੨. ਵਿਚਯਹਾਰਸਮ੍ਪਾਤੋ

੫੩. ਤਤ੍ਥ ਕਤਮੋ ਵਿਚਯੋ ਹਾਰਸਮ੍ਪਾਤੋ? ਤਤ੍ਥ ਤਣ੍ਹਾ ਦੁਵਿਧਾ ਕੁਸਲਾਪਿ ਅਕੁਸਲਾਪਿ. ਅਕੁਸਲਾ ਸਂਸਾਰਗਾਮਿਨੀ, ਕੁਸਲਾ ਅਪਚਯਗਾਮਿਨੀ ਪਹਾਨਤਣ੍ਹਾ. ਮਾਨੋਪਿ ਦੁਵਿਧੋ ਕੁਸਲੋਪਿ ਅਕੁਸਲੋਪਿ. ਯਂ ਮਾਨਂ ਨਿਸ੍ਸਾਯ ਮਾਨਂ ਪਜਹਤਿ, ਅਯਂ ਮਾਨੋ ਕੁਸਲੋ. ਯੋ ਪਨ ਮਾਨੋ ਦੁਕ੍ਖਂ ਨਿਬ੍ਬਤ੍ਤਯਤਿ, ਅਯਂ ਮਾਨੋ ਅਕੁਸਲੋ. ਤਤ੍ਥ ਯਂ ਨੇਕ੍ਖਮ੍ਮਸਿਤਂ ਦੋਮਨਸ੍ਸਂ ਕੁਦਾਸ੍ਸੁਨਾਮਾਹਂ ਤਂ ਆਯਤਨਂ ਸਚ੍ਛਿਕਤ੍ਵਾ ਉਪਸਮ੍ਪਜ੍ਜ ਵਿਹਰਿਸ੍ਸਂ ਯਂ ਅਰਿਯਾ ਸਨ੍ਤਂ ਆਯਤਨਂ ਸਚ੍ਛਿਕਤ੍ਵਾ ਉਪਸਮ੍ਪਜ੍ਜ ਵਿਹਰਨ੍ਤੀਤਿ ਤਸ੍ਸ ਉਪ੍ਪਜ੍ਜਤਿ ਪਿਹਾ, ਪਿਹਾਪਚ੍ਚਯਾ ਦੋਮਨਸ੍ਸਂ, ਅਯਂ ਤਣ੍ਹਾ ਕੁਸਲਾ ਰਾਗਵਿਰਾਗਾ ਚੇਤੋਵਿਮੁਤ੍ਤਿ, ਤਦਾਰਮ੍ਮਣਾ ਕੁਸਲਾ ਅਵਿਜ੍ਜਾਵਿਰਾਗਾ ਪਞ੍ਞਾਵਿਮੁਤ੍ਤਿ.

ਤਸ੍ਸਾ ਕੋ ਪਵਿਚਯੋ? ਅਟ੍ਠ ਮਗ੍ਗਙ੍ਗਾਨਿ ਸਮ੍ਮਾਦਿਟ੍ਠਿ ਸਮ੍ਮਾਸਙ੍ਕਪ੍ਪੋ ਸਮ੍ਮਾਵਾਚਾ ਸਮ੍ਮਾਕਮ੍ਮਨ੍ਤੋ ਸਮ੍ਮਾਆਜੀਵੋ ਸਮ੍ਮਾਵਾਯਾਮੋ ਸਮ੍ਮਾਸਤਿ ਸਮ੍ਮਾਸਮਾਧਿ. ਸੋ ਕਤ੍ਥ ਦਟ੍ਠਬ੍ਬੋ? ਚਤੁਤ੍ਥੇ ਝਾਨੇ ਪਾਰਮਿਤਾਯ. ਚਤੁਤ੍ਥੇ ਹਿ ਝਾਨੇ ਅਟ੍ਠਙ੍ਗਸਮਨ੍ਨਾਗਤਂ ਚਿਤ੍ਤਂ ਭਾਵਯਤਿ ਪਰਿਸੁਦ੍ਧਂ ਪਰਿਯੋਦਾਤਂ ਅਨਙ੍ਗਣਂ ਵਿਗਤੂਪਕ੍ਕਿਲੇਸਂ ਮੁਦੁ ਕਮ੍ਮਨਿਯਂ ਠਿਤਂ ਆਨੇਞ੍ਜਪ੍ਪਤ੍ਤਂ. ਸੋ ਤਤ੍ਥ ਅਟ੍ਠਵਿਧਂ ਅਧਿਗਚ੍ਛਤਿ ਛ ਅਭਿਞ੍ਞਾ ਦ੍ਵੇ ਚ ਵਿਸੇਸੇ, ਤਂ ਚਿਤ੍ਤਂ ਯਤੋ ਪਰਿਸੁਦ੍ਧਂ, ਤਤੋ ਪਰਿਯੋਦਾਤਂ, ਯਤੋ ਪਰਿਯੋਦਾਤਂ, ਤਤੋ ਅਨਙ੍ਗਣਂ, ਯਤੋ ਅਨਙ੍ਗਣਂ, ਤਤੋ ਵਿਗਤੂਪਕ੍ਕਿਲੇਸਂ, ਯਤੋ ਵਿਗਤੂਪਕ੍ਕਿਲੇਸਂ, ਤਤੋ ਮੁਦੁ, ਯਤੋ ਮੁਦੁ, ਤਤੋ ਕਮ੍ਮਨਿਯਂ, ਯਤੋ ਕਮ੍ਮਨਿਯਂ, ਤਤੋ ਠਿਤਂ, ਯਤੋ ਠਿਤਂ, ਤਤੋ ਆਨੇਞ੍ਜਪ੍ਪਤ੍ਤਂ. ਤਤ੍ਥ ਅਙ੍ਗਣਾ ਚ ਉਪਕ੍ਕਿਲੇਸਾ ਚ ਤਦੁਭਯਂ ਤਣ੍ਹਾਪਕ੍ਖੋ. ਯਾ ਚ ਇਞ੍ਜਨਾ ਯਾ ਚ ਚਿਤ੍ਤਸ੍ਸ ਅਟ੍ਠਿਤਿ, ਅਯਂ ਦਿਟ੍ਠਿਪਕ੍ਖੋ.

ਚਤ੍ਤਾਰਿ ਇਨ੍ਦ੍ਰਿਯਾਨਿ ਦੁਕ੍ਖਿਨ੍ਦ੍ਰਿਯਂ ਦੋਮਨਸ੍ਸਿਨ੍ਦ੍ਰਿਯਂ ਸੁਖਿਨ੍ਦ੍ਰਿਯਂ ਸੋਮਨਸ੍ਸਿਨ੍ਦ੍ਰਿਯਞ੍ਚ ਚਤੁਤ੍ਥਜ੍ਝਾਨੇ ਨਿਰੁਜ੍ਝਨ੍ਤਿ, ਤਸ੍ਸ ਉਪੇਕ੍ਖਿਨ੍ਦ੍ਰਿਯਂ ਅਵਸਿਟ੍ਠਂ ਭਵਤਿ. ਸੋ ਉਪਰਿਮਂ ਸਮਾਪਤ੍ਤਿਂ ਸਨ੍ਤਤੋ ਮਨਸਿਕਰੋਤਿ, ਤਸ੍ਸ ਉਪਰਿਮਂ ਸਮਾਪਤ੍ਤਿਂ ਸਨ੍ਤਤੋ ਮਨਸਿਕਰੋਤੋ ਚਤੁਤ੍ਥਜ੍ਝਾਨੇ ਓਲ਼ਾਰਿਕਾ ਸਞ੍ਞਾ ਸਣ੍ਠਹਤਿ ਉਕ੍ਕਣ੍ਠਾ ਚ ਪਟਿਘਸਞ੍ਞਾ, ਸੋ ਸਬ੍ਬਸੋ ਰੂਪਸਞ੍ਞਾਨਂ ਸਮਤਿਕ੍ਕਮਾ ਪਟਿਘਸਞ੍ਞਾਨਂ ਅਤ੍ਥਙ੍ਗਮਾ ਨਾਨਤ੍ਤਸਞ੍ਞਾਨਂ ਅਮਨਸਿਕਾਰਾ ‘‘ਅਨਨ੍ਤਂ ਆਕਾਸ’’ਨ੍ਤਿ ਆਕਾਸਾਨਞ੍ਚਾਯਤਨਸਮਾਪਤ੍ਤਿਂ ਸਚ੍ਛਿਕਤ੍ਵਾ ਉਪਸਮ੍ਪਜ੍ਜ ਵਿਹਰਤਿ. ਅਭਿਞ੍ਞਾਭਿਨੀਹਾਰੋ ਰੂਪਸਞ੍ਞਾ ਵੋਕਾਰੋ ਨਾਨਤ੍ਤਸਞ੍ਞਾ ਸਮਤਿਕ੍ਕਮਤਿ ਪਟਿਘਸਞ੍ਞਾ ਚਸ੍ਸ ਅਬ੍ਭਤ੍ਥਂ ਗਚ੍ਛਤਿ, ਏਵਂ ਸਮਾਧਿ ਤਸ੍ਸ ਸਮਾਹਿਤਸ੍ਸ ਓਭਾਸੋ ਅਨ੍ਤਰਧਾਯਤਿ ਦਸ੍ਸਨਞ੍ਚ ਰੂਪਾਨਂ, ਸੋ ਸਮਾਧਿ ਛਲ਼ਙ੍ਗਸਮਨ੍ਨਾਗਤੋ ਪਚ੍ਚਵੇਕ੍ਖਿਤਬ੍ਬੋ. ਅਨਭਿਜ੍ਝਾਸਹਗਤਂ ਮੇ ਮਾਨਸਂ ਸਬ੍ਬਲੋਕੇ, ਅਬ੍ਯਾਪਨ੍ਨਂ ਮੇ ਚਿਤ੍ਤਂ ਸਬ੍ਬਸਤ੍ਤੇਸੁ, ਆਰਦ੍ਧਂ ਮੇ ਵੀਰਿਯਂ ਪਗ੍ਗਹਿਤਂ, ਪਸ੍ਸਦ੍ਧੋ ਮੇ ਕਾਯੋ ਅਸਾਰਦ੍ਧੋ, ਸਮਾਹਿਤਂ ਮੇ ਚਿਤ੍ਤਂ ਅਵਿਕ੍ਖਿਤ੍ਤਂ, ਉਪਟ੍ਠਿਤਾ ਮੇ ਸਤਿ ਅਸਮ੍ਮੁਟ੍ਠਾ [ਅਪ੍ਪਮ੍ਮੁਟ੍ਠਾ (ਸੀ.)], ਤਤ੍ਥ ਯਞ੍ਚ ਅਨਭਿਜ੍ਝਾਸਹਗਤਂ ਮਾਨਸਂ ਸਬ੍ਬਲੋਕੇ ਯਞ੍ਚ ਅਬ੍ਯਾਪਨ੍ਨਂ ਚਿਤ੍ਤਂ ਸਬ੍ਬਸਤ੍ਤੇਸੁ ਯਞ੍ਚ ਆਰਦ੍ਧਂ ਵੀਰਿਯਂ ਪਗ੍ਗਹਿਤਂ ਯਞ੍ਚ ਸਮਾਹਿਤਂ ਚਿਤ੍ਤਂ ਅਵਿਕ੍ਖਿਤ੍ਤਂ, ਅਯਂ ਸਮਥੋ. ਯੋ ਪਸ੍ਸਦ੍ਧੋ ਕਾਯੋ ਅਸਾਰਦ੍ਧੋ, ਅਯਂ ਸਮਾਧਿਪਰਿਕ੍ਖਾਰੋ. ਯਾ ਉਪਟ੍ਠਿਤਾ ਸਤਿ ਅਸਮ੍ਮੁਟ੍ਠਾ ਅਯਂ ਵਿਪਸ੍ਸਨਾ.

੫੪. ਸੋ ਸਮਾਧਿ ਪਞ੍ਚਵਿਧੇਨ ਵੇਦਿਤਬ੍ਬੋ. ਅਯਂ ਸਮਾਧਿ ‘‘ਪਚ੍ਚੁਪ੍ਪਨ੍ਨਸੁਖੋ’’ਤਿ ਇਤਿਸ੍ਸ ਪਚ੍ਚਤ੍ਤਮੇਵ ਞਾਣਦਸ੍ਸਨਂ ਪਚ੍ਚੁਪਟ੍ਠਿਤਂ ਭਵਤਿ, ਅਯਂ ਸਮਾਧਿ ‘‘ਆਯਤਿਂ ਸੁਖਵਿਪਾਕੋ’’ਤਿ ਇਤਿਸ੍ਸ ਪਚ੍ਚਤ੍ਤਮੇਵ ਞਾਣਦਸ੍ਸਨਂ ਪਚ੍ਚੁਪਟ੍ਠਿਤਂ ਭਵਤਿ, ਅਯਂ ਸਮਾਧਿ ‘‘ਅਰਿਯੋ ਨਿਰਾਮਿਸੋ’’ਤਿ ਇਤਿਸ੍ਸ ਪਚ੍ਚਤ੍ਤਮੇਵ ਞਾਣਦਸ੍ਸਨਂ ਪਚ੍ਚੁਪਟ੍ਠਿਤਂ ਭਵਤਿ, ਅਯਂ ਸਮਾਧਿ ‘‘ਅਕਾਪੁਰਿਸਸੇਵਿਤੋ’’ਤਿ ਇਤਿਸ੍ਸ ਪਚ੍ਚਤ੍ਤਮੇਵ ਞਾਣਦਸ੍ਸਨਂ ਪਚ੍ਚੁਪਟ੍ਠਿਤਂ ਭਵਤਿ, ਅਯਂ ਸਮਾਧਿ ‘‘ਸਨ੍ਤੋ ਚੇਵ ਪਣੀਤੋ ਚ ਪਟਿਪ੍ਪਸ੍ਸਦ੍ਧਿਲਦ੍ਧੋ ਚ ਏਕੋਦਿਭਾਵਾਧਿਗਤੋ ਚ ਨ ਸਸਙ੍ਖਾਰਨਿਗ੍ਗਯ੍ਹਵਾਰਿਤਗਤੋ [ਸਸਙ੍ਖਾਰਨਿਗ੍ਗਯ੍ਹਵਾਰਿਤਵਤੋ (ਸੀ.), ਸਸਙ੍ਖਾਰਨਿਗ੍ਗਯ੍ਹਵਾਰਿਵਾਵਟੋ (ਕ.)] ਚਾ’’ਤਿ ਇਤਿਸ੍ਸ ਪਚ੍ਚਤ੍ਤਮੇਵ ਞਾਣਦਸ੍ਸਨਂ ਪਚ੍ਚੁਪਟ੍ਠਿਤਂ ਭਵਤਿ. ਤਂ ਖੋ ਪਨਿਮਂ ਸਮਾਧਿਂ ‘‘ਸਤੋ ਸਮਾਪਜ੍ਜਾਮਿ ਸਤੋ ਵੁਟ੍ਠਹਾਮੀ’’ਤਿ ਇਤਿਸ੍ਸ ਪਚ੍ਚਤ੍ਤਮੇਵ ਞਾਣਦਸ੍ਸਨਂ ਪਚ੍ਚੁਪਟ੍ਠਿਤਂ ਭਵਤਿ. ਤਤ੍ਥ ਯੋ ਚ ਸਮਾਧਿ ਪਚ੍ਚੁਪ੍ਪਨ੍ਨਸੁਖੋ ਯੋ ਚ ਸਮਾਧਿ ਆਯਤਿਂ ਸੁਖਵਿਪਾਕੋ ਅਯਂ ਸਮਥੋ. ਯੋ ਚ ਸਮਾਧਿ ਅਰਿਯੋ ਨਿਰਾਮਿਸੋ, ਯੋ ਚ ਸਮਾਧਿ ਅਕਾਪੁਰਿਸਸੇਵਿਤੋ, ਯੋ ਚ ਸਮਾਧਿ ਸਨ੍ਤੋ ਚੇਵ ਪਣੀਤੋ ਪਟਿਪ੍ਪਸ੍ਸਦ੍ਧਿਲਦ੍ਧੋ ਚ ਏਕੋਦਿਭਾਵਾਧਿਗਤੋ ਚ ਨ ਸਸਙ੍ਖਾਰਨਿਗ੍ਗਯ੍ਹਵਾਰਿਤਗਤੋ ਚ ਯਞ੍ਚਾਹਂ ਤਂ ਖੋ ਪਨਿਮਂ ਸਮਾਧਿਂ ਸਤੋ ਸਮਾਪਜ੍ਜਾਮਿ ਸਤੋ ਵੁਟ੍ਠਹਾਮੀਤਿ, ਅਯਂ ਵਿਪਸ੍ਸਨਾ.

ਸੋ ਸਮਾਧਿ ਪਞ੍ਚਵਿਧੇਨ ਵੇਦਿਤਬ੍ਬੋ ਪੀਤਿਫਰਣਤਾ ਸੁਖਫਰਣਤਾ ਚੇਤੋਫਰਣਤਾ ਆਲੋਕਫਰਣਤਾ ਪਚ੍ਚਵੇਕ੍ਖਣਾਨਿਮਿਤ੍ਤਂ. ਤਤ੍ਥ ਯੋ ਚ ਪੀਤਿਫਰਣੋ ਯੋ ਚ ਸੁਖਫਰਣੋ ਯੋ ਚ ਚੇਤੋਫਰਣੋ, ਅਯਂ ਸਮਥੋ. ਯੋ ਚ ਆਲੋਕਫਰਣੋ ਯਞ੍ਚ ਪਚ੍ਚਵੇਕ੍ਖਣਾਨਿਮਿਤ੍ਤਂ. ਅਯਂ ਵਿਪਸ੍ਸਨਾ.

੫੫. ਦਸ ਕਸਿਣਾਯਤਨਾਨਿ ਪਥਵੀਕਸਿਣਂ ਆਪੋਕਸਿਣਂ ਤੇਜੋਕਸਿਣਂ ਵਾਯੋਕਸਿਣਂ ਨੀਲਕਸਿਣਂ ਪੀਤਕਸਿਣਂ ਲੋਹਿਤਕਸਿਣਂ ਓਦਾਤਕਸਿਣਂ ਆਕਾਸਕਸਿਣਂ ਵਿਞ੍ਞਾਣਕਸਿਣਂ. ਤਤ੍ਥ ਯਞ੍ਚ ਪਥਵੀਕਸਿਣਂ ਯਞ੍ਚ ਆਪੋਕਸਿਣਂ ਏਵਂ ਸਬ੍ਬਂ, ਯਞ੍ਚ ਓਦਾਤਕਸਿਣਂ. ਇਮਾਨਿ ਅਟ੍ਠ ਕਸਿਣਾਨਿ ਸਮਥੋ. ਯਞ੍ਚ ਆਕਾਸਕਸਿਣਂ ਯਞ੍ਚ ਵਿਞ੍ਞਾਣਕਸਿਣਂ, ਅਯਂ ਵਿਪਸ੍ਸਨਾ. ਏਵਂ ਸਬ੍ਬੋ ਅਰਿਯੋ ਮਗ੍ਗੋ ਯੇਨ ਯੇਨ ਆਕਾਰੇਨ ਵੁਤ੍ਤੋ, ਤੇਨ ਤੇਨ ਸਮਥਵਿਪਸ੍ਸਨੇਨ ਯੋਜਯਿਤਬ੍ਬੋ. ਤੇ ਤੀਹਿ ਧਮ੍ਮੇਹਿ ਸਙ੍ਗਹਿਤਾ ਅਨਿਚ੍ਚਤਾਯ ਦੁਕ੍ਖਤਾਯ ਅਨਤ੍ਤਤਾਯ. ਸੋ ਸਮਥਵਿਪਸ੍ਸਨਂ ਭਾਵਯਮਾਨੋ ਤੀਣਿ ਵਿਮੋਕ੍ਖਮੁਖਾਨਿ ਭਾਵਯਤਿ. ਤੀਣਿ ਵਿਮੋਕ੍ਖਮੁਖਾਨਿ ਭਾਵਯਨ੍ਤੋ ਤਯੋ ਖਨ੍ਧੇ ਭਾਵਯਤਿ. ਤਯੋ ਖਨ੍ਧੇ ਭਾਵਯਨ੍ਤੋ ਅਰਿਯਂ ਅਟ੍ਠਙ੍ਗਿਕਂ ਮਗ੍ਗਂ ਭਾਵਯਤਿ.

ਰਾਗਚਰਿਤੋ ਪੁਗ੍ਗਲੋ ਅਨਿਮਿਤ੍ਤੇਨ ਵਿਮੋਕ੍ਖਮੁਖੇਨ ਨਿਯ੍ਯਾਤਿ [ਨੀਯਾਤਿ (ਸੀ.)] ਅਧਿਚਿਤ੍ਤਸਿਕ੍ਖਾਯ ਸਿਕ੍ਖਨ੍ਤੋ ਲੋਭਂ ਅਕੁਸਲਮੂਲਂ ਪਜਹਨ੍ਤੋ ਸੁਖਵੇਦਨੀਯਂ ਫਸ੍ਸਂ ਅਨੁਪਗਚ੍ਛਨ੍ਤੋ ਸੁਖਂ ਵੇਦਨਂ ਪਰਿਜਾਨਨ੍ਤੋ ਰਾਗਮਲਂ ਪਵਾਹੇਨ੍ਤੋ ਰਾਗਰਜਂ ਨਿਦ੍ਧੁਨਨ੍ਤੋ ਰਾਗਵਿਸਂ ਵਮੇਨ੍ਤੋ ਰਾਗਗ੍ਗਿਂ ਨਿਬ੍ਬਾਪੇਨ੍ਤੋ ਰਾਗਸਲ੍ਲਂ ਉਪ੍ਪਾਟੇਨ੍ਤੋ ਰਾਗਜਟਂ ਵਿਜਟੇਨ੍ਤੋ. ਦੋਸਚਰਿਤੋ ਪੁਗ੍ਗਲੋ ਅਪ੍ਪਣਿਹਿਤੇਨ ਵਿਮੋਕ੍ਖਮੁਖੇਨ ਨਿਯ੍ਯਾਤਿ ਅਧਿਸੀਲਸਿਕ੍ਖਾਯ ਸਿਕ੍ਖਨ੍ਤੋ ਦੋਸਂ ਅਕੁਸਲਮੂਲਂ ਪਜਹਨ੍ਤੋ ਦੁਕ੍ਖਵੇਦਨੀਯਂ ਫਸ੍ਸਂ ਅਨੁਪਗਚ੍ਛਨ੍ਤੋ ਦੁਕ੍ਖਵੇਦਨਂ ਪਰਿਜਾਨਨ੍ਤੋ ਦੋਸਮਲਂ ਪਵਾਹੇਨ੍ਤੋ ਦੋਸਰਜਂ ਨਿਦ੍ਧੁਨਨ੍ਤੋ ਦੋਸਵਿਸਂ ਵਮੇਨ੍ਤੋ ਦੋਸਗ੍ਗਿਂ ਨਿਬ੍ਬਾਪੇਨ੍ਤੋ ਦੋਸਸਲ੍ਲਂ ਉਪ੍ਪਾਟੇਨ੍ਤੋ ਦੋਸਜਟਂ ਵਿਜਟੇਨ੍ਤੋ. ਮੋਹਚਰਿਤੋ ਪੁਗ੍ਗਲੋ ਸੁਞ੍ਞਤਵਿਮੋਕ੍ਖਮੁਖੇਨ ਨਿਯ੍ਯਾਤਿ ਅਧਿਪਞ੍ਞਾਸਿਕ੍ਖਾਯ ਸਿਕ੍ਖਨ੍ਤੋ ਮੋਹਂ ਅਕੁਸਲਮੂਲਂ ਪਜਹਨ੍ਤੋ ਅਦੁਕ੍ਖਮਸੁਖਵੇਦਨੀਯਂ ਫਸ੍ਸਂ ਅਨੁਪਗਚ੍ਛਨ੍ਤੋ ਅਦੁਕ੍ਖਮਸੁਖਂ ਵੇਦਨਂ ਪਰਿਜਾਨਨ੍ਤੋ ਮੋਹਮਲਂ ਪਵਾਹੇਨ੍ਤੋ ਮੋਹਰਜਂ ਨਿਦ੍ਧੁਨਨ੍ਤੋ ਮੋਹਵਿਸਂ ਵਮੇਨ੍ਤੋ ਮੋਹਗ੍ਗਿਂ ਨਿਬ੍ਬਾਪੇਨ੍ਤੋ ਮੋਹਸਲ੍ਲਂ ਉਪ੍ਪਾਟੇਨ੍ਤੋ ਮੋਹਜਟਂ ਵਿਜਟੇਨ੍ਤੋ.

ਤਤ੍ਥ ਸੁਞ੍ਞਤਵਿਮੋਕ੍ਖਮੁਖਂ ਪਞ੍ਞਾਕ੍ਖਨ੍ਧੋ, ਅਨਿਮਿਤ੍ਤਵਿਮੋਕ੍ਖਮੁਖਂ ਸਮਾਧਿਕ੍ਖਨ੍ਧੋ, ਅਪ੍ਪਣਿਹਿਤਵਿਮੋਕ੍ਖਮੁਖਂ ਸੀਲਕ੍ਖਨ੍ਧੋ. ਸੋ ਤੀਣਿ ਵਿਮੋਕ੍ਖਮੁਖਾਨਿ ਭਾਵਯਨ੍ਤੋ ਤਯੋ ਖਨ੍ਧੇ ਭਾਵਯਤਿ, ਤਯੋ ਖਨ੍ਧੇ ਭਾਵਯਨ੍ਤੋ ਅਰਿਯਂ ਅਟ੍ਠਙ੍ਗਿਕਂ ਮਗ੍ਗਂ ਭਾਵਯਤਿ. ਤਤ੍ਥ ਯਾ ਚ ਸਮ੍ਮਾਵਾਚਾ ਯੋ ਚ ਸਮ੍ਮਾਕਮ੍ਮਨ੍ਤੋ ਯੋ ਚ ਸਮ੍ਮਾਆਜੀਵੋ, ਅਯਂ ਸੀਲਕ੍ਖਨ੍ਧੋ, ਯੋ ਚ ਸਮ੍ਮਾਵਾਯਾਮੋ ਯਾ ਚ ਸਮ੍ਮਾਸਤਿ ਯੋ ਚ ਸਮ੍ਮਾਸਮਾਧਿ, ਅਯਂ ਸਮਾਧਿਕ੍ਖਨ੍ਧੋ, ਯਾ ਚ ਸਮ੍ਮਾਦਿਟ੍ਠਿ ਯੋ ਚ ਸਮ੍ਮਾਸਙ੍ਕਪ੍ਪੋ, ਅਯਂ ਪਞ੍ਞਾਕ੍ਖਨ੍ਧੋ.

ਤਤ੍ਥ ਸੀਲਕ੍ਖਨ੍ਧੋ ਚ ਸਮਾਧਿਕ੍ਖਨ੍ਧੋ ਚ ਸਮਥੋ, ਪਞ੍ਞਾਕ੍ਖਨ੍ਧੋ ਵਿਪਸ੍ਸਨਾ. ਯੋ ਸਮਥਵਿਪਸ੍ਸਨਂ ਭਾਵੇਤਿ, ਤਸ੍ਸ ਦ੍ਵੇ ਭਵਙ੍ਗਾਨਿ ਭਾਵਨਂ ਗਚ੍ਛਨ੍ਤਿ ਕਾਯੋ ਚਿਤ੍ਤਞ੍ਚ, ਭਵਨਿਰੋਧਗਾਮਿਨੀ ਪਟਿਪਦਾ ਦ੍ਵੇ ਪਦਾਨਿ ਸੀਲਂ ਸਮਾਧਿ ਚ. ਸੋ ਹੋਤਿ ਭਿਕ੍ਖੁ ਭਾਵਿਤਕਾਯੋ ਭਾਵਿਤਸੀਲੋ ਭਾਵਿਤਚਿਤ੍ਤੋ ਭਾਵਿਤਪਞ੍ਞੋ. ਕਾਯੇ ਭਾਵਿਯਮਾਨੇ ਦ੍ਵੇ ਧਮ੍ਮਾ ਭਾਵਨਂ ਗਚ੍ਛਨ੍ਤਿ ਸਮ੍ਮਾਕਮ੍ਮਨ੍ਤੋ ਸਮ੍ਮਾਵਾਯਾਮੋ ਚ, ਸੀਲੇ ਭਾਵਿਯਮਾਨੇ ਦ੍ਵੇ ਧਮ੍ਮਾ ਭਾਵਨਂ ਗਚ੍ਛਨ੍ਤਿ ਸਮ੍ਮਾਵਾਚਾ ਸਮ੍ਮਾਆਜੀਵੋ ਚ, ਚਿਤ੍ਤੇ ਭਾਵਿਯਮਾਨੇ ਦ੍ਵੇ ਧਮ੍ਮਾ ਭਾਵਨਂ ਗਚ੍ਛਨ੍ਤਿ ਸਮ੍ਮਾਸਤਿ ਸਮ੍ਮਾਸਮਾਧਿ ਚ, ਪਞ੍ਞਾਯ ਭਾਵਿਯਮਾਨਾਯ ਦ੍ਵੇ ਧਮ੍ਮਾ ਭਾਵਨਂ ਗਚ੍ਛਨ੍ਤਿ ਸਮ੍ਮਾਦਿਟ੍ਠਿ ਸਮ੍ਮਾਸਙ੍ਕਪ੍ਪੋ ਚ.

ਤਤ੍ਥ ਯੋ ਚ ਸਮ੍ਮਾਕਮ੍ਮਨ੍ਤੋ ਯੋ ਚ ਸਮ੍ਮਾਵਾਯਾਮੋ ਸਿਯਾ ਕਾਯਿਕੋ ਸਿਯਾ ਚੇਤਸਿਕੋ, ਤਤ੍ਥ ਯੋ ਕਾਯਸਙ੍ਗਹੋ, ਸੋ ਕਾਯੇ ਭਾਵਿਤੇ ਭਾਵਨਂ ਗਚ੍ਛਤਿ, ਯੋ ਚਿਤ੍ਤਸਙ੍ਗਹੋ, ਸੋ ਚਿਤ੍ਤੇ ਭਾਵਿਤੇ ਭਾਵਨਂ ਗਚ੍ਛਤਿ. ਸੋ ਸਮਥਵਿਪਸ੍ਸਨਂ ਭਾਵਯਨ੍ਤੋ ਪਞ੍ਚਵਿਧਂ ਅਧਿਗਮਂ ਗਚ੍ਛਤਿ [ਅਧਿਗਚ੍ਛਤਿ (ਸੀ.)] ਖਿਪ੍ਪਾਧਿਗਮੋ ਚ ਹੋਤਿ, ਵਿਮੁਤ੍ਤਾਧਿਗਮੋ ਚ ਹੋਤਿ, ਮਹਾਧਿਗਮੋ ਚ ਹੋਤਿ, ਵਿਪੁਲਾਧਿਗਮੋ ਚ ਹੋਤਿ, ਅਨਵਸੇਸਾਧਿਗਮੋ ਚ ਹੋਤਿ. ਤਤ੍ਥ ਸਮਥੇਨ ਖਿਪ੍ਪਾਧਿਗਮੋ ਚ ਮਹਾਧਿਗਮੋ ਚ ਵਿਪੁਲਾਧਿਗਮੋ ਚ ਹੋਤਿ, ਵਿਪਸ੍ਸਨਾਯ ਵਿਮੁਤ੍ਤਾਧਿਗਮੋ ਚ ਅਨਵਸੇਸਾਧਿਗਮੋ ਚ ਹੋਤਿ.

੫੬. ਤਤ੍ਥ ਯੋ ਦੇਸਯਤਿ, ਸੋ ਦਸਬਲਸਮਨ੍ਨਾਗਤੋ ਸਤ੍ਥਾ ਓਵਾਦੇਨ ਸਾਵਕੇ ਨ ਵਿਸਂਵਾਦਯਤਿ. ਸੋ ਤਿਵਿਧਂ ਇਦਂ ਕਰੋਥ ਇਮਿਨਾ ਉਪਾਯੇਨ ਕਰੋਥ ਇਦਂ ਵੋ ਕੁਰੁਮਾਨਾਨਂ ਹਿਤਾਯ ਸੁਖਾਯ ਭਵਿਸ੍ਸਤਿ, ਸੋ ਤਥਾ ਓਵਦਿਤੋ ਤਥਾਨੁਸਿਟ੍ਠੋ ਤਥਾਕਰੋਨ੍ਤੋ ਤਥਾਪਟਿਪਜ੍ਜਨ੍ਤੋ ਤਂ ਭੂਮਿਂ ਨ ਪਾਪੁਣਿਸ੍ਸਤੀਤਿ ਨੇਤਂ ਠਾਨਂ ਵਿਜ੍ਜਤਿ. ਸੋ ਤਥਾ ਓਵਦਿਤੋ ਤਥਾਨੁਸਿਟ੍ਠੋ ਸੀਲਕ੍ਖਨ੍ਧਂ ਅਪਰਿਪੂਰਯਨ੍ਤੋ ਤਂ ਭੂਮਿਂ ਅਨੁਪਾਪੁਣਿਸ੍ਸਤੀਤਿ ਨੇਤਂ ਠਾਨਂ ਵਿਜ੍ਜਤਿ. ਸੋ ਤਥਾ ਓਵਦਿਤੋ ਤਥਾਨੁਸਿਟ੍ਠੋ ਸੀਲਕ੍ਖਨ੍ਧਂ ਪਰਿਪੂਰਯਨ੍ਤੋ ਤਂ ਭੂਮਿਂ ਅਨੁਪਾਪੁਣਿਸ੍ਸਤੀਤਿ ਠਾਨਮੇਤਂ ਵਿਜ੍ਜਤਿ.

ਸਮ੍ਮਾਸਮ੍ਬੁਦ੍ਧਸ੍ਸ ਤੇ ਸਤੋ ਇਮੇ ਧਮ੍ਮਾ ਅਨਭਿਸਮ੍ਬੁਦ੍ਧਾਤਿ ਨੇਤਂ ਠਾਨਂ ਵਿਜ੍ਜਤਿ. ਸਬ੍ਬਾਸਵਪਰਿਕ੍ਖੀਣਸ੍ਸ ਤੇ ਸਤੋ ਇਮੇ ਆਸਵਾ ਅਪਰਿਕ੍ਖੀਣਾਤਿ ਨੇਤਂ ਠਾਨਂ ਵਿਜ੍ਜਤਿ. ਯਸ੍ਸ ਤੇ ਅਤ੍ਥਾਯ ਧਮ੍ਮੋ ਦੇਸਿਤੋ, ਸੋ ਨ ਨਿਯ੍ਯਾਤਿ ਤਕ੍ਕਰਸ੍ਸ ਸਮ੍ਮਾ ਦੁਕ੍ਖਕ੍ਖਯਾਯਾਤਿ ਨੇਤਂ ਠਾਨਂ ਵਿਜ੍ਜਤਿ. ਸਾਵਕੋ ਖੋ ਪਨ ਤੇ ਧਮ੍ਮਾਨੁਧਮ੍ਮਪ੍ਪਟਿਪਨ੍ਨੋ ਸਾਮੀਚਿਪ੍ਪਟਿਪਨ੍ਨੋ ਅਨੁਧਮ੍ਮਚਾਰੀ ਸੋ ਪੁਬ੍ਬੇਨ ਅਪਰਂ ਉਲ਼ਾਰਂ ਵਿਸੇਸਾਧਿਗਮਂ ਨ ਸਚ੍ਛਿਕਰਿਸ੍ਸਤੀਤਿ ਨੇਤਂ ਠਾਨਂ ਵਿਜ੍ਜਤਿ.

ਯੇ ਖੋ ਪਨ ਧਮ੍ਮਾ ਅਨ੍ਤਰਾਯਿਕਾ, ਤੇ ਪਟਿਸੇਵਤੋ ਨਾਲਂ ਅਨ੍ਤਰਾਯਾਯਾਤਿ ਨੇਤਂ ਠਾਨਂ ਵਿਜ੍ਜਤਿ. ਯੇ ਖੋ ਪਨ ਧਮ੍ਮਾ ਅਨਿਯ੍ਯਾਨਿਕਾ, ਤੇ ਨਿਯ੍ਯਨ੍ਤਿ ਤਕ੍ਕਰਸ੍ਸ ਸਮ੍ਮਾ ਦੁਕ੍ਖਕ੍ਖਯਾਯਾਤਿ ਨੇਤਂ ਠਾਨਂ ਵਿਜ੍ਜਤਿ. ਯੇ ਖੋ ਪਨ ਧਮ੍ਮਾ ਨਿਯ੍ਯਾਨਿਕਾ, ਤੇ ਨਿਯ੍ਯਨ੍ਤਿ ਤਕ੍ਕਰਸ੍ਸ ਸਮ੍ਮਾ ਦੁਕ੍ਖਕ੍ਖਯਾਯਾਤਿ ਠਾਨਮੇਤਂ ਵਿਜ੍ਜਤਿ. ਸਾਵਕੋ ਖੋ ਪਨ ਤੇ ਸਉਪਾਦਿਸੇਸੋ ਅਨੁਪਾਦਿਸੇਸਂ ਨਿਬ੍ਬਾਨਧਾਤੁਂ ਅਨੁਪਾਪੁਣਿਸ੍ਸਤੀਤਿ ਨੇਤਂ ਠਾਨਂ ਵਿਜ੍ਜਤਿ.

ਦਿਟ੍ਠਿਸਮ੍ਪਨ੍ਨੋ ਮਾਤਰਂ ਜੀਵਿਤਾ ਵੋਰੋਪੇਯ੍ਯ ਹਤ੍ਥੇਹਿ ਵਾ ਪਾਦੇਹਿ ਵਾ ਸੁਹਤਂ ਕਰੇਯ੍ਯਾਤਿ ਨੇਤਂ ਠਾਨਂ ਵਿਜ੍ਜਤਿ, ਪੁਥੁਜ੍ਜਨੋ ਮਾਤਰਂ ਜੀਵਿਤਾ ਵੋਰੋਪੇਯ੍ਯ ਹਤ੍ਥੇਹਿ ਵਾ ਪਾਦੇਹਿ ਵਾ ਸੁਹਤਂ ਕਰੇਯ੍ਯਾਤਿ ਠਾਨਮੇਤਂ ਵਿਜ੍ਜਤਿ. ਏਵਂ ਪਿਤਰਂ, ਅਰਹਨ੍ਤਂ, ਭਿਕ੍ਖੁਂ. ਦਿਟ੍ਠਿਸਮ੍ਪਨ੍ਨੋ ਪੁਗ੍ਗਲੋ ਸਙ੍ਘਂ ਭਿਨ੍ਦੇਯ੍ਯ ਸਙ੍ਘੇ ਵਾ ਸਙ੍ਘਰਾਜਿਂ ਜਨੇਯ੍ਯਾਤਿ ਨੇਤਂ ਠਾਨਂ ਵਿਜ੍ਜਤਿ, ਪੁਥੁਜ੍ਜਨੋ ਸਙ੍ਘਂ ਭਿਨ੍ਦੇਯ੍ਯ ਸਙ੍ਘੇ ਵਾ ਸਙ੍ਘਰਾਜਿਂ ਜਨੇਯ੍ਯਾਤਿ ਠਾਨਮੇਤਂ ਵਿਜ੍ਜਤਿ, ਦਿਟ੍ਠਿਸਮ੍ਪਨ੍ਨੋ ਤਥਾਗਤਸ੍ਸ ਦੁਟ੍ਠਚਿਤ੍ਤੋ ਲੋਹਿਤਂ ਉਪ੍ਪਾਦੇਯ੍ਯ, ਪਰਿਨਿਬ੍ਬੁਤਸ੍ਸ ਵਾ ਤਥਾਗਤਸ੍ਸ ਦੁਟ੍ਠਚਿਤ੍ਤੋ ਥੂਪਂ ਭਿਨ੍ਦੇਯ੍ਯਾਤਿ ਨੇਤਂ ਠਾਨਂ ਵਿਜ੍ਜਤਿ. ਪੁਥੁਜ੍ਜਨੋ ਤਥਾਗਤਸ੍ਸ ਦੁਟ੍ਠਚਿਤ੍ਤੋ ਲੋਹਿਤਂ ਉਪ੍ਪਾਦੇਯ੍ਯ, ਪਰਿਨਿਬ੍ਬੁਤਸ੍ਸ ਵਾ ਤਥਾਗਤਸ੍ਸ ਦੁਟ੍ਠਚਿਤ੍ਤੋ ਥੂਪਂ ਭਿਨ੍ਦੇਯ੍ਯਾਤਿ ਠਾਨਮੇਤਂ ਵਿਜ੍ਜਤਿ. ਦਿਟ੍ਠਿਸਮ੍ਪਨ੍ਨੋ ਅਞ੍ਞਂ ਸਤ੍ਥਾਰਂ ਅਪਦਿਸੇਯ੍ਯ ਅਪਿ ਜੀਵਿਤਹੇਤੂਤਿ ਨੇਤਂ ਠਾਨਂ ਵਿਜ੍ਜਤਿ, ਪੁਥੁਜ੍ਜਨੋ ਅਞ੍ਞਂ ਸਤ੍ਥਾਰਂ ਅਪਦਿਸੇਯ੍ਯਾਤਿ ਠਾਨਮੇਤਂ ਵਿਜ੍ਜਤਿ. ਦਿਟ੍ਠਿਸਮ੍ਪਨ੍ਨੋ ਇਤੋ ਬਹਿਦ੍ਧਾ ਅਞ੍ਞਂ ਦਕ੍ਖਿਣੇਯ੍ਯਂ ਪਰਿਯੇਸੇਯ੍ਯਾਤਿ ਨੇਤਂ ਠਾਨਂ ਵਿਜ੍ਜਤਿ, ਪੁਥੁਜ੍ਜਨੋ ਇਤੋ ਬਹਿਦ੍ਧਾ ਅਞ੍ਞਂ ਦਕ੍ਖਿਣੇਯ੍ਯਂ ਪਰਿਯੇਸੇਯ੍ਯਾਤਿ ਠਾਨਮੇਤਂ ਵਿਜ੍ਜਤਿ, ਦਿਟ੍ਠਿਸਮ੍ਪਨ੍ਨੋ ਕੁਤੂਹਲਮਙ੍ਗਲੇਨ ਸੁਦ੍ਧਿਂ ਪਚ੍ਚੇਯ੍ਯਾਤਿ ਨੇਤਂ ਠਾਨਂ ਵਿਜ੍ਜਤਿ. ਪੁਥੁਜ੍ਜਨੋ ਕੁਤੂਹਲਮਙ੍ਗਲੇਨ ਸੁਦ੍ਧਿਂ ਪਚ੍ਚੇਯ੍ਯਾਤਿ ਠਾਨਮੇਤਂ ਵਿਜ੍ਜਤਿ.

੫੭. ਇਤ੍ਥੀ ਰਾਜਾ ਚਕ੍ਕਵਤ੍ਤੀ ਸਿਯਾਤਿ ਨੇਤਂ ਠਾਨਂ ਵਿਜ੍ਜਤਿ, ਪੁਰਿਸੋ ਰਾਜਾ ਚਕ੍ਕਵਤ੍ਤੀ ਸਿਯਾਤਿ ਠਾਨਮੇਤਂ ਵਿਜ੍ਜਤਿ; ਇਤ੍ਥੀ ਸਕ੍ਕੋ ਦੇਵਾਨਮਿਨ੍ਦੋ ਸਿਯਾਤਿ ਨੇਤਂ ਠਾਨਂ ਵਿਜ੍ਜਤਿ, ਪੁਰਿਸੋ ਸਕ੍ਕੋ ਦੇਵਾਨਮਿਨ੍ਦੋ ਸਿਯਾਤਿ ਠਾਨਮੇਤਂ ਵਿਜ੍ਜਤਿ; ਇਤ੍ਥੀ ਮਾਰੋ ਪਾਪਿਮਾ ਸਿਯਾਤਿ ਨੇਤਂ ਠਾਨਂ ਵਿਜ੍ਜਤਿ, ਪੁਰਿਸੋ ਮਾਰੋ ਪਾਪਿਮਾ ਸਿਯਾਤਿ ਠਾਨਮੇਤਂ ਵਿਜ੍ਜਤਿ; ਇਤ੍ਥੀ ਮਹਾਬ੍ਰਹ੍ਮਾ ਸਿਯਾਤਿ ਨੇਤਂ ਠਾਨਂ ਵਿਜ੍ਜਤਿ, ਪੁਰਿਸੋ ਮਹਾਬ੍ਰਹ੍ਮਾ ਸਿਯਾਤਿ ਠਾਨਮੇਤਂ ਵਿਜ੍ਜਤਿ; ਇਤ੍ਥੀ ਤਥਾਗਤੋ ਅਰਹਂ ਸਮ੍ਮਾਸਮ੍ਬੁਦ੍ਧੋ ਸਿਯਾਤਿ ਨੇਤਂ ਠਾਨਂ ਵਿਜ੍ਜਤਿ, ਪੁਰਿਸੋ ਤਥਾਗਤੋ ਅਰਹਂ ਸਮ੍ਮਾਸਮ੍ਬੁਦ੍ਧੋ ਸਿਯਾਤਿ ਠਾਨਮੇਤਂ ਵਿਜ੍ਜਤਿ.

ਦ੍ਵੇ ਤਥਾਗਤਾ ਅਰਹਨ੍ਤੋ ਸਮ੍ਮਾਸਮ੍ਬੁਦ੍ਧਾ ਅਪੁਬ੍ਬਂ ਅਚਰਿਮਂ ਏਕਿਸ੍ਸਾ ਲੋਕਧਾਤੁਯਾ ਉਪ੍ਪਜ੍ਜੇਯ੍ਯੁਂ ਵਾ ਧਮ੍ਮਂ ਵਾ ਦੇਸੇਯ੍ਯੁਨ੍ਤਿ ਨੇਤਂ ਠਾਨਂ ਵਿਜ੍ਜਤਿ, ਏਕੋਵ ਤਥਾਗਤੋ ਅਰਹਂ ਸਮ੍ਮਾਸਮ੍ਬੁਦ੍ਧੋ ਏਕਿਸ੍ਸਾ ਲੋਕਧਾਤੁਯਾ ਉਪ੍ਪਜ੍ਜਿਸ੍ਸਤਿ ਵਾ ਧਮ੍ਮਂ ਵਾ ਦੇਸੇਸ੍ਸਤੀਤਿ ਠਾਨਮੇਤਂ ਵਿਜ੍ਜਤਿ.

ਤਿਣ੍ਣਂ ਦੁਚ੍ਚਰਿਤਾਨਂ ਇਟ੍ਠੋ ਕਨ੍ਤੋ ਪਿਯੋ ਮਨਾਪੋ ਵਿਪਾਕੋ ਭਵਿਸ੍ਸਤੀਤਿ ਨੇਤਂ ਠਾਨਂ ਵਿਜ੍ਜਤਿ, ਤਿਣ੍ਣਂ ਦੁਚ੍ਚਰਿਤਾਨਂ ਅਨਿਟ੍ਠੋ ਅਕਨ੍ਤੋ ਅਪ੍ਪਿਯੋ ਅਮਨਾਪੋ ਵਿਪਾਕੋ ਭਵਿਸ੍ਸਤੀਤਿ ਠਾਨਮੇਤਂ ਵਿਜ੍ਜਤਿ. ਤਿਣ੍ਣਂ ਸੁਚਰਿਤਾਨਂ ਅਨਿਟ੍ਠੋ ਅਕਨ੍ਤੋ ਅਪ੍ਪਿਯੋ ਅਮਨਾਪੋ ਵਿਪਾਕੋ ਭਵਿਸ੍ਸਤੀਤਿ ਨੇਤਂ ਠਾਨਂ ਵਿਜ੍ਜਤਿ, ਤਿਣ੍ਣਂ ਸੁਚਰਿਤਾਨਂ ਇਟ੍ਠੋ ਕਨ੍ਤੋ ਪਿਯੋ ਮਨਾਪੋ ਵਿਪਾਕੋ ਭਵਿਸ੍ਸਤੀਤਿ ਠਾਨਮੇਤਂ ਵਿਜ੍ਜਤਿ.

ਅਞ੍ਞਤਰੋ ਸਮਣੋ ਵਾ ਬ੍ਰਾਹ੍ਮਣੋ ਵਾ ਕੁਹਕੋ ਲਪਕੋ ਨੇਮਿਤ੍ਤਕੋ ਕੁਹਨਲਪਨਨੇਮਿਤ੍ਤਕਤ੍ਤਂ ਪੁਬ੍ਬਙ੍ਗਮਂ ਕਤ੍ਵਾ ਪਞ੍ਚ ਨੀਵਰਣੇ ਅਪ੍ਪਹਾਯ ਚੇਤਸੋ ਉਪਕ੍ਕਿਲੇਸੇ ਪਞ੍ਞਾਯ ਦੁਬ੍ਬਲੀਕਰਣੇ ਚਤੂਸੁ ਸਤਿਪਟ੍ਠਾਨੇਸੁ ਅਨੁਪਟ੍ਠਿਤਸ੍ਸਤਿ [ਅਨੁਪਟ੍ਠਿਤਸਤਿ (ਸੀ.)] ਵਿਹਰਨ੍ਤੋ ਸਤ੍ਤ ਬੋਜ੍ਝਙ੍ਗੇ ਅਭਾਵਯਿਤ੍ਵਾ ਅਨੁਤ੍ਤਰਂ ਸਮ੍ਮਾਸਮ੍ਬੋਧਿਂ ਅਭਿਸਮ੍ਬੁਜ੍ਝਿਸ੍ਸਤੀਤਿ ਨੇਤਂ ਠਾਨਂ ਵਿਜ੍ਜਤਿ, ਅਞ੍ਞਤਰੋ ਸਮਣੋ ਵਾ ਬ੍ਰਾਹ੍ਮਣੋ ਵਾ ਸਬ੍ਬਦੋਸਾਪਗਤੋ ਪਞ੍ਚ ਨੀਵਰਣੇ ਪਹਾਯ ਚੇਤਸੋ ਉਪਕ੍ਕਿਲੇਸੇ ਪਞ੍ਞਾਯ ਦੁਬ੍ਬਲੀਕਰਣੇ ਚਤੂਸੁ ਸਤਿਪਟ੍ਠਾਨੇਸੁ ਉਪਟ੍ਠਿਤਸ੍ਸਤਿ ਵਿਹਰਨ੍ਤੋ ਸਤ੍ਤ ਬੋਜ੍ਝਙ੍ਗੇ ਭਾਵਯਿਤ੍ਵਾ ਅਨੁਤ੍ਤਰਂ ਸਮ੍ਮਾਸਮ੍ਬੋਧਿਂ ਅਭਿਸਮ੍ਬੁਜ੍ਝਿਸ੍ਸਤੀਤਿ ਠਾਨਮੇਤਂ ਵਿਜ੍ਜਤਿ. ਯਂ ਏਤ੍ਥ ਞਾਣਂ ਹੇਤੁਸੋ ਠਾਨਸੋ ਅਨੋਧਿਸੋ ਇਦਂ ਵੁਚ੍ਚਤਿ ਠਾਨਾਟ੍ਠਾਨਞਾਣਂ ਪਠਮਂ ਤਥਾਗਤਬਲਂ.

ਇਤਿ ਠਾਨਾਟ੍ਠਾਨਗਤਾ ਸਬ੍ਬੇ ਖਯਧਮ੍ਮਾ ਵਯਧਮ੍ਮਾ ਵਿਰਾਗਧਮ੍ਮਾ ਨਿਰੋਧਧਮ੍ਮਾ ਕੇਚਿ ਸਗ੍ਗੂਪਗਾ ਕੇਚਿ ਅਪਾਯੂਪਗਾ ਕੇਚਿ ਨਿਬ੍ਬਾਨੂਪਗਾ, ਏਵਂ ਭਗਵਾ ਆਹ –

੫੮. ਸਬ੍ਬੇ ਸਤ੍ਤਾ [ਪਸ੍ਸ ਸਂ. ਨਿ. ੧.੧੩੩] ਮਰਿਸ੍ਸਨ੍ਤਿ, ਮਰਣਨ੍ਤਂ ਹਿ ਜੀਵਿਤਂ;

ਯਥਾਕਮ੍ਮਂ ਗਮਿਸ੍ਸਨ੍ਤਿ, ਪੁਞ੍ਞਪਾਪਫਲੂਪਗਾ;

ਨਿਰਯਂ ਪਾਪਕਮ੍ਮਨ੍ਤਾ, ਪੁਞ੍ਞਕਮ੍ਮਾ ਚ ਸੁਗ੍ਗਤਿਂ;

ਅਪਰੇ ਚ ਮਗ੍ਗਂ ਭਾਵੇਤ੍ਵਾ, ਪਰਿਨਿਬ੍ਬਨ੍ਤਿਨਾਸਵਾਤਿ [ਪਰਿਨਿਬ੍ਬਨ੍ਤਿ ਅਨਾਸਵਾਤਿ (ਸੀ. ਕ.)].

ਸਬ੍ਬੇ ਸਤ੍ਤਾਤਿ ਅਰਿਯਾ ਚ ਅਨਰਿਯਾ ਚ ਸਕ੍ਕਾਯਪਰਿਯਾਪਨ੍ਨਾ ਚ ਸਕ੍ਕਾਯਵੀਤਿਵਤ੍ਤਾ ਚ. ਮਰਿਸ੍ਸਨ੍ਤੀਤਿ ਦ੍ਵੀਹਿ ਮਰਣੇਹਿ ਦਨ੍ਧਮਰਣੇਨ ਚ ਅਦਨ੍ਧਮਰਣੇਨ ਚ, ਸਕ੍ਕਾਯਪਰਿਯਾਪਨ੍ਨਾਨਂ ਅਦਨ੍ਧਮਰਣਂ ਸਕ੍ਕਾਯਵੀਤਿਵਤ੍ਤਾਨਂ ਦਨ੍ਧਮਰਣਂ. ਮਰਣਨ੍ਤਂ ਹਿ ਜੀਵਿਤਨ੍ਤਿ ਖਯਾ ਆਯੁਸ੍ਸ ਇਨ੍ਦ੍ਰਿਯਾਨਂ ਉਪਰੋਧਾ ਜੀਵਿਤਪਰਿਯਨ੍ਤੋ ਮਰਣਪਰਿਯਨ੍ਤੋ. ਯਥਾਕਮ੍ਮਂ ਗਮਿਸ੍ਸਨ੍ਤੀਤਿ ਕਮ੍ਮਸ੍ਸਕਤਾ. ਪੁਞ੍ਞਪਾਪਫਲੂਪਗਾਤਿ ਕਮ੍ਮਾਨਂ ਫਲਦਸ੍ਸਾਵਿਤਾ ਚ ਅਵਿਪ੍ਪਵਾਸੋ ਚ.

ਨਿਰਯਂ ਪਾਪਕਮ੍ਮਨ੍ਤਾਤਿ ਅਪੁਞ੍ਞਸਙ੍ਖਾਰਾ. ਪੁਞ੍ਞਕਮ੍ਮਾ ਚ ਸੁਗ੍ਗਤਿਨ੍ਤਿ ਪੁਞ੍ਞਸਙ੍ਖਾਰਾ ਸੁਗਤਿਂ ਗਮਿਸ੍ਸਨ੍ਤਿ. ਅਪਰੇ ਚ ਮਗ੍ਗਂ ਭਾਵੇਤ੍ਵਾ, ਪਰਿਨਿਬ੍ਬਨ੍ਤਿਨਾਸਵਾਤਿ ਸਬ੍ਬਸਙ੍ਖਾਰਾਨਂ ਸਮਤਿਕ੍ਕਮਨਂ. ਤੇਨਾਹ ਭਗਵਾ – ‘‘ਸਬ੍ਬੇ…ਪੇ… ਨਾਸਵਾ’’ਤਿ.

‘‘ਸਬ੍ਬੇ ਸਤ੍ਤਾ ਮਰਿਸ੍ਸਨ੍ਤਿ, ਮਰਣਨ੍ਤਂ ਹਿ ਜੀਵਿਤਂ. ਯਥਾਕਮ੍ਮਂ ਗਮਿਸ੍ਸਨ੍ਤਿ, ਪੁਞ੍ਞਪਾਪਫਲੂਪਗਾ. ਨਿਰਯਂ ਪਾਪਕਮ੍ਮਨ੍ਤਾ’’ਤਿ ਆਗਾਲ਼੍ਹਾ ਚ ਨਿਜ੍ਝਾਮਾ ਚ ਪਟਿਪਦਾ. ‘‘ਅਪਰੇ ਚ ਮਗ੍ਗਂ ਭਾਵੇਤ੍ਵਾ, ਪਰਿਨਿਬ੍ਬਨ੍ਤਿਨਾਸਵਾ’’ਤਿ ਮਜ੍ਝਿਮਾ ਪਟਿਪਦਾ. ‘‘ਸਬ੍ਬੇ ਸਤ੍ਤਾ ਮਰਿਸ੍ਸਨ੍ਤਿ, ਮਰਣਨ੍ਤਂ ਹਿ ਜੀਵਿਤਂ, ਯਥਾਕਮ੍ਮਂ ਗਮਿਸ੍ਸਨ੍ਤਿ, ਪੁਞ੍ਞਪਾਪਫਲੂਪਗਾ, ਨਿਰਯਂ ਪਾਪਕਮ੍ਮਨ੍ਤਾ’’ਤਿ ਅਯਂ ਸਂਕਿਲੇਸੋ. ਏਵਂ ਸਂਸਾਰਂ ਨਿਬ੍ਬਤ੍ਤਯਤਿ. ‘‘ਸਬ੍ਬੇ ਸਤ੍ਤਾ ਮਰਿਸ੍ਸਨ੍ਤਿ…ਪੇ… ਨਿਰਯਂ ਪਾਪਕਮ੍ਮਨ੍ਤਾ’’ਤਿ ਇਮੇ ਤਯੋ ਵਟ੍ਟਾ ਦੁਕ੍ਖਵਟ੍ਟੋ ਕਮ੍ਮਵਟ੍ਟੋ ਕਿਲੇਸਵਟ੍ਟੋ. ‘‘ਅਪਰੇ ਚ ਮਗ੍ਗਂ ਭਾਵੇਤ੍ਵਾ, ਪਰਿਨਿਬ੍ਬਨ੍ਤਿਨਾਸਵਾ’’ਤਿ ਤਿਣ੍ਣਂ ਵਟ੍ਟਾਨਂ ਵਿਵਟ੍ਟਨਾ. ‘‘ਸਬ੍ਬੇ ਸਤ੍ਤਾ ਮਰਿਸ੍ਸਨ੍ਤਿ…ਪੇ… ਨਿਰਯਂ ਪਾਪਕਮ੍ਮਨ੍ਤਾ’’ਤਿ ਆਦੀਨਵੋ, ‘‘ਪੁਞ੍ਞਕਮ੍ਮਾ ਚ ਸੁਗ੍ਗਤਿ’’ਨ੍ਤਿ ਅਸ੍ਸਾਦੋ, ‘‘ਅਪਰੇ ਚ ਮਗ੍ਗਂ ਭਾਵੇਤ੍ਵਾ, ਪਰਿਨਿਬ੍ਬਨ੍ਤਿਨਾਸਵਾ’’ਤਿ ਨਿਸ੍ਸਰਣਂ. ‘‘ਸਬ੍ਬੇ ਸਤ੍ਤਾ ਮਰਿਸ੍ਸਨ੍ਤਿ…ਪੇ… ਨਿਰਯਂ ਪਾਪਕਮ੍ਮਨ੍ਤਾ’’ਤਿ ਹੇਤੁ ਚ ਫਲਞ੍ਚ, ਪਞ੍ਚਕ੍ਖਨ੍ਧਾ ਫਲਂ, ਤਣ੍ਹਾ ਹੇਤੁ, ‘‘ਅਪਰੇ ਚ ਮਗ੍ਗਂ ਭਾਵੇਤ੍ਵਾ, ਪਰਿਨਿਬ੍ਬਨ੍ਤਿਨਾਸਵਾ’’ਤਿ ਮਗ੍ਗੋ ਚ ਫਲਞ੍ਚ. ‘‘ਸਬ੍ਬੇ ਸਤ੍ਤਾ ਮਰਿਸ੍ਸਨ੍ਤਿ, ਮਰਣਨ੍ਤਂ ਹਿ ਜੀਵਿਤਂ. ਯਥਾਕਮ੍ਮਂ ਗਮਿਸ੍ਸਨ੍ਤਿ, ਪੁਞ੍ਞਪਾਪਫਲੂਪਗਾ, ਨਿਰਯਂ ਪਾਪਕਮ੍ਮਨ੍ਤਾ’’ਤਿ ਅਯਂ ਸਂਕਿਲੇਸੋ, ਸੋ ਸਂਕਿਲੇਸੋ ਤਿਵਿਧੋ ਤਣ੍ਹਾਸਂਕਿਲੇਸੋ ਦਿਟ੍ਠਿਸਂਕਿਲੇਸੋ ਦੁਚ੍ਚਰਿਤਸਂਕਿਲੇਸੋਤਿ.

੫੯. ਤਤ੍ਥ ਤਣ੍ਹਾਸਂਕਿਲੇਸੋ ਤੀਹਿ ਤਣ੍ਹਾਹਿ ਨਿਦ੍ਦਿਸਿਤਬ੍ਬੋ – ਕਾਮਤਣ੍ਹਾਯ ਭਵਤਣ੍ਹਾਯ ਵਿਭਵਤਣ੍ਹਾਯ. ਯੇਨ ਯੇਨ ਵਾ ਪਨ ਵਤ੍ਥੁਨਾ ਅਜ੍ਝੋਸਿਤੋ, ਤੇਨ ਤੇਨੇਵ ਨਿਦ੍ਦਿਸਿਤਬ੍ਬੋ, ਤਸ੍ਸਾ ਵਿਤ੍ਥਾਰੋ ਛਤ੍ਤਿਂਸਾਯ ਤਣ੍ਹਾਯ ਜਾਲਿਨਿਯਾ ਵਿਚਰਿਤਾਨਿ. ਤਤ੍ਥ ਦਿਟ੍ਠਿਸਂਕਿਲੇਸੋ ਉਚ੍ਛੇਦਸਸ੍ਸਤੇਨ ਨਿਦ੍ਦਿਸਿਤਬ੍ਬੋ, ਯੇਨ ਯੇਨ ਵਾ ਪਨ ਵਤ੍ਥੁਨਾ ਦਿਟ੍ਠਿਵਸੇਨ ਅਭਿਨਿਵਿਸਤਿ, ‘‘ਇਦਮੇਵ ਸਚ੍ਚਂ ਮੋਘਮਞ੍ਞ’’ਨ੍ਤਿ ਤੇਨ ਤੇਨੇਵ ਨਿਦ੍ਦਿਸਿਤਬ੍ਬੋ, ਤਸ੍ਸਾ ਵਿਤ੍ਥਾਰੋ ਦ੍ਵਾਸਟ੍ਠਿ ਦਿਟ੍ਠਿਗਤਾਨਿ. ਤਤ੍ਥ ਦੁਚ੍ਚਰਿਤਸਂਕਿਲੇਸੋ ਚੇਤਨਾ ਚੇਤਸਿਕਕਮ੍ਮੇਨ ਨਿਦ੍ਦਿਸਿਤਬ੍ਬੋ, ਤੀਹਿ ਦੁਚ੍ਚਰਿਤੇਹਿ ਕਾਯਦੁਚ੍ਚਰਿਤੇਨ ਵਚੀਦੁਚ੍ਚਰਿਤੇਨ ਮਨੋਦੁਚ੍ਚਰਿਤੇਨ, ਤਸ੍ਸਾ ਵਿਤ੍ਥਾਰੋ ਦਸ ਅਕੁਸਲਕਮ੍ਮਪਥਾ. ਅਪਰੇ ਚ ਮਗ੍ਗਂ ਭਾਵੇਤ੍ਵਾ, ਪਰਿਨਿਬ੍ਬਨ੍ਤਿਨਾਸਵਾਤਿ ਇਦਂ ਵੋਦਾਨਂ.

ਤਯਿਦਂ ਵੋਦਾਨਂ ਤਿਵਿਧਂ; ਤਣ੍ਹਾਸਂਕਿਲੇਸੋ ਸਮਥੇਨ ਵਿਸੁਜ੍ਝਤਿ, ਸੋ ਸਮਥੋ ਸਮਾਧਿਕ੍ਖਨ੍ਧੋ, ਦਿਟ੍ਠਿਸਂਕਿਲੇਸੋ ਵਿਪਸ੍ਸਨਾਯ ਵਿਸੁਜ੍ਝਤਿ, ਸਾ ਵਿਪਸ੍ਸਨਾ ਪਞ੍ਞਾਕ੍ਖਨ੍ਧੋ, ਦੁਚ੍ਚਰਿਤਸਂਕਿਲੇਸੋ ਸੁਚਰਿਤੇਨ ਵਿਸੁਜ੍ਝਤਿ, ਤਂ ਸੁਚਰਿਤਂ ਸੀਲਕ੍ਖਨ੍ਧੋ.

‘‘ਸਬ੍ਬੇ ਸਤ੍ਤਾ ਮਰਿਸ੍ਸਨ੍ਤਿ, ਮਰਣਨ੍ਤਂ ਹਿ ਜੀਵਿਤਂ, ਯਥਾਕਮ੍ਮਂ ਗਮਿਸ੍ਸਨ੍ਤਿ, ਪੁਞ੍ਞਪਾਪਫਲੂਪਗਾ, ਨਿਰਯਂ ਪਾਪਕਮ੍ਮਨ੍ਤਾ’’ਤਿ ਅਪੁਞ੍ਞਪ੍ਪਟਿਪਦਾ, ‘‘ਪੁਞ੍ਞਕਮ੍ਮਾ ਚ ਸੁਗ੍ਗਤਿ’’ਨ੍ਤਿ ਪੁਞ੍ਞਪ੍ਪਟਿਪਦਾ, ‘‘ਅਪਰੇ ਚ ਮਗ੍ਗਂ ਭਾਵੇਤ੍ਵਾ, ਪਰਿਨਿਬ੍ਬਨ੍ਤਿਨਾਸਵਾ’’ਤਿ ਪੁਞ੍ਞਪਾਪਸਮਤਿਕ੍ਕਮਪ੍ਪਟਿਪਦਾ, ਤਤ੍ਥ ਯਾ ਚ ਪੁਞ੍ਞਪ੍ਪਟਿਪਦਾ ਯਾ ਚ ਅਪੁਞ੍ਞਪ੍ਪਟਿਪਦਾ, ਅਯਂ ਏਕਾ ਪਟਿਪਦਾ ਸਬ੍ਬਤ੍ਥਗਾਮਿਨੀ ਏਕਾ ਅਪਾਯੇਸੁ, ਏਕਾ ਦੇਵੇਸੁ, ਯਾ ਚ ਪੁਞ੍ਞਪਾਪਸਮਤਿਕ੍ਕਮਾ ਪਟਿਪਦਾ ਅਯਂ ਤਤ੍ਥ ਤਤ੍ਥ ਗਾਮਿਨੀ ਪਟਿਪਦਾ.

ਤਯੋ ਰਾਸੀ – ਮਿਚ੍ਛਤ੍ਤਨਿਯਤੋ ਰਾਸਿ, ਸਮ੍ਮਤ੍ਤਨਿਯਤੋ ਰਾਸਿ, ਅਨਿਯਤੋ ਰਾਸਿ, ਤਤ੍ਥ ਯੋ ਚ ਮਿਚ੍ਛਤ੍ਤਨਿਯਤੋ ਰਾਸਿ ਯੋ ਚ ਸਮ੍ਮਤ੍ਤਨਿਯਤੋ ਰਾਸਿ ਏਕਾ ਪਟਿਪਦਾ ਤਤ੍ਥ ਤਤ੍ਥ ਗਾਮਿਨੀ, ਤਤ੍ਥ ਯੋ ਅਨਿਯਤੋ ਰਾਸਿ, ਅਯਂ ਸਬ੍ਬਤ੍ਥਗਾਮਿਨੀ ਪਟਿਪਦਾ. ਕੇਨ ਕਾਰਣੇਨ? ਪਚ੍ਚਯਂ ਲਭਨ੍ਤੋ ਨਿਰਯੇ ਉਪਪਜ੍ਜੇਯ੍ਯ, ਪਚ੍ਚਯਂ ਲਭਨ੍ਤੋ ਤਿਰਚ੍ਛਾਨਯੋਨੀਸੁ ਉਪਪਜ੍ਜੇਯ੍ਯ, ਪਚ੍ਚਯਂ ਲਭਨ੍ਤੋ ਪੇਤ੍ਤਿਵਿਸਯੇਸੁ ਉਪਪਜ੍ਜੇਯ੍ਯ, ਪਚ੍ਚਯਂ ਲਭਨ੍ਤੋ ਅਸੁਰੇਸੁ ਉਪਪਜ੍ਜੇਯ੍ਯ, ਪਚ੍ਚਯਂ ਲਭਨ੍ਤੋ ਦੇਵੇਸੁ ਉਪਪਜ੍ਜੇਯ੍ਯ, ਪਚ੍ਚਯਂ ਲਭਨ੍ਤੋ ਮਨੁਸ੍ਸੇਸੁ ਉਪਪਜ੍ਜੇਯ੍ਯ, ਪਚ੍ਚਯਂ ਲਭਨ੍ਤੋ ਪਰਿਨਿਬ੍ਬਾਯੇਯ੍ਯ, ਤਸ੍ਮਾਯਂ ਸਬ੍ਬਤ੍ਥਗਾਮਿਨੀ ਪਟਿਪਦਾ, ਯਂ ਏਤ੍ਥ ਞਾਣਂ ਹੇਤੁਸੋ ਠਾਨਸੋ ਅਨੋਧਿਸੋ, ਇਦਂ ਵੁਚ੍ਚਤਿ ਸਬ੍ਬਤ੍ਥਗਾਮਿਨੀ ਪਟਿਪਦਾ ਞਾਣਂ ਦੁਤਿਯਂ ਤਥਾਗਤਬਲਂ.

ਇਤਿ ਸਬ੍ਬਤ੍ਥਗਾਮਿਨੀ ਪਟਿਪਦਾ ਅਨੇਕਧਾਤੁਲੋਕੋ, ਤਤ੍ਥ ਤਤ੍ਥ ਗਾਮਿਨੀ ਪਟਿਪਦਾ ਨਾਨਾਧਾਤੁਲੋਕੋ. ਤਤ੍ਥ ਕਤਮੋ ਅਨੇਕਧਾਤੁਲੋਕੋ? ਚਕ੍ਖੁਧਾਤੁ ਰੂਪਧਾਤੁ ਚਕ੍ਖੁਵਿਞ੍ਞਾਣਧਾਤੁ, ਸੋਤਧਾਤੁ ਸਦ੍ਦਧਾਤੁ ਸੋਤਵਿਞ੍ਞਾਣਧਾਤੁ, ਘਾਨਧਾਤੁ ਗਨ੍ਧਧਾਤੁ ਘਾਨਵਿਞ੍ਞਾਣਧਾਤੁ, ਜਿਵ੍ਹਾਧਾਤੁ ਰਸਧਾਤੁ ਜਿਵ੍ਹਾਵਿਞ੍ਞਾਣਧਾਤੁ, ਕਾਯਧਾਤੁ ਫੋਟ੍ਠਬ੍ਬਧਾਤੁ ਕਾਯਵਿਞ੍ਞਾਣਧਾਤੁ, ਮਨੋਧਾਤੁ ਧਮ੍ਮਧਾਤੁ ਮਨੋਵਿਞ੍ਞਾਣਧਾਤੁ, ਪਥਵੀਧਾਤੁ, ਆਪੋਧਾਤੁ, ਤੇਜੋਧਾਤੁ, ਵਾਯੋਧਾਤੁ, ਆਕਾਸਧਾਤੁ, ਵਿਞ੍ਞਾਣਧਾਤੁ, ਕਾਮਧਾਤੁ, ਬ੍ਯਾਪਾਦਧਾਤੁ, ਵਿਹਿਂਸਾਧਾਤੁ, ਨੇਕ੍ਖਮ੍ਮਧਾਤੁ, ਅਬ੍ਯਾਪਾਦਧਾਤੁ, ਅਵਿਹਿਂਸਾਧਾਤੁ, ਦੁਕ੍ਖਧਾਤੁ, ਦੋਮਨਸ੍ਸਧਾਤੁ, ਅਵਿਜ੍ਜਾਧਾਤੁ, ਸੁਖਧਾਤੁ, ਸੋਮਨਸ੍ਸਧਾਤੁ, ਉਪੇਕ੍ਖਾਧਾਤੁ, ਰੂਪਧਾਤੁ, ਅਰੂਪਧਾਤੁ, ਨਿਰੋਧਧਾਤੁ, ਸਙ੍ਖਾਰਧਾਤੁ, ਨਿਬ੍ਬਾਨਧਾਤੁ, ਅਯਂ ਅਨੇਕਧਾਤੁਲੋਕੋ.

ਤਤ੍ਥ ਕਤਮੋ ਨਾਨਾਧਾਤੁਲੋਕੋ? ਅਞ੍ਞਾ ਚਕ੍ਖੁਧਾਤੁ, ਅਞ੍ਞਾ ਰੂਪਧਾਤੁ, ਅਞ੍ਞਾ ਚਕ੍ਖੁਵਿਞ੍ਞਾਣਧਾਤੁ. ਏਵਂ ਸਬ੍ਬਾ. ਅਞ੍ਞਾ ਨਿਬ੍ਬਾਨਧਾਤੁ. ਯਂ ਏਤ੍ਥ ਞਾਣਂ ਹੇਤੁਸੋ ਠਾਨਸੋ ਅਨੋਧਿਸੋ, ਇਦਂ ਵੁਚ੍ਚਤਿ ਅਨੇਕਧਾਤੁ ਨਾਨਾਧਾਤੁ ਞਾਣਂ ਤਤਿਯਂ ਤਥਾਗਤਬਲਂ.

੬੦. ਇਤਿ ਅਨੇਕਧਾਤੁ ਨਾਨਾਧਾਤੁਕਸ੍ਸ ਲੋਕਸ੍ਸ ਯਂ ਯਦੇਵ ਧਾਤੁਂ ਸਤ੍ਤਾ ਅਧਿਮੁਚ੍ਚਨ੍ਤਿ, ਤਂ ਤਦੇਵ ਅਧਿਟ੍ਠਹਨ੍ਤਿ ਅਭਿਨਿਵਿਸਨ੍ਤਿ, ਕੇਚਿ ਰੂਪਾਧਿਮੁਤ੍ਤਾ, ਕੇਚਿ ਸਦ੍ਦਾਧਿਮੁਤ੍ਤਾ, ਕੇਚਿ ਗਨ੍ਧਾਧਿਮੁਤ੍ਤਾ, ਕੇਚਿ ਰਸਾਧਿਮੁਤ੍ਤਾ, ਕੇਚਿ ਫੋਟ੍ਠਬ੍ਬਾਧਿਮੁਤ੍ਤਾ, ਕੇਚਿ ਧਮ੍ਮਾਧਿਮੁਤ੍ਤਾ, ਕੇਚਿ ਇਤ੍ਥਾਧਿਮੁਤ੍ਤਾ, ਕੇਚਿ ਪੁਰਿਸਾਧਿਮੁਤ੍ਤਾ, ਕੇਚਿ ਚਾਗਾਧਿਮੁਤ੍ਤਾ, ਕੇਚਿ ਹੀਨਾਧਿਮੁਤ੍ਤਾ, ਕੇਚਿ ਪਣੀਤਾਧਿਮੁਤ੍ਤਾ, ਕੇਚਿ ਦੇਵਾਧਿਮੁਤ੍ਤਾ, ਕੇਚਿ ਮਨੁਸ੍ਸਾਧਿਮੁਤ੍ਤਾ, ਕੇਚਿ ਨਿਬ੍ਬਾਨਾਧਿਮੁਤ੍ਤਾ. ਯਂ ਏਤ੍ਥ ਞਾਣਂ ਹੇਤੁਸੋ ਠਾਨਸੋ ਅਨੋਧਿਸੋ, ਅਯਂ ਵੇਨੇਯ੍ਯੋ, ਅਯਂ ਨ ਵੇਨੇਯ੍ਯੋ, ਅਯਂ ਸਗ੍ਗਗਾਮੀ, ਅਯਂ ਦੁਗ੍ਗਤਿਗਾਮੀਤਿ, ਇਦਂ ਵੁਚ੍ਚਤਿ ਸਤ੍ਤਾਨਂ ਨਾਨਾਧਿਮੁਤ੍ਤਿਕਤਾ ਞਾਣਂ ਚਤੁਤ੍ਥਂ ਤਥਾਗਤਬਲਂ.

ਇਤਿ ਤੇ ਯਥਾਧਿਮੁਤ੍ਤਾ ਚ ਭਵਨ੍ਤਿ, ਤਂ ਤਂ ਕਮ੍ਮਸਮਾਦਾਨਂ ਸਮਾਦਿਯਨ੍ਤਿ. ਤੇ ਛਬ੍ਬਿਧਂ ਕਮ੍ਮਂ ਸਮਾਦਿਯਨ੍ਤਿ – ਕੇਚਿ ਲੋਭਵਸੇਨ, ਕੇਚਿ ਦੋਸਵਸੇਨ, ਕੇਚਿ ਮੋਹਵਸੇਨ, ਕੇਚਿ ਸਦ੍ਧਾਵਸੇਨ, ਕੇਚਿ ਵੀਰਿਯਵਸੇਨ, ਕੇਚਿ ਪਞ੍ਞਾਵਸੇਨ. ਤਂ ਵਿਭਜ੍ਜਮਾਨਂ ਦੁਵਿਧਂ – ਸਂਸਾਰਗਾਮਿ ਚ ਨਿਬ੍ਬਾਨਗਾਮਿ ਚ.

ਤਤ੍ਥ ਯਂ ਲੋਭਵਸੇਨ ਦੋਸਵਸੇਨ ਮੋਹਵਸੇਨ ਚ ਕਮ੍ਮਂ ਕਰੋਤਿ, ਇਦਂ ਕਮ੍ਮਂ ਕਣ੍ਹਂ ਕਣ੍ਹਵਿਪਾਕਂ. ਤਤ੍ਥ ਯਂ ਸਦ੍ਧਾਵਸੇਨ ਕਮ੍ਮਂ ਕਰੋਤਿ, ਇਦਂ ਕਮ੍ਮਂ ਸੁਕ੍ਕਂ ਸੁਕ੍ਕਵਿਪਾਕਂ. ਤਤ੍ਥ ਯਂ ਲੋਭਵਸੇਨ ਦੋਸਵਸੇਨ ਮੋਹਵਸੇਨ ਸਦ੍ਧਾਵਸੇਨ ਚ ਕਮ੍ਮਂ ਕਰੋਤਿ, ਇਦਂ ਕਮ੍ਮਂ ਕਣ੍ਹਸੁਕ੍ਕਂ ਕਣ੍ਹਸੁਕ੍ਕਵਿਪਾਕਂ. ਤਤ੍ਥ ਯਂ ਵੀਰਿਯਵਸੇਨ ਪਞ੍ਞਾਵਸੇਨ ਚ ਕਮ੍ਮਂ ਕਰੋਤਿ, ਇਦਂ ਕਮ੍ਮਂ ਅਕਣ੍ਹਂ ਅਸੁਕ੍ਕਂ ਅਕਣ੍ਹਅਸੁਕ੍ਕਵਿਪਾਕਂ ਕਮ੍ਮੁਤ੍ਤਮਂ ਕਮ੍ਮਸੇਟ੍ਠਂ ਕਮ੍ਮਕ੍ਖਯਾਯ ਸਂਵਤ੍ਤਤਿ.

ਚਤ੍ਤਾਰਿ ਕਮ੍ਮਸਮਾਦਾਨਾਨਿ. ਅਤ੍ਥਿ ਕਮ੍ਮਸਮਾਦਾਨਂ ਪਚ੍ਚੁਪ੍ਪਨ੍ਨਸੁਖਂ ਆਯਤਿਂ ਦੁਕ੍ਖਵਿਪਾਕਂ, ਅਤ੍ਥਿ ਕਮ੍ਮਸਮਾਦਾਨਂ ਪਚ੍ਚੁਪ੍ਪਨ੍ਨਦੁਕ੍ਖਂ ਆਯਤਿਂ ਸੁਖਵਿਪਾਕਂ, ਅਤ੍ਥਿ ਕਮ੍ਮਸਮਾਦਾਨਂ ਪਚ੍ਚੁਪ੍ਪਨ੍ਨਦੁਕ੍ਖਞ੍ਚੇਵ ਆਯਤਿਂ ਚ ਦੁਕ੍ਖਵਿਪਾਕਂ, ਅਤ੍ਥਿ ਕਮ੍ਮਸਮਾਦਾਨਂ ਪਚ੍ਚੁਪ੍ਪਨ੍ਨਸੁਖਞ੍ਚੇਵ ਆਯਤਿਂ ਚ ਸੁਖਵਿਪਾਕਂ. ਯਂ ਏਵਂ ਜਾਤਿਯਂ ਕਮ੍ਮਸਮਾਦਾਨਂ, ਇਮਿਨਾ ਪੁਗ੍ਗਲੇਨ ਅਕੁਸਲਕਮ੍ਮਸਮਾਦਾਨਂ ਉਪਚਿਤਂ ਅਵਿਪਕ੍ਕਂ ਵਿਪਾਕਾਯ ਪਚ੍ਚੁਪਟ੍ਠਿਤਂ ਨ ਚ ਭਬ੍ਬੋ ਅਭਿਨਿਬ੍ਬਿਧਾ ਗਨ੍ਤੁਨ੍ਤਿ ਤਂ ਭਗਵਾ ਨ ਓਵਦਤਿ. ਯਥਾ ਦੇਵਦਤ੍ਤਂ ਕੋਕਾਲਿਕਂ ਸੁਨਕ੍ਖਤ੍ਤਂ ਲਿਚ੍ਛਵਿਪੁਤ੍ਤਂ, ਯੇ ਵਾ ਪਨਞ੍ਞੇਪਿ ਸਤ੍ਤਾ ਮਿਚ੍ਛਤ੍ਤਨਿਯਤਾ ਇਮੇਸਞ੍ਚ ਪੁਗ੍ਗਲਾਨਂ ਉਪਚਿਤਂ ਅਕੁਸਲਂ ਨ ਚ ਤਾਵ ਪਾਰਿਪੂਰਿਂ ਗਤਂ, ਪੁਰਾ ਪਾਰਿਪੂਰਿਂ ਗਚ੍ਛਤਿ. ਪੁਰਾ ਫਲਂ ਨਿਬ੍ਬਤ੍ਤਯਤਿ, ਪੁਰਾ ਮਗ੍ਗਮਾਵਾਰਯਤਿ, ਪੁਰਾ ਵੇਨੇਯ੍ਯਤ੍ਤਂ ਸਮਤਿਕ੍ਕਮਤੀਤਿ ਤੇ ਭਗਵਾ ਅਸਮਤ੍ਤੇ ਓਵਦਤਿ. ਯਥਾ ਪੁਣ੍ਣਞ੍ਚ ਗੋਵਤਿਕਂ ਅਚੇਲਞ੍ਚ ਕੁਕ੍ਕੁਰਵਤਿਕਂ.

੬੧. ਇਮਸ੍ਸ ਚ ਪੁਗ੍ਗਲਸ੍ਸ ਅਕੁਸਲਕਮ੍ਮਸਮਾਦਾਨਂ ਪਰਿਪੂਰਮਾਨਂ ਮਗ੍ਗਂ ਆਵਾਰਯਿਸ੍ਸਤਿ ਪੁਰਾ ਪਾਰਿਪੂਰਿਂ ਗਚ੍ਛਤਿ, ਪੁਰਾ ਫਲਂ ਨਿਬ੍ਬਤ੍ਤਯਤਿ, ਪੁਰਾ ਮਗ੍ਗਮਾਵਾਰਯਤਿ, ਪੁਰਾ ਵੇਨੇਯ੍ਯਤ੍ਤਂ ਸਮਤਿਕ੍ਕਮਤੀਤਿ ਤਂ ਭਗਵਾ ਅਸਮਤ੍ਤਂ ਓਵਦਤਿ. ਯਥਾ ਆਯਸ੍ਮਨ੍ਤਂ ਅਙ੍ਗੁਲਿਮਾਲਂ.

ਸਬ੍ਬੇਸਂ ਮੁਦੁਮਜ੍ਝਾਧਿਮਤ੍ਤਤਾ. ਤਤ੍ਥ ਮੁਦੁ ਆਨੇਞ੍ਜਾਭਿਸਙ੍ਖਾਰਾ ਮਜ੍ਝਂ ਅਵਸੇਸਕੁਸਲਸਙ੍ਖਾਰਾ, ਅਧਿਮਤ੍ਤਂ ਅਕੁਸਲਸਙ੍ਖਾਰਾ, ਯਂ ਏਤ੍ਥ ਞਾਣਂ ਹੇਤੁਸੋ ਠਾਨਸੋ ਅਨੋਧਿਸੋ, ਇਦਂ ਦਿਟ੍ਠਧਮ੍ਮਵੇਦਨੀਯਂ, ਇਦਂ ਉਪਪਜ੍ਜਵੇਦਨੀਯਂ, ਇਦਂ ਅਪਰਾਪਰਿਯਵੇਦਨੀਯਂ, ਇਦਂ ਨਿਰਯਵੇਦਨੀਯਂ, ਇਦਂ ਤਿਰਚ੍ਛਾਨਵੇਦਨੀਯਂ, ਇਦਂ ਪੇਤ੍ਤਿਵਿਸਯਵੇਦਨੀਯਂ, ਇਦਂ ਅਸੁਰਵੇਦਨੀਯਂ, ਇਦਂ ਦੇਵਵੇਦਨੀਯਂ, ਇਦਂ ਮਨੁਸ੍ਸਵੇਦਨੀਯਨ੍ਤਿ, ਇਦਂ ਵੁਚ੍ਚਤਿ ਅਤੀਤਾਨਾਗਤਪਚ੍ਚੁਪ੍ਪਨ੍ਨਾਨਂ ਕਮ੍ਮਸਮਾਦਾਨਾਨਂ ਹੇਤੁਸੋ ਠਾਨਸੋ ਅਨੋਧਿਸੋ ਵਿਪਾਕਵੇਮਤ੍ਤਤਾ ਞਾਣਂ ਪਞ੍ਚਮਂ ਤਥਾਗਤਬਲਂ.

੬੨. ਇਤਿ ਤਥਾ ਸਮਾਦਿਨ੍ਨਾਨਂ ਕਮ੍ਮਾਨਂ ਸਮਾਦਿਨ੍ਨਾਨਂ ਝਾਨਾਨਂ ਵਿਮੋਕ੍ਖਾਨਂ ਸਮਾਧੀਨਂ ਸਮਾਪਤ੍ਤੀਨਂ ਅਯਂ ਸਂਕਿਲੇਸੋ, ਇਦਂ ਵੋਦਾਨਂ, ਇਦਂ ਵੁਟ੍ਠਾਨਂ, ਏਵਂ ਸਂਕਿਲਿਸ੍ਸਤਿ, ਏਵਂ ਵੋਦਾਯਤਿ, ਏਵਂ ਵੁਟ੍ਠਹਤੀਤਿ ਞਾਣਂ ਅਨਾਵਰਣਂ.

ਤਤ੍ਥ ਕਤਿ ਝਾਨਾਨਿ? ਚਤ੍ਤਾਰਿ ਝਾਨਾਨਿ. ਕਤਿ ਵਿਮੋਕ੍ਖਾ? ਏਕਾਦਸ ਚ ਅਟ੍ਠ ਚ ਸਤ੍ਤ ਚ ਤਯੋ ਚ ਦ੍ਵੇ ਚ. ਕਤਿ ਸਮਾਧੀ? ਤਯੋ ਸਮਾਧੀ – ਸਵਿਤਕ੍ਕੋ ਸਵਿਚਾਰੋ ਸਮਾਧਿ, ਅਵਿਤਕ੍ਕੋ ਵਿਚਾਰਮਤ੍ਤੋ ਸਮਾਧਿ, ਅਵਿਤਕ੍ਕੋ ਅਵਿਚਾਰੋ ਸਮਾਧਿ. ਕਤਿ ਸਮਾਪਤ੍ਤਿਯੋ? ਪਞ੍ਚ ਸਮਾਪਤ੍ਤਿਯੋ – ਸਞ੍ਞਾਸਮਾਪਤ੍ਤਿ ਅਸਞ੍ਞਾਸਮਾਪਤ੍ਤਿ ਨੇਵਸਞ੍ਞਾਨਾਸਞ੍ਞਾਸਮਾਪਤ੍ਤਿ ਵਿਭੂਤਸਞ੍ਞਾਸਮਾਪਤ੍ਤਿ [ਵਿਭੂਤਸਮਾਪਤ੍ਤਿ (ਸੀ. ਕ.)] ਨਿਰੋਧਸਮਾਪਤ੍ਤਿ.

ਤਤ੍ਥ ਕਤਮੋ ਸਂਕਿਲੇਸੋ? ਪਠਮਜ੍ਝਾਨਸ੍ਸ ਕਾਮਰਾਗਬ੍ਯਾਪਾਦਾ ਸਂਕਿਲੇਸੋ. ਯੇ ਚ ਕੁਕ੍ਕੁਟਝਾਯੀ ਦ੍ਵੇ ਪਠਮਕਾ ਯੋ ਵਾ ਪਨ ਕੋਚਿ ਹਾਨਭਾਗਿਯੋ ਸਮਾਧਿ, ਅਯਂ ਸਂਕਿਲੇਸੋ. ਤਤ੍ਥ ਕਤਮਂ ਵੋਦਾਨਂ, ਨੀਵਰਣਪਾਰਿਸੁਦ੍ਧਿ, ਪਠਮਸ੍ਸ ਝਾਨਸ੍ਸ ਯੇ ਚ ਕੁਕ੍ਕੁਟਝਾਯੀ ਦ੍ਵੇ ਪਚ੍ਛਿਮਕਾ ਯੋ ਵਾ ਪਨ ਕੋਚਿ ਵਿਸੇਸਭਾਗਿਯੋ ਸਮਾਧਿ, ਇਦਂ ਵੋਦਾਨਂ. ਤਤ੍ਥ ਕਤਮਂ ਵੁਟ੍ਠਾਨਂ? ਯਂ ਸਮਾਪਤ੍ਤਿਵੁਟ੍ਠਾਨਕੋਸਲ੍ਲਂ, ਇਦਂ ਵੁਟ੍ਠਾਨਂ. ਯਂ ਏਤ੍ਥ ਞਾਣਂ ਹੇਤੁਸੋ ਠਾਨਸੋ ਅਨੋਧਿਸੋ, ਇਦਂ ਵੁਚ੍ਚਤਿ ਸਬ੍ਬੇਸਂ ਝਾਨਵਿਮੋਕ੍ਖਸਮਾਧਿਸਮਾਪਤ੍ਤੀਨਂ ਸਂਕਿਲੇਸਵੋਦਾਨਵੁਟ੍ਠਾਨਞਾਣਂ ਛਟ੍ਠਂ ਤਥਾਗਤਬਲਂ.

੬੩. ਇਤਿ ਤਸ੍ਸੇਵ ਸਮਾਧਿਸ੍ਸ ਤਯੋ ਧਮ੍ਮਾ ਪਰਿਵਾਰਾ ਇਨ੍ਦ੍ਰਿਯਾਨਿ ਬਲਾਨਿ ਵੀਰਿਯਮਿਤਿ, ਤਾਨਿਯੇਵ ਇਨ੍ਦ੍ਰਿਯਾਨਿ ਵੀਰਿਯਵਸੇਨ ਬਲਾਨਿ ਭਵਨ੍ਤਿ, ਆਧਿਪਤੇਯ੍ਯਟ੍ਠੇਨ ਇਨ੍ਦ੍ਰਿਯਾਨਿ, ਅਕਮ੍ਪਿਯਟ੍ਠੇਨ ਬਲਾਨਿ, ਇਤਿ ਤੇਸਂ ਮੁਦੁਮਜ੍ਝਾਧਿਮਤ੍ਤਤਾ ਅਯਂ ਮੁਦਿਨ੍ਦ੍ਰਿਯੋ ਅਯਂ ਮਜ੍ਝਿਨ੍ਦ੍ਰਿਯੋ ਅਯਂ ਤਿਕ੍ਖਿਨ੍ਦ੍ਰਿਯੋਤਿ. ਤਤ੍ਥ ਭਗਵਾ ਤਿਕ੍ਖਿਨ੍ਦ੍ਰਿਯਂ ਸਂਖਿਤ੍ਤੇਨ ਓਵਾਦੇਨ ਓਵਦਤਿ, ਮਜ੍ਝਿਨ੍ਦ੍ਰਿਯਂ ਭਗਵਾ ਸਂਖਿਤ੍ਤਵਿਤ੍ਥਾਰੇਨ ਓਵਦਤਿ, ਮੁਦਿਨ੍ਦ੍ਰਿਯਂ ਭਗਵਾ ਵਿਤ੍ਥਾਰੇਨ ਓਵਦਤਿ. ਤਤ੍ਥ ਭਗਵਾ ਤਿਕ੍ਖਿਨ੍ਦ੍ਰਿਯਸ੍ਸ ਮੁਦੁਕਂ ਧਮ੍ਮਦੇਸਨਂ ਉਪਦਿਸਤਿ, ਮਜ੍ਝਿਨ੍ਦ੍ਰਿਯਸ੍ਸ ਭਗਵਾ ਮੁਦੁਤਿਕ੍ਖਧਮ੍ਮਦੇਸਨਂ ਉਪਦਿਸਤਿ, ਮੁਦਿਨ੍ਦ੍ਰਿਯਸ੍ਸ ਭਗਵਾ ਤਿਕ੍ਖਂ ਧਮ੍ਮਦੇਸਨਂ ਉਪਦਿਸਤਿ. ਤਤ੍ਥ ਭਗਵਾ ਤਿਕ੍ਖਿਨ੍ਦ੍ਰਿਯਸ੍ਸ ਸਮਥਂ ਉਪਦਿਸਤਿ, ਮਜ੍ਝਿਨ੍ਦ੍ਰਿਯਸ੍ਸ ਭਗਵਾ ਸਮਥਵਿਪਸ੍ਸਨਂ ਉਪਦਿਸਤਿ, ਮੁਦਿਨ੍ਦ੍ਰਿਯਸ੍ਸ ਭਗਵਾ ਵਿਪਸ੍ਸਨਂ ਉਪਦਿਸਤਿ. ਤਤ੍ਥ ਭਗਵਾ ਤਿਕ੍ਖਿਨ੍ਦ੍ਰਿਯਸ੍ਸ ਨਿਸ੍ਸਰਣਂ ਉਪਦਿਸਤਿ, ਮਜ੍ਝਿਨ੍ਦ੍ਰਿਯਸ੍ਸ ਭਗਵਾ ਆਦੀਨਵਞ੍ਚ ਨਿਸ੍ਸਰਣਞ੍ਚ ਉਪਦਿਸਤਿ, ਮੁਦਿਨ੍ਦ੍ਰਿਯਸ੍ਸ ਭਗਵਾ ਅਸ੍ਸਾਦਞ੍ਚ ਆਦੀਨਵਞ੍ਚ ਨਿਸ੍ਸਰਣਞ੍ਚ ਉਪਦਿਸਤਿ. ਤਤ੍ਥ ਭਗਵਾ ਤਿਕ੍ਖਿਨ੍ਦ੍ਰਿਯਸ੍ਸ ਅਧਿਪਞ੍ਞਾਸਿਕ੍ਖਾਯ ਪਞ੍ਞਾਪਯਤਿ, ਮਜ੍ਝਿਨ੍ਦ੍ਰਿਯਸ੍ਸ ਭਗਵਾ ਅਧਿਚਿਤ੍ਤਸਿਕ੍ਖਾਯ ਪਞ੍ਞਾਪਯਤਿ, ਮੁਦਿਨ੍ਦ੍ਰਿਯਸ੍ਸ ਭਗਵਾ ਅਧਿਸੀਲਸਿਕ੍ਖਾਯ ਪਞ੍ਞਾਪਯਤਿ.

ਯਂ ਏਤ੍ਥ ਞਾਣਂ ਹੇਤੁਸੋ ਠਾਨਸੋ ਅਨੋਧਿਸੋ ਅਯਂ ਇਮਂ ਭੂਮਿਂ ਭਾਵਨਞ੍ਚ ਗਤੋ, ਇਮਾਯ ਵੇਲਾਯ ਇਮਾਯ ਅਨੁਸਾਸਨਿਯਾ ਏਵਂ ਧਾਤੁਕੋ ਚਾਯਂ ਅਯਂ ਚਸ੍ਸ ਆਸਯੋ ਅਯਞ੍ਚ ਅਨੁਸਯੋ ਇਤਿ, ਇਦਂ ਵੁਚ੍ਚਤਿ ਪਰਸਤ੍ਤਾਨਂ ਪਰਪੁਗ੍ਗਲਾਨਂ ਇਨ੍ਦ੍ਰਿਯਪਰੋਪਰਿਯਤ੍ਤਵੇਮਤ੍ਤਤਾ ਞਾਣਂ ਸਤ੍ਤਮਂ ਤਥਾਗਤਬਲਂ.

ਇਤਿ ਤਤ੍ਥ ਯਂ ਅਨੇਕਵਿਹਿਤਂ ਪੁਬ੍ਬੇਨਿਵਾਸਂ ਅਨੁਸ੍ਸਰਤਿ. ਸੇਯ੍ਯਥਿਦਂ, ਏਕਮ੍ਪਿ ਜਾਤਿਂ ਦ੍ਵੇਪਿ ਜਾਤਿਯੋ ਤਿਸ੍ਸੋਪਿ ਜਾਤਿਯੋ ਚਤਸ੍ਸੋਪਿ ਜਾਤਿਯੋ ਪਞ੍ਚਪਿ ਜਾਤਿਯੋ ਦਸਪਿ ਜਾਤਿਯੋ ਵੀਸਮ੍ਪਿ ਜਾਤਿਯੋ ਤਿਂਸਮ੍ਪਿ ਜਾਤਿਯੋ ਚਤ੍ਤਾਰੀਸਮ੍ਪਿ ਜਾਤਿਯੋ ਪਞ੍ਞਾਸਮ੍ਪਿ ਜਾਤਿਯੋ ਜਾਤਿਸਤਮ੍ਪਿ ਜਾਤਿਸਹਸ੍ਸਮ੍ਪਿ ਜਾਤਿਸਤਸਹਸ੍ਸਮ੍ਪਿ ਅਨੇਕਾਨਿਪਿ ਜਾਤਿਸਤਾਨਿ ਅਨੇਕਾਨਿਪਿ ਜਾਤਿਸਹਸ੍ਸਾਨਿ ਅਨੇਕਾਨਿਪਿ ਜਾਤਿਸਤਸਹਸ੍ਸਾਨਿ ਅਨੇਕੇਪਿ ਸਂਵਟ੍ਟਕਪ੍ਪੇ ਅਨੇਕੇਪਿ ਵਿਵਟ੍ਟਕਪ੍ਪੇ ਅਨੇਕੇਪਿ ਸਂਵਟ੍ਟਵਿਵਟ੍ਟਕਪ੍ਪੇ. ਅਮੁਤ੍ਰਾਸਿਂ ਏਵਂਨਾਮੋ ਏਵਂਗੋਤ੍ਤੋ ਏਵਂਵਣ੍ਣੋ ਏਵਮਾਹਾਰੋ ਏਵਂਸੁਖਦੁਕ੍ਖਪ੍ਪਟਿਸਂਵੇਦੀ ਏਵਮਾਯੁਪਰਿਯਨ੍ਤੋ, ਸੋ ਤਤੋ ਚੁਤੋ ਅਮੁਤ੍ਰ ਉਦਪਾਦਿਂ. ਤਤ੍ਰਾਪਾਸਿਂ ਏਵਂਨਾਮੋ ਏਵਂਗੋਤ੍ਤੋ ਏਵਂਵਣ੍ਣੋ ਏਵਮਾਹਾਰੋ ਏਵਂਸੁਖਦੁਕ੍ਖਪ੍ਪਟਿਸਂਵੇਦੀ ਏਵਮਾਯੁਪਰਿਯਨ੍ਤੋ, ਸੋ ਤਤੋ ਚੁਤੋ ਇਧੂਪਪਨ੍ਨੋਤਿ, ਇਤਿ ਸਾਕਾਰਂ ਸਉਦ੍ਦੇਸਂ ਅਨੇਕਵਿਹਿਤਂ ਪੁਬ੍ਬੇਨਿਵਾਸਂ ਅਨੁਸ੍ਸਰਤਿ.

੬੪. ਤਤ੍ਥ ਸਗ੍ਗੂਪਗੇਸੁ ਚ ਸਤ੍ਤੇਸੁ ਮਨੁਸ੍ਸੂਪਗੇਸੁ ਚ ਸਤ੍ਤੇਸੁ ਅਪਾਯੂਪਗੇਸੁ ਚ ਸਤ੍ਤੇਸੁ ਇਮਸ੍ਸ ਪੁਗ੍ਗਲਸ੍ਸ ਲੋਭਾਦਯੋ ਉਸ੍ਸਨ੍ਨਾ ਅਲੋਭਾਦਯੋ ਮਨ੍ਦਾ, ਇਮਸ੍ਸ ਪੁਗ੍ਗਲਸ੍ਸ ਅਲੋਭਾਦਯੋ ਉਸ੍ਸਨ੍ਨਾ ਲੋਭਾਦਯੋ ਮਨ੍ਦਾ, ਯੇ ਵਾ ਪਨ ਉਸ੍ਸਨ੍ਨਾ ਯੇ ਵਾ ਪਨ ਮਨ੍ਦਾ ਇਮਸ੍ਸ ਪੁਗ੍ਗਲਸ੍ਸ ਇਮਾਨਿ ਇਨ੍ਦ੍ਰਿਯਾਨਿ ਉਪਚਿਤਾਨਿ ਇਮਸ੍ਸ ਪੁਗ੍ਗਲਸ੍ਸ ਇਮਾਨਿ ਇਨ੍ਦ੍ਰਿਯਾਨਿ ਅਨੁਪਚਿਤਾਨਿ ਅਮੁਕਾਯ ਵਾ ਕਪ੍ਪਕੋਟਿਯਂ ਕਪ੍ਪਸਤਸਹਸ੍ਸੇ ਵਾ ਕਪ੍ਪਸਹਸ੍ਸੇ ਵਾ ਕਪ੍ਪਸਤੇ ਵਾ ਕਪ੍ਪੇ ਵਾ ਅਨ੍ਤਰਕਪ੍ਪੇ ਵਾ ਉਪਡ੍ਢਕਪ੍ਪੇ ਵਾ ਸਂਵਚ੍ਛਰੇ ਵਾ ਉਪਡ੍ਢਸਂਵਚ੍ਛਰੇ ਵਾ ਮਾਸੇ ਵਾ ਪਕ੍ਖੇ ਵਾ ਦਿਵਸੇ ਵਾ ਮੁਹੁਤ੍ਤੇ ਵਾ ਇਮਿਨਾ ਪਮਾਦੇਨ ਵਾ ਪਸਾਦੇਨ ਵਾਤਿ. ਤਂ ਤਂ ਭਵਂ ਭਗਵਾ ਅਨੁਸ੍ਸਰਨ੍ਤੋ ਅਸੇਸਂ ਜਾਨਾਤਿ, ਤਤ੍ਥ ਯਂ ਦਿਬ੍ਬੇਨ ਚਕ੍ਖੁਨਾ ਵਿਸੁਦ੍ਧੇਨ ਅਤਿਕ੍ਕਨ੍ਤਮਾਨੁਸਕੇਨ ਸਤ੍ਤੇ ਪਸ੍ਸਤਿ ਚਵਮਾਨੇ ਉਪਪਜ੍ਜਮਾਨੇ ਹੀਨੇ ਪਣੀਤੇ ਸੁਵਣ੍ਣੇ ਦੁਬ੍ਬਣ੍ਣੇ ਸੁਗਤੇ ਦੁਗ੍ਗਤੇ ਯਥਾਕਮ੍ਮੂਪਗੇ ਸਤ੍ਤੇ ਪਜਾਨਾਤਿ ਇਮੇ ਵਤ ਭੋਨ੍ਤੋ ਸਤ੍ਤਾ ਕਾਯਦੁਚ੍ਚਰਿਤੇਨ ਸਮਨ੍ਨਾਗਤਾ ਵਚੀਦੁਚ੍ਚਰਿਤੇਨ ਸਮਨ੍ਨਾਗਤਾ ਮਨੋਦੁਚ੍ਚਰਿਤੇਨ ਸਮਨ੍ਨਾਗਤਾ ਅਰਿਯਾਨਂ ਉਪਵਾਦਕਾ ਮਿਚ੍ਛਾਦਿਟ੍ਠਿਕਾ ਮਿਚ੍ਛਾਦਿਟ੍ਠਿਕਮ੍ਮਸਮਾਦਾਨਾ, ਤੇ ਕਾਯਸ੍ਸ ਭੇਦਾ ਪਰਂ ਮਰਣਾ ਅਪਾਯਂ ਦੁਗ੍ਗਤਿਂ ਵਿਨਿਪਾਤਂ ਨਿਰਯਂ ਉਪਪਨ੍ਨਾ.

ਇਮੇ ਵਾ ਪਨ ਭੋਨ੍ਤੋ ਸਤ੍ਤਾ ਕਾਯਸੁਚਰਿਤੇਨ ਸਮਨ੍ਨਾਗਤਾ ਵਚੀਸੁਚਰਿਤੇਨ ਸਮਨ੍ਨਾਗਤਾ ਮਨੋਸੁਚਰਿਤੇਨ ਸਮਨ੍ਨਾਗਤਾ ਅਰਿਯਾਨਂ ਅਨੁਪਵਾਦਕਾ ਸਮ੍ਮਾਦਿਟ੍ਠਿਕਾ ਸਮ੍ਮਾਦਿਟ੍ਠਿਕਮ੍ਮਸਮਾਦਾਨਾ, ਤੇ ਕਾਯਸ੍ਸ ਭੇਦਾ ਪਰਂ ਮਰਣਾ ਸੁਗਤਿਂ ਸਗ੍ਗਂ ਲੋਕਂ ਉਪਪਨ੍ਨਾ, ਤਤ੍ਥ ਸਗ੍ਗੂਪਗੇਸੁ ਚ ਸਤ੍ਤੇਸੁ ਮਨੁਸ੍ਸੂਪਗੇਸੁ ਚ ਸਤ੍ਤੇਸੁ ਅਪਾਯੂਪਗੇਸੁ ਚ ਸਤ੍ਤੇਸੁ ਇਮਿਨਾ ਪੁਗ੍ਗਲੇਨ ਏਵਰੂਪਂ ਕਮ੍ਮਂ ਅਮੁਕਾਯ ਕਪ੍ਪਕੋਟਿਯਂ ਉਪਚਿਤਂ ਕਪ੍ਪਸਤਸਹਸ੍ਸੇ ਵਾ ਕਪ੍ਪਸਹਸ੍ਸੇ ਵਾ ਕਪ੍ਪਸਤੇ ਵਾ ਕਪ੍ਪੇ ਵਾ ਅਨ੍ਤਰਕਪ੍ਪੇ ਵਾ ਉਪਡ੍ਢਕਪ੍ਪੇ ਵਾ ਸਂਵਚ੍ਛਰੇ ਵਾ ਉਪਡ੍ਢਸਂਵਚ੍ਛਰੇ ਵਾ ਮਾਸੇ ਵਾ ਪਕ੍ਖੇ ਵਾ ਦਿਵਸੇ ਵਾ ਮੁਹੁਤ੍ਤੇ ਵਾ ਇਮਿਨਾ ਪਮਾਦੇਨ ਵਾ ਪਸਾਦੇਨ ਵਾਤਿ. ਇਮਾਨਿ ਭਗਵਤੋ ਦ੍ਵੇ ਞਾਣਾਨਿ – ਪੁਬ੍ਬੇਨਿਵਾਸਾਨੁਸ੍ਸਤਿਞਾਣਞ੍ਚ ਦਿਬ੍ਬਚਕ੍ਖੁ ਚ ਅਟ੍ਠਮਂ ਨਵਮਂ ਤਥਾਗਤਬਲਂ.

ਇਤਿ ਤਤ੍ਥ ਯਂ ਸਬ੍ਬਞ੍ਞੁਤਾ ਪਤ੍ਤਾ ਵਿਦਿਤਾ ਸਬ੍ਬਧਮ੍ਮਾ ਵਿਰਜਂ ਵੀਤਮਲਂ ਉਪ੍ਪਨ੍ਨਂ ਸਬ੍ਬਞ੍ਞੁਤਞਾਣਂ ਨਿਹਤੋ ਮਾਰੋ ਬੋਧਿਮੂਲੇ, ਇਦਂ ਭਗਵਤੋ ਦਸਮਂ ਬਲਂ ਸਬ੍ਬਾਸਵਪਰਿਕ੍ਖਯਂ ਞਾਣਂ. ਦਸਬਲਸਮਨ੍ਨਾਗਤਾ ਹਿ ਬੁਦ੍ਧਾ ਭਗਵਨ੍ਤੋਤਿ.

ਨਿਯੁਤ੍ਤੋ ਵਿਚਯੋ ਹਾਰਸਮ੍ਪਾਤੋ.