੧੪. ਪਚ੍ਚਵੇਕ੍ਖਣਞਾਣਨਿਦ੍ਦੇਸੋ

੬੫. ਕਥਂ ਤਦਾ ਸਮੁਦਾਗਤੇ ਧਮ੍ਮੇ ਪਸ੍ਸਨੇ ਪਞ੍ਞਾ ਪਚ੍ਚਵੇਕ੍ਖਣੇ ਞਾਣਂ? ਸੋਤਾਪਤ੍ਤਿਮਗ੍ਗਕ੍ਖਣੇ ਦਸ੍ਸਨਟ੍ਠੇਨ ਸਮ੍ਮਾਦਿਟ੍ਠਿ ਤਦਾ ਸਮੁਦਾਗਤਾ. ਅਭਿਨਿਰੋਪਨਟ੍ਠੇਨ ਸਮ੍ਮਾਸਙ੍ਕਪ੍ਪੋ ਤਦਾ ਸਮੁਦਾਗਤੋ. ਪਰਿਗ੍ਗਹਟ੍ਠੇਨ ਸਮ੍ਮਾਵਾਚਾ ਤਦਾ ਸਮੁਦਾਗਤਾ. ਸਮੁਟ੍ਠਾਨਟ੍ਠੇਨ ਸਮ੍ਮਾਕਮ੍ਮਨ੍ਤੋ ਤਦਾ ਸਮੁਦਾਗਤੋ. ਵੋਦਾਨਟ੍ਠੇਨ ਸਮ੍ਮਾਆਜੀਵੋ ਤਦਾ ਸਮੁਦਾਗਤੋ. ਪਗ੍ਗਹਟ੍ਠੇਨ ਸਮ੍ਮਾਵਾਯਾਮੋ ਤਦਾ ਸਮੁਦਾਗਤੋ. ਉਪਟ੍ਠਾਨਟ੍ਠੇਨ ਸਮ੍ਮਾਸਤਿ ਤਦਾ ਸਮੁਦਾਗਤਾ. ਅਵਿਕ੍ਖੇਪਟ੍ਠੇਨ ਸਮ੍ਮਾਸਮਾਧਿ ਤਦਾ ਸਮੁਦਾਗਤੋ.

ਉਪਟ੍ਠਾਨਟ੍ਠੇਨ ਸਤਿਸਮ੍ਬੋਜ੍ਝਙ੍ਗੋ ਤਦਾ ਸਮੁਦਾਗਤੋ. ਪਵਿਚਯਟ੍ਠੇਨ ਧਮ੍ਮਵਿਚਯਸਮ੍ਬੋਜ੍ਝਙ੍ਗੋ ਤਦਾ ਸਮੁਦਾਗਤੋ. ਪਗ੍ਗਹਟ੍ਠੇਨ ਵੀਰਿਯਸਮ੍ਬੋਜ੍ਝਙ੍ਗੋ ਤਦਾ ਸਮੁਦਾਗਤੋ. ਫਰਣਟ੍ਠੇਨ ਪੀਤਿਸਮ੍ਬੋਜ੍ਝਙ੍ਗੋ ਤਦਾ ਸਮੁਦਾਗਤੋ. ਉਪਸਮਟ੍ਠੇਨ ਪਸ੍ਸਦ੍ਧਿਸਮ੍ਬੋਜ੍ਝਙ੍ਗੋ ਤਦਾ ਸਮੁਦਾਗਤੋ. ਅਵਿਕ੍ਖੇਪਟ੍ਠੇਨ ਸਮਾਧਿਸਮ੍ਬੋਜ੍ਝਙ੍ਗੋ ਤਦਾ ਸਮੁਦਾਗਤੋ. ਪਟਿਸਙ੍ਖਾਨਟ੍ਠੇਨ ਉਪੇਕ੍ਖਾਸਮ੍ਬੋਜ੍ਝਙ੍ਗੋ ਤਦਾ ਸਮੁਦਾਗਤੋ.

ਅਸ੍ਸਦ੍ਧਿਯੇ ਅਕਮ੍ਪਿਯਟ੍ਠੇਨ ਸਦ੍ਧਾਬਲਂ ਤਦਾ ਸਮੁਦਾਗਤਂ. ਕੋਸਜ੍ਜੇ ਅਕਮ੍ਪਿਯਟ੍ਠੇਨ ਵੀਰਿਯਬਲਂ ਤਦਾ ਸਮੁਦਾਗਤਂ. ਪਮਾਦੇ ਅਕਮ੍ਪਿਯਟ੍ਠੇਨ ਸਤਿਬਲਂ ਤਦਾ ਸਮੁਦਾਗਤਂ. ਉਦ੍ਧਚ੍ਚੇ ਅਕਮ੍ਪਿਯਟ੍ਠੇਨ ਸਮਾਧਿਬਲਂ ਤਦਾ ਸਮੁਦਾਗਤਂ. ਅਵਿਜ੍ਜਾਯ ਅਕਮ੍ਪਿਯਟ੍ਠੇਨ ਪਞ੍ਞਾਬਲਂ ਤਦਾ ਸਮੁਦਾਗਤਂ.

ਅਧਿਮੋਕ੍ਖਟ੍ਠੇਨ ਸਦ੍ਧਿਨ੍ਦ੍ਰਿਯਂ ਤਦਾ ਸਮੁਦਾਗਤਂ. ਪਗ੍ਗਹਟ੍ਠੇਨ ਵੀਰਿਯਿਨ੍ਦ੍ਰਿਯਂ ਤਦਾ ਸਮੁਦਾਗਤਂ. ਉਪਟ੍ਠਾਨਟ੍ਠੇਨ ਸਤਿਨ੍ਦ੍ਰਿਯਂ ਤਦਾ ਸਮੁਦਾਗਤਂ. ਅਵਿਕ੍ਖੇਪਟ੍ਠੇਨ ਸਮਾਧਿਨ੍ਦ੍ਰਿਯਂ ਤਦਾ ਸਮੁਦਾਗਤਂ. ਦਸ੍ਸਨਟ੍ਠੇਨ ਪਞ੍ਞਿਨ੍ਦ੍ਰਿਯਂ ਤਦਾ ਸਮੁਦਾਗਤਂ.

ਆਧਿਪਤੇਯ੍ਯਟ੍ਠੇਨ ਇਨ੍ਦ੍ਰਿਯਾ ਤਦਾ ਸਮੁਦਾਗਤਾ. ਅਕਮ੍ਪਿਯਟ੍ਠੇਨ ਬਲਾ ਤਦਾ ਸਮੁਦਾਗਤਾ. ਨਿਯ੍ਯਾਨਟ੍ਠੇਨ ਸਮ੍ਬੋਜ੍ਝਙ੍ਗਾ ਤਦਾ ਸਮੁਦਾਗਤਾ. ਹੇਤੁਟ੍ਠੇਨ ਮਗ੍ਗੋ ਤਦਾ ਸਮੁਦਾਗਤੋ. ਉਪਟ੍ਠਾਨਟ੍ਠੇਨ ਸਤਿਪਟ੍ਠਾਨਾ ਤਦਾ ਸਮੁਦਾਗਤਾ. ਪਦਹਨਟ੍ਠੇਨ ਸਮ੍ਮਪ੍ਪਧਾਨਾ ਤਦਾ ਸਮੁਦਾਗਤਾ. ਇਜ੍ਝਨਟ੍ਠੇਨ ਇਦ੍ਧਿਪਾਦਾ ਤਦਾ ਸਮੁਦਾਗਤਾ. ਤਥਟ੍ਠੇਨ ਸਚ੍ਚਾ ਤਦਾ ਸਮੁਦਾਗਤਾ. ਅਵਿਕ੍ਖੇਪਟ੍ਠੇਨ ਸਮਥੋ ਤਦਾ ਸਮੁਦਾਗਤੋ. ਅਨੁਪਸ੍ਸਨਟ੍ਠੇਨ ਵਿਪਸ੍ਸਨਾ ਤਦਾ ਸਮੁਦਾਗਤਾ. ਏਕਰਸਟ੍ਠੇਨ ਸਮਥਵਿਪਸ੍ਸਨਾ ਤਦਾ ਸਮੁਦਾਗਤਾ. ਅਨਤਿਵਤ੍ਤਨਟ੍ਠੇਨ ਯੁਗਨਦ੍ਧਂ ਤਦਾ ਸਮੁਦਾਗਤਂ. ਸਂਵਰਟ੍ਠੇਨ ਸੀਲਵਿਸੁਦ੍ਧਿ ਤਦਾ ਸਮੁਦਾਗਤਾ. ਅਵਿਕ੍ਖੇਪਟ੍ਠੇਨ ਚਿਤ੍ਤਵਿਸੁਦ੍ਧਿ ਤਦਾ ਸਮੁਦਾਗਤਾ. ਦਸ੍ਸਨਟ੍ਠੇਨ ਦਿਟ੍ਠਿਵਿਸੁਦ੍ਧਿ ਤਦਾ ਸਮੁਦਾਗਤਾ. ਵਿਮੁਤ੍ਤਟ੍ਠੇਨ ਵਿਮੋਕ੍ਖੋ ਤਦਾ ਸਮੁਦਾਗਤੋ. ਪਟਿਵੇਧਟ੍ਠੇਨ ਵਿਜ੍ਜਾ ਤਦਾ ਸਮੁਦਾਗਤਾ. ਪਰਿਚ੍ਚਾਗਟ੍ਠੇਨ ਵਿਮੁਤ੍ਤਿ ਤਦਾ ਸਮੁਦਾਗਤਾ. ਸਮੁਚ੍ਛੇਦਟ੍ਠੇਨ ਖਯੇ ਞਾਣਂ ਤਦਾ ਸਮੁਦਾਗਤਂ.

ਛਨ੍ਦੋ ਮੂਲਟ੍ਠੇਨ ਤਦਾ ਸਮੁਦਾਗਤੋ. ਮਨਸਿਕਾਰੋ ਸਮੁਟ੍ਠਾਨਟ੍ਠੇਨ ਤਦਾ ਸਮੁਦਾਗਤੋ. ਫਸ੍ਸੋ ਸਮੋਧਾਨਟ੍ਠੇਨ ਤਦਾ ਸਮੁਦਾਗਤੋ. ਵੇਦਨਾ ਸਮੋਸਰਣਟ੍ਠੇਨ ਤਦਾ ਸਮੁਦਾਗਤਾ. ਸਮਾਧਿ ਪਮੁਖਟ੍ਠੇਨ ਤਦਾ ਸਮੁਦਾਗਤੋ. ਸਤਿ ਆਧਿਪਤੇਯ੍ਯਟ੍ਠੇਨ ਤਦਾ ਸਮੁਦਾਗਤਾ. ਪਞ੍ਞਾ ਤਦੁਤ੍ਤਰਟ੍ਠੇਨ ਤਦਾ ਸਮੁਦਾਗਤਾ. ਵਿਮੁਤ੍ਤਿ ਸਾਰਟ੍ਠੇਨ ਤਦਾ ਸਮੁਦਾਗਤਾ. ਅਮਤੋਗਧਂ ਨਿਬ੍ਬਾਨਂ ਪਰਿਯੋਸਾਨਟ੍ਠੇਨ ਤਦਾ ਸਮੁਦਾਗਤਂ. ਵੁਟ੍ਠਹਿਤ੍ਵਾ ਪਚ੍ਚਵੇਕ੍ਖਤਿ, ਇਮੇ ਧਮ੍ਮਾ ਤਦਾ ਸਮੁਦਾਗਤਾ.

ਸੋਤਾਪਤ੍ਤਿਫਲਕ੍ਖਣੇ ਦਸ੍ਸਨਟ੍ਠੇਨ ਸਮ੍ਮਾਦਿਟ੍ਠਿ ਤਦਾ ਸਮੁਦਾਗਤਾ. ਅਭਿਨਿਰੋਪਨਟ੍ਠੇਨ ਸਮ੍ਮਾਸਙ੍ਕਪ੍ਪੋ ਤਦਾ ਸਮੁਦਾਗਤੋ…ਪੇ… ਪਟਿਪ੍ਪਸ੍ਸਦ੍ਧਟ੍ਠੇਨ ਅਨੁਪ੍ਪਾਦੇ ਞਾਣਂ ਤਦਾ ਸਮੁਦਾਗਤਂ. ਛਨ੍ਦੋ ਮੂਲਟ੍ਠੇਨ ਤਦਾ ਸਮੁਦਾਗਤੋ. ਮਨਸਿਕਾਰੋ ਸਮੁਟ੍ਠਾਨਟ੍ਠੇਨ ਤਦਾ ਸਮੁਦਾਗਤੋ. ਫਸ੍ਸੋ ਸਮੋਧਾਨਟ੍ਠੇਨ ਤਦਾ ਸਮੁਦਾਗਤੋ. ਵੇਦਨਾ ਸਮੋਸਰਣਟ੍ਠੇਨ ਤਦਾ ਸਮੁਦਾਗਤਾ. ਸਮਾਧਿ ਪਮੁਖਟ੍ਠੇਨ ਤਦਾ ਸਮੁਦਾਗਤੋ. ਸਤਿ ਆਧਿਪਤੇਯ੍ਯਟ੍ਠੇਨ ਤਦਾ ਸਮੁਦਾਗਤਾ. ਪਞ੍ਞਾ ਤਦੁਤ੍ਤਰਟ੍ਠੇਨ ਤਦਾ ਸਮੁਦਾਗਤਾ. ਵਿਮੁਤ੍ਤਿ ਸਾਰਟ੍ਠੇਨ ਤਦਾ ਸਮੁਦਾਗਤਾ. ਅਮਤੋਗਧਂ ਨਿਬ੍ਬਾਨਂ ਪਰਿਯੋਸਾਨਟ੍ਠੇਨ ਤਦਾ ਸਮੁਦਾਗਤਂ. ਵੁਟ੍ਠਹਿਤ੍ਵਾ ਪਚ੍ਚਵੇਕ੍ਖਤਿ, ਇਮੇ ਧਮ੍ਮਾ ਤਦਾ ਸਮੁਦਾਗਤਾ.

ਸਕਦਾਗਾਮਿਮਗ੍ਗਕ੍ਖਣੇ…ਪੇ… ਸਕਦਾਗਾਮਿਫਲਕ੍ਖਣੇ…ਪੇ… ਅਨਾਗਾਮਿਮਗ੍ਗਕ੍ਖਣੇ…ਪੇ… ਅਨਾਗਾਮਿਫਲਕ੍ਖਣੇ…ਪੇ… ਅਰਹਤ੍ਤਮਗ੍ਗਕ੍ਖਣੇ ਦਸ੍ਸਨਟ੍ਠੇਨ ਸਮ੍ਮਾਦਿਟ੍ਠਿ ਤਦਾ ਸਮੁਦਾਗਤਾ…ਪੇ… ਸਮੁਚ੍ਛੇਦਟ੍ਠੇਨ ਖਯੇ ਞਾਣਂ ਤਦਾ ਸਮੁਦਾਗਤਂ. ਛਨ੍ਦੋ ਮੂਲਟ੍ਠੇਨ ਤਦਾ ਸਮੁਦਾਗਤੋ…ਪੇ… ਅਮਤੋਗਧਂ ਨਿਬ੍ਬਾਨਂ ਪਰਿਯੋਸਾਨਟ੍ਠੇਨ ਤਦਾ ਸਮੁਦਾਗਤਂ. ਵੁਟ੍ਠਹਿਤ੍ਵਾ ਪਚ੍ਚਵੇਕ੍ਖਤਿ, ਇਮੇ ਧਮ੍ਮਾ ਤਦਾ ਸਮੁਦਾਗਤਾ.

ਅਰਹਤ੍ਤਫਲਕ੍ਖਣੇ ਦਸ੍ਸਨਟ੍ਠੇਨ ਸਮ੍ਮਾਦਿਟ੍ਠਿ ਤਦਾ ਸਮੁਦਾਗਤਾ …ਪੇ… ਪਟਿਪ੍ਪਸ੍ਸਦ੍ਧਟ੍ਠੇਨ ਅਨੁਪ੍ਪਾਦੇ ਞਾਣਂ ਤਦਾ ਸਮੁਦਾਗਤਂ. ਛਨ੍ਦੋ ਮੂਲਟ੍ਠੇਨ ਤਦਾ ਸਮੁਦਾਗਤੋ …ਪੇ… ਅਮਤੋਗਧਂ ਨਿਬ੍ਬਾਨਂ ਪਰਿਯੋਸਾਨਟ੍ਠੇਨ ਤਦਾ ਸਮੁਦਾਗਤਂ. ਵੁਟ੍ਠਹਿਤ੍ਵਾ ਪਚ੍ਚਵੇਕ੍ਖਤਿ, ਇਮੇ ਧਮ੍ਮਾ ਤਦਾ ਸਮੁਦਾਗਤਾ. ਤਂ ਞਾਤਟ੍ਠੇਨ ਞਾਣਂ, ਪਜਾਨਨਟ੍ਠੇਨ ਪਞ੍ਞਾ. ਤੇਨ ਵੁਚ੍ਚਤਿ – ‘‘ਤਦਾ ਸਮੁਦਾਗਤੇ ਧਮ੍ਮੇ ਪਸ੍ਸਨੇ ਪਞ੍ਞਾ ਪਚ੍ਚਵੇਕ੍ਖਣੇ ਞਾਣਂ’’.

ਪਚ੍ਚਵੇਕ੍ਖਣਞਾਣਨਿਦ੍ਦੇਸੋ ਚੁਦ੍ਦਸਮੋ.