੩੯੦. ਮਯ੍ਹਕਜਾਤਕਂ (੬-੨-੫)

੧੦੨. ਸਕੁਣੋ ਮਯ੍ਹਕੋ ਨਾਮ, ਗਿਰਿਸਾਨੁਦਰੀਚਰੋ;

ਪਕ੍ਕਂ ਪਿਪ੍ਫਲਿਮਾਰੁਯ੍ਹ, ਮਯ੍ਹਂ ਮਯ੍ਹਨ੍ਤਿ ਕਨ੍ਦਤਿ.

੧੦੩. ਤਸ੍ਸੇਵਂ ਵਿਲਪਨ੍ਤਸ੍ਸ, ਦਿਜਸਙ੍ਘਾ ਸਮਾਗਤਾ;

ਭੁਤ੍ਵਾਨ ਪਿਪ੍ਫਲਿਂ ਯਨ੍ਤਿ, ਵਿਲਪਤ੍ਵੇਵ ਸੋ ਦਿਜੋ.

੧੦੪. ਏਵਮੇਵ ਇਧੇਕਚ੍ਚੋ, ਸਙ੍ਘਰਿਤ੍ਵਾ ਬਹੁਂ ਧਨਂ;

ਨੇਵਤ੍ਤਨੋ ਨ ਞਾਤੀਨਂ, ਯਥੋਧਿਂ ਪਟਿਪਜ੍ਜਤਿ.

੧੦੫. ਨ ਸੋ ਅਚ੍ਛਾਦਨਂ ਭਤ੍ਤਂ, ਨ ਮਾਲਂ ਨ ਵਿਲੇਪਨਂ;

ਅਨੁਭੋਤਿ [ਨਾਨੁਭੋਤਿ (ਸ੍ਯਾ. ਕ.)] ਸਕਿਂ ਕਿਞ੍ਚਿ, ਨ ਸਙ੍ਗਣ੍ਹਾਤਿ ਞਾਤਕੇ.

੧੦੬. ਤਸ੍ਸੇਵਂ ਵਿਲਪਨ੍ਤਸ੍ਸ, ਮਯ੍ਹਂ ਮਯ੍ਹਨ੍ਤਿ ਰਕ੍ਖਤੋ;

ਰਾਜਾਨੋ ਅਥ ਵਾ ਚੋਰਾ, ਦਾਯਦਾ ਯੇ ਵ [ਯੇ ਚ (ਸ੍ਯਾ. ਕ.)] ਅਪ੍ਪਿਯਾ;

ਧਨਮਾਦਾਯ ਗਚ੍ਛਨ੍ਤਿ, ਵਿਲਪਤ੍ਵੇਵ ਸੋ ਨਰੋ.

੧੦੭. ਧੀਰੋ [ਧੀਰੋ ਚ (ਸੀ.)] ਭੋਗੇ ਅਧਿਗਮ੍ਮ, ਸਙ੍ਗਣ੍ਹਾਤਿ ਚ ਞਾਤਕੇ;

ਤੇਨ ਸੋ ਕਿਤ੍ਤਿਂ ਪਪ੍ਪੋਤਿ, ਪੇਚ੍ਚ ਸਗ੍ਗੇ ਪਮੋਦਤੀਤਿ [ਸਗ੍ਗੇ ਚ ਮੋਦਤੀਤਿ (ਸੀ. ਪੀ.)].

ਮਯ੍ਹਕਜਾਤਕਂ ਪਞ੍ਚਮਂ.