੩੦੧. ਚੂਲ਼ਕਾਲਿਙ੍ਗਜਾਤਕਂ (੪-੧-੧)

੧. ਵਿਵਰਥਿਮਾਸਂ [ਵਿਵਰਥ ਇਮਾਸਂ (ਸੀ. ਸ੍ਯਾ. ਪੀ.)] ਦ੍ਵਾਰਂ, ਨਗਰਂ ਪਵਿਸਨ੍ਤੁ [ਪਵਿਸਿਤੁਂ ਮਯਾ; (ਕ.)] ਅਰੁਣਰਾਜਸ੍ਸ;

ਸੀਹੇਨ ਸੁਸਿਟ੍ਠੇਨ, ਸੁਰਕ੍ਖਿਤਂ [ਸੁਸਤ੍ਥੇਨ, ਸੁਰਕ੍ਖਿਤਂ (ਸੀ. ਪੀ.), ਸੁਸਿਟ੍ਠੇਨ (ਕ.)] ਨਨ੍ਦਿਸੇਨੇਨ.

੨. ਜਯੋ ਕਲਿਙ੍ਗਾਨਮਸਯ੍ਹਸਾਹਿਨਂ, ਪਰਾਜਯੋ ਅਨਯੋ [ਅਜਯੋ (ਸ੍ਯਾ.), ਅਨ੍ਵਿਤੋ (ਕ.)] ਅਸ੍ਸਕਾਨਂ;

ਇਚ੍ਚੇਵ ਤੇ ਭਾਸਿਤਂ ਬ੍ਰਹ੍ਮਚਾਰਿ, ਨ ਉਜ੍ਜੁਭੂਤਾ ਵਿਤਥਂ ਭਣਨ੍ਤਿ.

੩. ਦੇਵਾ ਮੁਸਾਵਾਦਮੁਪਾਤਿਵਤ੍ਤਾ, ਸਚ੍ਚਂ ਧਨਂ ਪਰਮਂ ਤੇਸੁ [ਤਥਂ ਪੇਮਕਰਂ ਨੁ (ਕ.), ਤਥਂ ਪਰਮਂ ਕਰਂ ਨੁ (ਸ੍ਯਾ.)] ਸਕ੍ਕ;

ਤਂ ਤੇ ਮੁਸਾ ਭਾਸਿਤਂ ਦੇਵਰਾਜ, ਕਿਂ ਵਾ ਪਟਿਚ੍ਚ ਮਘਵਾ ਮਹਿਨ੍ਦ.

੪. ਨਨੁ ਤੇ ਸੁਤਂ ਬ੍ਰਾਹ੍ਮਣ ਭਞ੍ਞਮਾਨੇ, ਦੇਵਾ ਨ ਇਸ੍ਸਨ੍ਤਿ ਪੁਰਿਸਪਰਕ੍ਕਮਸ੍ਸ;

ਦਮੋ ਸਮਾਧਿ ਮਨਸੋ ਅਭੇਜ੍ਜੋ [ਅਦੇਜ੍ਜੋ (ਸੀ. ਪੀ.), ਅਭਿਜ੍ਜੋ (ਕ.)], ਅਬ੍ਯਗ੍ਗਤਾ ਨਿਕ੍ਕਮਨਞ੍ਚ [ਨਿਕ੍ਖਮਨਞ੍ਚ (ਸੀ.)] ਕਾਲੇ;

ਦਲ਼੍ਹਞ੍ਚ ਵਿਰਿਯਂ ਪੁਰਿਸਪਰਕ੍ਕਮੋ ਚ, ਤੇਨੇਵ ਆਸਿ ਵਿਜਯੋ ਅਸ੍ਸਕਾਨਨ੍ਤਿ.

ਚੂਲ਼ਕਾਲਿਙ੍ਗਜਾਤਕਂ ਪਠਮਂ.