੭੦. ਯਮਕਪਾਟਿਹੀਰਞਾਣਨਿਦ੍ਦੇਸੋ

੧੧੬. ਕਤਮਂ ਤਥਾਗਤਸ੍ਸ ਯਮਕਪਾਟਿਹੀਰੇ ਞਾਣਂ? ਇਧ ਤਥਾਗਤੋ ਯਮਕਪਾਟਿਹੀਰਂ ਕਰੋਤਿ ਅਸਾਧਾਰਣਂ ਸਾਵਕੇਹਿ. ਉਪਰਿਮਕਾਯਤੋ ਅਗ੍ਗਿਕ੍ਖਨ੍ਧੋ ਪਵਤ੍ਤਤਿ, ਹੇਟ੍ਠਿਮਕਾਯਤੋ ਉਦਕਧਾਰਾ ਪਵਤ੍ਤਤਿ; ਹੇਟ੍ਠਿਮਕਾਯਤੋ ਅਗ੍ਗਿਕ੍ਖਨ੍ਧੋ ਪਵਤ੍ਤਤਿ, ਉਪਰਿਮਕਾਯਤੋ ਉਦਕਧਾਰਾ ਪਵਤ੍ਤਤਿ; ਪੁਰਤ੍ਥਿਮਕਾਯਤੋ ਅਗ੍ਗਿਕ੍ਖਨ੍ਧੋ ਪਵਤ੍ਤਤਿ, ਪਚ੍ਛਿਮਕਾਯਤੋ ਉਦਕਧਾਰਾ ਪਵਤ੍ਤਤਿ; ਪਚ੍ਛਿਮਕਾਯਤੋ ਅਗ੍ਗਿਕ੍ਖਨ੍ਧੋ ਪਵਤ੍ਤਤਿ, ਪੁਰਤ੍ਥਿਮਕਾਯਤੋ ਉਦਕਧਾਰਾ ਪਵਤ੍ਤਤਿ; ਦਕ੍ਖਿਣਅਕ੍ਖਿਤੋ ਅਗ੍ਗਿਕ੍ਖਨ੍ਧੋ ਪਵਤ੍ਤਤਿ, ਵਾਮਅਕ੍ਖਿਤੋ ਉਦਕਧਾਰਾ ਪਵਤ੍ਤਤਿ; ਵਾਮਅਕ੍ਖਿਤੋ ਅਗ੍ਗਿਕ੍ਖਨ੍ਧੋ ਪਵਤ੍ਤਤਿ, ਦਕ੍ਖਿਣਅਕ੍ਖਿਤੋ ਉਦਕਧਾਰਾ ਪਵਤ੍ਤਤਿ; ਦਕ੍ਖਿਣਕਣ੍ਣਸੋਤਤੋ ਅਗ੍ਗਿਕ੍ਖਨ੍ਧੋ ਪਵਤ੍ਤਤਿ, ਵਾਮਕਣ੍ਣਸੋਤਤੋ ਉਦਕਧਾਰਾ ਪਵਤ੍ਤਤਿ; ਵਾਮਕਣ੍ਣਸੋਤਤੋ ਅਗ੍ਗਿਕ੍ਖਨ੍ਧੋ ਪਵਤ੍ਤਤਿ, ਦਕ੍ਖਿਣਕਣ੍ਣਸੋਤਤੋ ਉਦਕਧਾਰਾ ਪਵਤ੍ਤਤਿ; ਦਕ੍ਖਿਣਨਾਸਿਕਾਸੋਤਤੋ ਅਗ੍ਗਿਕ੍ਖਨ੍ਧੋ ਪਵਤ੍ਤਤਿ, ਵਾਮਨਾਸਿਕਾਸੋਤਤੋ ਉਦਕਧਾਰਾ ਪਵਤ੍ਤਤਿ; ਵਾਮਨਾਸਿਕਾਸੋਤਤੋ ਅਗ੍ਗਿਕ੍ਖਨ੍ਧੋ ਪਵਤ੍ਤਤਿ, ਦਕ੍ਖਿਣਨਾਸਿਕਾਸੋਤਤੋ ਉਦਕਧਾਰਾ ਪਵਤ੍ਤਤਿ; ਦਕ੍ਖਿਣਅਂਸਕੂਟਤੋ ਅਗ੍ਗਿਕ੍ਖਨ੍ਧੋ ਪਵਤ੍ਤਤਿ, ਵਾਮਅਂਸਕੂਟਤੋ ਉਦਕਧਾਰਾ ਪਵਤ੍ਤਤਿ; ਵਾਮਅਂਸਕੂਟਤੋ ਅਗ੍ਗਿਕ੍ਖਨ੍ਧੋ ਪਵਤ੍ਤਤਿ, ਦਕ੍ਖਿਣਅਂਸਕੂਟਤੋ ਉਦਕਧਾਰਾ ਪਵਤ੍ਤਤਿ; ਦਕ੍ਖਿਣਹਤ੍ਥਤੋ ਅਗ੍ਗਿਕ੍ਖਨ੍ਧੋ ਪਵਤ੍ਤਤਿ, ਵਾਮਹਤ੍ਥਤੋ ਉਦਕਧਾਰਾ ਪਵਤ੍ਤਤਿ; ਵਾਮਹਤ੍ਥਤੋ ਅਗ੍ਗਿਕ੍ਖਨ੍ਧੋ ਪਵਤ੍ਤਤਿ, ਦਕ੍ਖਿਣਹਤ੍ਥਤੋ ਉਦਕਧਾਰਾ ਪਵਤ੍ਤਤਿ; ਦਕ੍ਖਿਣਪਸ੍ਸਤੋ ਅਗ੍ਗਿਕ੍ਖਨ੍ਧੋ ਪਵਤ੍ਤਤਿ, ਵਾਮਪਸ੍ਸਤੋ ਉਦਕਧਾਰਾ ਪਵਤ੍ਤਤਿ; ਵਾਮਪਸ੍ਸਤੋ ਅਗ੍ਗਿਕ੍ਖਨ੍ਧੋ ਪਵਤ੍ਤਤਿ, ਦਕ੍ਖਿਣਪਸ੍ਸਤੋ ਉਦਕਧਾਰਾ ਪਵਤ੍ਤਤਿ; ਦਕ੍ਖਿਣਪਾਦਤੋ ਅਗ੍ਗਿਕ੍ਖਨ੍ਧੋ ਪਵਤ੍ਤਤਿ, ਵਾਮਪਾਦਤੋ ਉਦਕਧਾਰਾ ਪਵਤ੍ਤਤਿ; ਵਾਮਪਾਦਤੋ ਅਗ੍ਗਿਕ੍ਖਨ੍ਧੋ ਪਵਤ੍ਤਤਿ, ਦਕ੍ਖਿਣਪਾਦਤੋ ਉਦਕਧਾਰਾ ਪਵਤ੍ਤਤਿ; ਅਙ੍ਗੁਲਙ੍ਗੁਲੇਹਿ ਅਗ੍ਗਿਕ੍ਖਨ੍ਧੋ ਪਵਤ੍ਤਤਿ, ਅਙ੍ਗੁਲਨ੍ਤਰਿਕਾਹਿ ਉਦਕਧਾਰਾ ਪਵਤ੍ਤਤਿ; ਅਙ੍ਗੁਲਨ੍ਤਰਿਕਾਹਿ ਅਗ੍ਗਿਕ੍ਖਨ੍ਧੋ ਪਵਤ੍ਤਤਿ, ਅਙ੍ਗੁਲਙ੍ਗੁਲੇਹਿ ਉਦਕਧਾਰਾ ਪਵਤ੍ਤਤਿ; ਏਕੇਕਲੋਮਤੋ ਅਗ੍ਗਿਕ੍ਖਨ੍ਧੋ ਪਵਤ੍ਤਤਿ, ਏਕੇਕਲੋਮਤੋ ਉਦਕਧਾਰਾ ਪਵਤ੍ਤਤਿ; ਲੋਮਕੂਪਤੋ ਲੋਮਕੂਪਤੋ ਅਗ੍ਗਿਕ੍ਖਨ੍ਧੋ ਪਵਤ੍ਤਤਿ, ਲੋਮਕੂਪਤੋ ਲੋਮਕੂਪਤੋ ਉਦਕਧਾਰਾ ਪਵਤ੍ਤਤਿ.

ਛਨ੍ਨਂ ਵਣ੍ਣਾਨਂ – ਨੀਲਾਨਂ, ਪੀਤਕਾਨਂ, ਲੋਹਿਤਕਾਨਂ, ਓਦਾਤਾਨਂ, ਮਞ੍ਜਿਟ੍ਠਾਨਂ [ਮਞ੍ਜੇਟ੍ਠਾਨਂ (ਸ੍ਯਾ. ਕ.)], ਪਭਸ੍ਸਰਾਨਂ ਭਗਵਾ ਚਙ੍ਕਮਤਿ, ਨਿਮ੍ਮਿਤੋ ਤਿਟ੍ਠਤਿ ਵਾ ਨਿਸੀਦਤਿ ਵਾ ਸੇਯ੍ਯਂ ਵਾ ਕਪ੍ਪੇਤਿ. ਭਗਵਾ ਤਿਟ੍ਠਤਿ, ਨਿਮ੍ਮਿਤੋ ਚਙ੍ਕਮਤਿ ਵਾ ਨਿਸੀਦਤਿ ਵਾ ਸੇਯ੍ਯਂ ਵਾ ਕਪ੍ਪੇਤਿ. ਭਗਵਾ ਨਿਸੀਦਤਿ, ਨਿਮ੍ਮਿਤੋ ਚਙ੍ਕਮਤਿ ਵਾ ਤਿਟ੍ਠਤਿ ਵਾ ਸੇਯ੍ਯਂ ਵਾ ਕਪ੍ਪੇਤਿ. ਭਗਵਾ ਸੇਯ੍ਯਂ ਕਪ੍ਪੇਤਿ, ਨਿਮ੍ਮਿਤੋ ਚਙ੍ਕਮਤਿ ਵਾ ਤਿਟ੍ਠਤਿ ਵਾ ਨਿਸੀਦਤਿ ਵਾ. ਨਿਮ੍ਮਿਤੋ ਚਙ੍ਕਮਤਿ, ਭਗਵਾ ਤਿਟ੍ਠਤਿ ਵਾ ਨਿਸੀਦਤਿ ਵਾ ਸੇਯ੍ਯਂ ਵਾ ਕਪ੍ਪੇਤਿ. ਨਿਮ੍ਮਿਤੋ ਤਿਟ੍ਠਤਿ, ਭਗਵਾ ਚਙ੍ਕਮਤਿ ਵਾ ਨਿਸੀਦਤਿ ਵਾ ਸੇਯ੍ਯਂ ਵਾ ਕਪ੍ਪੇਤਿ. ਨਿਮ੍ਮਿਤੋ ਨਿਸੀਦਤਿ, ਭਗਵਾ ਚਙ੍ਕਮਤਿ ਵਾ ਤਿਟ੍ਠਤਿ ਵਾ ਸੇਯ੍ਯਂ ਵਾ ਕਪ੍ਪੇਤਿ. ਨਿਮ੍ਮਿਤੋ ਸੇਯ੍ਯਂ ਕਪ੍ਪੇਤਿ, ਭਗਵਾ ਚਙ੍ਕਮਤਿ ਵਾ ਤਿਟ੍ਠਤਿ ਵਾ ਨਿਸੀਦਤਿ ਵਾ. ਇਦਂ ਤਥਾਗਤਸ੍ਸ ਯਮਕਪਾਟਿਹੀਰੇ ਞਾਣਂ.

ਯਮਕਪਾਟਿਹੀਰਞਾਣਨਿਦ੍ਦੇਸੋ ਸਤ੍ਤਤਿਮੋ.