੫੩੭. ਮਹਾਸੁਤਸੋਮਜਾਤਕਂ (੫)

੩੭੧. ‘‘ਕਸ੍ਮਾ ਤੁਵਂ ਰਸਕ ਏਦਿਸਾਨਿ, ਕਰੋਸਿ ਕਮ੍ਮਾਨਿ ਸੁਦਾਰੁਣਾਨਿ;

ਹਨਾਸਿ ਇਤ੍ਥੀ ਪੁਰਿਸੇ ਚ ਮੂਲ਼੍ਹੋ, ਮਂਸਸ੍ਸ ਹੇਤੁ ਅਦੁ [ਆਦੁ (ਸੀ. ਸ੍ਯਾ.)] ਧਨਸ੍ਸ ਕਾਰਣਾ’’.

੩੭੨. ‘‘ਨਂ ਅਤ੍ਤਹੇਤੂ ਨ ਧਨਸ੍ਸ ਕਾਰਣਾ, ਨ ਪੁਤ੍ਤਦਾਰਸ੍ਸ ਸਹਾਯਞਾਤਿਨਂ;

ਭਤ੍ਤਾ ਚ ਮੇ ਭਗਵਾ ਭੂਮਿਪਾਲੋ, ਸੋ ਖਾਦਤਿ ਮਂਸਂ ਭਦਨ੍ਤੇਦਿਸਂ’’.

੩੭੩. ‘‘ਸਚੇ ਤੁਵਂ ਭਤ੍ਤੁਰਤ੍ਥੇ ਪਯੁਤ੍ਤੋ, ਕਰੋਸਿ ਕਮ੍ਮਾਨਿ ਸੁਦਾਰੁਣਾਨਿ;

ਪਾਤੋਵ ਅਨ੍ਤੇਪੁਰਂ ਪਾਪੁਣਿਤ੍ਵਾ, ਲਪੇਯ੍ਯਾਸਿ ਮੇ ਰਾਜਿਨੋ ਸਮ੍ਮੁਖੇ ਤਂ’’.

੩੭੪. ‘‘ਤਥਾ ਕਰਿਸ੍ਸਾਮਿ ਅਹਂ ਭਦਨ੍ਤੇ, ਯਥਾ ਤੁਵਂ [ਯਮੇਵ ਤ੍ਵਂ (ਸੀ.)] ਭਾਸਸਿ ਕਾਲ਼ਹਤ੍ਥਿ;

ਪਾਤੋਵ ਅਨ੍ਤੇਪੁਰਂ ਪਾਪੁਣਿਤ੍ਵਾ, ਵਕ੍ਖਾਮਿ ਤੇ ਰਾਜਿਨੋ ਸਮ੍ਮੁਖੇ ਤਂ’’.

੩੭੫. ਤਤੋ ਰਤ੍ਯਾ ਵਿਵਸਾਨੇ [ਵਿਵਸਨੇ (ਸੀ. ਸ੍ਯਾ. ਪੀ.)], ਸੂਰਿਯੁਗ੍ਗਮਨਂ ਪਤਿ;

ਕਾਲ਼ੋ ਰਸਕਮਾਦਾਯ, ਰਾਜਾਨਂ ਉਪਸਙ੍ਕਮਿ;

ਉਪਸਙ੍ਕਮ੍ਮ [ਉਪਸਙ੍ਕਮਿਤ੍ਵਾ (ਸੀ. ਸ੍ਯਾ. ਪੀ.)] ਰਾਜਾਨਂ, ਇਦਂ ਵਚਨਮਬ੍ਰਵਿ.

੩੭੬. ‘‘ਸਚ੍ਚਂ ਕਿਰ ਮਹਾਰਾਜ, ਰਸਕੋ ਪੇਸਿਤੋ ਤਯਾ;

ਹਨਤਿ ਇਤ੍ਥਿਪੁਰਿਸੇ, ਤੁਵਂ ਮਂਸਾਨਿ ਖਾਦਸਿ’’.

੩੭੭. ‘‘ਏਵਮੇਵ ਤਥਾ ਕਾਲ਼, ਰਸਕੋ ਪੇਸਿਤੋ ਮਯਾ;

ਮਮ ਅਤ੍ਥਂ ਕਰੋਨ੍ਤਸ੍ਸ, ਕਿਮੇਤਂ ਪਰਿਭਾਸਸਿ’’.

੩੭੮. ‘‘ਆਨਨ੍ਦੋ ਸਬ੍ਬਮਚ੍ਛਾਨਂ, ਖਾਦਿਤ੍ਵਾ ਰਸਗਿਦ੍ਧਿਮਾ;

ਪਰਿਕ੍ਖੀਣਾਯ ਪਰਿਸਾਯ, ਅਤ੍ਤਾਨਂ ਖਾਦਿਯਾ ਮਤੋ.

੩੭੯. ‘‘ਏਵਂ ਪਮਤ੍ਤੋ ਰਸਗਾਰਵੇ ਰਤ੍ਤੋ [ਰਤੋ (ਸੀ. ਸ੍ਯਾ. ਪੀ.)], ਬਾਲੋ ਯਦੀ ਆਯਤਿ ਨਾਵਬੁਜ੍ਝਤਿ;

ਵਿਧਮ੍ਮ ਪੁਤ੍ਤੇ ਚਜਿ [ਚਜਿਤ੍ਵਾ (ਕ.)] ਞਾਤਕੇ ਚ, ਪਰਿਵਤ੍ਤਿਯ ਅਤ੍ਤਾਨਞ੍ਞੇਵ [ਅਤ੍ਤਾਨਮੇਵ (ਸੀ. ਪੀ.)] ਖਾਦਤਿ.

੩੮੦. ‘‘ਇਦਂ ਤੇ ਸੁਤ੍ਵਾਨ ਵਿਗੇਤੁ [ਵਿਹੇਤੁ (ਸੀ. ਪੀ.)] ਛਨ੍ਦੋ, ਮਾ ਭਕ੍ਖਯੀ [ਮਾ ਭਕ੍ਖਸੀ (ਸੀ. ਪੀ.)] ਰਾਜ ਮਨੁਸ੍ਸਮਂਸਂ;

ਮਾ ਤ੍ਵਂ ਇਮਂ ਕੇਵਲਂ ਵਾਰਿਜੋਵ, ਦ੍ਵਿਪਦਾਧਿਪ [ਦਿਪਦਾਦਿਪ (ਸੀ. ਪੀ.) ਏਵਮੁਪਰਿਪਿ] ਸੁਞ੍ਞਮਕਾਸਿ ਰਟ੍ਠਂ’’.

੩੮੧. ‘‘ਸੁਜਾਤੋ ਨਾਮ ਨਾਮੇਨ, ਓਰਸੋ ਤਸ੍ਸ ਅਤ੍ਰਜੋ [ਤਸ੍ਸ ਓਰਸ ਅਤ੍ਰਜੋ (ਸੀ.), ਤਸ੍ਸ ਅਤ੍ਰਜ ਓਰਸੋ (ਪੀ.)];

ਜਮ੍ਬੁਪੇਸਿਮਲਦ੍ਧਾਨ, ਮਤੋ ਸੋ ਤਸ੍ਸ ਸਙ੍ਖਯੇ.

੩੮੨. ‘‘ਏਵਮੇਵ ਅਹਂ ਕਾਲ਼, ਭੁਤ੍ਵਾ ਭਕ੍ਖਂ ਰਸੁਤ੍ਤਮਂ;

ਅਲਦ੍ਧਾ ਮਾਨੁਸਂ ਮਂਸਂ, ਮਞ੍ਞੇ ਹਿਸ੍ਸਾਮਿ [ਹੇਸ੍ਸਾਮਿ (ਸੀ. ਸ੍ਯਾ.), ਹਸ੍ਸਾਮਿ (ਪੀ.)] ਜੀਵਿਤਂ’’.

੩੮੩. ‘‘ਮਾਣਵ ਅਭਿਰੂਪੋਸਿ, ਕੁਲੇ ਜਾਤੋਸਿ ਸੋਤ੍ਥਿਯੇ;

ਨ ਤ੍ਵਂ ਅਰਹਸਿ ਤਾਤ, ਅਭਕ੍ਖਂ ਭਕ੍ਖਯੇਤਵੇ’’.

੩੮੪. ‘‘ਰਸਾਨਂ ਅਞ੍ਞਤਰਂ ਏਤਂ, ਕਸ੍ਮਾ [ਯਸ੍ਮਾ (ਸੀ. ਪੀ.)] ਮਂ ਤ੍ਵਂ ਨਿਵਾਰਯੇ;

ਸੋਹਂ ਤਤ੍ਥ ਗਮਿਸ੍ਸਾਮਿ, ਯਤ੍ਥ ਲਚ੍ਛਾਮਿ ਏਦਿਸਂ.

੩੮੫. ‘‘ਸੋਵਾਹਂ ਨਿਪ੍ਪਤਿਸ੍ਸਾਮਿ, ਨ ਤੇ ਵਚ੍ਛਾਮਿ ਸਨ੍ਤਿਕੇ;

ਯਸ੍ਸ ਮੇ ਦਸ੍ਸਨੇਨ ਤ੍ਵਂ, ਨਾਭਿਨਨ੍ਦਸਿ ਬ੍ਰਾਹ੍ਮਣ’’.

੩੮੬. ‘‘ਅਦ੍ਧਾ ਅਞ੍ਞੇਪਿ ਦਾਯਾਦੇ, ਪੁਤ੍ਤੇ ਲਚ੍ਛਾਮ ਮਾਣਵ;

ਤ੍ਵਞ੍ਚ ਜਮ੍ਮ ਵਿਨਸ੍ਸਸ੍ਸੁ, ਯਤ੍ਥ ਪਤ੍ਤਂ ਨ ਤਂ ਸੁਣੇ’’.

੩੮੭. ‘‘ਏਵਮੇਵ ਤੁਵਂ ਰਾਜ, ਦ੍ਵਿਪਦਿਨ੍ਦ ਸੁਣੋਹਿ ਮੇ;

ਪਬ੍ਬਾਜੇਸ੍ਸਨ੍ਤਿ ਤਂ ਰਟ੍ਠਾ, ਸੋਣ੍ਡਂ ਮਾਣਵਕਂ ਯਥਾ’’.

੩੮੮. ‘‘ਸੁਜਾਤੋ ਨਾਮ ਨਾਮੇਨ, ਭਾਵਿਤਤ੍ਤਾਨ ਸਾਵਕੋ;

ਅਚ੍ਛਰਂ ਕਾਮਯਨ੍ਤੋਵ, ਨ ਸੋ ਭੁਞ੍ਜਿ ਨ ਸੋ ਪਿਵਿ.

੩੮੯. ‘‘ਕੁਸਗ੍ਗੇਨੁਦਕਮਾਦਾਯ [ਕੁਸਗ੍ਗੇ ਉਦਕਮਾਦਾਯ (ਸੀ. ਪੀ.)], ਸਮੁਦ੍ਦੇ ਉਦਕਂ ਮਿਨੇ;

ਏਵਂ ਮਾਨੁਸਕਾ ਕਾਮਾ, ਦਿਬ੍ਬਕਾਮਾਨ ਸਨ੍ਤਿਕੇ.

੩੯੦. ‘‘ਏਵਮੇਵ ਅਹਂ ਕਾਲ਼, ਭੁਤ੍ਵਾ ਭਕ੍ਖਂ ਰਸੁਤ੍ਤਮਂ;

ਅਲਦ੍ਧਾ ਮਾਨੁਸਂ ਮਂਸਂ, ਮਞ੍ਞੇ ਹਿਸ੍ਸਾਮਿ ਜੀਵਿਤਂ’’.

੩੯੧. ‘‘ਯਥਾਪਿ ਤੇ ਧਤਰਟ੍ਠਾ, ਹਂਸਾ ਵੇਹਾਯਸਙ੍ਗਮਾ;

ਅਭੁਤ੍ਤਪਰਿਭੋਗੇਨ [ਅਵੁਤ੍ਤਿਪਰਿਭੋਗੇਨ (ਸੀ. ਪੀ.), ਅਯੁਤ੍ਤਪਰਿਭੋਗੇਨ (ਸ੍ਯਾ.)], ਸਬ੍ਬੇ ਅਬ੍ਭਤ੍ਥਤਂ ਗਤਾ.

੩੯੨. ‘‘ਏਵਮੇਵ ਤੁਵਂ ਰਾਜ, ਦ੍ਵਿਪਦਿਨ੍ਦ ਸੁਣੋਹਿ ਮੇ;

ਅਭਕ੍ਖਂ ਰਾਜ ਭਕ੍ਖੇਸਿ, ਤਸ੍ਮਾ ਪਬ੍ਬਾਜਯਨ੍ਤਿ ਤਂ’’.

੩੯੩. ‘‘ਤਿਟ੍ਠਾਹੀਤਿ ਮਯਾ ਵੁਤ੍ਤੋ, ਸੋ ਤ੍ਵਂ ਗਚ੍ਛਸਿ ਪਮ੍ਮੁਖੋ [ਪਾਮੁਖੋ (ਕ.)];

ਅਟ੍ਠਿਤੋ ਤ੍ਵਂ ਠਿਤੋਮ੍ਹੀਤਿ, ਲਪਸਿ ਬ੍ਰਹ੍ਮਚਾਰਿਨਿ;

ਇਦਂ ਤੇ ਸਮਣਾਯੁਤ੍ਤਂ, ਅਸਿਞ੍ਚ ਮੇ ਮਞ੍ਞਸਿ ਕਙ੍ਕਪਤ੍ਤਂ’’ [ਕਙ੍ਖਪਤ੍ਤਂ (ਸ੍ਯਾ. ਕ.)].

੩੯੪. ‘‘ਠਿਤੋਹਮਸ੍ਮੀ ਸਧਮ੍ਮੇਸੁ ਰਾਜ, ਨ ਨਾਮਗੋਤ੍ਤਂ ਪਰਿਵਤ੍ਤਯਾਮਿ;

ਚੋਰਞ੍ਚ ਲੋਕੇ ਅਠਿਤਂ ਵਦਨ੍ਤਿ, ਆਪਾਯਿਕਂ ਨੇਰਯਿਕਂ ਇਤੋ ਚੁਤਂ.

੩੯੫. ‘‘ਸਚੇ ਤ੍ਵਂ ਸਦ੍ਦਹਸਿ [ਸਚੇਪਿ ਸਹਸਿ (ਸੀ. ਪੀ.)] ਰਾਜ, ਸੁਤਂ ਗਣ੍ਹਾਹਿ ਖਤ੍ਤਿਯ [ਖਤ੍ਤਿਯਂ (ਸ੍ਯਾ.)];

ਤੇਨ ਯਞ੍ਞਂ ਯਜਿਤ੍ਵਾਨ, ਏਵਂ ਸਗ੍ਗਂ ਗਮਿਸ੍ਸਸਿ’’.

੩੯੬. ‘‘ਕਿਸ੍ਮਿਂ ਨੁ ਰਟ੍ਠੇ ਤਵ ਜਾਤਿਭੂਮਿ [ਜਾਤਭੂਮਿ (ਸੀ.)], ਅਥ ਕੇਨ ਅਤ੍ਥੇਨ ਇਧਾਨੁਪਤ੍ਤੋ;

ਅਕ੍ਖਾਹਿ ਮੇ ਬ੍ਰਾਹ੍ਮਣ ਏਤਮਤ੍ਥਂ, ਕਿਮਿਚ੍ਛਸੀ ਦੇਮਿ ਤਯਜ੍ਜ ਪਤ੍ਥਿਤਂ’’.

੩੯੭. ‘‘ਗਾਥਾ ਚਤਸ੍ਸੋ ਧਰਣੀਮਹਿਸ੍ਸਰ, ਸੁਗਮ੍ਭਿਰਤ੍ਥਾ ਵਰਸਾਗਰੂਪਮਾ;

ਤਵੇਵ ਅਤ੍ਥਾਯ ਇਧਾਗਤੋਸ੍ਮਿ, ਸੁਣੋਹਿ ਗਾਥਾ ਪਰਮਤ੍ਥਸਂਹਿਤਾ’’.

੩੯੮. ‘‘ਨ ਵੇ ਰੁਦਨ੍ਤਿ ਮਤਿਮਨ੍ਤੋ ਸਪਞ੍ਞਾ, ਬਹੁਸ੍ਸੁਤਾ ਯੇ ਬਹੁਟ੍ਠਾਨਚਿਨ੍ਤਿਨੋ;

ਦੀਪਞ੍ਹਿ ਏਤਂ ਪਰਮਂ ਨਰਾਨਂ, ਯਂ ਪਣ੍ਡਿਤਾ ਸੋਕਨੁਦਾ ਭਵਨ੍ਤਿ.

੩੯੯. ‘‘ਅਤ੍ਤਾਨਂ ਞਾਤੀ ਉਦਾਹੁ [ਉਦ (ਸੀ. ਪੀ.)] ਪੁਤ੍ਤਦਾਰਂ, ਧਞ੍ਞਂ ਧਨਂ ਰਜਤਂ ਜਾਤਰੂਪਂ;

ਕਿਮੇਵ ਤ੍ਵਂ [ਕਿਮੋ ਨੁ ਤ੍ਵਂ (ਸੀ. ਪੀ.)] ਸੁਤਸੋਮਾਨੁਤਪ੍ਪੇ, ਕੋਰਬ੍ਯਸੇਟ੍ਠ ਵਚਨਂ ਸੁਣੋਮ ਤੇਤਂ’.

੪੦੦. ‘‘ਨੇਵਾਹਮਤ੍ਤਾਨਮਨੁਤ੍ਥੁਨਾਮਿ, ਨ ਪੁਤ੍ਤਦਾਰਂ ਨ ਧਨਂ ਨ ਰਟ੍ਠਂ;

ਸਤਞ੍ਚ ਧਮ੍ਮੋ ਚਰਿਤੋ ਪੁਰਾਣੋ, ਤਂ ਸਙ੍ਕਰਂ [ਸਙ੍ਗਰਂ (ਸੀ. ਸ੍ਯਾ. ਪੀ.) ਏਵਮੁਪਰਿਪਿ] ਬ੍ਰਾਹ੍ਮਣਸ੍ਸਾਨੁਤਪ੍ਪੇ.

੪੦੧. ‘‘ਕਤੋ ਮਯਾ ਸਙ੍ਕਰੋ ਬ੍ਰਾਹ੍ਮਣੇਨ, ਰਟ੍ਠੇ ਸਕੇ ਇਸ੍ਸਰਿਯੇ ਠਿਤੇਨ;

ਤਂ ਸਙ੍ਕਰਂ ਬ੍ਰਾਹ੍ਮਣਸਪ੍ਪਦਾਯ, ਸਚ੍ਚਾਨੁਰਕ੍ਖੀ ਪੁਨਰਾਵਜਿਸ੍ਸਂ’’.

੪੦੨. ‘‘ਨੇਵਾਹਮੇਤਂ ਅਭਿਸਦ੍ਦਹਾਮਿ, ਸੁਖੀ ਨਰੋ ਮਚ੍ਚੁਮੁਖਾ ਪਮੁਤ੍ਤੋ;

ਅਮਿਤ੍ਤਹਤ੍ਥਂ ਪੁਨਰਾਵਜੇਯ੍ਯ, ਕੋਰਬ੍ਯਸੇਟ੍ਠ ਨ ਹਿ ਮਂ ਉਪੇਸਿ.

੪੦੩. ‘‘ਮੁਤ੍ਤੋ ਤੁਵਂ ਪੋਰਿਸਾਦਸ੍ਸ ਹਤ੍ਥਾ, ਗਨ੍ਤ੍ਵਾ ਸਕਂ ਮਨ੍ਦਿਰਂ ਕਾਮਕਾਮੀ;

ਮਧੁਰਂ ਪਿਯਂ ਜੀਵਿਤਂ ਲਦ੍ਧ ਰਾਜ, ਕੁਤੋ ਤੁਵਂ ਏਹਿਸਿ ਮੇ ਸਕਾਸਂ’’.

੪੦੪. ‘‘ਮਤਂ ਵਰੇਯ੍ਯ ਪਰਿਸੁਦ੍ਧਸੀਲੋ, ਨ ਜੀਵਿਤਂ [ਨ ਹਿ ਜੀਵਿਤਂ (ਸੀ.)] ਗਰਹਿਤੋ ਪਾਪਧਮ੍ਮੋ;

ਨ ਹਿ ਤਂ ਨਰਂ ਤਾਯਤਿ [ਤਾਯਤੇ (ਸੀ. ਸ੍ਯਾ. ਪੀ. ਕ.)] ਦੁਗ੍ਗਤੀਹਿ, ਯਸ੍ਸਾਪਿ ਹੇਤੁ ਅਲਿਕਂ ਭਣੇਯ੍ਯ.

੪੦੫. ‘‘ਸਚੇਪਿ ਵਾਤੋ ਗਿਰਿਮਾਵਹੇਯ੍ਯ, ਚਨ੍ਦੋ ਚ ਸੂਰਿਯੋ ਚ ਛਮਾ ਪਤੇਯ੍ਯੁਂ;

ਸਬ੍ਬਾ ਚ ਨਜ੍ਜੋ ਪਟਿਸੋਤਂ ਵਜੇਯ੍ਯੁਂ, ਨ ਤ੍ਵੇਵਹਂ ਰਾਜ ਮੁਸਾ ਭਣੇਯ੍ਯਂ.

੪੦੬. [ਅਯਂ ਗਾਥਾ ਸੀ. ਪੀ. ਪੋਤ੍ਥਕੇਸੁ ਨ ਦਿਸ੍ਸਤਿ] ‘‘ਨਭਂ ਫਲੇਯ੍ਯ ਉਦਧੀਪਿ ਸੁਸ੍ਸੇ, ਸਂਵਟ੍ਟਯੇ ਭੂਤਧਰਾ ਵਸੁਨ੍ਧਰਾ;

ਸਿਲੁਚ੍ਚਯੋ ਮੇਰੁ ਸਮੂਲਮੁਪ੍ਪਤੇ, ਨ ਤ੍ਵੇਵਹਂ ਰਾਜ ਮੁਸਾ ਭਣੇਯ੍ਯਂ’’ [ਅਯਂ ਗਾਥਾ ਸੀ. ਪੀ. ਪੋਤ੍ਥਕੇਸੁ ਨ ਦਿਸ੍ਸਤਿ].

੪੦੭. ‘‘ਅਸਿਞ੍ਚ ਸਤ੍ਤਿਞ੍ਚ ਪਰਾਮਸਾਮਿ, ਸਪਥਮ੍ਪਿ ਤੇ ਸਮ੍ਮ ਅਹਂ ਕਰੋਮਿ;

ਤਯਾ ਪਮੁਤ੍ਤੋ ਅਨਣੋ ਭਵਿਤ੍ਵਾ, ਸਚ੍ਚਾਨੁਰਕ੍ਖੀ ਪੁਨਰਾਵਜਿਸ੍ਸਂ’’.

੪੦੮. ‘‘ਯੋ ਤੇ ਕਤੋ ਸਙ੍ਕਰੋ ਬ੍ਰਾਹ੍ਮਣੇਨ, ਰਟ੍ਠੇ ਸਕੇ ਇਸ੍ਸਰਿਯੇ ਠਿਤੇਨ;

ਤਂ ਸਙ੍ਕਰਂ ਬ੍ਰਾਹ੍ਮਣਸਪ੍ਪਦਾਯ, ਸਚ੍ਚਾਨੁਰਕ੍ਖੀ ਪੁਨਰਾਵਜਸ੍ਸੁ’’.

੪੦੯. ‘‘ਯੋ ਮੇ ਕਤੋ ਸਙ੍ਕਰੋ ਬ੍ਰਾਹ੍ਮਣੇਨ, ਰਟ੍ਠੇ ਸਕੇ ਇਸ੍ਸਰਿਯੇ ਠਿਤੇਨ;

ਤਂ ਸਙ੍ਕਰਂ ਬ੍ਰਾਹ੍ਮਣਸਪ੍ਪਦਾਯ, ਸਚ੍ਚਾਨੁਰਕ੍ਖੀ ਪੁਨਰਾਵਜਿਸ੍ਸਂ’’.

੪੧੦. ‘‘ਮੁਤ੍ਤੋ ਚ ਸੋ ਪੋਰਿਸਾਦਸ੍ਸ ਹਤ੍ਥਾ, ਗਨ੍ਤ੍ਵਾਨ ਤਂ ਬ੍ਰਾਹ੍ਮਣਂ ਏਤਦਵੋਚ;

ਸੁਣੋਮ [ਸੁਣੋਮਿ (ਸੀ. ਸ੍ਯਾ.)] ਗਾਥਾਯੋ ਸਤਾਰਹਾਯੋ, ਯਾ ਮੇ ਸੁਤਾ ਅਸ੍ਸੁ ਹਿਤਾਯ ਬ੍ਰਹ੍ਮੇ’’.

੪੧੧. ‘‘ਸਕਿਦੇਵ ਸੁਤਸੋਮ, ਸਬ੍ਭਿ ਹੋਤਿ [ਹੋਤੁ (ਪੀ.)] ਸਮਾਗਮੋ;

ਸਾ ਨਂ ਸਙ੍ਗਤਿ ਪਾਲੇਤਿ, ਨਾਸਬ੍ਭਿ ਬਹੁਸਙ੍ਗਮੋ.

੪੧੨. ‘‘ਸਬ੍ਭਿਰੇਵ ਸਮਾਸੇਥ, ਸਬ੍ਭਿ ਕੁਬ੍ਬੇਥ ਸਨ੍ਥਵਂ;

ਸਤਂ ਸਦ੍ਧਮ੍ਮਮਞ੍ਞਾਯ, ਸੇਯ੍ਯੋ ਹੋਤਿ ਨ ਪਾਪਿਯੋ.

੪੧੩. ‘‘ਜੀਰਨ੍ਤਿ ਵੇ ਰਾਜਰਥਾ ਸੁਚਿਤ੍ਤਾ, ਅਥੋ ਸਰੀਰਮ੍ਪਿ ਜਰਂ ਉਪੇਤਿ;

ਸਤਞ੍ਚ ਧਮ੍ਮੋ ਨ ਜਰਂ ਉਪੇਤਿ, ਸਨ੍ਤੋ ਹਵੇ ਸਬ੍ਭਿ ਪਵੇਦਯਨ੍ਤਿ.

੪੧੪. ‘‘ਨਭਞ੍ਚਂ ਦੂਰੇ ਪਥਵੀ ਚ ਦੂਰੇ, ਪਾਰਂ ਸਮੁਦ੍ਦਸ੍ਸ ਤਦਾਹੁ ਦੂਰੇ;

ਤਤੋ ਹਵੇ ਦੂਰਤਰਂ ਵਦਨ੍ਤਿ, ਸਤਞ੍ਚ ਧਮ੍ਮੋ [ਧਮ੍ਮਂ (ਸੀ. ਪੀ.)] ਅਸਤਞ੍ਚ ਰਾਜ’’.

੪੧੫. ‘‘ਸਹਸ੍ਸਿਯਾ [ਸਹਸ੍ਸਿਯੋ (ਸੀ. ਪੀ.)] ਇਮਾ ਗਾਥਾ, ਨਹਿਮਾ [ਨ ਇਮਾ, (ਸੀ. ਪੀ.) ਨਯਿਮਾ (ਸ੍ਯਾ.)] ਗਾਥਾ ਸਤਾਰਹਾ;

ਚਤ੍ਤਾਰਿ ਤ੍ਵਂ ਸਹਸ੍ਸਾਨਿ, ਖਿਪ੍ਪਂ ਗਣ੍ਹਾਹਿ ਬ੍ਰਾਹ੍ਮਣ’’.

੪੧੬. ‘‘ਆਸੀਤਿਯਾ ਨਾਵੁਤਿਯਾ [ਅਸੀਤਿਯਾ ਨਵੁਤਿਯਾ (ਪੀ.)] ਚ ਗਾਥਾ, ਸਤਾਰਹਾ ਚਾਪਿ ਭਵੇਯ੍ਯ [ਭਵੇਯ੍ਯੁ (ਸੀ. ਸ੍ਯਾ. ਪੀ.)] ਗਾਥਾ;

ਪਚ੍ਚਤ੍ਤਮੇਵ ਸੁਤਸੋਮ ਜਾਨਹਿ, ਸਹਸ੍ਸਿਯਾ ਨਾਮ ਕਾ ਅਤ੍ਥਿ [ਸਹਸ੍ਸਿਯੋ ਨਾਮ ਇਧਤ੍ਥਿ (ਸੀ.)] ਗਾਥਾ’’.

੪੧੭. ‘‘ਇਚ੍ਛਾਮਿ ਵੋਹਂ ਸੁਤਵੁਦ੍ਧਿਮਤ੍ਤਨੋ, ਸਨ੍ਤੋਤਿ ਮਂ [ਸਨ੍ਤੋ ਮਮਂ (ਸ੍ਯਾ.), ਸਨ੍ਤੋ ਚ ਮਂ (ਸੀ. ਪੀ. ਕ.)] ਸਪ੍ਪੁਰਿਸਾ ਭਜੇਯ੍ਯੁਂ;

ਅਹਂ ਸਵਨ੍ਤੀਹਿ ਮਹੋਦਧੀਵ, ਨ ਹਿ ਤਾਤ ਤਪ੍ਪਾਮਿ ਸੁਭਾਸਿਤੇਨ.

੪੧੮. ‘‘ਅਗ੍ਗਿ ਯਥਾ ਤਿਣਕਟ੍ਠਂ ਦਹਨ੍ਤੋ, ਨ ਤਪ੍ਪਤੀ ਸਾਗਰੋਵ [ਸਾਗਰੋ ਵਾ (ਸੀ. ਪੀ.)] ਨਦੀਹਿ;

ਏਵਮ੍ਪਿ ਤੇ ਪਣ੍ਡਿਤਾ ਰਾਜਸੇਟ੍ਠ, ਸੁਤ੍ਵਾ ਨ ਤਪ੍ਪਨ੍ਤਿ ਸੁਭਾਸਿਤੇਨ.

੪੧੯. ‘‘ਸਕਸ੍ਸ ਦਾਸਸ੍ਸ ਯਦਾ ਸੁਣੋਮਿ, ਗਾਥਂ ਅਹਂ ਅਤ੍ਥਵਤਿਂ [ਗਾਥਾ ਅਹਂ ਅਤ੍ਥਵਤੀ (ਸੀ. ਪੀ.)] ਜਨਿਨ੍ਦ;

ਤਮੇਵ ਸਕ੍ਕਚ੍ਚ ਨਿਸਾਮਯਾਮਿ, ਨ ਹਿ ਤਾਤ ਧਮ੍ਮੇਸੁ ਮਮਤ੍ਥਿ ਤਿਤ੍ਤਿ’’.

੪੨੦. ‘‘ਇਦਂ ਤੇ ਰਟ੍ਠਂ ਸਧਨਂ ਸਯੋਗ੍ਗਂ, ਸਕਾਯੁਰਂ ਸਬ੍ਬਕਾਮੂਪਪਨ੍ਨਂ;

ਕਿਂ ਕਾਮਹੇਤੁ ਪਰਿਭਾਸਸਿਮਂ [ਭਾਸਸੇ ਮਂ (ਸੀ. ਸ੍ਯਾ. ਪੀ.)], ਗਚ੍ਛਾਮਹਂ ਪੋਰਿਸਾਦਸ੍ਸ ਞਤ੍ਤੇ’’ [ਪੋਰਿਸਾਦਸ੍ਸ ਕਨ੍ਤੇ (ਸੀ. ਪੀ.), ਪੋਰਿਸਾਦਸ੍ਸੁਪਨ੍ਤੇ (ਕ.)].

੪੨੧. ‘‘ਅਤ੍ਤਾਨੁਰਕ੍ਖਾਯ ਭਵਨ੍ਤਿ ਹੇਤੇ, ਹਤ੍ਥਾਰੋਹਾ ਰਥਿਕਾ ਪਤ੍ਤਿਕਾ ਚ;

ਅਸ੍ਸਾਰੁਹਾ [ਅਸ੍ਸਾਰੋਹਾ (ਸ੍ਯਾ. ਪੀ.)] ਯੇ ਚ ਧਨੁਗ੍ਗਹਾਸੇ, ਸੇਨਂ ਪਯੁਞ੍ਜਾਮ ਹਨਾਮ ਸਤ੍ਤੁਂ’’.

੪੨੨. ‘‘ਸੁਦੁਕ੍ਕਰਂ ਪੋਰਿਸਾਦੋ ਅਕਾਸਿ, ਜੀਵਂ ਗਹੇਤ੍ਵਾਨ ਅਵਸ੍ਸਜੀ ਮਂ;

ਤਂ ਤਾਦਿਸਂ ਪੁਬ੍ਬਕਿਚ੍ਚਂ ਸਰਨ੍ਤੋ, ਦੁਬ੍ਭੇ ਅਹਂ ਤਸ੍ਸ ਕਥਂ ਜਨਿਨ੍ਦ’’.

੪੨੩. ‘‘ਵਨ੍ਦਿਤ੍ਵਾ ਸੋ ਪਿਤਰਂ ਮਾਤਰਞ੍ਚ, ਅਨੁਸਾਸੇਤ੍ਵਾ ਨੇਗਮਞ੍ਚ ਬਲਞ੍ਚ;

ਸਚ੍ਚਵਾਦੀ ਸਚ੍ਚਾਨੁਰਕ੍ਖਮਾਨੋ, ਅਗਮਾਸਿ ਸੋ ਯਤ੍ਥ ਪੋਰਿਸਾਦੋ’’.

੪੨੪. ‘‘ਕਤੋ ਮਯਾ ਸਙ੍ਕਰੋ ਬ੍ਰਾਹ੍ਮਣੇਨ, ਰਟ੍ਠੇ ਸਕੇ ਇਸ੍ਸਰਿਯੇ ਠਿਤੇਨ;

ਤਂ ਸਙ੍ਕਰਂ ਬ੍ਰਾਹ੍ਮਣਸਪ੍ਪਦਾਯ, ਸਚ੍ਚਾਨੁਰਕ੍ਖੀ ਪੁਨਰਾਗਤੋਸ੍ਮਿ;

ਯਜਸ੍ਸੁ ਯਞ੍ਞਂ ਖਾਦ ਮਂ ਪੋਰਿਸਾਦ’’.

੪੨੫. ‘‘ਨ ਹਾਯਤੇ ਖਾਦਿਤਂ [ਖਾਦਿਤੁਂ (ਸੀ. ਸ੍ਯਾ. ਪੀ.)] ਮਯ੍ਹਂ ਪਚ੍ਛਾ, ਚਿਤਕਾ ਅਯਂ ਤਾਵ ਸਧੂਮਿਕਾਵ [ਸਧੂਮਕਾ ਚ (ਸ੍ਯਾ.)];

ਨਿਦ੍ਧੂਮਕੇ ਪਚਿਤਂ ਸਾਧੁਪਕ੍ਕਂ, ਸੁਣੋਮ [ਸੁਣੋਮਿ (ਸੀ.), ਸੁਣਾਮ (ਪੀ.)] ਗਾਥਾਯੋ ਸਤਾਰਹਾਯੋ’’.

੪੨੬. ‘‘ਅਧਮ੍ਮਿਕੋ ਤ੍ਵਂ ਪੋਰਿਸਾਦਕਾਸਿ [ਪੋਰਿਸਾਦਮਕਾਸਿ (ਕ.)], ਰਟ੍ਠਾ ਚ ਭਟ੍ਠੋ ਉਦਰਸ੍ਸ ਹੇਤੁ;

ਧਮ੍ਮਞ੍ਚਿਮਾ ਅਭਿਵਦਨ੍ਤਿ ਗਾਥਾ, ਧਮ੍ਮੋ ਚ ਅਧਮ੍ਮੋ ਚ ਕੁਹਿਂ ਸਮੇਤਿ.

੪੨੭. ‘‘ਅਧਮ੍ਮਿਕਸ੍ਸ ਲੁਦ੍ਦਸ੍ਸ, ਨਿਚ੍ਚਂ ਲੋਹਿਤਪਾਣਿਨੋ;

ਨਤ੍ਥਿ ਸਚ੍ਚਂ ਕੁਤੋ ਧਮ੍ਮੋ, ਕਿਂ ਸੁਤੇਨ ਕਰਿਸ੍ਸਸਿ’’.

੪੨੮. ‘‘ਯੋ ਮਂਸਹੇਤੁ ਮਿਗਵਂ ਚਰੇਯ੍ਯ, ਯੋ ਵਾ ਹਨੇ ਪੁਰਿਸਮਤ੍ਤਹੇਤੁ;

ਉਭੋਪਿ ਤੇ ਪੇਚ੍ਚ ਸਮਾ ਭਵਨ੍ਤਿ, ਕਸ੍ਮਾ ਨੋ [ਕਸ੍ਮਾ ਨੁ (ਕ.)] ਅਧਮ੍ਮਿਕਂ ਬ੍ਰੂਸਿ ਮਂ ਤ੍ਵਂ’’.

੪੨੯. ‘‘ਪਞ੍ਚ ਪਞ੍ਚਨਖਾ ਭਕ੍ਖਾ, ਖਤ੍ਤਿਯੇਨ ਪਜਾਨਤਾ;

ਅਭਕ੍ਖਂ ਰਾਜ ਭਕ੍ਖੇਸਿ, ਤਸ੍ਮਾ ਅਧਮ੍ਮਿਕੋ ਤੁਵਂ’’.

੪੩੦. ‘‘ਮੁਤ੍ਤੋ ਤੁਵਂ ਪੋਰਿਸਾਦਸ੍ਸ ਹਤ੍ਥਾ, ਗਨ੍ਤ੍ਵਾ ਸਕਂ ਮਨ੍ਦਿਰਂ ਕਾਮਕਾਮੀ;

ਅਮਿਤ੍ਤਹਤ੍ਥਂ ਪੁਨਰਾਗਤੋਸਿ, ਨ ਖਤ੍ਤਧਮ੍ਮੇ ਕੁਸਲੋਸਿ ਰਾਜ’’.

੪੩੧. ‘‘ਯੇ ਖਤ੍ਤਧਮ੍ਮੇ ਕੁਸਲਾ ਭਵਨ੍ਤਿ, ਪਾਯੇਨ ਤੇ ਨੇਰਯਿਕਾ ਭਵਨ੍ਤਿ;

ਤਸ੍ਮਾ ਅਹਂ ਖਤ੍ਤਧਮ੍ਮਂ ਪਹਾਯ, ਸਚ੍ਚਾਨੁਰਕ੍ਖੀ ਪੁਨਰਾਗਤੋਸ੍ਮਿ;

ਯਜਸ੍ਸੁ ਯਞ੍ਞਂ ਖਾਦ ਮਂ ਪੋਰਿਸਾਦ’’.

੪੩੨. ‘‘ਪਾਸਾਦਵਾਸਾ ਪਥਵੀਗਵਸ੍ਸਾ, ਕਾਮਿਤ੍ਥਿਯੋ ਕਾਸਿਕਚਨ੍ਦਨਞ੍ਚ;

ਸਬ੍ਬਂ ਤਹਿਂ ਲਭਸਿ [ਲਬ੍ਭਤਿ (ਪੀ.)] ਸਾਮਿਤਾਯ, ਸਚ੍ਚੇਨ ਕਿਂ ਪਸ੍ਸਸਿ ਆਨਿਸਂਸਂ’’.

੪੩੩. ‘‘ਯੇ ਕੇਚਿਮੇ ਅਤ੍ਥਿ ਰਸਾ ਪਥਬ੍ਯਾ, ਸਚ੍ਚਂ ਤੇਸਂ ਸਾਧੁਤਰਂ ਰਸਾਨਂ;

ਸਚ੍ਚੇ ਠਿਤਾ ਸਮਣਬ੍ਰਾਹ੍ਮਣਾ ਚ, ਤਰਨ੍ਤਿ ਜਾਤਿਮਰਣਸ੍ਸ ਪਾਰਂ’’.

੪੩੪. ‘‘ਮੁਤ੍ਤੋ ਤੁਵਂ ਪੋਰਿਸਾਦਸ੍ਸ ਹਤ੍ਥਾ, ਗਨ੍ਤ੍ਵਾ ਸਕਂ ਮਨ੍ਦਿਰਂ ਕਾਮਕਾਮੀ;

ਅਮਿਤ੍ਤਹਤ੍ਥਂ ਪੁਨਰਾਗਤੋਸਿ, ਨ ਹਿ ਨੂਨ ਤੇ ਮਰਣਭਯਂ ਜਨਿਨ੍ਦ;

ਅਲੀਨਚਿਤ੍ਤੋ ਅਸਿ [ਚ’ਸਿ (ਸੀ. ਸ੍ਯਾ. ਪੀ.)] ਸਚ੍ਚਵਾਦੀ’’.

੪੩੫. ‘‘ਕਤਾ ਮੇ ਕਲ੍ਯਾਣਾ ਅਨੇਕਰੂਪਾ, ਯਞ੍ਞਾ ਯਿਟ੍ਠਾ ਯੇ ਵਿਪੁਲਾ ਪਸਤ੍ਥਾ;

ਵਿਸੋਧਿਤੋ ਪਰਲੋਕਸ੍ਸ ਮਗ੍ਗੋ, ਧਮ੍ਮੇ ਠਿਤੋ ਕੋ ਮਰਣਸ੍ਸ ਭਾਯੇ.

੪੩੬. ‘‘ਕਤਾ ਮੇ ਕਲ੍ਯਾਣਾ ਅਨੇਕਰੂਪਾ, ਯਞ੍ਞਾ ਯਿਟ੍ਠਾ ਯੇ ਵਿਪੁਲਾ ਪਸਤ੍ਥਾ;

ਅਨਾਨੁਤਪ੍ਪਂ ਪਰਲੋਕਂ ਗਮਿਸ੍ਸਂ, ਯਜਸ੍ਸੁ ਯਞ੍ਞਂ ਅਦ [ਖਾਦ (ਸੀ. ਸ੍ਯਾ. ਪੀ.)] ਮਂ ਪੋਰਿਸਾਦ.

੪੩੭. ‘‘ਪਿਤਾ ਚ ਮਾਤਾ ਚ ਉਪਟ੍ਠਿਤਾ ਮੇ, ਧਮ੍ਮੇਨ ਮੇ ਇਸ੍ਸਰਿਯਂ ਪਸਤ੍ਥਂ;

ਵਿਸੋਧਿਤੋ ਪਰਲੋਕਸ੍ਸ ਮਗ੍ਗੋ, ਧਮ੍ਮੇ ਠਿਤੋ ਕੋ ਮਰਣਸ੍ਸ ਭਾਯੇ.

੪੩੮. ‘‘ਪਿਤਾ ਚ ਮਾਤਾ ਚ ਉਪਟ੍ਠਿਤਾ ਮੇ, ਧਮ੍ਮੇਨ ਮੇ ਇਸ੍ਸਰਿਯਂ ਪਸਤ੍ਥਂ;

ਅਨਾਨੁਤਪ੍ਪਂ ਪਰਲੋਕਂ ਗਮਿਸ੍ਸਂ, ਯਜਸ੍ਸੁ ਯਞ੍ਞਂ ਅਦ ਮਂ ਪੋਰਿਸਾਦ.

੪੩੯. ‘‘ਞਾਤੀਸੁ ਮਿਤ੍ਤੇਸੁ ਕਤਾ ਮੇ ਕਾਰਾ [ਕਤੂਪਕਾਰੋ (ਸ੍ਯਾ. ਕ.)], ਧਮ੍ਮੇਨ ਮੇ ਇਸ੍ਸਰਿਯਂ ਪਸਤ੍ਥਂ;

ਵਿਸੋਧਿਤੋ ਪਰਲੋਕਸ੍ਸ ਮਗ੍ਗੋ, ਧਮ੍ਮੇ ਠਿਤੋ ਕੋ ਮਰਣਸ੍ਸ ਭਾਯੇ.

੪੪੦. ‘‘ਞਾਤੀਸੁਂ ਮਿਤ੍ਤੇਸੁ ਕਤਾ ਮੇ ਕਾਰਾ, ਧਮ੍ਮੇਨ ਮੇ ਇਸ੍ਸਰਿਯਂ ਪਸਤ੍ਥਂ;

ਅਨਾਨੁਤਪ੍ਪਂ ਪਰਲੋਕਂ ਗਮਿਸ੍ਸਂ, ਯਜਸ੍ਸੁ ਯਞ੍ਞਂ ਅਦ ਮਂ ਪੋਰਿਸਾਦ.

੪੪੧. ‘‘ਦਿਨ੍ਨਂ ਮੇ ਦਾਨਂ ਬਹੁਧਾ ਬਹੂਨਂ, ਸਨ੍ਤਪ੍ਪਿਤਾ ਸਮਣਬ੍ਰਾਹ੍ਮਣਾ ਚ;

ਵਿਸੋਧਿਤੋ ਪਰਲੋਕਸ੍ਸ ਮਗ੍ਗੋ, ਧਮ੍ਮੇ ਠਿਤੋ ਕੋ ਮਰਣਸ੍ਸ ਭਾਯੇ.

੪੪੨. ‘‘ਦਿਨ੍ਨਂ ਮੇ ਦਾਨਂ ਬਹੁਧਾ ਬਹੂਨਂ, ਸਨ੍ਤਪ੍ਪਿਤਾ ਸਮਣਬ੍ਰਾਹ੍ਮਣਾ ਚ;

ਅਨਾਨੁਤਪ੍ਪਂ ਪਰਲੋਕਂ ਗਮਿਸ੍ਸਂ, ਯਜਸ੍ਸੁ ਯਞ੍ਞਂ ਅਦ ਮਂ ਪੋਰਿਸਾਦ’’.