ਮਿਲਿਨ੍ਦਪਞ੍ਹਪਾਲ਼ਿ

੧. ਮਿਲਿਨ੍ਦੋ ਨਾਮ ਸੋ ਰਾਜਾ, ਸਾਗਲਾਯਂ ਪੁਰੁਤ੍ਤਮੇ;

ਉਪਗਞ੍ਛਿ ਨਾਗਸੇਨਂ, ਗਙ੍ਗਾ ਚ [ਗਙ੍ਗਾਵ (ਸੀ. ਪੀ.)] ਯਥਾ ਸਾਗਰਂ.

ਆਸਜ੍ਜ ਰਾਜਾ ਚਿਤ੍ਰਕਥਿਂ, ਉਕ੍ਕਾਧਾਰਂ ਤਮੋਨੁਦਂ;

ਅਪੁਚ੍ਛਿ ਨਿਪੁਣੇ ਪਞ੍ਹੇ, ਠਾਨਾਟ੍ਠਾਨਗਤੇ ਪੁਥੂ.

ਪੁਚ੍ਛਾ ਵਿਸਜ੍ਜਨਾ [ਵਿਸ੍ਸਜ੍ਜਨਾ (ਸੀ. ਪੀ.)] ਚੇਵ, ਗਮ੍ਭੀਰਤ੍ਥੂਪਨਿਸ੍ਸਿਤਾ;

ਹਦਯਙ੍ਗਮਾ ਕਣ੍ਣਸੁਖਾ, ਅਬ੍ਭੁਤਾ ਲੋਮਹਂਸਨਾ.

ਅਭਿਧਮ੍ਮਵਿਨਯੋਗਾਲ਼੍ਹਾ, ਸੁਤ੍ਤਜਾਲਸਮਤ੍ਤਿਤਾ;

ਨਾਗਸੇਨਕਥਾ ਚਿਤ੍ਰਾ, ਓਪਮ੍ਮੇਹਿ ਨਯੇਹਿ ਚ.

ਤਤ੍ਥ ਞਾਣਂ ਪਣਿਧਾਯ, ਹਾਸਯਿਤ੍ਵਾਨ ਮਾਨਸਂ;

ਸੁਣਾਥ ਨਿਪੁਣੇ ਪਞ੍ਹੇ, ਕਙ੍ਖਾਟ੍ਠਾਨਵਿਦਾਲਨੇਤਿ.

੨. ਤਂ ਯਥਾਨੁਸੂਯਤੇ – ਅਤ੍ਥਿ ਯੋਨਕਾਨਂ ਨਾਨਾਪੁਟਭੇਦਨਂ ਸਾਗਲਂ ਨਾਮ ਨਗਰਂ ਨਦੀਪਬ੍ਬਤਸੋਭਿਤਂ ਰਮਣੀਯਭੂਮਿਪ੍ਪਦੇਸਭਾਗਂ ਆਰਾਮੁਯ੍ਯਾਨੋਪਵਨਤਲ਼ਾਕਪੋਕ੍ਖਰਣਿਸਮ੍ਪਨ੍ਨਂ ਨਦੀਪਬ੍ਬਤਵਨਰਾਮਣੇਯ੍ਯਕਂ ਸੁਤਵਨ੍ਤਨਿਮ੍ਮਿਤਂ ਨਿਹਤਪਚ੍ਚਤ੍ਥਿਕਂ [ਨਿਪ੍ਪਚ੍ਚਤ੍ਥਿਕਂ (ਕ.)] ਪਚ੍ਚਾਮਿਤ੍ਤਾਨੁਪਪੀਲ਼ਿਤਂ ਵਿਵਿਧਵਿਚਿਤ੍ਰਦਲ਼੍ਹਮਟ੍ਟਾਲਕੋਟ੍ਠਕਂ ਵਰਪਵਰਗੋਪੁਰ [ਪਵਰਪਚੁਰਗੋਪੁਰ (ਸੀ.)] ਤੋਰਣਂ ਗਮ੍ਭੀਰਪਰਿਖਾਪਣ੍ਡਰਪਾਕਾਰਪਰਿਕ੍ਖਿਤ੍ਤਨ੍ਤੇਪੁਰਂ. ਸੁਵਿਭਤ੍ਤਵੀਥਿਚਚ੍ਚਰਚਤੁਕ੍ਕਸਿਙ੍ਘਾਟਕਂ ਸੁਪ੍ਪਸਾਰਿਤਾਨੇਕਵਿਧਵਰਭਣ੍ਡਪਰਿਪੂਰਿਤਨ੍ਤਰਾਪਣਂ ਵਿਵਿਧਦਾਨਗ੍ਗਸਤਸਮੁਪਸੋਭਿਤਂ [ਸਤਸਮੁਪਸੋਭਿਤਂ (ਸੀ. ਪੀ.)] ਹਿਮਗਿਰਿਸਿਖਰਸਙ੍ਕਾਸਵਰਭਵਨਸਤਸਹਸ੍ਸਪ੍ਪਟਿਮਣ੍ਡਿਤਂ ਗਜਹਯਰਥਪਤ੍ਤਿਸਮਾਕੁਲਂ ਅਭਿਰੂਪਨਰਨਾਰਿਗਣਾਨੁਚਰਿਤਂ ਆਕਿਣ੍ਣਜਨਮਨੁਸ੍ਸਂ ਪੁਥੁਖਤ੍ਤਿਯਬ੍ਰਾਹ੍ਮਣਵੇਸ੍ਸਸੁਦ੍ਦਂ ਵਿਵਿਧਸਮਣਬ੍ਰਾਹ੍ਮਣਸਭਾਜਨ [ਸਭਾਜਨ (ਸੀ. ਪੀ.), ਸਮ੍ਮਾਭਾਜਨ (ਕ.)] ਸਙ੍ਘਟਿਤਂ ਬਹੁਵਿਧਵਿਜ੍ਜਾਵਨ੍ਤ [ਵਿਜ੍ਜਾਧਰ (ਕ.)] ਨਰਚਿਰ [ਨਰਵਿਰ (ਸੀ. ਪੀ.)] ਨਿਸੇਵਿਤਂ ਕਾਸਿਕਕੋਟੁਮ੍ਬਰਿਕਾਦਿਨਾਨਾਵਿਧਵਤ੍ਥਾਪਣਸਮ੍ਪਨ੍ਨਂ ਸੁਪ੍ਪਸਾਰਿਤਰੁਚਿਰਬਹੁਵਿਧਪੁਪ੍ਫਗਨ੍ਧਾਪਣਂ ਗਨ੍ਧਗਨ੍ਧਿਤਂ ਆਸੀਸਨੀਯਬਹੁਰਤਨਪਰਿਪੂਰਿਤਂ ਦਿਸਾਮੁਖਸੁਪ੍ਪਸਾਰਿਤਾਪਣਂ ਸਿਙ੍ਗਾਰਵਾਣਿਜਗਣਾਨੁਚਰਿਤਂ ਕਹਾਪਣਰਜਤਸੁਵਣ੍ਣਕਂਸਪਤ੍ਥਰਪਰਿਪੂਰਂ ਪਜ੍ਜੋਤਮਾਨਨਿਧਿਨਿਕੇਤਂ ਪਹੂਤਧਨਧਞ੍ਞਵਿਤ੍ਤੂਪਕਰਣਂ ਪਰਿਪੁਣ੍ਣਕੋਸਕੋਟ੍ਠਾਗਾਰਂ ਬਹ੍ਵਨ੍ਨਪਾਨਂ ਬਹੁਵਿਧਖਜ੍ਜਭੋਜ੍ਜਲੇਯ੍ਯਪੇਯ੍ਯਸਾਯਨੀਯਂ ਉਤ੍ਤਰਕੁਰੁਸਙ੍ਕਾਸਂ ਸਮ੍ਪਨ੍ਨਸਸ੍ਸਂ ਆਲ਼ਕਮਨ੍ਦਾ ਵਿਯ ਦੇਵਪੁਰਂ.

ਏਤ੍ਥ ਠਤ੍ਵਾ ਤੇਸਂ ਪੁਬ੍ਬਕਮ੍ਮਂ ਕਥੇਤਬ੍ਬਂ, ਕਥੇਨ੍ਤੇਨ ਚ ਛਧਾ ਵਿਭਜਿਤ੍ਵਾ ਕਥੇਤਬ੍ਬਂ. ਸੇਯ੍ਯਥੀਦਂ – ਪੁਬ੍ਬਯੋਗੋ ਮਿਲਿਨ੍ਦਪਞ੍ਹਂ ਲਕ੍ਖਣਪਞ੍ਹਂ ਮੇਣ੍ਡਕਪਞ੍ਹਂ ਅਨੁਮਾਨਪਞ੍ਹਂ ਓਪਮ੍ਮਕਥਾਪਞ੍ਹਨ੍ਤਿ.

ਤਤ੍ਥ ਮਿਲਿਨ੍ਦਪਞ੍ਹੋ ਲਕ੍ਖਣਪਞ੍ਹੋ, ਵਿਮਤਿਚ੍ਛੇਦਨਪਞ੍ਹੋਤਿ ਦੁਵਿਧੋ. ਮੇਣ੍ਡਕਪਞ੍ਹੋਪਿ ਮਹਾਵਗ੍ਗੋ, ਯੋਗਿਕਥਾਪਞ੍ਹੋਤਿ ਦੁਵਿਧੋ.

ਪੁਬ੍ਬਯੋਗੋਤਿ ਤੇਸਂ ਪੁਬ੍ਬਕਮ੍ਮਂ.

੧. ਬਾਹਿਰਕਥਾ

ਪੁਬ੍ਬਯੋਗਾਦਿ

੩. ਅਤੀਤੇ ਕਿਰ ਕਸ੍ਸਪਸ੍ਸ ਭਗਵਤੋ ਸਾਸਨੇ ਵਤ੍ਤਮਾਨੇ ਗਙ੍ਗਾਯ ਸਮੀਪੇ ਏਕਸ੍ਮਿਂ ਆਵਾਸੇ ਮਹਾਭਿਕ੍ਖੁਸਙ੍ਘੋ ਪਟਿਵਸਤਿ, ਤਤ੍ਥ ਵਤ੍ਤਸੀਲਸਮ੍ਪਨ੍ਨਾ ਭਿਕ੍ਖੂ ਪਾਤੋਵ ਉਟ੍ਠਾਯ ਯਟ੍ਠਿਸਮ੍ਮਜ੍ਜਨਿਯੋ [ਯਟ੍ਠਿਸਮ੍ਮੁਞ੍ਜਨਿਯੋ (ਸੀ. ਪੀ.)] ਆਦਾਯ ਬੁਦ੍ਧਗੁਣੇ ਆਵਜ੍ਜੇਨ੍ਤਾ ਅਙ੍ਗਣਂ ਸਮ੍ਮਜ੍ਜਿਤ੍ਵਾ ਕਚਵਰਬ੍ਯੂਹਂ ਕਰੋਨ੍ਤਿ. ਅਥੇਕੋ ਭਿਕ੍ਖੁ ਏਕਂ ਸਾਮਣੇਰਂ ‘‘ਏਹਿ ਸਾਮਣੇਰ, ਇਮਂ ਕਚਵਰਂ ਛਡ੍ਡੇਹੀ’’ਤਿ ਆਹ, ਸੋ ਅਸੁਣਨ੍ਤੋ ਵਿਯ ਗਚ੍ਛਤਿ, ਸੋ ਦੁਤਿਯਮ੍ਪਿ…ਪੇ… ਤਤਿਯਮ੍ਪਿ ਆਮਨ੍ਤਿਯਮਾਨੋ ਅਸੁਣਨ੍ਤੋ ਵਿਯ ਗਚ੍ਛਤੇਵ. ਤਤੋ ਸੋ ਭਿਕ੍ਖੁ ‘‘ਦੁਬ੍ਬਚੋ ਵਤਾਯਂ ਸਾਮਣੇਰੋ’’ਤਿ ਕੁਦ੍ਧੋ ਸਮ੍ਮਜ੍ਜਨਿਦਣ੍ਡੇਨ ਪਹਾਰਂ ਅਦਾਸਿ. ਤਤੋ ਸੋ ਰੋਦਨ੍ਤੋ ਭਯੇਨ ਕਚਵਰਂ ਛਡ੍ਡੇਨ੍ਤੋ ‘‘ਇਮਿਨਾ ਕਚਵਰਛਡ੍ਡਨਪੁਞ੍ਞਕਮ੍ਮੇਨ ਯਾਵਾਹਂ ਨਿਬ੍ਬਾਨਂ ਪਾਪੁਣਾਮਿ [ਨ ਪਾਪੁਣਾਮਿ (ਸ੍ਯਾ.)], ਏਤ੍ਥਨ੍ਤਰੇ ਨਿਬ੍ਬਤ੍ਤਨਿਬ੍ਬਤ੍ਤਟ੍ਠਾਨੇ ਮਜ੍ਝਨ੍ਹਿਕਸੂਰਿਯੋ [ਸੁਰਿਯੋ (ਸੀ. ਪੀ.)] ਵਿਯ ਮਹੇਸਕ੍ਖੋ ਮਹਾਤੇਜੋ ਭਵੇਯ੍ਯ’’ਨ੍ਤਿ ਪਠਮਂ ਪਤ੍ਥਨਂ ਪਟ੍ਠਪੇਸਿ. ਕਚਵਰਂ ਛਡ੍ਡੇਤ੍ਵਾ ਨਹਾਨਤ੍ਥਾਯ ਗਙ੍ਗਾਤਿਤ੍ਥਂ ਗਤੋ ਗਙ੍ਗਾਯ ਊਮਿਵੇਗਂ ਗਗ੍ਗਰਾਯਮਾਨਂ ਦਿਸ੍ਵਾ ‘‘ਯਾਵਾਹਂ ਨਿਬ੍ਬਾਨਂ ਪਾਪੁਣਾਮਿ [ਨ ਪਾਪੁਣਾਮਿ (ਸ੍ਯਾ.)], ਏਤ੍ਥਨ੍ਤਰੇ ਨਿਬ੍ਬਤ੍ਤਨਿਬ੍ਬਤ੍ਤਟ੍ਠਾਨੇ ਅਯਂ ਊਮਿਵੇਗੋ ਵਿਯ ਠਾਨੁਪ੍ਪਤ੍ਤਿਕਪਟਿਭਾਨੋ ਭਵੇਯ੍ਯਂ ਅਕ੍ਖਯਪਟਿਭਾਨੋ’’ਤਿ ਦੁਤਿਯਮ੍ਪਿ ਪਤ੍ਥਨਂ ਪਟ੍ਠਪੇਸਿ.

ਸੋਪਿ ਭਿਕ੍ਖੁ ਸਮ੍ਮਜ੍ਜਨਿਸਾਲਾਯ ਸਮ੍ਮਜ੍ਜਨਿਂ ਠਪੇਤ੍ਵਾ ਨਹਾਨਤ੍ਥਾਯ ਗਙ੍ਗਾਤਿਤ੍ਥਂ ਗਚ੍ਛਨ੍ਤੋ ਸਾਮਣੇਰਸ੍ਸ ਪਤ੍ਥਨਂ ਸੁਤ੍ਵਾ ‘‘ਏਸ ਮਯਾ ਪਯੋਜਿਤੋਪਿ ਤਾਵ ਏਵਂ ਪਤ੍ਥੇਤਿ, ਮਯ੍ਹਂ ਕਿਂ ਨ ਸਮਿਜ੍ਝਿਸ੍ਸਤੀ’’ਤਿ ਚਿਨ੍ਤੇਤ੍ਵਾ ‘‘ਯਾਵਾਹਂ ਨਿਬ੍ਬਾਨਂ ਪਾਪੁਣਾਮਿ [ਨ ਪਾਪੁਣਾਮਿ (ਸ੍ਯਾ.)], ਏਤ੍ਥਨ੍ਤਰੇ ਨਿਬ੍ਬਤ੍ਤਨਿਬ੍ਬਤ੍ਤਟ੍ਠਾਨੇ ਅਯਂ ਗਙ੍ਗਾਊਮਿਵੇਗੋ ਵਿਯ ਅਕ੍ਖਯਪਟਿਭਾਨੋ ਭਵੇਯ੍ਯਂ, ਇਮਿਨਾ ਪੁਚ੍ਛਿਤਪੁਚ੍ਛਿਤਂ ਸਬ੍ਬਂ ਪਞ੍ਹਪਟਿਭਾਨਂ ਵਿਜਟੇਤੁਂ ਨਿਬ੍ਬੇਠੇਤੁਂ ਸਮਤ੍ਥੋ ਭਵੇਯ੍ਯ’’ਨ੍ਤਿ ਪਤ੍ਥਨਂ ਪਟ੍ਠਪੇਸਿ.

ਤੇ ਉਭੋਪਿ ਦੇਵੇਸੁ ਚ ਮਨੁਸ੍ਸੇਸੁ ਚ ਸਂਸਰਨ੍ਤਾ ਏਕਂ ਬੁਦ੍ਧਨ੍ਤਰਂ ਖੇਪੇਸੁਂ. ਅਥ ਅਮ੍ਹਾਕਂ ਭਗਵਤਾਪਿ ਯਥਾ ਮੋਗ੍ਗਲਿਪੁਤ੍ਤਤਿਸ੍ਸਤ੍ਥੇਰੋ ਦਿਸ੍ਸਤਿ, ਏਵਮੇਤੇਪਿ ਦਿਸ੍ਸਨ੍ਤਿ ਮਮ ਪਰਿਨਿਬ੍ਬਾਨਤੋ ਪਞ੍ਚਵਸ੍ਸਸਤੇ ਅਤਿਕ੍ਕਨ੍ਤੇ ਏਤੇ ਉਪ੍ਪਜ੍ਜਿਸ੍ਸਨ੍ਤਿ, ਯਂ ਮਯਾ ਸੁਖੁਮਂ ਕਤ੍ਵਾ ਦੇਸਿਤਂ ਧਮ੍ਮਵਿਨਯਂ, ਤਂ ਏਤੇ ਪਞ੍ਹਪੁਚ੍ਛਨਓਪਮ੍ਮਯੁਤ੍ਤਿਵਸੇਨ ਨਿਜ੍ਜਟਂ ਨਿਗ੍ਗੁਮ੍ਬਂ ਕਤ੍ਵਾ ਵਿਭਜਿਸ੍ਸਨ੍ਤੀਤਿ ਨਿਦ੍ਦਿਟ੍ਠਾ.

੪. ਤੇਸੁ ਸਾਮਣੇਰੋ ਜਮ੍ਬੁਦੀਪੇ ਸਾਗਲਨਗਰੇ ਮਿਲਿਨ੍ਦੋ ਨਾਮ ਰਾਜਾ ਅਹੋਸਿ ਪਣ੍ਡਿਤੋ ਬ੍ਯਤ੍ਤੋ ਮੇਧਾਵੀ ਪਟਿਬਲੋ ਅਤੀਤਾਨਾਗਤਪਚ੍ਚੁਪ੍ਪਨ੍ਨਾਨਂ ਮਨ੍ਤਯੋਗਵਿਧਾਨਕਿਰਿਯਾਨਂ [ਸਮਨ੍ਤਯੋਗ … (ਸੀ. ਪੀ.)], ਕਰਣਕਾਲੇ ਨਿਸਮ੍ਮਕਾਰੀ ਹੋਤਿ, ਬਹੂਨਿ ਚਸ੍ਸ ਸਤ੍ਥਾਨਿ ਉਗ੍ਗਹਿਤਾਨਿ ਹੋਨ੍ਤਿ. ਸੇਯ੍ਯਥਿਦਂ, ਸੁਤਿ ਸਮ੍ਮੁਤਿ ਸਙ੍ਖ੍ਯਾ ਯੋਗਾ ਨੀਤਿ ਵਿਸੇਸਿਕਾ ਗਣਿਕਾ ਗਨ੍ਧਬ੍ਬਾ ਤਿਕਿਚ੍ਛਾ ਧਨੁਬ੍ਬੇਦਾ [ਚਤੁਬ੍ਬੇਦਾ (ਸੀ. ਪੀ.)] ਪੁਰਾਣਾ ਇਤਿਹਾਸਾ ਜੋਤਿਸਾ ਮਾਯਾ ਕੇਤੁ [ਹੇਤੁ (ਸੀ. ਪੀ.)] ਮਨ੍ਤਨਾ ਯੁਦ੍ਧਾ ਛਨ੍ਦਸਾ ਬੁਦ੍ਧਵਚਨੇਨ [ਛਨ੍ਦਸਾਮੁਦ੍ਦਵਚਨੇਨ (ਸੀ. ਪੀ.)] ਏਕੂਨਵੀਸਤਿ, ਵਿਤਣ੍ਡਵਾਦੀ [ਵਾਦੀ (ਸੀ. ਪੀ.)] ਦੁਰਾਸਦੋ ਦੁਪ੍ਪਸਹੋ ਪੁਥੁਤਿਤ੍ਥਕਰਾਨਂ ਅਗ੍ਗਮਕ੍ਖਾਯਤਿ, ਸਕਲਜਮ੍ਬੁਦੀਪੇ ਮਿਲਿਨ੍ਦੇਨ ਰਞ੍ਞਾ ਸਮੋ ਕੋਚਿ ਨਾਹੋਸਿ ਯਦਿਦਂ ਥਾਮੇਨ ਜਵੇਨ ਸੂਰੇਨ ਪਞ੍ਞਾਯ, ਅਡ੍ਢੋ ਮਹਦ੍ਧਨੋ ਮਹਾਭੋਗੋ ਅਨਨ੍ਤਬਲਵਾਹਨੋ.

੫. ਅਥੇਕਦਿਵਸਂ ਮਿਲਿਨ੍ਦੋ ਰਾਜਾ ਅਨਨ੍ਤਬਲਵਾਹਨਂ ਚਤੁਰਙ੍ਗਿਨਿਂ ਬਲਗ੍ਗਸੇਨਾਬ੍ਯੂਹਂ ਦਸ੍ਸਨਕਮ੍ਯਤਾਯ ਨਗਰਾ ਨਿਕ੍ਖਮਿਤ੍ਵਾ ਬਹਿਨਗਰੇ ਸੇਨਙ੍ਗਦਸ੍ਸਨਂ ਕਤ੍ਵਾ [ਸੇਨਾਗਣਨਂ ਕਾਰੇਤ੍ਵਾ (ਸੀ. ਪੀ.)] ਸਾਰੇਤ੍ਵਾ ਸੋ ਰਾਜਾ ਭਸ੍ਸਪ੍ਪਵਾਦਕੋ ਲੋਕਾਯਤਵਿਤਣ੍ਡ [ਪਵਤ੍ਤ (ਸੀ. ਪੀ.)] ਜਨਸਲ੍ਲਾਪਪ੍ਲਵ ਚਿਤ੍ਤਕੋਤੂਹਲੋ ਵਿਸਾਰਦੋ ਵਿਜਮ੍ਭਕੋ ਸੂਰਿਯਂ ਓਲੋਕੇਤ੍ਵਾ ਅਮਚ੍ਚੇ ਆਮਨ੍ਤੇਸਿ ‘‘ਬਹੁ ਭਣੇ ਤਾਵ ਦਿਵਸਾਵਸੇਸੋ ਕਿਂ ਕਰਿਸ੍ਸਾਮ, ਇਦਾਨੇਵ ਨਗਰਂ ਪਵਿਸਿਤ੍ਵਾ ਅਤ੍ਥਿ ਕੋਚਿ ਪਣ੍ਡਿਤੋ ਸਮਣੋ ਵਾ ਬ੍ਰਾਹ੍ਮਣੋ ਵਾ ਸਙ੍ਘੀ ਗਣੀ ਗਣਾਚਰਿਯੋ ਅਪਿ ਅਰਹਨ੍ਤਂ ਸਮ੍ਮਾਸਮ੍ਬੁਦ੍ਧਂ ਪਟਿਜਾਨਮਾਨੋ, ਯੋ ਮਯਾ ਸਦ੍ਧਿਂ ਸਲ੍ਲਪਿਤੁਂ ਸਕ੍ਕੋਤਿ ਕਙ੍ਖਂ ਪਟਿਵਿਨੇਤੁਂ, ਤਂ ਉਪਸਙ੍ਕਮਿਤ੍ਵਾ ਪਞ੍ਹਂ ਪੁਚ੍ਛਿਸ੍ਸਾਮ, ਕਙ੍ਖਂ ਪਟਿਵਿਨਯਿਸ੍ਸਾਮਾ’’ਤਿ.

ਏਵਂ ਵੁਤ੍ਤੇ ਪਞ੍ਚਸਤਾ ਯੋਨਕਾ ਰਾਜਾਨਂ ਮਿਲਿਨ੍ਦਂ ਏਤਦਵੋਚੁਂ ‘‘ਅਤ੍ਥਿ, ਮਹਾਰਾਜ, ਛ ਸਤ੍ਥਾਰੋ ਪੂਰਣੋ ਕਸ੍ਸਪੋ ਮਕ੍ਖਲਿਗੋਸਾਲੋ ਨਿਗਣ੍ਠੋ ਨਾਟਪੁਤ੍ਤੋ [ਨਾਥਪੁਤ੍ਤੋ (ਸੀ. ਪੀ.)] ਸਞ੍ਜਯੋ ਬੇਲਟ੍ਠਪੁਤ੍ਤੋ ਅਜਿਤੋ ਕੇਸਕਮ੍ਬਲੋ ਪਕੁਧੋ ਕਚ੍ਚਾਯਨੋ, ਤੇ ਸਙ੍ਘਿਨੋ ਗਣਿਨੋ ਗਣਾਚਰਿਯਕਾ ਞਾਤਾ ਯਸਸ੍ਸਿਨੋ ਤਿਤ੍ਥਕਰਾ ਸਾਧੁਸਮ੍ਮਤਾ ਬਹੁਜਨਸ੍ਸ, ਗਚ੍ਛ ਤ੍ਵਂ ਮਹਾਰਾਜ, ਤੇ ਪਞ੍ਹਂ ਪੁਚ੍ਛਸ੍ਸੁ, ਕਙ੍ਖਂ ਪਟਿਵਿਨਯਸ੍ਸੂ’’ਤਿ.

੬. ਅਥ ਖੋ ਮਿਲਿਨ੍ਦੋ ਰਾਜਾ ਪਞ੍ਚਹਿ ਯੋਨਕਸਤੇਹਿ ਪਰਿਵੁਤੋ ਭਦ੍ਰਵਾਹਨਂ ਰਥਵਰਮਾਰੁਯ੍ਹ ਯੇਨ ਪੂਰਣੋ ਕਸ੍ਸਪੋ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਪੂਰਣੇਨ ਕਸ੍ਸਪੇਨ ਸਦ੍ਧਿਂ ਸਮ੍ਮੋਦਿ, ਸਮ੍ਮੋਦਨੀਯਂ ਕਥਂ ਸਾਰਣੀਯਂ ਵੀਤਿਸਾਰੇਤ੍ਵਾ ਏਕਮਨ੍ਤਂ ਨਿਸੀਦਿ, ਏਕਮਨ੍ਤਂ ਨਿਸਿਨ੍ਨੋ ਖੋ ਮਿਲਿਨ੍ਦੋ ਰਾਜਾ ਪੂਰਣਂ ਕਸ੍ਸਪਂ ਏਤਦਵੋਚ ‘‘ਕੋ, ਭਨ੍ਤੇ ਕਸ੍ਸਪ, ਲੋਕਂ ਪਾਲੇਤੀ’’ਤਿ? ‘‘ਪਥਵੀ, ਮਹਾਰਾਜ, ਲੋਕਂ ਪਾਲੇਤੀ’’ਤਿ. ‘‘ਯਦਿ, ਭਨ੍ਤੇ ਕਸ੍ਸਪ, ਪਥਵੀ [ਪਠਵੀ (ਸੀ. ਸ੍ਯਾ. ਪੀ.)] ਲੋਕਂ ਪਾਲੇਤਿ, ਅਥ ਕਸ੍ਮਾ ਅਵੀਚਿਨਿਰਯਂ ਗਚ੍ਛਨ੍ਤਾ ਸਤ੍ਤਾ ਪਥਵਿਂ ਅਤਿਕ੍ਕਮਿਤ੍ਵਾ ਗਚ੍ਛਨ੍ਤੀ’’ਤਿ? ਏਵਂ ਵੁਤ੍ਤੇ ਪੂਰਣੋ ਕਸ੍ਸਪੋ ਨੇਵ ਸਕ੍ਖਿ ਓਗਿਲਿਤੁਂ, ਨੋ ਸਕ੍ਖਿ ਉਗ੍ਗਿਲਿਤੁਂ, ਅਧੋਮੁਖੋ ਪਤ੍ਤਕ੍ਖਨ੍ਧੋ ਤੁਣ੍ਹੀਭੂਤੋ ਪਜ੍ਝਾਯਨ੍ਤੋ ਨਿਸੀਦਿ.

੭. ਅਥ ਖੋ ਮਿਲਿਨ੍ਦੋ ਰਾਜਾ ਮਕ੍ਖਲਿਂ ਗੋਸਾਲਂ ਏਤਦਵੋਚ ‘‘ਅਤ੍ਥਿ, ਭਨ੍ਤੇ ਗੋਸਾਲ, ਕੁਸਲਾਕੁਸਲਾਨਿ ਕਮ੍ਮਾਨਿ, ਅਤ੍ਥਿ ਸੁਕਤਦੁਕ੍ਕਟਾਨਂ ਕਮ੍ਮਾਨਂ ਫਲਂ ਵਿਪਾਕੋ’’ਤਿ? ‘‘ਨਤ੍ਥਿ, ਮਹਾਰਾਜ, ਕੁਸਲਾਕੁਸਲਾਨਿ ਕਮ੍ਮਾਨਿ, ਨਤ੍ਥਿ ਸੁਕਤਦੁਕ੍ਕਟਾਨਂ ਕਮ੍ਮਾਨਂ ਫਲਂ ਵਿਪਾਕੋ. ਯੇ ਤੇ, ਮਹਾਰਾਜ, ਇਧ ਲੋਕੇ ਖਤ੍ਤਿਯਾ, ਤੇ ਪਰਲੋਕਂ ਗਨ੍ਤ੍ਵਾਪਿ ਪੁਨ ਖਤ੍ਤਿਯਾਵ ਭਵਿਸ੍ਸਨ੍ਤਿ, ਯੇ ਤੇ ਬ੍ਰਾਹ੍ਮਣਾ ਵੇਸ੍ਸਾ ਸੁਦ੍ਦਾ ਚਣ੍ਡਾਲਾ ਪੁਕ੍ਕੁਸਾ, ਤੇ ਪਰਲੋਕਂ ਗਨ੍ਤ੍ਵਾਪਿ ਪੁਨ ਬ੍ਰਾਹ੍ਮਣਾ ਵੇਸ੍ਸਾ ਸੁਦ੍ਦਾ ਚਣ੍ਡਾਲਾ ਪੁਕ੍ਕੁਸਾਵ ਭਵਿਸ੍ਸਨ੍ਤਿ. ਕਿਂ ਕੁਸਲਾਕੁਸਲੇਹਿ ਕਮ੍ਮੇਹੀ’’ਤਿ? ‘‘ਯਦਿ, ਭਨ੍ਤੇ ਗੋਸਾਲ, ਇਧ ਲੋਕੇ ਖਤ੍ਤਿਯਾ ਬ੍ਰਾਹ੍ਮਣਾ ਵੇਸ੍ਸਾ ਸੁਦ੍ਦਾ ਚਣ੍ਡਾਲਾ ਪੁਕ੍ਕੁਸਾ, ਤੇ ਪਰਲੋਕਂ ਗਨ੍ਤ੍ਵਾਪਿ ਪੁਨ ਖਤ੍ਤਿਯਾ ਬ੍ਰਾਹ੍ਮਣਾ ਵੇਸ੍ਸਾ ਸੁਦ੍ਦਾ ਚਣ੍ਡਾਲਾ ਪੁਕ੍ਕੁਸਾਵ ਭਵਿਸ੍ਸਨ੍ਤਿ, ਨਤ੍ਥਿ ਕੁਸਲਾਕੁਸਲੇਹਿ ਕਮ੍ਮੇਹਿ ਕਰਣੀਯਂ. ਤੇਨ ਹਿ, ਭਨ੍ਤੇ ਗੋਸਾਲ, ਯੇ ਤੇ ਇਧ ਲੋਕੇ ਹਤ੍ਥਚ੍ਛਿਨ੍ਨਾ, ਤੇ ਪਰਲੋਕਂ ਗਨ੍ਤ੍ਵਾਪਿ ਪੁਨ ਹਤ੍ਥਚ੍ਛਿਨ੍ਨਾਵ ਭਵਿਸ੍ਸਨ੍ਤਿ. ਯੇ ਪਾਦਚ੍ਛਿਨ੍ਨਾ, ਤੇ ਪਾਦਚ੍ਛਿਨ੍ਨਾਵ ਭਵਿਸ੍ਸਨ੍ਤਿ. ਯੇ ਹਤ੍ਥਪਾਦਚ੍ਛਿਨ੍ਨਾ, ਤੇ ਹਤ੍ਥਪਾਦਚ੍ਛਿਨ੍ਨਾਵ ਭਵਿਸ੍ਸਨ੍ਤਿ. ਯੇ ਕਣ੍ਣਚ੍ਛਿਨ੍ਨਾ, ਤੇ ਕਣ੍ਣਚ੍ਛਿਨ੍ਨਾਵ ਭਵਿਸ੍ਸਨ੍ਤਿ. ਯੇ ਨਾਸਚ੍ਛਿਨ੍ਨਾ, ਤੇ ਨਾਸਚ੍ਛਿਨ੍ਨਾਵ ਭਵਿਸ੍ਸਨ੍ਤਿ. ਯੇ ਕਣ੍ਣਨਾਸਚ੍ਛਿਨ੍ਨਾ, ਤੇ ਕਣ੍ਣਨਾਸਚ੍ਛਿਨ੍ਨਾਵ ਭਵਿਸ੍ਸਨ੍ਤੀ’’ਤਿ. ਏਵਂ ਵੁਤ੍ਤੇ ਗੋਸਾਲੋ ਤੁਣ੍ਹੀ ਅਹੋਸਿ.

ਅਥ ਖੋ ਮਿਲਿਨ੍ਦਸ੍ਸ ਰਞ੍ਞੋ ਏਤਦਹੋਸਿ ‘‘ਤੁਚ੍ਛੋ ਵਤ ਭੋ ਜਮ੍ਬੁਦੀਪੋ, ਪਲਾਪੋ ਵਤ ਭੋ ਜਮ੍ਬੁਦੀਪੋ, ਨਤ੍ਥਿ ਕੋਚਿ ਸਮਣੋ ਵਾ ਬ੍ਰਾਹ੍ਮਣੋ ਵਾ, ਯੋ ਮਯਾ ਸਦ੍ਧਿਂ ਸਲ੍ਲਪਿਤੁਂ ਸਕ੍ਕੋਤਿ ਕਙ੍ਖਂ ਪਟਿਵਿਨੇਤੁ’’ਨ੍ਤਿ.

ਅਥ ਖੋ ਮਿਲਿਨ੍ਦੋ ਰਾਜਾ ਅਮਚ੍ਚੇ ਆਮਨ੍ਤੇਸਿ ‘‘ਰਮਣੀਯਾ ਵਤ ਭੋ ਦੋਸਿਨਾ ਰਤ੍ਤਿ, ਕਂ ਨੁ ਖ੍ਵਜ੍ਜ ਸਮਣਂ ਵਾ ਬ੍ਰਾਹ੍ਮਣਂ ਵਾ ਉਪਸਙ੍ਕਮੇਯ੍ਯਾਮ ਪਞ੍ਹਂ ਪੁਚ੍ਛਿਤੁਂ, ਕੋ ਮਯਾ ਸਦ੍ਧਿਂ ਸਲ੍ਲਪਿਤੁਂ ਸਕ੍ਕੋਤਿ ਕਙ੍ਖਂ ਪਟਿਵਿਨੇਤੁ’’ਨ੍ਤਿ? ਏਵਂ ਵੁਤ੍ਤੇ ਅਮਚ੍ਚਾ ਤੁਣ੍ਹੀਭੂਤਾ ਰਞ੍ਞੋ ਮੁਖਂ ਓਲੋਕਯਮਾਨਾ ਅਟ੍ਠਂਸੁ.

ਤੇਨ ਖੋ ਪਨ ਸਮਯੇਨ ਸਾਗਲਨਗਰਂ ਦ੍ਵਾਦਸ ਵਸ੍ਸਾਨਿ ਸੁਞ੍ਞਂ ਅਹੋਸਿ ਸਮਣਬ੍ਰਾਹ੍ਮਣਗਹਪਤਿਪਣ੍ਡਿਤੇਹਿ, ਯਤ੍ਥ ਸਮਣਬ੍ਰਾਹ੍ਮਣਗਹਪਤਿਪਣ੍ਡਿਤਾ ਪਟਿਵਸਨ੍ਤੀਤਿ ਸੁਣਾਤਿ, ਤਤ੍ਥ ਗਨ੍ਤ੍ਵਾ ਰਾਜਾ ਤੇ ਪਞ੍ਹਂ ਪੁਚ੍ਛਤਿ, ਤੇ ਸਬ੍ਬੇਪਿ ਪਞ੍ਹਵਿਸਜ੍ਜਨੇਨ ਰਾਜਾਨਂ ਆਰਾਧੇਤੁਂ ਅਸਕ੍ਕੋਨ੍ਤਾ ਯੇਨ ਵਾ ਤੇਨ ਵਾ ਪਕ੍ਕਮਨ੍ਤਿ. ਯੇ ਅਞ੍ਞਂ ਦਿਸਂ ਨ ਪਕ੍ਕਮਨ੍ਤਿ, ਤੇ ਸਬ੍ਬੇ ਤੁਣ੍ਹੀਭੂਤਾ ਅਚ੍ਛਨ੍ਤਿ. ਭਿਕ੍ਖੂ ਪਨ ਯੇਭੁਯ੍ਯੇਨ ਹਿਮਵਨ੍ਤਮੇਵ ਗਚ੍ਛਨ੍ਤਿ.

੮. ਤੇਨ ਖੋ ਪਨ ਸਮਯੇਨ ਕੋਟਿਸਤਾ ਅਰਹਨ੍ਤੋ ਹਿਮਵਨ੍ਤੇ ਪਬ੍ਬਤੇ ਰਕ੍ਖਿਤਤਲੇ ਪਟਿਵਸਨ੍ਤਿ. ਅਥ ਖੋ ਆਯਸ੍ਮਾ ਅਸ੍ਸਗੁਤ੍ਤੋ ਦਿਬ੍ਬਾਯ ਸੋਤਧਾਤੁਯਾ ਮਿਲਿਨ੍ਦਸ੍ਸ ਰਞ੍ਞੋ ਵਚਨਂ ਸੁਤ੍ਵਾ ਯੁਗਨ੍ਧਰਮਤ੍ਥਕੇ ਭਿਕ੍ਖੁਸਙ੍ਘਂ ਸਨ੍ਨਿਪਾਤੇਤ੍ਵਾ ਭਿਕ੍ਖੂ ਪੁਚ੍ਛਿ ‘‘ਅਤ੍ਥਾਵੁਸੋ ਕੋਚਿ ਭਿਕ੍ਖੁ ਪਟਿਬਲੋ ਮਿਲਿਨ੍ਦੇਨ ਰਞ੍ਞਾ ਸਦ੍ਧਿਂ ਸਲ੍ਲਪਿਤੁਂ ਕਙ੍ਖਂ ਪਟਿਵਿਨੇਤੁ’’ਨ੍ਤਿ?

ਏਵਂ ਵੁਤ੍ਤੇ ਕੋਟਿਸਤਾ ਅਰਹਨ੍ਤੋ ਤੁਣ੍ਹੀ ਅਹੇਸੁਂ. ਦੁਤਿਯਮ੍ਪਿ ਤਤਿਯਮ੍ਪਿ ਪੁਟ੍ਠਾ ਤੁਣ੍ਹੀ ਅਹੇਸੁਂ. ਅਥ ਖੋ ਆਯਸ੍ਮਾ ਅਸ੍ਸਗੁਤ੍ਤੋ ਭਿਕ੍ਖੁਸਙ੍ਘਂ ਏਤਦਵੋਚ ‘‘ਅਤ੍ਥਾਵੁਸੋ ਤਾਵਤਿਂਸਭਵਨੇ ਵੇਜਯਨ੍ਤਸ੍ਸ ਪਾਚੀਨਤੋ ਕੇਤੁਮਤੀ ਨਾਮ ਵਿਮਾਨਂ, ਤਤ੍ਥ ਮਹਾਸੇਨੋ ਨਾਮ ਦੇਵਪੁਤ੍ਤੋ ਪਟਿਵਸਤਿ, ਸੋ ਪਟਿਬਲੋ ਤੇਨ ਮਿਲਿਨ੍ਦੇਨ ਰਞ੍ਞਾ ਸਦ੍ਧਿਂ ਸਲ੍ਲਪਿਤੁਂ ਕਙ੍ਖਂ ਪਟਿਵਿਨੇਤੁ’’ਨ੍ਤਿ.

ਅਥ ਖੋ ਕੋਟਿਸਤਾ ਅਰਹਨ੍ਤੋ ਯੁਗਨ੍ਧਰਪਬ੍ਬਤੇ ਅਨ੍ਤਰਹਿਤਾ ਤਾਵਤਿਂਸਭਵਨੇ ਪਾਤੁਰਹੇਸੁਂ. ਅਦ੍ਦਸਾ ਖੋ ਸਕ੍ਕੋ ਦੇਵਾਨਮਿਨ੍ਦੋ ਤੇ ਭਿਕ੍ਖੂ ਦੂਰਤੋਵ ਆਗਚ੍ਛਨ੍ਤੇ, ਦਿਸ੍ਵਾਨ ਯੇਨਾਯਸ੍ਮਾ ਅਸ੍ਸਗੁਤ੍ਤੋ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਆਯਸ੍ਮਨ੍ਤਂ ਅਸ੍ਸਗੁਤ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਅਟ੍ਠਾਸਿ, ਏਕਮਨ੍ਤਂ ਠਿਤੋ ਖੋ ਸਕ੍ਕੋ ਦੇਵਾਨਮਿਨ੍ਦੋ ਆਯਸ੍ਮਨ੍ਤਂ ਅਸ੍ਸਗੁਤ੍ਤਂ ਏਤਦਵੋਚ ‘‘ਮਹਾ ਖੋ, ਭਨ੍ਤੇ, ਭਿਕ੍ਖੁਸਙ੍ਘੋ ਅਨੁਪ੍ਪਤ੍ਤੋ, ਅਹਂ ਸਙ੍ਘਸ੍ਸ ਆਰਾਮਿਕੋ, ਕੇਨਤ੍ਥੋ, ਕਿਂ ਮਯਾ ਕਰਣੀਯ’’ਨ੍ਤਿ?

ਅਥ ਖੋ ਆਯਸ੍ਮਾ ਅਸ੍ਸਗੁਤ੍ਤੋ ਸਕ੍ਕਂ ਦੇਵਾਨਮਿਨ੍ਦਂ ਏਤਦਵੋਚ ‘‘ਅਯਂ ਖੋ, ਮਹਾਰਾਜ, ਜਮ੍ਬੁਦੀਪੇ ਸਾਗਲਨਗਰੇ ਮਿਲਿਨ੍ਦੋ ਨਾਮ ਰਾਜਾ ਵਿਤਣ੍ਡਵਾਦੀ ਦੁਰਾਸਦੋ ਦੁਪ੍ਪਸਹੋ ਪੁਥੁਤਿਤ੍ਥਕਰਾਨਂ ਅਗ੍ਗਮਕ੍ਖਾਯਤਿ, ਸੋ ਭਿਕ੍ਖੁਸਙ੍ਘਂ ਉਪਸਙ੍ਕਮਿਤ੍ਵਾ ਦਿਟ੍ਠਿਵਾਦੇਨ ਪਞ੍ਹਂ ਪੁਚ੍ਛਿਤ੍ਵਾ ਭਿਕ੍ਖੁਸਙ੍ਘਂ ਵਿਹੇਠੇਤੀ’’ਤਿ.

ਅਥ ਖੋ ਸਕ੍ਕੋ ਦੇਵਾਨਮਿਨ੍ਦੋ ਆਯਸ੍ਮਨ੍ਤਂ ਅਸ੍ਸਗੁਤ੍ਤਂ ਏਤਦਵੋਚ ‘‘ਅਯਂ ਖੋ, ਭਨ੍ਤੇ, ਮਿਲਿਨ੍ਦੋ ਰਾਜਾ ਇਤੋ ਚੁਤੋ ਮਨੁਸ੍ਸੇਸੁ ਉਪ੍ਪਨ੍ਨੋ, ਏਸੋ ਖੋ, ਭਨ੍ਤੇ, ਕੇਤੁਮਤਿਵਿਮਾਨੇ ਮਹਾਸੇਨੋ ਨਾਮ ਦੇਵਪੁਤ੍ਤੋ ਪਟਿਵਸਤਿ, ਸੋ ਪਟਿਬਲੋ ਤੇਨ ਮਿਲਿਨ੍ਦੇਨ ਰਞ੍ਞਾ ਸਦ੍ਧਿਂ ਸਲ੍ਲਪਿਤੁਂ ਕਙ੍ਖਂ ਪਟਿਵਿਨੇਤੁਂ, ਤਂ ਦੇਵਪੁਤ੍ਤਂ ਯਾਚਿਸ੍ਸਾਮ ਮਨੁਸ੍ਸਲੋਕੂਪਪਤ੍ਤਿਯਾ’’ਤਿ.

ਅਥ ਖੋ ਸਕ੍ਕੋ ਦੇਵਾਨਮਿਨ੍ਦੋ ਭਿਕ੍ਖੁਸਙ੍ਘਂ ਪੁਰਕ੍ਖਤ੍ਵਾ ਕੇਤੁਮਤਿਵਿਮਾਨਂ ਪਵਿਸਿਤ੍ਵਾ ਮਹਾਸੇਨਂ ਦੇਵਪੁਤ੍ਤਂ ਆਲਿਙ੍ਗਿਤ੍ਵਾ ਏਤਦਵੋਚ ‘‘ਯਾਚਤਿ ਤਂ, ਮਾਰਿਸ, ਭਿਕ੍ਖੁਸਙ੍ਘੋ ਮਨੁਸ੍ਸਲੋਕੂਪਪਤ੍ਤਿਯਾ’’ਤਿ. ‘‘ਨ ਮੇ, ਭਨ੍ਤੇ, ਮਨੁਸ੍ਸਲੋਕੇਨਤ੍ਥੋ ਕਮ੍ਮਬਹੁਲੇਨ, ਤਿਬ੍ਬੋ ਮਨੁਸ੍ਸਲੋਕੋ, ਇਧੇਵਾਹਂ, ਭਨ੍ਤੇ, ਦੇਵਲੋਕੇ ਉਪਰੂਪਰੂਪਪਤ੍ਤਿਕੋ ਹੁਤ੍ਵਾ ਪਰਿਨਿਬ੍ਬਾਯਿਸ੍ਸਾਮੀ’’ਤਿ. ਦੁਤਿਯਮ੍ਪਿ…ਪੇ… ਤਤਿਯਮ੍ਪਿ ਖੋ ਸਕ੍ਕੇਨ ਦੇਵਾਨਮਿਨ੍ਦੇਨ ਯਾਚਿਤੋ ਮਹਾਸੇਨੋ ਦੇਵਪੁਤ੍ਤੋ ਏਵਮਾਹ ‘‘ਨ ਮੇ, ਭਨ੍ਤੇ, ਮਨੁਸ੍ਸਲੋਕੇਨਤ੍ਥੋ ਕਮ੍ਮਬਹੁਲੇਨ, ਤਿਬ੍ਬੋ ਮਨੁਸ੍ਸਲੋਕੋ, ਇਧੇਵਾਹਂ, ਭਨ੍ਤੇ, ਦੇਵਲੋਕੇ ਉਪਰੂਪਰੂਪਪਤ੍ਤਿਕੋ ਹੁਤ੍ਵਾ ਪਰਿਨਿਬ੍ਬਾਯਿਸ੍ਸਾਮੀ’’ਤਿ.

ਅਥ ਖੋ ਆਯਸ੍ਮਾ ਅਸ੍ਸਗੁਤ੍ਤੋ ਮਹਾਸੇਨਂ ਦੇਵਪੁਤ੍ਤਂ ਏਤਦਵੋਚ ‘‘ਇਧ ਮਯਂ, ਮਾਰਿਸ, ਸਦੇਵਕਂ ਲੋਕਂ ਅਨੁਵਿਲੋਕਯਮਾਨਾ ਅਞ੍ਞਤ੍ਰ ਤਯਾ ਮਿਲਿਨ੍ਦਸ੍ਸ ਰਞ੍ਞੋ ਵਾਦਂ ਭਿਨ੍ਦਿਤ੍ਵਾ ਸਾਸਨਂ ਪਗ੍ਗਹੇਤੁਂ ਸਮਤ੍ਥਂ ਅਞ੍ਞਂ ਕਞ੍ਚਿ ਨ ਪਸ੍ਸਾਮ, ਯਾਚਤਿ ਤਂ, ਮਾਰਿਸ, ਭਿਕ੍ਖੁਸਙ੍ਘੋ, ਸਾਧੁ ਸਪ੍ਪੁਰਿਸ ਮਨੁਸ੍ਸਲੋਕੇ ਨਿਬ੍ਬਤ੍ਤਿਤ੍ਵਾ ਦਸਬਲਸ੍ਸ ਸਾਸਨਂ ਪਗ੍ਗਣ੍ਹਾਹੀ’’ਤਿ. ਏਵਂ ਵੁਤ੍ਤੇ ਮਹਾਸੇਨੋ ਦੇਵਪੁਤ੍ਤੋ ‘‘ਅਹਂ ਕਿਰ ਮਿਲਿਨ੍ਦਸ੍ਸ ਰਞ੍ਞੋ ਵਾਦਂ ਭਿਨ੍ਦਿਤ੍ਵਾ ਬੁਦ੍ਧਸਾਸਨਂ ਪਗ੍ਗਹੇਤੁਂ ਸਮਤ੍ਥੋ ਭਵਿਸ੍ਸਾਮੀ’’ਤਿ ਹਟ੍ਠਪਹਟ੍ਠੋ ਉਦਗ੍ਗੁਦਗ੍ਗੋ ਹੁਤ੍ਵਾ ‘‘ਸਾਧੁ, ਭਨ੍ਤੇ, ਮਨੁਸ੍ਸਲੋਕੇ ਉਪ੍ਪਜ੍ਜਿਸ੍ਸਾਮੀ’’ਤਿ ਪਟਿਞ੍ਞਂ ਅਦਾਸਿ.

੯. ਅਥ ਖੋ ਤੇ ਭਿਕ੍ਖੂ ਦੇਵਲੋਕੇ ਤਂ ਕਰਣੀਯਂ ਤੀਰੇਤ੍ਵਾ ਦੇਵੇਸੁ ਤਾਵਤਿਂਸੇਸੁ ਅਨ੍ਤਰਹਿਤਾ ਹਿਮਵਨ੍ਤੇ ਪਬ੍ਬਤੇ ਰਕ੍ਖਿਤਤਲੇ ਪਾਤੁਰਹੇਸੁਂ.

ਅਥ ਖੋ ਆਯਸ੍ਮਾ ਅਸ੍ਸਗੁਤ੍ਤੋ ਭਿਕ੍ਖੁਸਙ੍ਘਂ ਏਤਦਵੋਚ ‘‘ਅਤ੍ਥਾਵੁਸੋ, ਇਮਸ੍ਮਿਂ ਭਿਕ੍ਖੁਸਙ੍ਘੇ ਕੋਚਿ ਭਿਕ੍ਖੁ ਸਨ੍ਨਿਪਾਤਂ ਅਨਾਗਤੋ’’ਤਿ. ਏਵਂ ਵੁਤ੍ਤੇ ਅਞ੍ਞਤਰੋ ਭਿਕ੍ਖੁ ਆਯਸ੍ਮਨ੍ਤਂ ਅਸ੍ਸਗੁਤ੍ਤਂ ਏਤਦਵੋਚ ‘‘ਅਤ੍ਥਿ, ਭਨ੍ਤੇ, ਆਯਸ੍ਮਾ ਰੋਹਣੋ ਇਤੋ ਸਤ੍ਤਮੇ ਦਿਵਸੇ ਹਿਮਵਨ੍ਤਂ ਪਬ੍ਬਤਂ ਪਵਿਸਿਤ੍ਵਾ ਨਿਰੋਧਂ ਸਮਾਪਨ੍ਨੋ, ਤਸ੍ਸ ਸਨ੍ਤਿਕੇ ਦੂਤਂ ਪਾਹੇਥਾ’’ਤਿ. ਆਯਸ੍ਮਾਪਿ ਰੋਹਣੋ ਤਙ੍ਖਣਞ੍ਞੇਵ ਨਿਰੋਧਾ ਵੁਟ੍ਠਾਯ ‘‘ਸਙ੍ਘੋ ਮਂ ਪਟਿਮਾਨੇਤੀ’’ਤਿ ਹਿਮਵਨ੍ਤੇ ਪਬ੍ਬਤੇ ਅਨ੍ਤਰਹਿਤੋ ਰਕ੍ਖਿਤਤਲੇ ਕੋਟਿਸਤਾਨਂ ਅਰਹਨ੍ਤਾਨਂ ਪੁਰਤੋ ਪਾਤੁਰਹੋਸਿ.

ਅਥ ਖੋ ਆਯਸ੍ਮਾ ਅਸ੍ਸਗੁਤ੍ਤੋ ਆਯਸ੍ਮਨ੍ਤਂ ਰੋਹਣਂ ਏਤਦਵੋਚ ‘‘ਕਿਂ ਨੁ ਖੋ, ਆਵੁਸੋ, ਰੋਹਣ ਬੁਦ੍ਧਸਾਸਨੇ ਭਿਜ੍ਜਨ੍ਤੇ [ਪਲੁਜ੍ਜਨ੍ਤੇ (ਸੀ. ਪੀ.)] ਨ ਪਸ੍ਸਸਿ ਸਙ੍ਘਸ੍ਸ ਕਰਣੀਯਾਨੀ’’ਤਿ. ‘‘ਅਮਨਸਿਕਾਰੋ ਮੇ, ਭਨ੍ਤੇ, ਅਹੋਸੀ’’ਤਿ.

‘‘ਤੇਨ, ਹਾਵੁਸੋ ਰੋਹਣ, ਦਣ੍ਡਕਮ੍ਮਂ ਕਰੋਹੀ’’ਤਿ. ‘‘ਕਿਂ, ਭਨ੍ਤੇ, ਕਰੋਮੀ’’ਤਿ? ‘‘ਅਤ੍ਥਾਵੁਸੋ ਰੋਹਣ, ਹਿਮਵਨ੍ਤਪਬ੍ਬਤਪਸ੍ਸੇ ਗਜਙ੍ਗਲਂ [ਕਜਙ੍ਗਲਂ (ਸੀ. ਪੀ.)] ਨਾਮ ਬ੍ਰਾਹ੍ਮਣਗਾਮੋ, ਤਤ੍ਥ ਸੋਣੁਤ੍ਤਰੋ ਨਾਮ ਬ੍ਰਾਹ੍ਮਣੋ ਪਟਿਵਸਤਿ, ਤਸ੍ਸ ਪੁਤ੍ਤੋ ਉਪ੍ਪਜ੍ਜਿਸ੍ਸਤਿ ਨਾਗਸੇਨੋਤਿ ਨਾਮ ਦਾਰਕੋ, ਤੇਨ ਹਿ ਤ੍ਵਂ, ਆਵੁਸੋ ਰੋਹਣ, ਦਸਮਾਸਾਧਿਕਾਨਿ ਸਤ੍ਤ ਵਸ੍ਸਾਨਿ ਤਂ ਕੁਲਂ ਪਿਣ੍ਡਾਯ ਪਵਿਸਿਤ੍ਵਾ ਨਾਗਸੇਨਂ ਦਾਰਕਂ ਨੀਹਰਿਤ੍ਵਾ ਪਬ੍ਬਾਜੇਹਿ, ਪਬ੍ਬਜਿਤੇਵ ਤਸ੍ਮਿਂ ਦਣ੍ਡਕਮ੍ਮਤੋ ਮੁਚ੍ਚਿਸ੍ਸਸੀ’’ਤਿ. ਆਯਸ੍ਮਾਪਿ ਖੋ ਰੋਹਣੋ ‘‘ਸਾਧੂ’’ਤਿ ਸਮ੍ਪਟਿਚ੍ਛਿ.

੧੦. ਮਹਾਸੇਨੋਪਿ ਖੋ ਦੇਵਪੁਤ੍ਤੋ ਦੇਵਲੋਕਾ ਚਵਿਤ੍ਵਾ ਸੋਣੁਤ੍ਤਰਬ੍ਰਾਹ੍ਮਣਸ੍ਸ ਭਰਿਯਾਯ ਕੁਚ੍ਛਿਸ੍ਮਿਂ ਪਟਿਸਨ੍ਧਿਂ ਅਗ੍ਗਹੇਸਿ, ਸਹ ਪਟਿਸਨ੍ਧਿਗ੍ਗਹਣਾ ਤਯੋ ਅਚ੍ਛਰਿਯਾ ਅਬ੍ਭੁਤਾ ਧਮ੍ਮਾ ਪਾਤੁਰਹੇਸੁਂ, ਆਵੁਧਭਣ੍ਡਾਨਿ ਪਜ੍ਜਲਿਂਸੁ, ਅਗ੍ਗਸਸ੍ਸਂ ਅਭਿਨਿਪ੍ਫਨ੍ਨਂ, ਮਹਾਮੇਘੋ ਅਭਿਪ੍ਪਵਸ੍ਸਿ. ਆਯਸ੍ਮਾਪਿ ਖੋ ਰੋਹਣੋ ਤਸ੍ਸ ਪਟਿਸਨ੍ਧਿਗ੍ਗਹਣਤੋ ਪਟ੍ਠਾਯ ਦਸਮਾਸਾਧਿਕਾਨਿ ਸਤ੍ਤ ਵਸ੍ਸਾਨਿ ਤਂ ਕੁਲਂ ਪਿਣ੍ਡਾਯ ਪਵਿਸਨ੍ਤੋ ਏਕਦਿਵਸਮ੍ਪਿ ਕਟਚ੍ਛੁਮਤ੍ਤਂ ਭਤ੍ਤਂ ਵਾ ਉਲ਼ੁਙ੍ਕਮਤ੍ਤਂ ਯਾਗੁਂ ਵਾ ਅਭਿਵਾਦਨਂ ਵਾ ਅਞ੍ਜਲਿਕਮ੍ਮਂ ਵਾ ਸਾਮੀਚਿਕਮ੍ਮਂ ਵਾ ਨਾਲਤ੍ਥ, ਅਥ ਖੋ ਅਕ੍ਕੋਸਞ੍ਞੇਵ ਪਰਿਭਾਸਞ੍ਞੇਵ ਪਟਿਲਭਤਿ ‘‘ਅਤਿਚ੍ਛਥ ਭਨ੍ਤੇ’’ਤਿ ਵਚਨਮਤ੍ਤਮ੍ਪਿ ਵਤ੍ਤਾ ਨਾਮ ਨਾਹੋਸਿ, ਦਸਮਾਸਾਧਿਕਾਨਂ ਪਨ ਸਤ੍ਤਨ੍ਨਂ ਵਸ੍ਸਾਨਂ ਅਚ੍ਚਯੇਨ ਏਕਦਿਵਸਂ ‘‘ਅਤਿਚ੍ਛਥ ਭਨ੍ਤੇ’’ਤਿ ਵਚਨਮਤ੍ਤਂ ਅਲਤ੍ਥ. ਤਂ ਦਿਵਸਮੇਵ ਬ੍ਰਾਹ੍ਮਣੋਪਿ ਬਹਿ ਕਮ੍ਮਨ੍ਤਾ ਆਗਚ੍ਛਨ੍ਤੋ ਪਟਿਪਥੇ ਥੇਰਂ ਦਿਸ੍ਵਾ ‘‘ਕਿਂ, ਭੋ ਪਬ੍ਬਜਿਤ, ਅਮ੍ਹਾਕਂ ਗੇਹਂ ਅਗਮਿਤ੍ਥਾ’’ਤਿ ਆਹ. ‘‘ਆਮ, ਬ੍ਰਾਹ੍ਮਣ, ਅਗਮਮ੍ਹਾ’’ਤਿ. ‘‘ਅਪਿ ਕਿਞ੍ਚਿ ਲਭਿਤ੍ਥਾ’’ਤਿ. ‘‘ਆਮ, ਬ੍ਰਾਹ੍ਮਣ, ਲਭਿਮ੍ਹਾ’’ਤਿ. ਸੋ ਅਨਤ੍ਤਮਨੋ ਗੇਹਂ ਗਨ੍ਤ੍ਵਾ ਪੁਚ੍ਛਿ ‘‘ਤਸ੍ਸ ਪਬ੍ਬਜਿਤਸ੍ਸ ਕਿਞ੍ਚਿ ਅਦਤ੍ਥਾ’’ਤਿ. ‘‘ਨ ਕਿਞ੍ਚਿ ਅਦਮ੍ਹਾ’’ਤਿ. ਬ੍ਰਾਹ੍ਮਣੋ ਦੁਤਿਯਦਿਵਸੇ ਘਰਦ੍ਵਾਰੇ ਯੇਵ ਨਿਸੀਦਿ ‘‘ਅਜ੍ਜ ਪਬ੍ਬਜਿਤਂ ਮੁਸਾਵਾਦੇਨ ਨਿਗ੍ਗਹੇਸ੍ਸਾਮੀ’’ਤਿ. ਥੇਰੋ ਦੁਤਿਯਦਿਵਸੇ ਬ੍ਰਾਹ੍ਮਣਸ੍ਸ ਘਰਦ੍ਵਾਰਂ ਸਮ੍ਪਤ੍ਤੋ.

ਬ੍ਰਾਹ੍ਮਣੋ ਥੇਰਂ ਦਿਸ੍ਵਾਵ ਏਵਮਾਹ ‘‘ਤੁਮ੍ਹੇ ਹਿਯ੍ਯੋ ਅਮ੍ਹਾਕਂ ਗੇਹੇ ਕਿਞ੍ਚਿ ਅਲਭਿਤ੍ਵਾਵ ‘‘ਲਭਿਮ੍ਹਾ’’ਤਿ ਅਵੋਚੁਤ੍ਥ, ਵਟ੍ਟਤਿ ਨੁ ਖੋ ਤੁਮ੍ਹਾਕਂ ਮੁਸਾਵਾਦੋ’’ਤਿ. ਥੇਰੋ ਆਹ ‘‘ਮਯਂ, ਬ੍ਰਾਹ੍ਮਣ, ਤੁਮ੍ਹਾਕਂ ਗੇਹੇ ( ) [(ਪਵਿਸਨ੍ਤਾ) (ਕ.)] ਦਸਮਾਸਾਧਿਕਾਨਿ ਸਤ੍ਤ ਵਸ੍ਸਾਨਿ ‘ਅਤਿਚ੍ਛਥਾ’ਤਿ ਵਚਨਮਤ੍ਤਮ੍ਪਿ ਅਲਭਿਤ੍ਵਾ ਹਿਯ੍ਯੋ ‘ਅਤਿਚ੍ਛਥਾ’ਤਿ ਵਚਨਮਤ੍ਤਂ ਲਭਿਮ੍ਹਾ, ਅਥੇਤਂ ਵਾਚਾਪਟਿਸਨ੍ਧਾਰਂ [ਪਟਿਸਨ੍ਤਾਰਂ (ਸੀ. ਪੀ.)] ਉਪਾਦਾਯ ਏਵਮਵੋਚੁਮ੍ਹਾ’’ਤਿ.

ਬ੍ਰਾਹ੍ਮਣੋ ਚਿਨ੍ਤੇਸਿ ‘‘ਇਮੇ ਵਾਚਾਪਟਿਸਨ੍ਧਾਰਮਤ੍ਤਮ੍ਪਿ ਲਭਿਤ੍ਵਾ ਜਨਮਜ੍ਝੇ ‘ਲਭਿਮ੍ਹਾ’ਤਿ ਪਸਂਸਨ੍ਤਿ, ਅਞ੍ਞਂ ਕਿਞ੍ਚਿ ਖਾਦਨੀਯਂ ਵਾ ਭੋਜਨੀਯਂ ਵਾ ਲਭਿਤ੍ਵਾ ਕਸ੍ਮਾ ਨਪ੍ਪਸਂਸਨ੍ਤੀ’’ਤਿ ਪਸੀਦਿਤ੍ਵਾ ਅਤ੍ਤਨੋ ਅਤ੍ਥਾਯ ਪਟਿਯਾਦਿਤਭਤ੍ਤਤੋ ਕਟਚ੍ਛੁਭਿਕ੍ਖਂ, ਤਦੁਪਿਯਞ੍ਚ ਬ੍ਯਞ੍ਜਨਂ ਦਾਪੇਤ੍ਵਾ ‘‘ਇਮਂ ਭਿਕ੍ਖਂ ਸਬ੍ਬਕਾਲਂ ਤੁਮ੍ਹੇ ਲਭਿਸ੍ਸਥਾ’’ਤਿ ਆਹ.

ਸੋ ਪੁਨਦਿਵਸਤੋ ਪਭੁਤਿ ਉਪਸਙ੍ਕਮਨ੍ਤਸ੍ਸ ਥੇਰਸ੍ਸ ਉਪਸਮਂ ਦਿਸ੍ਵਾ ਭਿਯ੍ਯੋਸੋ ਮਤ੍ਤਾਯ ਪਸੀਦਿਤ੍ਵਾ ਥੇਰਂ ਨਿਚ੍ਚਕਾਲਂ ਅਤ੍ਤਨੋ ਘਰੇ ਭਤ੍ਤਵਿਸ੍ਸਗ੍ਗਕਰਣਤ੍ਥਾਯ ਯਾਚਿ. ਥੇਰੋ ਤੁਣ੍ਹੀਭਾਵੇਨ ਅਧਿਵਾਸੇਤ੍ਵਾ ਦਿਵਸੇ ਦਿਵਸੇ ਭਤ੍ਤਕਿਚ੍ਚਂ ਕਤ੍ਵਾ ਗਚ੍ਛਨ੍ਤੋ ਥੋਕਂ ਥੋਕਂ ਬੁਦ੍ਧਵਚਨਂ ਕਥੇਤ੍ਵਾ ਗਚ੍ਛਤਿ. ਸਾਪਿ ਖੋ ਬ੍ਰਾਹ੍ਮਣੀ ਦਸਮਾਸਚ੍ਚਯੇਨ ਪੁਤ੍ਤਂ ਵਿਜਾਯਿ, ‘‘ਨਾਗਸੇਨੋ’’ਤਿਸ੍ਸ ਨਾਮਮਕਂਸੁ, ਸੋ ਅਨੁਕ੍ਕਮੇਨ ਵਡ੍ਢਨ੍ਤੋ ਸਤ੍ਤਵਸ੍ਸਿਕੋ ਜਾਤੋ.

੧੧. ਅਥ ਖੋ ਨਾਗਸੇਨਸ੍ਸ ਦਾਰਕਸ੍ਸ ਪਿਤਾ ਨਾਗਸੇਨਂ ਦਾਰਕਂ ਏਤਦਵੋਚ ‘‘ਇਮਸ੍ਮਿਂ ਖੋ, ਤਾਤ ਨਾਗਸੇਨ, ਬ੍ਰਾਹ੍ਮਣਕੁਲੇ ਸਿਕ੍ਖਾਨਿ ਸਿਕ੍ਖੇਯ੍ਯਾਸੀ’’ਤਿ. ‘‘ਕਤਮਾਨਿ, ਤਾਤ, ਇਮਸ੍ਮਿਂ ਬ੍ਰਾਹ੍ਮਣਕੁਲੇ ਸਿਕ੍ਖਾਨਿ ਨਾਮਾ’’ਤਿ? ‘‘ਤਯੋ ਖੋ, ਤਾਤ ਨਾਗਸੇਨ, ਵੇਦਾ ਸਿਕ੍ਖਾਨਿ ਨਾਮ, ਅਵਸੇਸਾਨਿ ਸਿਪ੍ਪਾਨਿ ਸਿਪ੍ਪਂ ਨਾਮਾ’’ਤਿ. ‘‘ਤੇਨ ਹਿ, ਤਾਤ, ਸਿਕ੍ਖਿਸ੍ਸਾਮੀ’’ਤਿ.

ਅਥ ਖੋ ਸੋਣੁਤ੍ਤਰੋ ਬ੍ਰਾਹ੍ਮਣੋ ਆਚਰਿਯਬ੍ਰਾਹ੍ਮਣਸ੍ਸ ਆਚਰਿਯਭਾਗਂ ਸਹਸ੍ਸਂ ਦਤ੍ਵਾ ਅਨ੍ਤੋਪਾਸਾਦੇ ਏਕਸ੍ਮਿਂ ਗਬ੍ਭੇ ਏਕਤੋ ਮਞ੍ਚਕਂ ਪਞ੍ਞਪੇਤ੍ਵਾ ਆਚਰਿਯਬ੍ਰਾਹ੍ਮਣਂ ਏਤਦਵੋਚ ‘‘ਸਜ੍ਝਾਪੇਹਿ ਖੋ, ਤ੍ਵਂ ਬ੍ਰਾਹ੍ਮਣ, ਇਮਂ ਦਾਰਕਂ ਮਨ੍ਤਾਨੀਤਿ. ਤੇਨ ਹਿ ‘ਤਾਤ ਦਾਰਕ’ ਉਗ੍ਗਣ੍ਹਾਹਿ ਮਨ੍ਤਾਨੀ’’ਤਿ. ਆਚਰਿਯਬ੍ਰਾਹ੍ਮਣੋ ਸਜ੍ਝਾਯਤਿ ਨਾਗਸੇਨਸ੍ਸ ਦਾਰਕਸ੍ਸ ਏਕੇਨੇਵ ਉਦ੍ਦੇਸੇਨ ਤਯੋ ਵੇਦਾ ਹਦਯਙ੍ਗਤਾ ਵਾਚੁਗ੍ਗਤਾ ਸੂਪਧਾਰਿਤਾ ਸੁਵਵਤ੍ਥਾਪਿਤਾ ਸੁਮਨਸਿਕਤਾ ਅਹੇਸੁਂ, ਸਕਿਮੇਵ ਚਕ੍ਖੁਂ ਉਦਪਾਦਿ ਤੀਸੁ ਵੇਦੇਸੁ ਸਨਿਘਣ੍ਡੁਕੇਟੁਭੇਸੁ [ਸਨਿਘਣ੍ਟੁਕੇਟੁਭੇਸੁ (ਕ.)] ਸਾਕ੍ਖਰਪ੍ਪਭੇਦੇਸੁ ਇਤਿਹਾਸਪਞ੍ਚਮੇਸੁ ਪਦਕੋ ਵੇਯ੍ਯਾਕਰਣੋ ਲੋਕਾਯਤਮਹਾਪੁਰਿਸਲਕ੍ਖਣੇਸੁ ਅਨਵਯੋ ਅਹੋਸਿ.

ਅਥ ਖੋ ਨਾਗਸੇਨੋ ਦਾਰਕੋ ਪਿਤਰਂ ਏਤਦਵੋਚ ‘‘ਅਤ੍ਥਿ ਨੁ ਖੋ, ਤਾਤ, ਇਮਸ੍ਮਿਂ ਬ੍ਰਾਹ੍ਮਣਕੁਲੇ ਇਤੋ ਉਤ੍ਤਰਿਮ੍ਪਿ ਸਿਕ੍ਖਿਤਬ੍ਬਾਨਿ, ਉਦਾਹੁ ਏਤ੍ਤਕਾਨੇਵਾ’’ਤਿ. ‘‘ਨਤ੍ਥਿ, ਤਾਤ ਨਾਗਸੇਨ, ਇਮਸ੍ਮਿਂ ਬ੍ਰਾਹ੍ਮਣਕੁਲੇ ਇਤੋ ਉਤ੍ਤਰਿਂ ਸਿਕ੍ਖਿਤਬ੍ਬਾਨਿ, ਏਤ੍ਤਕਾਨੇਵ ਸਿਕ੍ਖਿਤਬ੍ਬਾਨੀ’’ਤਿ.

ਅਥ ਖੋ ਨਾਗਸੇਨੋ ਦਾਰਕੋ ਆਚਰਿਯਸ੍ਸ ਅਨੁਯੋਗਂ ਦਤ੍ਵਾ ਪਾਸਾਦਾ ਓਰੁਯ੍ਹ ਪੁਬ੍ਬਵਾਸਨਾਯ ਚੋਦਿਤਹਦਯੋ ਰਹੋਗਤੋ ਪਟਿਸਲ੍ਲੀਨੋ ਅਤ੍ਤਨੋ ਸਿਪ੍ਪਸ੍ਸ ਆਦਿਮਜ੍ਝਪਰਿਯੋਸਾਨਂ ਓਲੋਕੇਨ੍ਤੋ ਆਦਿਮ੍ਹਿ ਵਾ ਮਜ੍ਝੇ ਵਾ ਪਰਿਯੋਸਾਨੇ ਵਾ ਅਪ੍ਪਮਤ੍ਤਕਮ੍ਪਿ ਸਾਰਂ ਅਦਿਸ੍ਵਾ ‘‘ਤੁਚ੍ਛਾ ਵਤ ਭੋ ਇਮੇ ਵੇਦਾ, ਪਲਾਪਾ ਵਤ ਭੋ ਇਮੇ ਵੇਦਾ ਅਸਾਰਾ ਨਿਸ੍ਸਾਰਾ’’ਤਿ ਵਿਪ੍ਪਟਿਸਾਰੀ ਅਨਤ੍ਤਮਨੋ ਅਹੋਸਿ.

੧੨. ਤੇਨ ਖੋ ਪਨ ਸਮਯੇਨ ਆਯਸ੍ਮਾ ਰੋਹਣੋ ਵਤ੍ਤਨਿਯੇ ਸੇਨਾਸਨੇ ਨਿਸਿਨ੍ਨੋ ਨਾਗਸੇਨਸ੍ਸ ਦਾਰਕਸ੍ਸ ਚੇਤਸਾ ਚੇਤੋਪਰਿਵਿਤਕ੍ਕਮਞ੍ਞਾਯ ਨਿਵਾਸੇਤ੍ਵਾ ਪਤ੍ਤਚੀਵਰਮਾਦਾਯ ਵਤ੍ਤਨਿਯੇ ਸੇਨਾਸਨੇ ਅਨ੍ਤਰਹਿਤੋ ਗਜਙ੍ਗਲਬ੍ਰਾਹ੍ਮਣਗਾਮਸ੍ਸ ਪੁਰਤੋ ਪਾਤੁਰਹੋਸਿ. ਅਦ੍ਦਸਾ ਖੋ ਨਾਗਸੇਨੋ ਦਾਰਕੋ ਅਤ੍ਤਨੋ ਦ੍ਵਾਰਕੋਟ੍ਠਕੇ ਠਿਤੋ ਆਯਸ੍ਮਨ੍ਤਂ ਰੋਹਣਂ ਦੂਰਤੋਵ ਆਗਚ੍ਛਨ੍ਤਂ, ਦਿਸ੍ਵਾਨ ਅਤ੍ਤਮਨੋ ਉਦਗ੍ਗੋ ਪਮੁਦਿਤੋ ਪੀਤਿਸੋਮਨਸ੍ਸਜਾਤੋ ‘‘ਅਪ੍ਪੇਵ ਨਾਮਾਯਂ ਪਬ੍ਬਜਿਤੋ ਕਞ੍ਚਿ ਸਾਰਂ ਜਾਨੇਯ੍ਯਾ’’ਤਿ ਯੇਨਾਯਸ੍ਮਾ ਰੋਹਣੋ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਆਯਸ੍ਮਨ੍ਤਂ ਰੋਹਣਂ ਏਤਦਵੋਚ ‘‘ਕੋ ਨੁ ਖੋ, ਤ੍ਵਂ ਮਾਰਿਸ, ਏਦਿਸੋ ਭਣ੍ਡੁਕਾਸਾਵਵਸਨੋ’’ਤਿ. ‘‘ਪਬ੍ਬਜਿਤੋ [ਪਾਪਕਾਨਂ ਮਲਾਨਂ ਪਬ੍ਬਾਜੇਤੁਂ ਪਬ੍ਬਜਿਤੋ (ਸੀ. ਪੀ.)] ਨਾਮਾਹਂ ਦਾਰਕਾ’’ਤਿ. ‘‘ਕੇਨ, ਤ੍ਵਂ ਮਾਰਿਸ, ਪਬ੍ਬਜਿਤੋ ਨਾਮਾਸੀ’’ਤਿ? ‘‘ਪਾਪਕਾਨਿ ਮਲਾਨਿ ਪਬ੍ਬਾਜੇਤਿ, ਤਸ੍ਮਾਹਂ, ਦਾਰਕ, ਪਬ੍ਬਜਿਤੋ ਨਾਮਾ’’ਤਿ. ‘‘ਕਿਂਕਾਰਣਾ, ਮਾਰਿਸ, ਕੇਸਾ ਤੇ ਨ ਯਥਾ ਅਞ੍ਞੇਸ’’ਨ੍ਤਿ? ‘‘ਸੋਲ਼ਸਿਮੇ, ਦਾਰਕ, ਪਲਿਬੋਧੇ ਦਿਸ੍ਵਾ ਕੇਸਮਸ੍ਸੁਂ ਓਹਾਰੇਤ੍ਵਾ ਪਬ੍ਬਜਿਤੋ. ‘‘ਕਤਮੇ ਸੋਲ਼ਸ’’? ‘‘ਅਲਙ੍ਕਾਰਪਲਿਬੋਧੋ ਮਣ੍ਡਨਪਲਿਬੋਧੋ ਤੇਲਮਕ੍ਖਨਪਲਿਬੋਧੋ ਧੋਵਨਪਲਿਬੋਧੋ ਮਾਲਾਪਲਿਬੋਧੋ ਗਨ੍ਧਪਲਿਬੋਧੋ ਵਾਸਨਪਲਿਬੋਧੋ ਹਰੀਟਕਪਲਿਬੋਧੋ ਆਮਲਕਪਲਿਬੋਧੋ ਰਙ੍ਗਪਲਿਬੋਧੋ ਬਨ੍ਧਨਪਲਿਬੋਧੋ ਕੋਚ੍ਛਪਲਿਬੋਧੋ ਕਪ੍ਪਕਪਲਿਬੋਧੋ ਵਿਜਟਨਪਲਿਬੋਧੋ ਊਕਾਪਲਿਬੋਧੋ, ਕੇਸੇਸੁ ਵਿਲੂਨੇਸੁ ਸੋਚਨ੍ਤਿ ਕਿਲਮਨ੍ਤਿ ਪਰਿਦੇਵਨ੍ਤਿ ਉਰਤ੍ਤਾਲ਼ਿਂ ਕਨ੍ਦਨ੍ਤਿ ਸਮ੍ਮੋਹਂ ਆਪਜ੍ਜਨ੍ਤਿ, ਇਮੇਸੁ ਖੋ, ਦਾਰਕ, ਸੋਲ਼ਸਸੁ ਪਲਿਬੋਧੇਸੁ ਪਲਿਗੁਣ੍ਠਿਤਾ ਮਨੁਸ੍ਸਾ ਸਬ੍ਬਾਨਿ ਅਤਿਸੁਖੁਮਾਨਿ ਸਿਪ੍ਪਾਨਿ ਨਾਸੇਨ੍ਤੀ’’ਤਿ. ‘‘ਕਿਂਕਾਰਣਾ, ਮਾਰਿਸ, ਵਤ੍ਥਾਨਿਪਿ ਤੇ ਨ ਯਥਾ ਅਞ੍ਞੇਸ’’ਨ੍ਤਿ? ‘‘ਕਾਮਨਿਸ੍ਸਿਤਾਨਿ ਖੋ, ਦਾਰਕ, ਵਤ੍ਥਾਨਿ, ਕਾਮਨਿਸ੍ਸਿਤਾਨਿ ਗਿਹਿਬ੍ਯਞ੍ਜਨਭਣ੍ਡਾਨਿ [ਕਮਨੀਯਾਨਿ ਗਿਹਿਬ੍ਯਞ੍ਜਨਾਨਿ (ਸੀ. ਪੀ.)], ਯਾਨਿ ਕਾਨਿਚਿ ਖੋ ਭਯਾਨਿ ਵਤ੍ਥਤੋ ਉਪ੍ਪਜ੍ਜਨ੍ਤਿ, ਤਾਨਿ ਕਾਸਾਵਵਸਨਸ੍ਸ ਨ ਹੋਨ੍ਤਿ, ਤਸ੍ਮਾ ਵਤ੍ਥਾਨਿਪਿ ਮੇ ਨ ਯਥਾ ਅਞ੍ਞੇਸ’’ਨ੍ਤਿ. ‘‘ਜਾਨਾਸਿ ਖੋ, ਤ੍ਵਂ ਮਾਰਿਸ, ਸਿਪ੍ਪਾਨਿ ਨਾਮਾ’’ਤਿ? ‘‘ਆਮ, ਦਾਰਕ, ਜਾਨਾਮਹਂ ਸਿਪ੍ਪਾਨਿ, ਯਂ ਲੋਕੇ ਉਤ੍ਤਮਂ ਮਨ੍ਤਂ, ਤਮ੍ਪਿ ਜਾਨਾਮੀ’’ਤਿ. ‘‘ਮਯ੍ਹਮ੍ਪਿ ਤਂ, ਮਾਰਿਸ, ਦਾਤੁਂ ਸਕ੍ਕਾ’’ਤਿ? ‘‘ਆਮ, ਦਾਰਕ, ਸਕ੍ਕਾ’’ਤਿ. ‘‘ਤੇਨ ਹਿ ਮੇ ਦੇਹੀ’’ਤਿ. ‘‘ਅਕਾਲੋ ਖੋ, ਦਾਰਕ, ਅਨ੍ਤਰਘਰਂ ਪਿਣ੍ਡਾਯ ਪਵਿਟ੍ਠਮ੍ਹਾ’’ਤਿ.

ਅਥ ਖੋ ਨਾਗਸੇਨੋ ਦਾਰਕੋ ਆਯਸ੍ਮਤੋ ਰੋਹਣਸ੍ਸ ਹਤ੍ਥਤੋ ਪਤ੍ਤਂ ਗਹੇਤ੍ਵਾ ਘਰਂ ਪਵੇਸੇਤ੍ਵਾ ਪਣੀਤੇਨ ਖਾਦਨੀਯੇਨ ਭੋਜਨੀਯੇਨ ਸਹਤ੍ਥਾ ਸਨ੍ਤਪ੍ਪੇਤ੍ਵਾ ਸਮ੍ਪਵਾਰੇਤ੍ਵਾ ਆਯਸ੍ਮਨ੍ਤਂ ਰੋਹਣਂ ਭੁਤ੍ਤਾਵਿਂ ਓਨੀਤਪਤ੍ਤਪਾਣਿਂ ਏਤਦਵੋਚ ‘‘ਦੇਹਿ ਮੇ ਦਾਨਿ, ਮਾਰਿਸ, ਮਨ੍ਤ’’ਨ੍ਤਿ. ‘‘ਯਦਾ ਖੋ ਤ੍ਵਂ, ਦਾਰਕ, ਨਿਪ੍ਪਲਿਬੋਧੋ ਹੁਤ੍ਵਾ ਮਾਤਾਪਿਤਰੋ ਅਨੁਜਾਨਾਪੇਤ੍ਵਾ ਮਯਾ ਗਹਿਤਂ ਪਬ੍ਬਜਿਤਵੇਸਂ ਗਣ੍ਹਿਸ੍ਸਸਿ, ਤਦਾ ਦਸ੍ਸਾਮੀ’’ਤਿ ਆਹ.

ਅਥ ਖੋ ਨਾਗਸੇਨੋ ਦਾਰਕੋ ਮਾਤਾਪਿਤਰੋ ਉਪਸਙ੍ਕਮਿਤ੍ਵਾ ਆਹ ‘‘ਅਮ੍ਮਤਾਤਾ, ਅਯਂ ਪਬ੍ਬਜਿਤੋ ‘ਯਂ ਲੋਕੇ ਉਤ੍ਤਮਂ ਮਨ੍ਤਂ, ਤਂ ਜਾਨਾਮੀ’ਤਿ ਵਦਤਿ, ਨ ਚ ਅਤ੍ਤਨੋ ਸਨ੍ਤਿਕੇ ਅਪਬ੍ਬਜਿਤਸ੍ਸ ਦੇਤਿ, ਅਹਂ ਏਤਸ੍ਸ ਸਨ੍ਤਿਕੇ ਪਬ੍ਬਜਿਤ੍ਵਾ ਤਂ ਉਤ੍ਤਮਂ ਮਨ੍ਤਂ ਉਗ੍ਗਣ੍ਹਿਸ੍ਸਾਮੀ’’ਤਿ. ਅਥਸ੍ਸ ਮਾਤਾਪਿਤਰੋ ‘‘ਪਬ੍ਬਜਿਤ੍ਵਾਪਿ ਨੋ ਪੁਤ੍ਤੋ ਮਨ੍ਤਂ ਗਣ੍ਹਤੁ, ਗਹੇਤ੍ਵਾ ਪੁਨ ਆਗਚ੍ਛਿਸ੍ਸਤੀ’’ਤਿ ਮਞ੍ਞਮਾਨਾ ‘‘ਗਣ੍ਹ ਪੁਤ੍ਤਾ’’ਤਿ ਅਨੁਜਾਨਿਂਸੁ.

੧੩. ਅਥ ਖੋ ਆਯਸ੍ਮਾ ਰੋਹਣੋ ਨਾਗਸੇਨਂ ਦਾਰਕਂ ਆਦਾਯ ਯੇਨ ਵਤ੍ਤਨਿਯਂ ਸੇਨਾਸਨਂ, ਯੇਨ ਵਿਜਮ੍ਭਵਤ੍ਥੁ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਵਿਜਮ੍ਭਵਤ੍ਥੁਸ੍ਮਿਂ ਸੇਨਾਸਨੇ ਏਕਰਤ੍ਤਂ ਵਸਿਤ੍ਵਾ ਯੇਨ ਰਕ੍ਖਿਤਤਲਂ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਕੋਟਿਸਤਾਨਂ ਅਰਹਨ੍ਤਾਨਂ ਮਜ੍ਝੇ ਨਾਗਸੇਨਂ ਦਾਰਕਂ ਪਬ੍ਬਾਜੇਸਿ. ਪਬ੍ਬਜਿਤੋ ਚ ਪਨਾਯਸ੍ਮਾ ਨਾਗਸੇਨੋ ਆਯਸ੍ਮਨ੍ਤਂ ਰੋਹਣਂ ਏਤਦਵੋਚ ‘‘ਗਹਿਤੋ ਮੇ, ਭਨ੍ਤੇ, ਤਵ ਵੇਸੋ, ਦੇਥ ਮੇ ਦਾਨਿ ਮਨ੍ਤ’’ਨ੍ਤਿ. ਅਥ ਖੋ ਆਯਸ੍ਮਾ ਰੋਹਣੋ ‘‘ਕਿਮ੍ਹਿ ਨੁ ਖੋਹਂ ਨਾਗਸੇਨਂ ਵਿਨੇਯ੍ਯਂ ਪਠਮਂ ਵਿਨਯੇ ਵਾ ਸੁਤ੍ਤਨ੍ਤੇ ਵਾ ਅਭਿਧਮ੍ਮੇ ਵਾ’’ਤਿ ਚਿਨ੍ਤੇਤ੍ਵਾ ‘‘ਪਣ੍ਡਿਤੋ ਖੋ ਅਯਂ ਨਾਗਸੇਨੋ, ਸਕ੍ਕੋਤਿ ਸੁਖੇਨੇਵ ਅਭਿਧਮ੍ਮਂ ਪਰਿਯਾਪੁਣਿਤੁ’’ਨ੍ਤਿ ਪਠਮਂ ਅਭਿਧਮ੍ਮੇ ਵਿਨੇਸਿ.

ਆਯਸ੍ਮਾ ਚ ਨਾਗਸੇਨੋ ‘‘ਕੁਸਲਾ ਧਮ੍ਮਾ, ਅਕੁਸਲਾ ਧਮ੍ਮਾ, ਅਬ੍ਯਾਕਤਾ ਧਮ੍ਮਾ’’ਤਿ ਤਿਕਦੁਕਪਟਿਮਣ੍ਡਿਤਂ ਧਮ੍ਮਸਙ੍ਗਣੀਪਕਰਣਂ, ਖਨ੍ਧਵਿਭਙ੍ਗਾਦਿ ਅਟ੍ਠਾਰਸ ਵਿਭਙ੍ਗਪਟਿਮਣ੍ਡਿਤਂ ਵਿਭਙ੍ਗਪ੍ਪਕਰਣਂ, ‘‘ਸਙ੍ਗਹੋ ਅਸਙ੍ਗਹੋ’’ਤਿ ਆਦਿਨਾ ਚੁਦ੍ਦਸਵਿਧੇਨ ਵਿਭਤ੍ਤਂ ਧਾਤੁਕਥਾਪਕਰਣਂ, ‘‘ਖਨ੍ਧਪਞ੍ਞਤ੍ਤਿ ਆਯਤਨਪਞ੍ਞਤ੍ਤੀ’’ਤਿ ਆਦਿਨਾ ਛਬ੍ਬਿਧੇਨ ਵਿਭਤ੍ਤਂ ਪੁਗ੍ਗਲਪਞ੍ਞਤ੍ਤਿਪ੍ਪਕਰਣਂ, ਸਕਵਾਦੇ ਪਞ੍ਚਸੁਤ੍ਤਸਤਾਨਿ ਪਰਵਾਦੇ ਪਞ੍ਚਸੁਤ੍ਤਸਤਾਨੀਤਿ ਸੁਤ੍ਤਸਹਸ੍ਸਂ ਸਮੋਧਾਨੇਤ੍ਵਾ ਵਿਭਤ੍ਤਂ ਕਥਾਵਤ੍ਥੁਪ੍ਪਕਰਣਂ, ‘‘ਮੂਲਯਮਕਂ ਖਨ੍ਧਯਮਕ’’ਨ੍ਤਿ ਆਦਿਨਾ ਦਸਵਿਧੇਨ ਵਿਭਤ੍ਤਂ ਯਮਕਪ੍ਪਕਰਣਂ, ‘‘ਹੇਤੁਪਚ੍ਚਯੋ ਆਰਮ੍ਮਣਪਚ੍ਚਯੋ’’ਤਿ ਆਦਿਨਾ ਚਤੁਵੀਸਤਿਵਿਧੇਨ ਵਿਭਤ੍ਤਂ ਪਟ੍ਠਾਨਪ੍ਪਕਰਣਨ੍ਤਿ ਸਬ੍ਬਂ ਤਂ ਅਭਿਧਮ੍ਮਪਿਟਕਂ ਏਕੇਨੇਵ ਸਜ੍ਝਾਯੇਨ ਪਗੁਣਂ ਕਤ੍ਵਾ ‘‘ਤਿਟ੍ਠਥ ਭਨ੍ਤੇ, ਨ ਪੁਨ ਓਸਾਰੇਥ, ਏਤ੍ਤਕੇਨੇਵਾਹਂ ਸਜ੍ਝਾਯਿਸ੍ਸਾਮੀ’’ਤਿ ਆਹ.

੧੪. ਅਥ ਖੋ ਆਯਸ੍ਮਾ ਨਾਗਸੇਨੋ ਯੇਨ ਕੋਟਿਸਤਾ ਅਰਹਨ੍ਤੋ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਕੋਟਿਸਤੇ ਅਰਹਨ੍ਤੇ ਏਤਦਵੋਚ ‘‘ਅਹਂ ਖੋ ਭਨ੍ਤੇ ‘ਕੁਸਲਾ ਧਮ੍ਮਾ, ਅਕੁਸਲਾ ਧਮ੍ਮਾ, ਅਬ੍ਯਾਕਤਾ ਧਮ੍ਮਾ’ਤਿ ਇਮੇਸੁ ਤੀਸੁ ਪਦੇਸੁ ਪਕ੍ਖਿਪਿਤ੍ਵਾ ਸਬ੍ਬਂ ਤਂ ਅਭਿਧਮ੍ਮਪਿਟਕਂ ਵਿਤ੍ਥਾਰੇਨ ਓਸਾਰੇਸ੍ਸਾਮੀ’’ਤਿ. ‘‘ਸਾਧੁ, ਨਾਗਸੇਨ, ਓਸਾਰੇਹੀ’’ਤਿ.

ਅਥ ਖੋ ਆਯਸ੍ਮਾ ਨਾਗਸੇਨੋ ਸਤ੍ਤ ਮਾਸਾਨਿ ਸਤ੍ਤ ਪਕਰਣਾਨਿ ਵਿਤ੍ਥਾਰੇਨ ਓਸਾਰੇਸਿ, ਪਥਵੀ ਉਨ੍ਨਦਿ, ਦੇਵਤਾ ਸਾਧੁਕਾਰਮਦਂਸੁ, ਬ੍ਰਹ੍ਮਾਨੋ ਅਪ੍ਫੋਟੇਸੁਂ, ਦਿਬ੍ਬਾਨਿ ਚਨ੍ਦਨਚੁਣ੍ਣਾਨਿ ਦਿਬ੍ਬਾਨਿ ਚ ਮਨ੍ਦਾਰਵਪੁਪ੍ਫਾਨਿ ਅਭਿਪ੍ਪਵਸ੍ਸਿਂਸੁ.

੧੫. ਅਥ ਖੋ ਕੋਟਿਸਤਾ ਅਰਹਨ੍ਤੋ ਆਯਸ੍ਮਨ੍ਤਂ ਨਾਗਸੇਨਂ ਪਰਿਪੁਣ੍ਣਵੀਸਤਿਵਸ੍ਸਂ ਰਕ੍ਖਿਤਤਲੇ ਉਪਸਮ੍ਪਾਦੇਸੁਂ. ਉਪਸਮ੍ਪਨ੍ਨੋ ਚ ਪਨਾਯਸ੍ਮਾ ਨਾਗਸੇਨੋ ਤਸ੍ਸਾ ਰਤ੍ਤਿਯਾ ਅਚ੍ਚਯੇਨ ਪੁਬ੍ਬਣ੍ਹਸਮਯਂ ਨਿਵਾਸੇਤ੍ਵਾ ਪਤ੍ਤਚੀਵਰਮਾਦਾਯ ਉਪਜ੍ਝਾਯੇਨ ਸਦ੍ਧਿਂ ਗਾਮਂ ਪਿਣ੍ਡਾਯ ਪਵਿਸਨ੍ਤੋ ਏਵਰੂਪਂ ਪਰਿਵਿਤਕ੍ਕਂ ਉਪ੍ਪਾਦੇਸਿ ‘‘ਤੁਚ੍ਛੋ ਵਤ ਮੇ ਉਪਜ੍ਝਾਯੋ, ਬਾਲੋ ਵਤ ਮੇ ਉਪਜ੍ਝਾਯੋ, ਠਪੇਤ੍ਵਾ ਅਵਸੇਸਂ ਬੁਦ੍ਧਵਚਨਂ ਪਠਮਂ ਮਂ ਅਭਿਧਮ੍ਮੇ ਵਿਨੇਸੀ’’ਤਿ.

ਅਥ ਖੋ ਆਯਸ੍ਮਾ ਰੋਹਣੋ ਆਯਸ੍ਮਤੋ ਨਾਗਸੇਨਸ੍ਸ ਚੇਤਸਾ ਚੇਤੋਪਰਿਵਿਤਕ੍ਕਮਞ੍ਞਾਯ ਆਯਸ੍ਮਨ੍ਤਂ ਨਾਗਸੇਨਂ ਏਤਦਵੋਚ ‘‘ਅਨਨੁਚ੍ਛਵਿਕਂ ਖੋ ਨਾਗਸੇਨ ਪਰਿਵਿਤਕ੍ਕਂ ਵਿਤਕ੍ਕੇਸਿ, ਨ ਖੋ ਪਨੇਤਂ ਨਾਗਸੇਨ ਤਵਾਨੁਚ੍ਛਵਿਕ’’ਨ੍ਤਿ.

ਅਥ ਖੋ ਆਯਸ੍ਮਤੋ ਨਾਗਸੇਨਸ੍ਸ ਏਤਦਹੋਸਿ ‘‘ਅਚ੍ਛਰਿਯਂ ਵਤ ਭੋ, ਅਬ੍ਭੁਤਂ ਵਤ ਭੋ, ਯਤ੍ਰ ਹਿ ਨਾਮ ਮੇ ਉਪਜ੍ਝਾਯੋ ਚੇਤਸਾ ਚੇਤੋਪਰਿਵਿਤਕ੍ਕਂ ਜਾਨਿਸ੍ਸਤਿ, ਪਣ੍ਡਿਤੋ ਵਤ ਮੇ ਉਪਜ੍ਝਾਯੋ, ਯਂਨੂਨਾਹਂ ਉਪਜ੍ਝਾਯਂ ਖਮਾਪੇਯ੍ਯ’’ਨ੍ਤਿ. ਅਥ ਖੋ ਆਯਸ੍ਮਾ ਨਾਗਸੇਨੋ ਆਯਸ੍ਮਨ੍ਤਂ ਰੋਹਣਂ ਏਤਦਵੋਚ ‘‘ਖਮਥ ਮੇ, ਭਨ੍ਤੇ, ਨ ਪੁਨ ਏਵਰੂਪਂ ਵਿਤਕ੍ਕੇਸ੍ਸਾਮੀ’’ਤਿ.

ਅਥ ਖੋ ਆਯਸ੍ਮਾ ਰੋਹਣੋ ਆਯਸ੍ਮਨ੍ਤਂ ਨਾਗਸੇਨਂ ਏਤਦਵੋਚ ‘‘ਨ ਖੋ ਤ੍ਯਾਹਂ ਨਾਗਸੇਨ ਏਤ੍ਤਾਵਤਾ ਖਮਾਮਿ, ਅਤ੍ਥਿ ਖੋ ਨਾਗਸੇਨ ਸਾਗਲਂ ਨਾਮ ਨਗਰਂ, ਤਤ੍ਥ ਮਿਲਿਨ੍ਦੋ ਨਾਮ ਰਾਜਾ ਰਜ੍ਜਂ ਕਾਰੇਤਿ, ਸੋ ਦਿਟ੍ਠਿਵਾਦੇਨ ਪਞ੍ਹਂ ਪੁਚ੍ਛਿਤ੍ਵਾ ਭਿਕ੍ਖੁਸਙ੍ਘਂ ਵਿਹੇਠੇਤਿ, ਸਚੇ ਤ੍ਵਂ ਤਤ੍ਥ ਗਨ੍ਤ੍ਵਾ ਤਂ ਰਾਜਾਨਂ ਦਮੇਤ੍ਵਾ ਬੁਦ੍ਧਸਾਸਨੇ ਪਸਾਦੇਸ੍ਸਸਿ, ਏਵਾਹਂ ਤਂ ਖਮਿਸ੍ਸਾਮੀ’’ਤਿ.

‘‘ਤਿਟ੍ਠਤੁ, ਭਨ੍ਤੇ, ਏਕੋ ਮਿਲਿਨ੍ਦੋ ਰਾਜਾ; ਸਚੇ, ਭਨ੍ਤੇ, ਸਕਲਜਮ੍ਬੁਦੀਪੇ ਸਬ੍ਬੇ ਰਾਜਾਨੋ ਆਗਨ੍ਤ੍ਵਾ ਮਂ ਪਞ੍ਹਂ ਪੁਚ੍ਛੇਯ੍ਯੁਂ, ਸਬ੍ਬਂ ਤਂ ਵਿਸਜ੍ਜੇਤ੍ਵਾ ਸਮ੍ਪਦਾਲੇਸ੍ਸਾਮਿ, ‘ਖਮਥ ਮੇ ਭਨ੍ਤੇ’ਤਿ ਵਤ੍ਵਾ, ‘ਨ ਖਮਾਮੀ’ਤਿ ਵੁਤ੍ਤੇ ‘ਤੇਨ ਹਿ, ਭਨ੍ਤੇ, ਇਮਂ ਤੇਮਾਸਂ ਕਸ੍ਸ ਸਨ੍ਤਿਕੇ ਵਸਿਸ੍ਸਾਮੀ’ਤਿ ਆਹ’’. ਅਯਂ ਖੋ, ਨਾਗਸੇਨ, ਆਯਸ੍ਮਾ ਅਸ੍ਸਗੁਤ੍ਤੋ ਵਤ੍ਤਨਿਯੇ ਸੇਨਾਸਨੇ ਵਿਹਰਤਿ, ਗਚ੍ਛ ਤ੍ਵਂ, ਨਾਗਸੇਨ, ਯੇਨਾਯਸ੍ਮਾ ਅਸ੍ਸਗੁਤ੍ਤੋ ਤੇਨੁਪਸਙ੍ਕਮ, ਉਪਸਙ੍ਕਮਿਤ੍ਵਾ ਮਮ ਵਚਨੇਨ ਆਯਸ੍ਮਤੋ ਅਸ੍ਸਗੁਤ੍ਤਸ੍ਸ ਪਾਦੇ ਸਿਰਸਾ ਵਨ੍ਦ, ਏਵਞ੍ਚ ਨਂ ਵਦੇਹਿ ‘ਉਪਜ੍ਝਾਯੋ ਮੇ, ਭਨ੍ਤੇ, ਤੁਮ੍ਹਾਕਂ ਪਾਦੇ ਸਿਰਸਾ ਵਨ੍ਦਤਿ, ਅਪ੍ਪਾਬਾਧਂ ਅਪ੍ਪਾਤਙ੍ਕਂ ਲਹੁਟ੍ਠਾਨਂ ਬਲਂ ਫਾਸੁਵਿਹਾਰਂ ਪੁਚ੍ਛਤਿ, ਉਪਜ੍ਝਾਯੋ ਮੇ, ਭਨ੍ਤੇ, ਇਮਂ ਤੇਮਾਸਂ ਤੁਮ੍ਹਾਕਂ ਸਨ੍ਤਿਕੇ ਵਸਿਤੁਂ ਮਂ ਪਹਿਣੀ’ਤਿ, ‘ਕੋਨਾਮੋ ਤੇ ਉਪਜ੍ਝਾਯੋ’ਤਿ ਚ ਵੁਤ੍ਤੇ ‘ਰੋਹਣਤ੍ਥੇਰੋ ਨਾਮ ਭਨ੍ਤੇ’’ਤਿ ਵਦੇਯ੍ਯਾਸਿ, ‘ਅਹਂ ਕੋਨਾਮੋ’ਤਿ ਵੁਤ੍ਤੇ ਏਵਂ ਵਦੇਯ੍ਯਾਸਿ ‘ਮਮ ਉਪਜ੍ਝਾਯੋ, ਭਨ੍ਤੇ, ਤੁਮ੍ਹਾਕਂ ਨਾਮਂ ਜਾਨਾਤੀ’’’ਤਿ. ‘‘ਏਵਂ ਭਨ੍ਤੇ’’ਤਿ ਖੋ ਆਯਸ੍ਮਾ ਨਾਗਸੇਨੋ ਆਯਸ੍ਮਨ੍ਤਂ ਰੋਹਣਂ ਅਭਿਵਾਦੇਤ੍ਵਾ ਪਦਕ੍ਖਿਣਂ ਕਤ੍ਵਾ ਪਤ੍ਤਚੀਵਰਮਾਦਾਯ ਅਨੁਪੁਬ੍ਬੇਨ ਚਾਰਿਕਂ ਚਰਮਾਨੋ ਯੇਨ ਵਤ੍ਤਨਿਯਂ ਸੇਨਾਸਨਂ, ਯੇਨਾਯਸ੍ਮਾ ਅਸ੍ਸਗੁਤ੍ਤੋ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਆਯਸ੍ਮਨ੍ਤਂ ਅਸ੍ਸਗੁਤ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਅਟ੍ਠਾਸਿ, ਏਕਮਨ੍ਤਂ ਠਿਤੋ ਖੋ ਆਯਸ੍ਮਾ ਨਾਗਸੇਨੋ ਆਯਸ੍ਮਨ੍ਤਂ ਅਸ੍ਸਗੁਤ੍ਤਂ ਏਤਦਵੋਚ ‘‘ਉਪਜ੍ਝਾਯੋ ਮੇ, ਭਨ੍ਤੇ, ਤੁਮ੍ਹਾਕਂ ਪਾਦੇ ਸਿਰਸਾ ਵਨ੍ਦਤਿ, ਏਵਞ੍ਚ ਵਦੇਤਿ ਅਪ੍ਪਾਬਾਧਂ ਅਪ੍ਪਾਤਙ੍ਕਂ ਲਹੁਟ੍ਠਾਨਂ ਬਲਂ ਫਾਸੁਵਿਹਾਰਂ ਪੁਚ੍ਛਤਿ, ਉਪਜ੍ਝਾਯੋ ਮੇ, ਭਨ੍ਤੇ, ਇਮਂ ਤੇਮਾਸਂ ਤੁਮ੍ਹਾਕਂ ਸਨ੍ਤਿਕੇ ਵਸਿਤੁਂ ਮਂ ਪਹਿਣੀ’’ਤਿ.

ਅਥ ਖੋ ਆਯਸ੍ਮਾ ਅਸ੍ਸਗੁਤ੍ਤੋ ਆਯਸ੍ਮਨ੍ਤਂ ਨਾਗਸੇਨਂ ਏਤਦਵੋਚ ‘‘ਤ੍ਵਂ ਕਿਨ੍ਨਾਮੋਸੀ’’ਤਿ. ‘‘ਅਹਂ, ਭਨ੍ਤੇ, ਨਾਗਸੇਨੋ ਨਾਮਾ’’ਤਿ. ‘‘ਕੋਨਾਮੋ ਤੇ ਉਪਜ੍ਝਾਯੋ’’ਤਿ? ‘‘ਉਪਜ੍ਝਾਯੋ ਮੇ, ਭਨ੍ਤੇ, ਰੋਹਣੋ ਨਾਮਾ’’ਤਿ. ‘‘ਅਹਂ ਕੋਨਾਮੋ’’ਤਿ. ‘‘ਉਪਜ੍ਝਾਯੋ ਮੇ, ਭਨ੍ਤੇ, ਤੁਮ੍ਹਾਕਂ ਨਾਮਂ ਜਾਨਾਤੀ’’ਤਿ.

‘‘ਸਾਧੁ, ਨਾਗਸੇਨ, ਪਤ੍ਤਚੀਵਰਂ ਪਟਿਸਾਮੇਹੀ’’ਤਿ. ‘‘ਸਾਧੁ ਭਨ੍ਤੇ’’ਤਿ ਪਤ੍ਤਚੀਵਰਂ ਪਟਿਸਾਮੇਤ੍ਵਾ ਪੁਨਦਿਵਸੇ ਪਰਿਵੇਣਂ ਸਮ੍ਮਜ੍ਜਿਤ੍ਵਾ ਮੁਖੋਦਕਂ ਦਨ੍ਤਪੋਣਂ ਉਪਟ੍ਠਪੇਸਿ. ਥੇਰੋ ਸਮ੍ਮਜ੍ਜਿਤਟ੍ਠਾਨਂ ਪਟਿਸਮ੍ਮਜ੍ਜਿ, ਤਂ ਉਦਕਂ ਛਡ੍ਡੇਤ੍ਵਾ ਅਞ੍ਞਂ ਉਦਕਂ ਆਹਰਿ, ਤਞ੍ਚ ਦਨ੍ਤਕਟ੍ਠਂ ਅਪਨੇਤ੍ਵਾ ਅਞ੍ਞਂ ਦਨ੍ਤਕਟ੍ਠਂ ਗਣ੍ਹਿ, ਨ ਆਲਾਪਸਲ੍ਲਾਪਂ ਅਕਾਸਿ, ਏਵਂ ਸਤ੍ਤ ਦਿਵਸਾਨਿ ਕਤ੍ਵਾ ਸਤ੍ਤਮੇ ਦਿਵਸੇ ਪੁਨ ਪੁਚ੍ਛਿਤ੍ਵਾ ਪੁਨ ਤੇਨ ਤਥੇਵ ਵੁਤ੍ਤੇ ਵਸ੍ਸਵਾਸਂ ਅਨੁਜਾਨਿ.

੧੬. ਤੇਨ ਖੋ ਪਨ ਸਮਯੇਨ ਏਕਾ ਮਹਾਉਪਾਸਿਕਾ ਆਯਸ੍ਮਨ੍ਤਂ ਅਸ੍ਸਗੁਤ੍ਤਂ ਤਿਂਸਮਤ੍ਤਾਨਿ ਵਸ੍ਸਾਨਿ ਉਪਟ੍ਠਾਸਿ. ਅਥ ਖੋ ਸਾ ਮਹਾਉਪਾਸਿਕਾ ਤੇਮਾਸਚ੍ਚਯੇਨ ਯੇਨਾਯਸ੍ਮਾ ਅਸ੍ਸਗੁਤ੍ਤੋ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਆਯਸ੍ਮਨ੍ਤਂ ਅਸ੍ਸਗੁਤ੍ਤਂ ਏਤਦਵੋਚ ‘‘ਅਤ੍ਥਿ ਨੁ ਖੋ, ਤਾਤ, ਤੁਮ੍ਹਾਕਂ ਸਨ੍ਤਿਕੇ ਅਞ੍ਞੋ ਭਿਕ੍ਖੂ’’ਤਿ. ‘‘ਅਤ੍ਥਿ, ਮਹਾਉਪਾਸਿਕੇ, ਅਮ੍ਹਾਕਂ ਸਨ੍ਤਿਕੇ ਨਾਗਸੇਨੋ ਨਾਮ ਭਿਕ੍ਖੂ’’ਤਿ. ‘‘ਤੇਨ ਹਿ, ਤਾਤ ਅਸ੍ਸਗੁਤ੍ਤ, ਅਧਿਵਾਸੇਹਿ ਨਾਗਸੇਨੇਨ ਸਦ੍ਧਿਂ ਸ੍ਵਾਤਨਾਯ ਭਤ੍ਤ’’ਨ੍ਤਿ. ਅਧਿਵਾਸੇਸਿ ਖੋ ਆਯਸ੍ਮਾ ਅਸ੍ਸਗੁਤ੍ਤੋ ਤੁਣ੍ਹੀਭਾਵੇਨ.

ਅਥ ਖੋ ਆਯਸ੍ਮਾ ਅਸ੍ਸਗੁਤ੍ਤੋ ਤਸ੍ਸਾ ਰਤ੍ਤਿਯਾ ਅਚ੍ਚਯੇਨ ਪੁਬ੍ਬਣ੍ਹਸਮਯਂ ਨਿਵਾਸੇਤ੍ਵਾ ਪਤ੍ਤਚੀਵਰਮਾਦਾਯ ਆਯਸ੍ਮਤਾ ਨਾਗਸੇਨੇਨ ਸਦ੍ਧਿਂ ਪਚ੍ਛਾਸਮਣੇਨ ਯੇਨ ਮਹਾਉਪਾਸਿਕਾਯ ਨਿਵੇਸਨਂ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਪਞ੍ਞਤ੍ਤੇ ਆਸਨੇ ਨਿਸੀਦਿ. ਅਥ ਖੋ ਸਾ ਮਹਾਉਪਾਸਿਕਾ ਆਯਸ੍ਮਨ੍ਤਂ ਅਸ੍ਸਗੁਤ੍ਤਂ ਆਯਸ੍ਮਨ੍ਤਞ੍ਚ ਨਾਗਸੇਨਂ ਪਣੀਤੇਨ ਖਾਦਨੀਯੇਨ ਭੋਜਨੀਯੇਨ ਸਹਤ੍ਥਾ ਸਨ੍ਤਪ੍ਪੇਸਿ ਸਮ੍ਪਵਾਰੇਸਿ. ਅਥ ਖੋ ਆਯਸ੍ਮਾ ਅਸ੍ਸਗੁਤ੍ਤੋ ਭੁਤ੍ਤਾਵਿਂ ਓਨੀਤਪਤ੍ਤਪਾਣਿਂ ਆਯਸ੍ਮਨ੍ਤਂ ਨਾਗਸੇਨਂ ਏਤਦਵੋਚ ‘‘ਤ੍ਵਂ, ਨਾਗਸੇਨ, ਮਹਾਉਪਾਸਿਕਾਯ ਅਨੁਮੋਦਨਂ ਕਰੋਹੀ’’ਤਿ ਇਦਂ ਵਤ੍ਵਾ ਉਟ੍ਠਾਯਾਸਨਾ ਪਕ੍ਕਾਮਿ.

ਅਥ ਖੋ ਸਾ ਮਹਾਉਪਾਸਿਕਾ ਆਯਸ੍ਮਨ੍ਤਂ ਨਾਗਸੇਨਂ ਏਤਦਵੋਚ ‘‘ਮਹਲ੍ਲਿਕਾ ਖੋਹਂ, ਤਾਤ ਨਾਗਸੇਨ, ਗਮ੍ਭੀਰਾਯ ਧਮ੍ਮਕਥਾਯ ਮਯ੍ਹਂ ਅਨੁਮੋਦਨਂ ਕਰੋਹੀ’’ਤਿ. ਅਥ ਖੋ ਆਯਸ੍ਮਾ ਨਾਗਸੇਨੋ ਤਸ੍ਸਾ ਮਹਾਉਪਾਸਿਕਾਯ ਗਮ੍ਭੀਰਾਯ ਧਮ੍ਮਕਥਾਯ ਲੋਕੁਤ੍ਤਰਾਯ ਸੁਞ੍ਞਤਪ੍ਪਟਿਸਂਯੁਤ੍ਤਾਯ ਅਨੁਮੋਦਨਂ ਅਕਾਸਿ. ਅਥ ਖੋ ਤਸ੍ਸਾ ਮਹਾਉਪਾਸਿਕਾਯ ਤਸ੍ਮਿਂਯੇਵ ਆਸਨੇ ਵਿਰਜਂ ਵੀਤਮਲਂ ਧਮ੍ਮਚਕ੍ਖੁਂ ਉਦਪਾਦਿ ‘‘ਯਂ ਕਿਞ੍ਚਿ ਸਮੁਦਯਧਮ੍ਮਂ, ਸਬ੍ਬਂ ਤਂ ਨਿਰੋਧਧਮ੍ਮ’’ਨ੍ਤਿ. ਆਯਸ੍ਮਾਪਿ ਖੋ ਨਾਗਸੇਨੋ ਤਸ੍ਸਾ ਮਹਾਉਪਾਸਿਕਾਯ ਅਨੁਮੋਦਨਂ ਕਤ੍ਵਾ ਅਤ੍ਤਨਾ ਦੇਸਿਤਂ ਧਮ੍ਮਂ ਪਚ੍ਚਵੇਕ੍ਖਨ੍ਤੋ ਵਿਪਸ੍ਸਨਂ ਪਟ੍ਠਪੇਤ੍ਵਾ ਤਸ੍ਮਿਂਯੇਵ ਆਸਨੇ ਨਿਸਿਨ੍ਨੋ ਸੋਤਾਪਤ੍ਤਿਫਲੇ ਪਤਿਟ੍ਠਾਸਿ.

ਅਥ ਖੋ ਆਯਸ੍ਮਾ ਅਸ੍ਸਗੁਤ੍ਤੋ ਮਣ੍ਡਲਮਾਲ਼ੇ ਨਿਸਿਨ੍ਨੋ ਦ੍ਵਿਨ੍ਨਮ੍ਪਿ ਧਮ੍ਮਚਕ੍ਖੁਪਟਿਲਾਭਂ ਞਤ੍ਵਾ ਸਾਧੁਕਾਰਂ ਪਵਤ੍ਤੇਸਿ ‘‘ਸਾਧੁ ਸਾਧੁ ਨਾਗਸੇਨ, ਏਕੇਨ ਕਣ੍ਡਪ੍ਪਹਾਰੇਨ ਦ੍ਵੇ ਮਹਾਕਾਯਾ ਪਦਾਲਿਤਾ’’ਤਿ, ਅਨੇਕਾਨਿ ਚ ਦੇਵਤਾਸਹਸ੍ਸਾਨਿ ਸਾਧੁਕਾਰਂ ਪਵਤ੍ਤੇਸੁਂ.

੧੭. ਅਥ ਖੋ ਆਯਸ੍ਮਾ ਨਾਗਸੇਨੋ ਉਟ੍ਠਾਯਾਸਨਾ ਯੇਨਾਯਸ੍ਮਾ ਅਸ੍ਸਗੁਤ੍ਤੋ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਆਯਸ੍ਮਨ੍ਤਂ ਅਸ੍ਸਗੁਤ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ, ਏਕਮਨ੍ਤਂ ਨਿਸਿਨ੍ਨਂ ਖੋ ਆਯਸ੍ਮਨ੍ਤਂ ਨਾਗਸੇਨਂ ਆਯਸ੍ਮਾ ਅਸ੍ਸਗੁਤ੍ਤੋ ਏਤਦਵੋਚ ‘‘ਗਚ੍ਛ, ਤ੍ਵਂ ਨਾਗਸੇਨ, ਪਾਟਲਿਪੁਤ੍ਤਂ, ਪਾਟਲਿਪੁਤ੍ਤਨਗਰੇ ਅਸੋਕਾਰਾਮੇ ਆਯਸ੍ਮਾ ਧਮ੍ਮਰਕ੍ਖਿਤੋ ਪਟਿਵਸਤਿ, ਤਸ੍ਸ ਸਨ੍ਤਿਕੇ ਬੁਦ੍ਧਵਚਨਂ ਪਰਿਯਾਪੁਣਾਹੀ’’ਤਿ. ‘‘ਕੀਵ ਦੂਰੋ, ਭਨ੍ਤੇ, ਇਤੋ ਪਾਟਲਿਪੁਤ੍ਤਨਗਰ’’ਨ੍ਤਿ? ‘‘ਯੋਜਨਸਤਾਨਿ ਖੋ ਨਾਗਸੇਨਾ’’ਤਿ. ‘‘ਦੂਰੋ ਖੋ, ਭਨ੍ਤੇ, ਮਗ੍ਗੋ. ਅਨ੍ਤਰਾਮਗ੍ਗੇ ਭਿਕ੍ਖਾ ਦੁਲ੍ਲਭਾ, ਕਥਾਹਂ ਗਮਿਸ੍ਸਾਮੀ’’ਤਿ? ‘‘ਗਚ੍ਛ, ਤ੍ਵਂ ਨਾਗਸੇਨ, ਅਨ੍ਤਰਾਮਗ੍ਗੇ ਪਿਣ੍ਡਪਾਤਂ ਲਭਿਸ੍ਸਸਿ ਸਾਲੀਨਂ ਓਦਨਂ ਵਿਗਤਕਾਲ਼ਕਂ ਅਨੇਕਸੂਪਂ ਅਨੇਕਬ੍ਯਞ੍ਜਨ’’ਨ੍ਤਿ. ‘‘ਏਵਂ ਭਨ੍ਤੇ’’ਤਿ ਖੋ ਆਯਸ੍ਮਾ ਨਾਗਸੇਨੋ ਆਯਸ੍ਮਨ੍ਤਂ ਅਸ੍ਸਗੁਤ੍ਤਂ ਅਭਿਵਾਦੇਤ੍ਵਾ ਪਦਕ੍ਖਿਣਂ ਕਤ੍ਵਾ ਪਤ੍ਤਚੀਵਰਮਾਦਾਯ ਯੇਨ ਪਾਟਲਿਪੁਤ੍ਤਂ ਤੇਨ ਚਾਰਿਕਂ ਪਕ੍ਕਾਮਿ.

੧੮. ਤੇਨ ਖੋ ਪਨ ਸਮਯੇਨ ਪਾਟਲਿਪੁਤ੍ਤਕੋ ਸੇਟ੍ਠਿ ਪਞ੍ਚਹਿ ਸਕਟਸਤੇਹਿ ਪਾਟਲਿਪੁਤ੍ਤਗਾਮਿਮਗ੍ਗਂ ਪਟਿਪਨ੍ਨੋ ਹੋਤਿ. ਅਦ੍ਦਸਾ ਖੋ ਪਾਟਲਿਪੁਤ੍ਤਕੋ ਸੇਟ੍ਠਿ ਆਯਸ੍ਮਨ੍ਤਂ ਨਾਗਸੇਨਂ ਦੂਰਤੋਵ ਆਗਚ੍ਛਨ੍ਤਂ, ਦਿਸ੍ਵਾਨ ਯੇਨਾਯਸ੍ਮਾ ਨਾਗਸੇਨੋ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਆਯਸ੍ਮਨ੍ਤਂ ਨਾਗਸੇਨਂ ਅਭਿਵਾਦੇਤ੍ਵਾ ‘‘ਕੁਹਿਂ ਗਚ੍ਛਸਿ ਤਾਤਾ’’ਤਿ ਆਹ. ‘‘ਪਾਟਲਿਪੁਤ੍ਤਂ ਗਹਪਤੀ’’ਤਿ. ‘‘ਸਾਧੁ ਤਾਤ, ਮਯਮ੍ਪਿ ਪਾਟਲਿਪੁਤ੍ਤਂ ਗਚ੍ਛਾਮ. ਅਮ੍ਹੇਹਿ ਸਦ੍ਧਿਂ ਸੁਖਂ ਗਚ੍ਛਥਾ’’ਤਿ.

ਅਥ ਖੋ ਪਾਟਲਿਪੁਤ੍ਤਕੋ ਸੇਟ੍ਠਿ ਆਯਸ੍ਮਤੋ ਨਾਗਸੇਨਸ੍ਸ ਇਰਿਯਾਪਥੇ ਪਸੀਦਿਤ੍ਵਾ ਆਯਸ੍ਮਨ੍ਤਂ ਨਾਗਸੇਨਂ ਪਣੀਤੇਨ ਖਾਦਨੀਯੇਨ ਭੋਜਨੀਯੇਨ ਸਹਤ੍ਥਾ ਸਨ੍ਤਪ੍ਪੇਤ੍ਵਾ ਸਮ੍ਪਵਾਰੇਤ੍ਵਾ ਆਯਸ੍ਮਨ੍ਤਂ ਨਾਗਸੇਨਂ ਭੁਤ੍ਤਾਵਿਂ ਓਨੀਤਪਤ੍ਤਪਾਣਿਂ ਅਞ੍ਞਤਰਂ ਨੀਚਂ ਆਸਨਂ ਗਹੇਤ੍ਵਾ ਏਕਮਨ੍ਤਂ ਨਿਸੀਦਿ, ਏਕਮਨ੍ਤਂ ਨਿਸਿਨ੍ਨੋ ਖੋ ਪਾਟਲਿਪੁਤ੍ਤਕੋ ਸੇਟ੍ਠਿ ਆਯਸ੍ਮਨ੍ਤਂ ਨਾਗਸੇਨਂ ਏਤਦਵੋਚ ‘‘ਕਿਨ੍ਨਾਮੋਸਿ ਤ੍ਵਂ ਤਾਤਾ’’ਤਿ. ‘‘ਅਹਂ, ਗਹਪਤਿ, ਨਾਗਸੇਨੋ ਨਾਮਾ’’ਤਿ. ‘‘ਜਾਨਾਸਿ ਖੋ, ਤ੍ਵਂ ਤਾਤ, ਬੁਦ੍ਧਵਚਨਂ ਨਾਮਾ’’ਤਿ? ‘‘ਜਾਨਾਮਿ ਖੋਹਂ, ਗਹਪਤਿ, ਅਭਿਧਮ੍ਮਪਦਾਨੀ’’ਤਿ. ‘‘ਲਾਭਾ ਨੋ ਤਾਤ, ਸੁਲਦ੍ਧਂ ਨੋ ਤਾਤ, ਅਹਮ੍ਪਿ ਖੋ, ਤਾਤ, ਆਭਿਧਮ੍ਮਿਕੋ, ਤ੍ਵਮ੍ਪਿ ਆਭਿਧਮ੍ਮਿਕੋ, ਭਣ, ਤਾਤ, ਅਭਿਧਮ੍ਮਪਦਾਨੀ’’ਤਿ. ਅਥ ਖੋ ਆਯਸ੍ਮਾ ਨਾਗਸੇਨੋ ਪਾਟਲਿਪੁਤ੍ਤਕਸ੍ਸ ਸੇਟ੍ਠਿਸ੍ਸ ਅਭਿਧਮ੍ਮਂ ਦੇਸੇਸਿ, ਦੇਸੇਨ੍ਤੇ ਯੇਵ ਪਾਟਲਿਪੁਤ੍ਤਕਸ੍ਸ ਸੇਟ੍ਠਿਸ੍ਸ ਵਿਰਜਂ ਵੀਤਮਲਂ ਧਮ੍ਮਚਕ੍ਖੁਂ ਉਦਪਾਦਿ ‘‘ਯਂ ਕਿਞ੍ਚਿ ਸਮੁਦਯਧਮ੍ਮਂ, ਸਬ੍ਬਂ ਤਂ ਨਿਰੋਧਧਮ੍ਮ’’ਨ੍ਤਿ.

ਅਥ ਖੋ ਪਾਟਲਿਪੁਤ੍ਤਕੋ ਸੇਟ੍ਠਿ ਪਞ੍ਚਮਤ੍ਤਾਨਿ ਸਕਟਸਤਾਨਿ ਪੁਰਤੋ ਉਯ੍ਯੋਜੇਤ੍ਵਾ ਸਯਂ ਪਚ੍ਛਤੋ ਗਚ੍ਛਨ੍ਤੋ ਪਾਟਲਿਪੁਤ੍ਤਸ੍ਸ ਅਵਿਦੂਰੇ ਦ੍ਵੇਧਾਪਥੇ ਠਤ੍ਵਾ ਆਯਸ੍ਮਨ੍ਤਂ ਨਾਗਸੇਨਂ ਏਤਦਵੋਚ ‘‘ਅਯਂ ਖੋ, ਤਾਤ ਨਾਗਸੇਨ, ਅਸੋਕਾਰਾਮਸ੍ਸ ਮਗ੍ਗੋ, ਇਦਂ ਖੋ, ਤਾਤ, ਅਮ੍ਹਾਕਂ ਕਮ੍ਬਲਰਤਨਂ ਸੋਲ਼ਸਹਤ੍ਥਂ ਆਯਾਮੇਨ, ਅਟ੍ਠਹਤ੍ਥਂ ਵਿਤ੍ਥਾਰੇਨ, ਪਟਿਗ੍ਗਣ੍ਹਾਹਿ ਖੋ, ਤਾਤ, ਇਦਂ ਕਮ੍ਬਲਰਤਨਂ ਅਨੁਕਮ੍ਪਂ ਉਪਾਦਾਯਾ’’ਤਿ. ਪਟਿਗ੍ਗਹੇਸਿ ਖੋ ਆਯਸ੍ਮਾ ਨਾਗਸੇਨੋ ਤਂ ਕਮ੍ਬਲਰਤਨਂ ਅਨੁਕਮ੍ਪਂ ਉਪਾਦਾਯ. ਅਥ ਖੋ ਪਾਟਲਿਪੁਤ੍ਤਕੋ ਸੇਟ੍ਠਿ ਅਤ੍ਤਮਨੋ ਉਦਗ੍ਗੋ ਪਮੁਦਿਤੋ ਪੀਤਿਸੋਮਨਸ੍ਸਜਾਤੋ ਆਯਸ੍ਮਨ੍ਤਂ ਨਾਗਸੇਨਂ ਅਭਿਵਾਦੇਤ੍ਵਾ ਪਦਕ੍ਖਿਣਂ ਕਤ੍ਵਾ ਪਕ੍ਕਾਮਿ.

੧੯. ਅਥ ਖੋ ਆਯਸ੍ਮਾ ਨਾਗਸੇਨੋ ਯੇਨ ਅਸੋਕਾਰਾਮੋ ਯੇਨਾਯਸ੍ਮਾ ਧਮ੍ਮਰਕ੍ਖਿਤੋ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਆਯਸ੍ਮਨ੍ਤਂ ਧਮ੍ਮਰਕ੍ਖਿਤਂ ਅਭਿਵਾਦੇਤ੍ਵਾ ਅਤ੍ਤਨੋ ਆਗਤਕਾਰਣਂ ਕਥੇਤ੍ਵਾ ਆਯਸ੍ਮਤੋ ਧਮ੍ਮਰਕ੍ਖਿਤਸ੍ਸ ਸਨ੍ਤਿਕੇ ਤੇਪਿਟਕਂ ਬੁਦ੍ਧਵਚਨਂ ਏਕੇਨੇਵ ਉਦ੍ਦੇਸੇਨ ਤੀਹਿ ਮਾਸੇਹਿ ਬ੍ਯਞ੍ਜਨਸੋ ਪਰਿਯਾਪੁਣਿਤ੍ਵਾ ਪੁਨ ਤੀਹਿ ਮਾਸੇਹਿ ਅਤ੍ਥਸੋ ਮਨਸਾਕਾਸਿ.

ਅਥ ਖੋ ਆਯਸ੍ਮਾ ਧਮ੍ਮਰਕ੍ਖਿਤੋ ਆਯਸ੍ਮਨ੍ਤਂ ਨਾਗਸੇਨਂ ਏਤਦਵੋਚ ‘‘ਸੇਯ੍ਯਥਾਪਿ, ਨਾਗਸੇਨ, ਗੋਪਾਲਕੋ ਗਾਵੋ ਰਕ੍ਖਤਿ, ਅਞ੍ਞੇ ਗੋਰਸਂ ਪਰਿਭੁਞ੍ਜਨ੍ਤਿ. ਏਵਮੇਵ ਖੋ, ਤ੍ਵਂ ਨਾਗਸੇਨ, ਤੇਪਿਟਕਂ ਬੁਦ੍ਧਵਚਨਂ ਧਾਰੇਨ੍ਤੋਪਿ ਨ ਭਾਗੀ ਸਾਮਞ੍ਞਸ੍ਸਾ’’ਤਿ. ‘‘ਹੋਤੁ, ਭਨ੍ਤੇ, ਅਲਂ ਏਤ੍ਤਕੇਨਾ’’ਤਿ. ਤੇਨੇਵ ਦਿਵਸਭਾਗੇਨ ਤੇਨ ਰਤ੍ਤਿਭਾਗੇਨ ਸਹ ਪਟਿਸਮ੍ਭਿਦਾਹਿ ਅਰਹਤ੍ਤਂ ਪਾਪੁਣਿ, ਸਹ ਸਚ੍ਚਪ੍ਪਟਿਵੇਧੇਨ ਆਯਸ੍ਮਤੋ ਨਾਗਸੇਨਸ੍ਸ ਸਬ੍ਬੇ ਦੇਵਾ ਸਾਧੁਕਾਰਮਦਂਸੁ, ਪਥਵੀ ਉਨ੍ਨਦਿ, ਬ੍ਰਹ੍ਮਾਨੋ ਅਪ੍ਫੋਟੇਸੁਂ, ਦਿਬ੍ਬਾਨਿ ਚਨ੍ਦਨਚੁਣ੍ਣਾਨਿ ਦਿਬ੍ਬਾਨਿ ਚ ਮਨ੍ਦਾਰਵਪੁਪ੍ਫਾਨਿ ਅਭਿਪ੍ਪਵਸ੍ਸਿਂਸੁ.

੨੦. ਤੇਨ ਖੋ ਪਨ ਸਮਯੇਨ ਕੋਟਿਸਤਾ ਅਰਹਨ੍ਤੋ ਹਿਮਵਨ੍ਤੇ ਪਬ੍ਬਤੇ ਰਕ੍ਖਿਤਤਲੇ ਸਨ੍ਨਿਪਤਿਤ੍ਵਾ ਆਯਸ੍ਮਤੋ ਨਾਗਸੇਨਸ੍ਸ ਸਨ੍ਤਿਕੇ ਦੂਤਂ ਪਾਹੇਸੁਂ ‘‘ਆਗਚ੍ਛਤੁ ਨਾਗਸੇਨੋ, ਦਸ੍ਸਨਕਾਮਾ ਮਯਂ ਨਾਗਸੇਨ’’ਨ੍ਤਿ. ਅਥ ਖੋ ਆਯਸ੍ਮਾ ਨਾਗਸੇਨੋ ਦੂਤਸ੍ਸ ਵਚਨਂ ਸੁਤ੍ਵਾ ਅਸੋਕਾਰਾਮੇ ਅਨ੍ਤਰਹਿਤੋ ਹਿਮਵਨ੍ਤੇ ਪਬ੍ਬਤੇ ਰਕ੍ਖਿਤਤਲੇ ਕੋਟਿਸਤਾਨਂ ਅਰਹਨ੍ਤਾਨਂ ਪੁਰਤੋ ਪਾਤੁਰਹੋਸਿ.

ਅਥ ਖੋ ਕੋਟਿਸਤਾ ਅਰਹਨ੍ਤੋ ਆਯਸ੍ਮਨ੍ਤਂ ਨਾਗਸੇਨਂ ਏਤਦਵੋਚੁਂ ‘‘ਏਸੋ ਖੋ, ਨਾਗਸੇਨ, ਮਿਲਿਨ੍ਦੋ ਰਾਜਾ ਭਿਕ੍ਖੁਸਙ੍ਘਂ ਵਿਹੇਠੇਤਿ ਵਾਦਪ੍ਪਟਿਵਾਦੇਨ ਪਞ੍ਹਪੁਚ੍ਛਾਯ. ਸਾਧੁ, ਨਾਗਸੇਨ, ਗਚ੍ਛ ਤ੍ਵਂ ਮਿਲਿਨ੍ਦਂ ਰਾਜਾਨਂ ਦਮੇਹੀ’’ਤਿ. ‘‘ਤਿਟ੍ਠਤੁ, ਭਨ੍ਤੇ, ਏਕੋ ਮਿਲਿਨ੍ਦੋ ਰਾਜਾ; ਸਚੇ, ਭਨ੍ਤੇ, ਸਕਲਜਮ੍ਬੁਦੀਪੇ ਰਾਜਾਨੋ ਆਗਨ੍ਤ੍ਵਾ ਮਂ ਪਞ੍ਹਂ ਪੁਚ੍ਛੇਯ੍ਯੁਂ, ਸਬ੍ਬਂ ਤਂ ਵਿਸਜ੍ਜੇਤ੍ਵਾ ਸਮ੍ਪਦਾਲੇਸ੍ਸਾਮਿ, ਗਚ੍ਛਥ ਵੋ, ਭਨ੍ਤੇ, ਅਚ੍ਛਮ੍ਭਿਤਾ ਸਾਗਲਨਗਰ’’ਨ੍ਤਿ. ਅਥ ਖੋ ਥੇਰਾ ਭਿਕ੍ਖੂ ਸਾਗਲਨਗਰਂ ਕਾਸਾਵਪ੍ਪਜ੍ਜੋਤਂ ਇਸਿਵਾਤਪਟਿਵਾਤਂ ਅਕਂਸੁ.

੨੧. ਤੇਨ ਖੋ ਪਨ ਸਮਯੇਨ ਆਯਸ੍ਮਾ ਆਯੁਪਾਲੋ ਸਙ੍ਖ੍ਯੇਯ੍ਯਪਰਿਵੇਣੇ ਪਟਿਵਸਤਿ. ਅਥ ਖੋ ਮਿਲਿਨ੍ਦੋ ਰਾਜਾ ਅਮਚ੍ਚੇ ਏਤਦਵੋਚ ‘‘ਰਮਣੀਯਾ ਵਤ ਭੋ ਦੋਸਿਨਾ ਰਤ੍ਤਿ, ਕਨ੍ਨੁ ਖ੍ਵਜ੍ਜ ਸਮਣਂ ਵਾ ਬ੍ਰਾਹ੍ਮਣਂ ਵਾ ਉਪਸਙ੍ਕਮੇਯ੍ਯਾਮ ਸਾਕਚ੍ਛਾਯ ਪਞ੍ਹਪੁਚ੍ਛਨਾਯ, ਕੋ ਮਯਾ ਸਦ੍ਧਿਂ ਸਲ੍ਲਪਿਤੁਂ ਉਸ੍ਸਹਤਿ ਕਙ੍ਖਂ ਪਟਿਵਿਨੇਤੁ’’ਨ੍ਤਿ. ਏਵਂ ਵੁਤ੍ਤੇ ਪਞ੍ਚਸਤਾ ਯੋਨਕਾ ਰਾਜਾਨਂ ਮਿਲਿਨ੍ਦਂ ਏਤਦਵੋਚੁਂ ‘‘ਅਤ੍ਥਿ, ਮਹਾਰਾਜ, ਆਯੁਪਾਲੋ ਨਾਮ ਥੇਰੋ ਤੇਪਿਟਕੋ ਬਹੁਸ੍ਸੁਤੋ ਆਗਤਾਗਮੋ, ਸੋ ਏਤਰਹਿ ਸਙ੍ਖ੍ਯੇਯ੍ਯਪਰਿਵੇਣੇ ਪਟਿਵਸਤਿ; ਗਚ੍ਛ, ਤ੍ਵਂ ਮਹਾਰਾਜ, ਆਯਸ੍ਮਨ੍ਤਂ ਆਯੁਪਾਲਂ ਪਞ੍ਹਂ ਪੁਚ੍ਛਸ੍ਸੂ’’ਤਿ. ‘‘ਤੇਨ ਹਿ, ਭਣੇ, ਭਦਨ੍ਤਸ੍ਸ ਆਰੋਚੇਥਾ’’ਤਿ.

ਅਥ ਖੋ ਨੇਮਿਤ੍ਤਿਕੋ ਆਯਸ੍ਮਤੋ ਆਯੁਪਾਲਸ੍ਸ ਸਨ੍ਤਿਕੇ ਦੂਤਂ ਪਾਹੇਸਿ ‘‘ਰਾਜਾ, ਭਨ੍ਤੇ, ਮਿਲਿਨ੍ਦੋ ਆਯਸ੍ਮਨ੍ਤਂ ਆਯੁਪਾਲਂ ਦਸ੍ਸਨਕਾਮੋ’’ਤਿ. ਆਯਸ੍ਮਾਪਿ ਖੋ ਆਯੁਪਾਲੋ ਏਵਮਾਹ ‘‘ਤੇਨ ਹਿ ਆਗਚ੍ਛਤੂ’’ਤਿ. ਅਥ ਖੋ ਮਿਲਿਨ੍ਦੋ ਰਾਜਾ ਪਞ੍ਚਮਤ੍ਤੇਹਿ ਯੋਨਕਸਤੇਹਿ ਪਰਿਵੁਤੋ ਰਥਵਰਮਾਰੁਯ੍ਹ ਯੇਨ ਸਙ੍ਖ੍ਯੇਯ੍ਯਪਰਿਵੇਣਂ ਯੇਨਾਯਸ੍ਮਾ ਆਯੁਪਾਲੋ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਆਯਸ੍ਮਤਾ ਆਯੁਪਾਲੇਨ ਸਦ੍ਧਿਂ ਸਮ੍ਮੋਦਿ, ਸਮ੍ਮੋਦਨੀਯਂ ਕਥਂ ਸਾਰਣੀਯਂ ਵੀਤਿਸਾਰੇਤ੍ਵਾ ਏਕਮਨ੍ਤਂ ਨਿਸੀਦਿ, ਏਕਮਨ੍ਤਂ ਨਿਸਿਨ੍ਨੋ ਖੋ ਮਿਲਿਨ੍ਦੋ ਰਾਜਾ ਆਯਸ੍ਮਨ੍ਤਂ ਆਯੁਪਾਲਂ ਏਤਦਵੋਚ ‘‘ਕਿਮਤ੍ਥਿਯਾ, ਭਨ੍ਤੇ ਆਯੁਪਾਲ, ਤੁਮ੍ਹਾਕਂ ਪਬ੍ਬਜ੍ਜਾ, ਕੋ ਚ ਤੁਮ੍ਹਾਕਂ ਪਰਮਤ੍ਥੋ’’ਤਿ. ਥੇਰੋ ਆਹ ‘‘ਧਮ੍ਮਚਰਿਯਸਮਚਰਿਯਤ੍ਥਾ ਖੋ, ਮਹਾਰਾਜ, ਪਬ੍ਬਜ੍ਜਾ, ਸਾਮਞ੍ਞਫਲਂ ਖੋ ਪਨ ਅਮ੍ਹਾਕਂ ਪਰਮਤ੍ਥੋ’’ਤਿ. ‘‘ਅਤ੍ਥਿ ਪਨ, ਭਨ੍ਤੇ, ਕੋਚਿ ਗਿਹੀਪਿ ਧਮ੍ਮਚਾਰੀ ਸਮਚਾਰੀ’’ਤਿ? ‘‘ਆਮ, ਮਹਾਰਾਜ, ਅਤ੍ਥਿ ਗਿਹੀਪਿ ਧਮ੍ਮਚਾਰੀ ਸਮਚਾਰੀ, ਭਗਵਤਿ ਖੋ, ਮਹਾਰਾਜ, ਬਾਰਾਣਸਿਯਂ ਇਸਿਪਤਨੇ ਮਿਗਦਾਯੇ ਧਮ੍ਮਚਕ੍ਕਂ ਪਵਤ੍ਤੇਨ੍ਤੇ ਅਟ੍ਠਾਰਸਨ੍ਨਂ ਬ੍ਰਹ੍ਮਕੋਟੀਨਂ ਧਮ੍ਮਾਭਿਸਮਯੋ ਅਹੋਸਿ, ਦੇਵਤਾਨਂ ਪਨ ਧਮ੍ਮਾਭਿਸਮਯੋ ਗਣਨਪਥਂ ਵੀਤਿਵਤ੍ਤੋ, ਸਬ੍ਬੇਤੇ ਗਿਹਿਭੂਤਾ, ਨ ਪਬ੍ਬਜਿਤਾ.

‘‘ਪੁਨ ਚਪਰਂ, ਮਹਾਰਾਜ, ਭਗਵਤਾ ਖੋ ਮਹਾਸਮਯਸੁਤ੍ਤਨ੍ਤੇ ਦੇਸਿਯਮਾਨੇ, ਮਹਾਮਙ੍ਗਲਸੁਤ੍ਤਨ੍ਤੇ ਦੇਸਿਯਮਾਨੇ, ਸਮਚਿਤ੍ਤਪਰਿਯਾਯਸੁਤ੍ਤਨ੍ਤੇ ਦੇਸਿਯਮਾਨੇ, ਰਾਹੁਲੋਵਾਦਸੁਤ੍ਤਨ੍ਤੇ ਦੇਸਿਯਮਾਨੇ, ਪਰਾਭਵਸੁਤ੍ਤਨ੍ਤੇ ਦੇਸਿਯਮਾਨੇ ਗਣਨਪਥਂ ਵੀਤਿਵਤ੍ਤਾਨਂ ਦੇਵਤਾਨਂ ਧਮ੍ਮਾਭਿਸਮਯੋ ਅਹੋਸਿ, ਸਬ੍ਬੇਤੇ ਗਿਹਿਭੂਤਾ, ਨ ਪਬ੍ਬਜਿਤਾ’’ਤਿ. ‘‘ਤੇਨ ਹਿ, ਭਨ੍ਤੇ ਆਯੁਪਾਲ, ਨਿਰਤ੍ਥਿਕਾ ਤੁਮ੍ਹਾਕਂ ਪਬ੍ਬਜ੍ਜਾ, ਪੁਬ੍ਬੇ ਕਤਸ੍ਸ ਪਾਪਕਮ੍ਮਸ੍ਸ ਨਿਸ੍ਸਨ੍ਦੇਨ ਸਮਣਾ ਸਕ੍ਯਪੁਤ੍ਤਿਯਾ ਪਬ੍ਬਜਨ੍ਤਿ ਧੁਤਙ੍ਗਾਨਿ ਚ ਪਰਿਹਰਨ੍ਤਿ. ਯੇ ਖੋ ਤੇ, ਭਨ੍ਤੇ ਆਯੁਪਾਲ, ਭਿਕ੍ਖੂ ਏਕਾਸਨਿਕਾ, ਨੂਨ ਤੇ ਪੁਬ੍ਬੇ ਪਰੇਸਂ ਭੋਗਹਾਰਕਾ ਚੋਰਾ, ਤੇ ਪਰੇਸਂ ਭੋਗੇ ਅਚ੍ਛਿਨ੍ਦਿਤ੍ਵਾ ਤਸ੍ਸ ਕਮ੍ਮਸ੍ਸ ਨਿਸ੍ਸਨ੍ਦੇਨ ਏਤਰਹਿ ਏਕਾਸਨਿਕਾ ਭਵਨ੍ਤਿ, ਨ ਲਭਨ੍ਤਿ ਕਾਲੇਨ ਕਾਲਂ ਪਰਿਭੁਞ੍ਜਿਤੁਂ, ਨਤ੍ਥਿ ਤੇਸਂ ਸੀਲਂ, ਨਤ੍ਥਿ ਤਪੋ, ਨਤ੍ਥਿ ਬ੍ਰਹ੍ਮਚਰਿਯਂ. ਯੇ ਖੋ ਪਨ ਤੇ, ਭਨ੍ਤੇ ਆਯੁਪਾਲ, ਭਿਕ੍ਖੂ ਅਬ੍ਭੋਕਾਸਿਕਾ, ਨੂਨ ਤੇ ਪੁਬ੍ਬੇ ਗਾਮਘਾਤਕਾ ਚੋਰਾ, ਤੇ ਪਰੇਸਂ ਗੇਹਾਨਿ ਵਿਨਾਸੇਤ੍ਵਾ ਤਸ੍ਸ ਕਮ੍ਮਸ੍ਸ ਨਿਸ੍ਸਨ੍ਦੇਨ ਏਤਰਹਿ ਅਬ੍ਭੋਕਾਸਿਕਾ ਭਵਨ੍ਤਿ, ਨ ਲਭਨ੍ਤਿ ਸੇਨਾਸਨਾਨਿ ਪਰਿਭੁਞ੍ਜਿਤੁਂ, ਨਤ੍ਥਿ ਤੇਸਂ ਸੀਲਂ, ਨਤ੍ਥਿ ਤਪੋ, ਨਤ੍ਥਿ ਬ੍ਰਹ੍ਮਚਰਿਯਂ. ਯੇ ਖੋ ਪਨ ਤੇ, ਭਨ੍ਤੇ ਆਯੁਪਾਲ, ਭਿਕ੍ਖੂ ਨੇਸਜ੍ਜਿਕਾ, ਨੂਨ ਤੇ ਪੁਬ੍ਬੇ ਪਨ੍ਥਦੂਸਕਾ ਚੋਰਾ, ਤੇ ਪਰੇਸਂ ਪਥਿਕੇ ਜਨੇ ਗਹੇਤ੍ਵਾ ਬਨ੍ਧਿਤ੍ਵਾ ਨਿਸੀਦਾਪੇਤ੍ਵਾ ਤਸ੍ਸ ਕਮ੍ਮਸ੍ਸ ਨਿਸ੍ਸਨ੍ਦੇਨ ਏਤਰਹਿ ਨੇਸਜ੍ਜਿਕਾ ਭਵਨ੍ਤਿ, ਨ ਲਭਨ੍ਤਿ ਸੇਯ੍ਯਂ ਕਪ੍ਪੇਤੁਂ, ਨਤ੍ਥਿ ਤੇਸਂ ਸੀਲਂ, ਨਤ੍ਥਿ ਤਪੋ, ਨਤ੍ਥਿ ਬ੍ਰਹ੍ਮਚਰਿਯ’’ਨ੍ਤਿ ਆਹ.

ਏਵਂ ਵੁਤ੍ਤੇ ਆਯਸ੍ਮਾ ਆਯੁਪਾਲੋ ਤੁਣ੍ਹੀ ਅਹੋਸਿ, ਨ ਕਿਞ੍ਚਿ ਪਟਿਭਾਸਿ. ਅਥ ਖੋ ਪਞ੍ਚਸਤਾ ਯੋਨਕਾ ਰਾਜਾਨਂ ਮਿਲਿਨ੍ਦਂ ਏਤਦਵੋਚੁਂ ‘‘ਪਣ੍ਡਿਤੋ, ਮਹਾਰਾਜ, ਥੇਰੋ, ਅਪਿ ਚ ਖੋ ਅਵਿਸਾਰਦੋ ਨ ਕਿਞ੍ਚਿ ਪਟਿਭਾਸਤੀ’’ਤਿ.

ਅਥ ਖੋ ਮਿਲਿਨ੍ਦੋ ਰਾਜਾ ਆਯਸ੍ਮਨ੍ਤਂ ਆਯੁਪਾਲਂ ਤੁਣ੍ਹੀਭੂਤਂ ਦਿਸ੍ਵਾ ਅਪ੍ਫੋਟੇਤ੍ਵਾ ਉਕ੍ਕੁਟ੍ਠਿਂ ਕਤ੍ਵਾ ਯੋਨਕੇ ਏਤਦਵੋਚ ‘‘ਤੁਚ੍ਛੋ ਵਤ ਭੋ ਜਮ੍ਬੁਦੀਪੋ, ਪਲਾਪੋ ਵਤ ਭੋ ਜਮ੍ਬੁਦੀਪੋ, ਨਤ੍ਥਿ ਕੋਚਿ ਸਮਣੋ ਵਾ ਬ੍ਰਾਹ੍ਮਣੋ ਵਾ, ਯੋ ਮਯਾ ਸਦ੍ਧਿਂ ਸਲ੍ਲਪਿਤੁਂ ਉਸ੍ਸਹਤਿ ਕਙ੍ਖਂ ਪਟਿਵਿਨੇਤੁ’’ਨ੍ਤਿ.

੨੨. ਅਥ ਖੋ ਮਿਲਿਨ੍ਦਸ੍ਸ ਰਞ੍ਞੋ ਸਬ੍ਬਂ ਤਂ ਪਰਿਸਂ ਅਨੁਵਿਲੋਕੇਨ੍ਤਸ੍ਸ ਅਭੀਤੇ ਅਮਙ੍ਕੁਭੂਤੇ ਯੋਨਕੇ ਦਿਸ੍ਵਾ ਏਤਦਹੋਸਿ ‘‘ਨਿਸ੍ਸਂਸਯਂ ਅਤ੍ਥਿ ਮਞ੍ਞੇ ਅਞ੍ਞੋ ਕੋਚਿ ਪਣ੍ਡਿਤੋ ਭਿਕ੍ਖੁ, ਯੋ ਮਯਾ ਸਦ੍ਧਿਂ ਸਲ੍ਲਪਿਤੁਂ ਉਸ੍ਸਹਤਿ, ਯੇਨਿਮੇ ਯੋਨਕਾ ਨ ਮਙ੍ਕੁਭੂਤਾ’’ਤਿ. ਅਥ ਖੋ ਮਿਲਿਨ੍ਦੋ ਰਾਜਾ ਯੋਨਕੇ ਏਤਦਵੋਚ ‘‘ਅਤ੍ਥਿ, ਭਣੇ, ਅਞ੍ਞੋ ਕੋਚਿ ਪਣ੍ਡਿਤੋ ਭਿਕ੍ਖੁ, ਯੋ ਮਯਾ ਸਦ੍ਧਿਂ ਸਲ੍ਲਪਿਤੁਂ ਉਸ੍ਸਹਤਿ ਕਙ੍ਖਂ ਪਟਿਵਿਨੇਤੁ’’ਨ੍ਤਿ.

ਤੇਨ ਖੋ ਪਨ ਸਮਯੇਨ ਆਯਸ੍ਮਾ ਨਾਗਸੇਨੋ ਸਮਣਗਣਪਰਿਵੁਤੋ ਸਙ੍ਘੀ ਗਣੀ ਗਣਾਚਰਿਯੋ ਞਾਤੋ ਯਸਸ੍ਸੀ ਸਾਧੁਸਮ੍ਮਤੋ ਬਹੁਜਨਸ੍ਸ ਪਣ੍ਡਿਤੋ ਬ੍ਯਤ੍ਤੋ ਮੇਧਾਵੀ ਨਿਪੁਣੋ ਵਿਞ੍ਞੂ ਵਿਭਾਵੀ ਵਿਨੀਤੋ ਵਿਸਾਰਦੋ ਬਹੁਸ੍ਸੁਤੋ ਤੇਪਿਟਕੋ ਵੇਦਗੂ ਪਭਿਨ੍ਨਬੁਦ੍ਧਿਮਾ ਆਗਤਾਗਮੋ ਪਭਿਨ੍ਨਪਟਿਸਮ੍ਭਿਦੋ ਨਵਙ੍ਗਸਤ੍ਥੁਸਾਸਨੇ ਪਰਿਯਤ੍ਤਿਧਰੋ ਪਾਰਮਿਪ੍ਪਤ੍ਤੋ ਜਿਨਵਚਨੇ ਧਮ੍ਮਤ੍ਥਦੇਸਨਾਪਟਿਵੇਧਕੁਸਲੋ ਅਕ੍ਖਯਵਿਚਿਤ੍ਰਪਟਿਭਾਨੋ ਚਿਤ੍ਰਕਥੀ ਕਲ੍ਯਾਣਵਾਕ੍ਕਰਣੋ ਦੁਰਾਸਦੋ ਦੁਪ੍ਪਸਹੋ ਦੁਰੁਤ੍ਤਰੋ ਦੁਰਾਵਰਣੋ ਦੁਨ੍ਨਿਵਾਰਯੋ, ਸਾਗਰੋ ਵਿਯ ਅਕ੍ਖੋਭੋ, ਗਿਰਿਰਾਜਾ ਵਿਯ ਨਿਚ੍ਚਲੋ, ਰਣਞ੍ਜਹੋ ਤਮੋਨੁਦੋ ਪਭਙ੍ਕਰੋ ਮਹਾਕਥੀ ਪਰਗਣਿਗਣਮਥਨੋ ਪਰਤਿਤ੍ਥਿਯਮਦ੍ਦਨੋ ਭਿਕ੍ਖੂਨਂ ਭਿਕ੍ਖੁਨੀਨਂ ਉਪਾਸਕਾਨਂ ਉਪਾਸਿਕਾਨਂ ਰਾਜੂਨਂ ਰਾਜਮਹਾਮਤ੍ਤਾਨਂ ਸਕ੍ਕਤੋ ਗਰੁਕਤੋ ਮਾਨਿਤੋ ਪੂਜਿਤੋ ਅਪਚਿਤੋ ਲਾਭੀ ਚੀਵਰਪਿਣ੍ਡਪਾਤਸੇਨਾਸਨਗਿਲਾਨਪ੍ਪਚ੍ਚਯਭੇਸਜ੍ਜਪਰਿਕ੍ਖਾਰਾਨਂ ਲਾਭਗ੍ਗਯਸਗ੍ਗਪ੍ਪਤ੍ਤੋ ਵੁਦ੍ਧਾਨਂ ਵਿਞ੍ਞੂਨਂ ਸੋਤਾਵਧਾਨੇਨ ਸਮਨ੍ਨਾਗਤਾਨਂ ਸਨ੍ਦਸ੍ਸੇਨ੍ਤੋ ਨਵਙ੍ਗਂ ਜਿਨਸਾਸਨਰਤਨਂ, ਉਪਦਿਸਨ੍ਤੋ ਧਮ੍ਮਮਗ੍ਗਂ, ਧਾਰੇਨ੍ਤੋ ਧਮ੍ਮਪ੍ਪਜ੍ਜੋਤਂ, ਉਸ੍ਸਾਪੇਨ੍ਤੋ ਧਮ੍ਮਯੂਪਂ, ਯਜਨ੍ਤੋ ਧਮ੍ਮਯਾਗਂ, ਪਗ੍ਗਣ੍ਹਨ੍ਤੋ ਧਮ੍ਮਦ੍ਧਜਂ, ਉਸ੍ਸਾਪੇਨ੍ਤੋ ਧਮ੍ਮਕੇਤੁਂ, ਧਮੇਨ੍ਤੋ [ਉਪ੍ਪਲ਼ਾਸੇਨ੍ਤੋ (ਸੀ. ਪੀ.)] ਧਮ੍ਮਸਙ੍ਖਂ, ਆਹਨਨ੍ਤੋ ਧਮ੍ਮਭੇਰਿਂ, ਨਦਨ੍ਤੋ ਸੀਹਨਾਦਂ, ਗਜ੍ਜਨ੍ਤੋ ਇਨ੍ਦਗਜ੍ਜਿਤਂ, ਮਧੁਰਗਿਰਗਜ੍ਜਿਤੇਨ ਞਾਣਵਰਵਿਜ੍ਜੁਜਾਲਪਰਿਵੇਠਿਤੇਨ ਕਰੁਣਾਜਲਭਰਿਤੇਨ ਮਹਤਾ ਧਮ੍ਮਾਮਤਮੇਘੇਨ ਸਕਲਲੋਕਮਭਿਤਪ੍ਪਯਨ੍ਤੋ ਗਾਮਨਿਗਮਰਾਜਧਾਨੀਸੁ ਚਾਰਿਕਂ ਚਰਮਾਨੋ ਅਨੁਪੁਬ੍ਬੇਨ ਸਾਗਲਨਗਰਂ ਅਨੁਪ੍ਪਤ੍ਤੋ ਹੋਤਿ. ਤਤ੍ਰ ਸੁਦਂ ਆਯਸ੍ਮਾ ਨਾਗਸੇਨੋ ਅਸੀਤਿਯਾ ਭਿਕ੍ਖੁਸਹਸ੍ਸੇਹਿ ਸਦ੍ਧਿਂ ਸਙ੍ਖ੍ਯੇਯ੍ਯਪਰਿਵੇਣੇ ਪਟਿਵਸਤਿ. ਤੇਨਾਹੁ ਪੋਰਾਣਾ –

‘‘ਬਹੁਸ੍ਸੁਤੋ ਚਿਤ੍ਰਕਥੀ, ਨਿਪੁਣੋ ਚ ਵਿਸਾਰਦੋ;

ਸਾਮਯਿਕੋ ਚ ਕੁਸਲੋ, ਪਟਿਭਾਨੇ ਚ ਕੋਵਿਦੋ.

‘‘ਤੇ ਚ ਤੇਪਿਟਕਾ ਭਿਕ੍ਖੂ, ਪਞ੍ਚਨੇਕਾਯਿਕਾਪਿ ਚ;

ਚਤੁਨੇਕਾਯਿਕਾ ਚੇਵ, ਨਾਗਸੇਨਂ ਪੁਰਕ੍ਖਰੁਂ.

‘‘ਗਮ੍ਭੀਰਪਞ੍ਞੋ ਮੇਧਾਵੀ, ਮਗ੍ਗਾਮਗ੍ਗਸ੍ਸ ਕੋਵਿਦੋ;

ਉਤ੍ਤਮਤ੍ਥਂ ਅਨੁਪ੍ਪਤ੍ਤੋ, ਨਾਗਸੇਨੋ ਵਿਸਾਰਦੋ.

‘‘ਤੇਹਿ ਭਿਕ੍ਖੂਹਿ ਪਰਿਵੁਤੋ, ਨਿਪੁਣੇਹਿ ਸਚ੍ਚਵਾਦਿਭਿ;

ਚਰਨ੍ਤੋ ਗਾਮਨਿਗਮਂ, ਸਾਗਲਂ ਉਪਸਙ੍ਕਮਿ.

‘‘ਸਙ੍ਖ੍ਯੇਯ੍ਯਪਰਿਵੇਣਸ੍ਮਿਂ, ਨਾਗਸੇਨੋ ਤਦਾ ਵਸਿ;

ਕਥੇਤਿ ਸੋ ਮਨੁਸ੍ਸੇਹਿ, ਪਬ੍ਬਤੇ ਕੇਸਰੀ ਯਥਾ’’ਤਿ.

੨੩. ਅਥ ਖੋ ਦੇਵਮਨ੍ਤਿਯੋ ਰਾਜਾਨਂ ਮਿਲਿਨ੍ਦਂ ਏਤਦਵੋਚ ‘‘ਆਗਮੇਹਿ, ਤ੍ਵਂ ਮਹਾਰਾਜ; ਅਤ੍ਥਿ, ਮਹਾਰਾਜ, ਨਾਗਸੇਨੋ ਨਾਮ ਥੇਰੋ ਪਣ੍ਡਿਤੋ ਬ੍ਯਤ੍ਤੋ ਮੇਧਾਵੀ ਵਿਨੀਤੋ ਵਿਸਾਰਦੋ ਬਹੁਸ੍ਸੁਤੋ ਚਿਤ੍ਰਕਥੀ ਕਲ੍ਯਾਣਪਟਿਭਾਨੋ ਅਤ੍ਥਧਮ੍ਮਨਿਰੁਤ੍ਤਿਪਟਿਭਾਨਪਟਿਸਮ੍ਭਿਦਾਸੁ ਪਾਰਮਿਪ੍ਪਤ੍ਤੋ, ਸੋ ਏਤਰਹਿ ਸਙ੍ਖ੍ਯੇਯ੍ਯਪਰਿਵੇਣੇ ਪਟਿਵਸਤਿ, ਗਚ੍ਛ, ਤ੍ਵਂ ਮਹਾਰਾਜ, ਆਯਸ੍ਮਨ੍ਤਂ ਨਾਗਸੇਨਂ ਪਞ੍ਹਂ ਪੁਚ੍ਛਸ੍ਸੁ, ਉਸ੍ਸਹਤਿ ਸੋ ਤਯਾ ਸਦ੍ਧਿਂ ਸਲ੍ਲਪਿਤੁਂ ਕਙ੍ਖਂ ਪਟਿਵਿਨੇਤੁ’’ਨ੍ਤਿ. ਅਥ ਖੋ ਮਿਲਿਨ੍ਦਸ੍ਸ ਰਞ੍ਞੋ ਸਹਸਾ ‘‘ਨਾਗਸੇਨੋ’’ਤਿ ਸਦ੍ਦਂ ਸੁਤ੍ਵਾਵ ਅਹੁਦੇਵ ਭਯਂ, ਅਹੁਦੇਵ ਛਮ੍ਭਿਤਤ੍ਤਂ, ਅਹੁਦੇਵ ਲੋਮਹਂਸੋ. ਅਥ ਖੋ ਮਿਲਿਨ੍ਦੋ ਰਾਜਾ ਦੇਵਮਨ੍ਤਿਯਂ ਏਤਦਵੋਚ ‘‘ਉਸ੍ਸਹਤਿ ਭੋ ਨਾਗਸੇਨੋ ਭਿਕ੍ਖੁ ਮਯਾ ਸਦ੍ਧਿਂ ਸਲ੍ਲਪਿਤੁ’’ਨ੍ਤਿ? ‘‘ਉਸ੍ਸਹਤਿ, ਮਹਾਰਾਜ, ਅਪਿ ਇਨ੍ਦਯਮਵਰੁਣਕੁਵੇਰਪਜਾਪਤਿ ਸੁਯਾਮ ਸਨ੍ਤੁਸਿਤਲੋਕਪਾਲੇਹਿਪਿ ਪਿਤੁਪਿਤਾਮਹੇਨ ਮਹਾਬ੍ਰਹ੍ਮੁਨਾਪਿ ਸਦ੍ਧਿਂ ਸਲ੍ਲਪਿਤੁਂ, ਕਿਮਙ੍ਗਂ ਪਨ ਮਨੁਸ੍ਸਭੂਤੇਨਾ’’ਤਿ.

ਅਥ ਖੋ ਮਿਲਿਨ੍ਦੋ ਰਾਜਾ ਦੇਵਮਨ੍ਤਿਯਂ ਏਤਦਵੋਚ ‘‘ਤੇਨ ਹਿ, ਤ੍ਵਂ ਦੇਵਮਨ੍ਤਿਯ, ਭਦਨ੍ਤਸ੍ਸ ਸਨ੍ਤਿਕੇ ਦੂਤਂ ਪੇਸੇਹੀ’’ਤਿ. ‘‘ਏਵਂ ਦੇਵਾ’’ਤਿ ਖੋ ਦੇਵਮਨ੍ਤਿਯੋ ਆਯਸ੍ਮਤੋ ਨਾਗਸੇਨਸ੍ਸ ਸਨ੍ਤਿਕੇ ਦੂਤਂ ਪਾਹੇਸਿ ‘‘ਰਾਜਾ, ਭਨ੍ਤੇ, ਮਿਲਿਨ੍ਦੋ ਆਯਸ੍ਮਨ੍ਤਂ ਦਸ੍ਸਨਕਾਮੋ’’ਤਿ. ਆਯਸ੍ਮਾਪਿ ਖੋ ਨਾਗਸੇਨੋ ਏਵਮਾਹ ‘‘ਤੇਨ ਹਿ ਆਗਚ੍ਛਤੂ’’ਤਿ.

ਅਥ ਖੋ ਮਿਲਿਨ੍ਦੋ ਰਾਜਾ ਪਞ੍ਚਮਤ੍ਤੇਹਿ ਯੋਨਕਸਤੇਹਿ ਪਰਿਵੁਤੋ ਰਥਵਰਮਾਰੁਯ੍ਹ ਮਹਤਾ ਬਲਕਾਯੇਨ ਸਦ੍ਧਿਂ ਯੇਨ ਸਙ੍ਖ੍ਯੇਯ੍ਯਪਰਿਵੇਣਂ ਯੇਨਾਯਸ੍ਮਾ ਨਾਗਸੇਨੋ ਤੇਨੁਪਸਙ੍ਕਮਿ. ਤੇਨ ਖੋ ਪਨ ਸਮਯੇਨ ਆਯਸ੍ਮਾ ਨਾਗਸੇਨੋ ਅਸੀਤਿਯਾ ਭਿਕ੍ਖੁਸਹਸ੍ਸੇਹਿ ਸਦ੍ਧਿਂ ਮਣ੍ਡਲਮਾਲ਼ੇ ਨਿਸਿਨ੍ਨੋ ਹੋਤਿ. ਅਦ੍ਦਸਾ ਖੋ ਮਿਲਿਨ੍ਦੋ ਰਾਜਾ ਆਯਸ੍ਮਤੋ ਨਾਗਸੇਨਸ੍ਸ ਪਰਿਸਂ ਦੂਰਤੋਵ, ਦਿਸ੍ਵਾਨ ਦੇਵਮਨ੍ਤਿਯਂ ਏਤਦਵੋਚ ‘‘ਕਸ੍ਸੇਸਾ, ਦੇਵਮਨ੍ਤਿਯ, ਮਹਤੀ ਪਰਿਸਾ’’ਤਿ? ‘‘ਆਯਸ੍ਮਤੋ ਖੋ, ਮਹਾਰਾਜ, ਨਾਗਸੇਨਸ੍ਸ ਪਰਿਸਾ’’ਤਿ.

ਅਥ ਖੋ ਮਿਲਿਨ੍ਦਸ੍ਸ ਰਞ੍ਞੋ ਆਯਸ੍ਮਤੋ ਨਾਗਸੇਨਸ੍ਸ ਪਰਿਸਂ ਦੂਰਤੋਵ ਦਿਸ੍ਵਾ ਅਹੁਦੇਵ ਭਯਂ, ਅਹੁਦੇਵ ਛਮ੍ਭਿਤਤ੍ਤਂ, ਅਹੁਦੇਵ ਲੋਮਹਂਸੋ. ਅਥ ਖੋ ਮਿਲਿਨ੍ਦੋ ਰਾਜਾ ਖਗ੍ਗਪਰਿਵਾਰਿਤੋ ਵਿਯ ਗਜੋ, ਗਰੁਲ਼ਪਰਿਵਾਰਿਤੋ ਵਿਯ ਨਾਗੋ, ਅਜਗਰਪਰਿਵਾਰਿਤੋ ਵਿਯ ਕੋਤ੍ਥੁਕੋ [ਕੋਤ੍ਥੁਕੋ (ਸੀ. ਪੀ.)], ਮਹਿਂਸਪਰਿਵੁਤੋ ਵਿਯ ਅਚ੍ਛੋ, ਨਾਗਾਨੁਬਦ੍ਧੋ ਵਿਯ ਮਣ੍ਡੂਕੋ, ਸਦ੍ਦੂਲਾਨੁਬਦ੍ਧੋ ਵਿਯ ਮਿਗੋ, ਅਹਿਤੁਣ੍ਡਿਕਸਮਾਗਤੋ [ਅਭਿਗੁਣ੍ਠਿਕਸਮਾਗਤੋ (ਸੀ. ਪੀ.)] ਵਿਯ ਪਨ੍ਨਗੋ, ਮਜ੍ਜਾਰਸਮਾਗਤੋ ਵਿਯ ਉਨ੍ਦੂਰੋ, ਭੂਤਵੇਜ੍ਜਸਮਾਗਤੋ ਵਿਯ ਪਿਸਾਚੋ, ਰਾਹੁਮਖਗਤੋ ਵਿਯ ਚਨ੍ਦੋ, ਪਨ੍ਨਗੋ ਵਿਯ ਪੇਲ਼ਨ੍ਤਰਗਤੋ, ਸਕੁਣੋ ਵਿਯ ਪਞ੍ਜਰਨ੍ਤਰਗਤੋ, ਮਚ੍ਛੋ ਵਿਯ ਜਾਲਨ੍ਤਰਗਤੋ, ਵਾਲ਼ਵਨਮਨੁਪ੍ਪਵਿਟ੍ਠੋ ਵਿਯ ਪੁਰਿਸੋ, ਵੇਸ੍ਸਵਣਾਪਰਾਧਿਕੋ ਵਿਯ ਯਕ੍ਖੋ, ਪਰਿਕ੍ਖੀਣਾਯੁਕੋ ਵਿਯ ਦੇਵਪੁਤ੍ਤੋ ਭੀਤੋ ਉਬ੍ਬਿਗ੍ਗੋ ਉਤ੍ਰਸ੍ਤੋ ਸਂਵਿਗ੍ਗੋ ਲੋਮਹਟ੍ਠਜਾਤੋ ਵਿਮਨੋ ਦੁਮ੍ਮਨੋ ਭਨ੍ਤਚਿਤ੍ਤੋ ਵਿਪਰਿਣਤਮਾਨਸੋ ‘‘ਮਾ ਮਂ ਅਯਂ ਪਰਿਜਨੋ ਪਰਿਭਵੀ’’ਤਿ ਸਤਿਂ [ਧੀਤਿਂ (ਸੀ. ਪੀ.)] ਉਪਟ੍ਠਪੇਤ੍ਵਾ ਦੇਵਮਨ੍ਤਿਯਂ ਏਤਦਵੋਚ – ‘‘ਮਾ ਖੋ, ਤ੍ਵਂ ਦੇਵਮਨ੍ਤਿਯ, ਆਯਸ੍ਮਨ੍ਤਂ ਨਾਗਸੇਨਂ ਮਯ੍ਹਂ ਆਚਿਕ੍ਖੇਯ੍ਯਾਸਿ, ਅਨਕ੍ਖਾਤਞ੍ਞੇਵਾਹਂ ਨਾਗਸੇਨਂ ਜਾਨਿਸ੍ਸਾਮੀ’’ਤਿ. ‘‘ਸਾਧੁ, ਮਹਾਰਾਜ, ਤ੍ਵਞ੍ਞੇਵ ਜਾਨਾਹੀ’’ਤਿ.

ਤੇਨ ਖੋ ਪਨ ਸਮਯੇਨ ਆਯਸ੍ਮਾ ਨਾਗਸੇਨੋ ਤਸ੍ਸਾ ਭਿਕ੍ਖੁਪਰਿਸਾਯ ਪੁਰਤੋ ਚਤ੍ਤਾਲੀਸਾਯ ਭਿਕ੍ਖੁਸਹਸ੍ਸਾਨਂ ਨਵਕਤਰੋ ਹੋਤਿ ਪਚ੍ਛਤੋ ਚਤ੍ਤਾਲੀਸਾਯ ਭਿਕ੍ਖੁਸਹਸ੍ਸਾਨਂ ਵੁਡ੍ਢਤਰੋ.

ਅਥ ਖੋ ਮਿਲਿਨ੍ਦੋ ਰਾਜਾ ਸਬ੍ਬਂ ਤਂ ਭਿਕ੍ਖੁਸਙ੍ਘਂ ਪੁਰਤੋ ਚ ਪਚ੍ਛਤੋ ਚ ਮਜ੍ਝਤੋ ਚ ਅਨੁਵਿਲੋਕੇਨ੍ਤੋ ਅਦ੍ਦਸਾ ਖੋ ਆਯਸ੍ਮਨ੍ਤਂ ਨਾਗਸੇਨਂ ਦੂਰਤੋਵ ਭਿਕ੍ਖੁਸਙ੍ਘਸ੍ਸ ਮਜ੍ਝੇ ਨਿਸਿਨ੍ਨਂ ਕੇਸਰਸੀਹਂ ਵਿਯ ਵਿਗਤਭਯਭੇਰਵਂ ਵਿਗਤਲੋਮਹਂਸਂ ਵਿਗਤਭਯਸਾਰਜ੍ਜਂ, ਦਿਸ੍ਵਾਨ ਆਕਾਰੇਨੇਵ ਅਞ੍ਞਾਸਿ ‘‘ਏਸੋ ਖੋ ਏਤ੍ਥ ਨਾਗਸੇਨੋ’’ਤਿ.

ਅਥ ਖੋ ਮਿਲਿਨ੍ਦੋ ਰਾਜਾ ਦੇਵਮਨ੍ਤਿਯਂ ਏਤਦਵੋਚ ‘‘ਏਸੋ ਖੋ, ਦੇਵਮਨ੍ਤਿਯ, ਆਯਸ੍ਮਾ ਨਾਗਸੇਨੋ’’ਤਿ. ‘‘ਆਮ, ਮਹਾਰਾਜ, ਏਸੋ ਖੋ ਨਾਗਸੇਨੋ, ਸੁਟ੍ਠੁ ਖੋ, ਤ੍ਵਂ ਮਹਾਰਾਜ, ਨਾਗਸੇਨਂ ਅਞ੍ਞਾਸੀ’’ਤਿ. ਤਤੋ ਰਾਜਾ ਤੁਟ੍ਠੋ ਅਹੋਸਿ ‘‘ਅਨਕ੍ਖਾਤੋਵ ਮਯਾ ਨਾਗਸੇਨੋ ਅਞ੍ਞਾਤੋ’’ਤਿ. ਅਥ ਖੋ ਮਿਲਿਨ੍ਦਸ੍ਸ ਰਞ੍ਞੋ ਆਯਸ੍ਮਨ੍ਤਂ ਨਾਗਸੇਨਂ ਦਿਸ੍ਵਾਵ ਅਹੁਦੇਵ ਭਯਂ, ਅਹੁਦੇਵ ਛਮ੍ਭਿਤਤ੍ਤਂ, ਅਹੁਦੇਵ ਲੋਮਹਂਸੋ.

ਤੇਨਾਹੁ –

‘‘ਚਰਣੇਨ ਚ ਸਮ੍ਪਨ੍ਨਂ, ਸੁਦਨ੍ਤਂ ਉਤ੍ਤਮੇ ਦਮੇ;

ਦਿਸ੍ਵਾ ਰਾਜਾ ਨਾਗਸੇਨਂ, ਇਦਂ ਵਚਨਮਬ੍ਰਵਿ.

‘‘ਕਥਿਤਾ [ਕਥਿਕਾ (ਸੀ. ਪੀ.)] ਮਯਾ ਬਹੂ ਦਿਟ੍ਠਾ, ਸਾਕਚ੍ਛਾ ਓਸਟਾ ਬਹੂ;

ਨ ਤਾਦਿਸਂ ਭਯਂ ਆਸਿ, ਅਜ੍ਜ ਤਾਸੋ ਯਥਾ ਮਮ.

‘‘ਨਿਸ੍ਸਂਸਯਂ ਪਰਾਜਯੋ, ਮਮ ਅਜ੍ਜ ਭਵਿਸ੍ਸਤਿ;

ਜਯੋ ਚ ਨਾਗਸੇਨਸ੍ਸ, ਯਥਾ ਚਿਤ੍ਤਂ ਨ ਸਣ੍ਠਿਤ’’ਨ੍ਤਿ.

ਬਾਹਿਰਕਥਾ ਨਿਟ੍ਠਿਤਾ.