੩੮. ਵੀਰਿਯਾਰਮ੍ਭਞਾਣਨਿਦ੍ਦੇਸੋ

੮੯. ਕਥਂ ਅਸਲ੍ਲੀਨਤ੍ਤਪਹਿਤਤ੍ਤਪਗ੍ਗਹਟ੍ਠੇ ਪਞ੍ਞਾ ਵੀਰਿਯਾਰਮ੍ਭੇ ਞਾਣਂ? ਅਨੁਪ੍ਪਨ੍ਨਾਨਂ ਪਾਪਕਾਨਂ ਅਕੁਸਲਾਨਂ ਧਮ੍ਮਾਨਂ ਅਨੁਪ੍ਪਾਦਾਯ ਅਸਲ੍ਲੀਨਤ੍ਤਪਹਿਤਤ੍ਤਪਗ੍ਗਹਟ੍ਠੇ ਪਞ੍ਞਾ ਵੀਰਿਯਾਰਮ੍ਭੇ ਞਾਣਂ. ਉਪ੍ਪਨ੍ਨਾਨਂ ਪਾਪਕਾਨਂ ਅਕੁਸਲਾਨਂ ਧਮ੍ਮਾਨਂ ਪਹਾਨਾਯ ਅਸਲ੍ਲੀਨਤ੍ਤਪਹਿਤਤ੍ਤਪਗ੍ਗਹਟ੍ਠੇ ਪਞ੍ਞਾ ਵੀਰਿਯਾਰਮ੍ਭੇ ਞਾਣਂ. ਅਨੁਪ੍ਪਨ੍ਨਾਨਂ ਕੁਸਲਾਨਂ ਧਮ੍ਮਾਨਂ ਉਪ੍ਪਾਦਾਯ ਅਸਲ੍ਲੀਨਤ੍ਤਪਹਿਤਤ੍ਤਪਗ੍ਗਹਟ੍ਠੇ ਪਞ੍ਞਾ ਵੀਰਿਯਾਰਮ੍ਭੇ ਞਾਣਂ. ਉਪ੍ਪਨ੍ਨਾਨਂ ਕੁਸਲਾਨਂ ਧਮ੍ਮਾਨਂ ਠਿਤਿਯਾ ਅਸਮ੍ਮੋਸਾਯ ਭਿਯ੍ਯੋਭਾਵਾਯ ਵੇਪੁਲ੍ਲਾਯ ਭਾਵਨਾਯ ਪਾਰਿਪੂਰਿਯਾ ਅਸਲ੍ਲੀਨਤ੍ਤਪਹਿਤਤ੍ਤਪਗ੍ਗਹਟ੍ਠੇ ਪਞ੍ਞਾ ਵੀਰਿਯਾਰਮ੍ਭੇ ਞਾਣਂ.

ਅਨੁਪ੍ਪਨ੍ਨਸ੍ਸ ਕਾਮਚ੍ਛਨ੍ਦਸ੍ਸ ਅਨੁਪ੍ਪਾਦਾਯ ਅਸਲ੍ਲੀਨਤ੍ਤਪਹਿਤਤ੍ਤਪਗ੍ਗਹਟ੍ਠੇ ਪਞ੍ਞਾ ਵੀਰਿਯਾਰਮ੍ਭੇ ਞਾਣਂ. ਉਪ੍ਪਨ੍ਨਸ੍ਸ ਕਾਮਚ੍ਛਨ੍ਦਸ੍ਸ ਪਹਾਨਾਯ ਅਸਲ੍ਲੀਨਤ੍ਤਪਹਿਤਤ੍ਤਪਗ੍ਗਹਟ੍ਠੇ ਪਞ੍ਞਾ ਵੀਰਿਯਾਰਮ੍ਭੇ ਞਾਣਂ. ਅਨੁਪ੍ਪਨ੍ਨਸ੍ਸ ਨੇਕ੍ਖਮ੍ਮਸ੍ਸ ਉਪ੍ਪਾਦਾਯ ਅਸਲ੍ਲੀਨਤ੍ਤਪਹਿਤਤ੍ਤਪਗ੍ਗਹਟ੍ਠੇ ਪਞ੍ਞਾ ਵੀਰਿਯਾਰਮ੍ਭੇ ਞਾਣਂ. ਉਪ੍ਪਨ੍ਨਸ੍ਸ ਨੇਕ੍ਖਮ੍ਮਸ੍ਸ ਠਿਤਿਯਾ ਅਸਮ੍ਮੋਸਾਯ ਭਿਯ੍ਯੋਭਾਵਾਯ ਵੇਪੁਲ੍ਲਾਯ ਭਾਵਨਾਯ ਪਾਰਿਪੂਰਿਯਾ ਅਸਲ੍ਲੀਨਤ੍ਤਪਹਿਤਤ੍ਤਪਗ੍ਗਹਟ੍ਠੇ ਪਞ੍ਞਾ ਵੀਰਿਯਾਰਮ੍ਭੇ ਞਾਣਂ…ਪੇ….

ਅਨੁਪ੍ਪਨ੍ਨਾਨਂ ਸਬ੍ਬਕਿਲੇਸਾਨਂ ਅਨੁਪ੍ਪਾਦਾਯ ਅਸਲ੍ਲੀਨਤ੍ਤਪਹਿਤਤ੍ਤਪਗ੍ਗਹਟ੍ਠੇ ਪਞ੍ਞਾ ਵੀਰਿਯਾਰਮ੍ਭੇ ਞਾਣਂ. ਉਪ੍ਪਨ੍ਨਾਨਂ ਸਬ੍ਬਕਿਲੇਸਾਨਂ ਪਹਾਨਾਯ ਅਸਲ੍ਲੀਨਤ੍ਤਪਹਿਤਤ੍ਤਪਗ੍ਗਹਟ੍ਠੇ ਪਞ੍ਞਾ ਵੀਰਿਯਾਰਮ੍ਭੇ ਞਾਣਂ…ਪੇ… ਅਨੁਪ੍ਪਨ੍ਨਸ੍ਸ ਅਰਹਤ੍ਤਮਗ੍ਗਸ੍ਸ ਉਪ੍ਪਾਦਾਯ ਅਸਲ੍ਲੀਨਤ੍ਤਪਹਿਤਤ੍ਤਪਗ੍ਗਹਟ੍ਠੇ ਪਞ੍ਞਾ ਵੀਰਿਯਾਰਮ੍ਭੇ ਞਾਣਂ. ਉਪ੍ਪਨ੍ਨਸ੍ਸ ਅਰਹਤ੍ਤਮਗ੍ਗਸ੍ਸ ਠਿਤਿਯਾ ਅਸਮ੍ਮੋਸਾਯ ਭਿਯ੍ਯੋਭਾਵਾਯ ਵੇਪੁਲ੍ਲਾਯ ਭਾਵਨਾਯ ਪਾਰਿਪੂਰਿਯਾ ਅਸਲ੍ਲੀਨਤ੍ਤਪਹਿਤਤ੍ਤਪਗ੍ਗਹਟ੍ਠੇ ਪਞ੍ਞਾ ਵੀਰਿਯਾਰਮ੍ਭੇ ਞਾਣਂ. ਤਂ ਞਾਤਟ੍ਠੇਨ ਞਾਣਂ, ਪਜਾਨਨਟ੍ਠੇਨ ਪਞ੍ਞਾ. ਤੇਨ ਵੁਚ੍ਚਤਿ – ‘‘ਅਸਲ੍ਲੀਨਤ੍ਤਪਹਿਤਤ੍ਤਪਗ੍ਗਹਟ੍ਠੇ ਪਞ੍ਞਾ ਵੀਰਿਯਾਰਮ੍ਭੇ ਞਾਣਂ’’.

ਵੀਰਿਯਾਰਮ੍ਭਞਾਣਨਿਦ੍ਦੇਸੋ ਅਟ੍ਠਤਿਂਸਤਿਮੋ.