੧੦. ਮਾਤਿਕਾਕਥਾ

੪੦. ਨਿਚ੍ਛਾਤੋ [ਨਿਚ੍ਛਾਤੋ ਮੁਚ੍ਚਤੀਤਿ (ਸ੍ਯਾ.)], ਮੋਕ੍ਖੋ ਵਿਮੋਕ੍ਖੋ, ਵਿਜ੍ਜਾਵਿਮੁਤ੍ਤਿ, ਅਧਿਸੀਲਂ, ਅਧਿਚਿਤ੍ਤਂ, ਅਧਿਪਞ੍ਞਾ, ਪਸ੍ਸਦ੍ਧਿ, ਞਾਣਂ, ਦਸ੍ਸਨਂ ਵਿਸੁਦ੍ਧਿ [ਸੁਦ੍ਧਿ (ਸ੍ਯਾ.)] ਨੇਕ੍ਖਮ੍ਮਂ, ਨਿਸ੍ਸਰਣਂ ਪਵਿਵੇਕੋ, ਵੋਸ੍ਸਗ੍ਗੋ, ਚਰਿਯਾ, ਝਾਨਵਿਮੋਕ੍ਖੋ, ਭਾਵਨਾ, ਅਧਿਟ੍ਠਾਨਂ, ਜੀਵਿਤਂ.

੪੧. ਨਿਚ੍ਛਾਤੋਤਿ ਨੇਕ੍ਖਮ੍ਮੇਨ ਕਾਮਚ੍ਛਨ੍ਦਤੋ ਨਿਚ੍ਛਾਤੋ, ਅਬ੍ਯਾਪਾਦੇਨ ਬ੍ਯਾਪਾਦਤੋ ਨਿਚ੍ਛਾਤੋ…ਪੇ… ਪਠਮੇਨ ਝਾਨੇਨ ਨੀਵਰਣੇਹਿ ਨਿਚ੍ਛਾਤੋ…ਪੇ… ਅਰਹਤ੍ਤਮਗ੍ਗੇਨ ਸਬ੍ਬਕਿਲੇਸੇਹਿ ਨਿਚ੍ਛਾਤੋ.

ਮੋਕ੍ਖੋ ਵਿਮੋਕ੍ਖੋਤਿ ਨੇਕ੍ਖਮ੍ਮੇਨ ਕਾਮਚ੍ਛਨ੍ਦਤੋ ਮੁਚ੍ਚਤੀਤਿ – ਮੋਕ੍ਖੋ ਵਿਮੋਕ੍ਖੋ. ਅਬ੍ਯਾਪਾਦੇਨ ਬ੍ਯਾਪਾਦਤੋ ਮੁਚ੍ਚਤੀਤਿ – ਮੋਕ੍ਖੋ ਵਿਮੋਕ੍ਖੋ…ਪੇ… ਪਠਮੇਨ ਝਾਨੇਨ ਨੀਵਰਣੇਹਿ ਮੁਚ੍ਚਤੀਤਿ – ਮੋਕ੍ਖੋ ਵਿਮੋਕ੍ਖੋ…ਪੇ… ਅਰਹਤ੍ਤਮਗ੍ਗੇਨ ਸਬ੍ਬਕਿਲੇਸੇਹਿ ਮੁਚ੍ਚਤੀਤਿ – ਮੋਕ੍ਖੋ ਵਿਮੋਕ੍ਖੋ.

ਵਿਜ੍ਜਾਵਿਮੁਤ੍ਤੀਤਿ ਨੇਕ੍ਖਮ੍ਮਂ ਵਿਜ੍ਜਤੀਤਿ ਵਿਜ੍ਜਾ, ਕਾਮਚ੍ਛਨ੍ਦਤੋ ਮੁਚ੍ਚਤੀਤਿ ਵਿਮੁਤ੍ਤਿ. ਵਿਜ੍ਜਨ੍ਤੋ ਮੁਚ੍ਚਤਿ, ਮੁਚ੍ਚਨ੍ਤੋ ਵਿਜ੍ਜਤੀਤਿ – ਵਿਜ੍ਜਾਵਿਮੁਤ੍ਤਿ. ਅਬ੍ਯਾਪਾਦੋ [ਅਬ੍ਯਾਪਾਦਂ (ਸ੍ਯਾ.)] ਵਿਜ੍ਜਤੀਤਿ ਵਿਜ੍ਜਾ, ਬ੍ਯਾਪਾਦਤੋ ਵਿਮੁਚ੍ਚਤੀਤਿ ਵਿਮੁਤ੍ਤਿ. ਵਿਜ੍ਜਨ੍ਤੋ ਮੁਚ੍ਚਤਿ, ਮੁਚ੍ਚਨ੍ਤੋ ਵਿਜ੍ਜਤੀਤਿ – ਵਿਜ੍ਜਾਵਿਮੁਤ੍ਤਿ…ਪੇ… ਅਰਹਤ੍ਤਮਗ੍ਗੋ ਵਿਜ੍ਜਤੀਤਿ ਵਿਜ੍ਜਾ, ਸਬ੍ਬਕਿਲੇਸੇਹਿ ਮੁਚ੍ਚਤੀਤਿ ਵਿਮੁਤ੍ਤਿ. ਵਿਜ੍ਜਨ੍ਤੋ ਮੁਚ੍ਚਤਿ, ਮੁਚ੍ਚਨ੍ਤੋ ਵਿਜ੍ਜਤੀਤਿ – ਵਿਜ੍ਜਾਵਿਮੁਤ੍ਤਿ.

ਅਧਿਸੀਲਂ ਅਧਿਚਿਤ੍ਤਂ ਅਧਿਪਞ੍ਞਾਤਿ ਨੇਕ੍ਖਮ੍ਮੇਨ ਕਾਮਚ੍ਛਨ੍ਦਂ, ਸਂਵਰਟ੍ਠੇਨ ਸੀਲਵਿਸੁਦ੍ਧਿ, ਅਵਿਕ੍ਖੇਪਟ੍ਠੇਨ ਚਿਤ੍ਤਵਿਸੁਦ੍ਧਿ, ਦਸ੍ਸਨਟ੍ਠੇਨ ਦਿਟ੍ਠਿਵਿਸੁਦ੍ਧਿ. ਯੋ ਤਤ੍ਥ ਸਂਵਰਟ੍ਠੋ, ਅਯਂ ਅਧਿਸੀਲਸਿਕ੍ਖਾ. ਯੋ ਤਤ੍ਥ ਅਵਿਕ੍ਖੇਪਟ੍ਠੋ, ਅਯਂ ਅਧਿਚਿਤ੍ਤਸਿਕ੍ਖਾ. ਯੋ ਤਤ੍ਥ ਦਸ੍ਸਨਟ੍ਠੋ, ਅਯਂ ਅਧਿਪਞ੍ਞਾਸਿਕ੍ਖਾ. ਅਬ੍ਯਾਪਾਦੇਨ ਬ੍ਯਾਪਾਦਂ ਸਂਵਰਟ੍ਠੇਨ ਸੀਲਵਿਸੁਦ੍ਧਿ…ਪੇ… ਅਰਹਤ੍ਤਮਗ੍ਗੇਨ ਸਬ੍ਬਕਿਲੇਸੇ ਸਂਵਰਟ੍ਠੇਨ ਸੀਲਵਿਸੁਦ੍ਧਿ, ਅਵਿਕ੍ਖੇਪਟ੍ਠੇਨ ਚਿਤ੍ਤਵਿਸੁਦ੍ਧਿ. ਦਸ੍ਸਨਟ੍ਠੇਨ ਦਿਟ੍ਠਿਵਿਸੁਦ੍ਧਿ. ਯੋ ਤਤ੍ਥ ਸਂਵਰਟ੍ਠੋ, ਅਯਂ ਅਧਿਸੀਲਸਿਕ੍ਖਾ. ਯੋ ਤਤ੍ਥ ਅਵਿਕ੍ਖੇਪਟ੍ਠੋ, ਅਯਂ ਅਧਿਚਿਤ੍ਤਸਿਕ੍ਖਾ. ਯੋ ਤਤ੍ਥ ਦਸ੍ਸਨਟ੍ਠੋ, ਅਯਂ ਅਧਿਪਞ੍ਞਾਸਿਕ੍ਖਾ.

ਪਸ੍ਸਦ੍ਧੀਤਿ ਨੇਕ੍ਖਮ੍ਮੇਨ ਕਾਮਚ੍ਛਨ੍ਦਂ ਪਟਿਪ੍ਪਸ੍ਸਮ੍ਭੇਤਿ, ਅਬ੍ਯਾਪਾਦੇਨ ਬ੍ਯਾਪਾਦਂ ਪਟਿਪ੍ਪਸ੍ਸਮ੍ਭੇਤਿ…ਪੇ… ਅਰਹਤ੍ਤਮਗ੍ਗੇਨ ਸਬ੍ਬਕਿਲੇਸੇ ਪਟਿਪ੍ਪਸ੍ਸਮ੍ਭੇਤਿ.

ਞਾਣਨ੍ਤਿ ਕਾਮਚ੍ਛਨ੍ਦਸ੍ਸ ਪਹੀਨਤ੍ਤਾ ਨੇਕ੍ਖਮ੍ਮਂ ਞਾਤਟ੍ਠੇਨ ਞਾਣਂ; ਬ੍ਯਾਪਾਦਸ੍ਸ ਪਹੀਨਤ੍ਤਾ ਅਬ੍ਯਾਪਾਦੋ ਞਾਤਟ੍ਠੇਨ ਞਾਣਂ…ਪੇ… ਸਬ੍ਬਕਿਲੇਸਾਨਂ ਪਹੀਨਤ੍ਤਾ ਅਰਹਤ੍ਤਮਗ੍ਗੋ ਞਾਤਟ੍ਠੇਨ ਞਾਣਂ.

ਦਸ੍ਸਨਨ੍ਤਿ ਕਾਮਚ੍ਛਨ੍ਦਸ੍ਸ ਪਹੀਨਤ੍ਤਾ ਨੇਕ੍ਖਮ੍ਮਂ ਦਿਟ੍ਠਤ੍ਤਾ ਦਸ੍ਸਨਂ. ਬ੍ਯਾਪਾਦਸ੍ਸ ਪਹੀਨਤ੍ਤਾ ਅਬ੍ਯਾਪਾਦੋ ਦਿਟ੍ਠਤ੍ਤਾ ਦਸ੍ਸਨਂ…ਪੇ… ਸਬ੍ਬਕਿਲੇਸਾਨਂ ਪਹੀਨਤ੍ਤਾ ਅਰਹਤ੍ਤਮਗ੍ਗੋ ਦਿਟ੍ਠਤ੍ਤਾ ਦਸ੍ਸਨਂ.

ਵਿਸੁਦ੍ਧੀਤਿ ਕਾਮਚ੍ਛਨ੍ਦਂ ਪਜਹਨ੍ਤੋ ਨੇਕ੍ਖਮ੍ਮੇਨ ਵਿਸੁਜ੍ਝਤਿ. ਬ੍ਯਾਪਾਦਂ ਪਜਹਨ੍ਤੋ ਅਬ੍ਯਾਪਾਦੇਨ ਵਿਸੁਜ੍ਝਤਿ…ਪੇ… ਸਬ੍ਬਕਿਲੇਸੇ ਪਜਹਨ੍ਤੋ ਅਰਹਤ੍ਤਮਗ੍ਗੇਨ ਵਿਸੁਜ੍ਝਤਿ.

ਨੇਕ੍ਖਮ੍ਮਨ੍ਤਿ ਕਾਮਾਨਮੇਤਂ ਨਿਸ੍ਸਰਣਂ, ਯਦਿਦਂ ਨੇਕ੍ਖਮ੍ਮਂ. ਰੂਪਾਨਮੇਤਂ ਨਿਸ੍ਸਰਣਂ, ਯਦਿਦਂ ਆਰੁਪ੍ਪਂ. ਯਂ ਖੋ ਪਨ ਕਿਞ੍ਚਿ ਭੂਤਂ ਸਙ੍ਖਤਂ ਪਟਿਚ੍ਚਸਮੁਪ੍ਪਨ੍ਨਂ, ਨਿਰੋਧੋ ਤਸ੍ਸ ਨੇਕ੍ਖਮ੍ਮਂ. ਬ੍ਯਾਪਾਦਸ੍ਸ ਅਬ੍ਯਾਪਾਦੋ ਨੇਕ੍ਖਮ੍ਮਂ. ਥਿਨਮਿਦ੍ਧਸ੍ਸ ਆਲੋਕਸਞ੍ਞਾ ਨੇਕ੍ਖਮ੍ਮਂ…ਪੇ… ਸਬ੍ਬਕਿਲੇਸਾਨਂ ਅਰਹਤ੍ਤਮਗ੍ਗੋ ਨੇਕ੍ਖਮ੍ਮਂ.

ਨਿਸ੍ਸਰਣਨ੍ਤਿ ਕਾਮਾਨਮੇਤਂ ਨਿਸ੍ਸਰਣਂ, ਯਦਿਦਂ ਨੇਕ੍ਖਮ੍ਮਂ. ਰੂਪਾਨਮੇਤਂ ਨਿਸ੍ਸਰਣਂ, ਯਦਿਦਂ ਆਰੁਪ੍ਪਂ. ਯਂ ਖੋ ਪਨ ਕਿਞ੍ਚਿ ਭੂਤਂ ਸਙ੍ਖਤਂ ਪਟਿਚ੍ਚਸਮੁਪ੍ਪਨ੍ਨਂ, ਨਿਰੋਧੋ ਤਸ੍ਸ ਨਿਸ੍ਸਰਣਂ. ਕਾਮਚ੍ਛਨ੍ਦਸ੍ਸ ਨੇਕ੍ਖਮ੍ਮਂ ਨਿਸ੍ਸਰਣਂ. ਬ੍ਯਾਪਾਦਸ੍ਸ ਅਬ੍ਯਾਪਾਦੋ ਨਿਸ੍ਸਰਣਂ…ਪੇ… ਸਬ੍ਬਕਿਲੇਸਾਨਂ ਅਰਹਤ੍ਤਮਗ੍ਗੋ ਨਿਸ੍ਸਰਣਂ.

ਪਵਿਵੇਕੋਤਿ ਕਾਮਚ੍ਛਨ੍ਦਸ੍ਸ ਨੇਕ੍ਖਮ੍ਮਂ ਪਵਿਵੇਕੋ …ਪੇ… ਸਬ੍ਬਕਿਲੇਸਾਨਂ ਅਰਹਤ੍ਤਮਗ੍ਗੋ ਪਵਿਵੇਕੋ.

ਵੋਸ੍ਸਗ੍ਗੋਤਿ ਨੇਕ੍ਖਮ੍ਮੇਨ ਕਾਮਚ੍ਛਨ੍ਦਂ ਵੋਸ੍ਸਜ੍ਜਤੀਤਿ – ਵੋਸ੍ਸਗ੍ਗੋ. ਅਬ੍ਯਾਪਾਦੇਨ ਬ੍ਯਾਪਾਦਂ ਵੋਸ੍ਸਜ੍ਜਤੀਤਿ – ਵੋਸ੍ਸਗ੍ਗੋ…ਪੇ… ਅਰਹਤ੍ਤਮਗ੍ਗੇਨ ਸਬ੍ਬਕਿਲੇਸੇ ਵੋਸ੍ਸਜ੍ਜਤੀਤਿ – ਵੋਸ੍ਸਗ੍ਗੋ.

ਚਰਿਯਾਤਿ ਕਾਮਚ੍ਛਨ੍ਦਂ ਪਜਹਨ੍ਤੋ ਨੇਕ੍ਖਮ੍ਮੇਨ ਚਰਤਿ. ਬ੍ਯਾਪਾਦਂ ਪਜਹਨ੍ਤੋ ਅਬ੍ਯਾਪਾਦੇਨ ਚਰਤਿ…ਪੇ… ਸਬ੍ਬਕਿਲੇਸੇ ਪਜਹਨ੍ਤੋ ਅਰਹਤ੍ਤਮਗ੍ਗੇਨ ਚਰਤਿ.

ਝਾਨਵਿਮੋਕ੍ਖੋਤਿ ਨੇਕ੍ਖਮ੍ਮਂ ਝਾਯਤੀਤਿ – ਝਾਨਂ. ਕਾਮਚ੍ਛਨ੍ਦਂ ਝਾਪੇਤੀਤਿ – ਝਾਨਂ. ਝਾਯਨ੍ਤੋ ਮੁਚ੍ਚਤੀਤਿ – ਝਾਨਵਿਮੋਕ੍ਖੋ. ਝਾਪੇਨ੍ਤੋ ਮੁਚ੍ਚਤੀਤਿ – ਝਾਨਵਿਮੋਕ੍ਖੋ. ਝਾਯਨ੍ਤੀਤਿ ਧਮ੍ਮਾ. ਝਾਪੇਨ੍ਤੀਤਿ ਕਿਲੇਸੇ. ਝਾਤੇ ਚ ਝਾਪੇ ਚ ਜਾਨਾਤੀਤਿ – ਝਾਨਝਾਯੀ [ਝਾਨਵਿਮੋਕ੍ਖੋ (ਸ੍ਯਾ.) ਅਟ੍ਠਕਥਾ ਓਲੋਕੇਤਬ੍ਬਾ]. ਅਬ੍ਯਾਪਾਦੋ ਝਾਯਤੀਤਿ ਝਾਨਂ. ਬ੍ਯਾਪਾਦਂ ਝਾਪੇਤੀਤਿ – ਝਾਨਂ…ਪੇ… ਆਲੋਕਸਞ੍ਞਾ ਝਾਯਤੀਤਿ – ਝਾਨਂ. ਥਿਨਮਿਦ੍ਧਂ ਝਾਪੇਤੀਤਿ – ਝਾਨਂ…ਪੇ… ਅਰਹਤ੍ਤਮਗ੍ਗੋ ਝਾਯਤੀਤਿ – ਝਾਨਂ. ਸਬ੍ਬਕਿਲੇਸੇ ਝਾਪੇਤੀਤਿ – ਝਾਨਂ. ਝਾਯਨ੍ਤੋ ਮੁਚ੍ਚਤੀਤਿ – ਝਾਨਵਿਮੋਕ੍ਖੋ. ਝਾਪੇਨ੍ਤੋ ਮੁਚ੍ਚਤੀਤਿ – ਝਾਨਵਿਮੋਕ੍ਖੋ. ਝਾਯਨ੍ਤੀਤਿ – ਧਮ੍ਮਾ. ਝਾਪੇਨ੍ਤੀਤਿ – ਕਿਲੇਸੇ. ਝਾਤੇ ਚ ਝਾਪੇ ਚ ਜਾਨਾਤੀਤਿ – ਝਾਨਝਾਯੀ.

੪੨. ਭਾਵਨਾ ਅਧਿਟ੍ਠਾਨਂ ਜੀਵਿਤਨ੍ਤਿ ਕਾਮਚ੍ਛਨ੍ਦਂ ਪਜਹਨ੍ਤੋ ਨੇਕ੍ਖਮ੍ਮਂ ਭਾਵੇਤੀਤਿ – ਭਾਵਨਾਸਮ੍ਪਨ੍ਨੋ. ਨੇਕ੍ਖਮ੍ਮਵਸੇਨ ਚਿਤ੍ਤਂ ਅਧਿਟ੍ਠਾਤੀਤਿ – ਅਧਿਟ੍ਠਾਨਸਮ੍ਪਨ੍ਨੋ. ਸ੍ਵਾਯਂ ਏਵਂ ਭਾਵਨਾਸਮ੍ਪਨ੍ਨੋ ਅਧਿਟ੍ਠਾਨਸਮ੍ਪਨ੍ਨੋ ਸਮਂ ਜੀਵਤਿ, ਨੋ ਵਿਸਮਂ; ਸਮ੍ਮਾ ਜੀਵਤਿ, ਨੋ ਮਿਚ੍ਛਾ; ਵਿਸੁਦ੍ਧਂ ਜੀਵਤਿ, ਨੋ ਕਿਲਿਟ੍ਠਨ੍ਤਿ – ਆਜੀਵਸਮ੍ਪਨ੍ਨੋ. ਸ੍ਵਾਯਂ ਏਵਂ ਭਾਵਨਾਸਮ੍ਪਨ੍ਨੋ ਅਧਿਟ੍ਠਾਨਸਮ੍ਪਨ੍ਨੋ ਆਜੀਵਸਮ੍ਪਨ੍ਨੋ ਯਞ੍ਞਦੇਵ ਪਰਿਸਂ ਉਪਸਙ੍ਕਮਤਿ – ਯਦਿ ਖਤ੍ਤਿਯਪਰਿਸਂ ਯਦਿ ਬ੍ਰਾਹ੍ਮਣਪਰਿਸਂ ਯਦਿ ਗਹਪਤਿਪਰਿਸਂ ਯਦਿ ਸਮਣਪਰਿਸਂ – ਵਿਸਾਰਦੋ ਉਪਸਙ੍ਕਮਤਿ ਅਮਙ੍ਕੁਭੂਤੋ. ਤਂ ਕਿਸ੍ਸ ਹੇਤੁ? ਤਥਾ ਹਿ ਸੋ ਭਾਵਨਾਸਮ੍ਪਨ੍ਨੋ ਅਧਿਟ੍ਠਾਨਸਮ੍ਪਨ੍ਨੋ ਆਜੀਵਸਮ੍ਪਨ੍ਨੋ.

ਬ੍ਯਾਪਾਦਂ ਪਜਹਨ੍ਤੋ ਅਬ੍ਯਾਪਾਦਂ ਭਾਵੇਤੀਤਿ – ਭਾਵਨਾਸਮ੍ਪਨ੍ਨੋ…ਪੇ… ਥਿਨਮਿਦ੍ਧਂ ਪਜਹਨ੍ਤੋ ਆਲੋਕਸਞ੍ਞਂ ਭਾਵੇਤੀਤਿ – ਭਾਵਨਾਸਮ੍ਪਨ੍ਨੋ…ਪੇ… ਉਦ੍ਧਚ੍ਚਂ ਪਜਹਨ੍ਤੋ ਅਵਿਕ੍ਖੇਪਂ ਭਾਵੇਤੀਤਿ – ਭਾਵਨਾਸਮ੍ਪਨ੍ਨੋ…ਪੇ… ਵਿਚਿਕਿਚ੍ਛਂ ਪਜਹਨ੍ਤੋ ਧਮ੍ਮਵਵਤ੍ਥਾਨਂ ਭਾਵੇਤੀਤਿ – ਭਾਵਨਾਸਮ੍ਪਨ੍ਨੋ…ਪੇ… ਅਵਿਜ੍ਜਂ ਪਜਹਨ੍ਤੋ ਵਿਜ੍ਜਂ ਭਾਵੇਤੀਤਿ – ਭਾਵਨਾਸਮ੍ਪਨ੍ਨੋ…ਪੇ… ਅਰਤਿਂ ਪਜਹਨ੍ਤੋ ਪਾਮੋਜ੍ਜਂ ਭਾਵੇਤੀਤਿ – ਭਾਵਨਾਸਮ੍ਪਨ੍ਨੋ…ਪੇ… ਨੀਵਰਣੇ ਪਜਹਨ੍ਤੋ ਪਠਮਂ ਝਾਨਂ ਭਾਵੇਤੀਤਿ – ਭਾਵਨਾਸਮ੍ਪਨ੍ਨੋ…ਪੇ… ਸਬ੍ਬਕਿਲੇਸੇ ਪਜਹਨ੍ਤੋ ਅਰਹਤ੍ਤਮਗ੍ਗਂ ਭਾਵੇਤੀਤਿ – ਭਾਵਨਾਸਮ੍ਪਨ੍ਨੋ. ਅਰਹਤ੍ਤਮਗ੍ਗਵਸੇਨ ਚਿਤ੍ਤਂ ਅਧਿਟ੍ਠਾਤੀਤਿ – ਅਧਿਟ੍ਠਾਨਸਮ੍ਪਨ੍ਨੋ. ਸ੍ਵਾਯਂ ਏਵਂ ਭਾਵਨਾਸਮ੍ਪਨ੍ਨੋ ਅਧਿਟ੍ਠਾਨਸਮ੍ਪਨ੍ਨੋ ਸਮਂ ਜੀਵਤਿ, ਨੋ ਵਿਸਮਂ; ਸਮ੍ਮਾ ਜੀਵਤਿ, ਨੋ ਮਿਚ੍ਛਾ; ਵਿਸੁਦ੍ਧਂ ਜੀਵਤਿ, ਨੋ ਕਿਲਿਟ੍ਠਨ੍ਤਿ – ਆਜੀਵਸਮ੍ਪਨ੍ਨੋ. ਸ੍ਵਾਯਂ ਏਵਂ ਭਾਵਨਾਸਮ੍ਪਨ੍ਨੋ ਅਧਿਟ੍ਠਾਨਸਮ੍ਪਨ੍ਨੋ ਆਜੀਵਸਮ੍ਪਨ੍ਨੋ ਯਞ੍ਞਦੇਵ ਪਰਿਸਂ ਉਪਸਙ੍ਕਮਤਿ – ਯਦਿ ਖਤ੍ਤਿਯਪਰਿਸਂ ਯਦਿ ਬ੍ਰਾਹ੍ਮਣਪਰਿਸਂ ਯਦਿ ਗਹਪਤਿਪਰਿਸਂ ਯਦਿ ਸਮਣਪਰਿਸਂ – ਵਿਸਾਰਦੋ ਉਪਸਙ੍ਕਮਤਿ ਅਮਙ੍ਕੁਭੂਤੋ. ਤਂ ਕਿਸ੍ਸ ਹੇਤੁ? ਤਥਾ ਹਿ ਸੋ ਭਾਵਨਾਸਮ੍ਪਨ੍ਨੋ ਅਧਿਟ੍ਠਾਨਸਮ੍ਪਨ੍ਨੋ ਆਜੀਵਸਮ੍ਪਨ੍ਨੋਤਿ.

ਮਾਤਿਕਾਕਥਾ ਨਿਟ੍ਠਿਤਾ.

ਪਞ੍ਞਾਵਗ੍ਗੋ ਤਤਿਯੋ.