੭. ਸਮਸੀਸਕਥਾ

੩੩. ਸਬ੍ਬਧਮ੍ਮਾਨਂ [ਸਬ੍ਬੇਸਂ ਧਮ੍ਮਾਨਂ (ਕ.) ਪਟਿ. ਮ. ੧.੮੭ ਪਸ੍ਸਿਤਬ੍ਬਾ] ਸਮ੍ਮਾਸਮੁਚ੍ਛੇਦੇ ਨਿਰੋਧੇ ਚ ਅਨੁਪਟ੍ਠਾਨਤਾ ਪਞ੍ਞਾ ਸਮਸੀਸਟ੍ਠੇ ਞਾਣਂ.

ਸਬ੍ਬਧਮ੍ਮਾਨਨ੍ਤਿ ਪਞ੍ਚਕ੍ਖਨ੍ਧਾ, ਦ੍ਵਾਦਸਾਯਤਨਾਨਿ, ਅਟ੍ਠਾਰਸ ਧਾਤੁਯੋ, ਕੁਸਲਾ ਧਮ੍ਮਾ, ਅਕੁਸਲਾ ਧਮ੍ਮਾ, ਅਬ੍ਯਾਕਤਾ ਧਮ੍ਮਾ, ਕਾਮਾਵਚਰਾ ਧਮ੍ਮਾ, ਰੂਪਾਵਚਰਾ ਧਮ੍ਮਾ, ਅਰੂਪਾਵਚਰਾ ਧਮ੍ਮਾ, ਅਪਰਿਯਾਪਨ੍ਨਾ ਧਮ੍ਮਾ. ਸਮ੍ਮਾ ਸਮੁਚ੍ਛੇਦੇਤਿ ਨੇਕ੍ਖਮ੍ਮੇਨ ਕਾਮਚ੍ਛਨ੍ਦਂ ਸਮ੍ਮਾ ਸਮੁਚ੍ਛਿਨ੍ਦਤਿ, ਅਬ੍ਯਾਪਾਦੇਨ ਬ੍ਯਾਪਾਦਂ ਸਮ੍ਮਾ ਸਮੁਚ੍ਛਿਨ੍ਦਤਿ, ਆਲੋਕਸਞ੍ਞਾਯ ਥਿਨਮਿਦ੍ਧਂ ਸਮ੍ਮਾ ਸਮੁਚ੍ਛਿਨ੍ਦਤਿ, ਅਵਿਕ੍ਖੇਪੇਨ ਉਦ੍ਧਚ੍ਚਂ ਸਮ੍ਮਾ ਸਮੁਚ੍ਛਿਨ੍ਦਤਿ, ਧਮ੍ਮਵਵਤ੍ਥਾਨੇਨ ਵਿਚਿਕਿਚ੍ਛਂ ਸਮ੍ਮਾ ਸਮੁਚ੍ਛਿਨ੍ਦਤਿ, ਞਾਣੇਨ ਅਵਿਜ੍ਜਂ ਸਮ੍ਮਾ ਸਮੁਚ੍ਛਿਨ੍ਦਤਿ, ਪਾਮੋਜ੍ਜੇਨ ਅਰਤਿਂ ਸਮ੍ਮਾ ਸਮੁਚ੍ਛਿਨ੍ਦਤਿ, ਪਠਮੇਨ ਝਾਨੇਨ ਨੀਵਰਣੇ ਸਮ੍ਮਾ ਸਮੁਚ੍ਛਿਨ੍ਦਤਿ…ਪੇ… ਅਰਹਤ੍ਤਮਗ੍ਗੇਨ ਸਬ੍ਬਕਿਲੇਸੇ ਸਮ੍ਮਾ ਸਮੁਚ੍ਛਿਨ੍ਦਤਿ.

ਨਿਰੋਧੇਤਿ ਨੇਕ੍ਖਮ੍ਮੇਨ ਕਾਮਚ੍ਛਨ੍ਦਂ ਨਿਰੋਧੇਤਿ, ਅਬ੍ਯਾਪਾਦੇਨ ਬ੍ਯਾਪਾਦਂ ਨਿਰੋਧੇਤਿ, ਆਲੋਕਸਞ੍ਞਾਯ ਥਿਨਮਿਦ੍ਧਂ ਨਿਰੋਧੇਤਿ, ਅਵਿਕ੍ਖੇਪੇਨ ਉਦ੍ਧਚ੍ਚਂ ਨਿਰੋਧੇਤਿ, ਧਮ੍ਮਵਵਤ੍ਥਾਨੇਨ ਵਿਚਿਕਿਚ੍ਛਂ ਨਿਰੋਧੇਤਿ, ਞਾਣੇਨ ਅਵਿਜ੍ਜਂ ਨਿਰੋਧੇਤਿ, ਪਾਮੋਜ੍ਜੇਨ ਅਰਤਿਂ ਨਿਰੋਧੇਤਿ, ਪਠਮੇਨ ਝਾਨੇਨ ਨੀਵਰਣੇ ਨਿਰੋਧੇਤਿ…ਪੇ… ਅਰਹਤ੍ਤਮਗ੍ਗੇਨ ਸਬ੍ਬਕਿਲੇਸੇ ਨਿਰੋਧੇਤਿ.

ਅਨੁਪਟ੍ਠਾਨਤਾਤਿ ਨੇਕ੍ਖਮ੍ਮਂ ਪਟਿਲਦ੍ਧਸ੍ਸ ਕਾਮਚ੍ਛਨ੍ਦੋ ਨ ਉਪਟ੍ਠਾਤਿ, ਅਬ੍ਯਾਪਾਦਂ ਪਟਿਲਦ੍ਧਸ੍ਸ ਬ੍ਯਾਪਾਦੋ ਨ ਉਪਟ੍ਠਾਤਿ, ਆਲੋਕਸਞ੍ਞਂ ਪਟਿਲਦ੍ਧਸ੍ਸ ਥਿਨਮਿਦ੍ਧਂ ਨ ਉਪਟ੍ਠਾਤਿ, ਅਵਿਕ੍ਖੇਪਂ ਪਟਿਲਦ੍ਧਸ੍ਸ ਉਦ੍ਧਚ੍ਚਂ ਨ ਉਪਟ੍ਠਾਤਿ, ਧਮ੍ਮਵਵਤ੍ਥਾਨਂ ਪਟਿਲਦ੍ਧਸ੍ਸ ਵਿਚਿਕਿਚ੍ਛਾ ਨ ਉਪਟ੍ਠਾਤਿ, ਞਾਣਂ ਪਟਿਲਦ੍ਧਸ੍ਸ ਅਵਿਜ੍ਜਾ ਨ ਉਪਟ੍ਠਾਤਿ, ਪਾਮੋਜ੍ਜਂ ਪਟਿਲਦ੍ਧਸ੍ਸ ਅਰਤਿ ਨ ਉਪਟ੍ਠਾਤਿ, ਪਠਮਂ ਝਾਨਂ ਪਟਿਲਦ੍ਧਸ੍ਸ ਨੀਵਰਣਾ ਨ ਉਪਟ੍ਠਨ੍ਤਿ…ਪੇ… ਅਰਹਤ੍ਤਮਗ੍ਗਂ ਪਟਿਲਦ੍ਧਸ੍ਸ ਸਬ੍ਬਕਿਲੇਸਾ ਨ ਉਪਟ੍ਠਨ੍ਤਿ.

ਸਮਨ੍ਤਿ ਕਾਮਚ੍ਛਨ੍ਦਸ੍ਸ ਪਹੀਨਤ੍ਤਾ ਨੇਕ੍ਖਮ੍ਮਂ ਸਮਂ, ਬ੍ਯਾਪਾਦਸ੍ਸ ਪਹੀਨਤ੍ਤਾ ਅਬ੍ਯਾਪਾਦੋ ਸਮਂ, ਥਿਨਮਿਦ੍ਧਸ੍ਸ ਪਹੀਨਤ੍ਤਾ ਆਲੋਕਸਞ੍ਞਾ ਸਮਂ, ਉਦ੍ਧਚ੍ਚਸ੍ਸ ਪਹੀਨਤ੍ਤਾ ਅਵਿਕ੍ਖੇਪੋ ਸਮਂ, ਵਿਚਿਕਿਚ੍ਛਾਯ ਪਹੀਨਤ੍ਤਾ ਧਮ੍ਮਵਵਤ੍ਥਾਨਂ ਸਮਂ, ਅਵਿਜ੍ਜਾਯ ਪਹੀਨਤ੍ਤਾ ਞਾਣਂ ਸਮਂ, ਅਰਤਿਯਾ ਪਹੀਨਤ੍ਤਾ ਪਾਮੋਜ੍ਜਂ ਸਮਂ, ਨੀਵਰਣਾਨਂ ਪਹੀਨਤ੍ਤਾ ਪਠਮਂ ਝਾਨਂ ਸਮਂ…ਪੇ… ਸਬ੍ਬਕਿਲੇਸਾਨਂ ਪਹੀਨਤ੍ਤਾ ਅਰਹਤ੍ਤਮਗ੍ਗੋ ਸਮਂ.

ਸੀਸਨ੍ਤਿ ਤੇਰਸ ਸੀਸਾਨਿ – ਪਲਿਬੋਧਸੀਸਞ੍ਚ ਤਣ੍ਹਾ, ਵਿਨਿਬਨ੍ਧਨਸੀਸਞ੍ਚ ਮਾਨੋ, ਪਰਾਮਾਸਸੀਸਞ੍ਚ ਦਿਟ੍ਠਿ, ਵਿਕ੍ਖੇਪਸੀਸਞ੍ਚ ਉਦ੍ਧਚ੍ਚਂ, ਸਂਕਿਲੇਸਸੀਸਞ੍ਚ ਅਵਿਜ੍ਜਾ, ਅਧਿਮੋਕ੍ਖਸੀਸਞ੍ਚ ਸਦ੍ਧਾ, ਪਗ੍ਗਹਸੀਸਞ੍ਚ ਵੀਰਿਯਂ, ਉਪਟ੍ਠਾਨਸੀਸਞ੍ਚ ਸਤਿ, ਅਵਿਕ੍ਖੇਪਸੀਸਞ੍ਚ ਸਮਾਧਿ, ਦਸ੍ਸਨਸੀਸਞ੍ਚ ਪਞ੍ਞਾ, ਪਵਤ੍ਤਸੀਸਞ੍ਚ ਜੀਵਿਤਿਨ੍ਦ੍ਰਿਯਂ, ਗੋਚਰਸੀਸਞ੍ਚ ਵਿਮੋਕ੍ਖੋ, ਸਙ੍ਖਾਰਸੀਸਞ੍ਚ ਨਿਰੋਧੋਤਿ.

ਸਮਸੀਸਕਥਾ ਨਿਟ੍ਠਿਤਾ.