੧੩. ਵਿਮੁਤ੍ਤਿਞਾਣਨਿਦ੍ਦੇਸੋ

੬੪. ਕਥਂ ਛਿਨ੍ਨਵਟੁਮਾਨੁਪਸ੍ਸਨੇ ਪਞ੍ਞਾ ਵਿਮੁਤ੍ਤਿਞਾਣਂ? ਸੋਤਾਪਤ੍ਤਿਮਗ੍ਗੇਨ ਸਕ੍ਕਾਯਦਿਟ੍ਠਿ, ਵਿਚਿਕਿਚ੍ਛਾ, ਸੀਲਬ੍ਬਤਪਰਾਮਾਸੋ, ਦਿਟ੍ਠਾਨੁਸਯੋ, ਵਿਚਿਕਿਚ੍ਛਾਨੁਸਯੋ ਅਤ੍ਤਨੋ ਚਿਤ੍ਤਸ੍ਸ ਉਪਕ੍ਕਿਲੇਸਾ ਸਮ੍ਮਾ ਸਮੁਚ੍ਛਿਨ੍ਨਾ ਹੋਨ੍ਤਿ. ਇਮੇਹਿ ਪਞ੍ਚਹਿ ਉਪਕ੍ਕਿਲੇਸੇਹਿ ਸਪਰਿਯੁਟ੍ਠਾਨੇਹਿ ਚਿਤ੍ਤਂ ਵਿਮੁਤ੍ਤਂ ਹੋਤਿ ਸੁਵਿਮੁਤ੍ਤਂ. ਤਂਵਿਮੁਤ੍ਤਿ ਞਾਤਟ੍ਠੇਨ ਞਾਣਂ, ਪਜਾਨਨਟ੍ਠੇਨ ਪਞ੍ਞਾ. ਤੇਨ ਵੁਚ੍ਚਤਿ – ‘‘ਛਿਨ੍ਨਵਟੁਮਾਨੁਪਸ੍ਸਨੇ ਪਞ੍ਞਾ ਵਿਮੁਤ੍ਤਿਞਾਣਂ’’.

ਸਕਦਾਗਾਮਿਮਗ੍ਗੇਨ ਓਲ਼ਾਰਿਕਂ ਕਾਮਰਾਗਸਞ੍ਞੋਜਨਂ, ਪਟਿਘਸਞ੍ਞੋਜਨਂ, ਓਲ਼ਾਰਿਕੋ ਕਾਮਰਾਗਾਨੁਸਯੋ, ਪਟਿਘਾਨੁਸਯੋ – ਅਤ੍ਤਨੋ ਚਿਤ੍ਤਸ੍ਸ ਉਪਕ੍ਕਿਲੇਸਾ ਸਮ੍ਮਾ ਸਮੁਚ੍ਛਿਨ੍ਨਾ ਹੋਨ੍ਤਿ. ਇਮੇਹਿ ਚਤੂਹਿ ਉਪਕ੍ਕਿਲੇਸੇਹਿ ਸਪਰਿਯੁਟ੍ਠਾਨੇਹਿ ਚਿਤ੍ਤਂ ਵਿਮੁਤ੍ਤਂ ਹੋਤਿ ਸੁਵਿਮੁਤ੍ਤਂ. ਤਂਵਿਮੁਤ੍ਤਿ ਞਾਤਟ੍ਠੇਨ ਞਾਣਂ, ਪਜਾਨਨਟ੍ਠੇਨ ਪਞ੍ਞਾ. ਤੇਨ ਵੁਚ੍ਚਤਿ – ‘‘ਛਿਨ੍ਨਵਟੁਮਾਨੁਪਸ੍ਸਨੇ ਪਞ੍ਞਾ ਵਿਮੁਤ੍ਤਿਞਾਣਂ’’.

ਅਨਾਗਾਮਿਮਗ੍ਗੇਨ ਅਨੁਸਹਗਤਂ ਕਾਮਰਾਗਸਞ੍ਞੋਜਨਂ, ਪਟਿਘਸਞ੍ਞੋਜਨਂ, ਅਨੁਸਹਗਤੋ ਕਾਮਰਾਗਾਨੁਸਯੋ, ਪਟਿਘਾਨੁਸਯੋ – ਅਤ੍ਤਨੋ ਚਿਤ੍ਤਸ੍ਸ ਉਪਕ੍ਕਿਲੇਸਾ ਸਮ੍ਮਾ ਸਮੁਚ੍ਛਿਨ੍ਨਾ ਹੋਨ੍ਤਿ. ਇਮੇਹਿ ਚਤੂਹਿ ਉਪਕ੍ਕਿਲੇਸੇਹਿ ਸਪਰਿਯੁਟ੍ਠਾਨੇਹਿ ਚਿਤ੍ਤਂ ਵਿਮੁਤ੍ਤਂ ਹੋਤਿ ਸੁਵਿਮੁਤ੍ਤਂ. ਤਂਵਿਮੁਤ੍ਤਿ ਞਾਤਟ੍ਠੇਨ ਞਾਣਂ, ਪਜਾਨਨਟ੍ਠੇਨ ਪਞ੍ਞਾ. ਤੇਨ ਵੁਚ੍ਚਤਿ – ‘‘ਛਿਨ੍ਨਵਟੁਮਾਨੁਪਸ੍ਸਨੇ ਪਞ੍ਞਾ ਵਿਮੁਤ੍ਤਿਞਾਣਂ’’.

ਅਰਹਤ੍ਤਮਗ੍ਗੇਨ ਰੂਪਰਾਗੋ, ਅਰੂਪਰਾਗੋ, ਮਾਨੋ, ਉਦ੍ਧਚ੍ਚਂ, ਅਵਿਜ੍ਜਾ, ਮਾਨਾਨੁਸਯੋ, ਭਵਰਾਗਾਨੁਸਯੋ, ਅਵਿਜ੍ਜਾਨੁਸਯੋ – ਅਤ੍ਤਨੋ ਚਿਤ੍ਤਸ੍ਸ ਉਪਕ੍ਕਿਲੇਸਾ ਸਮ੍ਮਾ ਸਮੁਚ੍ਛਿਨ੍ਨਾ ਹੋਨ੍ਤਿ. ਇਮੇਹਿ ਅਟ੍ਠਹਿ ਉਪਕ੍ਕਿਲੇਸੇਹਿ ਸਪਰਿਯੁਟ੍ਠਾਨੇਹਿ ਚਿਤ੍ਤਂ ਵਿਮੁਤ੍ਤਂ ਹੋਤਿ ਸੁਵਿਮੁਤ੍ਤਂ. ਤਂਵਿਮੁਤ੍ਤਿ ਞਾਤਟ੍ਠੇਨ ਞਾਣਂ, ਪਜਾਨਨਟ੍ਠੇਨ ਪਞ੍ਞਾ. ਤੇਨ ਵੁਚ੍ਚਤਿ – ‘‘ਛਿਨ੍ਨਵਟੁਮਾਨੁਪਸ੍ਸਨੇ ਪਞ੍ਞਾ ਵਿਮੁਤ੍ਤਿਞਾਣਂ’’. ਤਂ ਞਾਤਟ੍ਠੇਨ ਞਾਣਂ, ਪਜਾਨਨਟ੍ਠੇਨ ਪਞ੍ਞਾ. ਤੇਨ ਵੁਚ੍ਚਤਿ – ‘‘ਛਿਨ੍ਨਵਟੁਮਾਨੁਪਸ੍ਸਨੇ ਪਞ੍ਞਾ ਵਿਮੁਤ੍ਤਿਞਾਣਂ’’.

ਵਿਮੁਤ੍ਤਿਞਾਣਨਿਦ੍ਦੇਸੋ ਤੇਰਸਮੋ.