੩੯. ਅਤ੍ਥਸਨ੍ਦਸ੍ਸਨਞਾਣਨਿਦ੍ਦੇਸੋ

੯੦. ਕਥਂ ਨਾਨਾਧਮ੍ਮਪ੍ਪਕਾਸਨਤਾ ਪਞ੍ਞਾ ਅਤ੍ਥਸਨ੍ਦਸ੍ਸਨੇ ਞਾਣਂ? ਨਾਨਾਧਮ੍ਮਾਤਿ ਪਞ੍ਚਕ੍ਖਨ੍ਧਾ, ਦ੍ਵਾਦਸਾਯਤਨਾਨਿ, ਅਟ੍ਠਾਰਸ ਧਾਤੁਯੋ, ਕੁਸਲਾ ਧਮ੍ਮਾ, ਅਕੁਸਲਾ ਧਮ੍ਮਾ, ਅਬ੍ਯਾਕਤਾ ਧਮ੍ਮਾ, ਕਾਮਾਵਚਰਾ ਧਮ੍ਮਾ, ਰੂਪਾਵਚਰਾ ਧਮ੍ਮਾ, ਅਰੂਪਾਵਚਰਾ ਧਮ੍ਮਾ, ਅਪਰਿਯਾਪਨ੍ਨਾ ਧਮ੍ਮਾ.

ਪਕਾਸਨਤਾਤਿ ਰੂਪਂ ਅਨਿਚ੍ਚਤੋ ਪਕਾਸੇਤਿ, ਰੂਪਂ ਦੁਕ੍ਖਤੋ ਪਕਾਸੇਤਿ, ਰੂਪਂ ਅਨਤ੍ਤਤੋ ਪਕਾਸੇਤਿ. ਵੇਦਨਂ…ਪੇ… ਸਞ੍ਞਂ… ਸਙ੍ਖਾਰੇ… ਵਿਞ੍ਞਾਣਂ… ਚਕ੍ਖੁਂ…ਪੇ… ਜਰਾਮਰਣਂ ਅਨਿਚ੍ਚਤੋ ਪਕਾਸੇਤਿ, ਜਰਾਮਰਣਂ ਦੁਕ੍ਖਤੋ ਪਕਾਸੇਤਿ, ਜਰਾਮਰਣਂ ਅਨਤ੍ਤਤੋ ਪਕਾਸੇਤਿ.

ਅਤ੍ਥਸਨ੍ਦਸ੍ਸਨੇਤਿ ਕਾਮਚ੍ਛਨ੍ਦਂ ਪਜਹਨ੍ਤੋ ਨੇਕ੍ਖਮ੍ਮਤ੍ਥਂ ਸਨ੍ਦਸ੍ਸੇਤਿ. ਬ੍ਯਾਪਾਦਂ ਪਜਹਨ੍ਤੋ ਅਬ੍ਯਾਪਾਦਤ੍ਥਂ ਸਨ੍ਦਸ੍ਸੇਤਿ. ਥਿਨਮਿਦ੍ਧਂ ਪਜਹਨ੍ਤੋ ਆਲੋਕਸਞ੍ਞਤ੍ਥਂ ਸਨ੍ਦਸ੍ਸੇਤਿ. ਉਦ੍ਧਚ੍ਚਂ ਪਜਹਨ੍ਤੋ ਅਵਿਕ੍ਖੇਪਤ੍ਥਂ ਸਨ੍ਦਸ੍ਸੇਤਿ. ਵਿਚਿਕਿਚ੍ਛਂ ਪਜਹਨ੍ਤੋ ਧਮ੍ਮਵਵਤ੍ਥਾਨਤ੍ਥਂ ਸਨ੍ਦਸ੍ਸੇਤਿ. ਅਵਿਜ੍ਜਂ ਪਜਹਨ੍ਤੋ ਞਾਣਤ੍ਥਂ ਸਨ੍ਦਸ੍ਸੇਤਿ. ਅਰਤਿਂ ਪਜਹਨ੍ਤੋ ਪਾਮੋਜ੍ਜਤ੍ਥਂ ਸਨ੍ਦਸ੍ਸੇਤਿ. ਨੀਵਰਣੇ ਪਜਹਨ੍ਤੋ ਪਠਮਝਾਨਤ੍ਥਂ ਸਨ੍ਦਸ੍ਸੇਤਿ …ਪੇ… ਸਬ੍ਬਕਿਲੇਸੇ ਪਜਹਨ੍ਤੋ ਅਰਹਤ੍ਤਮਗ੍ਗਤ੍ਥਂ ਸਨ੍ਦਸ੍ਸੇਤਿ. ਤਂ ਞਾਤਟ੍ਠੇਨ ਞਾਣਂ, ਪਜਾਨਨਟ੍ਠੇਨ ਪਞ੍ਞਾ. ਤੇਨ ਵੁਚ੍ਚਤਿ – ‘‘ਨਾਨਾਧਮ੍ਮਪਕਾਸਨਤਾ ਪਞ੍ਞਾ ਅਤ੍ਥਸਨ੍ਦਸ੍ਸਨੇ ਞਾਣਂ’’.

ਅਤ੍ਥਸਨ੍ਦਸ੍ਸਨਞਾਣਨਿਦ੍ਦੇਸੋ ਨਵਤਿਂਸਤਿਮੋ.