੭. ਸਤ੍ਤਪੁਤ੍ਤਖਾਦਪੇਤਿਵਤ੍ਥੁ

੩੫. ‘‘ਨਗ੍ਗਾ ਦੁਬ੍ਬਣ੍ਣਰੂਪਾਸਿ, ਦੁਗ੍ਗਨ੍ਧਾ ਪੂਤਿ ਵਾਯਸਿ;

ਮਕ੍ਖਿਕਾਹਿ ਪਰਿਕਿਣ੍ਣਾ, ਕਾ ਨੁ ਤ੍ਵਂ ਇਧ ਤਿਟ੍ਠਸੀ’’ਤਿ.

੩੬. ‘‘ਅਹਂ ਭਦਨ੍ਤੇ ਪੇਤੀਮ੍ਹਿ, ਦੁਗ੍ਗਤਾ ਯਮਲੋਕਿਕਾ;

ਪਾਪਕਮ੍ਮਂ ਕਰਿਤ੍ਵਾਨ, ਪੇਤਲੋਕਂ ਇਤੋ ਗਤਾ.

੩੭. ‘‘ਕਾਲੇਨ ਸਤ੍ਤ ਪੁਤ੍ਤਾਨਿ, ਸਾਯਂ ਸਤ੍ਤ ਪੁਨਾਪਰੇ;

ਵਿਜਾਯਿਤ੍ਵਾਨ ਖਾਦਾਮਿ, ਤੇਪਿ ਨਾ ਹੋਨ੍ਤਿ ਮੇ ਅਲਂ.

੩੮. ‘‘ਪਰਿਡਯ੍ਹਤਿ ਧੂਮਾਯਤਿ, ਖੁਦਾਯ ਹਦਯਂ ਮਮ;

ਨਿਬ੍ਬੁਤਿਂ ਨਾਧਿਗਚ੍ਛਾਮਿ, ਅਗ੍ਗਿਦਡ੍ਢਾਵ ਆਤਪੇ’’ਤਿ.

੩੯. ‘‘ਕਿਂ ਨੁ ਕਾਯੇਨ ਵਾਚਾਯ, ਮਨਸਾ ਦੁਕ੍ਕਟਂ ਕਤਂ;

ਕਿਸ੍ਸ ਕਮ੍ਮਵਿਪਾਕੇਨ, ਪੁਤ੍ਤਮਂਸਾਨਿ ਖਾਦਸੀ’’ਤਿ.

੪੦. ‘‘ਅਹੂ ਮਯ੍ਹਂ ਦੁਵੇ ਪੁਤ੍ਤਾ, ਉਭੋ ਸਮ੍ਪਤ੍ਤਯੋਬ੍ਬਨਾ;

ਸਾਹਂ ਪੁਤ੍ਤਬਲੂਪੇਤਾ, ਸਾਮਿਕਂ ਅਤਿਮਞ੍ਞਿਸਂ.

੪੧. ‘‘ਤਤੋ ਮੇ ਸਾਮਿਕੋ ਕੁਦ੍ਧੋ, ਸਪਤ੍ਤਿਂ ਮਯ੍ਹਮਾਨਯਿ;

ਸਾ ਚ ਗਬ੍ਭਂ ਅਲਭਿਤ੍ਥ, ਤਸ੍ਸਾ ਪਾਪਂ ਅਚੇਤਯਿਂ.

੪੨. ‘‘ਸਾਹਂ ਪਦੁਟ੍ਠਮਨਸਾ, ਅਕਰਿਂ ਗਬ੍ਭਪਾਤਨਂ;

ਤਸ੍ਸਾ ਤੇਮਾਸਿਕੋ ਗਬ੍ਭੋ, ਪੁਬ੍ਬਲੋਹਿਤਕੋ [ਪੁਬ੍ਬਲੋਹਿਤਕੋ (ਕ.)] ਪਤਿ.

੪੩. ‘‘ਤਦਸ੍ਸਾ ਮਾਤਾ ਕੁਪਿਤਾ, ਮਯ੍ਹਂ ਞਾਤੀ ਸਮਾਨਯਿ;

ਸਪਥਞ੍ਚ ਮਂ ਕਾਰੇਸਿ, ਪਰਿਭਾਸਾਪਯੀ ਚ ਮਂ.

੪੪. ‘‘ਸਾਹਂ ਘੋਰਞ੍ਚ ਸਪਥਂ, ਮੁਸਾਵਾਦਂ ਅਭਾਸਿਸਂ;

‘ਪੁਤ੍ਤਮਂਸਾਨਿ ਖਾਦਾਮਿ, ਸਚੇ ਤਂ ਪਕਤਂ ਮਯਾ’.

੪੫. ‘‘ਤਸ੍ਸ ਕਮ੍ਮਸ੍ਸ ਵਿਪਾਕੇਨ, ਮੁਸਾਵਾਦਸ੍ਸ ਚੂਭਯਂ;

ਪੁਤ੍ਤਮਂਸਾਨਿ ਖਾਦਾਮਿ, ਪੁਬ੍ਬਲੋਹਿਤਮਕ੍ਖਿਤਾ’’ਤਿ.

ਸਤ੍ਤਪੁਤ੍ਤਖਾਦਪੇਤਿਵਤ੍ਥੁ ਸਤ੍ਤਮਂ.