੩੮੬. ਖਰਪੁਤ੍ਤਜਾਤਕਂ (੬-੨-੧)

੭੬. ਸਚ੍ਚਂ ਕਿਰੇਵਮਾਹਂਸੁ, ਵਸ੍ਤਂ [ਭਸ੍ਤਂ (ਸੀ. ਪੀ.), ਕਲਕਂ (ਸ੍ਯਾ.), ਗਰਂ (ਕ.)] ਬਾਲੋਤਿ ਪਣ੍ਡਿਤਾ;

ਪਸ੍ਸ ਬਾਲੋ ਰਹੋਕਮ੍ਮਂ, ਆਵਿਕੁਬ੍ਬਂ ਨ ਬੁਜ੍ਝਤਿ.

੭੭. ਤ੍ਵਂ ਖੋਪਿ [ਤ੍ਵਂ ਨੁ ਖੋ (ਸੀ. ਸ੍ਯਾ.), ਤ੍ਵਞ੍ਚ ਖੋ (ਪੀ.)] ਸਮ੍ਮ ਬਾਲੋਸਿ, ਖਰਪੁਤ੍ਤ ਵਿਜਾਨਹਿ;

ਰਜ੍ਜੁਯਾ ਹਿ [ਰਜ੍ਜੁਯਾਸਿ (ਪੀ.)] ਪਰਿਕ੍ਖਿਤ੍ਤੋ, ਵਙ੍ਕੋਟ੍ਠੋ ਓਹਿਤੋਮੁਖੋ.

੭੮. ਅਪਰਮ੍ਪਿ ਸਮ੍ਮ ਤੇ ਬਾਲ੍ਯਂ [ਅਯਮ੍ਪਿ ਸਮ੍ਮ ਤੇ ਬਾਲੋ (ਕ.)], ਯੋ ਮੁਤ੍ਤੋ ਨ ਪਲਾਯਸਿ;

ਸੋ ਚ ਬਾਲਤਰੋ ਸਮ੍ਮ, ਯਂ ਤ੍ਵਂ ਵਹਸਿ ਸੇਨਕਂ.

੭੯. ਯਂ ਨੁ ਸਮ੍ਮ ਅਹਂ ਬਾਲੋ, ਅਜਰਾਜ ਵਿਜਾਨਹਿ;

ਅਥ ਕੇਨ ਸੇਨਕੋ ਬਾਲੋ, ਤਂ ਮੇ ਅਕ੍ਖਾਹਿ ਪੁਚ੍ਛਿਤੋ.

੮੦. ਉਤ੍ਤਮਤ੍ਥਂ ਲਭਿਤ੍ਵਾਨ, ਭਰਿਯਾਯ ਯੋ ਪਦਸ੍ਸਤਿ [ਭਯਿਯਾ ਯੋ ਪਦਸ੍ਸਤਿ (ਪੀ.), ਭਯਿਯਾ ਨ ਭਵਿਸ੍ਸਤਿ (ਕ.)];

ਤੇਨ ਜਹਿਸ੍ਸਤਤ੍ਤਾਨਂ, ਸਾ ਚੇਵਸ੍ਸ ਨ ਹੇਸ੍ਸਤਿ.

੮੧. ਨ ਵੇ ਪਿਯਮ੍ਮੇਤਿ [ਨ ਪਿਯਮੇਤਿ (ਕ.), ਨ ਪਿਯਮੇਦਨ੍ਤਿ (ਕਤ੍ਥਚਿ)] ਜਨਿਨ੍ਦ ਤਾਦਿਸੋ, ਅਤ੍ਤਂ ਨਿਰਂਕਤ੍ਵਾ ਪਿਯਾਨਿ ਸੇਵਤਿ [ਸੇਵਯੇ (?)];

ਅਤ੍ਤਾਵ ਸੇਯ੍ਯੋ ਪਰਮਾ ਚ ਸੇਯ੍ਯੋ, ਲਬ੍ਭਾ ਪਿਯਾ ਓਚਿਤਤ੍ਥੇਨ ਪਚ੍ਛਾਤਿ.

ਖਰਪੁਤ੍ਤਜਾਤਕਂ ਪਠਮਂ.