੭੧. ਮਹਾਕਰੁਣਾਞਾਣਨਿਦ੍ਦੇਸੋ

੧੧੭. ਕਤਮਂ ਤਥਾਗਤਸ੍ਸ ਮਹਾਕਰੁਣਾਸਮਾਪਤ੍ਤਿਯਾ ਞਾਣਂ? ਬਹੁਕੇਹਿ ਆਕਾਰੇਹਿ ਪਸ੍ਸਨ੍ਤਾਨਂ ਬੁਦ੍ਧਾਨਂ ਭਗਵਨ੍ਤਾਨਂ ਸਤ੍ਤੇਸੁ ਮਹਾਕਰੁਣਾ ਓਕ੍ਕਮਤਿ. ਆਦਿਤ੍ਤੋ ਲੋਕਸਨ੍ਨਿਵਾਸੋਤਿ – ਪਸ੍ਸਨ੍ਤਾਨਂ ਬੁਦ੍ਧਾਨਂ ਭਗਵਨ੍ਤਾਨਂ ਸਤ੍ਤੇਸੁ ਮਹਾਕਰੁਣਾ ਓਕ੍ਕਮਤਿ. ਉਯ੍ਯੁਤ੍ਤੋ ਲੋਕਸਨ੍ਨਿਵਾਸੋਤਿ – ਪਸ੍ਸਨ੍ਤਾਨਂ ਬੁਦ੍ਧਾਨਂ ਭਗਵਨ੍ਤਾਨਂ ਸਤ੍ਤੇਸੁ ਮਹਾਕਰੁਣਾ ਓਕ੍ਕਮਤਿ. ਪਯਾਤੋ ਲੋਕਸਨ੍ਨਿਵਾਸੋਤਿ – ਪਸ੍ਸਨ੍ਤਾਨਂ ਬੁਦ੍ਧਾਨਂ ਭਗਵਨ੍ਤਾਨਂ ਸਤ੍ਤੇਸੁ ਮਹਾਕਰੁਣਾ ਓਕ੍ਕਮਤਿ. ਕੁਮ੍ਮਗ੍ਗਪ੍ਪਟਿਪਨ੍ਨੋ [ਕੁਮ੍ਮਗ੍ਗਂ ਪਟਿਪਨ੍ਨੋ (ਸ੍ਯਾ.)] ਲੋਕਸਨ੍ਨਿਵਾਸੋਤਿ – ਪਸ੍ਸਨ੍ਤਾਨਂ ਬੁਦ੍ਧਾਨਂ ਭਗਵਨ੍ਤਾਨਂ ਸਤ੍ਤੇਸੁ ਮਹਾਕਰੁਣਾ ਓਕ੍ਕਮਤਿ. ਉਪਨੀਯਤਿ ਲੋਕੋ ਅਦ੍ਧੁਵੋਤਿ – ਪਸ੍ਸਨ੍ਤਾਨਂ ਬੁਦ੍ਧਾਨਂ ਭਗਵਨ੍ਤਾਨਂ ਸਤ੍ਤੇਸੁ ਮਹਾਕਰੁਣਾ ਓਕ੍ਕਮਤਿ. ਅਤਾਣੋ [ਅਤ੍ਤਾਣੋ (ਸ੍ਯਾ.)] ਲੋਕੋ ਅਨਭਿਸ੍ਸਰੋਤਿ – ਪਸ੍ਸਨ੍ਤਾਨਂ ਬੁਦ੍ਧਾਨਂ ਭਗਵਨ੍ਤਾਨਂ ਸਤ੍ਤੇਸੁ ਮਹਾਕਰੁਣਾ ਓਕ੍ਕਮਤਿ. ਅਸ੍ਸਕੋ ਲੋਕੋ, ਸਬ੍ਬਂ ਪਹਾਯ ਗਮਨੀਯਨ੍ਤਿ – ਪਸ੍ਸਨ੍ਤਾਨਂ ਬੁਦ੍ਧਾਨਂ ਭਗਵਨ੍ਤਾਨਂ ਸਤ੍ਤੇਸੁ ਮਹਾਕਰੁਣਾ ਓਕ੍ਕਮਤਿ. ਊਨੋ ਲੋਕੋ ਅਤੀਤੋ ਤਣ੍ਹਾਦਾਸੋਤਿ – ਪਸ੍ਸਨ੍ਤਾਨਂ ਬੁਦ੍ਧਾਨਂ ਭਗਵਨ੍ਤਾਨਂ ਸਤ੍ਤੇਸੁ ਮਹਾਕਰੁਣਾ ਓਕ੍ਕਮਤਿ. ਅਤਾਯਨੋ ਲੋਕਸਨ੍ਨਿਵਾਸੋਤਿ – ਪਸ੍ਸਨ੍ਤਾਨਂ…ਪੇ… ਅਲੇਣੋ ਲੋਕਸਨ੍ਨਿਵਾਸੋਤਿ – ਪਸ੍ਸਨ੍ਤਾਨਂ …ਪੇ… ਅਸਰਣੋ ਲੋਕਸਨ੍ਨਿਵਾਸੋਤਿ – ਪਸ੍ਸਨ੍ਤਾਨਂ…ਪੇ… ਅਸਰਣੀਭੂਤੋ ਲੋਕਸਨ੍ਨਿਵਾਸੋਤਿ – ਪਸ੍ਸਨ੍ਤਾਨਂ…ਪੇ….

ਉਦ੍ਧਤੋ ਲੋਕੋ ਅਵੂਪਸਨ੍ਤੋਤਿ – ਪਸ੍ਸਨ੍ਤਾਨਂ…ਪੇ… ਸਸਲ੍ਲੋ ਲੋਕਸਨ੍ਨਿਵਾਸੋ, ਵਿਦ੍ਧੋ ਪੁਥੁਸਲ੍ਲੇਹਿ; ਤਸ੍ਸ ਨਤ੍ਥਞ੍ਞੋ ਕੋਚਿ ਸਲ੍ਲਾਨਂ ਉਦ੍ਧਤਾ, ਅਞ੍ਞਤ੍ਰ ਮਯਾਤਿ – ਪਸ੍ਸਨ੍ਤਾਨਂ…ਪੇ… ਅਵਿਜ੍ਜਨ੍ਧਕਾਰਾਵਰਣੋ ਲੋਕਸਨ੍ਨਿਵਾਸੋ ਅਣ੍ਡਭੂਤੋ ਕਿਲੇਸਪਞ੍ਜਰਪਕ੍ਖਿਤ੍ਤੋ; ਤਸ੍ਸ ਨਤ੍ਥਞ੍ਞੋ ਕੋਚਿ ਆਲੋਕਂ ਦਸ੍ਸੇਤਾ, ਅਞ੍ਞਤ੍ਰ ਮਯਾਤਿ – ਪਸ੍ਸਨ੍ਤਾਨਂ…ਪੇ… ਅਵਿਜ੍ਜਾਗਤੋ ਲੋਕਸਨ੍ਨਿਵਾਸੋ ਅਣ੍ਡਭੂਤੋ ਪਰਿਯੋਨਦ੍ਧੋ ਤਨ੍ਤਾਕੁਲਕਜਾਤੋ [ਤਨ੍ਤਾਕੁਲਜਾਤੋ (ਸ੍ਯਾ.)] ਕੁਲਾਗਣ੍ਡਿਕਜਾਤੋ [ਗੁਲ਼ਾਗੁਣ੍ਠਿਕਜਾਤੋ (ਸ੍ਯਾ.), ਗੁਲਾਗੁਣ੍ਡਿਕਜਾਤੋ (ਕ. ਸੀ. ਅਟ੍ਠ.) ਦੀ. ਨਿ. ੨.੯੫ ਪਸ੍ਸਿਤਬ੍ਬਾ] ਮੁਞ੍ਜਪਬ੍ਬਜਭੂਤੋ ਅਪਾਯਂ ਦੁਗ੍ਗਤਿਂ ਵਿਨਿਪਾਤਂ ਸਂਸਾਰਂ ਨਾਤਿਵਤ੍ਤਤੀਤਿ – ਪਸ੍ਸਨ੍ਤਾਨਂ…ਪੇ… ਅਵਿਜ੍ਜਾਵਿਸਦੋਸਸਂਲਿਤ੍ਤੋ ਲੋਕਸਨ੍ਨਿਵਾਸੋ ਕਿਲੇਸਕਲਲੀਭੂਤੋਤਿ – ਪਸ੍ਸਨ੍ਤਾਨਂ…ਪੇ… ਰਾਗਦੋਸਮੋਹਜਟਾਜਟਿਤੋ ਲੋਕਸਨ੍ਨਿਵਾਸੋ; ਤਸ੍ਸ ਨਤ੍ਥਞ੍ਞੋ ਕੋਚਿ ਜਟਂ ਵਿਜਟੇਤਾ, ਅਞ੍ਞਤ੍ਰ ਮਯਾਤਿ – ਪਸ੍ਸਨ੍ਤਾਨਂ…ਪੇ….

ਤਣ੍ਹਾਸਙ੍ਘਾਟਪਟਿਮੁਕ੍ਕੋ ਲੋਕਸਨ੍ਨਿਵਾਸੋਤਿ – ਪਸ੍ਸਨ੍ਤਾਨਂ…ਪੇ… ਤਣ੍ਹਾਜਾਲੇਨ ਓਤ੍ਥਟੋ [ਓਤ੍ਥਤੋ (ਕ.)] ਲੋਕਸਨ੍ਨਿਵਾਸੋਤਿ – ਪਸ੍ਸਨ੍ਤਾਨਂ…ਪੇ… ਤਣ੍ਹਾਸੋਤੇਨ ਵੁਯ੍ਹਤਿ ਲੋਕਸਨ੍ਨਿਵਾਸੋਤਿ – ਪਸ੍ਸਨ੍ਤਾਨਂ…ਪੇ… ਤਣ੍ਹਾਸਞ੍ਞੋਜਨੇਨ ਸਞ੍ਞੁਤ੍ਤੋ ਲੋਕਸਨ੍ਨਿਵਾਸੋਤਿ – ਪਸ੍ਸਨ੍ਤਾਨਂ…ਪੇ… ਤਣ੍ਹਾਨੁਸਯੇਨ ਅਨੁਸਟੋ ਲੋਕਸਨ੍ਨਿਵਾਸੋਤਿ – ਪਸ੍ਸਨ੍ਤਾਨਂ…ਪੇ… ਤਣ੍ਹਾਸਨ੍ਤਾਪੇਨ ਸਨ੍ਤਪ੍ਪਤਿ ਲੋਕਸਨ੍ਨਿਵਾਸੋਤਿ – ਪਸ੍ਸਨ੍ਤਾਨਂ…ਪੇ… ਤਣ੍ਹਾਪਰਿਲ਼ਾਹੇਨ ਪਰਿਡਯ੍ਹਤਿ ਲੋਕਸਨ੍ਨਿਵਾਸੋਤਿ – ਪਸ੍ਸਨ੍ਤਾਨਂ…ਪੇ….

ਦਿਟ੍ਠਿਸਙ੍ਘਾਟਪਟਿਮੁਕ੍ਕੋ ਲੋਕਸਨ੍ਨਿਵਾਸੋਤਿ – ਪਸ੍ਸਨ੍ਤਾਨਂ…ਪੇ… ਦਿਟ੍ਠਿਜਾਲੇਨ ਓਤ੍ਥਟੋ ਲੋਕਸਨ੍ਨਿਵਾਸੋਤਿ – ਪਸ੍ਸਨ੍ਤਾਨਂ…ਪੇ… ਦਿਟ੍ਠਿਸੋਤੇਨ ਵੁਯ੍ਹਤਿ ਲੋਕਸਨ੍ਨਿਵਾਸੋਤਿ – ਪਸ੍ਸਨ੍ਤਾਨਂ…ਪੇ… ਦਿਟ੍ਠਿਸਞ੍ਞੋਜਨੇਨ ਸਞ੍ਞੁਤ੍ਤੋ ਲੋਕਸਨ੍ਨਿਵਾਸੋਤਿ – ਪਸ੍ਸਨ੍ਤਾਨਂ…ਪੇ… ਦਿਟ੍ਠਾਨੁਸਯੇਨ ਅਨੁਸਟੋ ਲੋਕਸਨ੍ਨਿਵਾਸੋਤਿ – ਪਸ੍ਸਨ੍ਤਾਨਂ…ਪੇ… ਦਿਟ੍ਠਿਸਨ੍ਤਾਪੇਨ ਸਨ੍ਤਪ੍ਪਤਿ ਲੋਕਸਨ੍ਨਿਵਾਸੋਤਿ – ਪਸ੍ਸਨ੍ਤਾਨਂ…ਪੇ… ਦਿਟ੍ਠਿਪਰਿਲ਼ਾਹੇਨ ਪਰਿਡਯ੍ਹਤਿ ਲੋਕਸਨ੍ਨਿਵਾਸੋਤਿ – ਪਸ੍ਸਨ੍ਤਾਨਂ…ਪੇ….

ਜਾਤਿਯਾ ਅਨੁਗਤੋ ਲੋਕਸਨ੍ਨਿਵਾਸੋਤਿ – ਪਸ੍ਸਨ੍ਤਾਨਂ…ਪੇ… ਜਰਾਯ ਅਨੁਸਟੋ ਲੋਕਸਨ੍ਨਿਵਾਸੋਤਿ – ਪਸ੍ਸਨ੍ਤਾਨਂ…ਪੇ… ਬ੍ਯਾਧਿਨਾ ਅਭਿਭੂਤੋ ਲੋਕਸਨ੍ਨਿਵਾਸੋਤਿ – ਪਸ੍ਸਨ੍ਤਾਨਂ …ਪੇ… ਮਰਣੇਨ ਅਬ੍ਭਾਹਤੋ ਲੋਕਸਨ੍ਨਿਵਾਸੋਤਿ – ਪਸ੍ਸਨ੍ਤਾਨਂ…ਪੇ… ਦੁਕ੍ਖੇ ਪਤਿਟ੍ਠਿਤੋ ਲੋਕਸਨ੍ਨਿਵਾਸੋਤਿ – ਪਸ੍ਸਨ੍ਤਾਨਂ…ਪੇ….

ਤਣ੍ਹਾਯ ਉਡ੍ਡਿਤੋ ਲੋਕਸਨ੍ਨਿਵਾਸੋਤਿ – ਪਸ੍ਸਨ੍ਤਾਨਂ…ਪੇ… ਜਰਾਪਾਕਾਰਪਰਿਕ੍ਖਿਤ੍ਤੋ ਲੋਕਸਨ੍ਨਿਵਾਸੋਤਿ – ਪਸ੍ਸਨ੍ਤਾਨਂ…ਪੇ… ਮਚ੍ਚੁਪਾਸੇਨ ਪਰਿਕ੍ਖਿਤ੍ਤੋ ਲੋਕਸਨ੍ਨਿਵਾਸੋਤਿ – ਪਸ੍ਸਨ੍ਤਾਨਂ…ਪੇ… ਮਹਾਬਨ੍ਧਨਬਨ੍ਧੋ ਲੋਕਸਨ੍ਨਿਵਾਸੋ – ਰਾਗਬਨ੍ਧਨੇਨ ਦੋਸਬਨ੍ਧਨੇਨ ਮੋਹਬਨ੍ਧਨੇਨ ਮਾਨਬਨ੍ਧਨੇਨ ਦਿਟ੍ਠਿਬਨ੍ਧਨੇਨ ਕਿਲੇਸਬਨ੍ਧਨੇਨ ਦੁਚ੍ਚਰਿਤਬਨ੍ਧਨੇਨ; ਤਸ੍ਸ ਨਤ੍ਥਞ੍ਞੋ ਕੋਚਿ ਬਨ੍ਧਨਂ ਮੋਚੇਤਾ, ਅਞ੍ਞਤ੍ਰ ਮਯਾਤਿ – ਪਸ੍ਸਨ੍ਤਾਨਂ…ਪੇ… ਮਹਾਸਮ੍ਬਾਧਪ੍ਪਟਿਪਨ੍ਨੋ ਲੋਕਸਨ੍ਨਿਵਾਸੋ; ਤਸ੍ਸ ਨਤ੍ਥਞ੍ਞੋ ਕੋਚਿ ਓਕਾਸਂ ਦਸ੍ਸੇਤਾ, ਅਞ੍ਞਤ੍ਰ ਮਯਾਤਿ – ਪਸ੍ਸਨ੍ਤਾਨਂ… ਮਹਾਪਲਿਬੋਧੇਨ ਪਲਿਬੁਦ੍ਧੋ ਲੋਕਸਨ੍ਨਿਵਾਸੋ; ਤਸ੍ਸ ਨਤ੍ਥਞ੍ਞੋ ਕੋਚਿ ਪਲਿਬੋਧਂ ਛੇਤਾ, ਅਞ੍ਞਤ੍ਰ ਮਯਾਤਿ – ਪਸ੍ਸਨ੍ਤਾਨਂ…ਪੇ… ਮਹਾਪਪਾਤੇ ਪਤਿਤੋ ਲੋਕਸਨ੍ਨਿਵਾਸੋ; ਤਸ੍ਸ ਨਤ੍ਥਞ੍ਞੋ ਕੋਚਿ ਪਪਾਤਾ ਉਦ੍ਧਤਾ, ਅਞ੍ਞਤ੍ਰ ਮਯਾਤਿ – ਪਸ੍ਸਨ੍ਤਾਨਂ…ਪੇ… ਮਹਾਕਨ੍ਤਾਰਪ੍ਪਟਿਪਨ੍ਨੋ ਲੋਕਸਨ੍ਨਿਵਾਸੋ; ਤਸ੍ਸ ਨਤ੍ਥਞ੍ਞੋ ਕੋਚਿ ਕਨ੍ਤਾਰਂ ਤਾਰੇਤਾ, ਅਞ੍ਞਤ੍ਰ ਮਯਾਤਿ – ਪਸ੍ਸਨ੍ਤਾਨਂ…ਪੇ… ਮਹਾਸਂਸਾਰਪ੍ਪਟਿਪਨ੍ਨੋ ਲੋਕਸਨ੍ਨਿਵਾਸੋ; ਤਸ੍ਸ ਨਤ੍ਥਞ੍ਞੋ ਕੋਚਿ ਸਂਸਾਰਾ ਮੋਚੇਤਾ, ਅਞ੍ਞਤ੍ਰ ਮਯਾਤਿ – ਪਸ੍ਸਨ੍ਤਾਨਂ…ਪੇ… ਮਹਾਵਿਦੁਗ੍ਗੇ ਸਮ੍ਪਰਿਵਤ੍ਤਤਿ ਲੋਕਸਨ੍ਨਿਵਾਸੋ; ਤਸ੍ਸ ਨਤ੍ਥਞ੍ਞੋ ਕੋਚਿ ਵਿਦੁਗ੍ਗਾ ਉਦ੍ਧਤਾ, ਅਞ੍ਞਤ੍ਰ ਮਯਾਤਿ – ਪਸ੍ਸਨ੍ਤਾਨਂ…ਪੇ… ਮਹਾਪਲਿਪੇ [ਮਹਾਪਲ੍ਲੇਪੇ (ਸ੍ਯਾ.)] ਪਲਿਪਨ੍ਨੋ ਲੋਕਸਨ੍ਨਿਵਾਸੋ; ਤਸ੍ਸ ਨਤ੍ਥਞ੍ਞੋ ਕੋਚਿ ਪਲਿਪਾ ਉਦ੍ਧਤਾ, ਅਞ੍ਞਤ੍ਰ ਮਯਾਤਿ – ਪਸ੍ਸਨ੍ਤਾਨਂ…ਪੇ….

ਅਬ੍ਭਾਹਤੋ ਲੋਕਸਨ੍ਨਿਵਾਸੋਤਿ – ਪਸ੍ਸਨ੍ਤਾਨਂ…ਪੇ… ਆਦਿਤ੍ਤੋ ਲੋਕਸਨ੍ਨਿਵਾਸੋ – ਰਾਗਗ੍ਗਿਨਾ ਦੋਸਗ੍ਗਿਨਾ ਮੋਹਗ੍ਗਿਨਾ ਜਾਤਿਯਾ ਜਰਾਯ ਮਰਣੇਨ ਸੋਕੇਹਿ ਪਰਿਦੇਵੇਹਿ ਦੁਕ੍ਖੇਹਿ ਦੋਮਨਸ੍ਸੇਹਿ ਉਪਾਯਾਸੇਹਿ; ਤਸ੍ਸ ਨਤ੍ਥਞ੍ਞੋ ਕੋਚਿ ਨਿਬ੍ਬਾਪੇਤਾ, ਅਞ੍ਞਤ੍ਰ ਮਯਾਤਿ – ਪਸ੍ਸਨ੍ਤਾਨਂ…ਪੇ… ਉਨ੍ਨੀਤਕੋ ਲੋਕਸਨ੍ਨਿਵਾਸੋ ਹਞ੍ਞਤਿ ਨਿਚ੍ਚਮਤਾਣੋ ਪਤ੍ਤਦਣ੍ਡੋ ਤਕ੍ਕਰੋਤਿ – ਪਸ੍ਸਨ੍ਤਾਨਂ…ਪੇ… ਵਜ੍ਜਬਨ੍ਧਨਬਦ੍ਧੋ ਲੋਕਸਨ੍ਨਿਵਾਸੋ ਆਘਾਤਨਪਚ੍ਚੁਪਟ੍ਠਿਤੋ; ਤਸ੍ਸ ਨਤ੍ਥਞ੍ਞੋ ਕੋਚਿ ਬਨ੍ਧਨਂ ਮੋਚੇਤਾ, ਅਞ੍ਞਤ੍ਰ ਮਯਾਤਿ – ਪਸ੍ਸਨ੍ਤਾਨਂ…ਪੇ… ਅਨਾਥੋ ਲੋਕਸਨ੍ਨਿਵਾਸੋ ਪਰਮਕਾਰੁਞ੍ਞਪ੍ਪਤ੍ਤੋ; ਤਸ੍ਸ ਨਤ੍ਥਞ੍ਞੋ ਕੋਚਿ ਤਾਯੇਤਾ, ਅਞ੍ਞਤ੍ਰ ਮਯਾਤਿ – ਪਸ੍ਸਨ੍ਤਾਨਂ…ਪੇ… ਦੁਕ੍ਖਾਭਿਤੁਨ੍ਨੋ [ਦੁਕ੍ਖਾਭਿਤੁਣ੍ਣੋ (ਕ.)] ਲੋਕਸਨ੍ਨਿਵਾਸੋ ਚਿਰਰਤ੍ਤਂ ਪੀਲ਼ਿਤੋਤਿ – ਪਸ੍ਸਨ੍ਤਾਨਂ…ਪੇ… ਗਧਿਤੋ ਲੋਕਸਨ੍ਨਿਵਾਸੋ ਨਿਚ੍ਚਂ ਪਿਪਾਸਿਤੋਤਿ – ਪਸ੍ਸਨ੍ਤਾਨਂ…ਪੇ….

ਅਨ੍ਧੋ ਲੋਕਸਨ੍ਨਿਵਾਸੋ ਅਚਕ੍ਖੁਕੋਤਿ – ਪਸ੍ਸਨ੍ਤਾਨਂ…ਪੇ… ਹਤਨੇਤ੍ਤੋ ਲੋਕਸਨ੍ਨਿਵਾਸੋ ਅਪਰਿਣਾਯਕੋਤਿ – ਪਸ੍ਸਨ੍ਤਾਨਂ…ਪੇ… ਵਿਪਥਪਕ੍ਖਨ੍ਦੋ [ਵਿਪਥਂ ਪਕ੍ਖਨ੍ਤੋ (ਸ੍ਯਾ.)] ਲੋਕਸਨ੍ਨਿਵਾਸੋ ਅਞ੍ਜਸਾਪਰਦ੍ਧੋ; ਤਸ੍ਸ ਨਤ੍ਥਞ੍ਞੋ ਕੋਚਿ ਅਰਿਯਪਥਂ ਆਨੇਤਾ, ਅਞ੍ਞਤ੍ਰ ਮਯਾਤਿ – ਪਸ੍ਸਨ੍ਤਾਨਂ…ਪੇ… ਮਹੋਘਪਕ੍ਖਨ੍ਦੋ ਲੋਕਸਨ੍ਨਿਵਾਸੋ; ਤਸ੍ਸ ਨਤ੍ਥਞ੍ਞੋ ਕੋਚਿ ਓਘਾ ਉਦ੍ਧਤਾ, ਅਞ੍ਞਤ੍ਰ ਮਯਾਤਿ – ਪਸ੍ਸਨ੍ਤਾਨਂ…ਪੇ….

੧੧੮. ਦ੍ਵੀਹਿ ਦਿਟ੍ਠਿਗਤੇਹਿ ਪਰਿਯੁਟ੍ਠਿਤੋ ਲੋਕਸਨ੍ਨਿਵਾਸੋਤਿ – ਪਸ੍ਸਨ੍ਤਾਨਂ…ਪੇ… ਤੀਹਿ ਦੁਚ੍ਚਰਿਤੇਹਿ ਵਿਪ੍ਪਟਿਪਨ੍ਨੋ ਲੋਕਸਨ੍ਨਿਵਾਸੋਤਿ – ਪਸ੍ਸਨ੍ਤਾਨਂ…ਪੇ… ਚਤੂਹਿ ਯੋਗੇਹਿ ਯੁਤ੍ਤੋ ਲੋਕਸਨ੍ਨਿਵਾਸੋ ਚਤੁਯੋਗਯੋਜਿਤੋਤਿ – ਪਸ੍ਸਨ੍ਤਾਨਂ…ਪੇ… ਚਤੂਹਿ ਗਨ੍ਥੇਹਿ [ਗਣ੍ਠੇਹਿ (ਸ੍ਯਾ.)] ਗਨ੍ਥਿਤੋ ਲੋਕਸਨ੍ਨਿਵਾਸੋਤਿ – ਪਸ੍ਸਨ੍ਤਾਨਂ…ਪੇ… ਚਤੂਹਿ ਉਪਾਦਾਨੇਹਿ ਉਪਾਦਿਯਤਿ ਲੋਕਸਨ੍ਨਿਵਾਸੋਤਿ – ਪਸ੍ਸਨ੍ਤਾਨਂ…ਪੇ… ਪਞ੍ਚਗਤਿਸਮਾਰੁਲ਼੍ਹੋ ਲੋਕਸਨ੍ਨਿਵਾਸੋਤਿ – ਪਸ੍ਸਨ੍ਤਾਨਂ…ਪੇ… ਪਞ੍ਚਹਿ ਕਾਮਗੁਣੇਹਿ ਰਜ੍ਜਤਿ ਲੋਕਸਨ੍ਨਿਵਾਸੋਤਿ – ਪਸ੍ਸਨ੍ਤਾਨਂ…ਪੇ… ਪਞ੍ਚਹਿ ਨੀਵਰਣੇਹਿ ਓਤ੍ਥਟੋ ਲੋਕਸਨ੍ਨਿਵਾਸੋਤਿ – ਪਸ੍ਸਨ੍ਤਾਨਂ…ਪੇ… ਛਹਿ ਵਿਵਾਦਮੂਲੇਹਿ ਵਿਵਦਤਿ ਲੋਕਸਨ੍ਨਿਵਾਸੋਤਿ – ਪਸ੍ਸਨ੍ਤਾਨਂ…ਪੇ… ਛਹਿ ਤਣ੍ਹਾਕਾਯੇਹਿ ਰਜ੍ਜਤਿ ਲੋਕਸਨ੍ਨਿਵਾਸੋਤਿ – ਪਸ੍ਸਨ੍ਤਾਨਂ…ਪੇ… ਛਹਿ ਦਿਟ੍ਠਿਗਤੇਹਿ ਪਰਿਯੁਟ੍ਠਿਤੋ ਲੋਕਸਨ੍ਨਿਵਾਸੋਤਿ – ਪਸ੍ਸਨ੍ਤਾਨਂ …ਪੇ… ਸਤ੍ਤਹਿ ਅਨੁਸਯੇਹਿ ਅਨੁਸਟੋ ਲੋਕਸਨ੍ਨਿਵਾਸੋਤਿ – ਪਸ੍ਸਨ੍ਤਾਨਂ…ਪੇ… ਸਤ੍ਤਹਿ ਸਞ੍ਞੋਜਨੇਹਿ ਸਞ੍ਞੁਤ੍ਤੋ ਲੋਕਸਨ੍ਨਿਵਾਸੋਤਿ – ਪਸ੍ਸਨ੍ਤਾਨਂ…ਪੇ… ਸਤ੍ਤਹਿ ਮਾਨੇਹਿ ਉਨ੍ਨਤੋ [ਉਣ੍ਣਤੋ (ਸ੍ਯਾ. ਕ.)] ਲੋਕਸਨ੍ਨਿਵਾਸੋਤਿ – ਪਸ੍ਸਨ੍ਤਾਨਂ…ਪੇ… ਅਟ੍ਠਹਿ ਲੋਕਧਮ੍ਮੇਹਿ ਸਮ੍ਪਰਿਵਤ੍ਤਤਿ ਲੋਕਸਨ੍ਨਿਵਾਸੋਤਿ – ਪਸ੍ਸਨ੍ਤਾਨਂ…ਪੇ… ਅਟ੍ਠਹਿ ਮਿਚ੍ਛਤ੍ਤੇਹਿ ਨਿਯ੍ਯਾਤੋ ਲੋਕਸਨ੍ਨਿਵਾਸੋਤਿ – ਪਸ੍ਸਨ੍ਤਾਨਂ…ਪੇ… ਅਟ੍ਠਹਿ ਪੁਰਿਸਦੋਸੇਹਿ ਦੁਸ੍ਸਤਿ ਲੋਕਸਨ੍ਨਿਵਾਸੋਤਿ – ਪਸ੍ਸਨ੍ਤਾਨਂ…ਪੇ… ਨਵਹਿ ਆਘਾਤਵਤ੍ਥੂਹਿ ਆਘਾਤਿਤੋ ਲੋਕਸਨ੍ਨਿਵਾਸੋਤਿ – ਪਸ੍ਸਨ੍ਤਾਨਂ …ਪੇ… ਨਵਵਿਧਮਾਨੇਹਿ ਉਨ੍ਨਤੋ ਲੋਕਸਨ੍ਨਿਵਾਸੋਤਿ – ਪਸ੍ਸਨ੍ਤਾਨਂ…ਪੇ… ਨਵਹਿ ਤਣ੍ਹਾਮੂਲਕੇਹਿ ਧਮ੍ਮੇਹਿ ਰਜ੍ਜਤਿ ਲੋਕਸਨ੍ਨਿਵਾਸੋਤਿ – ਪਸ੍ਸਨ੍ਤਾਨਂ…ਪੇ… ਦਸਹਿ ਕਿਲੇਸਵਤ੍ਥੂਹਿ ਕਿਲਿਸ੍ਸਤਿ ਲੋਕਸਨ੍ਨਿਵਾਸੋਤਿ – ਪਸ੍ਸਨ੍ਤਾਨਂ…ਪੇ… ਦਸਹਿ ਆਘਾਤਵਤ੍ਥੂਹਿ ਆਘਾਤਿਤੋ ਲੋਕਸਨ੍ਨਿਵਾਸੋਤਿ – ਪਸ੍ਸਨ੍ਤਾਨਂ…ਪੇ… ਦਸਹਿ ਅਕੁਸਲਕਮ੍ਮਪਥੇਹਿ ਸਮਨ੍ਨਾਗਤੋ ਲੋਕਸਨ੍ਨਿਵਾਸੋਤਿ – ਪਸ੍ਸਨ੍ਤਾਨਂ…ਪੇ… ਦਸਹਿ ਸਞ੍ਞੋਜਨੇਹਿ ਸਞ੍ਞੁਤ੍ਤੋ ਲੋਕਸਨ੍ਨਿਵਾਸੋਤਿ – ਪਸ੍ਸਨ੍ਤਾਨਂ…ਪੇ… ਦਸਹਿ ਮਿਚ੍ਛਤ੍ਤੇਹਿ ਨਿਯ੍ਯਾਤੋ ਲੋਕਸਨ੍ਨਿਵਾਸੋਤਿ – ਪਸ੍ਸਨ੍ਤਾਨਂ…ਪੇ… ਦਸਵਤ੍ਥੁਕਾਯ ਮਿਚ੍ਛਾਦਿਟ੍ਠਿਯਾ ਸਮਨ੍ਨਾਗਤੋ ਲੋਕਸਨ੍ਨਿਵਾਸੋਤਿ – ਪਸ੍ਸਨ੍ਤਾਨਂ…ਪੇ… ਦਸਵਤ੍ਥੁਕਾਯ ਅਨ੍ਤਗ੍ਗਾਹਿਕਾਯ ਦਿਟ੍ਠਿਯਾ ਸਮਨ੍ਨਾਗਤੋ ਲੋਕਸਨ੍ਨਿਵਾਸੋਤਿ – ਪਸ੍ਸਨ੍ਤਾਨਂ…ਪੇ… ਅਟ੍ਠਸਤਤਣ੍ਹਾਪਪਞ੍ਚਸਤੇਹਿ ਪਪਞ੍ਚਿਤੋ ਲੋਕਸਨ੍ਨਿਵਾਸੋਤਿ – ਪਸ੍ਸਨ੍ਤਾਨਂ ਬੁਦ੍ਧਾਨਂ ਭਗਵਨ੍ਤਾਨਂ ਸਤ੍ਤੇਸੁ ਮਹਾਕਰੁਣਾ ਓਕ੍ਕਮਤਿ. ਦ੍ਵਾਸਟ੍ਠਿਯਾ ਦਿਟ੍ਠਿਗਤੇਹਿ ਪਰਿਯੁਟ੍ਠਿਤੋ ਲੋਕਸਨ੍ਨਿਵਾਸੋਤਿ – ਪਸ੍ਸਨ੍ਤਾਨਂ ਬੁਦ੍ਧਾਨਂ ਭਗਵਨ੍ਤਾਨਂ ਸਤ੍ਤੇਸੁ ਮਹਾਕਰੁਣਾ ਓਕ੍ਕਮਤਿ.

ਅਹਞ੍ਚਮ੍ਹਿ ਤਿਣ੍ਣੋ, ਲੋਕੋ ਚ ਅਤਿਣ੍ਣੋ ਅਹਂ ਚਮ੍ਹਿ ਮੁਤ੍ਤੋ, ਲੋਕੋ ਚ ਅਮੁਤ੍ਤੋ; ਅਹਞ੍ਚਮ੍ਹਿ ਦਨ੍ਤੋ, ਲੋਕੋ ਚ ਅਦਨ੍ਤੋ; ਅਹਂ ਚਮ੍ਹਿ ਸਨ੍ਤੋ, ਲੋਕੋ ਚ ਅਸਨ੍ਤੋ; ਅਹਂ ਚਮ੍ਹਿ ਅਸ੍ਸਤ੍ਥੋ, ਲੋਕੋ ਚ ਅਨਸ੍ਸਤ੍ਥੋ; ਅਹਂ ਚਮ੍ਹਿ ਪਰਿਨਿਬ੍ਬੁਤੋ, ਲੋਕੋ ਚ ਅਪਰਿਨਿਬ੍ਬੁਤੋ; ਪਹੋਮਿ ਖ੍ਵਾਹਂ ਤਿਣ੍ਣੋ ਤਾਰੇਤੁਂ, ਮੁਤ੍ਤੋ ਮੋਚੇਤੁਂ, ਦਨ੍ਤੋ ਦਮੇਤੁਂ, ਸਨ੍ਤੋ ਸਮੇਤੁਂ, ਅਸ੍ਸਤ੍ਥੋ ਅਸ੍ਸਾਸੇਤੁਂ, ਪਰਿਨਿਬ੍ਬੁਤੋ ਪਰੇ ਚ ਪਰਿਨਿਬ੍ਬਾਪੇਤੁਨ੍ਤਿ – ਪਸ੍ਸਨ੍ਤਾਨਂ ਬੁਦ੍ਧਾਨਂ ਭਗਵਨ੍ਤਾਨਂ ਸਤ੍ਤੇਸੁ ਮਹਾਕਰੁਣਾ ਓਕ੍ਕਮਤਿ. ਇਦਂ ਤਥਾਗਤਸ੍ਸ ਮਹਾਕਰੁਣਾਸਮਾਪਤ੍ਤਿਯਾ ਞਾਣਂ.

ਮਹਾਕਰੁਣਾਞਾਣਨਿਦ੍ਦੇਸੋ ਏਕਸਤ੍ਤਤਿਮੋ.