੧੦. ਸਿਙ੍ਗਾਲਵਗ੍ਗੋ

੨੪੧. ਸਬ੍ਬਦਾਠਿਜਾਤਕਂ (੨-੧੦-੧)

੧੮੨. ਸਿਙ੍ਗਾਲੋ ਮਾਨਥਦ੍ਧੋ ਚ, ਪਰਿਵਾਰੇਨ ਅਤ੍ਥਿਕੋ;

ਪਾਪੁਣਿ ਮਹਤਿਂ ਭੂਮਿਂ, ਰਾਜਾਸਿ ਸਬ੍ਬਦਾਠਿਨਂ.

੧੮੩. ਏਵਮੇਵ ਮਨੁਸ੍ਸੇਸੁ, ਯੋ ਹੋਤਿ ਪਰਿਵਾਰਵਾ;

ਸੋ ਹਿ ਤਤ੍ਥ ਮਹਾ ਹੋਤਿ, ਸਿਙ੍ਗਾਲੋ ਵਿਯ ਦਾਠਿਨਨ੍ਤਿ.

ਸਬ੍ਬਦਾਠਿਜਾਤਕਂ ਪਠਮਂ.

੨੪੨. ਸੁਨਖਜਾਤਕਂ (੨-੧੦-੨)

੧੮੪. ਬਾਲੋ ਵਤਾਯਂ ਸੁਨਖੋ, ਯੋ ਵਰਤ੍ਤਂ [ਯੋ ਚ ਯੋਤ੍ਤਂ (ਕ.)] ਨ ਖਾਦਤਿ;

ਬਨ੍ਧਨਾ ਚ ਪਮੁਞ੍ਚੇਯ੍ਯ, ਅਸਿਤੋ ਚ ਘਰਂ ਵਜੇ.

੧੮੫. ਅਟ੍ਠਿਤਂ ਮੇ ਮਨਸ੍ਮਿਂ ਮੇ, ਅਥੋ ਮੇ ਹਦਯੇ ਕਤਂ;

ਕਾਲਞ੍ਚ ਪਟਿਕਙ੍ਖਾਮਿ, ਯਾਵ ਪਸ੍ਸੁਪਤੂ ਜਨੋ [ਪਸੁਪਤੁਜ੍ਜਨੋ (ਸ੍ਯਾ. ਕ.)].

ਸੁਨਖਜਾਤਕਂ ਦੁਤਿਯਂ.

੨੪੩. ਗੁਤ੍ਤਿਲਜਾਤਕਂ (੨-੧੦-੩)

੧੮੬. ਸਤ੍ਤਤਨ੍ਤਿਂ ਸੁਮਧੁਰਂ, ਰਾਮਣੇਯ੍ਯਂ ਅਵਾਚਯਿਂ;

ਸੋ ਮਂ ਰਙ੍ਗਮ੍ਹਿ ਅਵ੍ਹੇਤਿ, ਸਰਣਂ ਮੇ ਹੋਹਿ ਕੋਸਿਯ.

੧੮੭. ਅਹਂ ਤਂ ਸਰਣਂ ਸਮ੍ਮ [ਅਹਂ ਤੇ ਸਰਣਂ ਹੋਮਿ (ਵਿ. ਵ. ੩੨੮)], ਅਹਮਾਚਰਿਯਪੂਜਕੋ;

ਨ ਤਂ ਜਯਿਸ੍ਸਤਿ ਸਿਸ੍ਸੋ, ਸਿਸ੍ਸਮਾਚਰਿਯ ਜੇਸ੍ਸਸੀਤਿ.

ਗੁਤ੍ਤਿਲਜਾਤਕਂ ਤਤਿਯਂ.

੨੪੪. ਵਿਗਤਿਚ੍ਛਜਾਤਕਂ (੨-੧੦-੪)

੧੮੮. ਯਂ ਪਸ੍ਸਤਿ ਨ ਤਂ ਇਚ੍ਛਤਿ, ਯਞ੍ਚ ਨ ਪਸ੍ਸਤਿ ਤਂ ਕਿਰਿਚ੍ਛਤਿ;

ਮਞ੍ਞਾਮਿ ਚਿਰਂ ਚਰਿਸ੍ਸਤਿ, ਨ ਹਿ ਤਂ ਲਚ੍ਛਤਿ ਯਂ ਸ ਇਚ੍ਛਤਿ.

੧੮੯. ਯਂ ਲਭਤਿ ਨ ਤੇਨ ਤੁਸ੍ਸਤਿ, ਯਞ੍ਚ ਪਤ੍ਥੇਤਿ ਲਦ੍ਧਂ ਹੀਲ਼ੇਤਿ;

ਇਚ੍ਛਾ ਹਿ ਅਨਨ੍ਤਗੋਚਰਾ, ਵਿਗਤਿਚ੍ਛਾਨ [ਵੀਤਿਚ੍ਛਾਨਂ (ਸੀ. ਪੀ.)] ਨਮੋ ਕਰੋਮਸੇਤਿ.

ਵਿਗਤਿਚ੍ਛ [ਵੀਤਿਚ੍ਛ (ਸੀ. ਪੀ.)] ਜਾਤਕਂ ਚਤੁਤ੍ਥਂ.

੨੪੫. ਮੂਲਪਰਿਯਾਯਜਾਤਕਂ (੨-੧੦-੫)

੧੯੦. ਕਾਲੋ ਘਸਤਿ ਭੂਤਾਨਿ, ਸਬ੍ਬਾਨੇਵ ਸਹਤ੍ਤਨਾ;

ਯੋ ਚ ਕਾਲਘਸੋ ਭੂਤੋ, ਸ ਭੂਤਪਚਨਿਂ ਪਚਿ.

੧੯੧. ਬਹੂਨਿ ਨਰਸੀਸਾਨਿ, ਲੋਮਸਾਨਿ ਬ੍ਰਹਾਨਿ ਚ;

ਗੀਵਾਸੁ ਪਟਿਮੁਕ੍ਕਾਨਿ, ਕੋਚਿਦੇਵੇਤ੍ਥ ਕਣ੍ਣਵਾਤਿ.

ਮੂਲਪਰਿਯਾਯਜਾਤਕਂ ਪਞ੍ਚਮਂ.

੨੪੬. ਬਾਲੋਵਾਦਜਾਤਕਂ (੨-੧੦-੬)

੧੯੨. ਹਨ੍ਤ੍ਵਾ ਛੇਤ੍ਵਾ [ਝਤ੍ਵਾ (ਸੀ. ਪੀ.), ਘਤ੍ਵਾ (ਸ੍ਯਾ.)] ਵਧਿਤ੍ਵਾ ਚ, ਦੇਤਿ ਦਾਨਂ ਅਸਞ੍ਞਤੋ;

ਏਦਿਸਂ ਭਤ੍ਤਂ ਭੁਞ੍ਜਮਾਨੋ, ਸ ਪਾਪਮੁਪਲਿਮ੍ਪਤਿ [ਸ ਪਾਪੇਨ ਉਪਲਿਪ੍ਪਤਿ (ਸੀ. ਪੀ.)].

੧੯੩. ਪੁਤ੍ਤਦਾਰਮ੍ਪਿ ਚੇ ਹਨ੍ਤ੍ਵਾ, ਦੇਤਿ ਦਾਨਂ ਅਸਞ੍ਞਤੋ;

ਭੁਞ੍ਜਮਾਨੋਪਿ ਸਪ੍ਪਞ੍ਞੋ, ਨ ਪਾਪਮੁਪਲਿਮ੍ਪਤੀਤਿ.

ਬਾਲੋਵਾਦਜਾਤਕਂ ਛਟ੍ਠਂ.

੨੪੭. ਪਾਦਞ੍ਜਲੀਜਾਤਕਂ (੨-੧੦-੭)

੧੯੪. ਅਦ੍ਧਾ ਪਾਦਞ੍ਜਲੀ ਸਬ੍ਬੇ, ਪਞ੍ਞਾਯ ਅਤਿਰੋਚਤਿ;

ਤਥਾ ਹਿ ਓਟ੍ਠਂ ਭਞ੍ਜਤਿ, ਉਤ੍ਤਰਿਂ ਨੂਨ ਪਸ੍ਸਤਿ.

੧੯੫. ਨਾਯਂ ਧਮ੍ਮਂ ਅਧਮ੍ਮਂ ਵਾ, ਅਤ੍ਥਾਨਤ੍ਥਞ੍ਚ ਬੁਜ੍ਝਤਿ;

ਅਞ੍ਞਤ੍ਰ ਓਟ੍ਠਨਿਬ੍ਭੋਗਾ, ਨਾਯਂ ਜਾਨਾਤਿ ਕਿਞ੍ਚਨਨ੍ਤਿ.

ਪਾਦਞ੍ਜਲੀਜਾਤਕਂ ਸਤ੍ਤਮਂ.

੨੪੮. ਕਿਂਸੁਕੋਪਮਜਾਤਕਂ (੨-੧੦-੮)

੧੯੬. ਸਬ੍ਬੇਹਿ ਕਿਂਸੁਕੋ ਦਿਟ੍ਠੋ, ਕਿਂਨ੍ਵੇਤ੍ਥ ਵਿਚਿਕਿਚ੍ਛਥ;

ਨ ਹਿ ਸਬ੍ਬੇਸੁ ਠਾਨੇਸੁ, ਸਾਰਥੀ ਪਰਿਪੁਚ੍ਛਿਤੋ.

੧੯੭. ਏਵਂ ਸਬ੍ਬੇਹਿ ਞਾਣੇਹਿ, ਯੇਸਂ ਧਮ੍ਮਾ ਅਜਾਨਿਤਾ;

ਤੇ ਵੇ ਧਮ੍ਮੇਸੁ ਕਙ੍ਖਨ੍ਤਿ, ਕਿਂਸੁਕਸ੍ਮਿਂਵ ਭਾਤਰੋਤਿ.

ਕਿਂਸੁਕੋਪਮਜਾਤਕਂ ਅਟ੍ਠਮਂ.

੨੪੯. ਸਾਲਕਜਾਤਕਂ (੨-੧੦-੯)

੧੯੮. ਏਕਪੁਤ੍ਤਕੋ ਭਵਿਸ੍ਸਸਿ, ਤ੍ਵਞ੍ਚ ਨੋ ਹੇਸ੍ਸਸਿ ਇਸ੍ਸਰੋ ਕੁਲੇ;

ਓਰੋਹ ਦੁਮਸ੍ਮਾ ਸਾਲਕ, ਏਹਿ ਦਾਨਿ ਘਰਕਂ ਵਜੇਮਸੇ.

੧੯੯. ਨਨੁ ਮਂ ਸੁਹਦਯੋਤਿ [ਨਨੁ ਮਂ ਹਦਯੇਤਿ (ਸੀ. ਪੀ.)] ਮਞ੍ਞਸਿ, ਯਞ੍ਚ ਮਂ ਹਨਸਿ ਵੇਲ਼ੁਯਟ੍ਠਿਯਾ;

ਪਕ੍ਕਮ੍ਬਵਨੇ ਰਮਾਮਸੇ, ਗਚ੍ਛ ਤ੍ਵਂ ਘਰਕਂ ਯਥਾਸੁਖਨ੍ਤਿ.

ਸਾਲਕਜਾਤਕਂ ਨਵਮਂ.

੨੫੦. ਕਪਿਜਾਤਕਂ (੨-੧੦-੧੦)

੨੦੦. ਅਯਂ ਇਸੀ ਉਪਸਮਸਂਯਮੇ ਰਤੋ, ਸ ਤਿਟ੍ਠਤਿ [ਸਨ੍ਤਿਟ੍ਠਤਿ (ਸੀ. ਪੀ.)] ਸਿਸਿਰਭਯੇਨ ਅਟ੍ਟਿਤੋ;

ਹਨ੍ਦ ਅਯਂ ਪਵਿਸਤੁਮਂ ਅਗਾਰਕਂ, ਵਿਨੇਤੁ ਸੀਤਂ ਦਰਥਞ੍ਚ ਕੇਵਲਂ.

੨੦੧. ਨਾਯਂ ਇਸੀ ਉਪਸਮਸਂਯਮੇ ਰਤੋ, ਕਪੀ ਅਯਂ ਦੁਮਵਰਸਾਖਗੋਚਰੋ;

ਸੋ ਦੂਸਕੋ ਰੋਸਕੋ ਚਾਪਿ ਜਮ੍ਮੋ, ਸਚੇਵਜੇਮਮ੍ਪਿ [ਸਚੇ + ਆਵਜੇ + ਇਮਮ੍ਪਿ] ਦੂਸੇਯ੍ਯਗਾਰਨ੍ਤਿ [ਦੂਸਯੇ ਘਰਨ੍ਤਿ (ਸੀ. ਸ੍ਯਾ. ਪੀ.)].

ਕਪਿਜਾਤਕਂ ਦਸਮਂ.

ਸਿਙ੍ਗਾਲਵਗ੍ਗੋ ਦਸਮੋ.

ਤਸ੍ਸੁਦ੍ਦਾਨਂ –

ਅਥ ਰਾਜਾ ਸਿਙ੍ਗਾਲਵਰੋ ਸੁਨਖੋ, ਤਥਾ ਕੋਸਿਯ ਇਚ੍ਛਤਿ ਕਾਲਘਸੋ;

ਅਥ ਦਾਨਵਰੋਟ੍ਠਪਿ ਸਾਰਥਿਨਾ, ਪੁਨਮ੍ਬਵਨਞ੍ਚ ਸਿਸਿਰਕਪਿ ਦਸਾਤਿ.

ਅਥ ਵਗ੍ਗੁਦ੍ਦਾਨਂ –

ਦਲ਼੍ਹਞ੍ਚ ਵਗ੍ਗਂ ਅਪਰੇਨ ਸਨ੍ਥਵਂ, ਕਲ੍ਯਾਣਵਗ੍ਗਾਸਦਿਸੋ ਚ ਰੂਹਕਂ;

ਨਤਂਦਲ਼੍ਹ ਬੀਰਣਥਮ੍ਭਕਂ ਪੁਨ, ਕਾਸਾਵੁਪਾਹਨ ਸਿਙ੍ਗਾਲਕੇਨ ਦਸਾਤਿ.

ਦੁਕਨਿਪਾਤਂ ਨਿਟ੍ਠਿਤਂ.