੪੨੧. ਗਙ੍ਗਮਾਲਜਾਤਕਂ (੫)

੩੬. ਅਙ੍ਗਾਰਜਾਤਾ ਪਥਵੀ, ਕੁਕ੍ਕੁਲ਼ਾਨੁਗਤਾ ਮਹੀ;

ਅਥ ਗਾਯਸਿ ਵਤ੍ਤਾਨਿ [ਵਤ੍ਥਾਨਿ (ਕ.)], ਨ ਤਂ ਤਪਤਿ ਆਤਪੋ.

੩੭. ਉਦ੍ਧਂ ਤਪਤਿ ਆਦਿਚ੍ਚੋ, ਅਧੋ ਤਪਤਿ ਵਾਲੁਕਾ;

ਅਥ ਗਾਯਸਿ ਵਤ੍ਤਾਨਿ [ਵਤ੍ਥਾਨਿ (ਕ.)], ਨ ਤਂ ਤਪਤਿ ਆਤਪੋ.

੩੮. ਨ ਮਂ ਤਪਤਿ ਆਤਪੋ, ਆਤਪਾ [ਆਤਪ੍ਪਾ (ਸੀ. ਸ੍ਯਾ. ਪੀ.)] ਤਪਯਨ੍ਤਿ ਮਂ;

ਅਤ੍ਥਾ ਹਿ ਵਿਵਿਧਾ ਰਾਜ, ਤੇ ਤਪਨ੍ਤਿ ਨ ਆਤਪੋ.

੩੯. ਅਦ੍ਦਸਂ ਕਾਮ ਤੇ ਮੂਲਂ, ਸਙ੍ਕਪ੍ਪਾ ਕਾਮ ਜਾਯਸਿ;

ਨ ਤਂ ਸਙ੍ਕਪ੍ਪਯਿਸ੍ਸਾਮਿ, ਏਵਂ ਕਾਮ ਨ ਹੇਹਿਸਿ.

੪੦. ਅਪ੍ਪਾਪਿ ਕਾਮਾ ਨ ਅਲਂ, ਬਹੂਹਿਪਿ ਨ ਤਪ੍ਪਤਿ;

ਅਹਹਾ ਬਾਲਲਪਨਾ, ਪਰਿਵਜ੍ਜੇਥ [ਪਟਿਵਿਜ੍ਝੇਥ (ਪੀ. ਸੀ. ਅਟ੍ਠ.)] ਜਗ੍ਗਤੋ.

੪੧. ਅਪ੍ਪਸ੍ਸ ਕਮ੍ਮਸ੍ਸ ਫਲਂ ਮਮੇਦਂ, ਉਦਯੋ ਅਜ੍ਝਾਗਮਾ ਮਹਤ੍ਤਪਤ੍ਤਂ;

ਸੁਲਦ੍ਧਲਾਭੋ ਵਤ ਮਾਣਵਸ੍ਸ, ਯੋ ਪਬ੍ਬਜੀ ਕਾਮਰਾਗਂ ਪਹਾਯ.

੪੨. ਤਪਸਾ ਪਜਹਨ੍ਤਿ ਪਾਪਕਮ੍ਮਂ, ਤਪਸਾ ਨ੍ਹਾਪਿਤਕੁਮ੍ਭਕਾਰਭਾਵਂ;

ਤਪਸਾ ਅਭਿਭੁਯ੍ਯ ਗਙ੍ਗਮਾਲ, ਨਾਮੇਨਾਲਪਸਜ੍ਜ ਬ੍ਰਹ੍ਮਦਤ੍ਤਂ.

੪੩. ਸਨ੍ਦਿਟ੍ਠਿਕਮੇਵ ‘‘ਅਮ੍ਮ’’ ਪਸ੍ਸਥ, ਖਨ੍ਤੀਸੋਰਚ੍ਚਸ੍ਸ ਅਯਂ [ਯੋ (ਸ੍ਯਾ. ਪੀ. ਕ.)] ਵਿਪਾਕੋ;

ਯੋ [ਸੋ (ਸ੍ਯਾ. ਕ.)] ਸਬ੍ਬਜਨਸ੍ਸ ਵਨ੍ਦਿਤੋਹੁ, ਤਂ ਵਨ੍ਦਾਮ ਸਰਾਜਿਕਾ ਸਮਚ੍ਚਾ.

੪੪. ਮਾ ਕਿਞ੍ਚਿ ਅਵਚੁਤ੍ਥ ਗਙ੍ਗਮਾਲਂ, ਮੁਨਿਨਂ ਮੋਨਪਥੇਸੁ ਸਿਕ੍ਖਮਾਨਂ;

ਏਸੋ ਹਿ ਅਤਰਿ ਅਣ੍ਣਵਂ, ਯਂ ਤਰਿਤ੍ਵਾ ਚਰਨ੍ਤਿ ਵੀਤਸੋਕਾਤਿ.

ਗਙ੍ਗਮਾਲਜਾਤਕਂ ਪਞ੍ਚਮਂ.