੧੦. ਵੇਵਚਨਹਾਰਸਮ੍ਪਾਤੋ

੭੨. ਤਤ੍ਥ ਕਤਮੋ ਵੇਵਚਨੋ ਹਾਰਸਮ੍ਪਾਤੋ?

‘‘ਤਸ੍ਮਾ ਰਕ੍ਖਿਤਚਿਤ੍ਤਸ੍ਸ, ਸਮ੍ਮਾਸਙ੍ਕਪ੍ਪਗੋਚਰੋ’’ਤਿ ਗਾਥਾ. ‘‘ਤਸ੍ਮਾ ਰਕ੍ਖਿਤਚਿਤ੍ਤਸ੍ਸਾ’’ਤਿ ਚਿਤ੍ਤਂ ਮਨੋ ਵਿਞ੍ਞਾਣਂ ਮਨਿਨ੍ਦ੍ਰਿਯਂ ਮਨਾਯਤਨਂ ਵਿਜਾਨਨਾ ਵਿਜਾਨਿਤਤ੍ਤਂ, ਇਦਂ ਵੇਵਚਨਂ. ‘‘ਸਮ੍ਮਾਸਙ੍ਕਪ੍ਪਗੋਚਰੋ’’ਤਿ ਨੇਕ੍ਖਮ੍ਮਸਙ੍ਕਪ੍ਪੋ ਅਬ੍ਯਾਪਾਦਸਙ੍ਕਪ੍ਪੋ ਅਵਿਹਿਂਸਾਸਙ੍ਕਪ੍ਪੋ, ਇਦਂ ਵੇਵਚਨਂ. ‘‘ਸਮ੍ਮਾਦਿਟ੍ਠਿਪੁਰੇਕ੍ਖਾਰੋ’’ਤਿ ਸਮ੍ਮਾਦਿਟ੍ਠਿ ਨਾਮ ਪਞ੍ਞਾਸਤ੍ਥਂ ਪਞ੍ਞਾਖਗ੍ਗੋ ਪਞ੍ਞਾਰਤਨਂ ਪਞ੍ਞਾਪਜ੍ਜੋਤੋ ਪਞ੍ਞਾਪਤੋਦੋ ਪਞ੍ਞਾਪਾਸਾਦੋ, ਇਦਂ ਵੇਵਚਨਂ.

ਨਿਯੁਤ੍ਤੋ ਵੇਵਚਨੋ ਹਾਰਸਮ੍ਪਾਤੋ.