੯. ਸੂਰਿਯਤਪਨਪਞ੍ਹੋ

੯. ‘‘ਭਨ੍ਤੇ ਨਾਗਸੇਨ, ਅਯਂ ਸੂਰਿਯੋ ਸਬ੍ਬਕਾਲਂ ਕਠਿਨਂ ਤਪਤਿ, ਉਦਾਹੁ ਕਿਞ੍ਚਿਕਾਲਂ ਮਨ੍ਦਂ ਤਪਤੀ’’ਤਿ? ‘‘ਸਬ੍ਬਕਾਲਂ, ਮਹਾਰਾਜ, ਸੂਰਿਯੋ ਕਠਿਨਂ ਤਪਤਿ, ਨ ਕਿਞ੍ਚਿਕਾਲਂ ਮਨ੍ਦਂ ਤਪਤੀ’’ਤਿ. ‘‘ਯਦਿ, ਭਨ੍ਤੇ ਨਾਗਸੇਨ, ਸੂਰਿਯੋ ਸਬ੍ਬਕਾਲਂ ਕਠਿਨਂ ਤਪਤਿ, ਕਿਸ੍ਸ ਪਨ ਅਪ੍ਪੇਕਦਾ ਸੂਰਿਯੋ ਕਠਿਨਂ ਤਪਤਿ, ਅਪ੍ਪੇਕਦਾ ਮਨ੍ਦਂ ਤਪਤੀ’’ਤਿ? ‘‘ਚਤ੍ਤਾਰੋਮੇ, ਮਹਾਰਾਜ, ਸੂਰਿਯਸ੍ਸ ਰੋਗਾ, ਯੇਸਂ ਅਞ੍ਞਤਰੇਨ ਰੋਗੇਨ ਪਟਿਪੀਲ਼ਿਤੋ ਸੂਰਿਯੋ ਮਨ੍ਦਂ ਤਪਤਿ. ਕਤਮੇ ਚਤ੍ਤਾਰੋ? ਅਬ੍ਭਂ, ਮਹਾਰਾਜ, ਸੂਰਿਯਸ੍ਸ ਰੋਗੋ, ਤੇਨ ਰੋਗੇਨ ਪਟਿਪੀਲ਼ਿਤੋ ਸੂਰਿਯੋ ਮਨ੍ਦਂ ਤਪਤਿ. ਮਹਿਕਾ, ਮਹਾਰਾਜ, ਸੂਰਿਯਸ੍ਸ ਰੋਗੋ, ਤੇਨ ਰੋਗੇਨ ਪਟਿਪੀਲ਼ਿਤੋ ਸੂਰਿਯੋ ਮਨ੍ਦਂ ਤਪਤਿ. ਮੇਘੋ, ਮਹਾਰਾਜ, ਸੂਰਿਯਸ੍ਸ ਰੋਗੋ, ਤੇਨ ਰੋਗੇਨ ਪਟਿਪੀਲ਼ਿਤੋ ਸੂਰਿਯੋ ਮਨ੍ਦਂ ਤਪਤਿ. ਰਾਹੁ, ਮਹਾਰਾਜ, ਸੂਰਿਯਸ੍ਸ ਰੋਗੋ, ਤੇਨ ਰੋਗੇਨ ਪਟਿਪੀਲ਼ਿਤੋ ਸੂਰਿਯੋ ਮਨ੍ਦਂ ਤਪਤਿ. ਇਮੇ ਖੋ, ਮਹਾਰਾਜ, ਚਤ੍ਤਾਰੋ ਸੂਰਿਯਸ੍ਸ ਰੋਗਾ, ਯੇਸਂ ਅਞ੍ਞਤਰੇਨ ਰੋਗੇਨ ਪਟਿਪੀਲ਼ਿਤੋ ਸੂਰਿਯੋ ਮਨ੍ਦਂ ਤਪਤੀ’’ਤਿ. ‘‘ਅਚ੍ਛਰਿਯਂ, ਭਨ੍ਤੇ ਨਾਗਸੇਨ, ਅਬ੍ਭੁਤਂ, ਭਨ੍ਤੇ ਨਾਗਸੇਨ, ਸੂਰਿਯਸ੍ਸਪਿ ਤਾਵ ਤੇਜੋਸਮ੍ਪਨ੍ਨਸ੍ਸ ਰੋਗੋ ਉਪ੍ਪਜ੍ਜਿਸ੍ਸਤਿ, ਕਿਮਙ੍ਗਂ ਪਨ ਅਞ੍ਞੇਸਂ ਸਤ੍ਤਾਨਂ, ਨਤ੍ਥਿ, ਭਨ੍ਤੇ, ਏਸਾ ਵਿਭਤ੍ਤਿ ਅਞ੍ਞਸ੍ਸ ਅਞ੍ਞਤ੍ਰ ਤਵਾਦਿਸੇਨ ਬੁਦ੍ਧਿਮਤਾ’’ਤਿ.

ਸੂਰਿਯਤਪਨਪਞ੍ਹੋ ਨਵਮੋ.