੯. ਉਪਾਹਨਵਗ੍ਗੋ
੨੩੧. ਉਪਾਹਨਜਾਤਕਂ (੨-੯-੧)
੧੬੧. ਯਥਾਪਿ ਕੀਤਾ ਪੁਰਿਸਸ੍ਸੁਪਾਹਨਾ, ਸੁਖਸ੍ਸ ਅਤ੍ਥਾਯ ਦੁਖਂ ਉਦਬ੍ਬਹੇ;
ਘਮ੍ਮਾਭਿਤਤ੍ਤਾ ਥਲਸਾ ਪਪੀਲ਼ਿਤਾ, ਤਸ੍ਸੇਵ ਪਾਦੇ ਪੁਰਿਸਸ੍ਸ ਖਾਦਰੇ.
੧੬੨. ਏਵਮੇਵ ਯੋ ਦੁਕ੍ਕੁਲੀਨੋ ਅਨਰਿਯੋ, ਤਮ੍ਮਾਕ [ਤਮ੍ਹਾਕ (ਸੀ.), ਤੁਮ੍ਹਾਕ (ਸ੍ਯਾ. ਪੀ.)] ਵਿਜ੍ਜਞ੍ਚ ਸੁਤਞ੍ਚ ਆਦਿਯ;
ਤਮੇਵ ਸੋ ਤਤ੍ਥ ਸੁਤੇਨ ਖਾਦਤਿ, ਅਨਰਿਯੋ ਵੁਚ੍ਚਤਿ ਦੁਪਾਹਨੂਪਮੋਤਿ [ਪਾਨਦੂਪਮੋਤਿ (ਸੀ. ਪੀ.)].
ਉਪਾਹਨਜਾਤਕਂ ਪਠਮਂ.
੨੩੨. ਵੀਣਾਗੁਣਜਾਤਕਂ (੨-੯-੨)
੧੬੩. ਏਕਚਿਨ੍ਤਿਤੋ ਯਮਤ੍ਥੋ, ਬਾਲੋ ਅਪਰਿਣਾਯਕੋ;
ਨ ਹਿ ਖੁਜ੍ਜੇਨ ਵਾਮੇਨ, ਭੋਤਿ ਸਙ੍ਗਨ੍ਤੁਮਰਹਸਿ.
੧੬੪. ਪੁਰਿਸੂਸਭਂ ਮਞ੍ਞਮਾਨਾ, ਅਹਂ ਖੁਜ੍ਜਮਕਾਮਯਿਂ;
ਸੋਯਂ ਸਂਕੁਟਿਤੋ ਸੇਤਿ, ਛਿਨ੍ਨਤਨ੍ਤਿ ਯਥਾ ਵਿਣਾਤਿ [ਥੁਣਾਤਿ (ਸੀ.)].
ਵੀਣਾਗੁਣਜਾਤਕਂ ਦੁਤਿਯਂ.
੨੩੩. ਵਿਕਣ੍ਣਜਾਤਕਂ (੨-੯-੩)
੧੬੫. ਕਾਮਂ ਯਹਿਂ ਇਚ੍ਛਸਿ ਤੇਨ ਗਚ੍ਛ, ਵਿਦ੍ਧੋਸਿ ਮਮ੍ਮਮ੍ਹਿ [ਮਮਸ੍ਮਿ (ਕ.)] ਵਿਕਣ੍ਣਕੇਨ;
ਹਤੋਸਿ ਭਤ੍ਤੇਨ ਸੁਵਾਦਿਤੇਨ [ਸਵਾਦਿਤੇਨ (ਸੀ. ਸ੍ਯਾ. ਪੀ.)], ਲੋਲੋ ਚ ਮਚ੍ਛੇ ਅਨੁਬਨ੍ਧਮਾਨੋ.
੧੬੬. ਏਵਮ੍ਪਿ ਲੋਕਾਮਿਸਂ ਓਪਤਨ੍ਤੋ, ਵਿਹਞ੍ਞਤੀ ਚਿਤ੍ਤਵਸਾਨੁਵਤ੍ਤੀ;
ਸੋ ਹਞ੍ਞਤਿ ਞਾਤਿਸਖਾਨ ਮਜ੍ਝੇ, ਮਚ੍ਛਾਨੁਗੋ ਸੋਰਿਵ ਸੁਂਸੁਮਾਰੋਤਿ [ਸੁਸੁਮਾਰੋ (ਕ.)].
ਵਿਕਣ੍ਣਜਾਤਕਂ ਤਤਿਯਂ.
੨੩੪. ਅਸਿਤਾਭੂਜਾਤਕਂ (੨-੯-੪)
੧੬੭. ਤ੍ਵਮੇਵ ਦਾਨਿਮਕਰ [ਮਕਰਿ (ਸ੍ਯਾ.), ਮਕਰਾ (ਕ. ਸੀ.)], ਯਂ ਕਾਮੋ ਬ੍ਯਗਮਾ ਤਯਿ;
ਸੋਯਂ ਅਪ੍ਪਟਿਸਨ੍ਧਿਕੋ, ਖਰਛਿਨ੍ਨਂਵ ਰੇਨੁਕਂ [ਰੇਰੁਕਂ (ਸੀ. ਪੀ.)].
੧੬੮. ਅਤ੍ਰਿਚ੍ਛਂ [ਅਤ੍ਰਿਚ੍ਛਾ (ਸੀ. ਸ੍ਯਾ. ਪੀ.)] ਅਤਿਲੋਭੇਨ, ਅਤਿਲੋਭਮਦੇਨ ਚ;
ਏਵਂ ਹਾਯਤਿ ਅਤ੍ਥਮ੍ਹਾ, ਅਹਂਵ ਅਸਿਤਾਭੁਯਾਤਿ.
ਅਸਿਤਾਭੂਜਾਤਕਂ ਚਤੁਤ੍ਥਂ.
੨੩੫. ਵਚ੍ਛਨਖਜਾਤਕਂ (੨-੯-੫)
੧੬੯. ਸੁਖਾ ਘਰਾ ਵਚ੍ਛਨਖ, ਸਹਿਰਞ੍ਞਾ ਸਭੋਜਨਾ;
ਯਤ੍ਥ ਭੁਤ੍ਵਾ ਪਿਵਿਤ੍ਵਾ ਚ, ਸਯੇਯ੍ਯਾਥ ਅਨੁਸ੍ਸੁਕੋ.
੧੭੦. ਘਰਾ ਨਾਨੀਹਮਾਨਸ੍ਸ, ਘਰਾ ਨਾਭਣਤੋ ਮੁਸਾ;
ਘਰਾ ਨਾਦਿਨ੍ਨਦਣ੍ਡਸ੍ਸ, ਪਰੇਸਂ ਅਨਿਕੁਬ੍ਬਤੋ [ਅਨਿਕ੍ਰੁਬ੍ਬਤੋ (ਕ.)];
ਏਵਂ ਛਿਦ੍ਦਂ ਦੁਰਭਿਸਮ੍ਭਵਂ [ਦੁਰਭਿਭਵਂ (ਸੀ. ਪੀ.)], ਕੋ ਘਰਂ ਪਟਿਪਜ੍ਜਤੀਤਿ.
ਵਚ੍ਛਨਖਜਾਤਕਂ ਪਞ੍ਚਮਂ.
੨੩੬. ਬਕਜਾਤਕਂ (੨-੯-੬)
੧੭੧. ਭਦ੍ਦਕੋ ਵਤਯਂ ਪਕ੍ਖੀ, ਦਿਜੋ ਕੁਮੁਦਸਨ੍ਨਿਭੋ;
ਵੂਪਸਨ੍ਤੇਹਿ ਪਕ੍ਖੇਹਿ, ਮਨ੍ਦਮਨ੍ਦੋਵ ਝਾਯਤਿ.
੧੭੨. ਨਾਸ੍ਸ ਸੀਲਂ ਵਿਜਾਨਾਥ, ਅਨਞ੍ਞਾਯ ਪਸਂਸਥ;
ਅਮ੍ਹੇ ਦਿਜੋ ਨ ਪਾਲੇਤਿ, ਤੇਨ ਪਕ੍ਖੀ ਨ ਫਨ੍ਦਤੀਤਿ.
ਬਕਜਾਤਕਂ ਛਟ੍ਠਂ.
੨੩੭. ਸਾਕੇਤਜਾਤਕਂ (੨-੯-੭)
੧੭੩. ਕੋ ਨੁ ਖੋ ਭਗਵਾ ਹੇਤੁ, ਏਕਚ੍ਚੇ ਇਧ ਪੁਗ੍ਗਲੇ;
ਅਤੀਵ ਹਦਯਂ ਨਿਬ੍ਬਾਤਿ, ਚਿਤ੍ਤਞ੍ਚਾਪਿ ਪਸੀਦਤਿ.
੧੭੪. ਪੁਬ੍ਬੇਵ ਸਨ੍ਨਿਵਾਸੇਨ, ਪਚ੍ਚੁਪ੍ਪਨ੍ਨਹਿਤੇਨ ਵਾ;
ਏਵਂ ਤਂ ਜਾਯਤੇ ਪੇਮਂ, ਉਪ੍ਪਲਂਵ ਯਥੋਦਕੇਤਿ.
ਸਾਕੇਤਜਾਤਕਂ ਸਤ੍ਤਮਂ.
੨੩੮. ਏਕਪਦਜਾਤਕਂ (੨-੯-੮)
੧੭੫. ਇਙ੍ਘ ਏਕਪਦਂ ਤਾਤ, ਅਨੇਕਤ੍ਥਪਦਸ੍ਸਿਤਂ [ਪਦਨਿਸ੍ਸਿਤਂ (ਸੀ. ਪੀ.)];
ਕਿਞ੍ਚਿ ਸਙ੍ਗਾਹਿਕਂ ਬ੍ਰੂਸਿ, ਯੇਨਤ੍ਥੇ ਸਾਧਯੇਮਸੇ.
੧੭੬. ਦਕ੍ਖੇਯ੍ਯੇਕਪਦਂ ਤਾਤ, ਅਨੇਕਤ੍ਥਪਦਸ੍ਸਿਤਂ;
ਤਞ੍ਚ ਸੀਲੇਨ ਸਞ੍ਞੁਤ੍ਤਂ, ਖਨ੍ਤਿਯਾ ਉਪਪਾਦਿਤਂ;
ਅਲਂ ਮਿਤ੍ਤੇ ਸੁਖਾਪੇਤੁਂ, ਅਮਿਤ੍ਤਾਨਂ ਦੁਖਾਯ ਚਾਤਿ.
ਏਕਪਦਜਾਤਕਂ ਅਟ੍ਠਮਂ.
੨੩੯. ਹਰਿਤਮਣ੍ਡੂਕਜਾਤਕਂ (੨-੯-੯)
੧੭੭. ਆਸੀਵਿਸਮ੍ਪਿ ਮਂ [ਆਸੀਵਿਸਂ ਮਮਂ (ਸੀ. ਪੀ.)] ਸਨ੍ਤਂ, ਪਵਿਟ੍ਠਂ ਕੁਮਿਨਾਮੁਖਂ;
ਰੁਚ੍ਚਤੇ ਹਰਿਤਾਮਾਤਾ, ਯਂ ਮਂ ਖਾਦਨ੍ਤਿ ਮਚ੍ਛਕਾ.
੧੭੮. ਵਿਲੁਮ੍ਪਤੇਵ ਪੁਰਿਸੋ, ਯਾਵਸ੍ਸ ਉਪਕਪ੍ਪਤਿ;
ਯਦਾ ਚਞ੍ਞੇ ਵਿਲੁਮ੍ਪਨ੍ਤਿ, ਸੋ ਵਿਲੁਤ੍ਤੋ ਵਿਲੁਮ੍ਪਤੀਤਿ [ਵਿਲੁਪ੍ਪਤੀਤਿ (?)].
ਹਰਿਤਮਣ੍ਡੂਕਜਾਤਕਂ ਨਵਮਂ.
੨੪੦. ਮਹਾਪਿਙ੍ਗਲਜਾਤਕਂ (੨-੯-੧੦)
੧੭੯. ਸਬ੍ਬੋ ਜਨੋ ਹਿਂਸਿਤੋ ਪਿਙ੍ਗਲੇਨ, ਤਸ੍ਮਿਂ ਮਤੇ ਪਚ੍ਚਯਾ [ਪਚ੍ਚਯਂ (ਸੀ. ਸ੍ਯਾ. ਪੀ.)] ਵੇਦਯਨ੍ਤਿ;
ਪਿਯੋ ਨੁ ਤੇ ਆਸਿ ਅਕਣ੍ਹਨੇਤ੍ਤੋ, ਕਸ੍ਮਾ ਨੁ ਤ੍ਵਂ ਰੋਦਸਿ ਦ੍ਵਾਰਪਾਲ.
੧੮੦. ਨ ਮੇ ਪਿਯੋ ਆਸਿ ਅਕਣ੍ਹਨੇਤ੍ਤੋ, ਭਾਯਾਮਿ ਪਚ੍ਚਾਗਮਨਾਯ ਤਸ੍ਸ;
ਇਤੋ ਗਤੋ ਹਿਂਸੇਯ੍ਯ ਮਚ੍ਚੁਰਾਜਂ, ਸੋ ਹਿਂਸਿਤੋ ਆਨੇਯ੍ਯ ਪੁਨ ਇਧ.
੧੮੧. ਦਡ੍ਢੋ ਵਾਹਸਹਸ੍ਸੇਹਿ, ਸਿਤ੍ਤੋ ਘਟਸਤੇਹਿ ਸੋ;
ਪਰਿਕ੍ਖਤਾ ਚ ਸਾ ਭੂਮਿ, ਮਾ ਭਾਯਿ ਨਾਗਮਿਸ੍ਸਤੀਤਿ.
ਮਹਾਪਿਙ੍ਗਲਜਾਤਕਂ ਦਸਮਂ.
ਉਪਾਹਨਵਗ੍ਗੋ ਨਵਮੋ.
ਤਸ੍ਸੁਦ੍ਦਾਨਂ –
ਵਰੁਪਾਹਨ ਖੁਜ੍ਜ ਵਿਕਣ੍ਣਕਕੋ, ਅਸਿਤਾਭੁਯ ਪਞ੍ਚਮਵਚ੍ਛਨਖੋ;
ਦਿਜ ਪੇਮਵਰੁਤ੍ਤਮਏਕਪਦਂ, ਕੁਮਿਨਾਮੁਖ ਪਿਙ੍ਗਲਕੇਨ ਦਸਾਤਿ.