੩੮੭. ਸੂਚਿਜਾਤਕਂ (੬-੨-੨)

੮੨. ਅਕਕ੍ਕਸਂ ਅਫਰੁਸਂ, ਖਰਧੋਤਂ ਸੁਪਾਸਿਯਂ;

ਸੁਖੁਮਂ ਤਿਖਿਣਗ੍ਗਞ੍ਚ, ਕੋ ਸੂਚਿਂ ਕੇਤੁਮਿਚ੍ਛਤਿ.

੮੩. ਸੁਮਜ੍ਜਞ੍ਚ ਸੁਪਾਸਞ੍ਚ, ਅਨੁਪੁਬ੍ਬਂ [ਅਨੁਪੁਬ੍ਬ (ਸੀ. ਸ੍ਯਾ.)] ਸੁਵਟ੍ਟਿਤਂ;

ਘਨਘਾਤਿਮਂ ਪਟਿਥਦ੍ਧਂ, ਕੋ ਸੂਚਿਂ ਕੇਤੁਮਿਚ੍ਛਤਿ.

੮੪. ਇਤੋ ਦਾਨਿ ਪਤਾਯਨ੍ਤਿ, ਸੂਚਿਯੋ ਬਲ਼ਿਸਾਨਿ ਚ;

ਕੋਯਂ ਕਮ੍ਮਾਰਗਾਮਸ੍ਮਿਂ, ਸੂਚਿਂ ਵਿਕ੍ਕੇਤੁਮਿਚ੍ਛਤਿ.

੮੫. ਇਤੋ ਸਤ੍ਥਾਨਿ ਗਚ੍ਛਨ੍ਤਿ, ਕਮ੍ਮਨ੍ਤਾ ਵਿਵਿਧਾ ਪੁਥੂ;

ਕੋਯਂ ਕਮ੍ਮਾਰਗਾਮਸ੍ਮਿਂ, ਸੂਚਿਂ ਵਿਕ੍ਕੇਤੁਮਿਚ੍ਛਤਿ [ਮਰਹਤਿ (ਸੀ. ਸ੍ਯਾ. ਪੀ.)].

੮੬. ਸੂਚਿਂ ਕਮ੍ਮਾਰਗਾਮਸ੍ਮਿਂ, ਵਿਕ੍ਕੇਤਬ੍ਬਾ ਪਜਾਨਤਾ;

ਆਚਰਿਯਾਵ ਜਾਨਨ੍ਤਿ [ਆਚਰਿਯਾ ਸਞ੍ਜਾਨਨ੍ਤਿ (ਕ.), ਆਚਰਿਯਾ ਪਜਾਨਨ੍ਤਿ (ਸ੍ਯਾ.), ਆਚਰਿਯਾਵ ਸਞ੍ਜਾਨਨ੍ਤਿ (ਪੀ.)], ਕਮ੍ਮਂ ਸੁਕਤਦੁਕ੍ਕਟਂ [ਦੁਕ੍ਕਤਂ (ਸੀ. ਪੀ.)].

੮੭. ਇਮਂ ਚੇ [ਇਮਞ੍ਚ (ਸੀ. ਸ੍ਯਾ. ਪੀ.)] ਤੇ ਪਿਤਾ ਭਦ੍ਦੇ, ਸੂਚਿਂ ਜਞ੍ਞਾ ਮਯਾ ਕਤਂ;

ਤਯਾ ਚ ਮਂ ਨਿਮਨ੍ਤੇਯ੍ਯ, ਯਞ੍ਚਤ੍ਥਞ੍ਞਂ ਘਰੇ ਧਨਨ੍ਤਿ.

ਸੂਚਿਜਾਤਕਂ ਦੁਤਿਯਂ.