੨. ਸਚ੍ਚਕਥਾ

੮. ਪੁਰਿਮਨਿਦਾਨਂ. ‘‘ਚਤ੍ਤਾਰਿਮਾਨਿ, ਭਿਕ੍ਖਵੇ [ਸਂ. ਨਿ. ੫.੧੦੯੦], ਤਥਾਨਿ ਅਵਿਤਥਾਨਿ ਅਨਞ੍ਞਥਾਨਿ. ਕਤਮਾਨਿ ਚਤ੍ਤਾਰਿ? ‘ਇਦਂ ਦੁਕ੍ਖ’ਨ੍ਤਿ, ਭਿਕ੍ਖਵੇ, ਤਥਮੇਤਂ ਅਵਿਤਥਮੇਤਂ ਅਨਞ੍ਞਥਮੇਤਂ; ‘ਅਯਂ ਦੁਕ੍ਖਸਮੁਦਯੋ’ਤਿ ਤਥਮੇਤਂ ਅਵਿਤਥਮੇਤਂ ਅਨਞ੍ਞਥਮੇਤਂ, ‘ਅਯਂ ਦੁਕ੍ਖਨਿਰੋਧੋ’ਤਿ ਤਥਮੇਤਂ ਅਵਿਤਥਮੇਤਂ ਅਨਞ੍ਞਥਮੇਤਂ, ‘ਅਯਂ ਦੁਕ੍ਖਨਿਰੋਧਗਾਮਿਨੀ ਪਟਿਪਦਾ’ਤਿ ਤਥਮੇਤਂ ਅਵਿਤਥਮੇਤਂ ਅਨਞ੍ਞਥਮੇਤਂ. ਇਮਾਨਿ ਖੋ, ਭਿਕ੍ਖਵੇ, ਚਤ੍ਤਾਰਿ ਤਥਾਨਿ ਅਵਿਤਥਾਨਿ ਅਨਞ੍ਞਥਾਨਿ’’.

੧. ਪਠਮਸੁਤ੍ਤਨ੍ਤਨਿਦ੍ਦੇਸੋ

ਕਥਂ ਦੁਕ੍ਖਂ ਤਥਟ੍ਠੇਨ ਸਚ੍ਚਂ? ਚਤ੍ਤਾਰੋ ਦੁਕ੍ਖਸ੍ਸ ਦੁਕ੍ਖਟ੍ਠਾ ਤਥਾ ਅਵਿਤਥਾ ਅਨਞ੍ਞਥਾ. ਦੁਕ੍ਖਸ੍ਸ ਪੀਲ਼ਨਟ੍ਠੋ, ਸਙ੍ਖਤਟ੍ਠੋ, ਸਨ੍ਤਾਪਟ੍ਠੋ, ਵਿਪਰਿਣਾਮਟ੍ਠੋ – ਇਮੇ ਚਤ੍ਤਾਰੋ ਦੁਕ੍ਖਸ੍ਸ ਦੁਕ੍ਖਟ੍ਠਾ ਤਥਾ ਅਵਿਤਥਾ ਅਨਞ੍ਞਥਾ. ਏਵਂ ਦੁਕ੍ਖਂ ਤਥਟ੍ਠੇਨ ਸਚ੍ਚਂ.

ਕਥਂ ਸਮੁਦਯੋ ਤਥਟ੍ਠੇਨ ਸਚ੍ਚਂ? ਚਤ੍ਤਾਰੋ ਸਮੁਦਯਸ੍ਸ ਸਮੁਦਯਟ੍ਠਾ ਤਥਾ ਅਵਿਤਥਾ ਅਨਞ੍ਞਥਾ. ਸਮੁਦਯਸ੍ਸ ਆਯੂਹਨਟ੍ਠੋ, ਨਿਦਾਨਟ੍ਠੋ, ਸਂਯੋਗਟ੍ਠੋ ਪਲਿਬੋਧਟ੍ਠੋ – ਇਮੇ ਚਤ੍ਤਾਰੋ ਸਮੁਦਯਸ੍ਸ ਸਮੁਦਯਟ੍ਠਾ ਤਥਾ ਅਵਿਤਥਾ ਅਨਞ੍ਞਥਾ. ਏਵਂ ਸਮੁਦਯੋ ਤਥਟ੍ਠੇਨ ਸਚ੍ਚਂ.

ਕਥਂ ਨਿਰੋਧੋ ਤਥਟ੍ਠੇਨ ਸਚ੍ਚਂ? ਚਤ੍ਤਾਰੋ ਨਿਰੋਧਸ੍ਸ ਨਿਰੋਧਟ੍ਠਾ ਤਥਾ ਅਵਿਤਥਾ ਅਨਞ੍ਞਥਾ. ਨਿਰੋਧਸ੍ਸ ਨਿਸ੍ਸਰਣਟ੍ਠੋ, ਵਿਵੇਕਟ੍ਠੋ, ਅਸਙ੍ਖਤਟ੍ਠੋ, ਅਮਤਟ੍ਠੋ – ਇਮੇ ਚਤ੍ਤਾਰੋ ਨਿਰੋਧਸ੍ਸ ਨਿਰੋਧਟ੍ਠਾ ਤਥਾ ਅਵਿਤਥਾ ਅਨਞ੍ਞਥਾ. ਏਵਂ ਨਿਰੋਧੋ ਤਥਟ੍ਠੇਨ ਸਚ੍ਚਂ.

ਕਥਂ ਮਗ੍ਗੋ ਤਥਟ੍ਠੇਨ ਸਚ੍ਚਂ? ਚਤ੍ਤਾਰੋ ਮਗ੍ਗਸ੍ਸ ਮਗ੍ਗਟ੍ਠਾ ਤਥਾ ਅਵਿਤਥਾ ਅਨਞ੍ਞਥਾ. ਮਗ੍ਗਸ੍ਸ ਨਿਯ੍ਯਾਨਟ੍ਠੋ, ਹੇਤੁਟ੍ਠੋ, ਦਸ੍ਸਨਟ੍ਠੋ, ਆਧਿਪਤੇਯ੍ਯਟ੍ਠੋ – ਇਮੇ ਚਤ੍ਤਾਰੋ ਮਗ੍ਗਸ੍ਸ ਮਗ੍ਗਟ੍ਠਾ ਤਥਾ ਅਵਿਤਥਾ ਅਨਞ੍ਞਥਾ. ਏਵਂ ਮਗ੍ਗੋ ਤਥਟ੍ਠੇਨ ਸਚ੍ਚਂ.

੯. ਕਤਿਹਾਕਾਰੇਹਿ ਚਤ੍ਤਾਰਿ ਸਚ੍ਚਾਨਿ ਏਕਪ੍ਪਟਿਵੇਧਾਨਿ? ਚਤੂਹਾਕਾਰੇਹਿ ਚਤ੍ਤਾਰਿ ਸਚ੍ਚਾਨਿ ਏਕਪ੍ਪਟਿਵੇਧਾਨਿ. ਤਥਟ੍ਠੇਨ, ਅਨਤ੍ਤਟ੍ਠੇਨ, ਸਚ੍ਚਟ੍ਠੇਨ, ਪਟਿਵੇਧਟ੍ਠੇਨ – ਇਮੇਹਿ ਚਤੂਹਾਕਾਰੇਹਿ ਚਤ੍ਤਾਰਿ ਸਚ੍ਚਾਨਿ ਏਕਸਙ੍ਗਹਿਤਾਨਿ. ਯਂ ਏਕਸਙ੍ਗਹਿਤਂ ਤਂ ਏਕਤ੍ਤਂ. ਏਕਤ੍ਤਂ ਏਕੇਨ ਞਾਣੇਨ ਪਟਿਵਿਜ੍ਝਤੀਤਿ – ਚਤ੍ਤਾਰਿ ਸਚ੍ਚਾਨਿ ਏਕਪ੍ਪਟਿਵੇਧਾਨਿ.

ਕਥਂ ਤਥਟ੍ਠੇਨ ਚਤ੍ਤਾਰਿ ਸਚ੍ਚਾਨਿ ਏਕਪ੍ਪਟਿਵੇਧਾਨਿ? ਚਤੂਹਾਕਾਰੇਹਿ ਤਥਟ੍ਠੇਨ ਚਤ੍ਤਾਰਿ ਸਚ੍ਚਾਨਿ ਏਕਪ੍ਪਟਿਵੇਧਾਨਿ. ਦੁਕ੍ਖਸ੍ਸ ਦੁਕ੍ਖਟ੍ਠੋ ਤਥਟ੍ਠੋ, ਸਮੁਦਯਸ੍ਸ ਸਮੁਦਯਟ੍ਠੋ ਤਥਟ੍ਠੋ, ਨਿਰੋਧਸ੍ਸ ਨਿਰੋਧਟ੍ਠੋ ਤਥਟ੍ਠੋ, ਮਗ੍ਗਸ੍ਸ ਮਗ੍ਗਟ੍ਠੋ ਤਥਟ੍ਠੋ – ਇਮੇਹਿ ਚਤੂਹਾਕਾਰੇਹਿ ਤਥਟ੍ਠੇਨ ਚਤ੍ਤਾਰਿ ਸਚ੍ਚਾਨਿ ਏਕਸਙ੍ਗਹਿਤਾਨਿ. ਯਂ ਏਕਸਙ੍ਗਹਿਤਂ ਤਂ ਏਕਤ੍ਤਂ. ਏਕਤ੍ਤਂ ਏਕੇਨ ਞਾਣੇਨ ਪਟਿਵਿਜ੍ਝਤੀਤਿ – ਚਤ੍ਤਾਰਿ ਸਚ੍ਚਾਨਿ ਏਕਪ੍ਪਟਿਵੇਧਾਨਿ.

ਕਥਂ ਅਨਤ੍ਤਟ੍ਠੇਨ ਚਤ੍ਤਾਰਿ ਸਚ੍ਚਾਨਿ ਏਕਪ੍ਪਟਿਵੇਧਾਨਿ? ਚਤੂਹਾਕਾਰੇਹਿ ਅਨਤ੍ਤਟ੍ਠੇਨ ਚਤ੍ਤਾਰਿ ਸਚ੍ਚਾਨਿ ਏਕਪ੍ਪਟਿਵੇਧਾਨਿ. ਦੁਕ੍ਖਸ੍ਸ ਦੁਕ੍ਖਟ੍ਠੋ ਅਨਤ੍ਤਟ੍ਠੋ, ਸਮੁਦਯਸ੍ਸ ਸਮੁਦਯਟ੍ਠੋ ਅਨਤ੍ਤਟ੍ਠੋ, ਨਿਰੋਧਸ੍ਸ ਨਿਰੋਧਟ੍ਠੋ ਅਨਤ੍ਤਟ੍ਠੋ, ਮਗ੍ਗਸ੍ਸ ਮਗ੍ਗਟ੍ਠੋ ਅਨਤ੍ਤਟ੍ਠੋ – ਇਮੇਹਿ ਚਤੂਹਾਕਾਰੇਹਿ ਅਨਤ੍ਤਟ੍ਠੇਨ ਚਤ੍ਤਾਰਿ ਸਚ੍ਚਾਨਿ ਏਕਸਙ੍ਗਹਿਤਾਨਿ. ਯਂ ਏਕਸਙ੍ਗਹਿਤਂ ਤਂ ਏਕਤ੍ਤਂ. ਏਕਤ੍ਤਂ ਏਕੇਨ ਞਾਣੇਨ ਪਟਿਵਿਜ੍ਝਤੀਤਿ – ਚਤ੍ਤਾਰਿ ਸਚ੍ਚਾਨਿ ਏਕਪ੍ਪਟਿਵੇਧਾਨਿ.

ਕਥਂ ਸਚ੍ਚਟ੍ਠੇਨ ਚਤ੍ਤਾਰਿ ਸਚ੍ਚਾਨਿ ਏਕਪ੍ਪਟਿਵੇਧਾਨਿ? ਚਤੂਹਾਕਾਰੇਹਿ ਸਚ੍ਚਟ੍ਠੇਨ ਚਤ੍ਤਾਰਿ ਸਚ੍ਚਾਨਿ ਏਕਪ੍ਪਟਿਵੇਧਾਨਿ. ਦੁਕ੍ਖਸ੍ਸ ਦੁਕ੍ਖਟ੍ਠੋ ਸਚ੍ਚਟ੍ਠੋ, ਸਮੁਦਯਸ੍ਸ ਸਮੁਦਯਟ੍ਠੋ ਸਚ੍ਚਟ੍ਠੋ, ਨਿਰੋਧਸ੍ਸ ਨਿਰੋਧਟ੍ਠੋ ਸਚ੍ਚਟ੍ਠੋ, ਮਗ੍ਗਸ੍ਸ ਮਗ੍ਗਟ੍ਠੋ ਸਚ੍ਚਟ੍ਠੋ – ਇਮੇਹਿ ਚਤੂਹਾਕਾਰੇਹਿ ਸਚ੍ਚਟ੍ਠੇਨ ਚਤ੍ਤਾਰਿ ਸਚ੍ਚਾਨਿ ਏਕਸਙ੍ਗਹਿਤਾਨਿ. ਯਂ ਏਕਸਙ੍ਗਹਿਤਂ ਤਂ ਏਕਤ੍ਤਂ. ਏਕਤ੍ਤਂ ਏਕੇਨ ਞਾਣੇਨ ਪਟਿਵਿਜ੍ਝਤੀਤਿ – ਚਤ੍ਤਾਰਿ ਸਚ੍ਚਾਨਿ ਏਕਪ੍ਪਟਿਵੇਧਾਨਿ.

ਕਥਂ ਪਟਿਵੇਧਟ੍ਠੇਨ ਚਤ੍ਤਾਰਿ ਸਚ੍ਚਾਨਿ ਏਕਪ੍ਪਟਿਵੇਧਾਨਿ? ਚਤੂਹਾਕਾਰੇਹਿ ਪਟਿਵੇਧਟ੍ਠੇਨ ਚਤ੍ਤਾਰਿ ਸਚ੍ਚਾਨਿ ਏਕਪ੍ਪਟਿਵੇਧਾਨਿ. ਦੁਕ੍ਖਸ੍ਸ ਦੁਕ੍ਖਟ੍ਠੋ ਪਟਿਵੇਧਟ੍ਠੋ, ਸਮੁਦਯਸ੍ਸ ਸਮੁਦਯਟ੍ਠੋ ਪਟਿਵੇਧਟ੍ਠੋ ਨਿਰੋਧਸ੍ਸ ਨਿਰੋਧਟ੍ਠੋ ਪਟਿਵੇਧਟ੍ਠੋ, ਮਗ੍ਗਸ੍ਸ ਮਗ੍ਗਟ੍ਠੋ ਪਟਿਵੇਧਟ੍ਠੋ – ਇਮੇਹਿ ਚਤੂਹਾਕਾਰੇਹਿ ਪਟਿਵੇਧਟ੍ਠੇਨ ਚਤ੍ਤਾਰਿ ਸਚ੍ਚਾਨਿ ਏਕਸਙ੍ਗਹਿਤਾਨਿ ਯਂ ਏਕਸਙ੍ਗਹਿਤਂ ਤਂ ਏਕਤ੍ਤਂ. ਏਕਤ੍ਤਂ ਏਕੇਨ ਞਾਣੇਨ ਪਟਿਵਿਜ੍ਝਤੀਤਿ – ਚਤ੍ਤਾਰਿ ਸਚ੍ਚਾਨਿ ਏਕਪ੍ਪਟਿਵੇਧਾਨਿ.

੧੦. ਕਤਿਹਾਕਾਰੇਹਿ ਚਤ੍ਤਾਰਿ ਸਚ੍ਚਾਨਿ ਏਕਪ੍ਪਟਿਵੇਧਾਨਿ? ਯਂ ਅਨਿਚ੍ਚਂ ਤਂ ਦੁਕ੍ਖਂ, ਯਂ ਦੁਕ੍ਖਂ ਤਂ ਅਨਿਚ੍ਚਂ, ਯਂ ਅਨਿਚ੍ਚਞ੍ਚ ਦੁਕ੍ਖਞ੍ਚ ਤਂ ਅਨਤ੍ਤਾ. ਯਂ ਅਨਿਚ੍ਚਞ੍ਚ ਦੁਕ੍ਖਞ੍ਚ ਅਨਤ੍ਤਾ ਚ ਤਂ ਤਥਂ. ਯਂ ਅਨਿਚ੍ਚਂ ਚ ਦੁਕ੍ਖਞ੍ਚ ਅਨਤ੍ਤਾ ਚ ਤਥਞ੍ਚ ਤਂ ਸਚ੍ਚਂ. ਯਂ ਅਨਿਚ੍ਚਞ੍ਚ ਦੁਕ੍ਖਞ੍ਚ ਅਨਤ੍ਤਾ ਚ ਤਥਞ੍ਚ ਸਚ੍ਚਞ੍ਚ ਤਂ ਏਕਸਙ੍ਗਹਿਤਂ. ਯਂ ਏਕਸਙ੍ਗਹਿਤਂ ਤਂ ਏਕਤ੍ਤਂ. ਏਕਤ੍ਤਂ ਏਕੇਨ ਞਾਣੇਨ ਪਟਿਵਿਜ੍ਝਤੀਤਿ – ਚਤ੍ਤਾਰਿ ਸਚ੍ਚਾਨਿ ਏਕਪ੍ਪਟਿਵੇਧਾਨਿ.

ਕਤਿਹਾਕਾਰੇਹਿ ਚਤ੍ਤਾਰਿ ਸਚ੍ਚਾਨਿ ਏਕਪ੍ਪਟਿਵੇਧਾਨਿ? ਨਵਹਾਕਾਰੇਹਿ ਚਤ੍ਤਾਰਿ ਸਚ੍ਚਾਨਿ ਏਕਪ੍ਪਟਿਵੇਧਾਨਿ. ਤਥਟ੍ਠੇਨ, ਅਨਤ੍ਤਟ੍ਠੇਨ, ਸਚ੍ਚਟ੍ਠੇਨ, ਪਟਿਵੇਧਟ੍ਠੇਨ, ਅਭਿਞ੍ਞਟ੍ਠੇਨ, ਪਰਿਞ੍ਞਟ੍ਠੇਨ, ਪਹਾਨਟ੍ਠੇਨ, ਭਾਵਨਟ੍ਠੇਨ, ਸਚ੍ਛਿਕਿਰਿਯਟ੍ਠੇਨ – ਇਮੇਹਿ ਨਵਹਾਕਾਰੇਹਿ ਚਤ੍ਤਾਰਿ ਸਚ੍ਚਾਨਿ ਏਕਸਙ੍ਗਹਿਤਾਨਿ. ਯਂ ਏਕਸਙ੍ਗਹਿਤਂ ਤਂ ਏਕਤ੍ਤਂ. ਏਕਤ੍ਤਂ ਏਕੇਨ ਞਾਣੇਨ ਪਟਿਵਿਜ੍ਝਤੀਤਿ – ਚਤ੍ਤਾਰਿ ਸਚ੍ਚਾਨਿ ਏਕਪ੍ਪਟਿਵੇਧਾਨਿ.

ਕਥਂ ਤਥਟ੍ਠੇਨ ਚਤ੍ਤਾਰਿ ਸਚ੍ਚਾਨਿ ਏਕਪ੍ਪਟਿਵੇਧਾਨਿ? ਨਵਹਾਕਾਰੇਹਿ ਤਥਟ੍ਠੇਨ ਚਤ੍ਤਾਰਿ ਸਚ੍ਚਾਨਿ ਏਕਪ੍ਪਟਿਵੇਧਾਨਿ. ਦੁਕ੍ਖਸ੍ਸ ਦੁਕ੍ਖਟ੍ਠੋ ਤਥਟ੍ਠੋ, ਸਮੁਦਯਸ੍ਸ ਸਮੁਦਯਟ੍ਠੋ ਤਥਟ੍ਠੋ, ਨਿਰੋਧਸ੍ਸ ਨਿਰੋਧਟ੍ਠੋ ਤਥਟ੍ਠੋ, ਮਗ੍ਗਸ੍ਸ ਮਗ੍ਗਟ੍ਠੋ ਤਥਟ੍ਠੋ, ਅਭਿਞ੍ਞਾਯ ਅਭਿਞ੍ਞਟ੍ਠੋ ਤਥਟ੍ਠੋ, ਪਰਿਞ੍ਞਾਯ ਪਰਿਞ੍ਞਟ੍ਠੋ ਤਥਟ੍ਠੋ, ਪਹਾਨਸ੍ਸ ਪਹਾਨਟ੍ਠੋ ਤਥਟ੍ਠੋ, ਭਾਵਨਾਯ ਭਾਵਨਟ੍ਠੋ ਤਥਟ੍ਠੋ, ਸਚ੍ਛਿਕਿਰਿਯਾਯ ਸਚ੍ਛਿਕਿਰਿਯਟ੍ਠੋ ਤਥਟ੍ਠੋ – ਇਮੇਹਿ ਨਵਹਾਕਾਰੇਹਿ ਤਥਟ੍ਠੇਨ ਚਤ੍ਤਾਰਿ ਸਚ੍ਚਾਨਿ ਏਕਸਙ੍ਗਹਿਤਾਨਿ. ਯਂ ਏਕਸਙ੍ਗਹਿਤਂ ਤਂ ਏਕਤ੍ਤਂ. ਏਕਤ੍ਤਂ ਏਕੇਨ ਞਾਣੇਨ ਪਟਿਵਿਜ੍ਝਤੀਤਿ – ਚਤ੍ਤਾਰਿ ਸਚ੍ਚਾਨਿ ਏਕਪ੍ਪਟਿਵੇਧਾਨਿ.

ਕਥਂ ਅਨਤ੍ਤਟ੍ਠੇਨ… ਸਚ੍ਚਟ੍ਠੇਨ… ਪਟਿਵੇਧਟ੍ਠੇਨ ਚਤ੍ਤਾਰਿ ਸਚ੍ਚਾਨਿ ਏਕਪ੍ਪਟਿਵੇਧਾਨਿ? ਨਵਹਾਕਾਰੇਹਿ ਪਟਿਵੇਧਟ੍ਠੇਨ ਚਤ੍ਤਾਰਿ ਸਚ੍ਚਾਨਿ ਏਕਪ੍ਪਟਿਵੇਧਾਨਿ. ਦੁਕ੍ਖਸ੍ਸ ਦੁਕ੍ਖਟ੍ਠੋ ਪਟਿਵੇਧਟ੍ਠੋ, ਸਮੁਦਯਸ੍ਸ ਸਮੁਦਯਟ੍ਠੋ ਪਟਿਵੇਧਟ੍ਠੋ, ਨਿਰੋਧਸ੍ਸ ਨਿਰੋਧਟ੍ਠੋ ਪਟਿਵੇਧਟ੍ਠੋ, ਮਗ੍ਗਸ੍ਸ ਮਗ੍ਗਟ੍ਠੋ ਪਟਿਵੇਧਟ੍ਠੋ, ਅਭਿਞ੍ਞਾਯ ਅਭਿਞ੍ਞਟ੍ਠੋ ਪਟਿਵੇਧਟ੍ਠੋ, ਪਰਿਞ੍ਞਾਯ ਪਰਿਞ੍ਞਟ੍ਠੋ ਪਟਿਵੇਧਟ੍ਠੋ, ਪਹਾਨਸ੍ਸ ਪਹਾਨਟ੍ਠੋ ਪਟਿਵੇਧਟ੍ਠੋ, ਭਾਵਨਾਯ ਭਾਵਨਟ੍ਠੋ ਪਟਿਵੇਧਟ੍ਠੋ, ਸਚ੍ਛਿਕਿਰਿਯਾਯ ਸਚ੍ਛਿਕਿਰਿਯਟ੍ਠੋ ਪਟਿਵੇਧਟ੍ਠੋ – ਇਮੇਹਿ ਨਵਹਾਕਾਰੇਹਿ ਪਟਿਵੇਧਟ੍ਠੇਨ ਚਤ੍ਤਾਰਿ ਸਚ੍ਚਾਨਿ ਏਕਸਙ੍ਗਹਿਤਾਨਿ. ਯਂ ਏਕਸਙ੍ਗਹਿਤਂ ਤਂ ਏਕਤ੍ਤਂ. ਏਕਤ੍ਤਂ ਏਕੇਨ ਞਾਣੇਨ ਪਟਿਵਿਜ੍ਝਤੀਤਿ – ਚਤ੍ਤਾਰਿ ਸਚ੍ਚਾਨਿ ਏਕਪ੍ਪਟਿਵੇਧਾਨਿ.

੧੧. ਕਤਿਹਾਕਾਰੇਹਿ ਚਤ੍ਤਾਰਿ ਸਚ੍ਚਾਨਿ ਏਕਪ੍ਪਟਿਵੇਧਾਨਿ? ਦ੍ਵਾਦਸਹਿ ਆਕਾਰੇਹਿ ਚਤ੍ਤਾਰਿ ਸਚ੍ਚਾਨਿ ਏਕਪ੍ਪਟਿਵੇਧਾਨਿ. ਤਥਟ੍ਠੇਨ, ਅਨਤ੍ਤਟ੍ਠੇਨ, ਸਚ੍ਚਟ੍ਠੇਨ, ਪਟਿਵੇਧਟ੍ਠੇਨ, ਅਭਿਜਾਨਨਟ੍ਠੇਨ, ਪਰਿਜਾਨਨਟ੍ਠੇਨ, ਧਮ੍ਮਟ੍ਠੇਨ, ਤਥਟ੍ਠੇਨ, ਞਾਤਟ੍ਠੇਨ, ਸਚ੍ਛਿਕਿਰਿਯਟ੍ਠੇਨ, ਫਸ੍ਸਨਟ੍ਠੇਨ, ਅਭਿਸਮਯਟ੍ਠੇਨ – ਇਮੇਹਿ ਦ੍ਵਾਦਸਹਿ ਆਕਾਰੇਹਿ ਚਤ੍ਤਾਰਿ ਸਚ੍ਚਾਨਿ ਏਕਸਙ੍ਗਹਿਤਾਨਿ. ਯਂ ਏਕਸਙ੍ਗਹਿਤਂ ਤਂ ਏਕਤ੍ਤਂ. ਏਕਤ੍ਤਂ ਏਕੇਨ ਞਾਣੇਨ ਪਟਿਵਿਜ੍ਝਤੀਤਿ – ਚਤ੍ਤਾਰਿ ਸਚ੍ਚਾਨਿ ਏਕਪ੍ਪਟਿਵੇਧਾਨਿ.

ਕਥਂ ਤਥਟ੍ਠੇਨ ਚਤ੍ਤਾਰਿ ਸਚ੍ਚਾਨਿ ਏਕਪ੍ਪਟਿਵੇਧਾਨਿ? ਸੋਲ਼ਸਹਿ ਆਕਾਰੇਹਿ ਤਥਟ੍ਠੇਨ ਚਤ੍ਤਾਰਿ ਸਚ੍ਚਾਨਿ ਏਕਪ੍ਪਟਿਵੇਧਾਨਿ. ਦੁਕ੍ਖਸ੍ਸ ਪੀਲ਼ਨਟ੍ਠੋ, ਸਙ੍ਖਤਟ੍ਠੋ, ਸਨ੍ਤਾਪਟ੍ਠੋ, ਵਿਪਰਿਣਾਮਟ੍ਠੋ, ਤਥਟ੍ਠੋ; ਸਮੁਦਯਸ੍ਸ ਆਯੂਹਨਟ੍ਠੋ, ਨਿਦਾਨਟ੍ਠੋ, ਸਂਯੋਗਟ੍ਠੋ, ਪਲਿਬੋਧਟ੍ਠੋ ਤਥਟ੍ਠੋ; ਨਿਰੋਧਸ੍ਸ ਨਿਸ੍ਸਰਣਟ੍ਠੋ, ਵਿਵੇਕਟ੍ਠੋ, ਅਸਙ੍ਖਤਟ੍ਠੋ, ਅਮਤਟ੍ਠੋ ਤਥਟ੍ਠੋ; ਮਗ੍ਗਸ੍ਸ ਨਿਯ੍ਯਾਨਟ੍ਠੋ, ਹੇਤੁਟ੍ਠੋ, ਦਸ੍ਸਨਟ੍ਠੋ, ਆਧਿਪਤੇਯ੍ਯਟ੍ਠੋ ਤਥਟ੍ਠੋ – ਇਮੇਹਿ ਸੋਲ਼ਸਹਿ ਆਕਾਰੇਹਿ ਤਥਟ੍ਠੇਨ ਚਤ੍ਤਾਰਿ ਸਚ੍ਚਾਨਿ ਏਕਸਙ੍ਗਹਿਤਾਨਿ. ਯਂ ਏਕਸਙ੍ਗਹਿਤਂ ਤਂ ਏਕਤ੍ਤਂ. ਏਕਤ੍ਤਂ ਏਕੇਨ ਞਾਣੇਨ ਪਟਿਵਿਜ੍ਝਤੀਤਿ – ਚਤ੍ਤਾਰਿ ਸਚ੍ਚਾਨਿ ਏਕਪ੍ਪਟਿਵੇਧਾਨਿ.

ਕਥਂ ਅਨਤ੍ਤਟ੍ਠੇਨ…ਪੇ… ਸਚ੍ਚਟ੍ਠੇਨ… ਪਟਿਵੇਧਟ੍ਠੇਨ… ਅਭਿਜਾਨਨਟ੍ਠੇਨ… ਪਰਿਜਾਨਨਟ੍ਠੇਨ… ਧਮ੍ਮਟ੍ਠੇਨ… ਤਥਟ੍ਠੇਨ… ਞਾਤਟ੍ਠੇਨ… ਸਚ੍ਛਿਕਿਰਿਯਟ੍ਠੇਨ… ਫਸ੍ਸਨਟ੍ਠੇਨ… ਅਭਿਸਮਯਟ੍ਠੇਨ ਚਤ੍ਤਾਰਿ ਸਚ੍ਚਾਨਿ ਏਕਪ੍ਪਟਿਵੇਧਾਨਿ? ਸੋਲ਼ਸਹਿ ਆਕਾਰੇਹਿ ਅਭਿਸਮਯਟ੍ਠੇਨ ਚਤ੍ਤਾਰਿ ਸਚ੍ਚਾਨਿ ਏਕਪ੍ਪਟਿਵੇਧਾਨਿ. ਦੁਕ੍ਖਸ੍ਸ ਪੀਲ਼ਨਟ੍ਠੋ, ਸਙ੍ਖਤਟ੍ਠੋ, ਸਨ੍ਤਾਪਟ੍ਠੋ, ਵਿਪਰਿਣਾਮਟ੍ਠੋ, ਅਭਿਸਮਯਟ੍ਠੋ; ਸਮੁਦਯਸ੍ਸ ਆਯੂਹਨਟ੍ਠੋ, ਨਿਦਾਨਟ੍ਠੋ, ਸਂਯੋਗਟ੍ਠੋ, ਪਲਿਬੋਧਟ੍ਠੋ, ਅਭਿਸਮਯਟ੍ਠੋ; ਨਿਰੋਧਸ੍ਸ ਨਿਸ੍ਸਰਣਟ੍ਠੋ, ਵਿਵੇਕਟ੍ਠੋ, ਅਸਙ੍ਖਤਟ੍ਠੋ, ਅਮਤਟ੍ਠੋ, ਅਭਿਸਮਯਟ੍ਠੋ; ਮਗ੍ਗਸ੍ਸ ਨਿਯ੍ਯਾਨਟ੍ਠੋ, ਹੇਤੁਟ੍ਠੋ, ਦਸ੍ਸਨਟ੍ਠੋ, ਆਧਿਪਤੇਯ੍ਯਟ੍ਠੋ, ਅਭਿਸਮਯਟ੍ਠੋ – ਇਮੇਹਿ ਸੋਲ਼ਸਹਿ ਆਕਾਰੇਹਿ ਅਭਿਸਮਯਟ੍ਠੇਨ ਚਤ੍ਤਾਰਿ ਸਚ੍ਚਾਨਿ ਏਕਸਙ੍ਗਹਿਤਾਨਿ. ਯਂ ਏਕਸਙ੍ਗਹਿਤਂ ਤਂ ਏਕਤ੍ਤਂ. ਏਕਤ੍ਤਂ ਏਕੇਨ ਞਾਣੇਨ ਪਟਿਵਿਜ੍ਝਤੀਤਿ – ਚਤ੍ਤਾਰਿ ਸਚ੍ਚਾਨਿ ਏਕਪ੍ਪਟਿਵੇਧਾਨਿ.

੧੨. ਸਚ੍ਚਾਨਂ ਕਤਿ ਲਕ੍ਖਣਾਨਿ? ਸਚ੍ਚਾਨਂ ਦ੍ਵੇ ਲਕ੍ਖਣਾਨਿ. ਸਙ੍ਖਤਲਕ੍ਖਣਞ੍ਚ, ਅਸਙ੍ਖਤਲਕ੍ਖਣਞ੍ਚ – ਸਚ੍ਚਾਨਂ ਇਮਾਨਿ ਦ੍ਵੇ ਲਕ੍ਖਣਾਨਿ.

ਸਚ੍ਚਾਨਂ ਕਤਿ ਲਕ੍ਖਣਾਨਿ? ਸਚ੍ਚਾਨਂ ਛ ਲਕ੍ਖਣਾਨਿ. ਸਙ੍ਖਤਾਨਂ ਸਚ੍ਚਾਨਂ ਉਪ੍ਪਾਦੋ ਪਞ੍ਞਾਯਤਿ, ਵਯੋ ਪਞ੍ਞਾਯਤਿ, ਠਿਤਾਨਂ ਅਞ੍ਞਥਤ੍ਤਂ ਪਞ੍ਞਾਯਤਿ ਅਸਙ੍ਖਤਸ੍ਸ ਸਚ੍ਚਸ੍ਸ ਨ ਉਪ੍ਪਾਦੋ ਪਞ੍ਞਾਯਤਿ, ਨ ਵਯੋ ਪਞ੍ਞਾਯਤਿ, ਨ ਠਿਤਸ੍ਸ ਅਞ੍ਞਥਤ੍ਤਂ ਪਞ੍ਞਾਯਤਿ – ਸਚ੍ਚਾਨਂ ਇਮਾਨਿ ਛ ਲਕ੍ਖਣਾਨਿ.

ਸਚ੍ਚਾਨਂ ਕਤਿ ਲਕ੍ਖਣਾਨਿ? ਸਚ੍ਚਾਨਂ ਦ੍ਵਾਦਸ ਲਕ੍ਖਣਾਨਿ. ਦੁਕ੍ਖਸਚ੍ਚਸ੍ਸ ਉਪ੍ਪਾਦੋ ਪਞ੍ਞਾਯਤਿ, ਵਯੋ ਪਞ੍ਞਾਯਤਿ, ਠਿਤਸ੍ਸ ਅਞ੍ਞਥਤ੍ਤਂ ਪਞ੍ਞਾਯਤਿ; ਸਮੁਦਯਸਚ੍ਚਸ੍ਸ ਉਪ੍ਪਾਦੋ ਪਞ੍ਞਾਯਤਿ, ਵਯੋ ਪਞ੍ਞਾਯਤਿ, ਠਿਤਸ੍ਸ ਅਞ੍ਞਥਤ੍ਤਂ ਪਞ੍ਞਾਯਤਿ; ਮਗ੍ਗਸਚ੍ਚਸ੍ਸ ਉਪ੍ਪਾਦੋ ਪਞ੍ਞਾਯਤਿ, ਵਯੋ ਪਞ੍ਞਾਯਤਿ, ਠਿਤਸ੍ਸ ਅਞ੍ਞਥਤ੍ਤਂ ਪਞ੍ਞਾਯਤਿ; ਨਿਰੋਧਸਚ੍ਚਸ੍ਸ ਨ ਉਪ੍ਪਾਦੋ ਪਞ੍ਞਾਯਤਿ, ਨ ਵਯੋ ਪਞ੍ਞਾਯਤਿ, ਨ ਠਿਤਸ੍ਸ ਅਞ੍ਞਥਤ੍ਤਂ ਪਞ੍ਞਾਯਤਿ – ਸਚ੍ਚਾਨਂ ਇਮਾਨਿ ਦ੍ਵਾਦਸ ਲਕ੍ਖਣਾਨਿ.

ਚਤੁਨ੍ਨਂ ਸਚ੍ਚਾਨਂ ਕਤਿ ਕੁਸਲਾ, ਕਤਿ ਅਕੁਸਲਾ, ਕਤਿ ਅਬ੍ਯਾਕਤਾ? ਸਮੁਦਯਸਚ੍ਚਂ ਅਕੁਸਲਂ, ਮਗ੍ਗਸਚ੍ਚਂ ਕੁਸਲਂ, ਨਿਰੋਧਸਚ੍ਚਂ ਅਬ੍ਯਾਕਤਂ. ਦੁਕ੍ਖਸਚ੍ਚਂ ਸਿਯਾ ਕੁਸਲਂ, ਸਿਯਾ ਅਕੁਸਲਂ, ਸਿਯਾ ਅਬ੍ਯਾਕਤਂ.

ਸਿਯਾ ਤੀਣਿ ਸਚ੍ਚਾਨਿ ਏਕਸਚ੍ਚੇਨ ਸਙ੍ਗਹਿਤਾਨਿ, ਏਕਸਚ੍ਚਂ ਤੀਹਿ ਸਚ੍ਚੇਹਿ ਸਙ੍ਗਹਿਤਂ? ਵਤ੍ਥੁਵਸੇਨ ਪਰਿਯਾਯੇਨ ਸਿਯਾਤਿ. ਕਥਞ੍ਚ ਸਿਯਾ? ਯਂ ਦੁਕ੍ਖਸਚ੍ਚਂ ਅਕੁਸਲਂ, ਸਮੁਦਯਸਚ੍ਚਂ ਅਕੁਸਲਂ – ਏਵਂ ਅਕੁਸਲਟ੍ਠੇਨ ਦ੍ਵੇ ਸਚ੍ਚਾਨਿ ਏਕਸਚ੍ਚੇਨ ਸਙ੍ਗਹਿਤਾਨਿ, ਏਕਸਚ੍ਚਂ ਦ੍ਵੀਹਿ ਸਚ੍ਚੇਹਿ ਸਙ੍ਗਹਿਤਂ. ਯਂ ਦੁਕ੍ਖਸਚ੍ਚਂ ਕੁਸਲਂ, ਮਗ੍ਗਸਚ੍ਚਂ ਕੁਸਲਂ – ਏਵਂ ਕੁਸਲਟ੍ਠੇਨ ਦ੍ਵੇ ਸਚ੍ਚਾਨਿ ਏਕਸਚ੍ਚੇਨ ਸਙ੍ਗਹਿਤਾਨਿ, ਏਕਸਚ੍ਚਂ ਦ੍ਵੀਹਿ ਸਚ੍ਚੇਹਿ ਸਙ੍ਗਹਿਤਂ. ਯਂ ਦੁਕ੍ਖਸਚ੍ਚਂ ਅਬ੍ਯਾਕਤਂ, ਨਿਰੋਧਸਚ੍ਚਂ ਅਬ੍ਯਾਕਤਂ – ਏਵਂ ਅਬ੍ਯਾਕਤਟ੍ਠੇਨ ਦ੍ਵੇ ਸਚ੍ਚਾਨਿ ਏਕਸਚ੍ਚੇਨ ਸਙ੍ਗਹਿਤਾਨਿ, ਏਕਸਚ੍ਚਂ ਦ੍ਵੀਹਿ ਸਚ੍ਚੇਹਿ ਸਙ੍ਗਹਿਤਂ. ਏਵਂ ਸਿਯਾ ਤੀਣਿ ਸਚ੍ਚਾਨਿ ਏਕਸਚ੍ਚੇਨ ਸਙ੍ਗਹਿਤਾਨਿ, ਏਕਸਚ੍ਚਂ ਤੀਹਿ ਸਚ੍ਚੇਹਿ ਸਙ੍ਗਹਿਤਂ ਵਤ੍ਥੁਵਸੇਨ ਪਰਿਯਾਯੇਨਾਤਿ.

੨. ਦੁਤਿਯਸੁਤ੍ਤਨ੍ਤਪਾਲ਼ਿ

੧੩. ‘‘ਪੁਬ੍ਬੇ ਮੇ, ਭਿਕ੍ਖਵੇ [ਸਂ. ਨਿ. ੩.੨੬], ਸਮ੍ਬੋਧਾ ਅਨਭਿਸਮ੍ਬੁਦ੍ਧਸ੍ਸ ਬੋਧਿਸਤ੍ਤਸ੍ਸੇਵ ਸਤੋ ਏਤਦਹੋਸਿ – ‘ਕੋ ਨੁ ਖੋ ਰੂਪਸ੍ਸ ਅਸ੍ਸਾਦੋ, ਕੋ ਆਦੀਨਵੋ, ਕਿਂ ਨਿਸ੍ਸਰਣਂ; ਕੋ ਵੇਦਨਾਯ ਅਸ੍ਸਾਦੋ, ਕੋ ਆਦੀਨਵੋ, ਕਿਂ ਨਿਸ੍ਸਰਣਂ; ਕੋ ਸਞ੍ਞਾਯ ਅਸ੍ਸਾਦੋ, ਕੋ ਆਦੀਨਵੋ, ਕਿਂ ਨਿਸ੍ਸਰਣਂ; ਕੋ ਸਙ੍ਖਾਰਾਨਂ ਅਸ੍ਸਾਦੋ, ਕੋ ਆਦੀਨਵੋ, ਕਿਂ ਨਿਸ੍ਸਰਣਂ; ਕੋ ਵਿਞ੍ਞਾਣਸ੍ਸ ਅਸ੍ਸਾਦੋ, ਕੋ ਆਦੀਨਵੋ, ਕਿਂ ਨਿਸ੍ਸਰਣ’ਨ੍ਤਿ? ਤਸ੍ਸ ਮਯ੍ਹਂ, ਭਿਕ੍ਖਵੇ, ਏਤਦਹੋਸਿ – ‘ਯਂ ਖੋ ਰੂਪਂ ਪਟਿਚ੍ਚ ਉਪ੍ਪਜ੍ਜਤਿ ਸੁਖਂ ਸੋਮਨਸ੍ਸਂ – ਅਯਂ ਰੂਪਸ੍ਸ ਅਸ੍ਸਾਦੋ. ਯਂ ਰੂਪਂ ਅਨਿਚ੍ਚਂ, ਤਂ ਦੁਕ੍ਖਂ ਵਿਪਰਿਣਾਮਧਮ੍ਮਂ – ਅਯਂ ਰੂਪਸ੍ਸ ਆਦੀਨਵੋ. ਯੋ ਰੂਪਸ੍ਮਿਂ ਛਨ੍ਦਰਾਗਵਿਨਯੋ ਛਨ੍ਦਰਾਗਪ੍ਪਹਾਨਂ – ਇਦਂ ਰੂਪਸ੍ਸ ਨਿਸ੍ਸਰਣਂ. ਯਂ ਵੇਦਨਂ ਪਟਿਚ੍ਚ…ਪੇ… ਯਂ ਸਞ੍ਞਂ ਪਟਿਚ੍ਚ… ਯਂ ਸਙ੍ਖਾਰੇ ਪਟਿਚ੍ਚ… ਯਂ ਵਿਞ੍ਞਾਣਂ ਪਟਿਚ੍ਚ ਉਪ੍ਪਜ੍ਜਤਿ ਸੁਖਂ ਸੋਮਨਸ੍ਸਂ – ਅਯਂ ਵਿਞ੍ਞਾਣਸ੍ਸ ਅਸ੍ਸਾਦੋ. ਯਂ ਵਿਞ੍ਞਾਣਂ ਅਨਿਚ੍ਚਂ ਤਂ ਦੁਕ੍ਖਂ ਵਿਪਰਿਣਾਮਧਮ੍ਮਂ – ਅਯਂ ਵਿਞ੍ਞਾਣਸ੍ਸ ਆਦੀਨਵੋ. ਯੋ ਵਿਞ੍ਞਾਣਸ੍ਮਿਂ ਛਨ੍ਦਰਾਗਵਿਨਯੋ ਛਨ੍ਦਰਾਗਪ੍ਪਹਾਨਂ – ਇਦਂ ਵਿਞ੍ਞਾਣਸ੍ਸ ਨਿਸ੍ਸਰਣਂ’’.

‘‘ਯਾਵਕੀਵਞ੍ਚਾਹਂ, ਭਿਕ੍ਖਵੇ, ਇਮੇਸਂ ਪਞ੍ਚਨ੍ਨਂ ਉਪਾਦਾਨਕ੍ਖਨ੍ਧਾਨਂ ਏਵਂ ਅਸ੍ਸਾਦਞ੍ਚ ਅਸ੍ਸਾਦਤੋ ਆਦੀਨਵਞ੍ਚ ਆਦੀਨਵਤੋ ਨਿਸ੍ਸਰਣਞ੍ਚ ਨਿਸ੍ਸਰਣਤੋ ਯਥਾਭੂਤਂ ਨਾਬ੍ਭਞ੍ਞਾਸਿਂ, ਨੇਵ ਤਾਵਾਹਂ, ਭਿਕ੍ਖਵੇ, ਸਦੇਵਕੇ ਲੋਕੇ ਸਮਾਰਕੇ ਸਬ੍ਰਹ੍ਮਕੇ ਸਸ੍ਸਮਣਬ੍ਰਾਹ੍ਮਣਿਯਾ ਪਜਾਯ ਸਦੇਵਮਨੁਸ੍ਸਾਯ ‘ਅਨੁਤ੍ਤਰਂ ਸਮ੍ਮਾਸਮ੍ਬੋਧਿਂ ਅਭਿਸਮ੍ਬੁਦ੍ਧੋ’ਤਿ ਪਚ੍ਚਞ੍ਞਾਸਿਂ [ਅਭਿਸਮ੍ਬੁਦ੍ਧੋ ਪਚ੍ਚਞ੍ਞਾਸਿਂ (ਸ੍ਯਾ.) ਸਂ. ਨਿ. ੩.੨੬ ਪਸ੍ਸਿਤਬ੍ਬਾ] ਯਤੋ ਚ ਖ੍ਵਾਹਂ, ਭਿਕ੍ਖਵੇ, ਇਮੇਸਂ ਪਞ੍ਚਨ੍ਨਂ ਉਪਾਦਾਨਕ੍ਖਨ੍ਧਾਨਂ ਏਵਂ ਅਸ੍ਸਾਦਞ੍ਚ ਅਸ੍ਸਾਦਤੋ ਆਦੀਨਵਞ੍ਚ ਆਦੀਨਵਤੋ ਨਿਸ੍ਸਰਣਞ੍ਚ ਨਿਸ੍ਸਰਣਤੋ ਯਥਾਭੂਤਂ ਅਬ੍ਭਞ੍ਞਾਸਿਂ, ਅਥਾਹਂ, ਭਿਕ੍ਖਵੇ, ‘ਸਦੇਵਕੇ ਲੋਕੇ ਸਮਾਰਕੇ ਸਬ੍ਰਹ੍ਮਕੇ ਸਸ੍ਸਮਣਬ੍ਰਾਹ੍ਮਣਿਯਾ ਪਜਾਯ ਸਦੇਵਮਨੁਸ੍ਸਾਯ ਅਨੁਤ੍ਤਰਂ ਸਮ੍ਮਾਸਮ੍ਬੋਧਿਂ ਅਭਿਸਮ੍ਬੁਦ੍ਧੋ’ਤਿ ਪਚ੍ਚਞ੍ਞਾਸਿਂ. ਞਾਣਞ੍ਚ ਪਨ ਮੇ ਦਸ੍ਸਨਂ ਉਦਪਾਦਿ – ‘ਅਕੁਪ੍ਪਾ ਮੇ ਵਿਮੁਤ੍ਤਿ [ਚੇਤੋਵਿਮੁਤ੍ਤਿ (ਸ੍ਯਾ. ਕ.) ਸਂ. ਨਿ. ੩.੨੭ ਪਸ੍ਸਿਤਬ੍ਬਾ]. ਅਯਮਨ੍ਤਿਮਾ ਜਾਤਿ, ਨਤ੍ਥਿ ਦਾਨਿ ਪੁਨਬ੍ਭਵੋ’’’ਤਿ.

੩. ਦੁਤਿਯਸੁਤ੍ਤਨ੍ਤਨਿਦ੍ਦੇਸੋ

੧੪. ਯਂ ਰੂਪਂ ਪਟਿਚ੍ਚ ਉਪ੍ਪਜ੍ਜਤਿ ਸੁਖਂ ਸੋਮਨਸ੍ਸਂ, ਅਯਂ ਰੂਪਸ੍ਸ ਅਸ੍ਸਾਦੋਤਿ – ਪਹਾਨਪ੍ਪਟਿਵੇਧੋ ਸਮੁਦਯਸਚ੍ਚਂ. ਯਂ ਰੂਪਂ ਅਨਿਚ੍ਚਂ ਤਂ ਦੁਕ੍ਖਂ ਵਿਪਰਿਣਾਮਧਮ੍ਮਂ, ਅਯਂ ਰੂਪਸ੍ਸ ਆਦੀਨਵੋਤਿ – ਪਰਿਞ੍ਞਾਪਟਿਵੇਧੋ ਦੁਕ੍ਖਸਚ੍ਚਂ. ਯੋ ਰੂਪਸ੍ਮਿਂ ਛਨ੍ਦਰਾਗਵਿਨਯੋ ਛਨ੍ਦਰਾਗਪ੍ਪਹਾਨਂ, ਇਦਂ ਰੂਪਸ੍ਸ ਨਿਸ੍ਸਰਣਨ੍ਤਿ – ਸਚ੍ਛਿਕਿਰਿਯਾਪਟਿਵੇਧੋ ਨਿਰੋਧਸਚ੍ਚਂ. ਯਾ ਇਮੇਸੁ ਤੀਸੁ ਠਾਨੇਸੁ ਦਿਟ੍ਠਿ ਸਙ੍ਕਪ੍ਪੋ ਵਾਚਾ ਕਮ੍ਮਨ੍ਤੋ ਆਜੀਵੋ ਵਾਯਾਮੋ ਸਤਿ ਸਮਾਧਿ – ਭਾਵਨਾਪਟਿਵੇਧੋ ਮਗ੍ਗਸਚ੍ਚਂ.

ਯਂ ਵੇਦਨਂ ਪਟਿਚ੍ਚ…ਪੇ… ਯਂ ਸਞ੍ਞਂ ਪਟਿਚ੍ਚ… ਯਂ ਸਙ੍ਖਾਰੇ ਪਟਿਚ੍ਚ… ਯਂ ਵਿਞ੍ਞਾਣਂ ਪਟਿਚ੍ਚ ਉਪ੍ਪਜ੍ਜਤਿ ਸੁਖਂ ਸੋਮਨਸ੍ਸਂ, ਅਯਂ ਵਿਞ੍ਞਾਣਸ੍ਸ ਅਸ੍ਸਾਦੋਤਿ – ਪਹਾਨਪ੍ਪਟਿਵੇਧੋ ਸਮੁਦਯਸਚ੍ਚਂ. ਯਂ ਵਿਞ੍ਞਾਣਂ ਅਨਿਚ੍ਚਂ ਤਂ ਦੁਕ੍ਖਂ ਵਿਪਰਿਣਾਮਧਮ੍ਮਂ, ਅਯਂ ਵਿਞ੍ਞਾਣਸ੍ਸ ਆਦੀਨਵੋਤਿ – ਪਰਿਞ੍ਞਾਪਟਿਵੇਧੋ ਦੁਕ੍ਖਸਚ੍ਚਂ. ਯੋ ਵਿਞ੍ਞਾਣਸ੍ਮਿਂ ਛਨ੍ਦਰਾਗਵਿਨਯੋ ਛਨ੍ਦਰਾਗਪ੍ਪਹਾਨਂ, ਇਦਂ ਵਿਞ੍ਞਾਣਸ੍ਸ ਨਿਸ੍ਸਰਣਨ੍ਤਿ – ਸਚ੍ਛਿਕਿਰਿਯਾਪਟਿਵੇਧੋ ਨਿਰੋਧਸਚ੍ਚਂ. ਯਾ ਇਮੇਸੁ ਤੀਸੁ ਠਾਨੇਸੁ ਦਿਟ੍ਠਿ ਸਙ੍ਕਪ੍ਪੋ ਵਾਚਾ ਕਮ੍ਮਨ੍ਤੋ ਆਜੀਵੋ ਵਾਯਾਮੋ ਸਤਿ ਸਮਾਧਿ – ਭਾਵਨਾਪਟਿਵੇਧੋ ਮਗ੍ਗਸਚ੍ਚਂ.

੧੫. ਸਚ੍ਚਨ੍ਤਿ ਕਤਿਹਾਕਾਰੇਹਿ ਸਚ੍ਚਂ? ਏਸਨਟ੍ਠੇਨ, ਪਰਿਗ੍ਗਹਟ੍ਠੇਨ, ਪਟਿਵੇਧਟ੍ਠੇਨ. ਕਥਂ ਏਸਨਟ੍ਠੇਨ ਸਚ੍ਚਂ? ਜਰਾਮਰਣਂ ਕਿਂਨਿਦਾਨਂ, ਕਿਂਸਮੁਦਯਂ, ਕਿਂਜਾਤਿਕਂ, ਕਿਂਪਭਵਨ੍ਤਿ – ਏਵਂ ਏਸਨਟ੍ਠੇਨ ਸਚ੍ਚਂ. ਜਰਾਮਰਣਂ ਜਾਤਿਨਿਦਾਨਂ, ਜਾਤਿਸਮੁਦਯਂ, ਜਾਤਿਜਾਤਿਕਂ, ਜਾਤਿਪ੍ਪਭਵਨ੍ਤਿ – ਏਵਂ ਪਰਿਗ੍ਗਹਟ੍ਠੇਨ ਸਚ੍ਚਂ. ਜਰਾਮਰਣਞ੍ਚ ਪਜਾਨਾਤਿ, ਜਰਾਮਰਣਸਮੁਦਯਞ੍ਚ ਪਜਾਨਾਤਿ, ਜਰਾਮਰਣਨਿਰੋਧਞ੍ਚ ਪਜਾਨਾਤਿ, ਜਰਾਮਰਣਨਿਰੋਧਗਾਮਿਨਿਂ ਪਟਿਪਦਞ੍ਚ ਪਜਾਨਾਤਿ – ਏਵਂ ਪਟਿਵੇਧਟ੍ਠੇਨ ਸਚ੍ਚਂ.

ਜਾਤਿ ਕਿਂਨਿਦਾਨਾ, ਕਿਂਸਮੁਦਯਾ, ਕਿਂਜਾਤਿਕਾ, ਕਿਂਪਭਵਾਤਿ – ਏਵਂ ਏਸਨਟ੍ਠੇਨ ਸਚ੍ਚਂ. ਜਾਤਿ ਭਵਨਿਦਾਨਾ, ਭਵਸਮੁਦਯਾ, ਭਵਜਾਤਿਕਾ, ਭਵਪ੍ਪਭਵਾਤਿ – ਏਵਂ ਪਰਿਗ੍ਗਹਟ੍ਠੇਨ ਸਚ੍ਚਂ. ਜਾਤਿਞ੍ਚ ਪਜਾਨਾਤਿ, ਜਾਤਿਸਮੁਦਯਞ੍ਚ ਪਜਾਨਾਤਿ, ਜਾਤਿਨਿਰੋਧਞ੍ਚ ਪਜਾਨਾਤਿ, ਜਾਤਿਨਿਰੋਧਗਾਮਿਨਿਂ ਪਟਿਪਦਞ੍ਚ ਪਜਾਨਾਤਿ – ਏਵਂ ਪਟਿਵੇਧਟ੍ਠੇਨ ਸਚ੍ਚਂ.

ਭਵੋ ਕਿਂਨਿਦਾਨੋ, ਕਿਂਸਮੁਦਯੋ, ਕਿਂਜਾਤਿਕੋ, ਕਿਂਪਭਵੋਤਿ – ਏਵਂ ਏਸਨਟ੍ਠੇਨ ਸਚ੍ਚਂ. ਭਵੋ ਉਪਾਦਾਨਨਿਦਾਨੋ, ਉਪਾਦਾਨਸਮੁਦਯੋ, ਉਪਾਦਾਨਜਾਤਿਕੋ, ਉਪਾਦਾਨਪ੍ਪਭਵੋਤਿ – ਏਵਂ ਪਰਿਗ੍ਗਹਟ੍ਠੇਨ ਸਚ੍ਚਂ. ਭਵਂ ਚ ਪਜਾਨਾਤਿ, ਭਵਸਮੁਦਯਞ੍ਚ ਪਜਾਨਾਤਿ, ਭਵਨਿਰੋਧਞ੍ਚ ਪਜਾਨਾਤਿ, ਭਵਨਿਰੋਧਗਾਮਿਨਿਂ ਪਟਿਪਦਞ੍ਚ ਪਜਾਨਾਤਿ – ਏਵਂ ਪਟਿਵੇਧਟ੍ਠੇਨ ਸਚ੍ਚਂ.

ਉਪਾਦਾਨਂ ਕਿਂਨਿਦਾਨਂ, ਕਿਂਸਮੁਦਯਂ, ਕਿਂਜਾਤਿਕਂ, ਕਿਂਪਭਵਨ੍ਤਿ – ਏਵਂ ਏਸਨਟ੍ਠੇਨ ਸਚ੍ਚਂ. ਉਪਾਦਾਨਂ ਤਣ੍ਹਾਨਿਦਾਨਂ, ਤਣ੍ਹਾਸਮੁਦਯਂ, ਤਣ੍ਹਾਜਾਤਿਕਂ, ਤਣ੍ਹਾਪਭਵਨ੍ਤਿ – ਏਵਂ ਪਰਿਗ੍ਗਹਟ੍ਠੇਨ ਸਚ੍ਚਂ. ਉਪਾਦਾਨਞ੍ਚ ਪਜਾਨਾਤਿ, ਉਪਾਦਾਨਸਮੁਦਯਞ੍ਚ ਪਜਾਨਾਤਿ, ਉਪਾਦਾਨਨਿਰੋਧਞ੍ਚ ਪਜਾਨਾਤਿ ਉਪਾਦਾਨਨਿਰੋਧਗਾਮਿਨਿਂ ਪਟਿਪਦਞ੍ਚ ਪਜਾਨਾਤਿ – ਏਵਂ ਪਟਿਵੇਧਟ੍ਠੇਨ ਸਚ੍ਚਂ.

ਤਣ੍ਹਾ ਕਿਂਨਿਦਾਨਾ, ਕਿਂਸਮੁਦਯਾ, ਕਿਂਜਾਤਿਕਾ, ਕਿਂਪਭਵਾਤਿ – ਏਵਂ ਏਸਨਟ੍ਠੇਨ ਸਚ੍ਚਂ. ਤਣ੍ਹਾ ਵੇਦਨਾਨਿਦਾਨਾ, ਵੇਦਨਾਸਮੁਦਯਾ, ਵੇਦਨਾਜਾਤਿਕਾ, ਵੇਦਨਾਪਭਵਾਤਿ – ਏਵਂ ਪਰਿਗ੍ਗਹਟ੍ਠੇਨ ਸਚ੍ਚਂ. ਤਣ੍ਹਞ੍ਚ ਪਜਾਨਾਤਿ, ਤਣ੍ਹਾਸਮੁਦਯਞ੍ਚ ਪਜਾਨਾਤਿ, ਤਣ੍ਹਾਨਿਰੋਧਞ੍ਚ ਪਜਾਨਾਤਿ, ਤਣ੍ਹਾਨਿਰੋਧਗਾਮਿਨਿਂ ਪਟਿਪਦਞ੍ਚ ਪਜਾਨਾਤਿ – ਏਵਂ ਪਟਿਵੇਧਟ੍ਠੇਨ ਸਚ੍ਚਂ.

ਵੇਦਨਾ ਕਿਂਨਿਦਾਨਾ, ਕਿਂਸਮੁਦਯਾ, ਕਿਂਜਾਤਿਕਾ, ਕਿਂਪਭਵਾਤਿ – ਏਵਂ ਏਸਨਟ੍ਠੇਨ ਸਚ੍ਚਂ. ਵੇਦਨਾ ਫਸ੍ਸਨਿਦਾਨਾ, ਫਸ੍ਸਸਮੁਦਯਾ, ਫਸ੍ਸਜਾਤਿਕਾ, ਫਸ੍ਸਪ੍ਪਭਵਾਤਿ – ਏਵਂ ਪਰਿਗ੍ਗਹਟ੍ਠੇਨ ਸਚ੍ਚਂ. ਵੇਦਨਞ੍ਚ ਪਜਾਨਾਤਿ, ਵੇਦਨਾਸਮੁਦਯਞ੍ਚ ਪਜਾਨਾਤਿ, ਵੇਦਨਾਨਿਰੋਧਞ੍ਚ ਪਜਾਨਾਤਿ, ਵੇਦਨਾਨਿਰੋਧਗਾਮਿਨਿਂ ਪਟਿਪਦਞ੍ਚ ਪਜਾਨਾਤਿ – ਏਵਂ ਪਟਿਵੇਧਟ੍ਠੇਨ ਸਚ੍ਚਂ.

ਫਸ੍ਸੋ ਕਿਂਨਿਦਾਨੋ, ਕਿਂਸਮੁਦਯੋ, ਕਿਂਜਾਤਿਕੋ, ਕਿਂਪਭਵੋਤਿ – ਏਵਂ ਏਸਨਟ੍ਠੇਨ ਸਚ੍ਚਂ. ਫਸ੍ਸੋ ਸਲ਼ਾਯਤਨਨਿਦਾਨੋ, ਸਲ਼ਾਯਤਨਸਮੁਦਯੋ, ਸਲ਼ਾਯਤਨਜਾਤਿਕੋ, ਸਲ਼ਾਯਤਨਪ੍ਪਭਵੋਤਿ – ਏਵਂ ਪਰਿਗ੍ਗਹਟ੍ਠੇਨ ਸਚ੍ਚਂ. ਫਸ੍ਸਞ੍ਚ ਪਜਾਨਾਤਿ, ਫਸ੍ਸਸਮੁਦਯਞ੍ਚ ਪਜਾਨਾਤਿ, ਫਸ੍ਸਨਿਰੋਧਞ੍ਚ ਪਜਾਨਾਤਿ, ਫਸ੍ਸਨਿਰੋਧਗਾਮਿਨਿਂ ਪਟਿਪਦਞ੍ਚ ਪਜਾਨਾਤਿ – ਏਵਂ ਪਟਿਵੇਧਟ੍ਠੇਨ ਸਚ੍ਚਂ.

ਸਲ਼ਾਯਤਨਂ ਕਿਂਨਿਦਾਨਂ, ਕਿਂਸਮੁਦਯਂ, ਕਿਂਜਾਤਿਕਂ, ਕਿਂਪਭਵਨ੍ਤਿ – ਏਵਂ ਏਸਨਟ੍ਠੇਨ ਸਚ੍ਚਂ. ਸਲ਼ਾਯਤਨਂ ਨਾਮਰੂਪਨਿਦਾਨਂ, ਨਾਮਰੂਪਸਮੁਦਯਂ, ਨਾਮਰੂਪਜਾਤਿਕਂ, ਨਾਮਰੂਪਪ੍ਪਭਵਨ੍ਤਿ – ਏਵਂ ਪਰਿਗ੍ਗਹਟ੍ਠੇਨ ਸਚ੍ਚਂ. ਸਲ਼ਾਯਤਨਞ੍ਚ ਪਜਾਨਾਤਿ, ਸਲ਼ਾਯਤਨਸਮੁਦਯਞ੍ਚ ਪਜਾਨਾਤਿ, ਸਲ਼ਾਯਤਨਨਿਰੋਧਞ੍ਚ ਪਜਾਨਾਤਿ, ਸਲ਼ਾਯਤਨਨਿਰੋਧਗਾਮਿਨਿਂ ਪਟਿਪਦਞ੍ਚ ਪਜਾਨਾਤਿ – ਏਵਂ ਪਟਿਵੇਧਟ੍ਠੇਨ ਸਚ੍ਚਂ.

ਨਾਮਰੂਪਂ ਕਿਂਨਿਦਾਨਂ, ਕਿਂਸਮੁਦਯਂ, ਕਿਂਜਾਤਿਕਂ, ਕਿਂਪਭਵਨ੍ਤਿ – ਏਵਂ ਏਸਨਟ੍ਠੇਨ ਸਚ੍ਚਂ. ਨਾਮਰੂਪਂ ਵਿਞ੍ਞਾਣਨਿਦਾਨਂ, ਵਿਞ੍ਞਾਣਸਮੁਦਯਂ, ਵਿਞ੍ਞਾਣਜਾਤਿਕਂ, ਵਿਞ੍ਞਾਣਪ੍ਪਭਵਨ੍ਤਿ – ਏਵਂ ਪਰਿਗ੍ਗਹਟ੍ਠੇਨ ਸਚ੍ਚਂ. ਨਾਮਰੂਪਞ੍ਚ ਪਜਾਨਾਤਿ, ਨਾਮਰੂਪਸਮੁਦਯਞ੍ਚ ਪਜਾਨਾਤਿ, ਨਾਮਰੂਪਨਿਰੋਧਞ੍ਚ ਪਜਾਨਾਤਿ, ਨਾਮਰੂਪਨਿਰੋਧਗਾਮਿਨਿਂ ਪਟਿਪਦਞ੍ਚ ਪਜਾਨਾਤਿ – ਏਵਂ ਪਟਿਵੇਧਟ੍ਠੇਨ ਸਚ੍ਚਂ.

ਵਿਞ੍ਞਾਣਂ ਕਿਂਨਿਦਾਨਂ, ਕਿਂਸਮੁਦਯਂ, ਕਿਂਜਾਤਿਕਂ, ਕਿਂਪਭਵਨ੍ਤਿ – ਏਵਂ ਏਸਨਟ੍ਠੇਨ ਸਚ੍ਚਂ. ਵਿਞ੍ਞਾਣਂ ਸਙ੍ਖਾਰਨਿਦਾਨਂ, ਸਙ੍ਖਾਰਸਮੁਦਯਂ, ਸਙ੍ਖਾਰਜਾਤਿਕਂ, ਸਙ੍ਖਾਰਪ੍ਪਭਵਨ੍ਤਿ – ਏਵਂ ਪਰਿਗ੍ਗਹਟ੍ਠੇਨ ਸਚ੍ਚਂ. ਵਿਞ੍ਞਾਣਞ੍ਚ ਪਜਾਨਾਤਿ, ਵਿਞ੍ਞਾਣਸਮੁਦਯਞ੍ਚ ਪਜਾਨਾਤਿ, ਵਿਞ੍ਞਾਣਨਿਰੋਧਞ੍ਚ ਪਜਾਨਾਤਿ, ਵਿਞ੍ਞਾਣਨਿਰੋਧਗਾਮਿਨਿਂ ਪਟਿਪਦਞ੍ਚ ਪਜਾਨਾਤਿ – ਏਵਂ ਪਟਿਵੇਧਟ੍ਠੇਨ ਸਚ੍ਚਂ.

ਸਙ੍ਖਾਰਾ ਕਿਂਨਿਦਾਨਾ, ਕਿਂਸਮੁਦਯਾ, ਕਿਂਜਾਤਿਕਾ, ਕਿਂਪਭਵਾਤਿ – ਏਵਂ ਏਸਨਟ੍ਠੇਨ ਸਚ੍ਚਂ. ਸਙ੍ਖਾਰਾ ਅਵਿਜ੍ਜਾਨਿਦਾਨਾ, ਅਵਿਜ੍ਜਾਸਮੁਦਯਾ, ਅਵਿਜ੍ਜਾਜਾਤਿਕਾ, ਅਵਿਜ੍ਜਾਪਭਵਾਤਿ – ਏਵਂ ਪਰਿਗ੍ਗਹਟ੍ਠੇਨ ਸਚ੍ਚਂ. ਸਙ੍ਖਾਰੇ ਚ ਪਜਾਨਾਤਿ, ਸਙ੍ਖਾਰਸਮੁਦਯਞ੍ਚ ਪਜਾਨਾਤਿ, ਸਙ੍ਖਾਰਨਿਰੋਧਞ੍ਚ ਪਜਾਨਾਤਿ, ਸਙ੍ਖਾਰਨਿਰੋਧਗਾਮਿਨਿਂ ਪਟਿਪਦਞ੍ਚ ਪਜਾਨਾਤਿ – ਏਵਂ ਪਟਿਵੇਧਟ੍ਠੇਨ ਸਚ੍ਚਂ.

੧੬. ਜਰਾਮਰਣਂ ਦੁਕ੍ਖਸਚ੍ਚਂ, ਜਾਤਿ ਸਮੁਦਯਸਚ੍ਚਂ, ਉਭਿਨ੍ਨਮ੍ਪਿ ਨਿਸ੍ਸਰਣਂ ਨਿਰੋਧਸਚ੍ਚਂ, ਨਿਰੋਧਪ੍ਪਜਾਨਨਾ ਮਗ੍ਗਸਚ੍ਚਂ. ਜਾਤਿ ਦੁਕ੍ਖਸਚ੍ਚਂ, ਭਵੋ ਸਮੁਦਯਸਚ੍ਚਂ, ਉਭਿਨ੍ਨਮ੍ਪਿ ਨਿਸ੍ਸਰਣਂ ਨਿਰੋਧਸਚ੍ਚਂ, ਨਿਰੋਧਪ੍ਪਜਾਨਨਾ ਮਗ੍ਗਸਚ੍ਚਂ. ਭਵੋ ਦੁਕ੍ਖਸਚ੍ਚਂ, ਉਪਾਦਾਨਂ ਸਮੁਦਯਸਚ੍ਚਂ, ਉਭਿਨ੍ਨਮ੍ਪਿ ਨਿਸ੍ਸਰਣਂ ਨਿਰੋਧਸਚ੍ਚਂ, ਨਿਰੋਧਪ੍ਪਜਾਨਨਾ ਮਗ੍ਗਸਚ੍ਚਂ. ਉਪਾਦਾਨਂ ਦੁਕ੍ਖਸਚ੍ਚਂ, ਤਣ੍ਹਾ ਸਮੁਦਯਸਚ੍ਚਂ, ਉਭਿਨ੍ਨਮ੍ਪਿ ਨਿਸ੍ਸਰਣਂ ਨਿਰੋਧਸਚ੍ਚਂ, ਨਿਰੋਧਪ੍ਪਜਾਨਨਾ ਮਗ੍ਗਸਚ੍ਚਂ. ਤਣ੍ਹਾ ਦੁਕ੍ਖਸਚ੍ਚਂ, ਵੇਦਨਾ ਸਮੁਦਯਸਚ੍ਚਂ, ਉਭਿਨ੍ਨਮ੍ਪਿ ਨਿਸ੍ਸਰਣਂ ਨਿਰੋਧਸਚ੍ਚਂ, ਨਿਰੋਧਪ੍ਪਜਾਨਨਾ ਮਗ੍ਗਸਚ੍ਚਂ. ਵੇਦਨਾ ਦੁਕ੍ਖਸਚ੍ਚਂ, ਫਸ੍ਸੋ ਸਮੁਦਯਸਚ੍ਚਂ, ਉਭਿਨ੍ਨਮ੍ਪਿ ਨਿਸ੍ਸਰਣਂ ਨਿਰੋਧਸਚ੍ਚਂ, ਨਿਰੋਧਪ੍ਪਜਾਨਨਾ ਮਗ੍ਗਸਚ੍ਚਂ. ਫਸ੍ਸੋ ਦੁਕ੍ਖਸਚ੍ਚਂ, ਸਲ਼ਾਯਤਨਂ ਸਮੁਦਯਸਚ੍ਚਂ, ਉਭਿਨ੍ਨਮ੍ਪਿ ਨਿਸ੍ਸਰਣਂ ਨਿਰੋਧਸਚ੍ਚਂ, ਨਿਰੋਧਪ੍ਪਜਾਨਨਾ ਮਗ੍ਗਸਚ੍ਚਂ. ਸਲ਼ਾਯਤਨਂ ਦੁਕ੍ਖਸਚ੍ਚਂ, ਨਾਮਰੂਪਂ ਸਮੁਦਯਸਚ੍ਚਂ, ਉਭਿਨ੍ਨਮ੍ਪਿ ਨਿਸ੍ਸਰਣਂ ਨਿਰੋਧਸਚ੍ਚਂ, ਨਿਰੋਧਪ੍ਪਜਾਨਨਾ ਮਗ੍ਗਸਚ੍ਚਂ. ਨਾਮਰੂਪਂ ਦੁਕ੍ਖਸਚ੍ਚਂ, ਵਿਞ੍ਞਾਣਂ ਸਮੁਦਯਸਚ੍ਚਂ, ਉਭਿਨ੍ਨਮ੍ਪਿ ਨਿਸ੍ਸਰਣਂ ਨਿਰੋਧਸਚ੍ਚਂ, ਨਿਰੋਧਪ੍ਪਜਾਨਨਾ ਮਗ੍ਗਸਚ੍ਚਂ. ਵਿਞ੍ਞਾਣਂ ਦੁਕ੍ਖਸਚ੍ਚਂ, ਸਙ੍ਖਾਰਾ ਸਮੁਦਯਸਚ੍ਚਂ, ਉਭਿਨ੍ਨਮ੍ਪਿ ਨਿਸ੍ਸਰਣਂ ਨਿਰੋਧਸਚ੍ਚਂ, ਨਿਰੋਧਪ੍ਪਜਾਨਨਾ ਮਗ੍ਗਸਚ੍ਚਂ. ਸਙ੍ਖਾਰਾ ਦੁਕ੍ਖਸਚ੍ਚਂ, ਅਵਿਜ੍ਜਾ ਸਮੁਦਯਸਚ੍ਚਂ, ਉਭਿਨ੍ਨਮ੍ਪਿ ਨਿਸ੍ਸਰਣਂ ਨਿਰੋਧਸਚ੍ਚਂ, ਨਿਰੋਧਪ੍ਪਜਾਨਨਾ ਮਗ੍ਗਸਚ੍ਚਂ.

ਜਰਾਮਰਣਂ ਸਿਯਾ ਦੁਕ੍ਖਸਚ੍ਚਂ, ਸਿਯਾ ਸਮੁਦਯਸਚ੍ਚਂ, ਉਭਿਨ੍ਨਮ੍ਪਿ ਨਿਸ੍ਸਰਣਂ ਨਿਰੋਧਸਚ੍ਚਂ, ਨਿਰੋਧਪ੍ਪਜਾਨਨਾ ਮਗ੍ਗਸਚ੍ਚਂ. ਜਾਤਿ ਸਿਯਾ ਦੁਕ੍ਖਸਚ੍ਚਂ, ਸਿਯਾ ਸਮੁਦਯਸਚ੍ਚਂ…ਪੇ… ਭਵੋ ਸਿਯਾ ਦੁਕ੍ਖਸਚ੍ਚਂ, ਸਿਯਾ ਸਮੁਦਯਸਚ੍ਚਂ, ਉਭਿਨ੍ਨਮ੍ਪਿ ਨਿਸ੍ਸਰਣਂ ਨਿਰੋਧਸਚ੍ਚਂ, ਨਿਰੋਧਪ੍ਪਜਾਨਨਾ ਮਗ੍ਗਸਚ੍ਚਨ੍ਤਿ.

ਭਾਣਵਾਰੋ.

ਸਚ੍ਚਕਥਾ ਨਿਟ੍ਠਿਤਾ.