੩੯੧. ਵਿਜ੍ਜਾਧਰਜਾਤਕਂ (੬-੨-੬)

੧੦੮. ਦੁਬ੍ਬਣ੍ਣਰੂਪਂ ਤੁਵਮਰਿਯਵਣ੍ਣੀ, ਪੁਰਕ੍ਖਤ੍ਵਾ [ਪੁਰਕ੍ਖਿਤ੍ਵਾ (ਸ੍ਯਾ. ਕ.)] ਪਞ੍ਜਲਿਕੋ ਨਮਸ੍ਸਸਿ;

ਸੇਯ੍ਯੋ ਨੁ ਤੇ ਸੋ ਉਦਵਾ [ਉਦਾਹੁ (ਸ੍ਯਾ. ਕ.)] ਸਰਿਕ੍ਖੋ, ਨਾਮਂ ਪਰਸ੍ਸਤ੍ਤਨੋ ਚਾਪਿ ਬ੍ਰੂਹਿ.

੧੦੯. ਨ ਨਾਮਗੋਤ੍ਤਂ ਗਣ੍ਹਨ੍ਤਿ ਰਾਜ, ਸਮ੍ਮਗ੍ਗਤਾਨੁਜ੍ਜੁਗਤਾਨ [ਸਮਗ੍ਗਤਾਨੁਜ੍ਜੁਗਤਾਨ (ਸ੍ਯਾ.), ਸਮੁਗ੍ਗਤਾਨੁਜ੍ਜੁਗਤਾਨ (ਕ.)] ਦੇਵਾ;

ਅਹਞ੍ਚ ਤੇ ਨਾਮਧੇਯ੍ਯਂ ਵਦਾਮਿ, ਸਕ੍ਕੋਹਮਸ੍ਮੀ ਤਿਦਸਾਨਮਿਨ੍ਦੋ.

੧੧੦. ਯੋ ਦਿਸ੍ਵਾ ਭਿਕ੍ਖੁਂ ਚਰਣੂਪਪਨ੍ਨਂ, ਪੁਰਕ੍ਖਤ੍ਵਾ ਪਞ੍ਜਲਿਕੋ ਨਮਸ੍ਸਤਿ;

ਪੁਚ੍ਛਾਮਿ ਤਂ ਦੇਵਰਾਜੇਤਮਤ੍ਥਂ, ਇਤੋ ਚੁਤੋ ਕਿਂ ਲਭਤੇ ਸੁਖਂ ਸੋ.

੧੧੧. ਯੋ ਦਿਸ੍ਵਾ ਭਿਕ੍ਖੁਂ ਚਰਣੂਪਪਨ੍ਨਂ, ਪੁਰਕ੍ਖਤ੍ਵਾ ਪਞ੍ਜਲਿਕੋ ਨਮਸ੍ਸਤਿ;

ਦਿਟ੍ਠੇਵ ਧਮ੍ਮੇ ਲਭਤੇ ਪਸਂਸਂ, ਸਗ੍ਗਞ੍ਚ ਸੋ ਯਾਤਿ ਸਰੀਰਭੇਦਾ.

੧੧੨. ਲਕ੍ਖੀ ਵਤ ਮੇ ਉਦਪਾਦਿ ਅਜ੍ਜ, ਯਂ ਵਾਸਵਂ ਭੂਤਪਤਿਦ੍ਦਸਾਮ;

ਭਿਕ੍ਖੁਞ੍ਚ ਦਿਸ੍ਵਾਨ ਤੁਵਞ੍ਚ ਸਕ੍ਕ, ਕਾਹਾਮਿ ਪੁਞ੍ਞਾਨਿ ਅਨਪ੍ਪਕਾਨਿ.

੧੧੩. ਅਦ੍ਧਾ ਹਵੇ ਸੇਵਿਤਬ੍ਬਾ ਸਪਞ੍ਞਾ, ਬਹੁਸ੍ਸੁਤਾ ਯੇ ਬਹੁਠਾਨਚਿਨ੍ਤਿਨੋ;

ਭਿਕ੍ਖੁਞ੍ਚ ਦਿਸ੍ਵਾਨ ਮਮਞ੍ਚ ਰਾਜ, ਕਰੋਹਿ ਪੁਞ੍ਞਾਨਿ ਅਨਪ੍ਪਕਾਨਿ.

੧੧੪. ਅਕ੍ਕੋਧਨੋ ਨਿਚ੍ਚਪਸਨ੍ਨਚਿਤ੍ਤੋ, ਸਬ੍ਬਾਤਿਥੀਯਾਚਯੋਗੋ ਭਵਿਤ੍ਵਾ;

ਨਿਹਚ੍ਚ ਮਾਨਂ ਅਭਿਵਾਦਯਿਸ੍ਸਂ, ਸੁਤ੍ਵਾਨ ਦੇਵਿਨ੍ਦ ਸੁਭਾਸਿਤਾਨੀਤਿ.

ਵਿਜ੍ਜਾਧਰ [ਧਜਵਿਹੇਠਕ (ਸੀ. ਪੀ.), ਪਬ੍ਬਜਿਤਵਿਹੇਠਕ (ਸ੍ਯਾ.)] ਜਾਤਕਂ ਛਟ੍ਠਂ.