੯. ਸਙ੍ਖਾਰੁਪੇਕ੍ਖਾਞਾਣਨਿਦ੍ਦੇਸੋ

੫੪. ਕਥਂ ਮੁਞ੍ਚਿਤੁਕਮ੍ਯਤਾਪਟਿਸਙ੍ਖਾਸਨ੍ਤਿਟ੍ਠਨਾ [ਮੁਚ੍ਚਿਤੁਕਮ੍ਯਤਾਪਟਿਸਙ੍ਖਾਸਨ੍ਤਿਟ੍ਠਨਾ (ਕ.)] ਪਞ੍ਞਾ ਸਙ੍ਖਾਰੁਪੇਕ੍ਖਾਸੁ ਞਾਣਂ? ਉਪ੍ਪਾਦਂ ਮੁਞ੍ਚਿਤੁਕਮ੍ਯਤਾਪਟਿਸਙ੍ਖਾਸਨ੍ਤਿਟ੍ਠਨਾ [ਉਪ੍ਪਾਦਮੁਞ੍ਚਿਤੁਕਮ੍ਯਤਾ… (ਸ੍ਯਾ.)] ਪਞ੍ਞਾ ਸਙ੍ਖਾਰੁਪੇਕ੍ਖਾਸੁ ਞਾਣਂ, ਪਵਤ੍ਤਂ ਮੁਞ੍ਚਿਤੁਕਮ੍ਯਤਾਪਟਿਸਙ੍ਖਾਸਨ੍ਤਿਟ੍ਠਨਾ ਪਞ੍ਞਾ ਸਙ੍ਖਾਰੁਪੇਕ੍ਖਾਸੁ ਞਾਣਂ, ਨਿਮਿਤ੍ਤਂ ਮੁਞ੍ਚਿਤੁਕਮ੍ਯਤਾ…ਪੇ… ਆਯੂਹਨਂ ਮੁਞ੍ਚਿਤੁਕਮ੍ਯਤਾ… ਪਟਿਸਨ੍ਧਿਂ ਮੁਞ੍ਚਿਤੁਕਮ੍ਯਤਾ… ਗਤਿਂ ਮੁਞ੍ਚਿਤੁਕਮ੍ਯਤਾ… ਨਿਬ੍ਬਤ੍ਤਿਂ ਮੁਞ੍ਚਿਤੁਕਮ੍ਯਤਾ… ਉਪਪਤ੍ਤਿਂ ਮੁਞ੍ਚਿਤੁਕਮ੍ਯਤਾ… ਜਾਤਿਂ ਮੁਞ੍ਚਿਤੁਕਮ੍ਯਤਾ… ਜਰਂ ਮੁਞ੍ਚਿਤੁਕਮ੍ਯਤਾ… ਬ੍ਯਾਧਿਂ ਮੁਞ੍ਚਿਤੁਕਮ੍ਯਤਾ… ਮਰਣਂ ਮੁਞ੍ਚਿਤੁਕਮ੍ਯਤਾ… ਸੋਕਂ ਮੁਞ੍ਚਿਤੁਕਮ੍ਯਤਾ… ਪਰਿਦੇਵਂ ਮੁਞ੍ਚਿਤੁਕਮ੍ਯਤਾ…ਪੇ… ਉਪਾਯਾਸਂ ਮੁਞ੍ਚਿਤੁਕਮ੍ਯਤਾਪਟਿਸਙ੍ਖਾਸਨ੍ਤਿਟ੍ਠਨਾ ਪਞ੍ਞਾ ਸਙ੍ਖਾਰੁਪੇਕ੍ਖਾਸੁ ਞਾਣਂ.

ਉਪ੍ਪਾਦੋ ਦੁਕ੍ਖਨ੍ਤਿ – ਮੁਞ੍ਚਿਤੁਕਮ੍ਯਤਾਪਟਿਸਙ੍ਖਾਸਨ੍ਤਿਟ੍ਠਨਾ ਪਞ੍ਞਾ ਸਙ੍ਖਾਰੁਪੇਕ੍ਖਾਸੁ ਞਾਣਂ. ਪਵਤ੍ਤਂ ਦੁਕ੍ਖਨ੍ਤਿ – ਮੁਞ੍ਚਿਤੁਕਮ੍ਯਤਾਪਟਿਸਙ੍ਖਾਸਨ੍ਤਿਟ੍ਠਨਾ ਪਞ੍ਞਾ ਸਙ੍ਖਾਰੁਪੇਕ੍ਖਾਸੁ ਞਾਣਂ…ਪੇ… ਉਪਾਯਾਸੋ ਦੁਕ੍ਖਨ੍ਤਿ – ਮੁਞ੍ਚਿਤੁਕਮ੍ਯਤਾਪਟਿਸਙ੍ਖਾਸਨ੍ਤਿਟ੍ਠਨਾ ਪਞ੍ਞਾ ਸਙ੍ਖਾਰੁਪੇਕ੍ਖਾਸੁ ਞਾਣਂ.

ਉਪ੍ਪਾਦੋ ਭਯਨ੍ਤਿ – ਮੁਞ੍ਚਿਤੁਕਮ੍ਯਤਾਪਟਿਸਙ੍ਖਾਸਨ੍ਤਿਟ੍ਠਨਾ ਪਞ੍ਞਾ ਸਙ੍ਖਾਰੁਪੇਕ੍ਖਾਸੁ ਞਾਣਂ. ਪਵਤ੍ਤਂ ਭਯਨ੍ਤਿ – ਮੁਞ੍ਚਿਤੁਕਮ੍ਯਤਾਪਟਿਸਙ੍ਖਾਸਨ੍ਤਿਟ੍ਠਨਾ ਪਞ੍ਞਾ ਸਙ੍ਖਾਰੁਪੇਕ੍ਖਾਸੁ ਞਾਣਂ…ਪੇ… ਉਪਾਯਾਸੋ ਭਯਨ੍ਤਿ – ਮੁਞ੍ਚਿਤੁਕਮ੍ਯਤਾਪਟਿਸਙ੍ਖਾਸਨ੍ਤਿਟ੍ਠਨਾ ਪਞ੍ਞਾ ਸਙ੍ਖਾਰੁਪੇਕ੍ਖਾਸੁ ਞਾਣਂ.

ਉਪ੍ਪਾਦੋ ਸਾਮਿਸਨ੍ਤਿ – ਮੁਞ੍ਚਿਤੁਕਮ੍ਯਤਾਪਟਿਸਙ੍ਖਾਸਨ੍ਤਿਟ੍ਠਨਾ ਪਞ੍ਞਾ ਸਙ੍ਖਾਰੁਪੇਕ੍ਖਾਸੁ ਞਾਣਂ. ਪਵਤ੍ਤਂ ਸਾਮਿਸਨ੍ਤਿ – ਮੁਞ੍ਚਿਤੁਕਮ੍ਯਤਾਪਟਿਸਙ੍ਖਾਸਨ੍ਤਿਟ੍ਠਨਾ ਪਞ੍ਞਾ ਸਙ੍ਖਾਰੁਪੇਕ੍ਖਾਸੁ ਞਾਣਂ…ਪੇ… ਉਪਾਯਾਸੋ ਸਾਮਿਸਨ੍ਤਿ – ਮੁਞ੍ਚਿਤੁਕਮ੍ਯਤਾਪਟਿਸਙ੍ਖਾਸਨ੍ਤਿਟ੍ਠਨਾ ਪਞ੍ਞਾ ਸਙ੍ਖਾਰੁਪੇਕ੍ਖਾਸੁ ਞਾਣਂ.

ਉਪ੍ਪਾਦੋ ਸਙ੍ਖਾਰਾਤਿ – ਮੁਞ੍ਚਿਤੁਕਮ੍ਯਤਾਪਟਿਸਙ੍ਖਾਸਨ੍ਤਿਟ੍ਠਨਾ ਪਞ੍ਞਾ ਸਙ੍ਖਾਰੁਪੇਕ੍ਖਾਸੁ ਞਾਣਂ. ਪਵਤ੍ਤਂ ਸਙ੍ਖਾਰਾਤਿ – ਮੁਞ੍ਚਿਤੁਕਮ੍ਯਤਾਪਟਿਸਙ੍ਖਾਸਨ੍ਤਿਟ੍ਠਨਾ ਪਞ੍ਞਾ ਸਙ੍ਖਾਰੁਪੇਕ੍ਖਾਸੁ ਞਾਣਂ…ਪੇ… ਉਪਾਯਾਸੋ ਸਙ੍ਖਾਰਾਤਿ – ਮੁਞ੍ਚਿਤੁਕਮ੍ਯਤਾਪਟਿਸਙ੍ਖਾਸਨ੍ਤਿਟ੍ਠਨਾ ਪਞ੍ਞਾ ਸਙ੍ਖਾਰੁਪੇਕ੍ਖਾਸੁ ਞਾਣਂ.

ਉਪ੍ਪਾਦੋ ਸਙ੍ਖਾਰਾ, ਤੇ ਸਙ੍ਖਾਰੇ ਅਜ੍ਝੁਪੇਕ੍ਖਤੀਤਿ – ਸਙ੍ਖਾਰੁਪੇਕ੍ਖਾ. ਯੇ ਚ ਸਙ੍ਖਾਰਾ ਯਾ ਚ ਉਪੇਕ੍ਖਾ ਉਭੋਪੇਤੇ ਸਙ੍ਖਾਰਾ, ਤੇ ਸਙ੍ਖਾਰੇ ਅਜ੍ਝੁਪੇਕ੍ਖਤੀਤਿ – ਸਙ੍ਖਾਰੁਪੇਕ੍ਖਾ. ਪਵਤ੍ਤਂ ਸਙ੍ਖਾਰਾ…ਪੇ… ਨਿਮਿਤ੍ਤਂ ਸਙ੍ਖਾਰਾ… ਆਯੂਹਨਾ ਸਙ੍ਖਾਰਾ… ਪਟਿਸਨ੍ਧਿ ਸਙ੍ਖਾਰਾ… ਗਤਿ ਸਙ੍ਖਾਰਾ… ਨਿਬ੍ਬਤ੍ਤਿ ਸਙ੍ਖਾਰਾ… ਉਪਪਤ੍ਤਿ ਸਙ੍ਖਾਰਾ… ਜਾਤਿ ਸਙ੍ਖਾਰਾ… ਜਰਾ ਸਙ੍ਖਾਰਾ… ਬ੍ਯਾਧਿ ਸਙ੍ਖਾਰਾ… ਮਰਣਂ ਸਙ੍ਖਾਰਾ… ਸੋਕੋ ਸਙ੍ਖਾਰਾ… ਪਰਿਦੇਵੋ ਸਙ੍ਖਾਰਾ…ਪੇ… ਉਪਾਯਾਸੋ ਸਙ੍ਖਾਰਾ, ਤੇ ਸਙ੍ਖਾਰੇ ਅਜ੍ਝੁਪੇਕ੍ਖਤੀਤਿ – ਸਙ੍ਖਾਰੁਪੇਕ੍ਖਾ. ਯੇ ਚ ਸਙ੍ਖਾਰਾ ਯਾ ਚ ਉਪੇਕ੍ਖਾ ਉਭੋਪੇਤੇ ਸਙ੍ਖਾਰਾ, ਤੇ ਸਙ੍ਖਾਰੇ ਅਜ੍ਝੁਪੇਕ੍ਖਤੀਤਿ – ਸਙ੍ਖਾਰੁਪੇਕ੍ਖਾ.

੫੫. ਕਤਿਹਾਕਾਰੇਹਿ ਸਙ੍ਖਾਰੁਪੇਕ੍ਖਾਯ ਚਿਤ੍ਤਸ੍ਸ ਅਭਿਨੀਹਾਰੋ ਹੋਤਿ? ਅਟ੍ਠਹਾਕਾਰੇਹਿ ਸਙ੍ਖਾਰੁਪੇਕ੍ਖਾਯ ਚਿਤ੍ਤਸ੍ਸ ਅਭਿਨੀਹਾਰੋ ਹੋਤਿ. ਪੁਥੁਜ੍ਜਨਸ੍ਸ ਕਤਿਹਾਕਾਰੇਹਿ ਸਙ੍ਖਾਰੁਪੇਕ੍ਖਾਯ ਚਿਤ੍ਤਸ੍ਸ ਅਭਿਨੀਹਾਰੋ ਹੋਤਿ? ਸੇਕ੍ਖਸ੍ਸ ਕਤਿਹਾਕਾਰੇਹਿ ਸਙ੍ਖਾਰੁਪੇਕ੍ਖਾਯ ਚਿਤ੍ਤਸ੍ਸ ਅਭਿਨੀਹਾਰੋ ਹੋਤਿ? ਵੀਤਰਾਗਸ੍ਸ ਕਤਿਹਾਕਾਰੇਹਿ ਸਙ੍ਖਾਰੁਪੇਕ੍ਖਾਯ ਚਿਤ੍ਤਸ੍ਸ ਅਭਿਨੀਹਾਰੋ ਹੋਤਿ? ਪੁਥੁਜ੍ਜਨਸ੍ਸ ਦ੍ਵੀਹਾਕਾਰੇਹਿ ਸਙ੍ਖਾਰੁਪੇਕ੍ਖਾਯ ਚਿਤ੍ਤਸ੍ਸ ਅਭਿਨੀਹਾਰੋ ਹੋਤਿ. ਸੇਕ੍ਖਸ੍ਸ ਤੀਹਾਕਾਰੇਹਿ ਸਙ੍ਖਾਰੁਪੇਕ੍ਖਾਯ ਚਿਤ੍ਤਸ੍ਸ ਅਭਿਨੀਹਾਰੋ ਹੋਤਿ. ਵੀਤਰਾਗਸ੍ਸ ਤੀਹਾਕਾਰੇਹਿ ਸਙ੍ਖਾਰੁਪੇਕ੍ਖਾਯ ਚਿਤ੍ਤਸ੍ਸ ਅਭਿਨੀਹਾਰੋ ਹੋਤਿ.

ਪੁਥੁਜ੍ਜਨਸ੍ਸ ਕਤਮੇਹਿ ਦ੍ਵੀਹਾਕਾਰੇਹਿ ਸਙ੍ਖਾਰੁਪੇਕ੍ਖਾਯ ਚਿਤ੍ਤਸ੍ਸ ਅਭਿਨੀਹਾਰੋ ਹੋਤਿ? ਪੁਥੁਜ੍ਜਨੋ ਸਙ੍ਖਾਰੁਪੇਕ੍ਖਂ ਅਭਿਨਨ੍ਦਤਿ ਵਾ ਵਿਪਸ੍ਸਤਿ ਵਾ. ਪੁਥੁਜ੍ਜਨਸ੍ਸ ਇਮੇਹਿ ਦ੍ਵੀਹਾਕਾਰੇਹਿ ਸਙ੍ਖਾਰੁਪੇਕ੍ਖਾਯ ਚਿਤ੍ਤਸ੍ਸ ਅਭਿਨੀਹਾਰੋ ਹੋਤਿ. ਸੇਕ੍ਖਸ੍ਸ ਕਤਮੇਹਿ ਤੀਹਾਕਾਰੇਹਿ ਸਙ੍ਖਾਰੁਪੇਕ੍ਖਾਯ ਚਿਤ੍ਤਸ੍ਸ ਅਭਿਨੀਹਾਰੋ ਹੋਤਿ? ਸੇਕ੍ਖੋ ਸਙ੍ਖਾਰੁਪੇਕ੍ਖਂ ਅਭਿਨਨ੍ਦਤਿ ਵਾ ਵਿਪਸ੍ਸਤਿ ਵਾ ਪਟਿਸਙ੍ਖਾਯ ਵਾ ਫਲਸਮਾਪਤ੍ਤਿਂ ਸਮਾਪਜ੍ਜਤਿ. ਸੇਕ੍ਖਸ੍ਸ ਇਮੇਹਿ ਤੀਹਾਕਾਰੇਹਿ ਸਙ੍ਖਾਰੁਪੇਕ੍ਖਾਯ ਚਿਤ੍ਤਸ੍ਸ ਅਭਿਨੀਹਾਰੋ ਹੋਤਿ. ਵੀਤਰਾਗਸ੍ਸ ਕਤਮੇਹਿ ਤੀਹਾਕਾਰੇਹਿ ਸਙ੍ਖਾਰੁਪੇਕ੍ਖਾਯ ਚਿਤ੍ਤਸ੍ਸ ਅਭਿਨੀਹਾਰੋ ਹੋਤਿ? ਵੀਤਰਾਗੋ ਸਙ੍ਖਾਰੁਪੇਕ੍ਖਂ ਵਿਪਸ੍ਸਤਿ ਵਾ ਪਟਿਸਙ੍ਖਾਯ ਵਾ ਫਲਸਮਾਪਤ੍ਤਿਂ ਸਮਾਪਜ੍ਜਤਿ, ਤਦਜ੍ਝੁਪੇਕ੍ਖਿਤ੍ਵਾ ਸੁਞ੍ਞਤਵਿਹਾਰੇਨ ਵਾ ਅਨਿਮਿਤ੍ਤਵਿਹਾਰੇਨ ਵਾ ਅਪ੍ਪਣਿਹਿਤਵਿਹਾਰੇਨ ਵਾ ਵਿਹਰਤਿ. ਵੀਤਰਾਗਸ੍ਸ ਇਮੇਹਿ ਤੀਹਾਕਾਰੇਹਿ ਸਙ੍ਖਾਰੁਪੇਕ੍ਖਾਯ ਚਿਤ੍ਤਸ੍ਸ ਅਭਿਨੀਹਾਰੋ ਹੋਤਿ.

੫੬. ਕਥਂ ਪੁਥੁਜ੍ਜਨਸ੍ਸ ਚ ਸੇਕ੍ਖਸ੍ਸ ਚ ਸਙ੍ਖਾਰੁਪੇਕ੍ਖਾਯ ਚਿਤ੍ਤਸ੍ਸ ਅਭਿਨੀਹਾਰੋ ਏਕਤ੍ਤਂ ਹੋਤਿ? ਪੁਥੁਜ੍ਜਨਸ੍ਸ ਸਙ੍ਖਾਰੁਪੇਕ੍ਖਂ ਅਭਿਨਨ੍ਦਤੋ ਚਿਤ੍ਤਂ ਕਿਲਿਸ੍ਸਤਿ, ਭਾਵਨਾਯ ਪਰਿਪਨ੍ਥੋ ਹੋਤਿ, ਪਟਿਵੇਧਸ੍ਸ ਅਨ੍ਤਰਾਯੋ ਹੋਤਿ, ਆਯਤਿਂ ਪਟਿਸਨ੍ਧਿਯਾ ਪਚ੍ਚਯੋ ਹੋਤਿ. ਸੇਕ੍ਖਸ੍ਸਪਿ ਸਙ੍ਖਾਰੁਪੇਕ੍ਖਂ ਅਭਿਨਨ੍ਦਤੋ ਚਿਤ੍ਤਂ ਕਿਲਿਸ੍ਸਤਿ, ਭਾਵਨਾਯ ਪਰਿਪਨ੍ਥੋ ਹੋਤਿ, ਉਤ੍ਤਰਿਪਟਿਵੇਧਸ੍ਸ ਅਨ੍ਤਰਾਯੋ ਹੋਤਿ, ਆਯਤਿਂ ਪਟਿਸਨ੍ਧਿਯਾ ਪਚ੍ਚਯੋ ਹੋਤਿ. ਏਵਂ ਪੁਥੁਜ੍ਜਨਸ੍ਸ ਚ ਸੇਕ੍ਖਸ੍ਸ ਚ ਸਙ੍ਖਾਰੁਪੇਕ੍ਖਾਯ ਚਿਤ੍ਤਸ੍ਸ ਅਭਿਨੀਹਾਰੋ ਏਕਤ੍ਤਂ ਹੋਤਿ ਅਭਿਨਨ੍ਦਟ੍ਠੇਨ.

ਕਥਂ ਪੁਥੁਜ੍ਜਨਸ੍ਸ ਚ ਸੇਕ੍ਖਸ੍ਸ ਚ ਵੀਤਰਾਗਸ੍ਸ ਚ ਸਙ੍ਖਾਰੁਪੇਕ੍ਖਾਯ ਚਿਤ੍ਤਸ੍ਸ ਅਭਿਨੀਹਾਰੋ ਏਕਤ੍ਤਂ ਹੋਤਿ? ਪੁਥੁਜ੍ਜਨੋ ਸਙ੍ਖਾਰੁਪੇਕ੍ਖਂ ਅਨਿਚ੍ਚਤੋਪਿ ਦੁਕ੍ਖਤੋਪਿ ਅਨਤ੍ਤਤੋਪਿ ਵਿਪਸ੍ਸਤਿ. ਸੇਕ੍ਖੋਪਿ ਸਙ੍ਖਾਰੁਪੇਕ੍ਖਂ ਅਨਿਚ੍ਚਤੋਪਿ ਦੁਕ੍ਖਤੋਪਿ ਅਨਤ੍ਤਤੋਪਿ ਵਿਪਸ੍ਸਤਿ. ਵੀਤਰਾਗੋਪਿ ਸਙ੍ਖਾਰੁਪੇਕ੍ਖਂ ਅਨਿਚ੍ਚਤੋਪਿ ਦੁਕ੍ਖਤੋਪਿ ਅਨਤ੍ਤਤੋਪਿ ਵਿਪਸ੍ਸਤਿ. ਏਵਂ ਪੁਥੁਜ੍ਜਨਸ੍ਸ ਚ ਸੇਕ੍ਖਸ੍ਸ ਚ ਵੀਤਰਾਗਸ੍ਸ ਚ ਸਙ੍ਖਾਰੁਪੇਕ੍ਖਾਯ ਚਿਤ੍ਤਸ੍ਸ ਅਭਿਨੀਹਾਰੋ ਏਕਤ੍ਤਂ ਹੋਤਿ ਅਨੁਪਸ੍ਸਨਟ੍ਠੇਨ.

ਕਥਂ ਪੁਥੁਜ੍ਜਨਸ੍ਸ ਚ ਸੇਕ੍ਖਸ੍ਸ ਚ ਵੀਤਰਾਗਸ੍ਸ ਚ ਸਙ੍ਖਾਰੁਪੇਕ੍ਖਾਯ ਚਿਤ੍ਤਸ੍ਸ ਅਭਿਨੀਹਾਰੋ ਨਾਨਤ੍ਤਂ ਹੋਤਿ? ਪੁਥੁਜ੍ਜਨਸ੍ਸ ਸਙ੍ਖਾਰੁਪੇਕ੍ਖਾ ਕੁਸਲਾ ਹੋਤਿ. ਸੇਕ੍ਖਸ੍ਸਪਿ ਸਙ੍ਖਾਰੁਪੇਕ੍ਖਾ ਕੁਸਲਾ ਹੋਤਿ. ਵੀਤਰਾਗਸ੍ਸ ਸਙ੍ਖਾਰੁਪੇਕ੍ਖਾ ਅਬ੍ਯਾਕਤਾ ਹੋਤਿ. ਏਵਂ ਪੁਥੁਜ੍ਜਨਸ੍ਸ ਚ ਸੇਕ੍ਖਸ੍ਸ ਚ ਵੀਤਰਾਗਸ੍ਸ ਚ ਸਙ੍ਖਾਰੁਪੇਕ੍ਖਾਯ ਚਿਤ੍ਤਸ੍ਸ ਅਭਿਨੀਹਾਰੋ ਨਾਨਤ੍ਤਂ ਹੋਤਿ ਕੁਸਲਾਬ੍ਯਾਕਤਟ੍ਠੇਨ.

ਕਥਂ ਪੁਥੁਜ੍ਜਨਸ੍ਸ ਚ ਸੇਕ੍ਖਸ੍ਸ ਚ ਵੀਤਰਾਗਸ੍ਸ ਚ ਸਙ੍ਖਾਰੁਪੇਕ੍ਖਾਯ ਚਿਤ੍ਤਸ੍ਸ ਅਭਿਨੀਹਾਰੋ ਨਾਨਤ੍ਤਂ ਹੋਤਿ? ਪੁਥੁਜ੍ਜਨਸ੍ਸ ਸਙ੍ਖਾਰੁਪੇਕ੍ਖਾ ਕਿਞ੍ਚਿਕਾਲੇ ਸੁਵਿਦਿਤਾ ਹੋਤਿ, ਕਿਞ੍ਚਿਕਾਲੇ ਨ ਸੁਵਿਦਿਤਾ ਹੋਤਿ. ਸੇਕ੍ਖਸ੍ਸਪਿ ਸਙ੍ਖਾਰੁਪੇਕ੍ਖਾ ਕਿਞ੍ਚਿਕਾਲੇ ਸੁਵਿਦਿਤਾ ਹੋਤਿ, ਕਿਞ੍ਚਿਕਾਲੇ ਨ ਸੁਵਿਦਿਤਾ ਹੋਤਿ. ਵੀਤਰਾਗਸ੍ਸ ਸਙ੍ਖਾਰੁਪੇਕ੍ਖਾ ਅਚ੍ਚਨ੍ਤਂ ਸੁਵਿਦਿਤਾ ਹੋਤਿ. ਏਵਂ ਪੁਥੁਜ੍ਜਨਸ੍ਸ ਚ ਸੇਕ੍ਖਸ੍ਸ ਚ ਵੀਤਰਾਗਸ੍ਸ ਚ ਸਙ੍ਖਾਰੁਪੇਕ੍ਖਾਯ ਚਿਤ੍ਤਸ੍ਸ ਅਭਿਨੀਹਾਰੋ ਨਾਨਤ੍ਤਂ ਹੋਤਿ ਵਿਦਿਤਟ੍ਠੇਨ ਚ ਅਵਿਦਿਤਟ੍ਠੇਨ ਚ.

ਕਥਂ ਪੁਥੁਜ੍ਜਨਸ੍ਸ ਚ ਸੇਕ੍ਖਸ੍ਸ ਚ ਵੀਤਰਾਗਸ੍ਸ ਚ ਸਙ੍ਖਾਰੁਪੇਕ੍ਖਾਯ ਚਿਤ੍ਤਸ੍ਸ ਅਭਿਨੀਹਾਰੋ ਨਾਨਤ੍ਤਂ ਹੋਤਿ? ਪੁਥੁਜ੍ਜਨੋ ਸਙ੍ਖਾਰੁਪੇਕ੍ਖਂ ਅਤਿਤ੍ਤਤ੍ਤਾ ਵਿਪਸ੍ਸਤਿ. ਸੇਕ੍ਖੋਪਿ ਸਙ੍ਖਾਰੁਪੇਕ੍ਖਂ ਅਤਿਤ੍ਤਤ੍ਤਾ ਵਿਪਸ੍ਸਤਿ. ਵੀਤਰਾਗੋ ਸਙ੍ਖਾਰੁਪੇਕ੍ਖਂ ਤਿਤ੍ਤਤ੍ਤਾ ਵਿਪਸ੍ਸਤਿ. ਏਵਂ ਪੁਥੁਜ੍ਜਨਸ੍ਸ ਚ ਸੇਕ੍ਖਸ੍ਸ ਚ ਵੀਤਰਾਗਸ੍ਸ ਚ ਸਙ੍ਖਾਰੁਪੇਕ੍ਖਾਯ ਚਿਤ੍ਤਸ੍ਸ ਅਭਿਨੀਹਾਰੋ ਨਾਨਤ੍ਤਂ ਹੋਤਿ ਤਿਤ੍ਤਟ੍ਠੇਨ ਚ ਅਤਿਤ੍ਤਟ੍ਠੇਨ ਚ.

ਕਥਂ ਪੁਥੁਜ੍ਜਨਸ੍ਸ ਚ ਸੇਕ੍ਖਸ੍ਸ ਚ ਵੀਤਰਾਗਸ੍ਸ ਚ ਸਙ੍ਖਾਰੁਪੇਕ੍ਖਾਯ ਚਿਤ੍ਤਸ੍ਸ ਅਭਿਨੀਹਾਰੋ ਨਾਨਤ੍ਤਂ ਹੋਤਿ? ਪੁਥੁਜ੍ਜਨੋ ਸਙ੍ਖਾਰੁਪੇਕ੍ਖਂ ਤਿਣ੍ਣਂ ਸਂਯੋਜਨਾਨਂ ਪਹਾਨਾਯ ਸੋਤਾਪਤ੍ਤਿਮਗ੍ਗਂ ਪਟਿਲਾਭਤ੍ਥਾਯ ਵਿਪਸ੍ਸਤਿ. ਸੇਕ੍ਖੋ ਸਙ੍ਖਾਰੁਪੇਕ੍ਖਂ ਤਿਣ੍ਣਂ ਸਞ੍ਞੋਜਨਾਨਂ ਪਹੀਨਤ੍ਤਾ ਉਤ੍ਤਰਿਪਟਿਲਾਭਤ੍ਥਾਯ ਵਿਪਸ੍ਸਤਿ. ਵੀਤਰਾਗੋ ਸਙ੍ਖਾਰੁਪੇਕ੍ਖਂ ਸਬ੍ਬਕਿਲੇਸਾਨਂ ਪਹੀਨਤ੍ਤਾ ਦਿਟ੍ਠਧਮ੍ਮਸੁਖਵਿਹਾਰਤ੍ਥਾਯ ਵਿਪਸ੍ਸਤਿ. ਏਵਂ ਪੁਥੁਜ੍ਜਨਸ੍ਸ ਚ ਸੇਕ੍ਖਸ੍ਸ ਚ ਵੀਤਰਾਗਸ੍ਸ ਚ ਸਙ੍ਖਾਰੁਪੇਕ੍ਖਾਯ ਚਿਤ੍ਤਸ੍ਸ ਅਭਿਨੀਹਾਰੋ ਨਾਨਤ੍ਤਂ ਹੋਤਿ ਪਹੀਨਟ੍ਠੇਨ ਚ ਅਪ੍ਪਹੀਨਟ੍ਠੇਨ ਚ.

ਕਥਂ ਸੇਕ੍ਖਸ੍ਸ ਚ ਵੀਤਰਾਗਸ੍ਸ ਚ ਸਙ੍ਖਾਰੁਪੇਕ੍ਖਾਯ ਚਿਤ੍ਤਸ੍ਸ ਅਭਿਨੀਹਾਰੋ ਨਾਨਤ੍ਤਂ ਹੋਤਿ? ਸੇਕ੍ਖੋ ਸਙ੍ਖਾਰੁਪੇਕ੍ਖਂ ਅਭਿਨਨ੍ਦਤਿ ਵਾ ਵਿਪਸ੍ਸਤਿ ਵਾ ਪਟਿਸਙ੍ਖਾਯ ਵਾ ਫਲਸਮਾਪਤ੍ਤਿਂ ਸਮਾਪਜ੍ਜਤਿ. ਵੀਤਰਾਗੋ ਸਙ੍ਖਾਰੁਪੇਕ੍ਖਂ ਵਿਪਸ੍ਸਤਿ ਵਾ ਪਟਿਸਙ੍ਖਾਯ ਵਾ ਫਲਸਮਾਪਤ੍ਤਿਂ ਸਮਾਪਜ੍ਜਤਿ, ਤਦਜ੍ਝੁਪੇਕ੍ਖਿਤ੍ਵਾ ਸੁਞ੍ਞਤਵਿਹਾਰੇਨ ਵਾ ਅਨਿਮਿਤ੍ਤਵਿਹਾਰੇਨ ਵਾ ਅਪ੍ਪਣਿਹਿਤਵਿਹਾਰੇਨ ਵਾ ਵਿਹਰਤਿ. ਏਵਂ ਸੇਕ੍ਖਸ੍ਸ ਚ ਵੀਤਰਾਗਸ੍ਸ ਚ ਸਙ੍ਖਾਰੁਪੇਕ੍ਖਾਯ ਚਿਤ੍ਤਸ੍ਸ ਅਭਿਨੀਹਾਰੋ ਨਾਨਤ੍ਤਂ ਹੋਤਿ ਵਿਹਾਰਸਮਾਪਤ੍ਤਟ੍ਠੇਨ.

੫੭. ਕਤਿ ਸਙ੍ਖਾਰੁਪੇਕ੍ਖਾ ਸਮਥਵਸੇਨ ਉਪ੍ਪਜ੍ਜਨ੍ਤਿ? ਕਤਿ ਸਙ੍ਖਾਰੁਪੇਕ੍ਖਾ ਵਿਪਸ੍ਸਨਾਵਸੇਨ ਉਪ੍ਪਜ੍ਜਨ੍ਤਿ? ਅਟ੍ਠ ਸਙ੍ਖਾਰੁਪੇਕ੍ਖਾ ਸਮਥਵਸੇਨ ਉਪ੍ਪਜ੍ਜਨ੍ਤਿ. ਦਸ ਸਙ੍ਖਾਰੁਪੇਕ੍ਖਾ ਵਿਪਸ੍ਸਨਾਵਸੇਨ ਉਪ੍ਪਜ੍ਜਨ੍ਤਿ.

ਕਤਮਾ ਅਟ੍ਠ ਸਙ੍ਖਾਰੁਪੇਕ੍ਖਾ ਸਮਥਵਸੇਨ ਉਪ੍ਪਜ੍ਜਨ੍ਤਿ? ਪਠਮਂ ਝਾਨਂ ਪਟਿਲਾਭਤ੍ਥਾਯ ਨੀਵਰਣੇ ਪਟਿਸਙ੍ਖਾਸਨ੍ਤਿਟ੍ਠਨਾ ਪਞ੍ਞਾ ਸਙ੍ਖਾਰੁਪੇਕ੍ਖਾਸੁ ਞਾਣਂ. ਦੁਤਿਯਂ ਝਾਨਂ ਪਟਿਲਾਭਤ੍ਥਾਯ ਵਿਤਕ੍ਕਵਿਚਾਰੇ ਪਟਿਸਙ੍ਖਾਸਨ੍ਤਿਟ੍ਠਨਾ ਪਞ੍ਞਾ ਸਙ੍ਖਾਰੁਪੇਕ੍ਖਾਸੁ ਞਾਣਂ. ਤਤਿਯਂ ਝਾਨਂ ਪਟਿਲਾਭਤ੍ਥਾਯ ਪੀਤਿਂ ਪਟਿਸਙ੍ਖਾਸਨ੍ਤਿਟ੍ਠਨਾ ਪਞ੍ਞਾ ਸਙ੍ਖਾਰੁਪੇਕ੍ਖਾਸੁ ਞਾਣਂ. ਚਤੁਤ੍ਥਂ ਝਾਨਂ ਪਟਿਲਾਭਤ੍ਥਾਯ ਸੁਖਦੁਕ੍ਖੇ ਪਟਿਸਙ੍ਖਾਸਨ੍ਤਿਟ੍ਠਨਾ ਪਞ੍ਞਾ ਸਙ੍ਖਾਰੁਪੇਕ੍ਖਾਸੁ ਞਾਣਂ. ਆਕਾਸਾਨਞ੍ਚਾਯਤਨਸਮਾਪਤ੍ਤਿਂ ਪਟਿਲਾਭਤ੍ਥਾਯ ਰੂਪਸਞ੍ਞਂ ਪਟਿਘਸਞ੍ਞਂ ਨਾਨਤ੍ਤਸਞ੍ਞਂ ਪਟਿਸਙ੍ਖਾਸਨ੍ਤਿਟ੍ਠਨਾ ਪਞ੍ਞਾ ਸਙ੍ਖਾਰੁਪੇਕ੍ਖਾਸੁ ਞਾਣਂ. ਵਿਞ੍ਞਾਣਞ੍ਚਾਯਤਨਸਮਾਪਤ੍ਤਿਂ ਪਟਿਲਾਭਤ੍ਥਾਯ ਆਕਾਸਾਨਞ੍ਚਾਯਤਨਸਞ੍ਞਂ ਪਟਿਸਙ੍ਖਾਸਨ੍ਤਿਟ੍ਠਨਾ ਪਞ੍ਞਾ ਸਙ੍ਖਾਰੁਪੇਕ੍ਖਾਸੁ ਞਾਣਂ. ਆਕਿਞ੍ਚਞ੍ਞਾਯਤਨਸਮਾਪਤ੍ਤਿਂ ਪਟਿਲਾਭਤ੍ਥਾਯ ਵਿਞ੍ਞਾਣਞ੍ਚਾਯਤਨਸਞ੍ਞਂ ਪਟਿਸਙ੍ਖਾਸਨ੍ਤਿਟ੍ਠਨਾ ਪਞ੍ਞਾ ਸਙ੍ਖਾਰੁਪੇਕ੍ਖਾਸੁ ਞਾਣਂ. ਨੇਵਸਞ੍ਞਾਨਾਸਞ੍ਞਾਯਤਨਸਮਾਪਤ੍ਤਿਂ ਪਟਿਲਾਭਤ੍ਥਾਯ ਆਕਿਞ੍ਚਞ੍ਞਾਯਤਨਸਞ੍ਞਂ ਪਟਿਸਙ੍ਖਾਸਨ੍ਤਿਟ੍ਠਨਾ ਪਞ੍ਞਾ ਸਙ੍ਖਾਰੁਪੇਕ੍ਖਾਸੁ ਞਾਣਂ. ਇਮਾ ਅਟ੍ਠ ਸਙ੍ਖਾਰੁਪੇਕ੍ਖਾ ਸਮਥਵਸੇਨ ਉਪ੍ਪਜ੍ਜਨ੍ਤਿ.

ਕਤਮਾ ਦਸ ਸਙ੍ਖਾਰੁਪੇਕ੍ਖਾ ਵਿਪਸ੍ਸਨਾਵਸੇਨ ਉਪ੍ਪਜ੍ਜਨ੍ਤਿ? ਸੋਤਾਪਤ੍ਤਿਮਗ੍ਗਂ ਪਟਿਲਾਭਤ੍ਥਾਯ ਉਪ੍ਪਾਦਂ ਪਵਤ੍ਤਂ ਨਿਮਿਤ੍ਤਂ ਆਯੂਹਨਂ ਪਟਿਸਨ੍ਧਿਂ ਗਤਿਂ ਨਿਬ੍ਬਤ੍ਤਿਂ ਉਪਪਤ੍ਤਿਂ ਜਾਤਿਂ ਜਰਂ ਬ੍ਯਾਧਿਂ ਮਰਣਂ ਸੋਕਂ ਪਰਿਦੇਵਂ ਉਪਾਯਾਸਂ ਪਟਿਸਙ੍ਖਾਸਨ੍ਤਿਟ੍ਠਨਾ ਪਞ੍ਞਾ ਸਙ੍ਖਾਰੁਪੇਕ੍ਖਾਸੁ ਞਾਣਂ. ਸੋਤਾਪਤ੍ਤਿਫਲਸਮਾਪਤ੍ਤਤ੍ਥਾਯ ਉਪ੍ਪਾਦਂ ਪਵਤ੍ਤਂ ਨਿਮਿਤ੍ਤਂ ਆਯੂਹਨਂ ਪਟਿਸਨ੍ਧਿਂ…ਪੇ… ਪਟਿਸਙ੍ਖਾਸਨ੍ਤਿਟ੍ਠਨਾ ਪਞ੍ਞਾ ਸਙ੍ਖਾਰੁਪੇਕ੍ਖਾਸੁ ਞਾਣਂ. ਸਕਦਾਗਾਮਿਮਗ੍ਗਂ ਪਟਿਲਾਭਤ੍ਥਾਯ…ਪੇ… ਸਕਦਾਗਾਮਿਫਲਸਮਾਪਤ੍ਤਤ੍ਥਾਯ…ਪੇ… ਅਨਾਗਾਮਿਮਗ੍ਗਂ ਪਟਿਲਾਭਤ੍ਥਾਯ…ਪੇ… ਅਨਾਗਾਮਿਫਲਸਮਾਪਤ੍ਤਤ੍ਥਾਯ …ਪੇ… ਅਰਹਤ੍ਤਮਗ੍ਗਂ ਪਟਿਲਾਭਤ੍ਥਾਯ ਉਪ੍ਪਾਦਂ ਪਵਤ੍ਤਂ ਨਿਮਿਤ੍ਤਂ ਆਯੂਹਨਂ ਪਟਿਸਨ੍ਧਿਂ ਗਤਿਂ ਨਿਬ੍ਬਤ੍ਤਿਂ ਉਪਪਤ੍ਤਿਂ ਜਾਤਿਂ ਜਰਂ ਬ੍ਯਾਧਿਂ ਮਰਣਂ ਸੋਕਂ ਪਰਿਦੇਵਂ ਉਪਾਯਾਸਂ ਪਟਿਸਙ੍ਖਾਸਨ੍ਤਿਟ੍ਠਨਾ ਪਞ੍ਞਾ ਸਙ੍ਖਾਰੁਪੇਕ੍ਖਾਸੁ ਞਾਣਂ. ਅਰਹਤ੍ਤਫਲਸਮਾਪਤ੍ਤਤ੍ਥਾਯ…ਪੇ… ਸੁਞ੍ਞਤਵਿਹਾਰਸਮਾਪਤ੍ਤਤ੍ਥਾਯ…ਪੇ… ਅਨਿਮਿਤ੍ਤਵਿਹਾਰਸਮਾਪਤ੍ਤਤ੍ਥਾਯ ਉਪ੍ਪਾਦਂ ਪਵਤ੍ਤਂ ਨਿਮਿਤ੍ਤਂ ਆਯੂਹਨਂ ਪਟਿਸਨ੍ਧਿਂ…ਪੇ… ਪਟਿਸਙ੍ਖਾਸਨ੍ਤਿਟ੍ਠਨਾ ਪਞ੍ਞਾ ਸਙ੍ਖਾਰੁਪੇਕ੍ਖਾਸੁ ਞਾਣਂ. ਇਮਾ ਦਸ ਸਙ੍ਖਾਰੁਪੇਕ੍ਖਾ ਵਿਪਸ੍ਸਨਾਵਸੇਨ ਉਪ੍ਪਜ੍ਜਨ੍ਤਿ.

੫੮. ਕਤਿ ਸਙ੍ਖਾਰੁਪੇਕ੍ਖਾ ਕੁਸਲਾ, ਕਤਿ ਅਕੁਸਲਾ, ਕਤਿ ਅਬ੍ਯਾਕਤਾ? ਪਨ੍ਨਰਸ ਸਙ੍ਖਾਰੁਪੇਕ੍ਖਾ ਕੁਸਲਾ, ਤਿਸ੍ਸੋ ਸਙ੍ਖਾਰੁਪੇਕ੍ਖਾ ਅਬ੍ਯਾਕਤਾ. ਨਤ੍ਥਿ ਸਙ੍ਖਾਰੁਪੇਕ੍ਖਾ ਅਕੁਸਲਾ.

ਪਟਿਸਙ੍ਖਾਸਨ੍ਤਿਟ੍ਠਨਾ ਪਞ੍ਞਾ, ਅਟ੍ਠ ਚਿਤ੍ਤਸ੍ਸ ਗੋਚਰਾ;

ਪੁਥੁਜ੍ਜਨਸ੍ਸ ਦ੍ਵੇ ਹੋਨ੍ਤਿ, ਤਯੋ ਸੇਕ੍ਖਸ੍ਸ ਗੋਚਰਾ;

ਤਯੋ ਚ ਵੀਤਰਾਗਸ੍ਸ, ਯੇਹਿ ਚਿਤ੍ਤਂ ਵਿਵਟ੍ਟਤਿ.

ਅਟ੍ਠ ਸਮਾਧਿਸ੍ਸ ਪਚ੍ਚਯਾ, ਦਸ ਞਾਣਸ੍ਸ ਗੋਚਰਾ;

ਅਟ੍ਠਾਰਸ ਸਙ੍ਖਾਰੁਪੇਕ੍ਖਾ, ਤਿਣ੍ਣਂ ਵਿਮੋਕ੍ਖਾਨ ਪਚ੍ਚਯਾ.

ਇਮੇ ਅਟ੍ਠਾਰਸਾਕਾਰਾ, ਪਞ੍ਞਾ ਯਸ੍ਸ ਪਰਿਚ੍ਚਿਤਾ;

ਕੁਸਲੋ ਸਙ੍ਖਾਰੁਪੇਕ੍ਖਾਸੁ, ਨਾਨਾਦਿਟ੍ਠੀਸੁ ਨ ਕਮ੍ਪਤੀਤਿ.

ਤਂ ਞਾਤਟ੍ਠੇਨ ਞਾਣਂ, ਪਜਾਨਨਟ੍ਠੇਨ ਪਞ੍ਞਾ. ਤੇਨ ਵੁਚ੍ਚਤਿ – ‘‘ਮੁਞ੍ਚਿਤੁਕਮ੍ਯਤਾਪਟਿਸਙ੍ਖਾਸਨ੍ਤਿਟ੍ਠਨਾ ਪਞ੍ਞਾ ਸਙ੍ਖਾਰੁਪੇਕ੍ਖਾਸੁ ਞਾਣਂ’’.

ਸਙ੍ਖਾਰੁਪੇਕ੍ਖਾਞਾਣਨਿਦ੍ਦੇਸੋ ਨਵਮੋ.