਸਾ ਮਾਤਾ ਕੁਪਿਤਾ, ਮਯ੍ਹਂ ਞਾਤੀ ਸਮਾਨਯਿ;

ਸਪਥਞ੍ਚ ਮਂ ਕਾਰੇਸਿ, ਪਰਿਭਾਸਾਪਯੀ ਚ ਮਂ.

੩੩. ‘‘ਸਾਹਂ ਘੋਰਞ੍ਚ ਸਪਥਂ, ਮੁਸਾਵਾਦਂ ਅਭਾਸਿਸਂ;

ਪੁਤ੍ਤਮਂਸਾਨਿ ਖਾਦਾਮਿ, ਸਚੇ ਤਂ ਪਕਤਂ ਮਯਾ.

੩੪. ‘‘ਤਸ੍ਸ ਕਮ੍ਮਸ੍ਸ ਵਿਪਾਕੇਨ [ਵਿਪਾਕਂ (ਸ੍ਯਾ. ਕ.)], ਮੁਸਾਵਾਦਸ੍ਸ ਚੂਭਯਂ;

ਪੁਤ੍ਤਮਂਸਾਨਿ ਖਾਦਾਮਿ, ਪੁਬ੍ਬਲੋਹਿਤਮਕ੍ਖਿਤਾ’’ਤਿ.

ਪਞ੍ਚਪੁਤ੍ਤਖਾਦਪੇਤਿਵਤ੍ਥੁ [ਪਞ੍ਚਪੁਤ੍ਤਖਾਦਪੇਤਵਤ੍ਥੁ (ਸੀ. ਸ੍ਯਾ. ਪੀ.) ਏਵਮੁਪਰਿਪਿ] ਛਟ੍ਠਂ.