੮. ਕਾਸਾਵਵਗ੍ਗੋ

੨੨੧. ਕਾਸਾਵਜਾਤਕਂ (੨-੮-੧)

੧੪੧. ਅਨਿਕ੍ਕਸਾਵੋ ਕਾਸਾਵਂ, ਯੋ ਵਤ੍ਥਂ ਪਰਿਦਹਿਸ੍ਸਤਿ [ਪਰਿਦਹੇਸ੍ਸਤਿ (ਸੀ. ਪੀ.)];

ਅਪੇਤੋ ਦਮਸਚ੍ਚੇਨ, ਨ ਸੋ ਕਾਸਾਵਮਰਹਤਿ.

੧੪੨. ਯੋ ਚ ਵਨ੍ਤਕਸਾਵਸ੍ਸ, ਸੀਲੇਸੁ ਸੁਸਮਾਹਿਤੋ;

ਉਪੇਤੋ ਦਮਸਚ੍ਚੇਨ, ਸ ਵੇ ਕਾਸਾਵਮਰਹਤੀਤਿ.

ਕਾਸਾਵਜਾਤਕਂ ਪਠਮਂ.

੨੨੨. ਚੂਲ਼ਨਨ੍ਦਿਯਜਾਤਕਂ (੨-੮-੨)

੧੪੩. ਇਦਂ ਤਦਾਚਰਿਯਵਚੋ, ਪਾਰਾਸਰਿਯੋ ਯਦਬ੍ਰਵਿ [ਪੋਰਾਣਾਚਰਿਯੋਬ੍ਰਵਿ (ਕ.)];

ਮਾਸੁ ਤ੍ਵਂ ਅਕਰਿ [ਅਕਰਾ (ਸੀ. ਪੀ.)] ਪਾਪਂ, ਯਂ ਤ੍ਵਂ ਪਚ੍ਛਾ ਕਤਂ ਤਪੇ.

੧੪੪. ਯਾਨਿ ਕਰੋਤਿ ਪੁਰਿਸੋ, ਤਾਨਿ ਅਤ੍ਤਨਿ ਪਸ੍ਸਤਿ;

ਕਲ੍ਯਾਣਕਾਰੀ ਕਲ੍ਯਾਣਂ, ਪਾਪਕਾਰੀ ਚ ਪਾਪਕਂ;

ਯਾਦਿਸਂ ਵਪਤੇ ਬੀਜਂ, ਤਾਦਿਸਂ ਹਰਤੇ ਫਲਨ੍ਤਿ.

ਚੂਲ਼ਨਨ੍ਦਿਯਜਾਤਕਂ ਦੁਤਿਯਂ.

੨੨੩. ਪੁਟਭਤ੍ਤਜਾਤਕਂ (੨-੮-੩)

੧੪੫. ਨਮੇ ਨਮਨ੍ਤਸ੍ਸ ਭਜੇ ਭਜਨ੍ਤਂ, ਕਿਚ੍ਚਾਨੁਕੁਬ੍ਬਸ੍ਸ ਕਰੇਯ੍ਯ ਕਿਚ੍ਚਂ;

ਨਾਨਤ੍ਥਕਾਮਸ੍ਸ ਕਰੇਯ੍ਯ ਅਤ੍ਥਂ, ਅਸਮ੍ਭਜਨ੍ਤਮ੍ਪਿ ਨ ਸਮ੍ਭਜੇਯ੍ਯ.

੧੪੬. ਚਜੇ ਚਜਨ੍ਤਂ ਵਨਥਂ ਨ ਕਯਿਰਾ, ਅਪੇਤਚਿਤ੍ਤੇਨ ਨ ਸਮ੍ਭਜੇਯ੍ਯ;

ਦਿਜੋ ਦੁਮਂ ਖੀਣਫਲਨ੍ਤਿ ਞਤ੍ਵਾ, ਅਞ੍ਞਂ ਸਮੇਕ੍ਖੇਯ੍ਯ ਮਹਾ ਹਿ ਲੋਕੋਤਿ.

ਪੁਟਭਤ੍ਤਜਾਤਕਂ ਤਤਿਯਂ.

੨੨੪. ਕੁਮ੍ਭਿਲਜਾਤਕਂ (੨-੮-੪)

੧੪੭. ਯਸ੍ਸੇਤੇ ਚਤੁਰੋ ਧਮ੍ਮਾ, ਵਾਨਰਿਨ੍ਦ ਯਥਾ ਤਵ;

ਸਚ੍ਚਂ ਧਮ੍ਮੋ ਧਿਤਿ ਚਾਗੋ, ਦਿਟ੍ਠਂ ਸੋ ਅਤਿਵਤ੍ਤਤਿ.

੧੪੮. ਯਸ੍ਸ ਚੇਤੇ ਨ ਵਿਜ੍ਜਨ੍ਤਿ, ਗੁਣਾ ਪਰਮਭਦ੍ਦਕਾ;

ਸਚ੍ਚਂ ਧਮ੍ਮੋ ਧਿਤਿ ਚਾਗੋ, ਦਿਟ੍ਠਂ ਸੋ ਨਾਤਿਵਤ੍ਤਤੀਤਿ.

ਕੁਮ੍ਭਿਲਜਾਤਕਂ ਚਤੁਤ੍ਥਂ.

੨੨੫. ਖਨ੍ਤਿਵਣ੍ਣਜਾਤਕਂ (੨-੮-੫)

੧੪੯. ਅਤ੍ਥਿ ਮੇ ਪੁਰਿਸੋ ਦੇਵ, ਸਬ੍ਬਕਿਚ੍ਚੇਸੁ ਬ੍ਯਾਵਟੋ [ਵਾਵਟੋ (ਕ.)];

ਤਸ੍ਸ ਚੇਕੋਪਰਾਧਤ੍ਥਿ, ਤਤ੍ਥ ਤ੍ਵਂ ਕਿਨ੍ਤਿ ਮਞ੍ਞਸਿ.

੧੫੦. ਅਮ੍ਹਾਕਮ੍ਪਤ੍ਥਿ ਪੁਰਿਸੋ, ਏਦਿਸੋ ਇਧ ਵਿਜ੍ਜਤਿ;

ਦੁਲ੍ਲਭੋ ਅਙ੍ਗਸਮ੍ਪਨ੍ਨੋ, ਖਨ੍ਤਿਰਸ੍ਮਾਕ ਰੁਚ੍ਚਤੀਤਿ.

ਖਨ੍ਤਿਵਣ੍ਣਜਾਤਕਂ ਪਞ੍ਚਮਂ.

੨੨੬. ਕੋਸਿਯਜਾਤਕਂ (੨-੮-੬)

੧੫੧. ਕਾਲੇ ਨਿਕ੍ਖਮਨਾ ਸਾਧੁ, ਨਾਕਾਲੇ ਸਾਧੁ ਨਿਕ੍ਖਮੋ;

ਅਕਾਲੇਨ ਹਿ ਨਿਕ੍ਖਮ੍ਮ, ਏਕਕਮ੍ਪਿ ਬਹੁਜ੍ਜਨੋ;

ਨ ਕਿਞ੍ਚਿ ਅਤ੍ਥਂ ਜੋਤੇਤਿ, ਧਙ੍ਕਸੇਨਾਵ ਕੋਸਿਯਂ.

੧੫੨. ਧੀਰੋ ਚ ਵਿਧਿਵਿਧਾਨਞ੍ਞੂ, ਪਰੇਸਂ ਵਿਵਰਾਨੁਗੂ;

ਸਬ੍ਬਾਮਿਤ੍ਤੇ ਵਸੀਕਤ੍ਵਾ, ਕੋਸਿਯੋਵ ਸੁਖੀ ਸਿਯਾਤਿ.

ਕੋਸਿਯਜਾਤਕਂ ਛਟ੍ਠਂ.

੨੨੭. ਗੂਥਪਾਣਜਾਤਕਂ (੨-੮-੭)

੧੫੩. ਸੂਰੋ ਸੂਰੇਨ ਸਙ੍ਗਮ੍ਮ, ਵਿਕ੍ਕਨ੍ਤੇਨ ਪਹਾਰਿਨਾ;

ਏਹਿ ਨਾਗ ਨਿਵਤ੍ਤਸ੍ਸੁ, ਕਿਂ ਨੁ ਭੀਤੋ ਪਲਾਯਸਿ;

ਪਸ੍ਸਨ੍ਤੁ ਅਙ੍ਗਮਗਧਾ, ਮਮ ਤੁਯ੍ਹਞ੍ਚ ਵਿਕ੍ਕਮਂ.

੧੫੪. ਨ ਤਂ ਪਾਦਾ ਵਧਿਸ੍ਸਾਮਿ, ਨ ਦਨ੍ਤੇਹਿ ਨ ਸੋਣ੍ਡਿਯਾ;

ਮੀਲ਼੍ਹੇਨ ਤਂ ਵਧਿਸ੍ਸਾਮਿ, ਪੂਤਿ ਹਞ੍ਞਤੁ ਪੂਤਿਨਾਤਿ.

ਗੂਥਪਾਣਜਾਤਕਂ ਸਤ੍ਤਮਂ.

੨੨੮. ਕਾਮਨੀਤਜਾਤਕਂ (੨-੮-੮)

੧੫੫. ਤਯੋ ਗਿਰਿਂ ਅਨ੍ਤਰਂ ਕਾਮਯਾਮਿ, ਪਞ੍ਚਾਲਾ ਕੁਰੁਯੋ ਕੇਕਕੇ ਚ [ਕੁਰਯੋ ਕੇਕਯੇ ਚ (ਸੀ.)];

ਤਤੁਤ੍ਤਰਿਂ [ਤਦੁਤ੍ਤਰਿਂ (ਕ.)] ਬ੍ਰਾਹ੍ਮਣ ਕਾਮਯਾਮਿ, ਤਿਕਿਚ੍ਛ ਮਂ ਬ੍ਰਾਹ੍ਮਣ ਕਾਮਨੀਤਂ.

੧੫੬. ਕਣ੍ਹਾਹਿਦਟ੍ਠਸ੍ਸ ਕਰੋਨ੍ਤਿ ਹੇਕੇ, ਅਮਨੁਸ੍ਸਪਵਿਟ੍ਠਸ੍ਸ [ਅਮਨੁਸ੍ਸਵਦ੍ਧਸ੍ਸ (ਸੀ. ਪੀ.), ਅਮਨੁਸ੍ਸਵਿਟ੍ਠਸ੍ਸ (ਸ੍ਯਾ.)] ਕਰੋਨ੍ਤਿ ਪਣ੍ਡਿਤਾ;

ਨ ਕਾਮਨੀਤਸ੍ਸ ਕਰੋਤਿ ਕੋਚਿ, ਓਕ੍ਕਨ੍ਤਸੁਕ੍ਕਸ੍ਸ ਹਿ ਕਾ ਤਿਕਿਚ੍ਛਾਤਿ.

ਕਾਮਨੀਤਜਾਤਕਂ ਅਟ੍ਠਮਂ.

੨੨੯. ਪਲਾਯਿਤਜਾਤਕਂ (੨-੮-੯)

੧੫੭. ਗਜਗ੍ਗਮੇਘੇਹਿ ਹਯਗ੍ਗਮਾਲਿਭਿ, ਰਥੂਮਿਜਾਤੇਹਿ ਸਰਾਭਿਵਸ੍ਸੇਭਿ [ਸਰਾਭਿਵਸ੍ਸਭਿ (ਸ੍ਯਾ. ਸੀ. ਅਟ੍ਠ.), ਸਰਾਭਿਵਸ੍ਸਿਭਿ (?)];

ਥਰੁਗ੍ਗਹਾਵਟ੍ਟ [ਧਨੁਗ੍ਗਹਾਵਟ੍ਟ (ਕ.)] ਦਲ਼੍ਹਪ੍ਪਹਾਰਿਭਿ, ਪਰਿਵਾਰਿਤਾ ਤਕ੍ਕਸਿਲਾ ਸਮਨ੍ਤਤੋ.

੧੫੮. [ਅਭਿਧਾਵਥਾ ਚ ਪਤਥਾ ਚ, ਵਿਵਿਧਵਿਨਦਿਤਾ ਚ ਦਨ੍ਤਿਭਿ; ਵਤ੍ਤਤਜ੍ਜ ਤੁਮੁਲੋ ਘੋਸੋ, ਯਥਾ ਵਿਜ੍ਜੁਤਾ ਜਲਧਰਸ੍ਸ ਗਜ੍ਜਤੋਤਿ; (ਸੀ. ਪੀ. ਕ.)] ਅਭਿਧਾਵਥ ਚੂਪਧਾਵਥ ਚ [ਅਭਿਧਾਵਥਾ ਚੁਪ੍ਪਤਥਾ ਚ (ਸ੍ਯਾ.)], ਵਿਵਿਧਾ ਵਿਨਾਦਿਤਾ [ਵਿਨਾਦਿਤਤ੍ਥ (ਕ.)] ਵਦਨ੍ਤਿਭਿ;

ਵਤ੍ਤਤਜ੍ਜ ਤੁਮੁਲੋ ਘੋਸੋ ਯਥਾ, ਵਿਜ੍ਜੁਲਤਾ ਜਲਧਰਸ੍ਸ ਗਜ੍ਜਤੋਤਿ [ਅਭਿਧਾਵਥਾ ਚ ਪਤਥਾ ਚ, ਵਿਵਿਧਵਿਨਦਿਤਾ ਚ ਦਨ੍ਤਿਭਿ; ਵਤ੍ਤਤਜ੍ਜ ਤੁਮੁਲੋ ਘੋਸੋ, ਯਥਾ ਵਿਜ੍ਜੁਤਾ ਜਲਧਰਸ੍ਸ ਗਜ੍ਜਤੋਤਿ; (ਸੀ. ਪੀ. ਕ.)].

ਪਲਾਯਿਤਜਾਤਕਂ ਨਵਮਂ.

੨੩੦. ਦੁਤਿਯਪਲਾਯਿਤਜਾਤਕਂ (੨-੮-੧੦)

੧੫੯. ਧਜਮਪਰਿਮਿਤਂ ਅਨਨ੍ਤਪਾਰਂ, ਦੁਪ੍ਪਸਹਂਧਙ੍ਕੇਹਿ ਸਾਗਰਂਵ [ਸਾਗਰਮਿਵ (ਸੀ. ਸ੍ਯਾ. ਪੀ.)];

ਗਿਰਿਮਿਵਅਨਿਲੇਨ ਦੁਪ੍ਪਸਯ੍ਹੋ [ਦੁਪ੍ਪਸਹੋ (ਸੀ. ਪੀ. ਕ.)], ਦੁਪ੍ਪਸਹੋ ਅਹਮਜ੍ਜਤਾਦਿਸੇਨ.

੧੬੦. ਮਾ ਬਾਲਿਯਂ ਵਿਲਪਿ [ਵਿਪ੍ਪਲਪਿ (ਬਹੂਸੁ)] ਨ ਹਿਸ੍ਸ ਤਾਦਿਸਂ, ਵਿਡਯ੍ਹਸੇ [ਵਿਲ਼ਯ੍ਹਸੇ (ਸੀ. ਪੀ.)] ਨ ਹਿ ਲਭਸੇ ਨਿਸੇਧਕਂ;

ਆਸਜ੍ਜਸਿ ਗਜਮਿਵ ਏਕਚਾਰਿਨਂ, ਯੋ ਤਂ ਪਦਾ ਨਲ਼ਮਿਵ ਪੋਥਯਿਸ੍ਸਤੀਤਿ.

ਦੁਤਿਯਪਲਾਯਿਤਜਾਤਕਂ ਦਸਮਂ.

ਕਾਸਾਵਵਗ੍ਗੋ ਅਟ੍ਠਮੋ.

ਤਸ੍ਸੁਦ੍ਦਾਨਂ –

ਵਰਵਤ੍ਥਵਚੋ ਦੁਮਖੀਣਫਲਂ, ਚਤੁਰੋਧਮ੍ਮਵਰਂ ਪੁਰਿਸੁਤ੍ਤਮ;

ਧਙ੍ਕਮਗਧਾ ਚ ਤਯੋਗਿਰਿਨਾਮ, ਗਜਗ੍ਗਵਰੋ ਧਜਵਰੇਨ ਦਸਾਤਿ.