੩੮੮. ਤੁਣ੍ਡਿਲਜਾਤਕਂ (੬-੨-੩)

੮੮. ਨਵਛਨ੍ਨਕੇ [ਨਵਛਨ੍ਦਕੇ (ਸੀ. ਪੀ.), ਨਵਚ੍ਛਦ੍ਦਕੇ (ਸ੍ਯਾ.)] ਦਾਨਿ [ਦੋਣਿ (ਕ.), ਦਾਨਂ, ਦਾਨੇ (ਕਤ੍ਥਚਿ)] ਦਿਯ੍ਯਤਿ, ਪੁਣ੍ਣਾਯਂ ਦੋਣਿ ਸੁਵਾਮਿਨੀ ਠਿਤਾ;

ਬਹੁਕੇ ਜਨੇ ਪਾਸਪਾਣਿਕੇ, ਨੋ ਚ ਖੋ ਮੇ ਪਟਿਭਾਤਿ ਭੁਞ੍ਜਿਤੁਂ.

੮੯. ਤਸਸਿ ਭਮਸਿ ਲੇਣਮਿਚ੍ਛਸਿ, ਅਤ੍ਤਾਣੋਸਿ ਕੁਹਿਂ ਗਮਿਸ੍ਸਸਿ;

ਅਪ੍ਪੋਸ੍ਸੁਕ੍ਕੋ ਭੁਞ੍ਜ ਤੁਣ੍ਡਿਲ, ਮਂਸਤ੍ਥਾਯ ਹਿ ਪੋਸਿਤਾਮ੍ਹਸੇ [ਪੋਸਿਯਾਮਸੇ (ਸੀ. ਸ੍ਯਾ. ਪੀ.)].

੯੦. ਓਗਹ ਰਹਦਂ ਅਕਦ੍ਦਮਂ, ਸਬ੍ਬਂ ਸੇਦਮਲਂ ਪਵਾਹਯ;

ਗਣ੍ਹਾਹਿ ਨਵਂ ਵਿਲੇਪਨਂ, ਯਸ੍ਸ ਗਨ੍ਧੋ ਨ ਕਦਾਚਿ ਛਿਜ੍ਜਤਿ.

੯੧. ਕਤਮੋ ਰਹਦੋ ਅਕਦ੍ਦਮੋ, ਕਿਂਸੁ ਸੇਦਮਲਨ੍ਤਿ ਵੁਚ੍ਚਤਿ;

ਕਤਮਞ੍ਚ ਨਵਂ ਵਿਲੇਪਨਂ, ਯਸ੍ਸ ਗਨ੍ਧੋ ਨ ਕਦਾਚਿ ਛਿਜ੍ਜਤਿ.

੯੨. ਧਮ੍ਮੋ ਰਹਦੋ ਅਕਦ੍ਦਮੋ, ਪਾਪਂ ਸੇਦਮਲਨ੍ਤਿ ਵੁਚ੍ਚਤਿ;

ਸੀਲਞ੍ਚ ਨਵਂ ਵਿਲੇਪਨਂ, ਤਸ੍ਸ ਗਨ੍ਧੋ ਨ ਕਦਾਚਿ ਛਿਜ੍ਜਤਿ.

੯੩. ਨਨ੍ਦਨ੍ਤਿ ਸਰੀਰਘਾਤਿਨੋ, ਨ ਚ ਨਨ੍ਦਨ੍ਤਿ ਸਰੀਰਧਾਰਿਨੋ;

ਪੁਣ੍ਣਾਯ ਚ ਪੁਣ੍ਣਮਾਸਿਯਾ, ਰਮਮਾਨਾਵ ਜਹਨ੍ਤਿ ਜੀਵਿਤਨ੍ਤਿ.

ਤੁਣ੍ਡਿਲਜਾਤਕਂ ਤਤਿਯਂ.