੧੨. ਨਿਬ੍ਬਾਨਸਨ੍ਨਿਹਿਤਪਞ੍ਹੋ

੧੨. ‘‘ਭਨ੍ਤੇ ਨਾਗਸੇਨ, ਅਤ੍ਥਿ ਸੋ ਪਦੇਸੋ ਪੁਰਤ੍ਥਿਮਾਯ ਵਾ ਦਿਸਾਯ ਦਕ੍ਖਿਣਾਯ ਵਾ ਦਿਸਾਯ ਪਚ੍ਛਿਮਾਯ ਵਾ ਦਿਸਾਯ ਉਤ੍ਤਰਾਯ ਵਾ ਦਿਸਾਯ ਉਦ੍ਧਂ ਵਾ ਅਧੋ ਵਾ ਤਿਰਿਯਂ ਵਾ, ਯਤ੍ਥ ਨਿਬ੍ਬਾਨਂ ਸਨ੍ਨਿਹਿਤ’’ਨ੍ਤਿ? ‘‘ਨਤ੍ਥਿ, ਮਹਾਰਾਜ, ਸੋ ਪਦੇਸੋ ਪੁਰਤ੍ਥਿਮਾਯ ਵਾ ਦਿਸਾਯ ਦਕ੍ਖਿਣਾਯ ਵਾ ਦਿਸਾਯ ਪਚ੍ਛਿਮਾਯ ਵਾ ਦਿਸਾਯ ਉਤ੍ਤਰਾਯ ਵਾ ਦਿਸਾਯ ਉਦ੍ਧਂ ਵਾ ਅਧੋ ਵਾ ਤਿਰਿਯਂ ਵਾ, ਯਤ੍ਥ ਨਿਬ੍ਬਾਨਂ ਸਨ੍ਨਿਹਿਤ’’ਨ੍ਤਿ.

‘‘ਯਦਿ, ਭਨ੍ਤੇ ਨਾਗਸੇਨ, ਨਤ੍ਥਿ ਨਿਬ੍ਬਾਨਸ੍ਸ ਸਨ੍ਨਿਹਿਤੋਕਾਸੋ, ਤੇਨ ਹਿ ਨਤ੍ਥਿ ਨਿਬ੍ਬਾਨਂ? ਯੇਸਞ੍ਚ ਤਂ ਨਿਬ੍ਬਾਨਂ ਸਚ੍ਛਿਕਤਂ, ਤੇਸਮ੍ਪਿ ਸਚ੍ਛਿਕਿਰਿਯਾ ਮਿਚ੍ਛਾ, ਕਾਰਣਂ ਤਤ੍ਥ ਵਕ੍ਖਾਮਿ, ਯਥਾ, ਭਨ੍ਤੇ ਨਾਗਸੇਨ, ਮਹਿਯਾ ਧਞ੍ਞੁਟ੍ਠਾਨਂ ਖੇਤ੍ਤਂ ਅਤ੍ਥਿ, ਗਨ੍ਧੁਟ੍ਠਾਨਂ ਪੁਪ੍ਫਂ ਅਤ੍ਥਿ, ਪੁਪ੍ਫੁਟ੍ਠਾਨਂ ਗੁਮ੍ਬੋ ਅਤ੍ਥਿ, ਫਲੁਟ੍ਠਾਨਂ ਰੁਕ੍ਖੋ ਅਤ੍ਥਿ, ਰਤਨੁਟ੍ਠਾਨਂ ਆਕਰੋ ਅਤ੍ਥਿ, ਤਤ੍ਥ ਯੋ ਕੋਚਿ ਯਂ ਯਂ ਇਚ੍ਛਤਿ, ਸੋ ਤਤ੍ਥ ਗਨ੍ਤ੍ਵਾ ਤਂ ਤਂ ਹਰਤਿ, ਏਵਮੇਵ ਖੋ, ਭਨ੍ਤੇ ਨਾਗਸੇਨ, ਯਦਿ ਨਿਬ੍ਬਾਨਂ ਅਤ੍ਥਿ, ਤਸ੍ਸ ਨਿਬ੍ਬਾਨਸ੍ਸ ਉਟ੍ਠਾਨੋਕਾਸੋਪਿ ਇਚ੍ਛਿਤਬ੍ਬੋ, ਯਸ੍ਮਾ ਚ ਖੋ, ਭਨ੍ਤੇ ਨਾਗਸੇਨ, ਨਿਬ੍ਬਾਨਸ੍ਸ ਉਟ੍ਠਾਨੋਕਾਸੋ ਨਤ੍ਥਿ, ਤਸ੍ਮਾ ਨਤ੍ਥਿ ਨਿਬ੍ਬਾਨਨ੍ਤਿ ਬ੍ਰੂਮਿ, ਯੇਸਞ੍ਚ ਨਿਬ੍ਬਾਨਂ ਸਚ੍ਛਿਕਤਂ, ਤੇਸਮ੍ਪਿ ਸਚ੍ਛਿਕਿਰਿਯਾ ਮਿਚ੍ਛਾ’’ਤਿ.

‘‘ਨਤ੍ਥਿ, ਮਹਾਰਾਜ, ਨਿਬ੍ਬਾਨਸ੍ਸ ਸਨ੍ਨਿਹਿਤੋਕਾਸੋ, ਅਤ੍ਥਿ ਚੇਤਂ ਨਿਬ੍ਬਾਨਂ, ਸਮ੍ਮਾਪਟਿਪਨ੍ਨੋ ਯੋਨਿਸੋ ਮਨਸਿਕਾਰੇਨ ਨਿਬ੍ਬਾਨਂ ਸਚ੍ਛਿਕਰੋਤਿ. ਯਥਾ ਪਨ, ਮਹਾਰਾਜ, ਅਤ੍ਥਿ ਅਗ੍ਗਿ ਨਾਮ, ਨਤ੍ਥਿ ਤਸ੍ਸ ਸਨ੍ਨਿਹਿਤੋਕਾਸੋ, ਦ੍ਵੇ ਕਟ੍ਠਾਨਿ ਸਙ੍ਘਟ੍ਟੇਨ੍ਤੋ ਅਗ੍ਗਿਂ ਅਧਿਗਚ੍ਛਤਿ. ਏਵਮੇਵ ਖੋ, ਮਹਾਰਾਜ, ਅਤ੍ਥਿ ਨਿਬ੍ਬਾਨਂ, ਨਤ੍ਥਿ ਤਸ੍ਸ ਸਨ੍ਨਿਹਿਤੋਕਾਸੋ, ਸਮ੍ਮਾਪਟਿਪਨ੍ਨੋ ਯੋਨਿਸੋ ਮਨਸਿਕਾਰੇਨ ਨਿਬ੍ਬਾਨਂ ਸਚ੍ਛਿਕਰੋਤਿ.

‘‘ਯਥਾ ਵਾ ਪਨ, ਮਹਾਰਾਜ, ਅਤ੍ਥਿ ਸਤ੍ਤ ਰਤਨਾਨਿ ਨਾਮ. ਸੇਯ੍ਯਥਿਦਂ, ਚਕ੍ਕਰਤਨਂ ਹਤ੍ਥਿਰਤਨਂ ਅਸ੍ਸਰਤਨਂ ਮਣਿਰਤਨਂ ਇਤ੍ਥਿਰਤਨਂ ਗਹਪਤਿਰਤਨਂ ਪਰਿਣਾਯਕਰਤਨਂ. ਨ ਚ ਤੇਸਂ ਰਤਨਾਨਂ ਸਨ੍ਨਿਹਿਤੋਕਾਸੋ ਅਤ੍ਥਿ, ਖਤ੍ਤਿਯਸ੍ਸ ਪਨ ਸਮ੍ਮਾਪਟਿਪਨ੍ਨਸ੍ਸ ਪਟਿਪਤ੍ਤਿਬਲੇਨ ਤਾਨਿ ਰਤਨਾਨਿ ਉਪਗਚ੍ਛਨ੍ਤਿ. ਏਵਮੇਵ ਖੋ, ਮਹਾਰਾਜ, ਅਤ੍ਥਿ ਨਿਬ੍ਬਾਨਂ, ਨਤ੍ਥਿ ਤਸ੍ਸ ਸਨ੍ਨਿਹਿਤੋਕਾਸੋ, ਸਮ੍ਮਾਪਟਿਪਨ੍ਨੋ ਯੋਨਿਸੋ ਮਨਸਿਕਾਰੇਨ ਨਿਬ੍ਬਾਨਂ ਸਚ੍ਛਿਕਰੋਤੀ’’ਤਿ.

‘‘ਭਨ੍ਤੇ ਨਾਗਸੇਨ, ਨਿਬ੍ਬਾਨਸ੍ਸ ਸਨ੍ਨਿਹਿਤੋਕਾਸੋ ਮਾ ਹੋਤੁ, ਅਤ੍ਥਿ ਪਨ ਤਂ ਠਾਨਂ, ਯਤ੍ਥ ਠਿਤੋ ਸਮ੍ਮਾਪਟਿਪਨ੍ਨੋ ਨਿਬ੍ਬਾਨਂ ਸਚ੍ਛਿਕਰੋਤੀ’’ਤਿ? ‘‘ਆਮ, ਮਹਾਰਾਜ, ਅਤ੍ਥਿ ਤਂ ਠਾਨਂ, ਯਤ੍ਥ ਠਿਤੋ ਸਮ੍ਮਾਪਟਿਪਨ੍ਨੋ ਨਿਬ੍ਬਾਨਂ ਸਚ੍ਛਿਕਰੋਤੀ’’ਤਿ.

‘‘ਕਤਮਂ ਪਨ, ਭਨ੍ਤੇ, ਤਂ ਠਾਨਂ, ਯਤ੍ਥ ਠਿਤੋ ਸਮ੍ਮਾਪਟਿਪਨ੍ਨੋ ਨਿਬ੍ਬਾਨਂ ਸਚ੍ਛਿਕਰੋਤੀ’’ਤਿ? ‘‘ਸੀਲਂ, ਮਹਾਰਾਜ, ਠਾਨਂ, ਸੀਲੇ ਪਤਿਟ੍ਠਿਤੋ ਯੋਨਿਸੋ ਮਨਸਿਕਰੋਨ੍ਤੋ ਸਕ੍ਕਯਵਨੇਪਿ ਚੀਨਵਿਲਾਤੇਪਿ ਅਲਸਨ੍ਦੇਪਿ ਨਿਗੁਮ੍ਬੇਪਿ [ਨਿਕੁਮ੍ਬੇਪਿ (ਸੀ. ਸ੍ਯਾ. ਪੀ.)] ਕਾਸਿਕੋਸਲੇਪਿ ਕਸ੍ਮੀਰੇਪਿ ਗਨ੍ਧਾਰੇਪਿ ਨਗਮੁਦ੍ਧਨਿਪਿ ਬ੍ਰਹ੍ਮਲੋਕੇਪਿ ਯਤ੍ਥ ਕਤ੍ਥਚਿਪਿ ਠਿਤੋ ਸਮ੍ਮਾਪਟਿਪਨ੍ਨੋ ਨਿਬ੍ਬਾਨਂ ਸਚ੍ਛਿਕਰੋਤਿ. ਯਥਾ, ਮਹਾਰਾਜ, ਯੋ ਕੋਚਿ ਚਕ੍ਖੁਮਾ ਪੁਰਿਸੋ ਸਕਯਵਨੇਪਿ ਚੀਨਵਿਲਾਤੇਪਿ ਅਲਸਨ੍ਦੇਪਿ ਨਿਗੁਮ੍ਬੇਪਿ ਕਾਸਿਕੋਸਲੇਪਿ ਕਸ੍ਮੀਰੇਪਿ ਗਨ੍ਧਾਰੇਪਿ ਨਗਮੁਦ੍ਧਨਿਪਿ ਬ੍ਰਹ੍ਮਲੋਕੇਪਿ ਯਤ੍ਥ ਕਤ੍ਥਚਿਪਿ ਠਿਤੋ ਆਕਾਸਂ ਪਸ੍ਸਤਿ, ਏਵਮੇਵ ਖੋ, ਮਹਾਰਾਜ, ਸੀਲੇ ਪਤਿਟ੍ਠਿਤੋ ਯੋਨਿਸੋ ਮਨਸਿਕਰੋਨ੍ਤੋ ਸਕਯਵਨੇਪਿ…ਪੇ… ਯਤ੍ਥ ਕਤ੍ਥਚਿਪਿ ਠਿਤੋ ਸਮ੍ਮਾਪਟਿਪਨ੍ਨੋ ਨਿਬ੍ਬਾਨਂ ਸਚ੍ਛਿਕਰੋਤਿ.

‘‘ਯਥਾ ਵਾ ਪਨ, ਮਹਾਰਾਜ, ਸਕਯਵਨੇਪਿ…ਪੇ… ਯਤ੍ਥ ਕਤ੍ਥਚਿਪਿ ਠਿਤਸ੍ਸ ਪੁਬ੍ਬਦਿਸਾ ਅਤ੍ਥਿ, ਏਵਮੇਵ ਖੋ, ਮਹਾਰਾਜ, ਸੀਲੇ ਪਤਿਟ੍ਠਿਤਸ੍ਸ ਯੋਨਿਸੋ ਮਨਸਿਕਰੋਨ੍ਤਸ੍ਸ ਸਕ੍ਕਯਵਨੇਪਿ…ਪੇ… ਯਤ੍ਥ ਕਤ੍ਥਚਿਪਿ ਠਿਤਸ੍ਸ ਸਮ੍ਮਾਪਟਿਪਨ੍ਨਸ੍ਸ ਅਤ੍ਥਿ ਨਿਬ੍ਬਾਨਸਚ੍ਛਿਕਿਰਿਯਾ’’ਤਿ. ‘‘ਸਾਧੁ, ਭਨ੍ਤੇ ਨਾਗਸੇਨ, ਦੇਸਿਤਂ ਤਯਾ ਨਿਬ੍ਬਾਨਂ, ਦੇਸਿਤਾ ਨਿਬ੍ਬਾਨਸਚ੍ਛਿਕਿਰਿਯਾ, ਪਰਿਕ੍ਖਤਾ ਸੀਲਗੁਣਾ, ਦਸ੍ਸਿਤਾ ਸਮ੍ਮਾਪਟਿਪਤ੍ਤਿ, ਉਸ੍ਸਾਪਿਤੋ ਧਮ੍ਮਦ੍ਧਜੋ, ਸਣ੍ਠਪਿਤਾ ਧਮ੍ਮਨੇਤ੍ਤਿ, ਅਵਞ੍ਝੋ ਸੁਪ੍ਪਯੁਤ੍ਤਾਨਂ ਸਮ੍ਮਾਪਯੋਗੋ, ਏਵਮੇਤਂ ਗਣਿਵਰਪਵਰ ਤਥਾ ਸਮ੍ਪਟਿਚ੍ਛਾਮੀ’’ਤਿ.

ਨਿਬ੍ਬਾਨਸਨ੍ਨਿਹਿਤਪਞ੍ਹੋ ਦ੍ਵਾਦਸਮੋ.

ਵੇਸ੍ਸਨ੍ਤਰਵਗ੍ਗੋ ਤਤਿਯੋ.

ਇਮਸ੍ਮਿਂ ਵਗ੍ਗੇ ਦ੍ਵਾਦਸ ਪਞ੍ਹਾ.