੮. ਆਦੀਨਵਞਾਣਨਿਦ੍ਦੇਸੋ

੫੩. ਕਥਂ ਭਯਤੁਪਟ੍ਠਾਨੇ ਪਞ੍ਞਾ ਆਦੀਨਵੇ ਞਾਣਂ? ਉਪ੍ਪਾਦੋ ਭਯਨ੍ਤਿ – ਭਯਤੁਪਟ੍ਠਾਨੇ ਪਞ੍ਞਾ ਆਦੀਨਵੇ ਞਾਣਂ. ਪਵਤ੍ਤਂ ਭਯਨ੍ਤਿ – ਭਯਤੁਪਟ੍ਠਾਨੇ ਪਞ੍ਞਾ ਆਦੀਨਵੇ ਞਾਣਂ. ਨਿਮਿਤ੍ਤਂ ਭਯਨ੍ਤਿ…ਪੇ… ਆਯੂਹਨਾ ਭਯਨ੍ਤਿ…ਪੇ… ਪਟਿਸਨ੍ਧਿ ਭਯਨ੍ਤਿ… ਗਤਿ ਭਯਨ੍ਤਿ… ਨਿਬ੍ਬਤ੍ਤਿ ਭਯਨ੍ਤਿ… ਉਪਪਤ੍ਤਿ ਭਯਨ੍ਤਿ… ਜਾਤਿ ਭਯਨ੍ਤਿ… ਜਰਾ ਭਯਨ੍ਤਿ… ਬ੍ਯਾਧਿ ਭਯਨ੍ਤਿ … ਮਰਣਂ ਭਯਨ੍ਤਿ… ਸੋਕੋ ਭਯਨ੍ਤਿ… ਪਰਿਦੇਵੋ ਭਯਨ੍ਤਿ… ਉਪਾਯਾਸੋ ਭਯਨ੍ਤਿ – ਭਯਤੁਪਟ੍ਠਾਨੇ ਪਞ੍ਞਾ ਆਦੀਨਵੇ ਞਾਣਂ.

ਅਨੁਪ੍ਪਾਦੋ ਖੇਮਨ੍ਤਿ – ਸਨ੍ਤਿਪਦੇ ਞਾਣਂ. ਅਪ੍ਪਵਤ੍ਤਂ ਖੇਮਨ੍ਤਿ – ਸਨ੍ਤਿਪਦੇ ਞਾਣਂ…ਪੇ… ਅਨੁਪਾਯਾਸੋ ਖੇਮਨ੍ਤਿ – ਸਨ੍ਤਿਪਦੇ ਞਾਣਂ.

ਉਪ੍ਪਾਦੋ ਭਯਂ, ਅਨੁਪ੍ਪਾਦੋ ਖੇਮਨ੍ਤਿ – ਸਨ੍ਤਿਪਦੇ ਞਾਣਂ. ਪਵਤ੍ਤਂ ਭਯਂ, ਅਪ੍ਪਵਤ੍ਤਂ ਖੇਮਨ੍ਤਿ – ਸਨ੍ਤਿਪਦੇ ਞਾਣਂ…ਪੇ… ਉਪਾਯਾਸੋ ਭਯਂ, ਅਨੁਪਾਯਾਸੋ ਖੇਮਨ੍ਤਿ – ਸਨ੍ਤਿਪਦੇ ਞਾਣਂ.

ਉਪ੍ਪਾਦੋ ਦੁਕ੍ਖਨ੍ਤਿ – ਭਯਤੁਪਟ੍ਠਾਨੇ ਪਞ੍ਞਾ ਆਦੀਨਵੇ ਞਾਣਂ. ਪਵਤ੍ਤਂ ਦੁਕ੍ਖਨ੍ਤਿ – ਭਯਤੁਪਟ੍ਠਾਨੇ ਪਞ੍ਞਾ ਆਦੀਨਵੇ ਞਾਣਂ…ਪੇ… ਉਪਾਯਾਸੋ ਦੁਕ੍ਖਨ੍ਤਿ – ਭਯਤੁਪਟ੍ਠਾਨੇ ਪਞ੍ਞਾ ਆਦੀਨਵੇ ਞਾਣਂ.

ਅਨੁਪ੍ਪਾਦੋ ਸੁਖਨ੍ਤਿ – ਸਨ੍ਤਿਪਦੇ ਞਾਣਂ. ਅਪ੍ਪਵਤ੍ਤਂ ਸੁਖਨ੍ਤਿ – ਸਨ੍ਤਿਪਦੇ ਞਾਣਂ…ਪੇ… ਅਨੁਪਾਯਾਸੋ ਸੁਖਨ੍ਤਿ – ਸਨ੍ਤਿਪਦੇ ਞਾਣਂ.

ਉਪ੍ਪਾਦੋ ਦੁਕ੍ਖਂ, ਅਨੁਪ੍ਪਾਦੋ ਸੁਖਨ੍ਤਿ – ਸਨ੍ਤਿਪਦੇ ਞਾਣਂ. ਪਵਤ੍ਤਂ ਦੁਕ੍ਖਂ, ਅਪ੍ਪਵਤ੍ਤਂ ਸੁਖਨ੍ਤਿ – ਸਨ੍ਤਿਪਦੇ ਞਾਣਂ…ਪੇ… ਉਪਾਯਾਸੋ ਦੁਕ੍ਖਂ, ਅਨੁਪਾਯਾਸੋ ਸੁਖਨ੍ਤਿ – ਸਨ੍ਤਿਪਦੇ ਞਾਣਂ.

ਉਪ੍ਪਾਦੋ ਸਾਮਿਸਨ੍ਤਿ – ਭਯਤੁਪਟ੍ਠਾਨੇ ਪਞ੍ਞਾ ਆਦੀਨਵੇ ਞਾਣਂ. ਪਵਤ੍ਤਂ ਸਾਮਿਸਨ੍ਤਿ – ਭਯਤੁਪਟ੍ਠਾਨੇ ਪਞ੍ਞਾ ਆਦੀਨਵੇ ਞਾਣਂ…ਪੇ… ਉਪਾਯਾਸੋ ਸਾਮਿਸਨ੍ਤਿ – ਭਯਤੁਪਟ੍ਠਾਨੇ ਪਞ੍ਞਾ ਆਦੀਨਵੇ ਞਾਣਂ.

ਅਨੁਪ੍ਪਾਦੋ ਨਿਰਾਮਿਸਨ੍ਤਿ – ਸਨ੍ਤਿਪਦੇ ਞਾਣਂ. ਅਪ੍ਪਵਤ੍ਤਂ ਨਿਰਾਮਿਸਨ੍ਤਿ – ਸਨ੍ਤਿਪਦੇ ਞਾਣਂ…ਪੇ… ਅਨੁਪਾਯਾਸੋ ਨਿਰਾਮਿਸਨ੍ਤਿ – ਸਨ੍ਤਿਪਦੇ ਞਾਣਂ.

ਉਪ੍ਪਾਦੋ ਸਾਮਿਸਂ, ਅਨੁਪ੍ਪਾਦੋ ਨਿਰਾਮਿਸਨ੍ਤਿ – ਸਨ੍ਤਿਪਦੇ ਞਾਣਂ. ਪਵਤ੍ਤਂ ਸਾਮਿਸਂ, ਅਪ੍ਪਵਤ੍ਤਂ ਨਿਰਾਮਿਸਨ੍ਤਿ – ਸਨ੍ਤਿਪਦੇ ਞਾਣਂ…ਪੇ… ਉਪਾਯਾਸੋ ਸਾਮਿਸਂ, ਅਨੁਪਾਯਾਸੋ ਨਿਰਾਮਿਸਨ੍ਤਿ – ਸਨ੍ਤਿਪਦੇ ਞਾਣਂ.

ਉਪ੍ਪਾਦੋ ਸਙ੍ਖਾਰਾਤਿ – ਭਯਤੁਪਟ੍ਠਾਨੇ ਪਞ੍ਞਾ ਆਦੀਨਵੇ ਞਾਣਂ. ਪਵਤ੍ਤਂ ਸਙ੍ਖਾਰਾਤਿ – ਭਯਤੁਪਟ੍ਠਾਨੇ ਪਞ੍ਞਾ ਆਦੀਨਵੇ ਞਾਣਂ…ਪੇ… ਉਪਾਯਾਸੋ ਸਙ੍ਖਾਰਾਤਿ – ਭਯਤੁਪਟ੍ਠਾਨੇ ਪਞ੍ਞਾ ਆਦੀਨਵੇ ਞਾਣਂ.

ਅਨੁਪ੍ਪਾਦੋ ਨਿਬ੍ਬਾਨਨ੍ਤਿ – ਸਨ੍ਤਿਪਦੇ ਞਾਣਂ. ਅਪ੍ਪਵਤ੍ਤਂ ਨਿਬ੍ਬਾਨਨ੍ਤਿ – ਸਨ੍ਤਿਪਦੇ ਞਾਣਂ…ਪੇ… ਅਨੁਪਾਯਾਸੋ ਨਿਬ੍ਬਾਨਨ੍ਤਿ – ਸਨ੍ਤਿਪਦੇ ਞਾਣਂ.

ਉਪ੍ਪਾਦੋ ਸਙ੍ਖਾਰਾ, ਅਨੁਪ੍ਪਾਦੋ ਨਿਬ੍ਬਾਨਨ੍ਤਿ – ਸਨ੍ਤਿਪਦੇ ਞਾਣਂ. ਪਵਤ੍ਤਂ ਸਙ੍ਖਾਰਾ, ਅਪ੍ਪਵਤ੍ਤਂ ਨਿਬ੍ਬਾਨਨ੍ਤਿ – ਸਨ੍ਤਿਪਦੇ ਞਾਣਂ…ਪੇ… ਉਪਾਯਾਸੋ ਸਙ੍ਖਾਰਾ, ਅਨੁਪਾਯਾਸੋ ਨਿਬ੍ਬਾਨਨ੍ਤਿ – ਸਨ੍ਤਿਪਦੇ ਞਾਣਂ.

ਉਪ੍ਪਾਦਞ੍ਚ ਪਵਤ੍ਤਞ੍ਚ, ਨਿਮਿਤ੍ਤਂ ਦੁਕ੍ਖਨ੍ਤਿ ਪਸ੍ਸਤਿ;

ਆਯੂਹਨਂ ਪਟਿਸਨ੍ਧਿਂ, ਞਾਣਂ ਆਦੀਨਵੇ ਇਦਂ.

ਅਨੁਪ੍ਪਾਦਂ ਅਪ੍ਪਵਤ੍ਤਂ, ਅਨਿਮਿਤ੍ਤਂ ਸੁਖਨ੍ਤਿ ਚ;

ਅਨਾਯੂਹਨਂ ਅਪ੍ਪਟਿਸਨ੍ਧਿਂ, ਞਾਣਂ ਸਨ੍ਤਿਪਦੇ ਇਦਂ.

ਇਦਂ ਆਦੀਨਵੇ ਞਾਣਂ, ਪਞ੍ਚਠਾਨੇਸੁ ਜਾਯਤਿ;

ਪਞ੍ਚਠਾਨੇ ਸਨ੍ਤਿਪਦੇ, ਦਸ ਞਾਣੇ ਪਜਾਨਾਤਿ;

ਦ੍ਵਿਨ੍ਨਂ ਞਾਣਾਨਂ ਕੁਸਲਤਾ, ਨਾਨਾਦਿਟ੍ਠੀਸੁ ਨ ਕਮ੍ਪਤੀਤਿ.

ਤਂ ਞਾਤਟ੍ਠੇਨ ਞਾਣਂ, ਪਜਾਨਨਟ੍ਠੇਨ ਪਞ੍ਞਾ. ਤੇਨ ਵੁਚ੍ਚਤਿ – ‘‘ਭਯਤੁਪਟ੍ਠਾਨੇ ਪਞ੍ਞਾ ਆਦੀਨਵੇ ਞਾਣਂ’’.

ਆਦੀਨਵਞਾਣਨਿਦ੍ਦੇਸੋ ਅਟ੍ਠਮੋ.