੪੩੦. ਚੂਲ਼ਸੁਵਜਾਤਕਂ (੪)
੩੦. ਸਨ੍ਤਿ ਰੁਕ੍ਖਾ ਹਰਿਪਤ੍ਤਾ [ਹਰਿਤਪਤ੍ਤਾ (ਸੀ. ਸ੍ਯਾ. ਪੀ.)], ਦੁਮਾ ਨੇਕਫਲਾ ਬਹੂ;
ਕਸ੍ਮਾ ਨੁ ਸੁਕ੍ਖੇ [ਸੁਕ੍ਖ (ਕ.)] ਕੋਲ਼ਾਪੇ, ਸੁਵਸ੍ਸ ਨਿਰਤੋ ਮਨੋ.
੩੧. ਫਲਸ੍ਸ ਉਪਭੁਞ੍ਜਿਮ੍ਹਾ, ਨੇਕਵਸ੍ਸਗਣੇ ਬਹੂ;
ਅਫਲਮ੍ਪਿ ਵਿਦਿਤ੍ਵਾਨ, ਸਾਵ ਮੇਤ੍ਤਿ ਯਥਾ ਪੁਰੇ.
੩੨. ਸੁਖਞ੍ਚ ਰੁਕ੍ਖਂ ਕੋਲ਼ਾਪਂ, ਓਪਤ੍ਤਮਫਲਂ ਦੁਮਂ;
ਓਹਾਯ ਸਕੁਣਾ ਯਨ੍ਤਿ, ਕਿਂ ਦੋਸਂ ਪਸ੍ਸਸੇ ਦਿਜ.
੩੩. ਯੇ ਫਲਤ੍ਥਾ ਸਮ੍ਭਜਨ੍ਤਿ, ਅਫਲੋਤਿ ਜਹਨ੍ਤਿ ਨਂ;
ਅਤ੍ਤਤ੍ਥਪਞ੍ਞਾ ਦੁਮ੍ਮੇਧਾ, ਤੇ ਹੋਨ੍ਤਿ ਪਕ੍ਖਪਾਤਿਨੋ.
੩੪. ਸਾਧੁ ਸਕ੍ਖਿ ਕਤਂ ਹੋਤਿ, ਮੇਤ੍ਤਿ ਸਂਸਤਿ ਸਨ੍ਥਵੋ;
ਸਚੇਤਂ ਧਮ੍ਮਂ ਰੋਚੇਸਿ, ਪਾਸਂਸੋਸਿ ਵਿਜਾਨਤਂ.
੩੫. ਸੋ ਤੇ ਸੁਵ ਵਰਂ ਦਮ੍ਮਿ, ਪਤ੍ਤਯਾਨ ਵਿਹਙ੍ਗਮ;
ਵਰਂ ਵਰਸ੍ਸੁ ਵਕ੍ਕਙ੍ਗ, ਯਂ ਕਿਞ੍ਚਿ ਮਨਸਿਚ੍ਛਸਿ.
੩੬. ਅਪਿ ਨਾਮ ਨਂ ਪਸ੍ਸੇਯ੍ਯਂ [ਅਪਿ ਨਾਮ ਨਂ ਪੁਨ ਪਸ੍ਸੇ (ਸੀ. ਸ੍ਯਾ.)], ਸਪਤ੍ਤਂ ਸਫਲਂ ਦੁਮਂ;
ਦਲਿਦ੍ਦੋਵ ਨਿਧਿ ਲਦ੍ਧਾ, ਨਨ੍ਦੇਯ੍ਯਾਹਂ ਪੁਨਪ੍ਪੁਨਂ.
੩੭. ਤਤੋ ਅਮਤਮਾਦਾਯ, ਅਭਿਸਿਞ੍ਚਿ ਮਹੀਰੁਹਂ;
ਤਸ੍ਸ ਸਾਖਾ ਵਿਰੂਹਿਂਸੁ [ਵਿਰੂਲ਼੍ਹਸ੍ਸ (ਕ.)], ਸੀਤਚ੍ਛਾਯਾ ਮਨੋਰਮਾ.
੩੮. ਏਵਂ ਸਕ੍ਕ ਸੁਖੀ ਹੋਹਿ, ਸਹ ਸਬ੍ਬੇਹਿ ਞਾਤਿਭਿ;
ਯਥਾਹਮਜ੍ਜ ਸੁਖਿਤੋ, ਦਿਸ੍ਵਾਨ ਸਫਲਂ ਦੁਮਂ.
੩੯. ਸੁਵਸ੍ਸ ਚ ਵਰਂ ਦਤ੍ਵਾ, ਕਤ੍ਵਾਨ ਸਫਲਂ ਦੁਮਂ;
ਪਕ੍ਕਾਮਿ ਸਹ ਭਰਿਯਾਯ, ਦੇਵਾਨਂ ਨਨ੍ਦਨਂ ਵਨਨ੍ਤਿ.
ਚੂਲ਼ਸੁਵਜਾਤਕਂ ਚਤੁਤ੍ਥਂ.