੭. ਅਞ੍ਞਕਾਯਸਙ੍ਕਮਨਪਞ੍ਹੋ

੭. ਰਾਜਾ ਆਹ ‘‘ਭਨ੍ਤੇ ਨਾਗਸੇਨ, ਅਤ੍ਥਿ ਕੋਚਿ ਸਤ੍ਤੋ ਯੋ ਇਮਮ੍ਹਾ ਕਾਯਾ ਅਞ੍ਞਂ ਕਾਯਂ ਸਙ੍ਕਮਤੀ’’ਤਿ? ‘‘ਨ ਹਿ, ਮਹਾਰਾਜਾ’’ਤਿ. ‘‘ਯਦਿ, ਭਨ੍ਤੇ ਨਾਗਸੇਨ, ਇਮਮ੍ਹਾ ਕਾਯਾ ਅਞ੍ਞਂ ਕਾਯਂ ਸਙ੍ਕਮਨ੍ਤੋ ਨਤ੍ਥਿ, ਨਨੁ ਮੁਤ੍ਤੋ ਭਵਿਸ੍ਸਤਿ ਪਾਪਕੇਹਿ ਕਮ੍ਮੇਹੀ’’ਤਿ? ‘‘ਆਮ, ਮਹਾਰਾਜ, ਯਦਿ ਨ ਪਟਿਸਨ੍ਦਹੇਯ੍ਯ, ਮੁਤ੍ਤੋ ਭਵਿਸ੍ਸਤਿ ਪਾਪਕੇਹਿ ਕਮ੍ਮੇਹੀਤਿ, ਯਸ੍ਮਾ ਚ ਖੋ, ਮਹਾਰਾਜ, ਪਟਿਸਨ੍ਦਹਤਿ, ਤਸ੍ਮਾ ਨ ਪਰਿਮੁਤ੍ਤੋ ਪਾਪਕੇਹਿ ਕਮ੍ਮੇਹੀ’’ਤਿ.

‘‘ਓਪਮ੍ਮਂ ਕਰੋਹੀ’’ਤਿ. ‘‘ਯਥਾ, ਮਹਾਰਾਜ, ਕੋਚਿਦੇਵ ਪੁਰਿਸੋ ਅਞ੍ਞਤਰਸ੍ਸ ਪੁਰਿਸਸ੍ਸ ਅਮ੍ਬਂ ਅਵਹਰੇਯ੍ਯ, ਕਿਂ ਸੋ ਦਣ੍ਡਪ੍ਪਤ੍ਤੋ ਭਵੇਯ੍ਯਾ’’ਤਿ? ‘‘ਆਮ, ਭਨ੍ਤੇ, ਦਣ੍ਡਪ੍ਪਤ੍ਤੋ ਭਵੇਯ੍ਯਾ’’ਤਿ. ‘‘ਨ ਖੋ ਸੋ, ਮਹਾਰਾਜ, ਤਾਨਿ ਅਮ੍ਬਾਨਿ ਅਵਹਰਿ, ਯਾਨਿ ਤੇਨ ਰੋਪਿਤਾਨਿ, ਕਸ੍ਮਾ ਦਣ੍ਡਪ੍ਪਤ੍ਤੋ ਭਵੇਯ੍ਯਾ’’ਤਿ? ‘‘ਤਾਨਿ, ਭਨ੍ਤੇ, ਅਮ੍ਬਾਨਿ ਨਿਸ੍ਸਾਯ ਜਾਤਾਨਿ, ਤਸ੍ਮਾ ਦਣ੍ਡਪ੍ਪਤ੍ਤੋ ਭਵੇਯ੍ਯਾ’’ਤਿ. ‘‘ਏਵਮੇਵ ਖੋ, ਮਹਾਰਾਜ, ਇਮਿਨਾ ਨਾਮਰੂਪੇਨ ਕਮ੍ਮਂ ਕਰੋਤਿ ਸੋਭਨਂ ਵਾ ਅਸੋਭਨਂ ਵਾ, ਤੇਨ ਕਮ੍ਮੇਨ ਅਞ੍ਞਂ ਨਾਮਰੂਪਂ ਪਟਿਸਨ੍ਦਹਤਿ, ਤਸ੍ਮਾ ਨ ਪਰਿਮੁਤ੍ਤੋ ਪਾਪਕੇਹਿ ਕਮ੍ਮੇਹੀ’’ਤਿ.

‘‘ਕਲ੍ਲੋਸਿ, ਭਨ੍ਤੇ ਨਾਗਸੇਨਾ’’ਤਿ.

ਅਞ੍ਞਕਾਯਸਙ੍ਕਮਨਪਞ੍ਹੋ ਸਤ੍ਤਮੋ.