੬. ਉਪਸੀਵਮਾਣਵਪੁਚ੍ਛਾਨਿਦ੍ਦੇਸੋ

੩੮. ਏਕੋ ਅਹਂ ਸਕ੍ਕ ਮਹਨ੍ਤਮੋਘਂ, [ਇਚ੍ਚਾਯਸ੍ਮਾ ਉਪਸੀਵੋ]

ਅਨਿਸ੍ਸਿਤੋ ਨੋ ਵਿਸਹਾਮਿ ਤਾਰਿਤੁਂ;

ਆਰਮ੍ਮਣਂ [ਆਰਮਣਂ (ਕ.)] ਬ੍ਰੂਹਿ ਸਮਨ੍ਤਚਕ੍ਖੁ, ਯਂ ਨਿਸ੍ਸਿਤੋ ਓਘਮਿਮਂ ਤਰੇਯ੍ਯਂ.

ਏਕੋ ਅਹਂ ਸਕ੍ਕ ਮਹਨ੍ਤਮੋਘਨ੍ਤਿ. ਏਕੋਤਿ ਪੁਗ੍ਗਲੋ ਵਾ ਮੇ ਦੁਤਿਯੋ ਨਤ੍ਥਿ, ਧਮ੍ਮੋ ਵਾ ਮੇ ਦੁਤਿਯੋ ਨਤ੍ਥਿ, ਯਂ ਵਾ ਪੁਗ੍ਗਲਂ ਨਿਸ੍ਸਾਯ ਧਮ੍ਮਂ ਵਾ ਨਿਸ੍ਸਾਯ ਮਹਨ੍ਤਂ ਕਾਮੋਘਂ ਭਵੋਘਂ ਦਿਟ੍ਠੋਘਂ ਅਵਿਜ੍ਜੋਘਂ ਤਰੇਯ੍ਯਂ ਉਤ੍ਤਰੇਯ੍ਯਂ ਪਤਰੇਯ੍ਯਂ ਸਮਤਿਕ੍ਕਮੇਯ੍ਯਂ ਵੀਤਿਵਤ੍ਤੇਯ੍ਯਨ੍ਤਿ. ਸਕ੍ਕਾਤਿ ਸਕ੍ਕੋ. ਭਗਵਾ ਸਕ੍ਯਕੁਲਾ ਪਬ੍ਬਜਿਤੋਤਿਪਿ ਸਕ੍ਕੋ. ਅਥ ਵਾ, ਅਡ੍ਢੋ ਮਹਦ੍ਧਨੋ ਧਨਵਾਤਿਪਿ ਸਕ੍ਕੋ. ਤਸ੍ਸਿਮਾਨਿ ਧਨਾਨਿ, ਸੇਯ੍ਯਥਿਦਂ – ਸਦ੍ਧਾਧਨਂ ਸੀਲਧਨਂ ਹਿਰਿਧਨਂ ਓਤ੍ਤਪ੍ਪਧਨਂ ਸੁਤਧਨਂ ਚਾਗਧਨਂ ਪਞ੍ਞਾਧਨਂ ਸਤਿਪਟ੍ਠਾਨਧਨਂ…ਪੇ… ਨਿਬ੍ਬਾਨਧਨਂ. ਇਮੇਹਿ ਅਨੇਕੇਹਿ ਧਨਰਤਨੇਹਿ ਅਡ੍ਢੋ ਮਹਦ੍ਧਨੋ ਧਨਵਾਤਿਪਿ ਸਕ੍ਕੋ. ਅਥ ਵਾ, ਸਕ੍ਕੋ ਪਹੁ ਵਿਸਵੀ ਅਲਮਤ੍ਤੋ ਸੂਰੋ ਵੀਰੋ ਵਿਕ੍ਕਨ੍ਤੋ ਅਭੀਰੂ ਅਛਮ੍ਭੀ ਅਨੁਤ੍ਰਾਸੀ ਅਪਲਾਯੀ ਪਹੀਨਭਯਭੇਰਵੋ ਵਿਗਤਲੋਮਹਂਸੋਤਿਪਿ ਸਕ੍ਕੋਤਿ – ਏਕੋ ਅਹਂ ਸਕ੍ਕ ਮਹਨ੍ਤਮੋਘਂ.

ਇਚ੍ਚਾਯਸ੍ਮਾ ਉਪਸੀਵੋਤਿ. ਇਚ੍ਚਾਤਿ ਪਦਸਨ੍ਧਿ…ਪੇ…. ਆਯਸ੍ਮਾਤਿ ਪਿਯਵਚਨਂ…ਪੇ…. ਉਪਸੀਵੋਤਿ ਤਸ੍ਸ ਬ੍ਰਾਹ੍ਮਣਸ੍ਸ ਨਾਮਂ…ਪੇ… ਅਭਿਲਾਪੋਤਿ – ਇਚ੍ਚਾਯਸ੍ਮਾ ਉਪਸੀਵੋ.

ਅਨਿਸ੍ਸਿਤੋ ਨੋ ਵਿਸਹਾਮਿ ਤਾਰਿਤੁਨ੍ਤਿ. ਅਨਿਸ੍ਸਿਤੋਤਿ ਪੁਗ੍ਗਲਂ ਵਾ ਅਨਿਸ੍ਸਿਤੋ ਧਮ੍ਮਂ ਵਾ ਅਨਿਸ੍ਸਿਤੋ ਨੋ ਵਿਸਹਾਮਿ ਨ ਉਸ੍ਸਹਾਮਿ ਨ ਸਕ੍ਕੋਮਿ ਨ ਪਟਿਬਲੋ ਮਹਨ੍ਤਂ ਕਾਮੋਘਂ ਭਵੋਘਂ ਦਿਟ੍ਠੋਘਂ ਅਵਿਜ੍ਜੋਘਂ ਤਰਿਤੁਂ ਉਤ੍ਤਰਿਤੁਂ ਪਤਰਿਤੁਂ ਸਮਤਿਕ੍ਕਮਿਤੁਂ ਵੀਤਿਵਤ੍ਤਿਤੁਨ੍ਤਿ – ਅਨਿਸ੍ਸਿਤੋ ਨੋ ਵਿਸਹਾਮਿ ਤਾਰਿਤੁਂ.

ਆਰਮ੍ਮਣਂ ਬ੍ਰੂਹਿ ਸਮਨ੍ਤਚਕ੍ਖੂਤਿ ਆਰਮ੍ਮਣਂ ਆਲਮ੍ਬਣਂ ਨਿਸ੍ਸਯਂ ਉਪਨਿਸ੍ਸਯਂ ਬ੍ਰੂਹਿ ਆਚਿਕ੍ਖਾਹਿ ਦੇਸੇਹਿ ਪਞ੍ਞਪੇਹਿ ਪਟ੍ਠਪੇਹਿ ਵਿਵਰਾਹਿ ਵਿਭਜਾਹਿ ਉਤ੍ਤਾਨੀਕਰੋਹਿ ਪਕਾਸੇਹਿ. ਸਮਨ੍ਤਚਕ੍ਖੂਤਿ ਸਮਨ੍ਤਚਕ੍ਖੁ ਵੁਚ੍ਚਤਿ ਸਬ੍ਬਞ੍ਞੁਤਞਾਣਂ. ਭਗਵਾ ਤੇਨ ਸਬ੍ਬਞ੍ਞੁਤਞਾਣੇਨ ਉਪੇਤੋ ਸਮੁਪੇਤੋ ਉਪਾਗਤੋ ਸਮੁਪਾਗਤੋ ਉਪਪਨ੍ਨੋ ਸਮੁਪਪਨ੍ਨੋ ਸਮਨ੍ਨਾਗਤੋ.

ਨ ਤਸ੍ਸ ਅਦਿਟ੍ਠਮਿਧਤ੍ਥਿ ਕਿਞ੍ਚਿ, ਅਥੋ ਅਵਿਞ੍ਞਾਤਮਜਾਨਿਤਬ੍ਬਂ;

ਸਬ੍ਬਂ ਅਭਿਞ੍ਞਾਸਿ ਯਦਤ੍ਥਿ ਨੇਯ੍ਯਂ, ਤਥਾਗਤੋ ਤੇਨ ਸਮਨ੍ਤਚਕ੍ਖੂਤਿ.

ਆਰਮ੍ਮਣਂ ਬ੍ਰੂਹਿ ਸਮਨ੍ਤਚਕ੍ਖੁ.

ਯਂ ਨਿਸ੍ਸਿਤੋ ਓਘਮਿਮਂ ਤਰੇਯ੍ਯਨ੍ਤਿ. ਯਂ ਨਿਸ੍ਸਿਤੋਤਿ ਯਂ ਪੁਗ੍ਗਲਂ ਵਾ ਨਿਸ੍ਸਿਤੋ ਧਮ੍ਮਂ ਵਾ ਨਿਸ੍ਸਿਤੋ ਮਹਨ੍ਤਂ ਕਾਮੋਘਂ ਭਵੋਘਂ ਦਿਟ੍ਠੋਘਂ ਅਵਿਜ੍ਜੋਘਂ ਤਰੇਯ੍ਯਂ ਉਤ੍ਤਰੇਯ੍ਯਂ ਪਤਰੇਯ੍ਯਂ ਸਮਤਿਕ੍ਕਮੇਯ੍ਯਂ ਵੀਤਿਵਤ੍ਤੇਯ੍ਯਨ੍ਤਿ – ਯਂ ਨਿਸ੍ਸਿਤੋ ਓਘਮਿਮਂ ਤਰੇਯ੍ਯਂ. ਤੇਨਾਹ ਸੋ ਬ੍ਰਾਹ੍ਮਣੋ –

‘‘ਏਕੋ ਅਹਂ ਸਕ੍ਕ ਮਹਨ੍ਤਮੋਘਂ, [ਇਚ੍ਚਾਯਸ੍ਮਾ ਉਪਸੀਵੋ]

ਅਨਿਸ੍ਸਿਤੋ ਨੋ ਵਿਸਹਾਮਿ ਤਾਰਿਤੁਂ;

ਆਰਮ੍ਮਣਂ ਬ੍ਰੂਹਿ ਸਮਨ੍ਤਚਕ੍ਖੁ, ਯਂ ਨਿਸ੍ਸਿਤੋ ਓਘਮਿਮਂ ਤਰੇਯ੍ਯ’’ਨ੍ਤਿ.

੩੯. ਆਕਿਞ੍ਚਞ੍ਞਂ ਪੇਕ੍ਖਮਾਨੋ ਸਤਿਮਾ, [ਉਪਸੀਵਾਤਿ ਭਗਵਾ]

ਨਤ੍ਥੀਤਿ ਨਿਸ੍ਸਾਯ ਤਰਸ੍ਸੁ ਓਘਂ;

ਕਾਮੇ ਪਹਾਯ ਵਿਰਤੋ ਕਥਾਹਿ, ਤਣ੍ਹਕ੍ਖਯਂ ਨਤ੍ਤਮਹਾਭਿਪਸ੍ਸ [ਰਤ੍ਤਮਹਾਭਿਪਸ੍ਸ (ਸ੍ਯਾ.) ਪਸ੍ਸ ਅਭਿਧਾਨਗਨ੍ਥੇ ਅਬ੍ਯਯਵਗ੍ਗੇ] .

ਆਕਿਞ੍ਚਞ੍ਞਂ ਪੇਕ੍ਖਮਾਨੋ ਸਤਿਮਾਤਿ ਸੋ ਬ੍ਰਾਹ੍ਮਣੋ ਪਕਤਿਯਾ ਆਕਿਞ੍ਚਞ੍ਞਾਯਤਨਸਮਾਪਤ੍ਤਿਂ ਲਾਭੀਯੇਵ ਨਿਸ੍ਸਯਂ ਨ ਜਾਨਾਤਿ – ‘‘ਅਯਂ ਮੇ ਨਿਸ੍ਸਯੋ’’ਤਿ. ਤਸ੍ਸ ਭਗਵਾ ਨਿਸ੍ਸਯਞ੍ਚ ਆਚਿਕ੍ਖਤਿ ਉਤ੍ਤਰਿਞ੍ਚ ਨਿਯ੍ਯਾਨਪਥਂ. ਆਕਿਞ੍ਚਞ੍ਞਾਯਤਨਸਮਾਪਤ੍ਤਿਂ ਸਤੋ ਸਮਾਪਜ੍ਜਿਤ੍ਵਾ ਤਤੋ ਵੁਟ੍ਠਹਿਤ੍ਵਾ ਤਤ੍ਥ ਜਾਤੇ ਚਿਤ੍ਤਚੇਤਸਿਕੇ ਧਮ੍ਮੇ ਅਨਿਚ੍ਚਤੋ ਪੇਕ੍ਖਮਾਨੋ, ਦੁਕ੍ਖਤੋ…ਪੇ… ਰੋਗਤੋ… ਗਣ੍ਡਤੋ… ਸਲ੍ਲਤੋ… ਅਘਤੋ… ਆਬਾਧਤੋ… ਪਰਤੋ… ਪਲੋਕਤੋ… ਈਤਿਤੋ… ਉਪਦ੍ਦਵਤੋ… ਭਯਤੋ… ਉਪਸਗ੍ਗਤੋ… ਚਲਤੋ… ਪਭਙ੍ਗੁਤੋ… ਅਦ੍ਧੁਵਤੋ… ਅਤਾਣਤੋ… ਅਲੇਣਤੋ… ਅਸਰਣਤੋ… ਅਸਰਣੀਭੂਤਤੋ… ਰਿਤ੍ਤਤੋ… ਤੁਚ੍ਛਤੋ… ਸੁਞ੍ਞਤੋ… ਅਨਤ੍ਤਤੋ… ਆਦੀਨਵਤੋ… ਵਿਪਰਿਣਾਮਧਮ੍ਮਤੋ… ਅਸਾਰਕਤੋ… ਅਘਮੂਲਤੋ… ਭਵਤੋ… ਵਿਭਵਤੋ… ਸਾਸਵਤੋ… ਸਙ੍ਖਤਤੋ… ਮਾਰਾਮਿਸਤੋ… ਜਾਤਿਧਮ੍ਮਤੋ… ਜਰਾਧਮ੍ਮਤੋ… ਬ੍ਯਾਧਿਧਮ੍ਮਤੋ… ਮਰਣਧਮ੍ਮਤੋ… ਸੋਕਪਰਿਦੇਵਦੁਕ੍ਖਦੋਮਨਸ੍ਸੁਪਾਯਾਸਧਮ੍ਮਤੋ … ਸਮੁਦਯਧਮ੍ਮਤੋ… ਅਤ੍ਥਙ੍ਗਮਤੋ… ਅਸ੍ਸਾਦਤੋ… ਆਦੀਨਵਤੋ… ਨਿਸ੍ਸਰਣਤੋ ਪੇਕ੍ਖਮਾਨੋ ਦਕ੍ਖਮਾਨੋ ਓਲੋਕਯਮਾਨੋ ਨਿਜ੍ਝਾਯਮਾਨੋ ਉਪਪਰਿਕ੍ਖਮਾਨੋ.

ਸਤਿਮਾਤਿ ਯਾ ਸਤਿ ਅਨੁਸ੍ਸਤਿ ਪਟਿਸ੍ਸਤਿ…ਪੇ… ਸਮ੍ਮਾਸਤਿ – ਅਯਂ ਵੁਚ੍ਚਤਿ ਸਤਿ. ਇਮਾਯ ਸਤਿਯਾ ਉਪੇਤੋ ਹੋਤਿ…ਪੇ… ਸਮਨ੍ਨਾਗਤੋ, ਸੋ ਵੁਚ੍ਚਤਿ ਸਤਿਮਾਤਿ – ਆਕਿਞ੍ਚਞ੍ਞਂ ਪੇਕ੍ਖਮਾਨੋ ਸਤਿਮਾ.

ਉਪਸੀਵਾਤਿ ਭਗਵਾਤਿ. ਉਪਸੀਵਾਤਿ ਭਗਵਾ ਤਂ ਬ੍ਰਾਹ੍ਮਣਂ ਨਾਮੇਨ ਆਲਪਤਿ. ਭਗਵਾਤਿ ਗਾਰਵਾਧਿਵਚਨਮੇਤਂ…ਪੇ… ਸਚ੍ਛਿਕਾ ਪਞ੍ਞਤ੍ਤਿ, ਯਦਿਦਂ ਭਗਵਾਤਿ – ਉਪਸੀਵਾਤਿ ਭਗਵਾ.

ਨਤ੍ਥੀਤਿ ਨਿਸ੍ਸਾਯ ਤਰਸ੍ਸੁ ਓਘਨ੍ਤਿ ਨਤ੍ਥਿ ਕਿਞ੍ਚੀਤਿ ਆਕਿਞ੍ਚਞ੍ਞਾਯਤਨਸਮਾਪਤ੍ਤਿ. ਕਿਂਕਾਰਣਾ ਨਤ੍ਥਿ ਕਿਞ੍ਚੀਤਿ ਆਕਿਞ੍ਚਞ੍ਞਾਯਤਨਸਮਾਪਤ੍ਤਿ? ਵਿਞ੍ਞਾਣਞ੍ਚਾਯਤਨਸਮਾਪਤ੍ਤਿਂ ਸਤੋ ਸਮਾਪਜ੍ਜਿਤ੍ਵਾ ਤਤੋ ਵੁਟ੍ਠਹਿਤ੍ਵਾ ਤਞ੍ਞੇਵ ਵਿਞ੍ਞਾਣਂ ਅਭਾਵੇਤਿ, ਵਿਭਾਵੇਤਿ, ਅਨ੍ਤਰਧਾਪੇਤਿ, ਨਤ੍ਥਿ ਕਿਞ੍ਚੀਤਿ ਪਸ੍ਸਤਿ. ਤਂਕਾਰਣਾ ਨਤ੍ਥਿ ਕਿਞ੍ਚੀਤਿ ਆਕਿਞ੍ਚਞ੍ਞਾਯਤਨਸਮਾਪਤ੍ਤਿਂ ਨਿਸ੍ਸਾਯ ਉਪਨਿਸ੍ਸਾਯ ਆਲਮ੍ਬਣਂ ਕਰਿਤ੍ਵਾ ਕਾਮੋਘਂ ਭਵੋਘਂ ਦਿਟ੍ਠੋਘਂ ਅਵਿਜ੍ਜੋਘਂ ਤਰਸ੍ਸੁ ਉਤ੍ਤਰਸ੍ਸੁ ਪਤਰਸ੍ਸੁ ਸਮਤਿਕ੍ਕਮਸ੍ਸੁ ਵੀਤਿਵਤ੍ਤਸ੍ਸੂਤਿ – ਨਤ੍ਥੀਤਿ ਨਿਸ੍ਸਾਯ ਤਰਸ੍ਸੁ ਓਘਂ.

ਕਾਮੇ ਪਹਾਯ ਵਿਰਤੋ ਕਥਾਹੀਤਿ. ਕਾਮਾਤਿ ਉਦ੍ਦਾਨਤੋ ਦ੍ਵੇ ਕਾਮਾ – ਵਤ੍ਥੁਕਾਮਾ ਚ ਕਿਲੇਸਕਾਮਾ ਚ…ਪੇ… ਇਮੇ ਵੁਚ੍ਚਨ੍ਤਿ ਵਤ੍ਥੁਕਾਮਾ …ਪੇ… ਇਮੇ ਵੁਚ੍ਚਨ੍ਤਿ ਕਿਲੇਸਕਾਮਾ. ਕਾਮੇ ਪਹਾਯਾਤਿ ਵਤ੍ਥੁਕਾਮੇ ਪਰਿਜਾਨਿਤ੍ਵਾ ਕਿਲੇਸਕਾਮੇ ਪਹਾਯ ਪਜਹਿਤ੍ਵਾ ਵਿਨੋਦੇਤ੍ਵਾ ਬ੍ਯਨ੍ਤੀਕਰਿਤ੍ਵਾ ਅਨਭਾਵਂ ਗਮੇਤ੍ਵਾਤਿ – ਕਾਮੇ ਪਹਾਯ. ਵਿਰਤੋ ਕਥਾਹੀਤਿ ਕਥਂਕਥਾ ਵੁਚ੍ਚਤਿ ਵਿਚਿਕਿਚ੍ਛਾ. ਦੁਕ੍ਖੇ ਕਙ੍ਖਾ…ਪੇ… ਛਮ੍ਭਿਤਤ੍ਤਂ ਚਿਤ੍ਤਸ੍ਸ ਮਨੋਵਿਲੇਖੋ ਕਥਂਕਥਾਯ ਆਰਤੋ ਵਿਰਤੋ ਪਟਿਵਿਰਤੋ ਨਿਕ੍ਖਨ੍ਤੋ ਨਿਸ੍ਸਟੋ ਵਿਪ੍ਪਮੁਤ੍ਤੋ ਵਿਸਞ੍ਞੁਤ੍ਤੋ ਵਿਮਰਿਯਾਦਿਕਤੇਨ ਚੇਤਸਾ ਵਿਹਰਤੀਤਿ – ਏਵਮ੍ਪਿ ਵਿਰਤੋ ਕਥਾਹਿ…ਪੇ… ਅਥ ਵਾ, ਦ੍ਵਤ੍ਤਿਂਸਾਯ ਤਿਰਚ੍ਛਾਨਕਥਾਯ ਆਰਤੋ ਵਿਰਤੋ ਪਟਿਵਿਰਤੋ ਨਿਕ੍ਖਨ੍ਤੋ ਨਿਸ੍ਸਟੋ ਵਿਪ੍ਪਮੁਤ੍ਤੋ ਵਿਸਞ੍ਞੁਤ੍ਤੋ ਵਿਮਰਿਯਾਦਿਕਤੇਨ ਚੇਤਸਾ ਵਿਹਰਤੀਤਿ ਏਵਮ੍ਪਿ ਵਿਰਤੋ ਕਥਾਹੀਤਿ – ਕਾਮੇ ਪਹਾਯ ਵਿਰਤੋ ਕਥਾਹਿ.

ਤਣ੍ਹਕ੍ਖਯਂ ਨਤ੍ਤਮਹਾਭਿਪਸ੍ਸਾਤਿ. ਤਣ੍ਹਾਤਿ ਰੂਪਤਣ੍ਹਾ…ਪੇ… ਧਮ੍ਮਤਣ੍ਹਾ. ਨਤ੍ਤਂ ਵੁਚ੍ਚਤਿ ਰਤ੍ਤਿ. ਅਹੋਤਿ ਦਿਵਸੋ. ਰਤ੍ਤਿਞ੍ਚ ਦਿਵਾ ਚ ਤਣ੍ਹਕ੍ਖਯਂ ਰਾਗਕ੍ਖਯਂ ਦੋਸਕ੍ਖਯਂ ਮੋਹਕ੍ਖਯਂ ਗਤਿਕ੍ਖਯਂ ਉਪਪਤ੍ਤਿਕ੍ਖਯਂ ਪਟਿਸਨ੍ਧਿਕ੍ਖਯਂ ਭਵਕ੍ਖਯਂ ਸਂਸਾਰਕ੍ਖਯਂ ਵਟ੍ਟਕ੍ਖਯਂ ਪਸ੍ਸ ਅਭਿਪਸ੍ਸ ਦਕ੍ਖ ਓਲੋਕਯ ਨਿਜ੍ਝਾਯ ਉਪਪਰਿਕ੍ਖਾਤਿ – ਤਣ੍ਹਕ੍ਖਯਂ ਨਤ੍ਤਮਹਾਭਿਪਸ੍ਸ. ਤੇਨਾਹ ਭਗਵਾ –

‘‘ਆਕਿਞ੍ਚਞ੍ਞਂ ਪੇਕ੍ਖਮਾਨੋ ਸਤਿਮਾ, [ਉਪਸੀਵਾਤਿ ਭਗਵਾ]

ਨਤ੍ਥੀਤਿ ਨਿਸ੍ਸਾਯ ਤਰਸ੍ਸੁ ਓਘਂ;

ਕਾਮੇ ਪਹਾਯ ਵਿਰਤੋ ਕਥਾਹਿ, ਤਣ੍ਹਕ੍ਖਯਂ ਨਤ੍ਤਮਹਾਭਿਪਸ੍ਸਾ’’ਤਿ.

੪੦. ਸਬ੍ਬੇਸੁ ਕਾਮੇਸੁ ਯੋ ਵੀਤਰਾਗੋ, [ਇਚ੍ਚਾਯਸ੍ਮਾ ਉਪਸੀਵੋ]

ਆਕਿਞ੍ਚਞ੍ਞਂ ਨਿਸ੍ਸਿਤੋ ਹਿਤ੍ਵਾ ਮਞ੍ਞਂ;

ਸਞ੍ਞਾਵਿਮੋਕ੍ਖੇ ਪਰਮੇਧਿਮੁਤ੍ਤੋ, ਤਿਟ੍ਠੇ ਨੁ ਸੋ ਤਤ੍ਥ ਅਨਾਨੁਯਾਯੀ.

ਸਬ੍ਬੇਸੁ ਕਾਮੇਸੁ ਯੋ ਵੀਤਰਾਗੋਤਿ. ਸਬ੍ਬੇਸੂਤਿ ਸਬ੍ਬੇਨ ਸਬ੍ਬਂ ਸਬ੍ਬਥਾ ਸਬ੍ਬਂ ਅਸੇਸਂ ਨਿਸ੍ਸੇਸਂ ਪਰਿਯਾਦਿਯਨਵਚਨਮੇਤਂ ਸਬ੍ਬੇਸੂਤਿ. ਕਾਮੇਸੂਤਿ ਕਾਮਾਤਿ ਉਦ੍ਦਾਨਤੋ ਦ੍ਵੇ ਕਾਮਾ – ਵਤ੍ਥੁਕਾਮਾ ਚ ਕਿਲੇਸਕਾਮਾ ਚ…ਪੇ… ਇਮੇ ਵੁਚ੍ਚਨ੍ਤਿ ਵਤ੍ਥੁਕਾਮਾ…ਪੇ… ਇਮੇ ਵੁਚ੍ਚਨ੍ਤਿ ਕਿਲੇਸਕਾਮਾ. ਸਬ੍ਬੇਸੁ ਕਾਮੇਸੁ ਯੋ ਵੀਤਰਾਗੋਤਿ. ਸਬ੍ਬੇਸੁ ਕਾਮੇਸੁ ਯੋ ਵੀਤਰਾਗੋ ਵਿਗਤਰਾਗੋ ਚਤ੍ਤਰਾਗੋ ਵਨ੍ਤਰਾਗੋ ਮੁਤ੍ਤਰਾਗੋ ਪਹੀਨਰਾਗੋ ਪਟਿਨਿਸ੍ਸਟ੍ਠਰਾਗੋ ਵਿਕ੍ਖਮ੍ਭਨਤੋਤਿ – ਸਬ੍ਬੇਸੁ ਕਾਮੇਸੁ ਯੋ ਵੀਤਰਾਗੋ.

ਆਕਿਞ੍ਚਞ੍ਞਂ ਨਿਸ੍ਸਿਤੋ ਹਿਤ੍ਵਾ ਮਞ੍ਞਨ੍ਤਿ. ਹੇਟ੍ਠਿਮਾ ਛ ਸਮਾਪਤ੍ਤਿਯੋ ਹਿਤ੍ਵਾ ਚਜਿਤ੍ਵਾ ਪਰਿਚ੍ਚਜਿਤ੍ਵਾ ਅਤਿਕ੍ਕਮਿਤ੍ਵਾ ਸਮਤਿਕ੍ਕਮਿਤ੍ਵਾ ਵੀਤਿਵਤ੍ਤਿਤ੍ਵਾ ਆਕਿਞ੍ਚਞ੍ਞਾਯਤਨਸਮਾਪਤ੍ਤਿਂ ਨਿਸ੍ਸਿਤੋ ਅਲ੍ਲੀਨੋ ਉਪਗਤੋ ਸਮੁਪਗਤੋ ਅਜ੍ਝੋਸਿਤੋ ਅਧਿਮੁਤ੍ਤੋਤਿ – ਆਕਿਞ੍ਚਞ੍ਞਂ ਨਿਸ੍ਸਿਤੋ ਹਿਤ੍ਵਾ ਮਞ੍ਞਂ.

ਸਞ੍ਞਾਵਿਮੋਕ੍ਖੇ ਪਰਮੇਧਿਮੁਤ੍ਤੋਤਿ ਸਞ੍ਞਾਵਿਮੋਕ੍ਖਾ ਵੁਚ੍ਚਨ੍ਤਿ ਸਤ੍ਤ ਸਞ੍ਞਾਸਮਾਪਤ੍ਤਿਯੋ. ਤਾਸਂ ਸਞ੍ਞਾਸਮਾਪਤ੍ਤੀਨਂ ਆਕਿਞ੍ਚਞ੍ਞਾਯਤਨਸਮਾਪਤ੍ਤਿਵਿਮੋਕ੍ਖੋ [ਵਿਮੋਕ੍ਖਾ (ਕ.) ਏਵਮਞ੍ਞੇਸੁ ਪਦੇਸੁ ਬਹੁਵਚਨੇਨ] ਅਗ੍ਗੋ ਚ ਸੇਟ੍ਠੋ ਚ ਵਿਸੇਟ੍ਠੋ ਚ ਪਾਮੋਕ੍ਖੋ ਚ ਉਤ੍ਤਮੋ ਚ ਪਵਰੋ ਚ, ਪਰਮੇ ਅਗ੍ਗੇ ਸੇਟ੍ਠੇ ਵਿਸੇਟ੍ਠੇ ਪਾਮੋਕ੍ਖੇ ਉਤ੍ਤਮੇ ਪਵਰੇ ਅਧਿਮੁਤ੍ਤਿਵਿਮੋਕ੍ਖੇਨ ਅਧਿਮੁਤ੍ਤੋ ਤਤ੍ਰਾਧਿਮੁਤ੍ਤੋ ਤਦਧਿਮੁਤ੍ਤੋ ਤਚ੍ਚਰਿਤੋ ਤਬ੍ਬਹੁਲੋ ਤਗ੍ਗਰੁਕੋ ਤਨ੍ਨਿਨ੍ਨੋ ਤਪ੍ਪੋਣੋ ਤਪ੍ਪਬ੍ਭਾਰੋ ਤਦਧਿਮੁਤ੍ਤੋ ਤਦਧਿਪਤੇਯ੍ਯੋਤਿ – ਸਞ੍ਞਾਵਿਮੋਕ੍ਖੇ ਪਰਮੇਧਿਮੁਤ੍ਤੋ.

ਤਿਟ੍ਠੇ ਨੁ ਸੋ ਤਤ੍ਥ ਅਨਾਨੁਯਾਯੀਤਿ. ਤਿਟ੍ਠੇ ਨੂਤਿ ਸਂਸਯਪੁਚ੍ਛਾ ਵਿਮਤਿਪੁਚ੍ਛਾ ਦ੍ਵੇਲ਼੍ਹਕਪੁਚ੍ਛਾ ਅਨੇਕਂਸਪੁਚ੍ਛਾ, ‘‘ਏਵਂ ਨੁ ਖੋ, ਨਨੁ ਖੋ, ਕਿਂ ਨੁ ਖੋ, ਕਥਂ ਨੁ ਖੋ’’ਤਿ – ਤਿਟ੍ਠੇ ਨੁ. ਤਤ੍ਥਾਤਿ ਆਕਿਞ੍ਚਞ੍ਞਾਯਤਨੇ. ਅਨਾਨੁਯਾਯੀਤਿ ਅਨਾਨੁਯਾਯੀ ਅਵਿਚ੍ਚਮਾਨੋ [ਅਵੇਧਮਾਨੋ (ਸ੍ਯਾ.)] ਅਵਿਗਚ੍ਛਮਾਨੋ ਅਨਨ੍ਤਰਧਾਯਮਾਨੋ ਅਪਰਿਹਾਯਮਾਨੋ…ਪੇ…. ਅਥ ਵਾ, ਅਰਜ੍ਜਮਾਨੋ ਅਦੁਸ੍ਸਮਾਨੋ ਅਮੁਯ੍ਹਮਾਨੋ ਅਕਿਲਿਸ੍ਸਮਾਨੋਤਿ – ਤਿਟ੍ਠੇ ਨੁ ਸੋ ਤਤ੍ਥ ਅਨਾਨੁਯਾਯੀ. ਤੇਨਾਹ ਸੋ ਬ੍ਰਾਹ੍ਮਣੋ –

‘‘ਸਬ੍ਬੇਸੁ ਕਾਮੇਸੁ ਯੋ ਵੀਤਰਾਗੋ, [ਇਚ੍ਚਾਯਸ੍ਮਾ ਉਪਸੀਵੋ]

ਆਕਿਞ੍ਚਞ੍ਞਂ ਨਿਸ੍ਸਿਤੋ ਹਿਤ੍ਵਾ ਮਞ੍ਞਂ;

ਸਞ੍ਞਾਵਿਮੋਕ੍ਖੇ ਪਰਮੇਧਿਮੁਤ੍ਤੋ, ਤਿਟ੍ਠੇ ਨੁ ਸੋ ਤਤ੍ਥ ਅਨਾਨੁਯਾਯੀ’’ਤਿ.

੪੧. ਸਬ੍ਬੇਸੁ ਕਾਮੇਸੁ ਯੋ ਵੀਤਰਾਗੋ, [ਉਪਸੀਵਾਤਿ ਭਗਵਾ]

ਆਕਿਞ੍ਚਞ੍ਞਂ ਨਿਸ੍ਸਿਤੋ ਹਿਤ੍ਵਾ ਮਞ੍ਞਂ;

ਸਞ੍ਞਾਵਿਮੋਕ੍ਖੇ ਪਰਮੇਧਿਮੁਤ੍ਤੋ, ਤਿਟ੍ਠੇਯ੍ਯ ਸੋ ਤਤ੍ਥ ਅਨਾਨੁਯਾਯੀ.

ਸਬ੍ਬੇਸੁ ਕਾਮੇਸੁ ਯੋ ਵੀਤਰਾਗੋਤਿ. ਸਬ੍ਬੇਸੂਤਿ ਸਬ੍ਬੇਨ ਸਬ੍ਬਂ ਸਬ੍ਬਥਾ ਸਬ੍ਬਂ ਅਸੇਸਂ ਨਿਸ੍ਸੇਸਂ ਪਰਿਯਾਦਿਯਨਵਚਨਮੇਤਂ ਸਬ੍ਬੇਸੂਤਿ. ਕਾਮੇਸੂਤਿ ਕਾਮਾਤਿ ਉਦ੍ਦਾਨਤੋ ਦ੍ਵੇ ਕਾਮਾ – ਵਤ੍ਥੁਕਾਮਾ ਚ ਕਿਲੇਸਕਾਮਾ ਚ…ਪੇ… ਇਮੇ ਵੁਚ੍ਚਨ੍ਤਿ ਵਤ੍ਥੁਕਾਮਾ…ਪੇ… ਇਮੇ ਵੁਚ੍ਚਨ੍ਤਿ ਕਿਲੇਸਕਾਮਾ. ਸਬ੍ਬੇਸੁ ਕਾਮੇਸੁ ਯੋ ਵੀਤਰਾਗੋਤਿ ਸਬ੍ਬੇਸੁ ਕਾਮੇਸੁ ਯੋ ਵੀਤਰਾਗੋ…ਪੇ… ਪਟਿਨਿਸ੍ਸਟ੍ਠਰਾਗੋ ਵਿਕ੍ਖਮ੍ਭਨਤੋਤਿ – ਸਬ੍ਬੇਸੁ ਕਾਮੇਸੁ ਯੋ ਵੀਤਰਾਗੋ.

ਆਕਿਞ੍ਚਞ੍ਞਂ ਨਿਸ੍ਸਿਤੋ ਹਿਤ੍ਵਾ ਮਞ੍ਞਨ੍ਤਿ. ਹੇਟ੍ਠਿਮਾ ਛ ਸਮਾਪਤ੍ਤਿਯੋ ਹਿਤ੍ਵਾ ਚਜਿਤ੍ਵਾ ਪਰਿਚ੍ਚਜਿਤ੍ਵਾ ਅਤਿਕ੍ਕਮਿਤ੍ਵਾ ਸਮਤਿਕ੍ਕਮਿਤ੍ਵਾ ਵੀਤਿਵਤ੍ਤਿਤ੍ਵਾ ਆਕਿਞ੍ਚਞ੍ਞਾਯਤਨਸਮਾਪਤ੍ਤਿਂ ਨਿਸ੍ਸਿਤੋ ਅਲ੍ਲੀਨੋ ਉਪਗਤੋ ਸਮੁਪਗਤੋ ਅਜ੍ਝੋਸਿਤੋ ਅਧਿਮੁਤ੍ਤੋਤਿ – ਆਕਿਞ੍ਚਞ੍ਞਂ ਨਿਸ੍ਸਿਤੋ ਹਿਤ੍ਵਾ ਮਞ੍ਞਂ.

ਸਞ੍ਞਾਵਿਮੋਕ੍ਖੇ ਪਰਮੇਧਿਮੁਤ੍ਤੋਤਿ ਸਞ੍ਞਾਵਿਮੋਕ੍ਖਾ ਵੁਚ੍ਚਨ੍ਤਿ ਸਤ੍ਤ ਸਞ੍ਞਾਸਮਾਪਤ੍ਤਿਯੋ. ਤਾਸਂ ਸਞ੍ਞਾਸਮਾਪਤ੍ਤੀਨਂ ਆਕਿਞ੍ਚਞ੍ਞਾਯਤਨਸਮਾਪਤ੍ਤਿਵਿਮੋਕ੍ਖੋ ਅਗ੍ਗੋ ਚ ਸੇਟ੍ਠੋ ਚ ਵਿਸੇਟ੍ਠੋ ਚ ਪਾਮੋਕ੍ਖੋ ਚ ਉਤ੍ਤਮੋ ਚ ਪਵਰੋ ਚ, ਪਰਮੇ ਅਗ੍ਗੇ ਸੇਟ੍ਠੇ ਵਿਸੇਟ੍ਠੇ ਪਾਮੋਕ੍ਖੇ ਉਤ੍ਤਮੇ ਪਵਰੇ ਅਧਿਮੁਤ੍ਤਿਵਿਮੋਕ੍ਖੇਨ ਅਧਿਮੁਤ੍ਤੋ ਤਤ੍ਰਾਧਿਮੁਤ੍ਤੋ ਤਦਧਿਮੁਤ੍ਤੋ…ਪੇ… ਤਦਧਿਪਤੇਯ੍ਯੋਤਿ – ਸਞ੍ਞਾਵਿਮੋਕ੍ਖੇ ਪਰਮੇਧਿਮੁਤ੍ਤੋ.

ਤਿਟ੍ਠੇਯ੍ਯ ਸੋ ਤਤ੍ਥ ਅਨਾਨੁਯਾਯੀਤਿ. ਤਿਟ੍ਠੇਯ੍ਯਾਤਿ ਤਿਟ੍ਠੇਯ੍ਯ ਸਟ੍ਠਿਕਪ੍ਪਸਹਸ੍ਸਾਨਿ. ਤਤ੍ਥਾਤਿ ਆਕਿਞ੍ਚਞ੍ਞਾਯਤਨੇ. ਅਨਾਨੁਯਾਯੀਤਿ ਅਨਾਨੁਯਾਯੀ ਅਵਿਚ੍ਚਮਾਨੋ ਅਵਿਗਚ੍ਛਮਾਨੋ ਅਨਨ੍ਤਰਧਾਯਮਾਨੋ ਅਪਰਿਹਾਯਮਾਨੋ. ਅਥ ਵਾ, ਅਰਜ੍ਜਮਾਨੋ ਅਦੁਸ੍ਸਮਾਨੋ ਅਮੁਯ੍ਹਮਾਨੋ ਅਕਿਲਿਸ੍ਸਮਾਨੋਤਿ – ਤਿਟ੍ਠੇਯ੍ਯ ਸੋ ਤਤ੍ਥ ਅਨਾਨੁਯਾਯੀ. ਤੇਨਾਹ ਭਗਵਾ –

‘‘ਸਬ੍ਬੇਸੁ ਕਾਮੇਸੁ ਯੋ ਵੀਤਰਾਗੋ, [ਉਪਸੀਵਾਤਿ ਭਗਵਾ]

ਆਕਿਞ੍ਚਞ੍ਞਂ ਨਿਸ੍ਸਿਤੋ ਹਿਤ੍ਵਾ ਮਞ੍ਞਂ;

ਸਞ੍ਞਾਵਿਮੋਕ੍ਖੇ ਪਰਮੇਧਿਮੁਤ੍ਤੋ, ਤਿਟ੍ਠੇਯ੍ਯ ਸੋ ਤਤ੍ਥ ਅਨਾਨੁਯਾਯੀ’’ਤਿ.

੪੨. ਤਿਟ੍ਠੇ ਚੇ ਸੋ ਤਤ੍ਥ ਅਨਾਨੁਯਾਯੀ, ਪੂਗਮ੍ਪਿ ਵਸ੍ਸਾਨਿ [ਵਸ੍ਸਾਨਂ (ਸ੍ਯਾ. ਕ.)] ਸਮਨ੍ਤਚਕ੍ਖੁ;

ਤਤ੍ਥੇਵ ਸੋ ਸੀਤਿਸਿਯਾ ਵਿਮੁਤ੍ਤੋ, ਚਵੇਥ ਵਿਞ੍ਞਾਣਂ ਤਥਾਵਿਧਸ੍ਸ.

ਤਿਟ੍ਠੇ ਚੇ ਸੋ ਤਤ੍ਥ ਅਨਾਨੁਯਾਯੀਤਿ ਸਚੇ ਸੋ ਤਿਟ੍ਠੇਯ੍ਯ ਸਟ੍ਠਿਕਪ੍ਪਸਹਸ੍ਸਾਨਿ. ਤਤ੍ਥਾਤਿ ਆਕਿਞ੍ਚਞ੍ਞਾਯਤਨੇ. ਅਨਾਨੁਯਾਯੀਤਿ ਅਨਾਨੁਯਾਯੀ ਅਵਿਚ੍ਚਮਾਨੋ ਅਵਿਗਚ੍ਛਮਾਨੋ ਅਨਨ੍ਤਰਧਾਯਮਾਨੋ ਅਪਰਿਹਾਯਮਾਨੋ. ਅਥ ਵਾ, ਅਰਜ੍ਜਮਾਨੋ ਅਦੁਸ੍ਸਮਾਨੋ ਅਮੁਯ੍ਹਮਾਨੋ ਅਕਿਲਿਸ੍ਸਮਾਨੋਤਿ – ਤਿਟ੍ਠੇ ਚੇ ਸੋ ਤਤ੍ਥ ਅਨਾਨੁਯਾਯੀ.

ਪੂਗਮ੍ਪਿ ਵਸ੍ਸਾਨਿ ਸਮਨ੍ਤਚਕ੍ਖੂਤਿ. ਪੂਗਮ੍ਪਿ ਵਸ੍ਸਾਨੀਤਿ ਪੂਗਮ੍ਪਿ ਵਸ੍ਸਾਨਿ ਬਹੂਨਿ ਵਸ੍ਸਾਨਿ [ਬਹੁਨ੍ਨਂ ਵਸ੍ਸਾਨਂ (ਸ੍ਯਾ.)] ਬਹੂਨਿ ਵਸ੍ਸਸਤਾਨਿ ਬਹੂਨਿ ਵਸ੍ਸਸਹਸ੍ਸਾਨਿ ਬਹੂਨਿ ਵਸ੍ਸਸਤਸਹਸ੍ਸਾਨਿ ਬਹੂਨਿ ਕਪ੍ਪਾਨਿ ਬਹੂਨਿ ਕਪ੍ਪਸਤਾਨਿ ਬਹੂਨਿ ਕਪ੍ਪਸਹਸ੍ਸਾਨਿ ਬਹੂਨਿ ਕਪ੍ਪਸਤਸਹਸ੍ਸਾਨਿ. ਸਮਨ੍ਤਚਕ੍ਖੂਤਿ ਸਮਨ੍ਤਚਕ੍ਖੁ ਵੁਚ੍ਚਤਿ ਸਬ੍ਬਞ੍ਞੁਤਞਾਣਂ…ਪੇ… ਤਥਾਗਤੋ ਤੇਨ ਸਮਨ੍ਤਚਕ੍ਖੂਤਿ – ਪੂਗਮ੍ਪਿ ਵਸ੍ਸਾਨਿ ਸਮਨ੍ਤਚਕ੍ਖੁ.

ਤਤ੍ਥੇਵ ਸੋ ਸੀਤਿਸਿਯਾ ਵਿਮੁਤ੍ਤੋ, ਚਵੇਥ ਵਿਞ੍ਞਾਣਂ ਤਥਾਵਿਧਸ੍ਸਾਤਿ ਤਤ੍ਥੇਵ ਸੋ ਸੀਤਿਭਾਵਮਨੁਪ੍ਪਤ੍ਤੋ ਨਿਚ੍ਚੋ ਧੁਵੋ ਸਸ੍ਸਤੋ ਅਵਿਪਰਿਣਾਮਧਮ੍ਮੋ ਸਸ੍ਸਤਿਸਮਂ ਤਥੇਵ ਤਿਟ੍ਠੇਯ੍ਯ. ਅਥ ਵਾ, ਤਸ੍ਸ ਵਿਞ੍ਞਾਣਂ ਚਵੇਯ੍ਯ ਉਚ੍ਛਿਜ੍ਜੇਯ੍ਯ ਨਸ੍ਸੇਯ੍ਯ ਵਿਨਸ੍ਸੇਯ੍ਯ ਨ ਭਵੇਯ੍ਯਾਤਿ ਪੁਨਬ੍ਭਵਪਟਿਸਨ੍ਧਿਵਿਞ੍ਞਾਣਂ ਨਿਬ੍ਬਤ੍ਤੇਯ੍ਯ ਕਾਮਧਾਤੁਯਾ ਵਾ ਰੂਪਧਾਤੁਯਾ ਵਾ ਅਰੂਪਧਾਤੁਯਾ ਵਾਤਿ ਆਕਿਞ੍ਚਞ੍ਞਾਯਤਨਂ ਸਮਾਪਨ੍ਨਸ੍ਸ ਸਸ੍ਸਤਞ੍ਚ ਉਚ੍ਛੇਦਞ੍ਚ ਪੁਚ੍ਛਤਿ. ਉਦਾਹੁ ਤਤ੍ਥੇਵ ਅਨੁਪਾਦਿਸੇਸਾਯ ਨਿਬ੍ਬਾਨਧਾਤੁਯਾ ਪਰਿਨਿਬ੍ਬਾਯੇਯ੍ਯ. ਅਥ ਵਾ, ਤਸ੍ਸ ਵਿਞ੍ਞਾਣਂ ਚਵੇਯ੍ਯ ਪੁਨ ਪਟਿਸਨ੍ਧਿਵਿਞ੍ਞਾਣਂ ਨਿਬ੍ਬਤ੍ਤੇਯ੍ਯ ਕਾਮਧਾਤੁਯਾ ਵਾ ਰੂਪਧਾਤੁਯਾ ਵਾ ਅਰੂਪਧਾਤੁਯਾ ਵਾਤਿ, ਆਕਿਞ੍ਚਞ੍ਞਾਯਤਨਂ ਉਪਪਨ੍ਨਸ੍ਸ ਪਰਿਨਿਬ੍ਬਾਨਞ੍ਚ ਪਟਿਸਨ੍ਧਿਞ੍ਚ ਪੁਚ੍ਛਤਿ. ਤਥਾਵਿਧਸ੍ਸਾਤਿ ਤਥਾਵਿਧਸ੍ਸ ਤਾਦਿਸਸ੍ਸ ਤਸ੍ਸਣ੍ਠਿਤਸ੍ਸ ਤਪ੍ਪਕਾਰਸ੍ਸ ਤਪ੍ਪਟਿਭਾਗਸ੍ਸ ਆਕਿਞ੍ਚਞ੍ਞਾਯਤਨਂ ਉਪਪਨ੍ਨਸ੍ਸਾਤਿ – ਤਤ੍ਥੇਵ ਸੋ ਸੀਤਿਸਿਯਾ ਵਿਮੁਤ੍ਤੋ, ਚਵੇਥ ਵਿਞ੍ਞਾਣਂ ਤਥਾਵਿਧਸ੍ਸ. ਤੇਨਾਹ ਸੋ ਬ੍ਰਾਹ੍ਮਣੋ –

‘‘ਤਿਟ੍ਠੇ ਚੇ ਸੋ ਤਤ੍ਥ ਅਨਾਨੁਯਾਯੀ, ਪੂਗਮ੍ਪਿ ਵਸ੍ਸਾਨਿ ਸਮਨ੍ਤਚਕ੍ਖੁ;

ਤਤ੍ਥੇਵ ਸੋ ਸੀਤਿਸਿਯਾ ਵਿਮੁਤ੍ਤੋ, ਚਵੇਥ ਵਿਞ੍ਞਾਣਂ ਤਥਾਵਿਧਸ੍ਸਾ’’ਤਿ.

੪੩. ਅਚ੍ਚਿ ਯਥਾ ਵਾਤਵੇਗੇਨ ਖਿਤ੍ਤਾ, [ਉਪਸੀਵਾਤਿ ਭਗਵਾ]

ਅਤ੍ਥਂ ਪਲੇਤਿ ਨ ਉਪੇਤਿ ਸਙ੍ਖਂ;

ਏਵਂ ਮੁਨੀ ਨਾਮਕਾਯਾ ਵਿਮੁਤ੍ਤੋ, ਅਤ੍ਥਂ ਪਲੇਤਿ ਨ ਉਪੇਤਿ ਸਙ੍ਖਂ.

ਅਚ੍ਚਿ ਯਥਾ ਵਾਤਵੇਗੇਨ ਖਿਤ੍ਤਾਤਿ ਅਚ੍ਚਿ ਵੁਚ੍ਚਤਿ ਜਾਲਸਿਖਾ. ਵਾਤਾਤਿ ਪੁਰਤ੍ਥਿਮਾ ਵਾਤਾ ਪਚ੍ਛਿਮਾ ਵਾਤਾ ਉਤ੍ਤਰਾ ਵਾਤਾ ਦਕ੍ਖਿਣਾ ਵਾਤਾ ਸਰਜਾ ਵਾਤਾ ਅਰਜਾ ਵਾਤਾ ਸੀਤਾ ਵਾਤਾ ਉਣ੍ਹਾ ਵਾਤਾ ਪਰਿਤ੍ਤਾ ਵਾਤਾ ਅਧਿਮਤ੍ਤਾ ਵਾਤਾ [ਕਾਲ਼ਵਾਤਾ (ਕ.)] ਵੇਰਮ੍ਭਵਾਤਾ ਪਕ੍ਖਵਾਤਾ ਸੁਪਣ੍ਣਵਾਤਾ ਤਾਲਪਣ੍ਣਵਾਤਾ ਵਿਧੂਪਨਵਾਤਾ. ਵਾਤਵੇਗੇਨ ਖਿਤ੍ਤਾਤਿ ਵਾਤਵੇਗੇਨ ਖਿਤ੍ਤਾ [ਖਿਤ੍ਤਂ (ਸ੍ਯਾ.) ਏਵਮਞ੍ਞੇਸੁ ਪਦੇਸੁ ਨਿਗ੍ਗਹੀਤਨ੍ਤਵਸੇਨ] ਉਕ੍ਖਿਤ੍ਤਾ ਨੁਨ੍ਨਾ ਪਣੁਨ੍ਨਾ ਖਮ੍ਭਿਤਾ ਵਿਕ੍ਖਮ੍ਭਿਤਾਤਿ – ਅਚ੍ਚਿ ਯਥਾ ਵਾਤਵੇਗੇਨ ਖਿਤ੍ਤਾ. ਉਪਸੀਵਾਤਿ ਭਗਵਾਤਿ. ਉਪਸੀਵਾਤਿ ਭਗਵਾ ਤਂ ਬ੍ਰਾਹ੍ਮਣਂ ਨਾਮੇਨ ਆਲਪਤਿ. ਭਗਵਾਤਿ ਗਾਰਵਾਧਿਵਚਨਮੇਤਂ…ਪੇ… ਸਚ੍ਛਿਕਾ ਪਞ੍ਞਤ੍ਤਿ, ਯਦਿਦਂ ਭਗਵਾਤਿ – ਉਪਸੀਵਾਤਿ ਭਗਵਾ.

ਅਤ੍ਥਂ ਪਲੇਤਿ ਨ ਉਪੇਤਿ ਸਙ੍ਖਨ੍ਤਿ. ਅਤ੍ਥਂ ਪਲੇਤੀਤਿ ਅਤ੍ਥਂ ਪਲੇਤਿ, ਅਤ੍ਥਂ ਗਮੇਤਿ, ਅਤ੍ਥਂ ਗਚ੍ਛਤਿ ਨਿਰੁਜ੍ਝਤਿ ਵੂਪਸਮਤਿ ਪਟਿਪ੍ਪਸ੍ਸਮ੍ਭਤਿ. ਨ ਉਪੇਤਿ ਸਙ੍ਖਨ੍ਤਿ ਸਙ੍ਖਂ [ਅਮੁਕਂ ਨਾਮ ਦਿਸਂ ਗਤੋਤਿ ਸਙ੍ਖਂ (ਸ੍ਯਾ.)] ਨ ਉਪੇਤਿ, ਉਦ੍ਦੇਸਂ ਨ ਉਪੇਤਿ, ਗਣਨਂ ਨ ਉਪੇਤਿ, ਪਣ੍ਣਤ੍ਤਿਂ ਨ ਉਪੇਤਿ, ‘‘ਪੁਰਤ੍ਥਿਮਂ ਵਾ ਦਿਸਂ ਗਤਾ, ਪਚ੍ਛਿਮਂ ਵਾ ਦਿਸਂ ਗਤਾ, ਉਤ੍ਤਰਂ ਵਾ ਦਿਸਂ ਗਤਾ, ਦਕ੍ਖਿਣਂ ਵਾ ਦਿਸਂ ਗਤਾ ਉਦ੍ਧਂ ਵਾ ਗਤਾ, ਅਧੋ ਵਾ ਗਤਾ, ਤਿਰਿਯਂ ਵਾ ਗਤਾ, ਵਿਦਿਸਂ ਵਾ ਗਤਾ’’ਤਿ, ਸੋ ਹੇਤੁ ਨਤ੍ਥਿ, ਪਚ੍ਚਯੋ ਨਤ੍ਥਿ, ਕਾਰਣਂ ਨਤ੍ਥਿ, ਯੇਨ ਸਙ੍ਖਂ ਗਚ੍ਛੇਯ੍ਯਾਤਿ – ਅਤ੍ਥਂ ਪਲੇਤਿ ਨ ਉਪੇਤਿ ਸਙ੍ਖਂ.

ਏਵਂ ਮੁਨੀ ਨਾਮਕਾਯਾ ਵਿਮੁਤ੍ਤੋਤਿ. ਏਵਨ੍ਤਿ ਓਪਮ੍ਮਸਮ੍ਪਟਿਪਾਦਨਂ. ਮੁਨੀਤਿ ਮੋਨਂ ਵੁਚ੍ਚਤਿ ਞਾਣਂ …ਪੇ… ਸਙ੍ਗਜਾਲਮਤਿਚ੍ਚ ਸੋ ਮੁਨਿ. ਨਾਮਕਾਯਾ ਵਿਮੁਤ੍ਤੋਤਿ ਸੋ ਮੁਨਿ ਪਕਤਿਯਾ ਪੁਬ੍ਬੇਵ ਰੂਪਕਾਯਾ ਵਿਮੁਤ੍ਤੋ. ਤਦਙ੍ਗਂ ਸਮਤਿਕ੍ਕਮਾ [ਤਦਙ੍ਗਂ ਸਮਤਿਕ੍ਕਮ੍ਮ (ਕ.)] ਵਿਕ੍ਖਮ੍ਭਨਪ੍ਪਹਾਨੇਨ ਪਹੀਨੋ. ਤਸ੍ਸ ਮੁਨਿਨੋ ਭਵਨ੍ਤਂ ਆਗਮ੍ਮ ਚਤ੍ਤਾਰੋ ਅਰਿਯਮਗ੍ਗਾ ਪਟਿਲਦ੍ਧਾ ਹੋਨ੍ਤਿ. ਚਤੁਨ੍ਨਂ ਅਰਿਯਮਗ੍ਗਾਨਂ ਪਟਿਲਦ੍ਧਤ੍ਤਾ ਨਾਮਕਾਯੋ ਚ ਰੂਪਕਾਯੋ ਚ ਪਰਿਞ੍ਞਾਤਾ ਹੋਨ੍ਤਿ. ਨਾਮਕਾਯਸ੍ਸ ਚ ਰੂਪਕਾਯਸ੍ਸ ਚ ਪਰਿਞ੍ਞਾਤਤ੍ਤਾ ਨਾਮਕਾਯਾ ਚ ਰੂਪਕਾਯਾ ਚ ਮੁਤ੍ਤੋ ਵਿਮੁਤ੍ਤੋ ਸੁਵਿਮੁਤ੍ਤੋ ਅਚ੍ਚਨ੍ਤਅਨੁਪਾਦਾਵਿਮੋਕ੍ਖੇਨਾਤਿ – ਏਵਂ ਮੁਨੀ ਨਾਮਕਾਯਾ ਵਿਮੁਤ੍ਤੋ.

ਅਤ੍ਥਂ ਪਲੇਤਿ ਨ ਉਪੇਤਿ ਸਙ੍ਖਨ੍ਤਿ. ਅਤ੍ਥਂ ਪਲੇਤੀਤਿ ਅਨੁਪਾਦਿਸੇਸਾਯ ਨਿਬ੍ਬਾਨਧਾਤੁਯਾ ਪਰਿਨਿਬ੍ਬਾਯਤਿ. ਨ ਉਪੇਤਿ ਸਙ੍ਖਨ੍ਤਿ ਅਨੁਪਾਦਿਸੇਸਾਯ ਨਿਬ੍ਬਾਨਧਾਤੁਯਾ ਪਰਿਨਿਬ੍ਬੁਤੋ ਸਙ੍ਖਂ ਨ ਉਪੇਤਿ, ਉਦ੍ਦੇਸਂ ਨ ਉਪੇਤਿ, ਗਣਨਂ ਨ ਉਪੇਤਿ, ਪਣ੍ਣਤ੍ਤਿਂ ਨ ਉਪੇਤਿ – ਖਤ੍ਤਿਯੋਤਿ ਵਾ ਬ੍ਰਾਹ੍ਮਣੋਤਿ ਵਾ ਵੇਸ੍ਸੋਤਿ ਵਾ ਸੁਦ੍ਦੋਤਿ ਵਾ ਗਹਟ੍ਠੋਤਿ ਵਾ ਪਬ੍ਬਜਿਤੋਤਿ ਵਾ ਦੇਵੋਤਿ ਵਾ ਮਨੁਸ੍ਸੋਤਿ ਵਾ ਰੂਪੀਤਿ ਵਾ ਅਰੂਪੀਤਿ ਵਾ ਸਞ੍ਞੀਤਿ ਵਾ ਅਸਞ੍ਞੀਤਿ ਵਾ ਨੇਵਸਞ੍ਞੀਨਾਸਞ੍ਞੀਤਿ ਵਾ. ਸੋ ਹੇਤੁ ਨਤ੍ਥਿ ਪਚ੍ਚਯੋ ਨਤ੍ਥਿ ਕਾਰਣਂ ਨਤ੍ਥਿ ਯੇਨ ਸਙ੍ਖਂ ਗਚ੍ਛੇਯ੍ਯਾਤਿ – ਅਤ੍ਥਂ ਪਲੇਤਿ ਨ ਉਪੇਤਿ ਸਙ੍ਖਂ. ਤੇਨਾਹ ਭਗਵਾ –

‘‘ਅਚ੍ਚਿ ਯਥਾ ਵਾਤਵੇਗੇਨ ਖਿਤ੍ਤਾ, [ਉਪਸੀਵਾਤਿ ਭਗਵਾ]

ਅਤ੍ਥਂ ਪਲੇਤਿ ਨ ਉਪੇਤਿ ਸਙ੍ਖਂ;

ਏਵਂ ਮੁਨੀ ਨਾਮਕਾਯਾ ਵਿਮੁਤ੍ਤੋ, ਅਤ੍ਥਂ ਪਲੇਤਿ ਨ ਉਪੇਤਿ ਸਙ੍ਖ’’ਨ੍ਤਿ.

੪੪. ਅਤ੍ਥਙ੍ਗਤੋ ਸੋ ਉਦ ਵਾ ਸੋ ਨਤ੍ਥਿ, ਉਦਾਹੁ ਵੇ ਸਸ੍ਸਤਿਯਾ ਅਰੋਗੋ;

ਤਂ ਮੇ ਮੁਨੀ ਸਾਧੁ ਵਿਯਾਕਰੋਹਿ, ਤਥਾ ਹਿ ਤੇ ਵਿਦਿਤੋ ਏਸ ਧਮ੍ਮੋ.

ਅਤ੍ਥਙ੍ਗਤੋ ਸੋ ਉਦ ਵਾ ਸੋ ਨਤ੍ਥੀਤਿ ਸੋ ਅਤ੍ਥਙ੍ਗਤੋ ਉਦਾਹੁ ਨਤ੍ਥਿ ਸੋ ਨਿਰੁਦ੍ਧੋ ਉਚ੍ਛਿਨ੍ਨੋ ਵਿਨਟ੍ਠੋਤਿ – ਅਤ੍ਥਙ੍ਗਤੋ ਸੋ ਉਦ ਵਾ ਸੋ ਨਤ੍ਥਿ.

ਉਦਾਹੁ ਵੇ ਸਸ੍ਸਤਿਯਾ ਅਰੋਗੋਤਿ ਉਦਾਹੁ ਨਿਚ੍ਚੋ ਧੁਵੋ ਸਸ੍ਸਤੋ ਅਵਿਪਰਿਣਾਮਧਮ੍ਮੋ ਸਸ੍ਸਤਿਸਮਂ ਤਥੇਵ ਤਿਟ੍ਠੇਯ੍ਯਾਤਿ – ਉਦਾਹੁ ਵੇ ਸਸ੍ਸਤਿਯਾ ਅਰੋਗੋ.

ਤਂ ਮੇ ਮੁਨੀ ਸਾਧੁ ਵਿਯਾਕਰੋਹੀਤਿ. ਤਨ੍ਤਿ ਯਂ ਪੁਚ੍ਛਾਮਿ ਯਂ ਯਾਚਾਮਿ ਯਂ ਅਜ੍ਝੇਸਾਮਿ ਯਂ ਪਸਾਦੇਮਿ. ਮੁਨੀਤਿ ਮੋਨਂ ਵੁਚ੍ਚਤਿ ਞਾਣਂ…ਪੇ… ਸਙ੍ਗਜਾਲਮਤਿਚ੍ਚ ਸੋ ਮੁਨਿ. ਸਾਧੁ ਵਿਯਾਕਰੋਹੀਤਿ ਸਾਧੁ ਆਚਿਕ੍ਖਾਹਿ ਦੇਸੇਹਿ ਪਞ੍ਞਪੇਹਿ ਪਟ੍ਠਪੇਹਿ ਵਿਵਰਾਹਿ ਵਿਭਜਾਹਿ ਉਤ੍ਤਾਨੀਕਰੋਹਿ ਪਕਾਸੇਹੀਤਿ – ਤਂ ਮੇ ਮੁਨੀ ਸਾਧੁ ਵਿਯਾਕਰੋਹਿ.

ਤਥਾ ਹਿ ਤੇ ਵਿਦਿਤੋ ਏਸ ਧਮ੍ਮੋਤਿ ਤਥਾ ਹਿ ਤੇ ਵਿਦਿਤੋ ਤੁਲਿਤੋ ਤੀਰਿਤੋ ਵਿਭੂਤੋ ਵਿਭਾਵਿਤੋ ਏਸ ਧਮ੍ਮੋਤਿ – ਤਥਾ ਹਿ ਤੇ ਵਿਦਿਤੋ ਏਸ ਧਮ੍ਮੋ. ਤੇਨਾਹ ਸੋ ਬ੍ਰਾਹ੍ਮਣੋ –

‘‘ਅਤ੍ਥਙ੍ਗਤੋ ਸੋ ਉਦ ਵਾ ਸੋ ਨਤ੍ਥਿ, ਉਦਾਹੁ ਵੇ ਸਸ੍ਸਤਿਯਾ ਅਰੋਗੋ;

ਤਂ ਮੇ ਮੁਨੀ ਸਾਧੁ ਵਿਯਾਕਰੋਹਿ, ਤਥਾ ਹਿ ਤੇ ਵਿਦਿਤੋ ਏਸ ਧਮ੍ਮੋ’’ਤਿ.

੪੫. ਅਤ੍ਥਙ੍ਗਤਸ੍ਸ ਨ ਪਮਾਣਮਤ੍ਥਿ, [ਉਪਸੀਵਾਤਿ ਭਗਵਾ]

ਯੇਨ ਨਂ ਵਜ੍ਜੁਂ ਤਂ ਤਸ੍ਸ ਨਤ੍ਥਿ;

ਸਬ੍ਬੇਸੁ ਧਮ੍ਮੇਸੁ ਸਮੂਹਤੇਸੁ, ਸਮੂਹਤਾ ਵਾਦਪਥਾਪਿ ਸਬ੍ਬੇ.

ਅਤ੍ਥਙ੍ਗਤਸ੍ਸ ਨ ਪਮਾਣਮਤ੍ਥੀਤਿ ਅਤ੍ਥਙ੍ਗਤਸ੍ਸ ਅਨੁਪਾਦਿਸੇਸਾਯ ਨਿਬ੍ਬਾਨਧਾਤੁਯਾ ਪਰਿਨਿਬ੍ਬੁਤਸ੍ਸ ਰੂਪਪਮਾਣਂ ਨਤ੍ਥਿ, ਵੇਦਨਾਪਮਾਣਂ ਨਤ੍ਥਿ, ਸਞ੍ਞਾਪਮਾਣਂ ਨਤ੍ਥਿ, ਸਙ੍ਖਾਰਪਮਾਣਂ ਨਤ੍ਥਿ, ਵਿਞ੍ਞਾਣਪਮਾਣਂ ਨਤ੍ਥਿ, ਨ ਅਤ੍ਥਿ ਨ ਸਂਵਿਜ੍ਜਤਿ ਨੁਪਲਬ੍ਭਤਿ ਪਹੀਨਂ ਸਮੁਚ੍ਛਿਨ੍ਨਂ ਵੂਪਸਨ੍ਤਂ ਪਟਿਪ੍ਪਸ੍ਸਦ੍ਧਂ ਅਭਬ੍ਬੁਪ੍ਪਤ੍ਤਿਕਂ ਞਾਣਗ੍ਗਿਨਾ ਦਡ੍ਢਨ੍ਤਿ – ਅਤ੍ਥਙ੍ਗਤਸ੍ਸ ਨ ਪਮਾਣਮਤ੍ਥਿ. ਉਪਸੀਵਾਤਿ ਭਗਵਾਤਿ ਉਪਸੀਵਾਤਿ ਭਗਵਾ ਤਂ ਬ੍ਰਾਹ੍ਮਣਂ ਨਾਮੇਨ ਆਲਪਤਿ. ਭਗਵਾਤਿ ਗਾਰਵਾਧਿਵਚਨਮੇਤਂ…ਪੇ… ਸਚ੍ਛਿਕਾ ਪਞ੍ਞਤ੍ਤਿ, ਯਦਿਦਂ ਭਗਵਾਤਿ – ਉਪਸੀਵਾਤਿ ਭਗਵਾ.

ਯੇਨ ਨਂ ਵਜ੍ਜੁਂ ਤਂ ਤਸ੍ਸ ਨਤ੍ਥੀਤਿ ਯੇਨ ਤਂ ਰਾਗੇਨ [ਯੇਨ ਰਾਗੇਨ (ਸ੍ਯਾ. ਕ.) ਮਹਾਨਿ. ੯੪] ਵਦੇਯ੍ਯੁਂ, ਯੇਨ ਦੋਸੇਨ ਵਦੇਯ੍ਯੁਂ, ਯੇਨ ਮੋਹੇਨ ਵਦੇਯ੍ਯੁਂ, ਯੇਨ ਮਾਨੇਨ ਵਦੇਯ੍ਯੁਂ, ਯਾਯ ਦਿਟ੍ਠਿਯਾ ਵਦੇਯ੍ਯੁਂ, ਯੇਨ ਉਦ੍ਧਚ੍ਚੇਨ ਵਦੇਯ੍ਯੁਂ, ਯਾਯ ਵਿਚਿਕਿਚ੍ਛਾਯ ਵਦੇਯ੍ਯੁਂ, ਯੇਹਿ ਅਨੁਸਯੇਹਿ ਵਦੇਯ੍ਯੁਂ – ਰਤ੍ਤੋਤਿ ਵਾ ਦੁਟ੍ਠੋਤਿ ਵਾ ਮੂਲ਼੍ਹੋਤਿ ਵਾ ਵਿਨਿਬਦ੍ਧੋਤਿ ਵਾ ਪਰਾਮਟ੍ਠੋਤਿ ਵਾ ਵਿਕ੍ਖੇਪਗਤੋਤਿ ਵਾ ਅਨਿਟ੍ਠਙ੍ਗਤੋਤਿ [ਅਨਿਟ੍ਠਾਗਤੋਤਿ (ਕ.)] ਵਾ ਥਾਮਗਤੋਤਿ ਵਾ, ਤੇ ਅਭਿਸਙ੍ਖਾਰਾ ਪਹੀਨਾ. ਅਭਿਸਙ੍ਖਾਰਾਨਂ ਪਹੀਨਤ੍ਤਾ ਗਤਿਯਾ ਯੇਨ ਤਂ ਵਦੇਯ੍ਯੁਂ – ਨੇਰਯਿਕੋਤਿ ਵਾ ਤਿਰਚ੍ਛਾਨਯੋਨਿਕੋਤਿ ਵਾ ਪੇਤ੍ਤਿਵਿਸਯਿਕੋਤਿ ਵਾ ਮਨੁਸ੍ਸੋਤਿ ਵਾ ਦੇਵੋਤਿ ਵਾ ਰੂਪੀਤਿ ਵਾ ਅਰੂਪੀਤਿ ਵਾ ਸਞ੍ਞੀਤਿ ਵਾ ਅਸਞ੍ਞੀਤਿ ਵਾ ਨੇਵਸਞ੍ਞੀਨਾਸਞ੍ਞੀਤਿ ਵਾ, ਸੋ ਹੇਤੁ ਨਤ੍ਥਿ ਪਚ੍ਚਯੋ ਨਤ੍ਥਿ ਕਾਰਣਂ ਨਤ੍ਥਿ ਯੇਨ ਵਦੇਯ੍ਯੁਂ ਕਥੇਯ੍ਯੁਂ ਭਣੇਯ੍ਯੁਂ ਦੀਪੇਯ੍ਯੁਂ ਵੋਹਰੇਯ੍ਯੁਨ੍ਤਿ – ਯੇਨ ਨਂ ਵਜ੍ਜੁਂ ਤਂ ਤਸ੍ਸ ਨਤ੍ਥਿ.

ਸਬ੍ਬੇਸੁ ਧਮ੍ਮੇਸੁ ਸਮੂਹਤੇਸੂਤਿ ਸਬ੍ਬੇਸੁ ਧਮ੍ਮੇਸੁ ਸਬ੍ਬੇਸੁ ਖਨ੍ਧੇਸੁ ਸਬ੍ਬੇਸੁ ਆਯਤਨੇਸੁ ਸਬ੍ਬਾਸੁ ਧਾਤੂਸੁ ਸਬ੍ਬਾਸੁ ਗਤੀਸੁ ਸਬ੍ਬਾਸੁ ਉਪਪਤ੍ਤੀਸੁ ਸਬ੍ਬਾਸੁ ਪਟਿਸਨ੍ਧੀਸੁ ਸਬ੍ਬੇਸੁ ਭਵੇਸੁ ਸਬ੍ਬੇਸੁ ਸਂਸਾਰੇਸੁ ਸਬ੍ਬੇਸੁ ਵਟ੍ਟੇਸੁ ਊਹਤੇਸੁ ਸਮੂਹਤੇਸੁ ਉਦ੍ਧਤੇਸੁ ਸਮੁਦ੍ਧਤੇਸੁ ਉਪ੍ਪਾਟਿਤੇਸੁ ਸਮੁਪ੍ਪਾਟਿਤੇਸੁ ਪਹੀਨੇਸੁ ਸਮੁਚ੍ਛਿਨ੍ਨੇਸੁ ਵੂਪਸਨ੍ਤੇਸੁ ਪਟਿਪ੍ਪਸ੍ਸਦ੍ਧੇਸੁ ਅਭਬ੍ਬੁਪ੍ਪਤ੍ਤਿਕੇਸੁ ਞਾਣਗ੍ਗਿਨਾ ਦਡ੍ਢੇਸੂਤਿ – ਸਬ੍ਬੇਸੁ ਧਮ੍ਮੇਸੁ ਸਮੂਹਤੇਸੁ.

ਸਮੂਹਤਾ ਵਾਦਪਥਾਪਿ ਸਬ੍ਬੇਤਿ ਵਾਦਪਥਾ ਵੁਚ੍ਚਨ੍ਤਿ ਕਿਲੇਸਾ ਚ ਖਨ੍ਧਾ ਚ ਅਭਿਸਙ੍ਖਾਰਾ ਚ. ਤਸ੍ਸ ਵਾਦਾ ਚ ਵਾਦਪਥਾ ਚ ਅਧਿਵਚਨਾਨਿ ਚ ਅਧਿਵਚਨਪਥਾ ਚ ਨਿਰੁਤ੍ਤਿ ਚ ਨਿਰੁਤ੍ਤਿਪਥਾ ਚ ਪਞ੍ਞਤ੍ਤਿ ਚ ਪਞ੍ਞਤ੍ਤਿਪਥਾ ਚ ਊਹਤਾ ਸਮੂਹਤਾ ਉਦ੍ਧਤਾ ਸਮੁਦ੍ਧਤਾ ਉਪ੍ਪਾਟਿਤਾ ਸਮੁਪ੍ਪਾਟਿਤਾ ਪਹੀਨਾ ਸਮੁਚ੍ਛਿਨ੍ਨਾ ਵੂਪਸਨ੍ਤਾ ਪਟਿਪ੍ਪਸ੍ਸਦ੍ਧਾ ਅਭਬ੍ਬੁਪ੍ਪਤ੍ਤਿਕਾ ਞਾਣਗ੍ਗਿਨਾ ਦਡ੍ਢਾਤਿ – ਸਮੂਹਤਾ ਵਾਦਪਥਾਪਿ ਸਬ੍ਬੇ. ਤੇਨਾਹ ਭਗਵਾ –

‘‘ਅਤ੍ਥਙ੍ਗਤਸ੍ਸ ਨ ਪਮਾਣਮਤ੍ਥਿ, [ਉਪਸੀਵਾਤਿ ਭਗਵਾ]

ਯੇਨ ਨਂ ਵਜ੍ਜੁਂ ਤਂ ਤਸ੍ਸ ਨਤ੍ਥਿ;

ਸਬ੍ਬੇਸੁ ਧਮ੍ਮੇਸੁ ਸਮੂਹਤੇਸੁ, ਸਮੂਹਤਾ ਵਾਦਪਥਾਪਿ ਸਬ੍ਬੇ’’ਤਿ.

ਸਹ ਗਾਥਾਪਰਿਯੋਸਾਨਾ ਯੇ ਤੇ ਬ੍ਰਾਹ੍ਮਣੇਨ ਸਦ੍ਧਿਂ…ਪੇ… ਪਞ੍ਜਲਿਕੋ ਨਮਸ੍ਸਮਾਨੋ ਨਿਸਿਨ੍ਨੋ ਹੋਤਿ – ਸਤ੍ਥਾ ਮੇ, ਭਨ੍ਤੇ ਭਗਵਾ, ਸਾਵਕੋਹਮਸ੍ਮੀਤਿ.

ਉਪਸੀਵਮਾਣਵਪੁਚ੍ਛਾਨਿਦ੍ਦੇਸੋ ਛਟ੍ਠੋ.