੧੦. ਮਣ੍ਡਪੇਯ੍ਯਕਥਾ

੨੩੮. ‘‘ਮਣ੍ਡਪੇਯ੍ਯਮਿਦਂ, ਭਿਕ੍ਖਵੇ, ਬ੍ਰਹ੍ਮਚਰਿਯਂ. ਸਤ੍ਥਾ ਸਮ੍ਮੁਖੀਭੂਤੋ ਤਿਧਤ੍ਤਮਣ੍ਡੋ [ਤਿਵਿਧੋ ਮਣ੍ਡੋ (ਬਹੂਸੁ) ਅਟ੍ਠਕਥਾ ਓਲੋਕੇਤਬ੍ਬਾ]. ਸਤ੍ਥਰਿ ਸਮ੍ਮੁਖੀਭੂਤੇ ਦੇਸਨਾਮਣ੍ਡੋ, ਪਟਿਗ੍ਗਹਮਣ੍ਡੋ, ਬ੍ਰਹ੍ਮਚਰਿਯਮਣ੍ਡੋ’’.

ਕਤਮੋ ਦੇਸਨਾਮਣ੍ਡੋ? ਚਤੁਨ੍ਨਂ ਅਰਿਯਸਚ੍ਚਾਨਂ ਆਚਿਕ੍ਖਨਾ ਦੇਸਨਾ ਪਞ੍ਞਾਪਨਾ ਪਟ੍ਠਪਨਾ ਵਿਵਰਣਾ ਵਿਭਜਨਾ ਉਤ੍ਤਾਨੀਕਮ੍ਮਂ [ਉਤ੍ਤਾਨਿਕਮ੍ਮਂ (ਕ.)], ਚਤੁਨ੍ਨਂ ਸਤਿਪਟ੍ਠਾਨਾਨਂ…ਪੇ… ਚਤੁਨ੍ਨਂ ਸਮ੍ਮਪ੍ਪਧਾਨਾਨਂ… ਚਤੁਨ੍ਨਂ ਇਦ੍ਧਿਪਾਦਾਨਂ… ਪਞ੍ਚਨ੍ਨਂ ਇਨ੍ਦ੍ਰਿਯਾਨਂ… ਪਞ੍ਚਨ੍ਨਂ ਬਲਾਨਂ… ਸਤ੍ਤਨ੍ਨਂ ਬੋਜ੍ਝਙ੍ਗਾਨਂ… ਅਰਿਯਸ੍ਸ ਅਟ੍ਠਙ੍ਗਿਕਸ੍ਸ ਮਗ੍ਗਸ੍ਸ ਆਚਿਕ੍ਖਨਾ ਦੇਸਨਾ ਪਞ੍ਞਾਪਨਾ ਪਟ੍ਠਪਨਾ ਵਿਵਰਣਾ ਵਿਭਜਨਾ ਉਤ੍ਤਾਨੀਕਮ੍ਮਂ – ਅਯਂ ਦੇਸਨਾਮਣ੍ਡੋ.

ਕਤਮੋ ਪਟਿਗ੍ਗਹਮਣ੍ਡੋ? ਭਿਕ੍ਖੂ ਭਿਕ੍ਖੁਨਿਯੋ ਉਪਾਸਕਾ ਉਪਾਸਿਕਾਯੋ ਦੇਵਾ ਮਨੁਸ੍ਸਾ ਯੇ ਵਾ ਪਨਞ੍ਞੇਪਿ ਕੇਚਿ ਵਿਞ੍ਞਾਤਾਰੋ – ਅਯਂ ਪਟਿਗ੍ਗਹਮਣ੍ਡੋ.

ਕਤਮੋ ਬ੍ਰਹ੍ਮਚਰਿਯਮਣ੍ਡੋ? ਅਯਮੇਵ ਅਰਿਯੋ ਅਟ੍ਠਙ੍ਗਿਕੋ ਮਗ੍ਗੋ, ਸੇਯ੍ਯਥਿਦਂ – ਸਮ੍ਮਾਦਿਟ੍ਠਿ, ਸਮ੍ਮਾਸਙ੍ਕਪ੍ਪੋ, ਸਮ੍ਮਾਵਾਚਾ, ਸਮ੍ਮਾਕਮ੍ਮਨ੍ਤੋ, ਸਮ੍ਮਾਆਜੀਵੋ, ਸਮ੍ਮਾਵਾਯਾਮੋ, ਸਮ੍ਮਾਸਤਿ, ਸਮ੍ਮਾਸਮਾਧਿ – ਅਯਂ ਬ੍ਰਹ੍ਮਚਰਿਯਮਣ੍ਡੋ.

੨੩੯. ਅਧਿਮੋਕ੍ਖਮਣ੍ਡੋ ਸਦ੍ਧਿਨ੍ਦ੍ਰਿਯਂ, ਅਸ੍ਸਦ੍ਧਿਯਂ ਕਸਟੋ; ਅਸ੍ਸਦ੍ਧਿਯਂ ਕਸਟਂ ਛਡ੍ਡੇਤ੍ਵਾ ਸਦ੍ਧਿਨ੍ਦ੍ਰਿਯਸ੍ਸ ਅਧਿਮੋਕ੍ਖਮਣ੍ਡਂ ਪਿਵਤੀਤਿ – ਮਣ੍ਡਪੇਯ੍ਯਂ. ਪਗ੍ਗਹਮਣ੍ਡੋ ਵੀਰਿਯਿਨ੍ਦ੍ਰਿਯਂ, ਕੋਸਜ੍ਜਂ ਕਸਟੋ; ਕੋਸਜ੍ਜਂ ਕਸਟਂ ਛਡ੍ਡੇਤ੍ਵਾ ਵੀਰਿਯਿਨ੍ਦ੍ਰਿਯਸ੍ਸ ਪਗ੍ਗਹਮਣ੍ਡਂ ਪਿਵਤੀਤਿ – ਮਣ੍ਡਪੇਯ੍ਯਂ. ਉਪਟ੍ਠਾਨਮਣ੍ਡੋ ਸਤਿਨ੍ਦ੍ਰਿਯਂ, ਪਮਾਦੋ ਕਸਟੋ; ਪਮਾਦਂ ਕਸਟਂ ਛਡ੍ਡੇਤ੍ਵਾ ਸਤਿਨ੍ਦ੍ਰਿਯਸ੍ਸ ਉਪਟ੍ਠਾਨਮਣ੍ਡਂ ਪਿਵਤੀਤਿ – ਮਣ੍ਡਪੇਯ੍ਯਂ. ਅਵਿਕ੍ਖੇਪਮਣ੍ਡੋ ਸਮਾਧਿਨ੍ਦ੍ਰਿਯਂ, ਉਦ੍ਧਚ੍ਚਂ ਕਸਟੋ; ਉਦ੍ਧਚ੍ਚਂ ਕਸਟਂ ਛਡ੍ਡੇਤ੍ਵਾ ਸਮਾਧਿਨ੍ਦ੍ਰਿਯਸ੍ਸ ਅਵਿਕ੍ਖੇਪਮਣ੍ਡਂ ਪਿਵਤੀਤਿ – ਮਣ੍ਡਪੇਯ੍ਯਂ. ਦਸ੍ਸਨਮਣ੍ਡੋ ਪਞ੍ਞਿਨ੍ਦ੍ਰਿਯਂ, ਅਵਿਜ੍ਜਂ ਕਸਟੋ; ਅਵਿਜ੍ਜਂ ਕਸਟਂ ਛਡ੍ਡੇਤ੍ਵਾ ਪਞ੍ਞਿਨ੍ਦ੍ਰਿਯਸ੍ਸ ਦਸ੍ਸਨਮਣ੍ਡਂ ਪਿਵਤੀਤਿ – ਮਣ੍ਡਪੇਯ੍ਯਂ.

ਅਸ੍ਸਦ੍ਧਿਯੇ ਅਕਮ੍ਪਿਯਮਣ੍ਡੋ ਸਦ੍ਧਾਬਲਂ, ਅਸ੍ਸਦ੍ਧਿਯਂ ਕਸਟੋ; ਅਸ੍ਸਦ੍ਧਿਯਂ ਕਸਟਂ ਛਡ੍ਡੇਤ੍ਵਾ ਸਦ੍ਧਾਬਲਸ੍ਸ ਅਸ੍ਸਦ੍ਧਿਯੇ ਅਕਮ੍ਪਿਯਮਣ੍ਡਂ ਪਿਵਤੀਤਿ – ਮਣ੍ਡਪੇਯ੍ਯਂ. ਕੋਸਜ੍ਜੇ ਅਕਮ੍ਪਿਯਮਣ੍ਡੋ ਵੀਰਿਯਬਲਂ, ਕੋਸਜ੍ਜਂ ਕਸਟੋ; ਕੋਸਜ੍ਜਂ ਕਸਟਂ ਛਡ੍ਡੇਤ੍ਵਾ ਵੀਰਿਯਬਲਸ੍ਸ ਕੋਸਜ੍ਜੇ ਅਕਮ੍ਪਿਯਮਣ੍ਡਂ ਪਿਵਤੀਤਿ – ਮਣ੍ਡਪੇਯ੍ਯਂ. ਪਮਾਦੇ ਅਕਮ੍ਪਿਯਮਣ੍ਡੋ ਸਤਿਬਲਂ, ਪਮਾਦੋ ਕਸਟੋ; ਪਮਾਦਂ ਕਸਟਂ ਛਡ੍ਡੇਤ੍ਵਾ ਸਤਿਬਲਸ੍ਸ ਪਮਾਦੇ ਅਕਮ੍ਪਿਯਮਣ੍ਡਂ ਪਿਵਤੀਤਿ – ਮਣ੍ਡਪੇਯ੍ਯਂ. ਉਦ੍ਧਚ੍ਚੇ ਅਕਮ੍ਪਿਯਮਣ੍ਡੋ ਸਮਾਧਿਬਲਂ, ਉਦ੍ਧਚ੍ਚਂ ਕਸਟੋ; ਉਦ੍ਧਚ੍ਚਂ ਕਸਟਂ ਛਡ੍ਡੇਤ੍ਵਾ ਸਮਾਧਿਬਲਸ੍ਸ ਉਦ੍ਧਚ੍ਚੇ ਅਕਮ੍ਪਿਯਮਣ੍ਡਂ ਪਿਵਤੀਤਿ – ਮਣ੍ਡਪੇਯ੍ਯਂ. ਅਵਿਜ੍ਜਾਯ ਅਕਮ੍ਪਿਯਮਣ੍ਡੋ ਪਞ੍ਞਾਬਲਂ, ਅਵਿਜ੍ਜਾ ਕਸਟੋ; ਅਵਿਜ੍ਜਂ ਕਸਟਂ ਛਡ੍ਡੇਤ੍ਵਾ ਪਞ੍ਞਾਬਲਸ੍ਸ ਅਵਿਜ੍ਜਾਯ ਅਕਮ੍ਪਿਯਮਣ੍ਡਂ ਪਿਵਤੀਤਿ – ਮਣ੍ਡਪੇਯ੍ਯਂ.

ਉਪਟ੍ਠਾਨਮਣ੍ਡੋ ਸਤਿਸਮ੍ਬੋਜ੍ਝਙ੍ਗਾ, ਪਮਾਦੋ ਕਸਟੋ; ਪਮਾਦਂ ਕਸਟਂ ਛਡ੍ਡੇਤ੍ਵਾ ਸਤਿਸਮ੍ਬੋਜ੍ਝਙ੍ਗਸ੍ਸ ਉਪਟ੍ਠਾਨਮਣ੍ਡਂ ਪਿਵਤੀਤਿ – ਮਣ੍ਡਪੇਯ੍ਯਂ. ਪਵਿਚਯਮਣ੍ਡੋ ਧਮ੍ਮਵਿਚਯਸਮ੍ਬੋਜ੍ਝਙ੍ਗੋ, ਅਵਿਜ੍ਜਾ ਕਸਟੋ; ਅਵਿਜ੍ਜਂ ਕਸਟਂ ਛਡ੍ਡੇਤ੍ਵਾ ਧਮ੍ਮਵਿਚਯਸਮ੍ਬੋਜ੍ਝਙ੍ਗਸ੍ਸ ਪਵਿਚਯਮਣ੍ਡਂ ਪਿਵਤੀਤਿ – ਮਣ੍ਡਪੇਯ੍ਯਂ. ਪਗ੍ਗਹਮਣ੍ਡੋ ਵੀਰਿਯਸਮ੍ਬੋਜ੍ਝਙ੍ਗੋ, ਕੋਸਜ੍ਜਂ ਕਸਟੋ; ਕੋਸਜ੍ਜਂ ਕਸਟਂ ਛਡ੍ਡੇਤ੍ਵਾ ਵੀਰਿਯਸਮ੍ਬੋਜ੍ਝਙ੍ਗਸ੍ਸ ਪਗ੍ਗਹਮਣ੍ਡਂ ਪਿਵਤੀਤਿ – ਮਣ੍ਡਪੇਯ੍ਯਂ. ਫਰਣਮਣ੍ਡੋ ਪੀਤਿਸਮ੍ਬੋਜ੍ਝਙ੍ਗੋ, ਪਰਿਲ਼ਾਹੋ ਕਸਟੋ; ਪਰਿਲ਼ਾਹਂ ਕਸਟਂ ਛਡ੍ਡੇਤ੍ਵਾ ਪੀਤਿਸਮ੍ਬੋਜ੍ਝਙ੍ਗਸ੍ਸ ਫਰਣਮਣ੍ਡਂ ਪਿਵਤੀਤਿ – ਮਣ੍ਡਪੇਯ੍ਯਂ. ਉਪਸਮਮਣ੍ਡੋ ਪਸ੍ਸਦ੍ਧਿਸਮ੍ਬੋਜ੍ਝਙ੍ਗੋ, ਦੁਟ੍ਠੁਲ੍ਲਂ ਕਸਟੋ; ਦੁਟ੍ਠੁਲ੍ਲਂ ਕਸਟਂ ਛਡ੍ਡੇਤ੍ਵਾ ਪਸ੍ਸਦ੍ਧਿਸਮ੍ਬੋਜ੍ਝਙ੍ਗਸ੍ਸ ਉਪਸਮਮਣ੍ਡਂ ਪਿਵਤੀਤਿ – ਮਣ੍ਡਪੇਯ੍ਯਂ. ਅਵਿਕ੍ਖੇਪਮਣ੍ਡੋ ਸਮਾਧਿਸਮ੍ਬੋਜ੍ਝਙ੍ਗੋ, ਉਦ੍ਧਚ੍ਚਂ ਕਸਟੋ; ਉਦ੍ਧਚ੍ਚਂ ਕਸਟਂ ਛਡ੍ਡੇਤ੍ਵਾ ਸਮਾਧਿਸਮ੍ਬੋਜ੍ਝਙ੍ਗਸ੍ਸ ਅਵਿਕ੍ਖੇਪਮਣ੍ਡਂ ਪਿਵਤੀਤਿ – ਮਣ੍ਡਪੇਯ੍ਯਂ. ਪਟਿਸਙ੍ਖਾਨਮਣ੍ਡੋ ਉਪੇਕ੍ਖਾਸਮ੍ਬੋਜ੍ਝਙ੍ਗੋ, ਅਪ੍ਪਟਿਸਙ੍ਖਾ ਕਸਟੋ; ਅਪ੍ਪਟਿਸਙ੍ਖਂ ਕਸਟਂ ਛਡ੍ਡੇਤ੍ਵਾ ਉਪੇਕ੍ਖਾਸਮ੍ਬੋਜ੍ਝਙ੍ਗਸ੍ਸ ਪਟਿਸਙ੍ਖਾਨਮਣ੍ਡਂ ਪਿਵਤੀਤਿ – ਮਣ੍ਡਪੇਯ੍ਯਂ.

ਦਸ੍ਸਨਮਣ੍ਡੋ ਸਮ੍ਮਾਦਿਟ੍ਠਿ, ਮਿਚ੍ਛਾਦਿਟ੍ਠਿ ਕਸਟੋ; ਮਿਚ੍ਛਾਦਿਟ੍ਠਿਂ ਕਸਟਂ ਛਡ੍ਡੇਤ੍ਵਾ ਸਮ੍ਮਾਦਿਟ੍ਠਿਯਾ ਦਸ੍ਸਨਮਣ੍ਡਂ ਪਿਵਤੀਤਿ – ਮਣ੍ਡਪੇਯ੍ਯਂ. ਅਭਿਨਿਰੋਪਨਮਣ੍ਡੋ ਸਮ੍ਮਾਸਙ੍ਕਪ੍ਪੋ, ਮਿਚ੍ਛਾਸਙ੍ਕਪ੍ਪੋ ਕਸਟੋ; ਮਿਚ੍ਛਾਸਙ੍ਕਪ੍ਪਂ ਕਸਟਂ ਛਡ੍ਡੇਤ੍ਵਾ ਸਮ੍ਮਾਸਙ੍ਕਪ੍ਪਸ੍ਸ ਅਭਿਨਿਰੋਪਨਮਣ੍ਡਂ ਪਿਵਤੀਤਿ – ਮਣ੍ਡਪੇਯ੍ਯਂ. ਪਰਿਗ੍ਗਹਮਣ੍ਡੋ ਸਮ੍ਮਾਵਾਚਾ, ਮਿਚ੍ਛਾਵਾਚਾ ਕਸਟੋ; ਮਿਚ੍ਛਾਵਾਚਂ ਕਸਟਂ ਛਡ੍ਡੇਤ੍ਵਾ ਸਮ੍ਮਾਵਾਚਾਯ ਪਰਿਗ੍ਗਹਮਣ੍ਡਂ ਪਿਵਤੀਤਿ – ਮਣ੍ਡਪੇਯ੍ਯਂ. ਸਮੁਟ੍ਠਾਨਮਣ੍ਡੋ ਸਮ੍ਮਾਕਮ੍ਮਨ੍ਤੋ, ਮਿਚ੍ਛਾਕਮ੍ਮਨ੍ਤੋ ਕਸਟੋ; ਮਿਚ੍ਛਾਕਮ੍ਮਨ੍ਤਂ ਕਸਟਂ ਛਡ੍ਡੇਤ੍ਵਾ ਸਮ੍ਮਾਕਮ੍ਮਨ੍ਤਸ੍ਸ ਸਮੁਟ੍ਠਾਨਮਣ੍ਡਂ ਪਿਵਤੀਤਿ – ਮਣ੍ਡਪੇਯ੍ਯਂ. ਵੋਦਾਨਮਣ੍ਡੋ ਸਮ੍ਮਾਆਜੀਵੋ, ਮਿਚ੍ਛਾਆਜੀਵੋ ਕਸਟੋ; ਮਿਚ੍ਛਾਆਜੀਵਂ ਕਸਟਂ ਛਡ੍ਡੇਤ੍ਵਾ ਸਮ੍ਮਾਆਜੀਵਸ੍ਸ ਵੋਦਾਨਮਣ੍ਡਂ ਪਿਵਤੀਤਿ – ਮਣ੍ਡਪੇਯ੍ਯਂ. ਪਗ੍ਗਹਮਣ੍ਡੋ ਸਮ੍ਮਾਵਾਯਾਮੋ, ਮਿਚ੍ਛਾਵਾਯਾਮੋ ਕਸਟੋ; ਮਿਚ੍ਛਾਵਾਯਾਮਂ ਕਸਟਂ ਛਡ੍ਡੇਤ੍ਵਾ ਸਮ੍ਮਾਵਾਯਾਮਸ੍ਸ ਪਗ੍ਗਹਮਣ੍ਡਂ ਪਿਵਤੀਤਿ – ਮਣ੍ਡਪੇਯ੍ਯਂ. ਉਪਟ੍ਠਾਨਮਣ੍ਡੋ ਸਮ੍ਮਾਸਤਿ, ਮਿਚ੍ਛਾਸਤਿ ਕਸਟੋ; ਮਿਚ੍ਛਾਸਤਿਂ ਕਸਟਂ ਛਡ੍ਡੇਤ੍ਵਾ ਸਮ੍ਮਾਸਤਿਯਾ ਉਪਟ੍ਠਾਨਮਣ੍ਡਂ ਪਿਵਤੀਤਿ – ਮਣ੍ਡਪੇਯ੍ਯਂ. ਅਵਿਕ੍ਖੇਪਮਣ੍ਡੋ ਸਮ੍ਮਾਸਮਾਧਿ, ਮਿਚ੍ਛਾਸਮਾਧਿ ਕਸਟੋ; ਮਿਚ੍ਛਾਸਮਾਧਿਂ ਕਸਟਂ ਛਡ੍ਡੇਤ੍ਵਾ ਸਮ੍ਮਾਸਮਾਧਿਸ੍ਸ ਅਵਿਕ੍ਖੇਪਮਣ੍ਡਂ ਪਿਵਤੀਤਿ – ਮਣ੍ਡਪੇਯ੍ਯਂ.

੨੪੦. ਅਤ੍ਥਿ ਮਣ੍ਡੋ, ਅਤ੍ਥਿ ਪੇਯ੍ਯਂ, ਅਤ੍ਥਿ ਕਸਟੋ. ਅਧਿਮੋਕ੍ਖਮਣ੍ਡੋ ਸਦ੍ਧਿਨ੍ਦ੍ਰਿਯਂ, ਅਸ੍ਸਦ੍ਧਿਯਂ ਕਸਟੋ; ਯੋ ਤਤ੍ਥ ਅਤ੍ਥਰਸੋ ਧਮ੍ਮਰਸੋ ਵਿਮੁਤ੍ਤਿਰਸੋ – ਇਦਂ ਪੇਯ੍ਯਂ. ਪਗ੍ਗਹਮਣ੍ਡੋ ਵੀਰਿਯਿਨ੍ਦ੍ਰਿਯਂ, ਕੋਸਜ੍ਜਂ ਕਸਟੋ; ਯੋ ਤਤ੍ਥ ਅਤ੍ਥਰਸੋ ਧਮ੍ਮਰਸੋ ਵਿਮੁਤ੍ਤਿਰਸੋ – ਇਦਂ ਪੇਯ੍ਯਂ. ਉਪਟ੍ਠਾਨਮਣ੍ਡੋ ਸਤਿਨ੍ਦ੍ਰਿਯਂ, ਪਮਾਦੋ ਕਸਟੋ; ਯੋ ਤਤ੍ਥ ਅਤ੍ਥਰਸੋ ਧਮ੍ਮਰਸੋ ਵਿਮੁਤ੍ਤਿਰਸੋ – ਇਦਂ ਪੇਯ੍ਯਂ. ਅਵਿਕ੍ਖੇਪਮਣ੍ਡੋ ਸਮਾਧਿਨ੍ਦ੍ਰਿਯਂ, ਉਦ੍ਧਚ੍ਚਂ ਕਸਟੋ; ਯੋ ਤਤ੍ਥ ਅਤ੍ਥਰਸੋ ਧਮ੍ਮਰਸੋ ਵਿਮੁਤ੍ਤਿਰਸੋ – ਇਦਂ ਪੇਯ੍ਯਂ. ਦਸ੍ਸਨਮਣ੍ਡੋ ਪਞ੍ਞਿਨ੍ਦ੍ਰਿਯਂ, ਅਵਿਜ੍ਜਾ ਕਸਟੋ; ਯੋ ਤਤ੍ਥ ਅਤ੍ਥਰਸੋ ਧਮ੍ਮਰਸੋ ਵਿਮੁਤ੍ਤਿਰਸੋ – ਇਦਂ ਪੇਯ੍ਯਂ.

ਅਸ੍ਸਦ੍ਧਿਯੇ ਅਕਮ੍ਪਿਯਮਣ੍ਡੋ ਸਦ੍ਧਾਬਲਂ, ਅਸ੍ਸਦ੍ਧਿਯਂ ਕਸਟੋ; ਯੋ ਤਤ੍ਥ ਅਤ੍ਥਰਸੋ ਧਮ੍ਮਰਸੋ ਵਿਮੁਤ੍ਤਿਰਸੋ – ਇਦਂ ਪੇਯ੍ਯਂ. ਕੋਸਜ੍ਜੇ ਅਕਮ੍ਪਿਯਮਣ੍ਡੋ ਵੀਰਿਯਬਲਂ, ਕੋਸਜ੍ਜਂ ਕਸਟੋ; ਯੋ ਤਤ੍ਥ ਅਤ੍ਥਰਸੋ ਧਮ੍ਮਰਸੋ ਵਿਮੁਤ੍ਤਿਰਸੋ – ਇਦਂ ਪੇਯ੍ਯਂ. ਪਮਾਦੇ ਅਕਮ੍ਪਿਯਮਣ੍ਡੋ ਸਤਿਬਲਂ, ਪਮਾਦੋ ਕਸਟੋ; ਯੋ ਤਤ੍ਥ ਅਤ੍ਥਰਸੋ ਧਮ੍ਮਰਸੋ ਵਿਮੁਤ੍ਤਿਰਸੋ – ਇਦਂ ਪੇਯ੍ਯਂ. ਉਦ੍ਧਚ੍ਚੇ ਅਕਮ੍ਪਿਯਮਣ੍ਡੋ ਸਮਾਧਿਬਲਂ, ਉਦ੍ਧਚ੍ਚਂ ਕਸਟੋ; ਯੋ ਤਤ੍ਥ ਅਤ੍ਥਰਸੋ ਧਮ੍ਮਰਸੋ ਵਿਮੁਤ੍ਤਿਰਸੋ – ਇਦਂ ਪੇਯ੍ਯਂ. ਅਵਿਜ੍ਜਾਯ ਅਕਮ੍ਪਿਯਮਣ੍ਡੋ ਪਞ੍ਞਾਬਲਂ, ਅਵਿਜ੍ਜਾ ਕਸਟੋ; ਯੋ ਤਤ੍ਥ ਅਤ੍ਥਰਸੋ ਧਮ੍ਮਰਸੋ ਵਿਮੁਤ੍ਤਿਰਸੋ – ਇਦਂ ਪੇਯ੍ਯਂ.

ਉਪਟ੍ਠਾਨਮਣ੍ਡੋ ਸਤਿਸਮ੍ਬੋਜ੍ਝਙ੍ਗੋ, ਪਮਾਦੋ ਕਸਟੋ; ਯੋ ਤਤ੍ਥ ਅਤ੍ਥਰਸੋ ਧਮ੍ਮਰਸੋ ਵਿਮੁਤ੍ਤਿਰਸੋ – ਇਦਂ ਪੇਯ੍ਯਂ. ਪਵਿਚਯਮਣ੍ਡੋ ਧਮ੍ਮਵਿਚਯਸਮ੍ਬੋਜ੍ਝਙ੍ਗੋ, ਅਵਿਜ੍ਜਾ ਕਸਟੋ; ਯੋ ਤਤ੍ਥ ਅਤ੍ਥਰਸੋ ਧਮ੍ਮਰਸੋ ਵਿਮੁਤ੍ਤਿਰਸੋ – ਇਦਂ ਪੇਯ੍ਯਂ. ਪਗ੍ਗਹਮਣ੍ਡੋ ਵੀਰਿਯਸਮ੍ਬੋਜ੍ਝਙ੍ਗੋ, ਕੋਸਜ੍ਜਂ ਕਸਟੋ; ਯੋ ਤਤ੍ਥ ਅਤ੍ਥਰਸੋ ਧਮ੍ਮਰਸੋ ਵਿਮੁਤ੍ਤਿਰਸੋ – ਇਦਂ ਪੇਯ੍ਯਂ. ਫਰਣਮਣ੍ਡੋ ਪੀਤਿਸਮ੍ਬੋਜ੍ਝਙ੍ਗੋ, ਪਰਿਲ਼ਾਹੋ ਕਸਟੋ; ਯੋ ਤਤ੍ਥ ਅਤ੍ਥਰਸੋ ਧਮ੍ਮਰਸੋ ਵਿਮੁਤ੍ਤਿਰਸੋ – ਇਦਂ ਪੇਯ੍ਯਂ. ਉਪਸਮਮਣ੍ਡੋ ਪਸ੍ਸਦ੍ਧਿਸਮ੍ਬੋਜ੍ਝਙ੍ਗੋ, ਦੁਟ੍ਠੁਲ੍ਲਂ ਕਸਟੋ; ਯੋ ਤਤ੍ਥ ਅਤ੍ਥਰਸੋ ਧਮ੍ਮਰਸੋ ਵਿਮੁਤ੍ਤਿਰਸੋ – ਇਦਂ ਪੇਯ੍ਯਂ. ਅਵਿਕ੍ਖੇਪਮਣ੍ਡੋ ਸਮਾਧਿਸਮ੍ਬੋਜ੍ਝਙ੍ਗੋ, ਉਦ੍ਧਚ੍ਚਂ ਕਸਟੋ; ਯੋ ਤਤ੍ਥ ਅਤ੍ਥਰਸੋ ਧਮ੍ਮਰਸੋ ਵਿਮੁਤ੍ਤਿਰਸੋ – ਇਦਂ ਪੇਯ੍ਯਂ. ਪਟਿਸਙ੍ਖਾਨਮਣ੍ਡੋ ਉਪੇਕ੍ਖਾਸਮ੍ਬੋਜ੍ਝਙ੍ਗੋ, ਅਪਟਿਸਙ੍ਖਾ ਕਸਟੋ; ਯੋ ਤਤ੍ਥ ਅਤ੍ਥਰਸੋ ਧਮ੍ਮਰਸੋ ਵਿਮੁਤ੍ਤਿਰਸੋ – ਇਦਂ ਪੇਯ੍ਯਂ.

ਦਸ੍ਸਨਮਣ੍ਡੋ ਸਮ੍ਮਾਦਿਟ੍ਠਿ, ਮਿਚ੍ਛਾਦਿਟ੍ਠਿ ਕਸਟੋ; ਯੋ ਤਤ੍ਥ ਅਤ੍ਥਰਸੋ ਧਮ੍ਮਰਸੋ ਵਿਮੁਤ੍ਤਿਰਸੋ – ਇਦਂ ਪੇਯ੍ਯਂ. ਅਭਿਨਿਰੋਪਨਮਣ੍ਡੋ ਸਮ੍ਮਾਸਙ੍ਕਪ੍ਪੋ, ਮਿਚ੍ਛਾਸਙ੍ਕਪ੍ਪੋ ਕਸਟੋ; ਯੋ ਤਤ੍ਥ ਅਤ੍ਥਰਸੋ ਧਮ੍ਮਰਸੋ ਵਿਮੁਤ੍ਤਿਰਸੋ – ਇਦਂ ਪੇਯ੍ਯਂ. ਪਰਿਗ੍ਗਹਮਣ੍ਡੋ ਸਮ੍ਮਾਵਾਚਾ, ਮਿਚ੍ਛਾਵਾਚਾ ਕਸਟੋ; ਯੋ ਤਤ੍ਥ ਅਤ੍ਥਰਸੋ ਧਮ੍ਮਰਸੋ ਵਿਮੁਤ੍ਤਿਰਸੋ – ਇਦਂ ਪੇਯ੍ਯਂ. ਸਮੁਟ੍ਠਾਨਮਣ੍ਡੋ ਸਮ੍ਮਾਕਮ੍ਮਨ੍ਤੋ, ਮਿਚ੍ਛਾਕਮ੍ਮਨ੍ਤੋ ਕਸਟੋ; ਯੋ ਤਤ੍ਥ ਅਤ੍ਥਰਸੋ ਧਮ੍ਮਰਸੋ ਵਿਮੁਤ੍ਤਿਰਸੋ – ਇਦਂ ਪੇਯ੍ਯਂ. ਵੋਦਾਨਮਣ੍ਡੋ ਸਮ੍ਮਾਆਜੀਵੋ, ਮਿਚ੍ਛਾਆਜੀਵੋ ਕਸਟੋ; ਯੋ ਤਤ੍ਥ ਅਤ੍ਥਰਸੋ ਧਮ੍ਮਰਸੋ ਵਿਮੁਤ੍ਤਿਰਸੋ – ਇਦਂ ਪੇਯ੍ਯਂ. ਪਗ੍ਗਹਮਣ੍ਡੋ ਸਮ੍ਮਾਵਾਯਾਮੋ, ਮਿਚ੍ਛਾਵਾਯਾਮੋ ਕਸਟੋ; ਯੋ ਤਤ੍ਥ ਅਤ੍ਥਰਸੋ ਧਮ੍ਮਰਸੋ ਵਿਮੁਤ੍ਤਿਰਸੋ – ਇਦਂ ਪੇਯ੍ਯਂ. ਉਪਟ੍ਠਾਨਮਣ੍ਡੋ ਸਮ੍ਮਾਸਤਿ, ਮਿਚ੍ਛਾਸਤਿ ਕਸਟੋ; ਯੋ ਤਤ੍ਥ ਅਤ੍ਥਰਸੋ ਧਮ੍ਮਰਸੋ ਵਿਮੁਤ੍ਤਿਰਸੋ – ਇਦਂ ਪੇਯ੍ਯਂ. ਅਵਿਕ੍ਖੇਪਮਣ੍ਡੋ ਸਮ੍ਮਾਸਮਾਧਿ, ਮਿਚ੍ਛਾਸਮਾਧਿ ਕਸਟੋ; ਯੋ ਤਤ੍ਥ ਅਤ੍ਥਰਸੋ ਧਮ੍ਮਰਸੋ ਵਿਮੁਤ੍ਤਿਰਸੋ – ਇਦਂ ਪੇਯ੍ਯਂ.

ਦਸ੍ਸਨਮਣ੍ਡੋ ਸਮ੍ਮਾਦਿਟ੍ਠਿ… ਅਭਿਨਿਰੋਪਨਮਣ੍ਡੋ ਸਮ੍ਮਾਸਙ੍ਕਪ੍ਪੋ… ਪਰਿਗ੍ਗਹਮਣ੍ਡੋ ਸਮ੍ਮਾਵਾਚਾ… ਸਮੁਟ੍ਠਾਨਮਣ੍ਡੋ ਸਮ੍ਮਾਕਮ੍ਮਨ੍ਤੋ… ਵੋਦਾਨਮਣ੍ਡੋ ਸਮ੍ਮਾਆਜੀਵੋ… ਪਗ੍ਗਹਮਣ੍ਡੋ ਸਮ੍ਮਾਵਾਯਾਮੋ… ਉਪਟ੍ਠਾਨਮਣ੍ਡੋ ਸਮ੍ਮਾਸਤਿ… ਅਵਿਕ੍ਖੇਪਮਣ੍ਡੋ ਸਮ੍ਮਾਸਮਾਧਿ.

ਉਪਟ੍ਠਾਨਮਣ੍ਡੋ ਸਤਿਸਮ੍ਬੋਜ੍ਝਙ੍ਗੋ… ਪਵਿਚਯਮਣ੍ਡੋ ਧਮ੍ਮਵਿਚਯਸਮ੍ਬੋਜ੍ਝਙ੍ਗੋ… ਪਗ੍ਗਹਮਣ੍ਡੋ ਵੀਰਿਯਸਮ੍ਬੋਜ੍ਝਙ੍ਗੋ… ਫਰਣਮਣ੍ਡੋ ਪੀਤਿਸਮ੍ਬੋਜ੍ਝਙ੍ਗੋ… ਉਪਸਮਮਣ੍ਡੋ ਪਸ੍ਸਦ੍ਧਿਸਮ੍ਬੋਜ੍ਝਙ੍ਗੋ… ਅਵਿਕ੍ਖੇਪਮਣ੍ਡੋ ਸਮਾਧਿਸਮ੍ਬੋਜ੍ਝਙ੍ਗੋ… ਪਟਿਸਙ੍ਖਾਨਮਣ੍ਡੋ ਉਪੇਕ੍ਖਾਸਮ੍ਬੋਜ੍ਝਙ੍ਗੋ.

ਅਸ੍ਸਦ੍ਧਿਯੇ ਅਕਮ੍ਪਿਯਮਣ੍ਡੋ ਸਦ੍ਧਾਬਲਂ… ਕੋਸਜ੍ਜੇ ਅਕਮ੍ਪਿਯਮਣ੍ਡੋ ਵੀਰਿਯਬਲਂ… ਪਮਾਦੇ ਅਕਮ੍ਪਿਯਮਣ੍ਡੋ ਸਤਿਬਲਂ… ਉਦ੍ਧਚ੍ਚੇ ਅਕਮ੍ਪਿਯਮਣ੍ਡੋ ਸਮਾਧਿਬਲਂ… ਅਵਿਜ੍ਜਾਯ ਅਕਮ੍ਪਿਯਮਣ੍ਡੋ ਪਞ੍ਞਾਬਲਂ.

ਅਧਿਮੋਕ੍ਖਮਣ੍ਡੋ ਸਦ੍ਧਿਨ੍ਦ੍ਰਿਯਂ… ਪਗ੍ਗਹਮਣ੍ਡੋ ਵੀਰਿਯਿਨ੍ਦ੍ਰਿਯਂ… ਉਪਟ੍ਠਾਨਮਣ੍ਡੋ ਸਤਿਨ੍ਦ੍ਰਿਯਂ… ਅਵਿਕ੍ਖੇਪਮਣ੍ਡੋ ਸਮਾਧਿਨ੍ਦ੍ਰਿਯਂ… ਦਸ੍ਸਨਮਣ੍ਡੋ ਪਞ੍ਞਿਨ੍ਦ੍ਰਿਯਂ.

ਆਧਿਪਤੇਯ੍ਯਟ੍ਠੇਨ ਇਨ੍ਦ੍ਰਿਯਾ ਮਣ੍ਡੋ, ਅਕਮ੍ਪਿਯਟ੍ਠੇਨ ਬਲਾ ਮਣ੍ਡੋ, ਨਿਯ੍ਯਾਨਟ੍ਠੇਨ ਬੋਜ੍ਝਙ੍ਗਾ ਮਣ੍ਡੋ, ਹੇਤੁਟ੍ਠੇਨ ਮਗ੍ਗੋ ਮਣ੍ਡੋ, ਉਪਟ੍ਠਾਨਟ੍ਠੇਨ ਸਤਿਪਟ੍ਠਾਨਾ ਮਣ੍ਡੋ, ਪਦਹਨਟ੍ਠੇਨ ਸਮ੍ਮਪ੍ਪਧਾਨਾ ਮਣ੍ਡੋ, ਇਜ੍ਝਨਟ੍ਠੇਨ ਇਦ੍ਧਿਪਾਦਾ ਮਣ੍ਡੋ, ਤਥਟ੍ਠੇਨ ਸਚ੍ਚਾ ਮਣ੍ਡੋ, ਅਵਿਕ੍ਖੇਪਟ੍ਠੇਨ ਸਮਥੋ ਮਣ੍ਡੋ, ਅਨੁਪਸ੍ਸਨਟ੍ਠੇਨ ਵਿਪਸ੍ਸਨਾ ਮਣ੍ਡੋ, ਏਕਰਸਟ੍ਠੇਨ ਸਮਥਵਿਪਸ੍ਸਨਾ ਮਣ੍ਡੋ, ਅਨਤਿਵਤ੍ਤਨਟ੍ਠੇਨ ਯੁਗਨਦ੍ਧਾ ਮਣ੍ਡੋ, ਸਂਵਰਟ੍ਠੇਨ ਸੀਲਵਿਸੁਦ੍ਧਿ ਮਣ੍ਡੋ, ਅਵਿਕ੍ਖੇਪਟ੍ਠੇਨ ਚਿਤ੍ਤਵਿਸੁਦ੍ਧਿ ਮਣ੍ਡੋ, ਦਸ੍ਸਨਟ੍ਠੇਨ ਦਿਟ੍ਠਿਵਿਸੁਦ੍ਧਿ ਮਣ੍ਡੋ, ਮੁਤ੍ਤਟ੍ਠੇਨ ਵਿਮੋਕ੍ਖੋ ਮਣ੍ਡੋ, ਪਟਿਵੇਧਟ੍ਠੇਨ ਵਿਜ੍ਜਾ ਮਣ੍ਡੋ, ਪਰਿਚ੍ਚਾਗਟ੍ਠੇਨ ਵਿਮੁਤ੍ਤਿ ਮਣ੍ਡੋ, ਸਮੁਚ੍ਛੇਦਟ੍ਠੇਨ ਖਯੇ ਞਾਣਂ ਮਣ੍ਡੋ, ਪਟਿਪ੍ਪਸ੍ਸਦ੍ਧਟ੍ਠੇਨ ਅਨੁਪ੍ਪਾਦੇ ਞਾਣਂ ਮਣ੍ਡੋ, ਛਨ੍ਦੋ ਮੂਲਟ੍ਠੇਨ ਮਣ੍ਡੋ, ਮਨਸਿਕਾਰੋ ਸਮੁਟ੍ਠਾਨਟ੍ਠੇਨ ਮਣ੍ਡੋ, ਫਸ੍ਸੋ ਸਮੋਧਾਨਟ੍ਠੇਨ ਮਣ੍ਡੋ, ਵੇਦਨਾ ਸਮੋਸਰਣਟ੍ਠੇਨ ਮਣ੍ਡੋ, ਸਮਾਧਿ ਪਮੁਖਟ੍ਠੇਨ ਮਣ੍ਡੋ, ਸਤਿ ਆਧਿਪਤੇਯ੍ਯਟ੍ਠੇਨ ਮਣ੍ਡੋ, ਪਞ੍ਞਾ ਤਤੁਤ੍ਤਰਟ੍ਠੇਨ ਮਣ੍ਡੋ, ਵਿਮੁਤ੍ਤਿ ਸਾਰਟ੍ਠੇਨ ਮਣ੍ਡੋ, ਅਮਤੋਗਧਂ ਨਿਬ੍ਬਾਨਂ ਪਰਿਯੋਸਾਨਟ੍ਠੇਨ ਮਣ੍ਡੋਤਿ.

ਚਤੁਤ੍ਥਭਾਣਵਾਰੋ.

ਮਣ੍ਡਪੇਯ੍ਯਕਥਾ ਨਿਟ੍ਠਿਤਾ.

ਮਹਾਵਗ੍ਗੋ ਪਠਮੋ.