੨. ਧੁਤਙ੍ਗਪਞ੍ਹੋ

‘‘ਪਸ੍ਸਤਾਰਞ੍ਞਕੇ ਭਿਕ੍ਖੂ, ਅਜ੍ਝੋਗਾਲ਼੍ਹੇ ਧੁਤੇ ਗੁਣੇ;

ਪੁਨ ਪਸ੍ਸਤਿ ਗਿਹੀ ਰਾਜਾ, ਅਨਾਗਾਮਿਫਲੇ ਠਿਤੇ.

‘‘ਉਭੋਪਿ ਤੇ ਵਿਲੋਕੇਤ੍ਵਾ, ਉਪ੍ਪਜ੍ਜਿ ਸਂਸਯੋ ਮਹਾ;

ਬੁਜ੍ਝੇਯ੍ਯ ਚੇ ਗਿਹੀ ਧਮ੍ਮੇ, ਧੁਤਙ੍ਗਂ ਨਿਪ੍ਫਲਂ ਸਿਯਾ.

‘‘ਪਰਵਾਦਿਵਾਦਮਥਨਂ, ਨਿਪੁਣਂ ਪਿਟਕਤ੍ਤਯੇ;

ਹਨ੍ਦ ਪੁਚ੍ਛੇ ਕਥਿਸੇਟ੍ਠਂ, ਸੋ ਮੇ ਕਙ੍ਖਂ ਵਿਨੇਸ੍ਸਤੀ’’ਤਿ.

ਅਥ ਖੋ ਮਿਲਿਨ੍ਦੋ ਰਾਜਾ ਯੇਨਾਯਸ੍ਮਾ ਨਾਗਸੇਨੋ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਆਯਸ੍ਮਨ੍ਤਂ ਨਾਗਸੇਨਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ, ਏਕਮਨ੍ਤਂ ਨਿਸਿਨ੍ਨੋ ਖੋ ਮਿਲਿਨ੍ਦੋ ਰਾਜਾ ਆਯਸ੍ਮਨ੍ਤਂ ਨਾਗਸੇਨਂ ਏਤਦਵੋਚ ‘‘ਭਨ੍ਤੇ ਨਾਗਸੇਨ, ਅਤ੍ਥਿ ਕੋਚਿ ਗਿਹੀ ਅਗਾਰਿਕੋ ਕਾਮਭੋਗੀ ਪੁਤ੍ਤਦਾਰਸਮ੍ਬਾਧਸਯਨਂ ਅਜ੍ਝਾਵਸਨ੍ਤੋ ਕਾਸਿਕਚਨ੍ਦਨਂ ਪਚ੍ਚਨੁਭੋਨ੍ਤੋ ਮਾਲਾਗਨ੍ਧਵਿਲੇਪਨਂ ਧਾਰਯਨ੍ਤੋ ਜਾਤਰੂਪਰਜਤਂ ਸਾਦਿਯਨ੍ਤੋ ਮਣਿਮੁਤ੍ਤਾਕਞ੍ਚਨਵਿਚਿਤ੍ਤਮੋਲ਼ਿਬਦ੍ਧੋ ਯੇਨ ਸਨ੍ਤਂ ਪਰਮਤ੍ਥਂ ਨਿਬ੍ਬਾਨਂ ਸਚ੍ਛਿਕਤ’’ਨ੍ਤਿ?

‘‘ਨ, ਮਹਾਰਾਜ, ਏਕਞ੍ਞੇਵ ਸਤਂ ਨ ਦ੍ਵੇ ਸਤਾਨਿ ਨ ਤੀਣਿ ਚਤ੍ਤਾਰਿ ਪਞ੍ਚ ਸਤਾਨਿ ਨ ਸਹਸ੍ਸਂ ਨ ਸਤਸਹਸ੍ਸਂ ਨ ਕੋਟਿਸਤਂ ਨ ਕੋਟਿਸਹਸ੍ਸਂ ਨ ਕੋਟਿਸਤਸਹਸ੍ਸਂ, ਤਿਟ੍ਠਤੁ ਮਹਾਰਾਜ ਦਸਨ੍ਨਂ ਵੀਸਤਿਯਾ ਸਤਸ੍ਸ ਸਹਸ੍ਸਸ੍ਸ ਅਭਿਸਮਯੋ, ਕਤਮੇਨ ਤੇ ਪਰਿਯਾਯੇਨ ਅਨੁਯੋਗਂ ਦਮ੍ਮੀ’’ਤਿ.

‘‘ਤ੍ਵਮੇਵੇਤਂ ਬ੍ਰੂਹੀ’’ਤਿ. ‘‘ਤੇਨਹਿ ਤੇ, ਮਹਾਰਾਜ, ਕਥਯਿਸ੍ਸਾਮਿ ਸਤੇਨ ਵਾ ਸਹਸ੍ਸੇਨ ਵਾ ਸਤਸਹਸ੍ਸੇਨ ਵਾ ਕੋਟਿਯਾ ਵਾ ਕੋਟਿਸਤੇਨ ਵਾ ਕੋਟਿਸਹਸ੍ਸੇਨ ਵਾ ਕੋਟਿਸਤਸਹਸ੍ਸੇਨ ਵਾ, ਯਾ ਕਾਚਿ ਨਵਙ੍ਗੇ ਬੁਦ੍ਧਵਚਨੇ ਸਲ੍ਲੇਖਿਤਾਚਾਰਪ੍ਪਟਿਪਤ੍ਤਿਧੁਤਵਰਙ੍ਗਗੁਣਨਿਸ੍ਸਿਤਾ [ਧੁਤਵਰਙ੍ਗਗੁਣਨਿਸ੍ਸਿਤਾ (ਸੀ. ਸ੍ਯਾ. ਪੀ.)] ਥਾ, ਤਾ ਸਬ੍ਬਾ ਇਧ ਸਮੋਸਰਿਸ੍ਸਨ੍ਤਿ. ਯਥਾ, ਮਹਾਰਾਜ, ਨਿਨ੍ਨੁਨ੍ਨਤਸਮਵਿਸਮਥਲਾਥਲਦੇਸਭਾਗੇ ਅਭਿਵੁਟ੍ਠਂ ਉਦਕਂ, ਸਬ੍ਬਂ ਤਂ ਤਤੋ ਵਿਨਿਗਲ਼ਿਤ੍ਵਾ ਮਹੋਦਧਿਂ ਸਾਗਰਂ ਸਮੋਸਰਤਿ, ਏਵਮੇਵ ਖੋ, ਮਹਾਰਾਜ, ਸਮ੍ਪਾਦਕੇ ਸਤਿ ਯਾ ਕਾਚਿ ਨਵਙ੍ਗੇ ਬੁਦ੍ਧਵਚਨੇ ਸਲ੍ਲੇਖਿਤਾਚਾਰਪ੍ਪਟਿਪਤ੍ਤਿਧੁਤਙ੍ਗਗੁਣਧਰਨਿਸ੍ਸਿਤਾ ਕਥਾ, ਤਾ ਸਬ੍ਬਾ ਇਧ ਸਮੋਸਰਿਸ੍ਸਨ੍ਤਿ.

‘‘ਮਯ੍ਹਮ੍ਪੇਤ੍ਥ, ਮਹਾਰਾਜ, ਪਰਿਬ੍ਯਤ੍ਤਤਾਯ ਬੁਦ੍ਧਿਯਾ ਕਾਰਣਪਰਿਦੀਪਨਂ ਸਮੋਸਰਿਸ੍ਸਤਿ, ਤੇਨੇਸੋ ਅਤ੍ਥੋ ਸੁਵਿਭਤ੍ਤੋ ਵਿਚਿਤ੍ਤੋ ਪਰਿਪੁਣ੍ਣੋ ਪਰਿਸੁਦ੍ਧੋ ਸਮਾਨੀਤੋ ਭਵਿਸ੍ਸਤਿ. ਯਥਾ, ਮਹਾਰਾਜ, ਕੁਸਲੋ ਲੇਖਾਚਰਿਯੋ ਅਨੁਸਿਟ੍ਠੋ ਲੇਖਂ ਓਸਾਰੇਨ੍ਤੋ ਅਤ੍ਤਨੋ ਬ੍ਯਤ੍ਤਤਾਯ ਬੁਦ੍ਧਿਯਾ ਕਾਰਣਪਰਿਦੀਪਨੇਨ ਲੇਖਂ ਪਰਿਪੂਰੇਤਿ, ਏਵਂ ਸਾ ਲੇਖਾ ਸਮਤ੍ਤਾ ਪਰਿਪੁਣ੍ਣਾ ਅਨੂਨਿਕਾ ਭਵਿਸ੍ਸਤਿ. ਏਵਮੇਵ ਮਯ੍ਹਮ੍ਪੇਤ੍ਥ ਪਰਿਬ੍ਯਤ੍ਤਤਾਯ ਬੁਦ੍ਧਿਯਾ ਕਾਰਣਪਰਿਦੀਪਨਂ ਸਮੋਸਰਿਸ੍ਸਤਿ, ਤੇਨੇਸੋ ਅਤ੍ਥੋ ਸੁਵਿਭਤ੍ਤੋ ਵਿਚਿਤ੍ਤੋ ਪਰਿਪੁਣ੍ਣੋ ਪਰਿਸੁਦ੍ਧੋ ਸਮਾਨੀਤੋ ਭਵਿਸ੍ਸਤਿ.

‘‘ਨਗਰੇ, ਮਹਾਰਾਜ, ਸਾਵਤ੍ਥਿਯਾ ਪਞ੍ਚਕੋਟਿਮਤ੍ਤਾ ਅਰਿਯਸਾਵਕਾ ਭਗਵਤੋ ਉਪਾਸਕਉਪਾਸਿਕਾਯੋ ਸਤ੍ਤਪਣ੍ਣਾਸਸਹਸ੍ਸਾਨਿ ਤੀਣਿ ਚ ਸਤਸਹਸ੍ਸਾਨਿ ਅਨਾਗਾਮਿਫਲੇ ਪਤਿਟ੍ਠਿਤਾ, ਤੇ ਸਬ੍ਬੇਪਿ ਗਿਹੀ ਯੇਵ, ਨ ਪਬ੍ਬਜਿਤਾ. ਪੁਨ ਤਤ੍ਥੇਵ ਕਣ੍ਡਮ੍ਬਮੂਲੇ ਯਮਕਪਾਟਿਹਾਰਿਯੇ ਵੀਸਤਿ ਪਾਣਕੋਟਿਯੋ ਅਭਿਸਮਿਂਸੁ, ਪੁਨ ਚੂਲ਼ਰਾਹੁਲੋਵਾਦੇ [ਮਹਾਰਾਹੁਲੋਵਾਦੇ (ਸੀ. ਪੀ.)], ਮਹਾਮਙ੍ਗਲਸੁਤ੍ਤਨ੍ਤੇ, ਸਮਚਿਤ੍ਤਪਰਿਯਾਯੇ, ਪਰਾਭਵਸੁਤ੍ਤਨ੍ਤੇ, ਪੁਰਾਭੇਦਸੁਤ੍ਤਨ੍ਤੇ, ਕਲਹਵਿਵਾਦਸੁਤ੍ਤਨ੍ਤੇ, ਚੂਲ਼ਬ੍ਯੂਹਸੁਤ੍ਤਨ੍ਤੇ, ਮਹਾਬ੍ਯੂਹਸੁਤ੍ਤਨ੍ਤੇ, ਤੁਵਟਕਸੁਤ੍ਤਨ੍ਤੇ, ਸਾਰਿਪੁਤ੍ਤਸੁਤ੍ਤਨ੍ਤੇ ਗਣਨਪਥਮਤੀਤਾਨਂ ਦੇਵਤਾਨਂ ਧਮ੍ਮਾਭਿਸਮਯੋ ਅਹੋਸਿ.

‘‘ਨਗਰੇ ਰਾਜਗਹੇ ਪਞ੍ਞਾਸਸਹਸ੍ਸਾਨਿ ਤੀਣਿ ਚ ਸਤਸਹਸ੍ਸਾਨਿ ਅਰਿਯਸਾਵਕਾ ਭਗਵਤੋ ਉਪਾਸਕਉਪਾਸਿਕਾਯੋ, ਪੁਨ ਤਤ੍ਥੇਵ ਧਨਪਾਲਹਤ੍ਥਿਨਾਗਦਮਨੇ ਨਵੁਤਿ ਪਾਣਕੋਟਿਯੋ, ਪਾਰਾਯਨਸਮਾਗਮੇ ਪਾਸਾਣਕਚੇਤਿਯੇ ਚੁਦ੍ਦਸ ਪਾਣਕੋਟਿਯੋ, ਪੁਨ ਇਨ੍ਦਸਾਲਗੁਹਾਯਂ ਅਸੀਤਿ ਦੇਵਤਾਕੋਟਿਯੋ, ਪੁਨ ਬਾਰਾਣਸਿਯਂ ਇਸਿਪਤਨੇ ਮਿਗਦਾਯੇ ਪਠਮੇ ਧਮ੍ਮਦੇਸਨੇ ਅਟ੍ਠਾਰਸ ਬ੍ਰਹ੍ਮਕੋਟਿਯੋ ਅਪਰਿਮਾਣਾ ਚ ਦੇਵਤਾਯੋ, ਪੁਨ ਤਾਵਤਿਂਸਭਵਨੇ ਪਣ੍ਡੁਕਮ੍ਬਲਸਿਲਾਯਂ ਅਭਿਧਮ੍ਮਦੇਸਨਾਯ ਅਸੀਤਿ ਦੇਵਤਾਕੋਟਿਯੋ, ਦੇਵੋਰੋਹਣੇ ਸਙ੍ਕਸ੍ਸਨਗਰਦ੍ਵਾਰੇ ਲੋਕਵਿਵਰਣਪਾਟਿਹਾਰਿਯੇ ਪਸਨ੍ਨਾਨਂ ਨਰਮਰੂਨਂ ਤਿਂਸ ਕੋਟਿਯੋ ਅਭਿਸਮਿਂਸੁ.

ਪੁਨ ਸਕ੍ਕੇਸੁ ਕਪਿਲਵਤ੍ਥੁਸ੍ਮਿਂ ਨਿਗ੍ਰੋਧਾਰਾਮੇ ਬੁਦ੍ਧਵਂਸਦੇਸਨਾਯ ਮਹਾਸਮਯਸੁਤ੍ਤਨ੍ਤਦੇਸਨਾਯ ਚ ਗਣਨਪਥਮਤੀਤਾਨਂ ਦੇਵਤਾਨਂ ਧਮ੍ਮਾਭਿਸਮਯੋ ਅਹੋਸਿ. ਪੁਨ ਸੁਮਨਮਾਲਾਕਾਰਸਮਾਗਮੇ, ਗਰਹਦਿਨ੍ਨਸਮਾਗਮੇ, ਆਨਨ੍ਦਸੇਟ੍ਠਿਸਮਾਗਮੇ, ਜਮ੍ਬੁਕਾਜੀਵਕਸਮਾਗਮੇ, ਮਣ੍ਡੁਕਦੇਵਪੁਤ੍ਤਸਮਾਗਮੇ, ਮਟ੍ਠਕੁਣ੍ਡਲਿਦੇਵਪੁਤ੍ਤਸਮਾਗਮੇ, ਸੁਲਸਾਨਗਰਸੋਭਿਨਿਸਮਾਗਮੇ, ਸਿਰਿਮਾਨਗਰਸੋਭਿਨਿਸਮਾਗਮੇ, ਪੇਸਕਾਰਧੀਤੁਸਮਾਗਮੇ, ਚੂਲ਼ਸੁਭਦ੍ਦਾਸਮਾਗਮੇ, ਸਾਕੇਤਬ੍ਰਾਹ੍ਮਣਸ੍ਸ ਆਲ਼ਾਹਨਦਸ੍ਸਨਸਮਾਗਮੇ, ਸੂਨਾਪਰਨ੍ਤਕਸਮਾਗਮੇ, ਸਕ੍ਕਪਞ੍ਹਸਮਾਗਮੇ, ਤਿਰੋਕੁਟ੍ਟਸਮਾਗਮੇ [ਤਿਰੋਕੁਡ੍ਡਸਮਾਗਮੇ (ਸੀ. ਪੀ.)], ਰਤਨਸੁਤ੍ਤਸਮਾਗਮੇ ਪਚ੍ਚੇਕਂ ਚਤੁਰਾਸੀਤਿਯਾ ਪਾਣਸਹਸ੍ਸਾਨਂ ਧਮ੍ਮਾਭਿਸਮਯੋ ਅਹੋਸਿ, ਯਾਵਤਾ, ਮਹਾਰਾਜ, ਭਗਵਾ ਲੋਕੇ ਅਟ੍ਠਾਸਿ, ਤਾਵ ਤੀਸੁ ਮਣ੍ਡਲੇਸੁ ਸੋਲ਼ਸਸੁ ਮਹਾਜਨਪਦੇਸੁ ਯਤ੍ਥ ਯਤ੍ਥ ਭਗਵਾ ਵਿਹਾਸਿ, ਤਤ੍ਥ ਤਤ੍ਥ ਯੇਭੁਯ੍ਯੇਨ ਦ੍ਵੇ ਤਯੋ ਚਤ੍ਤਾਰੋ ਪਞ੍ਚ ਸਤਂ ਸਹਸ੍ਸਂ ਸਤਸਹਸ੍ਸਂ ਦੇਵਾ ਚ ਮਨੁਸ੍ਸਾ ਚ ਸਨ੍ਤਂ ਪਰਮਤ੍ਥਂ ਨਿਬ੍ਬਾਨਂ ਸਚ੍ਛਿਕਰਿਂਸੁ. ਯੇ ਤੇ, ਮਹਾਰਾਜ, ਦੇਵਾ ਗਿਹੀ ਯੇਵ, ਨ ਤੇ ਪਬ੍ਬਜਿਤਾ, ਏਤਾਨਿ ਚੇਵ, ਮਹਾਰਾਜ, ਅਞ੍ਞਾਨਿ ਚ ਅਨੇਕਾਨਿ ਦੇਵਤਾਕੋਟਿਸਤਸਹਸ੍ਸਾਨਿ ਗਿਹੀ ਅਗਾਰਿਕਾ ਕਾਮਭੋਗਿਨੋ ਸਨ੍ਤਂ ਪਰਮਤ੍ਥਂ ਨਿਬ੍ਬਾਨਂ ਸਚ੍ਛਿਕਰਿਂਸੂ’’ਤਿ.

‘‘ਯਦਿ, ਭਨ੍ਤੇ ਨਾਗਸੇਨ, ਗਿਹੀ ਅਗਾਰਿਕਾ ਕਾਮਭੋਗਿਨੋ ਸਨ੍ਤਂ ਪਰਮਤ੍ਥਂ ਨਿਬ੍ਬਾਨਂ ਸਚ੍ਛਿਕਰੋਨ੍ਤਿ, ਅਥ ਇਮਾਨਿ ਧੁਤਙ੍ਗਾਨਿ ਕਿਮਤ੍ਥਂ ਸਾਧੇਨ੍ਤਿ, ਤੇਨ ਕਾਰਣੇਨ ਧੁਤਙ੍ਗਾਨਿ ਅਕਿਚ੍ਚਕਰਾਨਿ ਹੋਨ੍ਤਿ. ਯਦਿ, ਭਨ੍ਤੇ ਨਾਗਸੇਨ, ਵਿਨਾ ਮਨ੍ਤੋਸਧੇਹਿ ਬ੍ਯਾਧਯੋ ਵੂਪਸਮਨ੍ਤਿ, ਕਿਂ ਵਮਨਵਿਰੇਚਨਾਦਿਨਾ ਸਰੀਰਦੁਬ੍ਬਲਕਰਣੇਨ? ਯਦਿ ਮੁਟ੍ਠੀਹਿ ਪਟਿਸਤ੍ਤੁਨਿਗ੍ਗਹੋ ਭਵਤਿ, ਕਿਂ ਅਸਿਸਤ੍ਤਿਸਰਧਨੁਕੋਦਣ੍ਡਲਗੁਲ਼ਮੁਗ੍ਗਰੇਹਿ? ਯਦਿ ਗਣ੍ਠਿਕੁਟਿਲਸੁਸਿਰਕਣ੍ਟਲਤਾਸਾਖਾ ਆਲਮ੍ਬਿਤ੍ਵਾ ਰੁਕ੍ਖਮਭਿਰੂਹਨਂ ਭਵਤਿ, ਕਿਂ ਦੀਘਦਲ਼੍ਹਨਿਸ੍ਸੇਣਿਪਰਿਯੇਸਨੇਨ? ਯਦਿ ਥਣ੍ਡਿਲਸੇਯ੍ਯਾਯ ਧਾਤੁਸਮਤਾ ਭਵਤਿ, ਕਿਂ ਸੁਖਸਮ੍ਫਸ੍ਸਮਹਤਿਮਹਾਸਿਰਿਸਯਨਪਰਿਯੇਸਨੇਨ? ਯਦਿ ਏਕਕੋ ਸਾਸਙ੍ਕਸਪ੍ਪਟਿਭਯਵਿਸਮਕਨ੍ਤਾਰਤਰਣਸਮਤ੍ਥੋ ਭਵਤਿ, ਕਿਂ ਸਨ੍ਨਦ੍ਧਸਜ੍ਜਮਹਤਿਮਹਾਸਤ੍ਥਪਰਿਯੇਸਨੇਨ? ਯਦਿ ਨਦਿਸਰਂ ਬਾਹੁਨਾ ਤਰਿਤੁਂ ਸਮਤ੍ਥੋ ਭਵਤਿ, ਕਿਂ ਧੁਵਸੇਤੁਨਾਵਾਪਰਿਯੇਸਨੇਨ? ਯਦਿ ਸਕਸਨ੍ਤਕੇਨ ਘਾਸਚ੍ਛਾਦਨਂ ਕਾਤੁਂ ਪਹੋਤਿ, ਕਿਂ ਪਰੂਪਸੇਵਨਪਿਯਸਮੁਲ੍ਲਾਪਪਚ੍ਛਾਪੁਰੇਧਾਵਨੇਨ? ਯਦਿ ਅਖਾਤਤਲ਼ਾਕੇ ਉਦਕਂ ਲਭਤਿ, ਕਿਂ ਉਦਪਾਨਤਲ਼ਾਕਪੋਕ੍ਖਰਣਿਖਣਨੇਨ? ਏਵਮੇਵ ਖੋ, ਭਨ੍ਤੇ ਨਾਗਸੇਨ, ਯਦਿ ਗਿਹੀ ਅਗਾਰਿਕਾ ਕਾਮਭੋਗਿਨੋ ਸਨ੍ਤਂ ਪਰਮਤ੍ਥਂ ਨਿਬ੍ਬਾਨਂ ਸਚ੍ਛਿਕਰੋਨ੍ਤਿ, ਕਿਂ ਧੁਤਗੁਣਵਰਸਮਾਦਿਯਨੇਨਾ’’ਤਿ?

‘‘ਅਟ੍ਠਵੀਸਤਿ ਖੋ ਪਨਿਮੇ, ਮਹਾਰਾਜ, ਧੁਤਙ੍ਗਗੁਣਾ ਯਥਾਭੁਚ੍ਚਗੁਣਾ, ਯੇਹਿ ਗੁਣੇਹਿ ਧੁਤਙ੍ਗਾਨਿ ਸਬ੍ਬਬੁਦ੍ਧਾਨਂ ਪਿਹਯਿਤਾਨਿ ਪਤ੍ਥਿਤਾਨਿ. ਕਤਮੇ ਅਟ੍ਠਵੀਸਤਿ? ਇਧ, ਮਹਾਰਾਜ, ਧੁਤਙ੍ਗਂ ਸੁਦ੍ਧਾਜੀਵਂ ਸੁਖਫਲਂ ਅਨਵਜ੍ਜਂ ਨ ਪਰਦੁਕ੍ਖਾਪਨਂ ਅਭਯਂ ਅਸਮ੍ਪੀਲ਼ਨਂ ਏਕਨ੍ਤਵਡ੍ਢਿਕਂ ਅਪਰਿਹਾਨਿਯਂ ਅਮਾਯਂ ਆਰਕ੍ਖਾ ਪਤ੍ਥਿਤਦਦਂ ਸਬ੍ਬਸਤ੍ਤਦਮਨਂ ਸਂਵਰਹਿਤਂ ਪਤਿਰੂਪਂ ਅਨਿਸ੍ਸਿਤਂ ਵਿਪ੍ਪਮੁਤ੍ਤਂ ਰਾਗਕ੍ਖਯਂ ਦੋਸਕ੍ਖਯਂ ਮੋਹਕ੍ਖਯਂ ਮਾਨਪ੍ਪਹਾਨਂ ਕੁਵਿਤਕ੍ਕਚ੍ਛੇਦਨਂ ਕਙ੍ਖਾਵਿਤਰਣਂ ਕੋਸਜ੍ਜਵਿਦ੍ਧਂਸਨਂ ਅਰਤਿਪ੍ਪਹਾਨਂ ਖਮਨਂ ਅਤੁਲਂ ਅਪ੍ਪਮਾਣਂ ਸਬ੍ਬਦੁਕ੍ਖਕ੍ਖਯਗਮਨਂ, ਇਮੇ ਖੋ, ਮਹਾਰਾਜ, ਅਟ੍ਠਵੀਸਤਿ ਧੁਤਙ੍ਗਗੁਣਾ ਯਥਾਭੁਚ੍ਚਗੁਣਾ ਯੇਹਿ ਗੁਣੇਹਿ ਧੁਤਙ੍ਗਾਨਿ ਸਬ੍ਬਬੁਦ੍ਧਾਨਂ ਪਿਹਯਿਤਾਨਿ ਪਤ੍ਥਿਤਾਨਿ.

‘‘ਯੇ ਖੋ ਤੇ, ਮਹਾਰਾਜ, ਧੁਤਗੁਣੇ ਸਮ੍ਮਾ ਉਪਸੇਵਨ੍ਤਿ, ਤੇ ਅਟ੍ਠਾਰਸਹਿ ਗੁਣੇਹਿ ਸਮੁਪੇਤਾ ਭਵਨ੍ਤਿ. ਕਤਮੇਹਿ ਅਟ੍ਠਾਰਸਹਿ? ਆਚਾਰੋ ਤੇਸਂ ਸੁਵਿਸੁਦ੍ਧੋ ਹੋਤਿ, ਪਟਿਪਦਾ ਸੁਪੂਰਿਤਾ ਹੋਤਿ, ਕਾਯਿਕਂ ਵਾਚਸਿਕਂ ਸੁਰਕ੍ਖਿਤਂ ਹੋਤਿ, ਮਨੋਸਮਾਚਾਰੋ ਸੁਵਿਸੁਦ੍ਧੋ ਹੋਤਿ, ਵੀਰਿਯਂ ਸੁਪਗ੍ਗਹਿਤਂ ਹੋਤਿ, ਭਯਂ ਵੂਪਸਮ੍ਮਤਿ, ਅਤ੍ਤਾਨੁਦਿਟ੍ਠਿਬ੍ਯਪਗਤਾ ਹੋਤਿ, ਆਘਾਤੋ ਉਪਰਤੋ ਹੋਤਿ, ਮੇਤ੍ਤਾ ਉਪਟ੍ਠਿਤਾ ਹੋਤਿ, ਆਹਾਰੋ ਪਰਿਞ੍ਞਾਤੋ ਹੋਤਿ, ਸਬ੍ਬਸਤ੍ਤਾਨਂ ਗਰੁਕਤੋ ਹੋਤਿ, ਭੋਜਨੇ ਮਤ੍ਤਞ੍ਞੂ ਹੋਤਿ, ਜਾਗਰਿਯਮਨੁਯੁਤ੍ਤੋ ਹੋਤਿ, ਅਨਿਕੇਤੋ ਹੋਤਿ, ਯਤ੍ਥ ਫਾਸੁ ਤਤ੍ਥ ਵਿਹਾਰੀ ਹੋਤਿ, ਪਾਪਜੇਗੁਚ੍ਛੀ ਹੋਤਿ, ਵਿਵੇਕਾਰਾਮੋ ਹੋਤਿ, ਸਤਤਂ ਅਪ੍ਪਮਤ੍ਤੋ ਹੋਤਿ, ਯੇ ਤੇ, ਮਹਾਰਾਜ, ਧੁਤਗੁਣੇ ਸਮ੍ਮਾ ਉਪਸੇਵਨ੍ਤਿ, ਤੇ ਇਮੇਹਿ ਅਟ੍ਠਾਰਸਹਿ ਗੁਣੇਹਿ ਸਮੁਪੇਤਾ ਭਵਨ੍ਤਿ.

‘‘ਦਸ ਇਮੇ, ਮਹਾਰਾਜ, ਪੁਗ੍ਗਲਾ ਧੁਤਗੁਣਾਰਹਾ. ਕਤਮੇ ਦਸ? ਸਦ੍ਧੋ ਹੋਤਿ ਹਿਰਿਮਾ ਧਿਤਿਮਾ ਅਕੁਹੋ ਅਤ੍ਥਵਸੀ ਅਲੋਲੋ ਸਿਕ੍ਖਾਕਾਮੋ ਦਲ਼੍ਹਸਮਾਦਾਨੋ ਅਨੁਜ੍ਝਾਨਬਹੁਲੋ ਮੇਤ੍ਤਾਵਿਹਾਰੀ, ਇਮੇ ਖੋ, ਮਹਾਰਾਜ, ਦਸ ਪੁਗ੍ਗਲਾ ਧੁਤਗੁਣਾਰਹਾ.

‘‘ਯੇ ਤੇ, ਮਹਾਰਾਜ, ਗਿਹੀ ਅਗਾਰਿਕਾ ਕਾਮਭੋਗਿਨੋ ਸਨ੍ਤਂ ਪਰਮਤ੍ਥਂ ਨਿਬ੍ਬਾਨਂ ਸਚ੍ਛਿਕਰੋਨ੍ਤਿ, ਸਬ੍ਬੇ ਤੇ ਪੁਰਿਮਾਸੁ ਜਾਤੀਸੁ ਤੇਰਸਸੁ ਧੁਤਗੁਣੇਸੁ ਕਤੂਪਾਸਨਾ ਕਤਭੂਮਿਕਮ੍ਮਾ, ਤੇ ਤਤ੍ਥ ਚਾਰਞ੍ਚ ਪਟਿਪਤ੍ਤਿਞ੍ਚ ਸੋਧਯਿਤ੍ਵਾ ਅਜ੍ਜੇਤਰਹਿ ਗਿਹੀ ਯੇਵ ਸਨ੍ਤਾ ਸਨ੍ਤਂ ਪਰਮਤ੍ਤਂ ਨਿਬ੍ਬਾਨਂ ਸਚ੍ਛਿਕਰੋਨ੍ਤਿ.

‘‘ਯਥਾ, ਮਹਾਰਾਜ, ਕੁਸਲੋ ਇਸ੍ਸਾਸੋ ਅਨ੍ਤੇਵਾਸਿਕੇ ਪਠਮਂ ਤਾਵ ਉਪਾਸਨਸਾਲਾਯਂ ਚਾਪਭੇਦਚਾਪਾਰੋਪਨਗ੍ਗਹਣਮੁਟ੍ਠਿਪ੍ਪਟਿਪੀਲ਼ਨਅਙ੍ਗੁਲਿਵਿਨਾਮਨਪਾਦਠਪਨਸਰਗ੍ਗਹਣਸਨ੍ਨਹਨਆਕਡ੍ਢਨ ਸਦ੍ਧਾਰਣਲਕ੍ਖਨਿਯਮਨਖਿਪਨੇ ਤਿਣਪੁਰਿਸਕਛਕਣ [ਖਣਕ (ਸੀ. ਪੀ.)] ਤਿਣਪਲਾਲਮਤ੍ਤਿਕਾਪੁਞ੍ਜਫਲਕਲਕ੍ਖਵੇਧੇ ਅਨੁਸਿਕ੍ਖਾਪੇਤ੍ਵਾ ਰਞ੍ਞੋ ਸਨ੍ਤਿਕੇ ਉਪਾਸਨਂ ਆਰਾਧਯਿਤ੍ਵਾ ਆਜਞ੍ਞਰਥਗਜਤੁਰਙ੍ਗਧਨਧਞ੍ਞਹਿਰਞ੍ਞਸੁਵਣ੍ਣਦਾਸਿਦਾਸਭਰਿਯਗਾਮਵਰਂ ਲਭਤਿ, ਏਵਮੇਵ ਖੋ, ਮਹਾਰਾਜ, ਯੇ ਤੇ ਗਿਹੀ ਅਗਾਰਿਕਾ ਕਾਮਭੋਗਿਨੋ ਸਨ੍ਤਂ ਪਰਮਤ੍ਥਂ ਨਿਬ੍ਬਾਨਂ ਸਚ੍ਛਿਕਰੋਨ੍ਤਿ, ਤੇ ਸਬ੍ਬੇ ਪੁਰਿਮਾਸੁ ਜਾਤੀਸੁ ਤੇਰਸਸੁ ਧੁਤਗੁਣੇਸੁ ਕਤੂਪਾਸਨਾ ਕਤਭੂਮਿਕਮ੍ਮਾ, ਤੇ ਤਤ੍ਥੇਵ ਚਾਰਞ੍ਚ ਪਟਿਪਤ੍ਤਿਞ੍ਚ ਸੋਧਯਿਤ੍ਵਾ ਅਜ੍ਜੇਤਰਹਿ ਗਿਹੀ ਯੇਵ ਸਨ੍ਤਾ ਸਨ੍ਤਂ ਪਰਮਤ੍ਥਂ ਨਿਬ੍ਬਾਨਂ ਸਚ੍ਛਿਕਰੋਨ੍ਤਿ. ਨ, ਮਹਾਰਾਜ, ਧੁਤਗੁਣੇਸੁ ਪੁਬ੍ਬਾਸੇਵਨਂ ਵਿਨਾ ਏਕਿਸ੍ਸਾ ਯੇਵ ਜਾਤਿਯਾ ਅਰਹਤ੍ਤਂ ਸਚ੍ਛਿਕਿਰਿਯਾ ਹੋਤਿ, ਉਤ੍ਤਮੇਨ ਪਨ ਵੀਰਿਯੇਨ ਉਤ੍ਤਮਾਯ ਪਟਿਪਤ੍ਤਿਯਾ ਤਥਾਰੂਪੇਨ ਆਚਰਿਯੇਨ ਕਲ੍ਯਾਣਮਿਤ੍ਤੇਨ ਅਰਹਤ੍ਤਂ ਸਚ੍ਛਿਕਿਰਿਯਾ ਹੋਤਿ.

‘‘ਯਥਾ ਵਾ ਪਨ, ਮਹਾਰਾਜ, ਭਿਸਕ੍ਕੋ ਸਲ੍ਲਕਤ੍ਤੋ ਆਚਰਿਯਂ ਧਨੇਨ ਵਾ ਵਤ੍ਤਪ੍ਪਟਿਪਤ੍ਤਿਯਾ ਵਾ ਆਰਾਧੇਤ੍ਵਾ ਸਤ੍ਤਗ੍ਗਹਣਛੇਦਨਲੇਖਨਵੇਧਨਸਲ੍ਲੁਦ੍ਧਰਣਵਣਧੋਵਨਸੋਸਨਭੇਸਜ੍ਜਾਨੁਲਿਮ੍ਪਨਵਮਨ ਵਿਰੇਚਨਾਨੁਵਾਸਨਕਿਰਿਯਮਨੁਸਿਕ੍ਖਿਤ੍ਵਾ ਵਿਜ੍ਜਾਸੁ ਕਤਸਿਕ੍ਖੋ ਕਤੂਪਾਸਨੋ ਕਤਹਤ੍ਥੋ ਆਤੁਰੇ ਉਪਸਙ੍ਕਮਤਿ ਤਿਕਿਚ੍ਛਾਯ, ਏਵਮੇਵ ਖੋ, ਮਹਾਰਾਜ, ਯੇ ਤੇ ਗਿਹੀ ਅਗਾਰਿਕਾ ਕਾਮਭੋਗਿਨੋ ਸਨ੍ਤਂ ਪਰਮਤ੍ਥਂ ਨਿਬ੍ਬਾਨਂ ਸਚ੍ਛਿਕਰੋਨ੍ਤਿ, ਤੇ ਸਬ੍ਬੇ ਪੁਰਿਮਾਸੁ ਜਾਤੀਸੁ ਤੇਰਸਸੁ ਧੁਤਗੁਣੇਸੁ ਕਤੂਪਾਸਨਾ ਕਤਭੂਮਿਕਮ੍ਮਾ, ਤੇ ਤਤ੍ਥੇਵ ਚਾਰਞ੍ਚ ਪਟਿਪਤ੍ਤਿਞ੍ਚ ਸੋਧਯਿਤ੍ਵਾ ਅਜ੍ਜੇਤਰਹਿ ਗਿਹੀ ਯੇਵ ਸਨ੍ਤਾ ਸਨ੍ਤਂ ਪਰਮਤ੍ਥਂ ਨਿਬ੍ਬਾਨਂ ਸਚ੍ਛਿਕਰੋਨ੍ਤਿ, ਨ, ਮਹਾਰਾਜ, ਧੁਤਗੁਣੇਹਿ ਅਵਿਸੁਦ੍ਧਾਨਂ ਧਮ੍ਮਾਭਿਸਮਯੋ ਹੋਤਿ.

‘‘ਯਥਾ, ਮਹਾਰਾਜ, ਉਦਕਸ੍ਸ ਅਸੇਚਨੇਨ ਬੀਜਾਨਂ ਅਵਿਰੂਹਨਂ ਹੋਤਿ, ਏਵਮੇਵ ਖੋ, ਮਹਾਰਾਜ, ਧੁਤਗੁਣੇਹਿ ਅਵਿਸੁਦ੍ਧਾਨਂ ਧਮ੍ਮਾਭਿਸਮਯੋ ਨ ਹੋਤਿ.

‘‘ਯਥਾ ਵਾ ਪਨ, ਮਹਾਰਾਜ, ਅਕਤਕੁਸਲਾਨਂ ਅਕਤਕਲ੍ਯਾਣਾਨਂ ਸੁਗਤਿਗਮਨਂ ਨ ਹੋਤਿ, ਏਵਮੇਵ ਖੋ, ਮਹਾਰਾਜ, ਧੁਤਗੁਣੇਹਿ ਅਵਿਸੁਦ੍ਧਾਨਂ ਧਮ੍ਮਾਭਿਸਮਯੋ ਨ ਹੋਤਿ.

‘‘ਪਥਵਿਸਮਂ, ਮਹਾਰਾਜ, ਧੁਤਗੁਣਂ ਵਿਸੁਦ੍ਧਿਕਾਮਾਨਂ ਪਤਿਟ੍ਠਾਨਟ੍ਠੇਨ. ਆਪੋਸਮਂ, ਮਹਾਰਾਜ, ਧੁਤਗੁਣਂ ਵਿਸੁਦ੍ਧਿਕਾਮਾਨਂ ਸਬ੍ਬਕਿਲੇਸਮਲਧੋਵਨਟ੍ਠੇਨ. ਤੇਜੋਸਮਂ, ਮਹਾਰਾਜ, ਧੁਤਗੁਣਂ ਵਿਸੁਦ੍ਧਿਕਾਮਾਨਂ ਸਬ੍ਬਕਿਲੇਸਵਨਜ੍ਝਾਪਨਟ੍ਠੇਨ. ਵਾਯੋਸਮਂ, ਮਹਾਰਾਜ, ਧੁਤਗੁਣਂ ਵਿਸੁਦ੍ਧਿਕਾਮਾਨਂ ਸਬ੍ਬਕਿਲੇਸਮਲਰਜੋਪਵਾਹਨਟ੍ਠੇਨ. ਅਗਦਸਮਂ, ਮਹਾਰਾਜ, ਧੁਤਗੁਣਂ ਵਿਸੁਦ੍ਧਿਕਾਮਾਨਂ ਸਬ੍ਬਕਿਲੇਸਬ੍ਯਾਧਿਵੂਪਸਮਨਟ੍ਠੇਨ. ਅਮਤਸਮਂ, ਮਹਾਰਾਜ, ਧੁਤਗੁਣਂ ਵਿਸੁਦ੍ਧਿਕਾਮਾਨਂ ਸਬ੍ਬਕਿਲੇਸਵਿਸਨਾਸਨਟ੍ਠੇਨ. ਖੇਤ੍ਤਸਮਂ, ਮਹਾਰਾਜ, ਧੁਤਗੁਣਂ ਵਿਸੁਦ੍ਧਿਕਾਮਾਨਂ ਸਬ੍ਬਸਾਮਞ੍ਞਗੁਣਸਸ੍ਸਵਿਰੂਹਨਟ੍ਠੇਨ. ਮਨੋਹਰਸਮਂ, ਮਹਾਰਾਜ, ਧੁਤਗੁਣਂ ਵਿਸੁਦ੍ਧਿਕਾਮਾਨਂ ਪਤ੍ਥਿਤਿਚ੍ਛਿਤਸਬ੍ਬਸਮ੍ਪਤ੍ਤਿਵਰਦਦਟ੍ਠੇਨ. ਨਾਵਾਸਮਂ, ਮਹਾਰਾਜ, ਧੁਤਗੁਣਂ ਵਿਸੁਦ੍ਧਿਕਾਮਾਨਂ ਸਂਸਾਰਮਹਣ੍ਣਵਪਾਰਗਮਨਟ੍ਠੇਨ. ਭੀਰੁਤ੍ਤਾਣਸਮਂ, ਮਹਾਰਾਜ, ਧੁਤਗੁਣਂ ਵਿਸੁਦ੍ਧਿਕਾਮਾਨਂ ਜਰਾਮਰਣਭੀਤਾਨਂ ਅਸ੍ਸਾਸਕਰਣਟ੍ਠੇਨ. ਮਾਤੁਸਮਂ, ਮਹਾਰਾਜ, ਧੁਤਗੁਣਂ ਵਿਸੁਦ੍ਧਿਕਾਮਾਨਂ ਕਿਲੇਸਦੁਕ੍ਖਪ੍ਪਟਿਪੀਲ਼ਿਤਾਨਂ ਅਨੁਗ੍ਗਾਹਕਟ੍ਠੇਨ. ਪਿਤੁਸਮਂ, ਮਹਾਰਾਜ, ਧੁਤਗੁਣਂ ਵਿਸੁਦ੍ਧਿਕਾਮਾਨਂ ਕੁਸਲਵਡ੍ਢਿਕਾਮਾਨਂ ਸਬ੍ਬਸਾਮਞ੍ਞਗੁਣਜਨਕਟ੍ਠੇਨ. ਮਿਤ੍ਤਸਮਂ, ਮਹਾਰਾਜ, ਧੁਤਗੁਣਂ ਵਿਸੁਦ੍ਧਿਕਾਮਾਨਂ ਸਬ੍ਬਸਾਮਞ੍ਞਗੁਣਪਰਿਯੇਸਨਅਵਿਸਂਵਾਦਕਟ੍ਠੇਨ. ਪਦੁਮਸਮਂ, ਮਹਾਰਾਜ, ਧੁਤਗੁਣਂ ਵਿਸੁਦ੍ਧਿਕਾਮਾਨਂ ਸਬ੍ਬਕਿਲੇਸਮਲੇਹਿ ਅਨੁਪਲਿਤ੍ਤਟ੍ਠੇਨ. ਚਤੁਜ੍ਜਾਤਿਯਵਰਗਨ੍ਧਸਮਂ, ਮਹਾਰਾਜ, ਧੁਤਗੁਣਂ ਵਿਸੁਦ੍ਧਿਕਾਮਾਨਂ ਕਿਲੇਸਦੁਗ੍ਗਨ੍ਧਪਟਿਵਿਨੋਦਨਟ੍ਠੇਨ. ਗਿਰਿਰਾਜਵਰਸਮਂ, ਮਹਾਰਾਜ, ਧੁਤਗੁਣਂ ਵਿਸੁਦ੍ਧਿਕਾਮਾਨਂ ਅਟ੍ਠਲੋਕਧਮ੍ਮਵਾਤੇਹਿ ਅਕਮ੍ਪਿਯਟ੍ਠੇਨ. ਆਕਾਸਸਮਂ, ਮਹਾਰਾਜ, ਧੁਤਗੁਣਂ ਵਿਸੁਦ੍ਧਿਕਾਮਾਨਂ ਸਬ੍ਬਤ੍ਥ ਗਹਣਾਪਗਤਉਰੁਵਿਸਟਵਿਤ੍ਥਤਮਹਨ੍ਤਟ੍ਠੇਨ. ਨਦੀਸਮਂ, ਮਹਾਰਾਜ, ਧੁਤਗੁਣਂ ਵਿਸੁਦ੍ਧਿਕਾਮਾਨਂ ਕਿਲੇਸਮਲਪਵਾਹਨਟ੍ਠੇਨ. ਸੁਦੇਸਕਸਮਂ, ਮਹਾਰਾਜ, ਧੁਤਗੁਣਂ ਵਿਸੁਦ੍ਧਿਕਾਮਾਨਂ ਜਾਤਿਕਨ੍ਤਾਰਕਿਲੇਸਵਨਗਹਨਨਿਤ੍ਥਰਣਟ੍ਠੇਨ. ਮਹਾਸਤ੍ਥਵਾਹਸਮਂ, ਮਹਾਰਾਜ, ਧੁਤਗੁਣਂ ਵਿਸੁਦ੍ਧਿਕਾਮਾਨਂ ਸਬ੍ਬਭਯਸੁਞ੍ਞਖੇਮਅਭਯਵਰਪਵਰਨਿਬ੍ਬਾਨਨਗਰਸਮ੍ਪਾਪਨਟ੍ਠੇਨ. ਸੁਮਜ੍ਜਿਤਵਿਮਲਾਦਾਸਸਮਂ, ਮਹਾਰਾਜ, ਧੁਤਗੁਣਂ ਵਿਸੁਦ੍ਧਿਕਾਮਾਨਂ ਸਙ੍ਖਾਰਾਨਂ ਸਭਾਵਦਸ੍ਸਨਟ੍ਠੇਨ. ਫਲਕਸਮਂ, ਮਹਾਰਾਜ, ਧੁਤਗੁਣਂ ਵਿਸੁਦ੍ਧਿਕਾਮਾਨਂ ਕਿਲੇਸਲਗੁਲ਼ਸਰਸਤ੍ਤਿਪਟਿਬਾਹਨਟ੍ਠੇਨ. ਛਤ੍ਤਸਮਂ, ਮਹਾਰਾਜ, ਧੁਤਗੁਣਂ ਵਿਸੁਦ੍ਧਿਕਾਮਾਨਂ ਕਿਲੇਸਵਸ੍ਸਤਿਵਿਧਗ੍ਗਿਸਨ੍ਤਾਪਾਤਪਪਟਿਬਾਹਨਟ੍ਠੇਨ. ਚਨ੍ਦਸਮਂ, ਮਹਾਰਾਜ, ਧੁਤਗੁਣਂ ਵਿਸੁਦ੍ਧਿਕਾਮਾਨਂ ਪਿਹਯਿਤਪਤ੍ਥਿਤਟ੍ਠੇਨ. ਸੂਰਿਯਸਮਂ, ਮਹਾਰਾਜ, ਧੁਤਗੁਣਂ ਵਿਸੁਦ੍ਧਿਕਾਮਾਨਂ ਮੋਹਤਮਤਿਮਿਰਨਾਸਨਟ੍ਠੇਨ. ਸਾਗਰਸਮਂ, ਮਹਾਰਾਜ, ਧੁਤਗੁਣਂ ਵਿਸੁਦ੍ਧਿਕਾਮਾਨਂ ਅਨੇਕਵਿਧਸਾਮਞ੍ਞਗੁਣਵਰਰਤਨੁਟ੍ਠਾਨਟ੍ਠੇਨ, ਅਪਰਿਮਿਤਅਸਙ੍ਖ੍ਯੇਯ੍ਯਅਪ੍ਪਮੇਯ੍ਯਟ੍ਠੇਨ ਚ. ਏਵਂ ਖੋ, ਮਹਾਰਾਜ, ਧੁਤਗੁਣਂ ਵਿਸੁਦ੍ਧਿਕਾਮਾਨਂ ਬਹੂਪਕਾਰਂ ਸਬ੍ਬਦਰਥਪਰਿਲ਼ਾਹਨੁਦਂ ਅਰਤਿਨੁਦਂ ਭਯਨੁਦਂ ਭਵਨੁਦਂ ਖੀਲਨੁਦਂ ਮਲਨੁਦਂ ਸੋਕਨੁਦਂ ਦੁਕ੍ਖਨੁਦਂ ਰਾਗਨੁਦਂ ਦੋਸਨੁਦਂ ਮੋਹਨੁਦਂ ਮਾਨਨੁਦਂ ਦਿਟ੍ਠਿਨੁਦਂ ਸਬ੍ਬਾਕੁਸਲਧਮ੍ਮਨੁਦਂ ਯਸਾਵਹਂ ਹਿਤਾਵਹਂ ਸੁਖਾਵਹਂ ਫਾਸੁਕਰਂ ਪੀਤਿਕਰਂ ਯੋਗਕ੍ਖੇਮਕਰਂ ਅਨਵਜ੍ਜਂ ਇਟ੍ਠਸੁਖਵਿਪਾਕਂ ਗੁਣਰਾਸਿਗੁਣਪੁਞ੍ਜਂ ਅਪਰਿਮਿਤਅਸਙ੍ਖ੍ਯੇਯ੍ਯ ਅਪ੍ਪਮੇਯ੍ਯਗੁਣਂ ਵਰਂ ਪਵਰਂ ਅਗ੍ਗਂ.

‘‘ਯਥਾ, ਮਹਾਰਾਜ, ਮਨੁਸ੍ਸਾ ਉਪਤ੍ਥਮ੍ਭਵਸੇਨ ਭੋਜਨਂ ਉਪਸੇਵਨ੍ਤਿ, ਹਿਤਵਸੇਨ ਭੇਸਜ੍ਜਂ ਉਪਸੇਵਨ੍ਤਿ, ਉਪਕਾਰਵਸੇਨ ਮਿਤ੍ਤਂ ਉਪਸੇਵਨ੍ਤਿ, ਤਾਰਣਵਸੇਨ ਨਾਵਂ ਉਪਸੇਵਨ੍ਤਿ, ਸੁਗਨ੍ਧਵਸੇਨ ਮਾਲਾਗਨ੍ਧਂ ਉਪਸੇਵਨ੍ਤਿ, ਅਭਯਵਸੇਨ ਭੀਰੁਤ੍ਤਾਣਂ ਉਪਸੇਵਨ੍ਤਿ, ਪਤਿਟ੍ਠਾਵਸੇਨ [ਪਤਿਟ੍ਠਾਨਵਸੇਨ (ਕ.)] ਪਥਵਿਂ ਉਪਸੇਵਨ੍ਤਿ, ਸਿਪ੍ਪਵਸੇਨ ਆਚਰਿਯਂ ਉਪਸੇਵਨ੍ਤਿ, ਯਸਵਸੇਨ ਰਾਜਾਨਂ ਉਪਸੇਵਨ੍ਤਿ, ਕਾਮਦਦਵਸੇਨ ਮਣਿਰਤਨਂ ਉਪਸੇਵਨ੍ਤਿ, ਏਵਮੇਵ ਖੋ, ਮਹਾਰਾਜ, ਸਬ੍ਬਸਾਮਞ੍ਞਗੁਣਦਦਵਸੇਨ ਅਰਿਯਾ ਧੁਤਗੁਣਂ ਉਪਸੇਵਨ੍ਤਿ.

‘‘ਯਥਾ ਵਾ ਪਨ, ਮਹਾਰਾਜ, ਉਦਕਂ ਬੀਜਵਿਰੂਹਨਾਯ, ਅਗ੍ਗਿ ਝਾਪਨਾਯ, ਆਹਾਰੋ ਬਲਾਹਰਣਾਯ, ਲਤਾ ਬਨ੍ਧਨਾਯ, ਸਤ੍ਥਂ ਛੇਦਨਾਯ, ਪਾਨੀਯਂ ਪਿਪਾਸਾਵਿਨਯਨਾਯ, ਨਿਧਿ ਅਸ੍ਸਾਸਕਰਣਾਯ, ਨਾਵਾ ਤੀਰਸਮ੍ਪਾਪਨਾਯ, ਭੇਸਜ੍ਜਂ ਬ੍ਯਾਧਿਵੂਪਸਮਨਾਯ, ਯਾਨਂ ਸੁਖਗਮਨਾਯ, ਭੀਰੁਤ੍ਤਾਣਂ ਭਯਵਿਨੋਦਨਾਯ, ਰਾਜਾ ਆਰਕ੍ਖਤ੍ਥਾਯ, ਫਲਕਂ ਦਣ੍ਡਲੇਡ੍ਡੁਲਗੁਲ਼ਸਰਸਤ੍ਤਿਪਟਿਬਾਹਨਾਯ, ਆਚਰਿਯੋ ਅਨੁਸਾਸਨਾਯ, ਮਾਤਾ ਪੋਸਨਾਯ, ਆਦਾਸੋ ਓਲੋਕਨਾਯ, ਅਲਙ੍ਕਾਰੋ ਸੋਭਨਾਯ, ਵਤ੍ਥਂ ਪਟਿਚ੍ਛਾਦਨਾਯ, ਨਿਸ੍ਸੇਣੀ ਆਰੋਹਨਾਯ, ਤੁਲਾ ਵਿਸਮਵਿਕ੍ਖੇਪਨਾਯ [ਨਿਕ੍ਖੇਪਨਾਯ (ਸੀ. ਪੀ.)], ਮਨ੍ਤਂ ਪਰਿਜਪ੍ਪਨਾਯ, ਆਵੁਧਂ ਤਜ੍ਜਨੀਯਪਟਿਬਾਹਨਾਯ, ਪਦੀਪੋ ਅਨ੍ਧਕਾਰਵਿਧਮਨਾਯ, ਵਾਤੋ ਪਰਿਲ਼ਾਹਨਿਬ੍ਬਾਪਨਾਯ, ਸਿਪ੍ਪਂ ਵੁਤ੍ਤਿਨਿਪ੍ਫਾਦਨਾਯ, ਅਗਦਂ ਜੀਵਿਤਰਕ੍ਖਣਾਯ, ਆਕਰੋ ਰਤਨੁਪ੍ਪਾਦਨਾਯ, ਰਤਨਂ ਅਲਙ੍ਕਰਾਯ, ਆਣਾ ਅਨਤਿਕ੍ਕਮਨਾਯ, ਇਸ੍ਸਰਿਯਂ ਵਸਵਤ੍ਤਨਾਯ, ਏਵਮੇਵ ਖੋ, ਮਹਾਰਾਜ, ਧੁਤਗੁਣਂ ਸਾਮਞ੍ਞਬੀਜਵਿਰੂਹਨਾਯ, ਕਿਲੇਸਮਲਝਾਪਨਾਯ, ਇਦ੍ਧਿਬਲਾਹਰਣਾਯ, ਸਤਿਸਂਵਰਨਿਬਨ੍ਧਨਾਯ, ਵਿਮਤਿਵਿਚਿਕਿਚ੍ਛਾਸਮੁਚ੍ਛੇਦਨਾਯ, ਤਣ੍ਹਾਪਿਪਾਸਾਵਿਨਯਨਾਯ, ਅਭਿਸਮਯਅਸ੍ਸਾਸਕਰਣਾਯ, ਚਤੁਰੋਘਨਿਤ੍ਥਰਣਾਯ, ਕਿਲੇਸਬ੍ਯਾਧਿਵੂਪਸਮਾਯ, ਨਿਬ੍ਬਾਨਸੁਖਪ੍ਪਟਿਲਾਭਾਯ, ਜਾਤਿਜਰਾਬ੍ਯਾਧਿਮਰਣਸੋਕਪਰਿਦੇਵਦੁਕ੍ਖਦੋਮਨਸ੍ਸੁਪਾਯਾਸਭਯਵਿਨੋਦਨਾਯ, ਸਾਮਞ੍ਞਗੁਣਪਰਿਰਕ੍ਖਣਾਯ, ਅਰਤਿਕੁਵਿਤਕ੍ਕਪਟਿਬਾਹਨਾਯ, ਸਕਲਸਾਮਞ੍ਞਤ੍ਥਾਨੁਸਾਸਨਾਯ, ਸਬ੍ਬਸਾਮਞ੍ਞਗੁਣਪੋਸਨਾਯ, ਸਮਥਵਿਪਸ੍ਸਨਾਮਗ੍ਗਫਲਨਿਬ੍ਬਾਨਦਸ੍ਸਨਾਯ, ਸਕਲਲੋਕਥੁਤਥੋਮਿਤਮਹਤਿਮਹਾਸੋਭਨਕਰਣਾਯ, ਸਬ੍ਬਾਪਾਯਪਿਦਹਨਾਯ, ਸਾਮਞ੍ਞਤ੍ਥਸੇਲਸਿਖਰਮੁਦ੍ਧਨਿ ਅਭਿਰੂਹਨਾਯ, ਵਙ੍ਕਕੁਟਿਲਵਿਸਮਚਿਤ੍ਤਵਿਕ੍ਖੇਪਨਾਯ [ਚਿਤ੍ਤਨਿਕ੍ਖੇਪਨਾਯ (ਸੀ. ਪੀ.)], ਸੇਵਿਤਬ੍ਬਾਸੇਵਿਤਬ੍ਬਧਮ੍ਮੇ ਸਾਧੁਸਜ੍ਝਾਯਕਰਣਾਯ, ਸਬ੍ਬਕਿਲੇਸਪਟਿਸਤ੍ਤੁਤਜ੍ਜਨਾਯ, ਅਵਿਜ੍ਜਨ੍ਧਕਾਰਵਿਧਮਨਾਯ, ਤਿਵਿਧਗ੍ਗਿਸਨ੍ਤਾਪਪਰਿਲ਼ਾਹਨਿਬ੍ਬਾਪਨਾਯ, ਸਣ੍ਹਸੁਖੁਮਸਨ੍ਤਸਮਾਪਤ੍ਤਿਨਿਪ੍ਫਾਦਨਾਯ, ਸਕਲਸਾਮਞ੍ਞਗੁਣਪਰਿਰਕ੍ਖਣਾਯ, ਬੋਜ੍ਝਙ੍ਗਵਰਰਤਨੁਪ੍ਪਾਦਨਾਯ, ਯੋਗਿਜਨਾਲਙ੍ਕਰਣਾਯ, ਅਨਵਜ੍ਜਨਿਪੁਣਸੁਖੁਮਸਨ੍ਤਿਸੁਖਮਨਤਿਕ੍ਕਮਨਾਯ, ਸਕਲਸਾਮਞ੍ਞਅਰਿਯਧਮ੍ਮਵਸਵਤ੍ਤਨਾਯ. ਇਤਿ, ਮਹਾਰਾਜ, ਇਮੇਸਂ ਗੁਣਾਨਂ ਅਧਿਗਮਾਯ ਯਦਿਦਂ ਏਕਮੇਕਂ ਧੁਤਗੁਣਂ, ਏਵਂ, ਮਹਾਰਾਜ, ਅਤੁਲਿਯਂ ਧੁਤਗੁਣਂ ਅਪ੍ਪਮੇਯ੍ਯਂ ਅਸਮਂ ਅਪ੍ਪਟਿਸਮਂ ਅਪ੍ਪਟਿਭਾਗਂ ਅਪ੍ਪਟਿਸੇਟ੍ਠਂ ਉਤ੍ਤਰਂ ਸੇਟ੍ਠਂ ਵਿਸਿਟ੍ਠਂ ਅਧਿਕਂ ਆਯਤਂ ਪੁਥੁਲਂ ਵਿਸਟਂ ਵਿਤ੍ਥਤਂ ਗਰੁਕਂ ਭਾਰਿਯਂ ਮਹਨ੍ਤਂ.

‘‘ਯੋ ਖੋ, ਮਹਾਰਾਜ, ਪੁਗ੍ਗਲੋ ਪਾਪਿਚ੍ਛੋ ਇਚ੍ਛਾਪਕਤੋ ਕੁਹਕੋ ਲੁਦ੍ਧੋ ਓਦਰਿਕੋ ਲਾਭਕਾਮੋ ਯਸਕਾਮੋ ਕਿਤ੍ਤਿਕਾਮੋ ਅਯੁਤ੍ਤੋ ਅਪ੍ਪਤ੍ਤੋ ਅਨਨੁਚ੍ਛਵਿਕੋ ਅਨਰਹੋ ਅਪ੍ਪਤਿਰੂਪੋ ਧੁਤਙ੍ਗਂ [ਤਧੁਗੁਣਂ (ਕ.) ਏਵਮੁਪਰਿਪਿ] ਸਮਾਦਿਯਤਿ, ਸੋ ਦਿਗੁਣਂ ਦਣ੍ਡਮਾਪਜ੍ਜਤਿ, ਸਬ੍ਬਗੁਣਘਾਤਮਾਪਜ੍ਜਤਿ, ਦਿਟ੍ਠਧਮ੍ਮਿਕਂ ਹੀਲ਼ਨਂ ਖੀਲ਼ਨਂ ਗਰਹਨਂ ਉਪ੍ਪਣ੍ਡਨਂ ਖਿਪਨਂ ਅਸਮ੍ਭੋਗਂ ਨਿਸ੍ਸਾਰਣਂ ਨਿਚ੍ਛੁਭਨਂ ਪਵਾਹਨਂ ਪਬ੍ਬਾਜਨਂ ਪਟਿਲਭਤਿ, ਸਮ੍ਪਰਾਯੇਪਿ ਸਤਯੋਜਨਿਕੇ ਅਵੀਚਿਮਹਾਨਿਰਯੇ ਉਣ੍ਹਕਠਿਤਤਤ੍ਤਸਨ੍ਤਤ੍ਤਅਚ੍ਚਿਜਾਲਾਮਾਲਕੇ ਅਨੇਕਵਸ੍ਸਕੋਟਿਸਤਸਹਸ੍ਸਾਨਿ ਉਦ੍ਧਮਧੋ ਤਿਰਿਯਂ ਫੇਣੁਦ੍ਦੇਹਕਂ ਸਮ੍ਪਰਿਵਤ੍ਤਕਂ ਪਚ੍ਚਤਿ, ਤਤੋ ਮੁਚ੍ਚਿਤ੍ਵਾ [ਮੁਚ੍ਚਿਤ੍ਵਾ (ਸੀ. ਪੀ.)] ਕਿਸਫਰੁਸਕਾਲ਼ਙ੍ਗਪਚ੍ਚਙ੍ਗੋ ਸੂਨੁਦ੍ਧੁਮਾਤਸੁਸਿਰੁਤ੍ਤਮਙ੍ਗੋ [ਸੂਨੁਦ੍ਧੁਮਾਤਸੂਚਿਮੁਖਪਮਾਣਸੁਸਿਰੁਤ੍ਤਮਙ੍ਗੋ (ਸੀ. ਪੀ.)] ਛਾਤੋ ਪਿਪਾਸਿਤੋ ਵਿਸਮਭੀਮਰੂਪਵਣ੍ਣੋ ਭਗ੍ਗਕਣ੍ਣਸੋਤੋ ਉਮ੍ਮੀਲਿਤਨਿਮੀਲਿਤਨੇਤ੍ਤਨਯਨੋ ਅਰੁਗਤ੍ਤਪਕ੍ਕਗਤ੍ਤੋ ਪੁਲ਼ਵਾਕਿਣ੍ਣਸਬ੍ਬਕਾਯੋ ਵਾਤਮੁਖੇ ਜਲਮਾਨੋ ਵਿਯ ਅਗ੍ਗਿਕ੍ਖਨ੍ਧੋ ਅਨ੍ਤੋ ਜਲਮਾਨੋ ਪਜ੍ਜਲਮਾਨੋ ਅਤਾਣੋ ਅਸਰਣੋ ਆਰੁਣ੍ਣਰੁਣ੍ਣਕਾਰੁਞ੍ਞਰਵਂ ਪਰਿਦੇਵਮਾਨੋ ਨਿਜ੍ਝਾਮਤਣ੍ਹਿਕੋ ਸਮਣਮਹਾਪੇਤੋ ਹੁਤ੍ਵਾ ਆਹਿਣ੍ਡਮਾਨੋ ਮਹਿਯਾ ਅਟ੍ਟਸ੍ਸਰਂ ਕਰੋਤਿ.

‘‘ਯਥਾ, ਮਹਾਰਾਜ, ਕੋਚਿ ਅਯੁਤ੍ਤੋ ਅਪ੍ਪਤ੍ਤੋ ਅਨਨੁਚ੍ਛਵਿਕੋ ਅਨਰਹੋ ਅਪ੍ਪਤਿਰੂਪੋ ਹੀਨੋ ਕੁਜਾਤਿਕੋ ਖਤ੍ਤਿਯਾਭਿਸੇਕੇਨ ਅਭਿਸਿਞ੍ਚਤਿ, ਸੋ ਲਭਤਿ ਹਤ੍ਥਚ੍ਛੇਦਂ ਪਾਦਚ੍ਛੇਦਂ ਹਤ੍ਥਪਾਦਚ੍ਛੇਦਂ ਕਣ੍ਣਚ੍ਛੇਦਂ ਨਾਸਚ੍ਛੇਦਂ ਕਣ੍ਣਨਾਸਚ੍ਛੇਦਂ ਬਿਲਙ੍ਗਥਾਲਿਕਂ ਸਙ੍ਖਮੁਣ੍ਡਿਕਂ ਰਾਹੁਮੁਖਂ ਜੋਤਿਮਾਲਿਕਂ ਹਤ੍ਥਪਜ੍ਜੋਤਿਕਂ ਏਰਕਵਤ੍ਤਿਕਂ ਚੀਰਕਵਾਸਿਕਂ ਏਣੇਯ੍ਯਕਂ ਬਲ਼ਿਸਮਂਸਿਕਂ ਕਹਾਪਣਕਂ ਖਾਰਾਪਤਚ੍ਛਿਕਂ ਪਲਿਘਪਰਿਵਤ੍ਤਿਕਂ ਪਲਾਲਪੀਠਕਂ ਤਤ੍ਤੇਨ ਤੇਲੇਨ ਓਸਿਞ੍ਚਨਂ ਸੁਨਖੇਹਿ ਖਾਦਾਪਨਂ ਜੀਵਸੂਲਾਰੋਪਨਂ ਅਸਿਨਾ ਸੀਸਚ੍ਛੇਦਂ ਅਨੇਕਵਿਹਿਤਮ੍ਪਿ ਕਮ੍ਮਕਾਰਣਂ ਅਨੁਭਵਤਿ. ਕਿਂ ਕਾਰਣਾ? ਅਯੁਤ੍ਤੋ ਅਪ੍ਪਤ੍ਤੋ ਅਨਨੁਚ੍ਛਵਿਕੋ ਅਨਰਹੋ ਅਪ੍ਪਤਿਰੂਪੋ ਹੀਨੋ ਕੁਜਾਤਿਕੋ ਮਹਨ੍ਤੇ ਇਸ੍ਸਰਿਯੇ ਠਾਨੇ ਅਤ੍ਤਾਨਂ ਠਪੇਸਿ, ਵੇਲਂ ਘਾਤੇਸਿ, ਏਵਮੇਵ ਖੋ, ਮਹਾਰਾਜ, ਯੋ ਕੋਚਿ ਪੁਗ੍ਗਲੋ ਪਾਪਿਚ੍ਛੋ…ਪੇ… ਮਹਿਯਾ ਅਟ੍ਟਸ੍ਸਰਂ ਕਰੋਤਿ.

‘‘ਯੋ ਪਨ, ਮਹਾਰਾਜ, ਪੁਗ੍ਗਲੋ ਯੁਤ੍ਤੋ ਪਤ੍ਤੋ ਅਨੁਚ੍ਛਵਿਕੋ ਅਰਹੋ ਪਤਿਰੂਪੋ ਅਪ੍ਪਿਚ੍ਛੋ ਸਨ੍ਤੁਟ੍ਠੋ ਪਵਿਵਿਤ੍ਤੋ ਅਸਂਸਟ੍ਠੋ ਆਰਦ੍ਧਵੀਰਿਯੋ ਪਹਿਤਤ੍ਤੋ ਅਸਠੋ ਅਮਾਯੋ ਅਨੋਦਰਿਕੋ ਅਲਾਭਕਾਮੋ ਅਯਸਕਾਮੋ ਅਕਿਤ੍ਤਿਕਾਮੋ ਸਦ੍ਧੋ ਸਦ੍ਧਾਪਬ੍ਬਜਿਤੋ ਜਰਾਮਰਣਾ ਮੁਚ੍ਚਿਤੁਕਾਮੋ ‘ਸਾਸਨਂ ਪਗ੍ਗਣ੍ਹਿਸ੍ਸਾਮੀ’ਤਿ ਧੁਤਙ੍ਗਂ ਸਮਾਦਿਯਤਿ, ਸੋ ਦਿਗੁਣਂ ਪੂਜਂ ਅਰਹਤਿ ਦੇਵਾਨਞ੍ਚ ਪਿਯੋ ਹੋਤਿ ਮਨਾਪੋ ਪਿਹਯਿਤੋ ਪਤ੍ਥਿਤੋ, ਜਾਤਿਸੁਮਨਮਲ੍ਲਿਕਾਦੀਨਂ ਵਿਯ ਪੁਪ੍ਫਂ ਨਹਾਤਾਨੁਲਿਤ੍ਤਸ੍ਸ, ਜਿਘਚ੍ਛਿਤਸ੍ਸ ਵਿਯ ਪਣੀਤਭੋਜਨਂ, ਪਿਪਾਸਿਤਸ੍ਸ ਵਿਯ ਸੀਤਲਵਿਮਲਸੁਰਭਿਪਾਨੀਯਂ, ਵਿਸਗਤਸ੍ਸ ਵਿਯ ਓਸਧਵਰਂ, ਸੀਘਗਮਨਕਾਮਸ੍ਸ ਵਿਯ ਆਜਞ੍ਞਰਥਵਰੁਤ੍ਤਮਂ, ਅਤ੍ਥਕਾਮਸ੍ਸ ਵਿਯ ਮਨੋਹਰਮਣਿਰਤਨਂ, ਅਭਿਸਿਞ੍ਚਿਤੁਕਾਮਸ੍ਸ ਵਿਯ ਪਣ੍ਡਰਵਿਮਲਸੇਤਚ੍ਛਤ੍ਤਂ, ਧਮ੍ਮਕਾਮਸ੍ਸ ਵਿਯ ਅਰਹਤ੍ਤਫਲਾਧਿਗਮਮਨੁਤ੍ਤਰਂ. ਤਸ੍ਸ ਚਤ੍ਤਾਰੋ ਸਤਿਪਟ੍ਠਾਨਾ ਭਾਵਨਾਪਾਰਿਪੂਰਿਂ ਗਚ੍ਛਨ੍ਤਿ, ਚਤ੍ਤਾਰੋ ਸਮ੍ਮਪ੍ਪਧਾਨਾ ਚਤ੍ਤਾਰੋ ਇਦ੍ਧਿਪਾਦਾ ਪਞ੍ਚਿਨ੍ਦ੍ਰਿਯਾਨਿ ਪਞ੍ਚ ਬਲਾਨਿ ਸਤ੍ਤ ਬੋਜ੍ਝਙ੍ਗਾ ਅਰਿਯੋ ਅਟ੍ਠਙ੍ਗਿਕੋ ਮਗ੍ਗੋ ਭਾਵਨਾਪਾਰਿਪੂਰਿਂ ਗਚ੍ਛਤਿ, ਸਮਥਵਿਪਸ੍ਸਨਾ ਅਧਿਗਚ੍ਛਤਿ, ਅਧਿਗਮਪ੍ਪਟਿਪਤ੍ਤਿ ਪਰਿਣਮਤਿ, ਚਤ੍ਤਾਰਿ ਸਾਮਞ੍ਞਫਲਾਨਿ ਚਤਸ੍ਸੋ ਪਟਿਸਮ੍ਭਿਦਾ ਤਿਸ੍ਸੋ ਵਿਜ੍ਜਾ ਛਲ਼ਭਿਞ੍ਞਾ ਕੇਵਲੋ ਚ ਸਮਣਧਮ੍ਮੋ ਸਬ੍ਬੇ ਤਸ੍ਸਾਧੇਯ੍ਯਾ ਹੋਨ੍ਤਿ, ਵਿਮੁਤ੍ਤਿਪਣ੍ਡਰਵਿਮਲਸੇਤਚ੍ਛਤ੍ਤੇਨ ਅਭਿਸਿਞ੍ਚਤਿ.

‘‘ਯਥਾ, ਮਹਾਰਾਜ, ਰਞ੍ਞੋ ਖਤ੍ਤਿਯਸ੍ਸ ਅਭਿਜਾਤਕੁਲਕੁਲੀਨਸ੍ਸ ਖਤ੍ਤਿਯਾਭਿਸੇਕੇਨ ਅਭਿਸਿਤ੍ਤਸ੍ਸ ਪਰਿਚਰਨ੍ਤਿ ਸਰਟ੍ਠਨੇਗਮਜਾਨਪਦਭਟਬਲਾ [ਬਲਤ੍ਥਾ (ਸੀ. ਪੀ.)] ਅਟ੍ਠਤ੍ਤਿਂਸਾ ਚ ਰਾਜਪਰਿਸਾ ਨਟਨਚ੍ਚਕਾ ਮੁਖਮਙ੍ਗਲਿਕਾ ਸੋਤ੍ਥਿਵਾਚਕਾ ਸਮਣਬ੍ਰਾਹ੍ਮਣਸਬ੍ਬਪਾਸਣ੍ਡਗਣਾ ਅਭਿਗਚ੍ਛਨ੍ਤਿ, ਯਂ ਕਿਞ੍ਚਿ ਪਥਵਿਯਾ ਪਟ੍ਟਨਰਤਨਾਕਰਨਗਰਸੁਙ੍ਕਟ੍ਠਾਨਵੇਰਜ੍ਜਕਛੇਜ੍ਜਭੇਜ੍ਜਜਨਮਨੁਸਾਸਨਂ ਸਬ੍ਬਤ੍ਥ ਸਾਮਿਕੋ ਭਵਤਿ, ਏਵਮੇਵ ਖੋ, ਮਹਾਰਾਜ, ਯੋ ਕੋਚਿ ਪੁਗ੍ਗਲੋ ਯੁਤ੍ਤੋ ਪਤ੍ਤੋ…ਪੇ… ਵਿਮੁਤ੍ਤਿਪਣ੍ਡਰਵਿਮਲਸੇਤਚ੍ਛਤ੍ਤੇਨ ਅਭਿਸਿਞ੍ਚਤਿ.

‘‘ਤੇਰਸਿਮਾਨਿ, ਮਹਾਰਾਜ, ਧੁਤਙ੍ਗਾਨਿ, ਯੇਹਿ ਸੁਦ੍ਧਿਕਤੋ ਨਿਬ੍ਬਾਨਮਹਾਸਮੁਦ੍ਦਂ ਪਵਿਸਿਤ੍ਵਾ ਬਹੁਵਿਧਂ ਧਮ੍ਮਕੀਲ਼ਮਭਿਕੀਲ਼ਤਿ, ਰੂਪਾਰੂਪਅਟ੍ਠਸਮਾਪਤ੍ਤਿਯੋ ਵਲ਼ਞ੍ਜੇਤਿ, ਇਦ੍ਧਿਵਿਧਂ ਦਿਬ੍ਬਸੋਤਧਾਤੁਂ ਪਰਚਿਤ੍ਤਵਿਜਾਨਨਂ ਪੁਬ੍ਬੇਨਿਵਾਸਾਨੁਸ੍ਸਤਿਂ ਦਿਬ੍ਬਚਕ੍ਖੁਂ ਸਬ੍ਬਾਸਵਕ੍ਖਯਞ੍ਚ ਪਾਪੁਣਾਤਿ. ਕਤਮੇ ਤੇਰਸ? ਪਂਸੁਕੂਲਿਕਙ੍ਗਂ ਤੇਚੀਵਰਿਕਙ੍ਗਂ ਪਿਣ੍ਡਪਾਤਿਕਙ੍ਗਂ ਸਪਦਾਨਚਾਰਿਕਙ੍ਗਂ ਏਕਾਸਨਿਕਙ੍ਗਂ ਪਤ੍ਤਪਿਣ੍ਡਿਕਙ੍ਗਂ ਖਲੁਪਚ੍ਛਾਭਤ੍ਤਿਕਙ੍ਗਂ ਆਰਞ੍ਞਿਕਙ੍ਗਂ ਰੁਕ੍ਖਮੂਲਿਕਙ੍ਗਂ ਅਬ੍ਭੋਕਾਸਿਕਙ੍ਗਂ ਸੋਸਾਨਿਕਙ੍ਗਂ ਯਥਾਸਨ੍ਥਤਿਕਙ੍ਗਂ ਨੇਸਜ੍ਜਿਕਙ੍ਗਂ, ਇਮੇਹਿ ਖੋ, ਮਹਾਰਾਜ, ਤੇਰਸਹਿ ਧੁਤਗੁਣੇਹਿ ਪੁਬ੍ਬੇ ਆਸੇਵਿਤੇਹਿ ਨਿਸੇਵਿਤੇਹਿ ਚਿਣ੍ਣੇਹਿ ਪਰਿਚਿਣ੍ਣੇਹਿ ਚਰਿਤੇਹਿ ਉਪਚਰਿਤੇਹਿ ਪਰਿਪੂਰਿਤੇਹਿ ਕੇਵਲਂ ਸਾਮਞ੍ਞਂ ਪਟਿਲਭਤਿ, ਤਸ੍ਸਾਧੇਯ੍ਯਾ ਹੋਨ੍ਤਿ ਕੇਵਲਾ ਸਨ੍ਤਾ ਸੁਖਾ ਸਮਾਪਤ੍ਤਿਯੋ.

‘‘ਯਥਾ, ਮਹਾਰਾਜ, ਸਧਨੋ ਨਾਵਿਕੋ ਪਟ੍ਟਨੇ ਸੁਟ੍ਠੁ ਕਤਸੁਙ੍ਕੋ ਮਹਾਸਮੁਦ੍ਦਂ ਪਵਿਸਿਤ੍ਵਾ ਵਙ੍ਗਂ ਤਕ੍ਕੋਲਂ ਚੀਨਂ ਸੋਵੀਰਂ ਸੁਰਟ੍ਠਂ ਅਲਸਨ੍ਦਂ ਕੋਲਪਟ੍ਟਨਂ ਸੁਵਣ੍ਣਭੂਮਿਂ ਗਚ੍ਛਤਿ ਅਞ੍ਞਮ੍ਪਿ ਯਂ ਕਿਞ੍ਚਿ ਨਾਵਾਸਞ੍ਚਰਣਂ, ਏਵਮੇਵ ਖੋ, ਮਹਾਰਾਜ, ਇਮੇਹਿ ਤੇਰਸਹਿ ਧੁਤਗੁਣੇਹਿ ਪੁਬ੍ਬੇ ਆਸੇਵਿਤੇਹਿ ਨਿਸੇਵਿਤੇਹਿ ਚਿਣ੍ਣੇਹਿ ਪਰਿਚਿਣ੍ਣੇਹਿ ਚਰਿਤੇਹਿ ਉਪਚਰਿਤੇਹਿ ਪਰਿਪੂਰਿਤੇਹਿ ਕੇਵਲਂ ਸਾਮਞ੍ਞਂ ਪਟਿਲਭਤਿ, ਤਸ੍ਸਾਧੇਯ੍ਯਾ ਹੋਨ੍ਤਿ ਕੇਵਲਾ ਸਨ੍ਤਾ ਸੁਖਾ ਸਮਾਪਤ੍ਤਿਯੋ.

‘‘ਯਥਾ, ਮਹਾਰਾਜ, ਕਸ੍ਸਕੋ ਪਠਮਂ ਖੇਤ੍ਤਦੋਸਂ ਤਿਣਕਟ੍ਠਪਾਸਾਣਂ ਅਪਨੇਤ੍ਵਾ ਕਸਿਤ੍ਵਾ ਵਪਿਤ੍ਵਾ ਸਮ੍ਮਾ ਉਦਕਂ ਪਵੇਸੇਤ੍ਵਾ ਰਕ੍ਖਿਤ੍ਵਾ ਗੋਪੇਤ੍ਵਾ ਲਵਨਮਦ੍ਦਨੇਨ ਬਹੁਧਞ੍ਞਕੋ ਹੋਤਿ, ਤਸ੍ਸਾਧੇਯ੍ਯਾ ਭਵਨ੍ਤਿ ਯੇ ਕੇਚਿ ਅਧਨਾ ਕਪਣਾ ਦਲਿਦ੍ਦਾ ਦੁਗ੍ਗਤਜਨਾ, ਏਵਮੇਵ ਖੋ, ਮਹਾਰਾਜ, ਇਮੇਹਿ ਤੇਰਸਹਿ ਧੁਤਗੁਣੇਹਿ ਪੁਬ੍ਬੇ ਆਸੇਵਿਤੇਹਿ…ਪੇ… ਕੇਵਲਾ ਸਨ੍ਤਾ ਸੁਖਾ ਸਮਾਪਤ੍ਤਿਯੋ.

‘‘ਯਥਾ ਵਾ ਪਨ, ਮਹਾਰਾਜ, ਖਤ੍ਤਿਯੋ ਮੁਦ੍ਧਾਵਸਿਤ੍ਤੋ ਅਭਿਜਾਤਕੁਲੀਨੋ ਛੇਜ੍ਜਭੇਜ੍ਜਜਨਮਨੁਸਾਸਨੇ ਇਸ੍ਸਰੋ ਹੋਤਿ ਵਸਵਤ੍ਤੀ ਸਾਮਿਕੋ ਇਚ੍ਛਾਕਰਣੋ, ਕੇਵਲਾ ਚ ਮਹਾਪਥਵੀ ਤਸ੍ਸਾਧੇਯ੍ਯਾ ਹੋਤਿ, ਏਵਮੇਵ ਖੋ, ਮਹਾਰਾਜ, ਇਮੇਹਿ ਤੇਰਸਹਿ ਧੁਤਗੁਣੇਹਿ ਪੁਬ੍ਬੇ ਆਸੇਵਿਤੇਹਿ ਨਿਸੇਵਿਤੇਹਿ ਚਿਣ੍ਣੇਹਿ ਪਰਿਚਿਣ੍ਣੇਹਿ ਚਰਿਤੇਹਿ ਉਪਚਰਿਤੇਹਿ ਪਰਿਪੂਰਿਤੇਹਿ ਜਿਨਸਾਸਨਵਰੇ ਇਸ੍ਸਰੋ ਹੋਤਿ ਵਸਵਤ੍ਤੀ ਸਾਮਿਕੋ ਇਚ੍ਛਾਕਰਣੋ, ਕੇਵਲਾ ਚ ਸਮਣਗੁਣਾ ਤਸ੍ਸਾਧੇਯ੍ਯਾ ਹੋਨ੍ਤਿ.

‘‘ਨਨੁ, ਮਹਾਰਾਜ, ਥੇਰੋ ਉਪਸੇਨੋ ਵਙ੍ਗਨ੍ਤਪੁਤ੍ਤੋ ਸਲ੍ਲੇਖਧੁਤਗੁਣੇ ਪਰਿਪੂਰਕਾਰਿਤਾਯ ਅਨਾਦਿਯਿਤ੍ਵਾ ਸਾਵਤ੍ਥਿਯਾ ਸਙ੍ਘਸ੍ਸ ਕਤਿਕਂ ਸਪਰਿਸੋ ਨਰਦਮ੍ਮਸਾਰਥਿਂ ਪਟਿਸਲ੍ਲਾਨਗਤਂ ਉਪਸਙ੍ਕਮਿਤ੍ਵਾ ਭਗਵਤੋ ਪਾਦੇ ਸਿਰਸਾ ਵਨ੍ਦਿਤ੍ਵਾ ਏਕਮਨ੍ਤਂ ਨਿਸੀਦਿ, ਭਗਵਾ ਚ ਤਂ ਸੁਵਿਨੀਤਂ ਪਰਿਸਂ ਓਲੋਕੇਤ੍ਵਾ ਹਟ੍ਠਤੁਟ੍ਠੋ ਪਮੁਦਿਤੋ ਉਦਗ੍ਗੋ ਪਰਿਸਾਯ ਸਦ੍ਧਿਂ ਸਲ੍ਲਾਪਂ ਸਲ੍ਲਪਿਤ੍ਵਾ ਅਸਮ੍ਭਿਨ੍ਨੇਨ ਬ੍ਰਹ੍ਮਸ੍ਸਰੇਨ ਏਤਦਵੋਚ ‘ਪਾਸਾਦਿਕਾ ਖੋ ਪਨ ਤ੍ਯਾਯਂ ਉਪਸੇਨ ਪਰਿਸਾ, ਕਤਂ ਤ੍ਵਂ ਉਪਸੇਨ ਪਰਿਸਂ ਵਿਨੇਸੀ’ਤਿ. ਸੋਪਿ ਸਬ੍ਬਞ੍ਞੁਨਾ ਦਸਬਲੇਨ ਦੇਵਾਤਿਦੇਵੇਨ ਪੁਟ੍ਠੋ ਯਥਾਭੂਤਸਭਾਵਗੁਣਵਸੇਨ ਭਗਵਨ੍ਤਂ ਏਤਦਵੋਚ –

‘‘ਯੋ ਕੋਚਿ ਮਂ, ਭਨ੍ਤੇ, ਉਪਸਙ੍ਕਮਿਤ੍ਵਾ ਪਬ੍ਬਜ੍ਜਂ ਵਾ ਨਿਸ੍ਸਯਂ ਵਾ ਯਾਚਤਿ, ਤਮਹਂ ਏਵਂ ਵਦਾਮਿ ‘‘ਅਹਂ ਖੋ ਆਵੁਸੋ ਆਰਞ੍ਞਿਕੋ ਪਿਣ੍ਡਪਾਤਿਕੋ ਪਂਸੁਕੂਲਿਕੋ ਤੇਚੀਵਰਿਕੋ. ਸਚੇ ਤ੍ਵਮ੍ਪਿ ਆਰਞ੍ਞਿਕੋ ਭਵਿਸ੍ਸਸਿ ਪਿਣ੍ਡਪਾਤਿਕੋ ਪਂਸੁਕੂਲਿਕੋ ਤੇਚੀਵਰਿਕੋ, ਏਵਾਹਂ ਤਂ ਪਬ੍ਬਾਜੇਸ੍ਸਾਮਿ ਨਿਸ੍ਸਯਂ ਦਸ੍ਸਾਮੀ’’ਤਿ, ਸਚੇ ਸੋ ਮੇ, ਭਨ੍ਤੇ, ਪਟਿਸ੍ਸੁਣਿਤ੍ਵਾ ਨਨ੍ਦਤਿ ਓਰਮਤਿ, ਏਵਾਹਂ ਤਂ ਪਬ੍ਬਾਜੇਮਿ ਨਿਸ੍ਸਯਂ ਦੇਮਿ, ਸਚੇ ਨ ਨਨ੍ਦਤਿ ਨ ਓਰਮਤਿ, ਨ ਤਂ ਪਬ੍ਬਾਜੇਮਿ, ਨ ਨਿਸ੍ਸਯਂ ਦੇਮਿ, ਏਵਾਹਂ, ਭਨ੍ਤੇ, ਪਰਿਸਂ ਵਿਨੇਮੀ’’ਤਿ. ਏਵਂ ਖੋ [ਏਵਮ੍ਪਿ (ਕ.)], ਮਹਾਰਾਜ, ਧੁਤਗੁਣਵਰਸਮਾਦਿਣ੍ਣੋ ਜਿਨਸਾਸਨਵਰੇ ਇਸ੍ਸਰੋ ਹੋਤਿ. ਵਸਵਤ੍ਤੀ ਸਾਮਿਕੋ ਇਚ੍ਛਾਕਰਣੋ, ਤਸ੍ਸਾਧੇਯ੍ਯਾ ਹੋਨ੍ਤਿ ਕੇਵਲਾ ਸਨ੍ਤਾ ਸੁਖਾ ਸਮਾਪਤ੍ਤਿਯੋ.

‘‘ਯਥਾ, ਮਹਾਰਾਜ, ਪਦੁਮਂ ਅਭਿਵੁਦ੍ਧਪਰਿਸੁਦ੍ਧਉਦਿਚ੍ਚਜਾਤਿਪ੍ਪਭਵਂ ਸਿਨਿਦ੍ਧਂ ਮੁਦੁ ਲੋਭਨੀਯਂ ਸੁਗਨ੍ਧਂ ਪਿਯਂ ਪਤ੍ਥਿਤਂ ਪਸਤ੍ਥਂ ਜਲਕਦ੍ਦਮਮਨੁਪਲਿਤ੍ਤਂ ਅਣੁਪਤ੍ਤਕੇਸਰਕਣ੍ਣਿਕਾਭਿਮਣ੍ਡਿਤਂ ਭਮਰਗਣਸੇਵਿਤਂ ਸੀਤਲਸਲਿਲਸਂਵਦ੍ਧਂ, ਏਵਮੇਵ ਖੋ, ਮਹਾਰਾਜ, ਇਮੇਹਿ ਤੇਰਸਹਿ ਧੁਤਗੁਣੇਹਿ ਪੁਬ੍ਬੇ ਆਸੇਵਿਤੇਹਿ ਨਿਸੇਵਿਤੇਹਿ ਚਿਣ੍ਣੇਹਿ ਪਰਿਚਿਣ੍ਣੇਹਿ ਚਰਿਤੇਹਿ ਉਪਚਰਿਤੇਹਿ ਪਰਿਪੂਰਿਤੇਹਿ ਅਰਿਯਸਾਵਕੋ ਤਿਂਸਗੁਣਵਰੇਹਿ ਸਮੁਪੇਤੋ ਹੋਤਿ.

‘‘ਕਤਮੇਹਿ ਤਿਂਸਗੁਣਵਰੇਹਿ? ਸਿਨਿਦ੍ਧਮੁਦੁਮਦ੍ਦਵਮੇਤ੍ਤਚਿਤ੍ਤੋ ਹੋਤਿ, ਘਾਤਿਤਹਤਵਿਹਤਕਿਲੇਸੋ ਹੋਤਿ, ਹਤਨਿਹਤਮਾਨਦਬ੍ਬੋ ਹੋਤਿ, ਅਚਲਦਲ਼੍ਹਨਿਵਿਟ੍ਠਨਿਬ੍ਬੇਮਤਿਕਸਦ੍ਧੋ ਹੋਤਿ, ਪਰਿਪੁਣ੍ਣਪੀਣਿਤਪਹਟ੍ਠਲੋਭਨੀਯਸਨ੍ਤਸੁਖਸਮਾਪਤ੍ਤਿਲਾਭੀ ਹੋਤਿ, ਸੀਲਵਰਪਵਰਅਸਮਸੁਚਿਗਨ੍ਧਪਰਿਭਾਵਿਤੋ ਹੋਤਿ, ਦੇਵਮਨੁਸ੍ਸਾਨਂ ਪਿਯੋ ਹੋਤਿ ਮਨਾਪੋ, ਖੀਣਾਸਵਅਰਿਯਵਰਪੁਗ੍ਗਲਪਤ੍ਥਿਤੋ, ਦੇਵਮਨੁਸ੍ਸਾਨਂ ਵਨ੍ਦਿਤਪੂਜਿਤੋ, ਬੁਧਵਿਬੁਧਪਣ੍ਡਿਤਜਨਾਨਂ ਥੁਤਥਵਿਤਥੋਮਿਤਪਸਤ੍ਥੋ, ਇਧ ਵਾ ਹੁਰਂ ਵਾ ਲੋਕੇਨ ਅਨੁਪਲਿਤ੍ਤੋ, ਅਪ੍ਪਥੋਕਵਜ੍ਜੇਪਿ [ਅਪ੍ਪਸਾਵਜ੍ਜੇਪਿ (ਕ.)] ਭਯਦਸ੍ਸਾਵੀ, ਵਿਪੁਲਵਰਸਮ੍ਪਤ੍ਤਿਕਾਮਾਨਂ ਮਗ੍ਗਫਲਵਰਤ੍ਥਸਾਧਨੋ, ਆਯਾਚਿਤਵਿਪੁਲਪਣੀਤਪਚ੍ਚਯਭਾਗੀ, ਅਨਿਕੇਤਸਯਨੋ, ਝਾਨਜ੍ਝੋਸਿਤਤਪ੍ਪਵਰਵਿਹਾਰੀ, ਵਿਜਟਿਤਕਿਲੇਸਜਾਲਵਤ੍ਥੁ, ਭਿਨ੍ਨਭਗ੍ਗਸਙ੍ਕੁਟਿਤਸਞ੍ਛਿਨ੍ਨਗਤਿਨੀਵਰਣੋ, ਅਕੁਪ੍ਪਧਮ੍ਮੋ, ਅਭਿਨੀਤਵਾਸੋ, ਅਨਵਜ੍ਜਭੋਗੀ, ਗਤਿਵਿਮੁਤ੍ਤੋ, ਉਤ੍ਤਿਣ੍ਣਸਬ੍ਬਵਿਚਿਕਿਚ੍ਛੋ, ਵਿਮੁਤ੍ਤਿਜ੍ਝੋਸਿਤਤ੍ਥੋ [ਵਿਮੁਤ੍ਤਿਜ੍ਝਾਸਿਤਤ੍ਤੋ (ਸੀ. ਪੀ.)], ਦਿਟ੍ਠਧਮ੍ਮੋ, ਅਚਲਦਲ਼੍ਹਭੀਰੁਤ੍ਤਾਣਮੁਪਗਤੋ, ਸਮੁਚ੍ਛਿਨ੍ਨਾਨੁਸਯੋ, ਸਬ੍ਬਾਸਵਕ੍ਖਯਂ ਪਤ੍ਤੋ, ਸਨ੍ਤਸੁਖਸਮਾਪਤ੍ਤਿਵਿਹਾਰਬਹੁਲੋ, ਸਬ੍ਬਸਮਣਗੁਣਸਮੁਪੇਤੋ, ਇਮੇਹਿ ਤਿਂਸਗੁਣਵਰੇਹਿ ਸਮੁਪੇਤੋ ਹੋਤਿ.

‘‘ਨਨੁ, ਮਹਾਰਾਜ, ਥੇਰੋ ਸਾਰਿਪੁਤ੍ਤੋ ਦਸਸਹਸ੍ਸਿਲੋਕਧਾਤੁਯਾ ਅਗ੍ਗਪੁਰਿਸੋ ਠਪੇਤ੍ਵਾ ਦਸਬਲਂ ਲੋਕਾਚਰਿਯਂ, ਸੋਪਿ ਅਪਰਿਮਿਤਮਸਙ੍ਖ੍ਯੇਯ੍ਯਕਪ੍ਪੇ ਸਮਾਚਿਤਕੁਸਲਮੂਲੋ [ਸਮਾਚਿਣ੍ਣਕੁਸਲਮੂਲੋ (ਕ.)] ਬ੍ਰਾਹ੍ਮਣਕੁਲਕੁਲੀਨੋ ਮਨਾਪਿਕਂ ਕਾਮਰਤਿਂ ਅਨੇਕਸਤਸਙ੍ਖਂ ਧਨਵਰਞ੍ਚ ਓਹਾਯ ਜਿਨਸਾਸਨੇ ਪਬ੍ਬਜਿਤ੍ਵਾ ਇਮੇਹਿ ਤੇਰਸਹਿ ਧੁਤਗੁਣੇਹਿ ਕਾਯਵਚੀਚਿਤ੍ਤਂ ਦਮਯਿਤ੍ਵਾ ਅਜ੍ਜੇਤਰਹਿ ਅਨਨ੍ਤਗੁਣਸਮਨ੍ਨਾਗਤੋ ਗੋਤਮਸ੍ਸ ਭਗਵਤੋ ਸਾਸਨਵਰੇ ਧਮ੍ਮਚਕ੍ਕਮਨੁਪ੍ਪਵਤ੍ਤਕੋ ਜਾਤੋ. ਭਾਸਿਤਮ੍ਪੇਤਂ, ਮਹਾਰਾਜ, ਭਗਵਤਾ ਦੇਵਾਤਿਦੇਵੇਨ ਏਕਙ੍ਗੁਤ੍ਤਰਨਿਕਾਯਵਰਲਞ੍ਛਕੇ –

‘‘ਨਾਹਂ, ਭਿਕ੍ਖਵੇ, ਅਞ੍ਞਂ ਏਕਪੁਗ੍ਗਲਮ੍ਪਿ ਸਮਨੁਪਸ੍ਸਾਮਿ, ਯੋ ਏਵਂ ਤਥਾਗਤੇਨ ਅਨੁਤ੍ਤਰਂ ਧਮ੍ਮਚਕ੍ਕਂ ਪਵਤ੍ਤਿਤਂ ਸਮ੍ਮਦੇਵ ਅਨੁਪ੍ਪਵਤ੍ਤੇਤਿ, ਯਥਯਿਦਂ ਭਿਕ੍ਖਵੇ, ਸਾਰਿਪੁਤ੍ਤੋ, ਸਾਰਿਪੁਤ੍ਤੋ. ਭਿਕ੍ਖਵੇ, ਤਥਾਗਤੇਨ ਅਨੁਤ੍ਤਰਂ ਧਮ੍ਮਚਕ੍ਕਂ ਪਵਤ੍ਤਿਤਂ ਸਮ੍ਮਦੇਵ ਅਨੁਪ੍ਪਵਤ੍ਤੇਤੀ’’’ਤਿ.

‘‘ਸਾਧੁ, ਭਨ੍ਤੇ ਨਾਗਸੇਨ, ਯਂ ਕਿਞ੍ਚਿ ਨਵਙ੍ਗਂ ਬੁਦ੍ਧਵਚਨਂ, ਯਾ ਚ ਲੋਕੁਤ੍ਤਰਾ ਕਿਰਿਯਾ, ਯਾ ਚ ਲੋਕੇ ਅਧਿਗਮਵਿਪੁਲਵਰਸਮ੍ਪਤ੍ਤਿਯੋ, ਸਬ੍ਬਂ ਤਂ ਤੇਰਸਸੁ ਧੁਤਗੁਣੇਸੁ ਸਮੋਧਾਨੋਪਗਤ’’ [ਸਮੋਧਾਨੇਤਬ੍ਬਂ (ਕ.)] ਨ੍ਤਿ.

ਧੁਤਙ੍ਗਪਞ੍ਹੋ ਦੁਤਿਯੋ.

ਅਨੁਮਾਨਵਗ੍ਗੋ ਚਤੁਤ੍ਥੋ.