੪੩੬. ਸਮੁਗ੍ਗਜਾਤਕਂ (੧੦)

੮੭. ਕੁਤੋ ਨੁ ਆਗਚ੍ਛਥ ਭੋ ਤਯੋ ਜਨਾ, ਸ੍ਵਾਗਤਾ ਏਥ [ਸ੍ਵਾਗਤਂ ਏਤ੍ਥ (ਸੀ. ਪੀ.)] ਨਿਸੀਦਥਾਸਨੇ;

ਕਚ੍ਚਿਤ੍ਥ ਭੋਨ੍ਤੋ ਕੁਸਲਂ ਅਨਾਮਯਂ, ਚਿਰਸ੍ਸਮਬ੍ਭਾਗਮਨਂ ਹਿ ਵੋ ਇਧ.

੮੮. ਅਹਮੇਵ ਏਕੋ ਇਧ ਮਜ੍ਜ ਪਤ੍ਤੋ, ਨ ਚਾਪਿ ਮੇ ਦੁਤਿਯੋ ਕੋਚਿ ਵਿਜ੍ਜਤਿ;

ਕਿਮੇਵ ਸਨ੍ਧਾਯ ਤੇ ਭਾਸਿਤਂ ਇਸੇ, ‘‘ਕੁਤੋ ਨੁ ਆਗਚ੍ਛਥ ਭੋ ਤਯੋ ਜਨਾ’’.

੮੯. ਤੁਵਞ੍ਚ ਏਕੋ ਭਰਿਯਾ ਚ ਤੇ ਪਿਯਾ, ਸਮੁਗ੍ਗਪਕ੍ਖਿਤ੍ਤਨਿਕਿਣ੍ਣਮਨ੍ਤਰੇ;

ਸਾ ਰਕ੍ਖਿਤਾ ਕੁਚ੍ਛਿਗਤਾਵ [ਕੁਚ੍ਛਿਗਤਾ ਚ (ਕ.)] ਤੇ ਸਦਾ, ਵਾਯੁਸ੍ਸ [ਹਰਿਸ੍ਸ (ਕ.)] ਪੁਤ੍ਤੇਨ ਸਹਾ ਤਹਿਂ ਰਤਾ.

੯੦. ਸਂਵਿਗ੍ਗਰੂਪੋ ਇਸਿਨਾ ਵਿਯਾਕਤੋ [ਪਬ੍ਯਾਕਤੋ (ਕ.), ਬ੍ਯਾਕਤੋ (ਸ੍ਯਾ. ਪੀ.)], ਸੋ ਦਾਨਵੋ ਤਤ੍ਥ ਸਮੁਗ੍ਗਮੁਗ੍ਗਿਲਿ;

ਅਦ੍ਦਕ੍ਖਿ ਭਰਿਯਂ ਸੁਚਿ ਮਾਲਧਾਰਿਨਿਂ, ਵਾਯੁਸ੍ਸ ਪੁਤ੍ਤੇਨ ਸਹਾ ਤਹਿਂ ਰਤਂ.

੯੧. ਸੁਦਿਟ੍ਠਰੂਪਮੁਗ੍ਗਤਪਾਨੁਵਤ੍ਤਿਨਾ [ਸੁਦਿਟ੍ਠਰੂਪੁਗ੍ਗਤਪਾਨੁਵਤ੍ਤਿਨਾ (ਸੀ. ਸ੍ਯਾ. ਪੀ.)], ਹੀਨਾ ਨਰਾ ਯੇ ਪਮਦਾਵਸਂ ਗਤਾ;

ਯਥਾ ਹਵੇ ਪਾਣਰਿਵੇਤ੍ਥ ਰਕ੍ਖਿਤਾ, ਦੁਟ੍ਠਾ ਮਯੀ ਅਞ੍ਞਮਭਿਪ੍ਪਮੋਦਯਿ.

੯੨. ਦਿਵਾ ਚ ਰਤ੍ਤੋ ਚ ਮਯਾ ਉਪਟ੍ਠਿਤਾ, ਤਪਸ੍ਸਿਨਾ ਜੋਤਿਰਿਵਾ ਵਨੇ ਵਸਂ;

ਸਾ ਧਮ੍ਮਮੁਕ੍ਕਮ੍ਮ ਅਧਮ੍ਮਮਾਚਰਿ, ਅਕਿਰਿਯਰੂਪੋ ਪਮਦਾਹਿ ਸਨ੍ਥਵੋ.

੯੩. ਸਰੀਰਮਜ੍ਝਮ੍ਹਿ ਠਿਤਾਤਿਮਞ੍ਞਹਂ, ਮਯ੍ਹਂ ਅਯਨ੍ਤਿ ਅਸਤਿਂ ਅਸਞ੍ਞਤਂ;

ਸਾ ਧਮ੍ਮਮੁਕ੍ਕਮ੍ਮ ਅਧਮ੍ਮਮਾਚਰਿ, ਅਕਿਰਿਯਰੂਪੋ ਪਮਦਾਹਿ ਸਨ੍ਥਵੋ.

੯੪. ਸੁਰਕ੍ਖਿਤਂ ਮੇਤਿ ਕਥਂ ਨੁ ਵਿਸ੍ਸਸੇ, ਅਨੇਕਚਿਤ੍ਤਾਸੁ ਨ ਹਤ੍ਥਿ [ਅਨੇਕਚਿਤ੍ਤਾ ਪੁਨ ਹੇਤ੍ਥ (ਕ.)] ਰਕ੍ਖਣਾ;

ਏਤਾ ਹਿ ਪਾਤਾਲਪਪਾਤਸਨ੍ਨਿਭਾ, ਏਤ੍ਥਪ੍ਪਮਤ੍ਤੋ ਬ੍ਯਸਨਂ ਨਿਗਚ੍ਛਤਿ.

੯੫. ਤਸ੍ਮਾ ਹਿ ਤੇ ਸੁਖਿਨੋ ਵੀਤਸੋਕਾ, ਯੇ ਮਾਤੁਗਾਮੇਹਿ ਚਰਨ੍ਤਿ ਨਿਸ੍ਸਟਾ;

ਏਤਂ ਸਿਵਂ ਉਤ੍ਤਮਮਾਭਿਪਤ੍ਥਯਂ, ਨ ਮਾਤੁਗਾਮੇਹਿ ਕਰੇਯ੍ਯ ਸਨ੍ਥਵਨ੍ਤਿ.

ਸਮੁਗ੍ਗਜਾਤਕਂ ਦਸਮਂ.