੩੭. ਸਲ੍ਲੇਖਟ੍ਠਞਾਣਨਿਦ੍ਦੇਸੋ

੮੮. ਕਥਂ ਪੁਥੁਨਾਨਤ੍ਤੇਕਤ੍ਤਤੇਜਪਰਿਯਾਦਾਨੇ ਪਞ੍ਞਾ ਸਲ੍ਲੇਖਟ੍ਠੇ [ਪੁਥੁਨਾਨਤ੍ਤੇਕਤ੍ਤਤੇਜਪਰਿਯਾਦਾਨੇ (ਕ.)] ਞਾਣਂ? ਪੁਥੂਤਿ – ਰਾਗੋ ਪੁਥੁ, ਦੋਸੋ ਪੁਥੁ, ਮੋਹੋ ਪੁਥੁ, ਕੋਧੋ…ਪੇ… ਉਪਨਾਹੋ… ਮਕ੍ਖੋ… ਪਲ਼ਾਸੋ… ਇਸ੍ਸਾ… ਮਚ੍ਛਰਿਯਂ… ਮਾਯਾ… ਸਾਠੇਯ੍ਯਂ… ਥਮ੍ਭੋ… ਸਾਰਮ੍ਭੋ… ਮਾਨੋ… ਅਤਿਮਾਨੋ… ਮਦੋ… ਪਮਾਦੋ… ਸਬ੍ਬੇ ਕਿਲੇਸਾ… ਸਬ੍ਬੇ ਦੁਚ੍ਚਰਿਤਾ… ਸਬ੍ਬੇ ਅਭਿਸਙ੍ਖਾਰਾ… ਸਬ੍ਬੇ ਭਵਗਾਮਿਕਮ੍ਮਾ.

ਨਾਨਤ੍ਤੇਕਤ੍ਤਨ੍ਤਿ ਕਾਮਚ੍ਛਨ੍ਦੋ ਨਾਨਤ੍ਤਂ, ਨੇਕ੍ਖਮ੍ਮਂ ਏਕਤ੍ਤਂ. ਬ੍ਯਾਪਾਦੋ ਨਾਨਤ੍ਤਂ, ਅਬ੍ਯਾਪਾਦੋ ਏਕਤ੍ਤਂ. ਥਿਨਮਿਦ੍ਧਂ ਨਾਨਤ੍ਤਂ, ਆਲੋਕਸਞ੍ਞਾ ਏਕਤ੍ਤਂ. ਉਦ੍ਧਚ੍ਚਂ ਨਾਨਤ੍ਤਂ, ਅਵਿਕ੍ਖੇਪੋ ਏਕਤ੍ਤਂ. ਵਿਚਿਕਿਚ੍ਛਾ ਨਾਨਤ੍ਤਂ, ਧਮ੍ਮਵਵਤ੍ਥਾਨਂ ਏਕਤ੍ਤਂ. ਅਵਿਜ੍ਜਾ ਨਾਨਤ੍ਤਂ, ਞਾਣਂ ਏਕਤ੍ਤਂ. ਅਰਤਿ ਨਾਨਤ੍ਤਂ, ਪਾਮੋਜ੍ਜਂ ਏਕਤ੍ਤਂ. ਨੀਵਰਣਾ ਨਾਨਤ੍ਤਂ, ਪਠਮਂ ਝਾਨਂ ਏਕਤ੍ਤਂ…ਪੇ… ਸਬ੍ਬੇ ਕਿਲੇਸਾ ਨਾਨਤ੍ਤਂ, ਅਰਹਤ੍ਤਮਗ੍ਗੋ ਏਕਤ੍ਤਂ.

ਤੇਜੋਤਿ ਪਞ੍ਚ ਤੇਜਾ – ਚਰਣਤੇਜੋ, ਗੁਣਤੇਜੋ, ਪਞ੍ਞਾਤੇਜੋ, ਪੁਞ੍ਞਤੇਜੋ, ਧਮ੍ਮਤੇਜੋ. ਚਰਣਤੇਜੇਨ ਤੇਜਿਤਤ੍ਤਾ ਦੁਸ੍ਸੀਲ੍ਯਤੇਜਂ ਪਰਿਯਾਦਿਯਤਿ. ਗੁਣਤੇਜੇਨ ਤੇਜਿਤਤ੍ਤਾ ਅਗੁਣਤੇਜਂ ਪਰਿਯਾਦਿਯਤਿ. ਪਞ੍ਞਾਤੇਜੇਨ ਤੇਜਿਤਤ੍ਤਾ ਦੁਪ੍ਪਞ੍ਞਤੇਜਂ ਪਰਿਯਾਦਿਯਤਿ. ਪੁਞ੍ਞਤੇਜੇਨ ਤੇਜਿਤਤ੍ਤਾ ਅਪੁਞ੍ਞਤੇਜਂ ਪਰਿਯਾਦਿਯਤਿ. ਧਮ੍ਮਤੇਜੇਨ ਤੇਜਿਤਤ੍ਤਾ ਅਧਮ੍ਮਤੇਜਂ ਪਰਿਯਾਦਿਯਤਿ.

ਸਲ੍ਲੇਖੋਤਿ ਕਾਮਚ੍ਛਨ੍ਦੋ ਅਸਲ੍ਲੇਖੋ, ਨੇਕ੍ਖਮ੍ਮਂ ਸਲ੍ਲੇਖੋ. ਬ੍ਯਾਪਾਦੋ ਅਸਲ੍ਲੇਖੋ, ਅਬ੍ਯਾਪਾਦੋ ਸਲ੍ਲੇਖੋ. ਥਿਨਮਿਦ੍ਧਂ ਅਸਲ੍ਲੇਖੋ, ਆਲੋਕਸਞ੍ਞਾ ਸਲ੍ਲੇਖੋ. ਉਦ੍ਧਚ੍ਚਂ ਅਸਲ੍ਲੇਖੋ, ਅਵਿਕ੍ਖੇਪੋ ਸਲ੍ਲੇਖੋ. ਵਿਚਿਕਿਚ੍ਛਾ ਅਸਲ੍ਲੇਖੋ, ਧਮ੍ਮਵਵਤ੍ਥਾਨਂ ਸਲ੍ਲੇਖੋ. ਅਵਿਜ੍ਜਾ ਅਸਲ੍ਲੇਖੋ, ਞਾਣਂ ਸਲ੍ਲੇਖੋ. ਅਰਤਿ ਅਸਲ੍ਲੇਖੋ, ਪਾਮੋਜ੍ਜਂ ਸਲ੍ਲੇਖੋ. ਨੀਵਰਣਾ ਅਸਲ੍ਲੇਖੋ, ਪਠਮਂ ਝਾਨਂ ਸਲ੍ਲੇਖੋ…ਪੇ… ਸਬ੍ਬਕਿਲੇਸਾ ਅਸਲ੍ਲੇਖੋ, ਅਰਹਤ੍ਤਮਗ੍ਗੋ ਸਲ੍ਲੇਖੋ. ਤਂ ਞਾਤਟ੍ਠੇਨ ਞਾਣਂ, ਪਜਾਨਨਟ੍ਠੇਨ ਪਞ੍ਞਾ. ਤੇਨ ਵੁਚ੍ਚਤਿ – ‘‘ਪੁਥੁਨਾਨਤ੍ਤਤੇਜਪਰਿਯਾਦਾਨੇ ਪਞ੍ਞਾ ਸਲ੍ਲੇਖਟ੍ਠੇ ਞਾਣਂ’’.

ਸਲ੍ਲੇਖਟ੍ਠਞਾਣਨਿਦ੍ਦੇਸੋ ਸਤ੍ਤਤਿਂਸਤਿਮੋ.