੭੨-੭੩. ਸਬ੍ਬਞ੍ਞੁਤਞਾਣਨਿਦ੍ਦੇਸੋ

੧੧੯. ਕਤਮਂ ਤਥਾਗਤਸ੍ਸ ਸਬ੍ਬਞ੍ਞੁਤਞ੍ਞਾਣਂ? ਸਬ੍ਬਂ ਸਙ੍ਖਤਮਸਙ੍ਖਤਂ ਅਨਵਸੇਸਂ ਜਾਨਾਤੀਤਿ – ਸਬ੍ਬਞ੍ਞੁਤਞ੍ਞਾਣਂ. ਤਤ੍ਥ ਆਵਰਣਂ ਨਤ੍ਥੀਤਿ – ਅਨਾਵਰਣਞਾਣਂ [ਅਨਾਵਰਣਂ ਞਾਣਂ (ਸ੍ਯਾ.) ਏਵਮੁਪਰਿਪਿ].

੧੨੦. ਅਤੀਤਂ ਸਬ੍ਬਂ ਜਾਨਾਤੀਤਿ – ਸਬ੍ਬਞ੍ਞੁਤਞ੍ਞਾਣਂ. ਤਤ੍ਥ ਆਵਰਣਂ ਨਤ੍ਥੀਤਿ – ਅਨਾਵਰਣਞਾਣਂ. ਅਨਾਗਤਂ ਸਬ੍ਬਂ ਜਾਨਾਤੀਤਿ – ਸਬ੍ਬਞ੍ਞੁਤਞ੍ਞਾਣਂ. ਤਤ੍ਥ ਆਵਰਣਂ ਨਤ੍ਥੀਤਿ – ਅਨਾਵਰਣਞਾਣਂ. ਪਚ੍ਚੁਪ੍ਪਨ੍ਨਂ ਸਬ੍ਬਂ ਜਾਨਾਤੀਤਿ – ਸਬ੍ਬਞ੍ਞੁਤਞ੍ਞਾਣਂ. ਤਤ੍ਥ ਆਵਰਣਂ ਨਤ੍ਥੀਤਿ – ਅਨਾਵਰਣਞਾਣਂ.

ਚਕ੍ਖੁ ਚੇਵ ਰੂਪਾ ਚ, ਏਵਂ ਤਂ ਸਬ੍ਬਂ ਜਾਨਾਤੀਤਿ – ਸਬ੍ਬਞ੍ਞੁਤਞ੍ਞਾਣਂ. ਤਤ੍ਥ ਆਵਰਣਂ ਨਤ੍ਥੀਤਿ – ਅਨਾਵਰਣਞਾਣਂ. ਸੋਤਞ੍ਚੇਵ ਸਦ੍ਦਾ ਚ…ਪੇ… ਘਾਨਞ੍ਚੇਵ ਗਨ੍ਧਾ ਚ… ਜਿਵ੍ਹਾ ਚੇਵ ਰਸਾ ਚ… ਕਾਯੋ ਚੇਵ ਫੋਟ੍ਠਬ੍ਬਾ ਚ… ਮਨੋ ਚੇਵ ਧਮ੍ਮਾ ਚ, ਏਵਂ ਤਂ ਸਬ੍ਬਂ ਜਾਨਾਤੀਤਿ – ਸਬ੍ਬਞ੍ਞੁਤਞ੍ਞਾਣਂ. ਤਤ੍ਥ ਆਵਰਣਂ ਨਤ੍ਥੀਤਿ – ਅਨਾਵਰਣਞਾਣਂ.

ਯਾਵਤਾ ਅਨਿਚ੍ਚਟ੍ਠਂ ਦੁਕ੍ਖਟ੍ਠਂ ਅਨਤ੍ਤਟ੍ਠਂ, ਤਂ ਸਬ੍ਬਂ ਜਾਨਾਤੀਤਿ – ਸਬ੍ਬਞ੍ਞੁਤਞ੍ਞਾਣਂ. ਤਤ੍ਥ ਆਵਰਣਂ ਨਤ੍ਥੀਤਿ – ਅਨਾਵਰਣਞਾਣਂ. ਯਾਵਤਾ ਰੂਪਸ੍ਸ ਅਨਿਚ੍ਚਟ੍ਠਂ ਦੁਕ੍ਖਟ੍ਠਂ ਅਨਤ੍ਤਟ੍ਠਂ, ਤਂ ਸਬ੍ਬਂ ਜਾਨਾਤੀਤਿ – ਸਬ੍ਬਞ੍ਞੁਤਞ੍ਞਾਣਂ. ਤਤ੍ਥ ਆਵਰਣਂ ਨਤ੍ਥੀਤਿ – ਅਨਾਵਰਣਞਾਣਂ. ਯਾਵਤਾ ਵੇਦਨਾਯ…ਪੇ… ਯਾਵਤਾ ਸਞ੍ਞਾਯ…ਪੇ… ਯਾਵਤਾ ਸਙ੍ਖਾਰਾਨਂ…ਪੇ… ਯਾਵਤਾ ਵਿਞ੍ਞਾਣਸ੍ਸ …ਪੇ… ਯਾਵਤਾ ਚਕ੍ਖੁਸ੍ਸ…ਪੇ… ਜਰਾਮਰਣਸ੍ਸ ਅਨਿਚ੍ਚਟ੍ਠਂ ਦੁਕ੍ਖਟ੍ਠਂ ਅਨਤ੍ਤਟ੍ਠਂ, ਤਂ ਸਬ੍ਬਂ ਜਾਨਾਤੀਤਿ – ਸਬ੍ਬਞ੍ਞੁਤਞ੍ਞਾਣਂ. ਤਤ੍ਥ ਆਵਰਣਂ ਨਤ੍ਥੀਤਿ – ਅਨਾਵਰਣਞਾਣਂ.

ਯਾਵਤਾ ਅਭਿਞ੍ਞਾਯ ਅਭਿਞ੍ਞਟ੍ਠਂ, ਤਂ ਸਬ੍ਬਂ ਜਾਨਾਤੀਤਿ – ਸਬ੍ਬਞ੍ਞੁਤਞ੍ਞਾਣਂ. ਤਤ੍ਥ ਆਵਰਣਂ ਨਤ੍ਥੀਤਿ – ਅਨਾਵਰਣਞਾਣਂ. ਯਾਵਤਾ ਪਰਿਞ੍ਞਾਯ ਪਰਿਞ੍ਞਟ੍ਠਂ…ਪੇ… ਯਾਵਤਾ ਪਹਾਨਸ੍ਸ [ਪਹਾਨਾਯ (ਸ੍ਯਾ.)] ਪਹਾਨਟ੍ਠਂ…ਪੇ… ਯਾਵਤਾ ਭਾਵਨਾਯ ਭਾਵਨਟ੍ਠਂ…ਪੇ… ਯਾਵਤਾ ਸਚ੍ਛਿਕਿਰਿਯਾਯ ਸਚ੍ਛਿਕਿਰਿਯਟ੍ਠਂ, ਤਂ ਸਬ੍ਬਂ ਜਾਨਾਤੀਤਿ – ਸਬ੍ਬਞ੍ਞੁਤਞ੍ਞਾਣਂ. ਤਤ੍ਥ ਆਵਰਣਂ ਨਤ੍ਥੀਤਿ – ਅਨਾਵਰਣਞਾਣਂ.

ਯਾਵਤਾ ਖਨ੍ਧਾਨਂ ਖਨ੍ਧਟ੍ਠਂ, ਤਂ ਸਬ੍ਬਂ ਜਾਨਾਤੀਤਿ – ਸਬ੍ਬਞ੍ਞੁਤਞ੍ਞਾਣਂ. ਤਤ੍ਥ ਆਵਰਣਂ ਨਤ੍ਥੀਤਿ – ਅਨਾਵਰਣਞਾਣਂ. ਯਾਵਤਾ ਧਾਤੂਨਂ ਧਾਤੁਟ੍ਠਂ…ਪੇ… ਯਾਵਤਾ ਆਯਤਨਾਨਂ ਆਯਤਨਟ੍ਠਂ…ਪੇ… ਯਾਵਤਾ ਸਙ੍ਖਤਾਨਂ ਸਙ੍ਖਤਟ੍ਠਂ…ਪੇ… ਯਾਵਤਾ ਅਸਙ੍ਖਤਸ੍ਸ ਅਸਙ੍ਖਤਟ੍ਠਂ, ਤਂ ਸਬ੍ਬਂ ਜਾਨਾਤੀਤਿ – ਸਬ੍ਬਞ੍ਞੁਤਞ੍ਞਾਣਂ. ਤਤ੍ਥ ਆਵਰਣਂ ਨਤ੍ਥੀਤਿ – ਅਨਾਵਰਣਞਾਣਂ.

ਯਾਵਤਾ ਕੁਸਲੇ ਧਮ੍ਮੇ, ਸਬ੍ਬਂ [ਸਬ੍ਬੇ (ਅਟ੍ਠਕਥਾ)] ਜਾਨਾਤੀਤਿ – ਸਬ੍ਬਞ੍ਞੁਤਞ੍ਞਾਣਂ. ਤਤ੍ਥ ਆਵਰਣਂ ਨਤ੍ਥੀਤਿ – ਅਨਾਵਰਣਞਾਣਂ. ਯਾਵਤਾ ਅਕੁਸਲੇ ਧਮ੍ਮੇ…ਪੇ… ਯਾਵਤਾ ਅਬ੍ਯਾਕਤੇ ਧਮ੍ਮੇ… ਯਾਵਤਾ ਕਾਮਾਵਚਰੇ ਧਮ੍ਮੇ… ਯਾਵਤਾ ਰੂਪਾਵਚਰੇ ਧਮ੍ਮੇ… ਯਾਵਤਾ ਅਰੂਪਾਵਚਰੇ ਧਮ੍ਮੇ… ਯਾਵਤਾ ਅਪਰਿਯਾਪਨ੍ਨੇ ਧਮ੍ਮੇ, ਸਬ੍ਬਂ [ਸਬ੍ਬੇ (ਅਟ੍ਠਕਥਾ)] ਜਾਨਾਤੀਤਿ – ਸਬ੍ਬਞ੍ਞੁਤਞ੍ਞਾਣਂ. ਤਤ੍ਥ ਆਵਰਣਂ ਨਤ੍ਥੀਤਿ – ਅਨਾਵਰਣਞਾਣਂ.

ਯਾਵਤਾ ਦੁਕ੍ਖਸ੍ਸ ਦੁਕ੍ਖਟ੍ਠਂ, ਤਂ ਸਬ੍ਬਂ ਜਾਨਾਤੀਤਿ – ਸਬ੍ਬਞ੍ਞੁਤਞ੍ਞਾਣਂ. ਤਤ੍ਥ ਆਵਰਣਂ ਨਤ੍ਥੀਤਿ – ਅਨਾਵਰਣਞਾਣਂ. ਯਾਵਤਾ ਸਮੁਦਯਸ੍ਸ ਸਮੁਦਯਟ੍ਠਂ…ਪੇ… ਯਾਵਤਾ ਨਿਰੋਧਸ੍ਸ ਨਿਰੋਧਟ੍ਠਂ…ਪੇ… ਯਾਵਤਾ ਮਗ੍ਗਸ੍ਸ ਮਗ੍ਗਟ੍ਠਂ, ਤਂ ਸਬ੍ਬਂ ਜਾਨਾਤੀਤਿ – ਸਬ੍ਬਞ੍ਞੁਤਞ੍ਞਾਣਂ. ਤਤ੍ਥ ਆਵਰਣਂ ਨਤ੍ਥੀਤਿ – ਅਨਾਵਰਣਞਾਣਂ.

ਯਾਵਤਾ ਅਤ੍ਥਪਟਿਸਮ੍ਭਿਦਾਯ ਅਤ੍ਥਪਟਿਸਮ੍ਭਿਦਟ੍ਠਂ, ਤਂ ਸਬ੍ਬਂ ਜਾਨਾਤੀਤਿ – ਸਬ੍ਬਞ੍ਞੁਤਞ੍ਞਾਣਂ. ਤਤ੍ਥ ਆਵਰਣਂ ਨਤ੍ਥੀਤਿ – ਅਨਾਵਰਣਞਾਣਂ. ਯਾਵਤਾ ਧਮ੍ਮਪਟਿਸਮ੍ਭਿਦਾਯ ਧਮ੍ਮਪਟਿਸਮ੍ਭਿਦਟ੍ਠਂ…ਪੇ… ਯਾਵਤਾ ਨਿਰੁਤ੍ਤਿਪਟਿਸਮ੍ਭਿਦਾਯ ਨਿਰੁਤ੍ਤਿਪਟਿਸਮ੍ਭਿਦਟ੍ਠਂ…ਪੇ… ਯਾਵਤਾ ਪਟਿਭਾਨਪਟਿਸਮ੍ਭਿਦਾਯ ਪਟਿਭਾਨਪਟਿਸਮ੍ਭਿਦਟ੍ਠਂ, ਤਂ ਸਬ੍ਬਂ ਜਾਨਾਤੀਤਿ – ਸਬ੍ਬਞ੍ਞੁਤਞ੍ਞਾਣਂ. ਤਤ੍ਥ ਆਵਰਣਂ ਨਤ੍ਥੀਤਿ – ਅਨਾਵਰਣਞਾਣਂ.

ਯਾਵਤਾ ਇਨ੍ਦ੍ਰਿਯਪਰੋਪਰਿਯਤ੍ਤਞਾਣਂ, ਤਂ ਸਬ੍ਬਂ ਜਾਨਾਤੀਤਿ – ਸਬ੍ਬਞ੍ਞੁਤਞ੍ਞਾਣਂ. ਤਤ੍ਥ ਆਵਰਣਂ ਨਤ੍ਥੀਤਿ – ਅਨਾਵਰਣਞਾਣਂ. ਯਾਵਤਾ ਸਤ੍ਤਾਨਂ ਆਸਯਾਨੁਸਯੇ ਞਾਣਂ…ਪੇ… ਯਾਵਤਾ ਯਮਕਪਾਟਿਹੀਰੇ ਞਾਣਂ…ਪੇ… ਯਾਵਤਾ ਮਹਾਕਰੁਣਾਸਮਾਪਤ੍ਤਿਯਾ ਞਾਣਂ, ਤਂ ਸਬ੍ਬਂ ਜਾਨਾਤੀਤਿ – ਸਬ੍ਬਞ੍ਞੁਤਞ੍ਞਾਣਂ. ਤਤ੍ਥ ਆਵਰਣਂ ਨਤ੍ਥੀਤਿ – ਅਨਾਵਰਣਞਾਣਂ.

ਯਾਵਤਾ ਸਦੇਵਕਸ੍ਸ ਲੋਕਸ੍ਸ ਸਮਾਰਕਸ੍ਸ ਸਬ੍ਰਹ੍ਮਕਸ੍ਸ ਸਸ੍ਸਮਣਬ੍ਰਾਹ੍ਮਣਿਯਾ ਪਜਾਯ ਸਦੇਵਮਨੁਸ੍ਸਾਯ ਦਿਟ੍ਠਂ ਸੁਤਂ ਮੁਤਂ ਵਿਞ੍ਞਾਤਂ ਪਤ੍ਤਂ ਪਰਿਯੇਸਿਤਂ ਅਨੁਵਿਚਰਿਤਂ ਮਨਸਾ, ਤਂ ਸਬ੍ਬਂ ਜਾਨਾਤੀਤਿ – ਸਬ੍ਬਞ੍ਞੁਤਞ੍ਞਾਣਂ. ਤਤ੍ਥ ਆਵਰਣਂ ਨਤ੍ਥੀਤਿ – ਅਨਾਵਰਣਞਾਣਂ.

੧੨੧. ਨ ਤਸ੍ਸ ਅਦ੍ਦਿਟ੍ਠਮਿਧਤ੍ਥਿ ਕਿਞ੍ਚਿ, ਅਥੋ ਅਵਿਞ੍ਞਾਤਮਜਾਨਿਤਬ੍ਬਂ.

ਸਬ੍ਬਂ ਅਭਿਞ੍ਞਾਸਿ ਯਦਤ੍ਥਿ ਨੇਯ੍ਯਂ, ਤਥਾਗਤੋ ਤੇਨ ਸਮਨ੍ਤਚਕ੍ਖੂਤਿ [ਮਹਾਨਿ. ੧੫੬; ਚੂਲ਼ਨਿ. ਮੋਘਰਾਜਮਾਣਵਪੁਚ੍ਛਾਨਿਦ੍ਦੇਸ ੮੫].

ਸਮਨ੍ਤਚਕ੍ਖੂਤਿ ਕੇਨਟ੍ਠੇਨ ਸਮਨ੍ਤਚਕ੍ਖੁ? ਚੁਦ੍ਦਸ ਬੁਦ੍ਧਞਾਣਾਨਿ. ਦੁਕ੍ਖੇ ਞਾਣਂ ਬੁਦ੍ਧਞਾਣਂ, ਦੁਕ੍ਖਸਮੁਦਯੇ ਞਾਣਂ ਬੁਦ੍ਧਞਾਣਂ, ਦੁਕ੍ਖਨਿਰੋਧੇ ਞਾਣਂ ਬੁਦ੍ਧਞਾਣਂ, ਦੁਕ੍ਖਨਿਰੋਧਗਾਮਿਨਿਯਾ ਪਟਿਪਦਾਯ ਞਾਣਂ ਬੁਦ੍ਧਞਾਣਂ, ਅਤ੍ਥਪਟਿਸਮ੍ਭਿਦੇ ਞਾਣਂ ਬੁਦ੍ਧਞਾਣਂ, ਧਮ੍ਮਪਟਿਸਮ੍ਭਿਦੇ ਞਾਣਂ ਬੁਦ੍ਧਞਾਣਂ, ਨਿਰੁਤ੍ਤਿਪਟਿਸਮ੍ਭਿਦੇ ਞਾਣਂ ਬੁਦ੍ਧਞਾਣਂ, ਪਟਿਭਾਨਪਟਿਸਮ੍ਭਿਦੇ ਞਾਣਂ ਬੁਦ੍ਧਞਾਣਂ, ਇਨ੍ਦ੍ਰਿਯਪਰੋਪਰਿਯਤ੍ਤੇ ਞਾਣਂ ਬੁਦ੍ਧਞਾਣਂ, ਸਤ੍ਤਾਨਂ ਆਸਯਾਨੁਸਯੇ ਞਾਣਂ ਬੁਦ੍ਧਞਾਣਂ, ਯਮਕਪਾਟਿਹੀਰੇ ਞਾਣਂ ਬੁਦ੍ਧਞਾਣਂ, ਮਹਾਕਰੁਣਾਸਮਾਪਤ੍ਤਿਯਾ ਞਾਣਂ ਬੁਦ੍ਧਞਾਣਂ, ਸਬ੍ਬਞ੍ਞੁਤਞ੍ਞਾਣਂ ਬੁਦ੍ਧਞਾਣਂ, ਅਨਾਵਰਣਞਾਣਂ ਬੁਦ੍ਧਞਾਣਂ – ਇਮਾਨਿ ਚੁਦ੍ਦਸ ਬੁਦ੍ਧਞਾਣਾਨਿ. ਇਮੇਸਂ ਚੁਦ੍ਦਸਨ੍ਨਂ ਬੁਦ੍ਧਞਾਣਾਨਂ ਅਟ੍ਠ ਞਾਣਾਨਿ ਸਾਵਕਸਾਧਾਰਣਾਨਿ; ਛ ਞਾਣਾਨਿ ਅਸਾਧਾਰਣਾਨਿ ਸਾਵਕੇਹਿ.

ਯਾਵਤਾ ਦੁਕ੍ਖਸ੍ਸ ਦੁਕ੍ਖਟ੍ਠੋ, ਸਬ੍ਬੋ ਞਾਤੋ; ਅਞ੍ਞਾਤੋ ਦੁਕ੍ਖਟ੍ਠੋ ਨਤ੍ਥੀਤਿ – ਸਬ੍ਬਞ੍ਞੁਤਞ੍ਞਾਣਂ. ਤਤ੍ਥ ਆਵਰਣਂ ਨਤ੍ਥੀਤਿ – ਅਨਾਵਰਣਞਾਣਂ. ਯਾਵਤਾ ਦੁਕ੍ਖਸ੍ਸ ਦੁਕ੍ਖਟ੍ਠੋ, ਸਬ੍ਬੋ ਞਾਤੋ, ਸਬ੍ਬੋ ਦਿਟ੍ਠੋ, ਸਬ੍ਬੋ ਵਿਦਿਤੋ, ਸਬ੍ਬੋ ਸਚ੍ਛਿਕਤੋ, ਸਬ੍ਬੋ ਫਸ੍ਸਿਤੋ ਪਞ੍ਞਾਯ; ਅਫਸ੍ਸਿਤੋ ਪਞ੍ਞਾਯ ਦੁਕ੍ਖਟ੍ਠੋ ਨਤ੍ਥੀਤਿ – ਸਬ੍ਬਞ੍ਞੁਤਞ੍ਞਾਣਂ. ਤਤ੍ਥ ਆਵਰਣਂ ਨਤ੍ਥੀਤਿ – ਅਨਾਵਰਣਞਾਣਂ. ਯਾਵਤਾ ਸਮੁਦਯਸ੍ਸ ਸਮੁਦਯਟ੍ਠੋ…ਪੇ… ਯਾਵਤਾ ਨਿਰੋਧਸ੍ਸ ਨਿਰੋਧਟ੍ਠੋ… ਯਾਵਤਾ ਮਗ੍ਗਸ੍ਸ ਮਗ੍ਗਟ੍ਠੋ…ਪੇ… ਯਾਵਤਾ ਅਤ੍ਥਪਟਿਸਮ੍ਭਿਦਾਯ ਅਤ੍ਥਪਟਿਸਮ੍ਭਿਦਟ੍ਠੋ… ਯਾਵਤਾ ਧਮ੍ਮਪਟਿਸਮ੍ਭਿਦਾਯ ਧਮ੍ਮਪਟਿਸਮ੍ਭਿਦਟ੍ਠੋ… ਯਾਵਤਾ ਨਿਰੁਤ੍ਤਿਪਟਿਸਮ੍ਭਿਦਾਯ ਨਿਰੁਤ੍ਤਿਪਟਿਸਮ੍ਭਿਦਟ੍ਠੋ… ਯਾਵਤਾ ਪਟਿਭਾਨਪਟਿਸਮ੍ਭਿਦਾਯ ਪਟਿਭਾਨਪਟਿਸਮ੍ਭਿਦਟ੍ਠੋ, ਸਬ੍ਬੋ ਞਾਤੋ, ਸਬ੍ਬੋ ਦਿਟ੍ਠੋ, ਸਬ੍ਬੋ ਵਿਦਿਤੋ, ਸਬ੍ਬੋ ਸਚ੍ਛਿਕਤੋ, ਸਬ੍ਬੋ ਫਸ੍ਸਿਤੋ ਪਞ੍ਞਾਯ; ਅਫਸ੍ਸਿਤੋ ਪਞ੍ਞਾਯ ਪਟਿਭਾਨਪਟਿਸਮ੍ਭਿਦਟ੍ਠੋ ਨਤ੍ਥੀਤਿ – ਸਬ੍ਬਞ੍ਞੁਤਞ੍ਞਾਣਂ. ਤਤ੍ਥ ਆਵਰਣਂ ਨਤ੍ਥੀਤਿ – ਅਨਾਵਰਣਞਾਣਂ.

ਯਾਵਤਾ ਇਨ੍ਦ੍ਰਿਯਪਰੋਪਰਿਯਤ੍ਤਞਾਣਂ…ਪੇ… ਯਾਵਤਾ ਸਤ੍ਤਾਨਂ ਆਸਯਾਨੁਸਯੇ ਞਾਣਂ… ਯਾਵਤਾ ਯਮਕਪਾਟਿਹੀਰੇ ਞਾਣਂ… ਯਾਵਤਾ ਮਹਾਕਰੁਣਾਸਮਾਪਤ੍ਤਿਯਾ ਞਾਣਂ; ਸਬ੍ਬ ਞਾਤਂ, ਸਬ੍ਬਂ ਦਿਟ੍ਠਂ, ਸਬ੍ਬਂ ਵਿਦਿਤਂ, ਸਬ੍ਬਂ ਸਚ੍ਛਿਕਤਂ, ਸਬ੍ਬਂ ਫਸ੍ਸਿਤਂ ਪਞ੍ਞਾਯ; ਅਫਸ੍ਸਿਤਂ ਪਞ੍ਞਾਯ ਮਹਾਕਰੁਣਾਸਮਾਪਤ੍ਤਿਯਾ ਞਾਣਂ ਨਤ੍ਥੀਤਿ – ਸਬ੍ਬਞ੍ਞੁਤਞ੍ਞਾਣਂ. ਤਤ੍ਥ ਆਵਰਣਂ ਨਤ੍ਥੀਤਿ – ਅਨਾਵਰਣਞਾਣਂ.

ਯਾਵਤਾ ਸਦੇਵਕਸ੍ਸ ਲੋਕਸ੍ਸ ਸਮਾਰਕਸ੍ਸ ਸਬ੍ਰਹ੍ਮਕਸ੍ਸ ਸਸ੍ਸਮਣਬ੍ਰਾਹ੍ਮਣਿਯਾ ਪਜਾਯ ਸਦੇਵਮਨੁਸ੍ਸਾਯ ਦਿਟ੍ਠਂ ਸੁਤਂ ਮੁਤਂ ਵਿਞ੍ਞਾਤਂ ਪਤ੍ਤਂ ਪਰਿਯੇਸਿਤਂ ਅਨੁਵਿਚਰਿਤਂ ਮਨਸਾ, ਸਬ੍ਬਂ ਞਾਤਂ, ਸਬ੍ਬਂ ਦਿਟ੍ਠਂ, ਸਬ੍ਬਂ ਵਿਦਿਤਂ, ਸਬ੍ਬਂ ਸਚ੍ਛਿਕਤਂ, ਸਬ੍ਬਂ ਫਸ੍ਸਿਤਂ ਪਞ੍ਞਾਯ; ਅਫਸ੍ਸਿਤਂ ਪਞ੍ਞਾਯ ਨਤ੍ਥੀਤਿ – ਸਬ੍ਬਞ੍ਞੁਤਞ੍ਞਾਣਂ. ਤਤ੍ਥ ਆਵਰਣਂ ਨਤ੍ਥੀਤਿ – ਅਨਾਵਰਣਞਾਣਂ.

ਨ ਤਸ੍ਸ ਅਦ੍ਦਿਟ੍ਠਮਿਧਤ੍ਥਿ ਕਿਞ੍ਚਿ, ਅਥੋ ਅਵਿਞ੍ਞਾਤਮਜਾਨਿਤਬ੍ਬਂ;

ਸਬ੍ਬਂ ਅਭਿਞ੍ਞਾਸਿ ਯਦਤ੍ਥਿ ਨੇਯ੍ਯਂ, ਤਥਾਗਤੋ ਤੇਨ ਸਮਨ੍ਤਚਕ੍ਖੂਤਿ.

ਸਬ੍ਬਞ੍ਞੁਤਞਾਣਨਿਦ੍ਦੇਸੋ ਤੇਸਤ੍ਤਤਿਮੋ.

ਞਾਣਕਥਾ ਨਿਟ੍ਠਿਤਾ.