੪੩੮. ਦਦ੍ਦਰਜਾਤਕਂ (੧੨)

੧੦੫. ਯੋ ਤੇ ਪੁਤ੍ਤਕੇ ਅਖਾਦਿ, ਦਿਨ੍ਨਭਤ੍ਤੋ ਅਦੂਸਕੇ;

ਤਸ੍ਮਿਂ ਦਾਠਂ ਨਿਪਾਤੇਹਿ, ਮਾ ਤੇ ਮੁਚ੍ਚਿਤ੍ਥ ਜੀਵਤੋ.

੧੦੬. ਆਕਿਣ੍ਣਲੁਦ੍ਦੋ ਪੁਰਿਸੋ, ਧਾਤਿਚੇਲਂਵ ਮਕ੍ਖਿਤੋ;

ਪਦੇਸਂ ਤਂ ਨ ਪਸ੍ਸਾਮਿ, ਯਤ੍ਥ ਦਾਠਂ ਨਿਪਾਤਯੇ.

੧੦੭. ਅਕਤਞ੍ਞੁਸ੍ਸ ਪੋਸਸ੍ਸ, ਨਿਚ੍ਚਂ ਵਿਵਰਦਸ੍ਸਿਨੋ;

ਸਬ੍ਬਂ ਚੇ ਪਥਵਿਂ ਦਜ੍ਜਾ, ਨੇਵ ਨਂ ਅਭਿਰਾਧਯੇ.

੧੦੮. ਕਿਨ੍ਨੁ ਸੁਬਾਹੁ ਤਰਮਾਨਰੂਪੋ, ਪਚ੍ਚਾਗਤੋਸਿ ਸਹ ਮਾਣਵੇਨ;

ਕਿਂ ਕਿਚ੍ਚਮਤ੍ਥਂ ਇਧਮਤ੍ਥਿ ਤੁਯ੍ਹਂ, ਅਕ੍ਖਾਹਿ ਮੇ ਪੁਚ੍ਛਿਤੋ ਏਤਮਤ੍ਥਂ.

੧੦੯. ਯੋ ਤੇ ਸਖਾ ਦਦ੍ਦਰੋ ਸਾਧੁਰੂਪੋ, ਤਸ੍ਸ ਵਧਂ ਪਰਿਸਙ੍ਕਾਮਿ ਅਜ੍ਜ;

ਪੁਰਿਸਸ੍ਸ ਕਮ੍ਮਾਯਤਨਾਨਿ ਸੁਤ੍ਵਾ, ਨਾਹਂ ਸੁਖਿਂ ਦਦ੍ਦਰਂ ਅਜ੍ਜ ਮਞ੍ਞੇ.

੧੧੦. ਕਾਨਿਸ੍ਸ ਕਮ੍ਮਾਯਤਨਾਨਿ ਅਸ੍ਸੁ, ਪੁਰਿਸਸ੍ਸ ਵੁਤ੍ਤਿਸਮੋਧਾਨਤਾਯ;

ਕਂ ਵਾ ਪਟਿਞ੍ਞਂ ਪੁਰਿਸਸ੍ਸ ਸੁਤ੍ਵਾ, ਪਰਿਸਙ੍ਕਸਿ ਦਦ੍ਦਰਂ ਮਾਣਵੇਨ.

੧੧੧. ਚਿਣ੍ਣਾ ਕਲਿਙ੍ਗਾ ਚਰਿਤਾ ਵਣਿਜ੍ਜਾ, ਵੇਤ੍ਤਾਚਰੋ ਸਙ੍ਕੁਪਥੋਪਿ ਚਿਣ੍ਣੋ;

ਨਟੇਹਿ ਚਿਣ੍ਣਂ ਸਹ ਵਾਕੁਰੇਹਿ [ਵਾਕਰੇਹਿ (ਪੀ. ਸੀ. ਨਿਯ੍ਯ), ਵਾਗੁਰੇਹਿ (?)], ਦਣ੍ਡੇਨ ਯੁਦ੍ਧਮ੍ਪਿ ਸਮਜ੍ਜਮਜ੍ਝੇ.

੧੧੨. ਬਦ੍ਧਾ ਕੁਲੀਕਾ [ਕੁਲਿਙ੍ਕਾ (ਸੀ. ਪੀ.)] ਮਿਤਮਾਲ਼੍ਹਕੇਨ, ਅਕ੍ਖਾ ਜਿਤਾ [ਅਕ੍ਖਾਚਿਤਾ (ਸੀ. ਅਟ੍ਠ.)] ਸਂਯਮੋ ਅਬ੍ਭਤੀਤੋ;

ਅਬ੍ਬਾਹਿਤਂ [ਅਪ੍ਪਹਿਤਂ (ਸੀ. ਸ੍ਯਾ.), ਅਬ੍ਬੂਹਿਤਂ (ਪੀ. ਸੀ. ਨਿਯ੍ਯ)] ਪੁਬ੍ਬਕਂ [ਪੁਪ੍ਫਕਂ (ਸੀ. ਸ੍ਯਾ.)] ਅਡ੍ਢਰਤ੍ਤਂ, ਹਤ੍ਥਾ ਦਡ੍ਢਾ ਪਿਣ੍ਡਪਟਿਗ੍ਗਹੇਨ.

੧੧੩. ਤਾਨਿਸ੍ਸ ਕਮ੍ਮਾਯਤਨਾਨਿ ਅਸ੍ਸੁ, ਪੁਰਿਸਸ੍ਸ ਵੁਤ੍ਤਿਸਮੋਧਾਨਤਾਯ;

ਯਥਾ ਅਯਂ ਦਿਸ੍ਸਤਿ ਲੋਮਪਿਣ੍ਡੋ, ਗਾਵੋ ਹਤਾ ਕਿਂ ਪਨ ਦਦ੍ਦਰਸ੍ਸਾਤਿ.

ਦਦ੍ਦਰਜਾਤਕਂ ਦ੍ਵਾਦਸਮਂ.

ਨਵਕਨਿਪਾਤਂ ਨਿਟ੍ਠਿਤਂ.