੪੧੦. ਸੋਮਦਤ੍ਤਜਾਤਕਂ (੭-੨-੫)

੧੦੫. ਯੋ ਮਂ ਪੁਰੇ ਪਚ੍ਚੁਡ੍ਡੇਤਿ [ਪਚ੍ਚੁਦੇਤਿ (ਸੀ. ਸ੍ਯਾ. ਪੀ.), ਪਚ੍ਚੁਟ੍ਠੇਤਿ (ਕ.)], ਅਰਞ੍ਞੇ ਦੂਰਮਾਯਤੋ;

ਸੋ ਨ ਦਿਸ੍ਸਤਿ ਮਾਤਙ੍ਗੋ, ਸੋਮਦਤ੍ਤੋ ਕੁਹਿਂ ਗਤੋ.

੧੦੬. ਅਯਂ ਵਾ ਸੋ ਮਤੋ ਸੇਤਿ, ਅਲ੍ਲਸਿਙ੍ਗਂਵ ਵਚ੍ਛਿਤੋ [ਅਲ੍ਲਪਿਙ੍ਕਵ ਛਿਜ੍ਜਿਤੋ (ਸੀ. ਪੀ.), ਅਲ੍ਲਪੀਤਂਵ ਵਿਚ੍ਛਿਤੋ (ਸ੍ਯਾ.)];

ਭੁਮ੍ਯਾ ਨਿਪਤਿਤੋ ਸੇਤਿ, ਅਮਰਾ ਵਤ ਕੁਞ੍ਜਰੋ.

੧੦੭. ਅਨਗਾਰਿਯੁਪੇਤਸ੍ਸ, ਵਿਪ੍ਪਮੁਤ੍ਤਸ੍ਸ ਤੇ ਸਤੋ;

ਸਮਣਸ੍ਸ ਨ ਤਂ ਸਾਧੁ, ਯਂ ਪੇਤਮਨੁਸੋਚਸਿ.

੧੦੮. ਸਂਵਾਸੇਨ ਹਵੇ ਸਕ੍ਕ, ਮਨੁਸ੍ਸਸ੍ਸ ਮਿਗਸ੍ਸ ਵਾ;

ਹਦਯੇ ਜਾਯਤੇ ਪੇਮਂ, ਤਂ ਨ ਸਕ੍ਕਾ ਅਸੋਚਿਤੁਂ.

੧੦੯. ਮਤਂ ਮਰਿਸ੍ਸਂ ਰੋਦਨ੍ਤਿ, ਯੇ ਰੁਦਨ੍ਤਿ ਲਪਨ੍ਤਿ ਚ;

ਤਸ੍ਮਾ ਤ੍ਵਂ ਇਸਿ ਮਾ ਰੋਦਿ, ਰੋਦਿਤਂ ਮੋਘਮਾਹੁ ਸਨ੍ਤੋ.

੧੧੦. ਕਨ੍ਦਿਤੇਨ ਹਵੇ ਬ੍ਰਹ੍ਮੇ, ਮਤੋ ਪੇਤੋ ਸਮੁਟ੍ਠਹੇ;

ਸਬ੍ਬੇ ਸਙ੍ਗਮ੍ਮ ਰੋਦਾਮ, ਅਞ੍ਞਮਞ੍ਞਸ੍ਸ ਞਾਤਕੇ.

੧੧੧. ਆਦਿਤ੍ਤਂ ਵਤ ਮਂ ਸਨ੍ਤਂ, ਘਤਸਿਤ੍ਤਂਵ ਪਾਵਕਂ;

ਵਾਰਿਨਾ ਵਿਯ ਓਸਿਞ੍ਚਂ, ਸਬ੍ਬਂ ਨਿਬ੍ਬਾਪਯੇ ਦਰਂ.

੧੧੨. ਅਬ੍ਬਹੀ ਵਤ ਮੇ ਸਲ੍ਲਂ, ਯਮਾਸਿ ਹਦਯਸ੍ਸਿਤਂ;

ਯੋ ਮੇ ਸੋਕਪਰੇਤਸ੍ਸ, ਪੁਤ੍ਤਸੋਕਂ ਅਪਾਨੁਦਿ.

੧੧੩. ਸੋਹਂ ਅਬ੍ਬੂਲ਼੍ਹਸਲ੍ਲੋਸ੍ਮਿ, ਵੀਤਸੋਕੋ ਅਨਾਵਿਲੋ;

ਨ ਸੋਚਾਮਿ ਨ ਰੋਦਾਮਿ, ਤਵ ਸੁਤ੍ਵਾਨ ਵਾਸਵਾਤਿ.

ਸੋਮਦਤ੍ਤਜਾਤਕਂ ਪਞ੍ਚਮਂ.